Chapter 19

śrīpuruṣottama uvāca |
śṛṇu nārāyaṇīśri tvaṃ tato'haṃ puruṣottamaḥ |
puṇyaṃ bhaktiṃ tapo dṛṣṭvā bhaktayormanukālajam || 1 ||
[Analyze grammar]

yoginoḥ pātrayormamānugrahasya ca divyayoḥ |
īśvarībhūtayorhārdaṃ pūrayituṃ purā'rthitam || 2 ||
[Analyze grammar]

bhūloke mānavā ye ye narā nāryo napuṃsakāḥ |
bālā vṛddhā yuvānaśca vidhurā gṛhiṇastathā || 3 ||
[Analyze grammar]

tyāgino vanavāsāśca tān sarvān vai samantataḥ |
yugapad divyadehāśca kṛtvā vimānasaṃsthitān || 4 ||
[Analyze grammar]

kāṃścidapreṣayaṃ śvetadvīpaṃ kāṃścit kṣīrodaghim |
kāṃścit svargaṃ ca vividhaṃ kāṃścijjanaṃ mahastapaḥ || 5 ||
[Analyze grammar]

kāṃścidvai satyalokaṃ ca kāṃścid vaikuṇṭhamāvṛtau |
kāṃścid vairājalokāṃśca kāṃścid vaiṣṇavasatpadam || 6 ||
[Analyze grammar]

kāṃścittu nityakailāsaṃ kāṃścidavyākṛtaṃ padam |
amṛtaṃ dhāma kāṃścicca kāṃścid vaikuṇṭhamuttamam || 7 ||
[Analyze grammar]

kāṃścid golokamevā'pi kāṃścidakṣaramuttamam |
kāṃściddhāmānyanekāni yeṣāṃ yogyāni yāni ca || 8 ||
[Analyze grammar]

tāni tān prāpayāmāsa cāhaṃ śrīpuruṣottamaḥ |
atha ye paśavaścāpi pakṣiṇaśca mṛgādayaḥ || 9 ||
[Analyze grammar]

sarīsṛpādayaścāpi mānavādhārajīvanāḥ |
mānavāpekṣakāḥ sarve grāmāraṇyanivāsinaḥ || 10 ||
[Analyze grammar]

divyadehāḥ kṛtāstūrṇaṃ dvibhujā devakoṭayaḥ |
tān sarvānapi divyeṣu vimāneṣu nidhāya ca || 11 ||
[Analyze grammar]

svargaṃ janaṃ mahaḥ satyaṃ sauryaṃ cāndraṃ ca vāruṇam |
āgneyaṃ tāpasaṃ cārṣaṃ vairājaṃ dhāma ityapi || 12 ||
[Analyze grammar]

apreṣayaṃ yathāyogyān jīvān bhaktecchayā tvaham |
dagdhvā janyāni karmāṇi bhūsthān jīvānamocayam || 13 ||
[Analyze grammar]

aprāpayaṃ divyalokān yathāpekṣamanugrahāt |
lakṣmi kṛpā mayā ceyaṃ kṛtā bhaktānusāriṇī || 14 ||
[Analyze grammar]

bhūlokaḥ prāyaśaḥ śreyolokeṣu preṣito'bhavat |
pṛthvī riktā ca sañjātā vinā mānavarūpakaiḥ || 15 ||
[Analyze grammar]

tathā tadyogayuktānāṃ paśvādīnāṃ ca rūpakaiḥ |
riktā jātā mahī sarvā bhaktayostapaso balāt || 16 ||
[Analyze grammar]

puraiva mocitā jīvā abhīdānapradānakaiḥ |
mama bhaktena vipreṇa puṇyarātena yoginā || 17 ||
[Analyze grammar]

madbhaktānyā tathā rādhanikayā dvijayoṣitā |
sarvasṛṣṭau kṛpāluścā'haṃ tadā khyātimāpa ha || 18 ||
[Analyze grammar]

anādiśrīkṛṣṇanārāyaṇaḥ śrīpuruṣottamaḥ |
bhaktādhīnaḥ prabhūtvaivā'karavaṃ śreya uttamam || 19 ||
[Analyze grammar]

tato'bhavaṃ hyanādiśrīkṛpā nārāyaṇaḥ prabhuḥ |
śṛṇu lakṣmi tato bhaktaṃ puṇyarātaṃ tathā satīm || 20 ||
[Analyze grammar]

rādhanikāṃ divyadehau kṛtvā viṣṇusvarūpiṇau |
vimāne sve sthāpayitvā'preṣayaṃ tau nijā'kṣaram || 21 ||
[Analyze grammar]

atha brahmādayo devā bhūtalaṃ vīkṣya nirjanam |
prārthayāmāsuratyarthaṃ punarmānavasṛṣṭaye || 22 ||
[Analyze grammar]

paśvādīnāṃ ca sṛṣṭyarthaṃ sthātuṃ cākalpameva mām |
tato'haṃ bhūtale loke nyavasaṃ divyarūpavān || 23 ||
[Analyze grammar]

tvayā divyasvarūpiṇyā lakṣmyā sākaṃ pumuttamaḥ |
punaḥ sṛṣṭimakaravaṃ yathāpūrvāṃ tu mānasīm || 24 ||
[Analyze grammar]

mānavānāṃ paśūnāṃ ca pakṣiṇāṃ sarvadehinām |
icchayā vedhasaścāpi nyavasaṃ kalpakāntakam || 25 ||
[Analyze grammar]

evaṃ muktiḥ kṛtā cāpi punaḥ sṛṣṭiḥ kṛtā'pi ca |
smara sarvaṃ śivarājñi pare jānanti naiva tat || 26 ||
[Analyze grammar]

avatārā hyasaṃkhyātā jātā me kāryato'pi ca |
vatsare tatra kalpeṣu vedmi sarvānahaṃ priye || 27 ||
[Analyze grammar]

kṛpāvatīramā tvaṃ ca tadā'bhavo mayā saha |
ityevaṃ kathitaṃ lakṣmi prākaṭyaṃ mama vai tadā || 28 ||
[Analyze grammar]

athā'nyavatsare cāpi kathayāmi nibodha me |
brahmaṇo vai rudravatsarākhye dviśatakalpake || 29 ||
[Analyze grammar]

babhūva cāraṇo bhakto rakṣālayā'bhidhānakaḥ |
cāraṇī tasya bhāryā ca nāmnā tu santayoginī || 30 ||
[Analyze grammar]

yogabhraṣṭau pūrvabhaktau jātismarau babhūvatuḥ |
bhajamānau ca māṃ bhaktyā nārāyaṇaṃ pareśvaram || 31 ||
[Analyze grammar]

snānabhaktiparau sādhusādhvīsevāparāyaṇau |
nivasataḥ sma mahiṣīgovraje drumasaṃkule || 32 ||
[Analyze grammar]

pallyāṃ kharvaṭanikaṭe tṛṇaghāsādiśobhane |
antarīkṣaprakāśe vai kāmakalpānadītaṭe || 33 ||
[Analyze grammar]

cārayataḥ paśūnnityaṃ dadhighṛtādijīvanau |
ūrṇavastrau hare kṛṣṇa nārāyaṇeti saṃsmarau || 34 ||
[Analyze grammar]

anivedya ca me sthālīṃ polikādadhipūritām |
prātarnaiva na madhyāhne bhuñjāte na tathā niśi || 35 ||
[Analyze grammar]

jalaṃ patraṃ phalaṃ puṣpaṃ vanyadrumebhya eva ca |
āhṛtya sundaraṃ śreṣṭhaṃ hṛdyaṃ cārpayato mama || 36 ||
[Analyze grammar]

sādhavo'tithayaścāpyāyānti ye tu nijoṭajām |
tebhyo'rpayato dugdhānnaṃ ghṛtaṃ dadhi ca polikāḥ || 37 ||
[Analyze grammar]

santastṛptāḥ prakurvanti nāma saṃkīrtanaṃ hareḥ |
divāniśaṃ ca vā yānti yatheṣṭaṃ vā vasantyapi || 38 ||
[Analyze grammar]

sādhvyaścāpi samāyānti yoginyaḥ satyadevatāḥ |
brahmacāriṇya evā'pi prasiddhaṃ cāraṇālayam || 39 ||
[Analyze grammar]

devālayo yathā tadvad pallī sā govrajātmikā |
satīsādhvīsatāṃ vāsād devālayasamā'bhavat || 40 ||
[Analyze grammar]

yatra madbhajanaṃ nityaṃ yatra matpūjanaṃ sadā |
yatra matkīrtanaṃ nityaṃ tatra devālayo mama || 41 ||
[Analyze grammar]

ityahaṃ cā'gocaro'pi nyavasaṃ tatra padmaje |
bhaktānāṃ hṛdaye nityaṃ gṛhe cāpi ca maṇḍale || 42 ||
[Analyze grammar]

tīrthe cāpi vasāmyeva bhaktakalyāṇahetave |
bhuñje svapimi nṛtyāmi pibāmi ca rame'nvaham || 43 ||
[Analyze grammar]

viharāmi vihasāmi sahayāmi viśāmi ca |
yatte vadāmi gāyāmi prasīdāmi bhajāmi ca || 44 ||
[Analyze grammar]

snāmi śaucāmi saṃkurve cintayāmi ca raumyapi |
bhaktaiḥ saha militvaivā''carāmi vividhāṃ kriyām || 45 ||
[Analyze grammar]

līlāṃ mokṣakarīṃ sarvā divyāmānandayāmyapi |
rāsabhāvena gopaiśca gopībhiśca bhrame'pi ca || 46 ||
[Analyze grammar]

madbhaktānāṃ nivāseṣu tathā vasāmi sarvadā |
evaṃ cāraṇavāse'haṃ nyavasaṃ bhaktamaṇḍale || 47 ||
[Analyze grammar]

sarvathā sarvadā'dṛśyo na jānanti yathā hi te |
tathā'vasaṃ tayoḥ kuṭyāṃ govraje mūrtirūpavān || 48 ||
[Analyze grammar]

athaikadā'bhavat kāmakalpānadyāstaṭe śubhaḥ |
sādhūnāṃ vai samājaśca mahotsavo'nnasatrakaḥ || 49 ||
[Analyze grammar]

tatra yātāścāraṇāśca sādhavo'pi samutsave |
annasatramaye yajñe bhojayituṃ janānapi || 50 ||
[Analyze grammar]

annadānaṃ dugdhadānaṃ vastradānaṃ ghṛtārpaṇam |
kriyate ca yathāśakti bhikṣukebhyo nadītaṭe || 51 ||
[Analyze grammar]

dānotsava itikhyātiḥ satrasyā'sya tato'bhavam |
tatra sarve cāraṇā vai gatāścātha tu cāraṇī || 52 ||
[Analyze grammar]

ekākinī gṛharakṣākṛte gehe sthitā'bhavat |
vatsānāṃ pālanādyarthaṃ gṛhakāryārthamityapi || 53 ||
[Analyze grammar]

atha devāḥ samāyānti vyomamārgāt tadā bhuvi |
dānasthale mahātīrthe mahāścaryaparāstadā || 54 ||
[Analyze grammar]

viprāśca bhikṣukā bhūtvā bhūtvā sādhusvarūpiṇaḥ |
kiṃciddānaṃ svīkurvanti kāmakalpaphalapradam || 55 ||
[Analyze grammar]

dāturgrahitustulyaṃ vai jāyate tatra tatphalam |
ataḥ puṇyapralobhena devā gṛhṇanti dānakam || 56 ||
[Analyze grammar]

vaicitryaṃ dānasatre'trobhayataḥ phaladaṃ yataḥ |
athā'mbarāttadā devo vaimāniko'lpapuṇyavān || 57 ||
[Analyze grammar]

niryayau vyomamārgeṇa pallīṃ paśyan nadīṃ prati |
tena mohadṛśā dṛṣṭā surūpā cāraṇī satī || 58 ||
[Analyze grammar]

ujjvalā puṣṭadehā ca yuvatī svalpavastrikā |
nirjane prabhayā vyāptā sughaṭṭāṃgasuśobhanā || 59 ||
[Analyze grammar]

miṣṭasvaraṃ samuddhāṭya kīrtane magnamānasā |
snānārdrasarvadehā ca siñcamānā jalaṃ tanau || 60 ||
[Analyze grammar]

svarṇacampakavarṇābhā ratimūrtirivā'parā |
evaṃ vilokya mugdho'sau vaimāniko hi nirjane || 61 ||
[Analyze grammar]

cakame tāṃ satīṃ devīmavātarat tadantikam |
bhūtvā devo'pi ca yuvā surūpaścāraṇottamaḥ || 62 ||
[Analyze grammar]

sarvābharaṇasaṃśobhaḥ puṣṭaśca navayauvanaḥ |
kāmamūrtiriva tatra śobhate tejasā hyati || 63 ||
[Analyze grammar]

āyayau sannidhau tasyā hasan spraṣṭuṃ yatheṣṭakam |
sā'pi bhaktā navaṃ dṛṣṭvā janaṃ tūrṇaṃ sakāmukam || 64 ||
[Analyze grammar]

śīghramutthāya kuṭyāṃ sā yayau śīlāvanāya vai |
māṃ deva mā prapaśya tvaṃ kudṛṣṭyā śīlaśālinīm || 65 ||
[Analyze grammar]

pūjayāmi namaskurve prayāhi yāhi śaktimān |
pradharṣaṇamakāmāyā nikṛṣṭaphaladaṃ yataḥ || 66 ||
[Analyze grammar]

mānyāḥ pūjyāḥ sadā devāḥ svalpe tāḍyā na vai mayā |
yāhi satraṃ sukhaṃ tyaktvā''śāṃ durantāṃ vimānavan || 67 ||
[Analyze grammar]

eṣa dugdhāñjaliṃ tubhyamarpayāmyarhaṇārthakam |
mama vākyaṃ susammānya prayāhi tvaṃ yathāgatam || 68 ||
[Analyze grammar]

sādho pativratāyāśca tapasvināṃ gavāṃ tathā |
anivāryo bhaved daṇḍo yamasya brahmacāriṇām || 69 ||
[Analyze grammar]

devo vā sārvabhaumo vā vipro vā ceśvaro'pi vā |
bhavet kupathago daṇḍyaḥ pathi tiṣṭhan prapūjyakaḥ || 70 ||
[Analyze grammar]

ityukto'pi satīṃ tāṃ cāraṇīṃ spraṣṭuṃ ca dharṣitum |
upāyayau sa śālāyāṃ khinnā satī jagāda tam || 71 ||
[Analyze grammar]

devo bhūtvā divyabhogān bhuktvāpi mānave tanau |
mohaṃ yāto bhavānatra bhasmasād bhava kāmuka || 72 ||
[Analyze grammar]

mā devāścādyataḥ pṛthvyāṃ samāyāntu vimānagāḥ |
ye'bhiyāsyanti bhūbhāge bhaviṣyanti hi bhasmasāt || 73 ||
[Analyze grammar]

ityuktamātra evā'sau bhasmasādabhavattadā |
dānasatre ca ye devāḥ pṛthivīsthāstadā'bhavan || 74 ||
[Analyze grammar]

te'pi tūrṇaṃ śāpamātrādabhavan bhasmasāt priye |
hāhākārastadā jātaścāraṇīśāpataḥ kṣitau || 75 ||
[Analyze grammar]

jñātvā devā divyabuddhyā kāraṇaṃ svavināśakam |
drutaṃ ca dudruvurvyomnā dānaṃ tyaktvā nijālayān || 76 ||
[Analyze grammar]

devāgamo'bhavad ruddho brahmaviṣṇumaheśvarāḥ |
indracandrādayaścāpi bhuvaṃ nā''yānti bhīvaśāḥ || 77 ||
[Analyze grammar]

devatā na samāyānti tīrthadevā yayurdivam |
pativratāyāḥ śāpena bhayamāptā divaṃ gatāḥ || 78 ||
[Analyze grammar]

atha ye mānavā loke pāpāste tīrthagāminaḥ |
pāpaṃ prakṣālayantyeva tīrtheṣu bhūmigeṣu vai || 79 ||
[Analyze grammar]

tāni pāpāni tīrthānāṃ dagdhuṃ nāyānti devatāḥ |
kuṃbhe parvaṇi saṃkrāntau cāvabhṛthe'pi bhīvaśāḥ || 80 ||
[Analyze grammar]

atha tīrthāni sarvāṇi pāpākrāntāni pāpinām |
duḥkhitānyabhavaṃścā'pyārādhayāmāsuracyutam || 81 ||
[Analyze grammar]

satīśāpāt surā naivāyānti bhūmaṇḍalaṃ bhayāt |
asmannāśo bhavedevā'cireṇa pāpasaṃgrahāt || 82 ||
[Analyze grammar]

tasmādāgatya bhagavannuddhāraṃ kuru no bhuvi |
parabrahma svayaṃ cā'haṃ devānāṃ stavanaistataḥ || 83 ||
[Analyze grammar]

anādiśrīkṛṣṇanārāyaṇo'haṃ bhuvamāgataḥ |
cāraṇīgṛhamāgatya tadaṅke putratāṃ gataḥ || 84 ||
[Analyze grammar]

tīrthairdevaiḥ pūjitaśca śaṃkhacakrādicihnavān |
tvaṃ tadā cābhavo ratnadhanākhyacāraṇātmajā || 85 ||
[Analyze grammar]

tena vijñāya cihnaistvaṃ ramā ratnanarāyaṇī |
ratnanārāyaṇīśrīstvamarpitā vidhinā ca me || 86 ||
[Analyze grammar]

anādiśrītīrthanārāyaṇo'haṃ parameśvaraḥ |
sarvatīrthaiścāraṇaiśca prakhyāpitaḥ pareśvaraḥ || 87 ||
[Analyze grammar]

tataḥ sākaṃ tvayā cā'haṃ pitṛbhyāṃ sahitastathā |
tīrthānyakaravaṃ sarvāṇyabhigatvā punaḥ punaḥ || 88 ||
[Analyze grammar]

aghānyadahaṃ teṣāṃ cā'karavaṃ śāpamokṣaṇam |
devānāmāgamārthaṃ vai pṛthvyāṃ mātṛnideśataḥ || 89 ||
[Analyze grammar]

tato devā āyayuśca śāpasaṃharaṇottaram |
athā'haṃ kalpaparyantaṃ tīrthanārāyaṇo'bhavam || 90 ||
[Analyze grammar]

nyavasaṃ dharmamāsthāya nītvā ca pitarau saha |
bhaktānnītvā nijaṃ dhāma tato yayau purātanam || 91 ||
[Analyze grammar]

ityetanmama bhūbhāge cāraṇīśāpanuttaye |
prākaṭyaṃ yatpurā jātaṃ kathitaṃ kamale ca te || 92 ||
[Analyze grammar]

jānāmyahaṃ ca tatsarvaṃ nānye jānanti vismarāḥ |
smara tvaṃ cāraṇīṃ jātāṃ ratnanārāyaṇīṃ priye || 93 ||
[Analyze grammar]

anye tadā'vatārā me pṛthvyāṃ jātā anekaśaḥ |
sākaṃ tvayā śivarājñi tān jānāmi samastakān || 94 ||
[Analyze grammar]

tato mayā kṛtā loka cāraṇā devajātayaḥ |
yathā santastathā sarve yathā viprāśca bhūsurāḥ || 95 ||
[Analyze grammar]

paṭhanācchravaṇāccā'sya śrāvaṇāt smaraṇāttathā |
mananānmama prākaṭyasyāpi syānmokṣabhāg janaḥ || 96 ||
[Analyze grammar]

dhanavān dharmavān syācca putravān sarvaśaktimān |
nārī saubhāgyasaukhyādyaiśvaryavatī bhavedapi || 97 ||
[Analyze grammar]

iti śrīlakṣmīnārāyaṇīyasaṃhitāyāṃ tṛtīye dvāparasantāne vedhaso dvāviṃśe vatsare tīrthapāvanārthaṃ cāraṇyā aṃke'nāditīrthanārāyaṇasya prākaṭyamityādinirūpaṇanāmā |
navādhikadaśamo'dhyāyaḥ || 19 ||
[Analyze grammar]