Chapter 18

śrīpuruṣottama uvāca |
śṛṇu nārāyaṇīśri tvaṃ satkathāṃ paramāṃ mama |
ekaviṃśe vedhaso vai vatsare vedavatsare || 1 ||
[Analyze grammar]

kalpe'śītitame cāpi manau dvādaśake purā |
abhūd bhaktaḥ puṇyarāto dvijo bhaktiparāyaṇaḥ || 2 ||
[Analyze grammar]

patnī tasya rādhanikānāmnī cābhūt pativratā |
dampatī cakraturnityaṃ snānaṃ dhyānaṃ mamā'rhaṇam || 3 ||
[Analyze grammar]

bhajanaṃ cakratuścāpi japayajñaṃ ca saṃghaśaḥ |
akhaṇḍanāmadhunyaṃ ca pracakratuḥ kvacitkvacit || 4 ||
[Analyze grammar]

lakṣatulasikāpatraiḥ pūjanaṃ cakratuśca me |
kārtike ca madarthaṃ vai vratānyudyāpanāni ca || 5 ||
[Analyze grammar]

navānnānāṃ sumiṣṭānāṃ naivedyāni pracakratuḥ |
māghe vāsantikaṃ cāpyutsavaṃ pracakratustathā || 6 ||
[Analyze grammar]

puṣpadolotsavaṃ cāpi vaiśākhasya vratāni ca |
cāturmāsye niyamāṃśca bhaktiyuktān pracakratuḥ || 7 ||
[Analyze grammar]

nityaṃ pracakratuḥ sādhusādhvīsevāṃ samutsukau |
tābhyāṃ sādhumukhādākarṇitaṃ kathāprasaṃgataḥ || 8 ||
[Analyze grammar]

annadānātparaṃ dānaṃ vastradānaṃ prakīrtyate |
vastradānāt paraṃ dānaṃ dhanadānaṃ prakīrtyate || 9 ||
[Analyze grammar]

dhanadānātparaṃ dānaṃ godānaṃ samprakīrtyate |
godānācca paraṃ dānaṃ kanyādānaṃ prakīrtyate || 10 ||
[Analyze grammar]

kanyādānāt paraṃ dānaṃ putradānaṃ suvaṃśakṛt |
putradānāt paraṃ dānaṃ kṣetradānaṃ prakīrtyate || 11 ||
[Analyze grammar]

kṣetradānātparaṃ dānamārogyasya pradānakam |
ārogyadānataḥ śreṣṭhaṃ savṛttigṛhadānakam || 12 ||
[Analyze grammar]

savṛttigṛhadānācca puṇyadānaṃ paraṃ matam |
puṇyadānāddharmakarmapradānaṃ paramaṃ matam || 13 ||
[Analyze grammar]

dharmakarmapradānācca jñānadānaṃ sadā'dhikam |
jñānadānād bhaktidānaṃ sarvebhyaścātiricyate || 14 ||
[Analyze grammar]

bhaktidānāt svargadānaṃ śāśvatānandadāyakam |
śreṣṭhaṃ bhaktiyutaṃ cettat tato'bhayapradānakam || 15 ||
[Analyze grammar]

sarvadānāni ramyāṇi paralokapradāni ca |
brahmāṇḍadānatulyāni yāni yāni ca santi vai || 16 ||
[Analyze grammar]

jīvā'bhayapradānasya nā'rhanti ṣoḍaśīṃ kalām |
abhayaṃ kālato māyātaścāpi karmatastathā || 17 ||
[Analyze grammar]

pāpato yamadūtāśca kuhṛdbhyaḥ śatrutastathā |
vāsanātaśca bandhebhyo muktiścābhayadānakam || 18 ||
[Analyze grammar]

apunarāvṛttirūpā muktiryā sā'dhikā tataḥ |
sālokyā tatra vai śreṣṭhā sārṣṭyākhyā'to garīyasī || 19 ||
[Analyze grammar]

sārūpyākhyā tataḥ śreṣṭhatarā proktā sukhānvitā |
sāmīpyākhyā sarvaśreṣṭhatamā tato'pi vai tadā || 20 ||
[Analyze grammar]

sāyujyākhyā cātiśreṣṭhatamā yatparamā na vai |
vidyate'nyā'bhayadānātmikā mūrddhanyaśālinī || 21 ||
[Analyze grammar]

tasmāt sarvapradānebhyo'bhayadānaṃ viśiṣyate |
anyairvai pūrvakāle yad yādṛśaṃ nā'rpitaṃ kṛtam || 22 ||
[Analyze grammar]

tādṛśaṃ dānamevā'tra dātavyaṃ cābhayātmakam |
ityevaṃ ca satāṃ vaktrāchrutvā kathāmṛtaṃ tataḥ || 23 ||
[Analyze grammar]

puṇyarātastathā patnī vicāraṃ cakraturmuhuḥ |
dānaṃ dadatyatra loke dhanāḍhyāśca dhanādikam || 24 ||
[Analyze grammar]

āvābhyāṃ tu pradātavyaṃ pūrvaṃ kaiścinna yat kṛtam |
yādṛśaṃ na pradattaṃ ca tādṛśaṃ deyameva nau || 25 ||
[Analyze grammar]

athaivaṃ tau saṃvicārya kuruto bhaktidānakam |
jñānaṃ bhaktiṃ dadataśca kurutaśca svayaṃ sadā || 26 ||
[Analyze grammar]

evaṃ yāteṣu māseṣu varṣeṣvapi ca vai tataḥ |
prāṇāyāmaparau jātau yogakriyāparāyaṇau || 27 ||
[Analyze grammar]

prāṇarodhasamarthau ca samādhisthitivartinau |
tāpasau brahmaparamau tyaktadehasukhau tataḥ || 28 ||
[Analyze grammar]

videhau jīvanamuktau māyāsaṃgavivarjitau |
kṣapitabandhakarmāṇau dagdhaiṣaṇau ca yoginau || 29 ||
[Analyze grammar]

anyeṣāmabhayadānadharmamātraparāyaṇau |
vicārayantau satataṃ kathaṃ mokṣāśca dehinām || 30 ||
[Analyze grammar]

ātyantiko bhaveccātra kartavyaṃ dānameva tat |
abhīdānasamaṃ dānaṃ nānyad bhavati vai tataḥ || 31 ||
[Analyze grammar]

dātavyaṃ cābhayadānaṃ sarvajīvebhya eva ha |
ekaikasmai mokṣadānaṃ copadeśād bhavediha |
mantradānaiḥ śatānāṃ ca sahasrāṇāṃ bhavediha || 32 ||
[Analyze grammar]

yatnaśca bahulastatra sādhanasyā'valambinoḥ |
āvayorvai bhavedeva tasmāt sādhye svayaṃ harau || 33 ||
[Analyze grammar]

yatnaḥ samyaga vidhātavyaḥ prāpaṇīyaḥ pareśvaraḥ |
bhūlokasthamanuṣyāṇāṃ tatsambandhavatāṃ tathā || 34 ||
[Analyze grammar]

tiraścāmapi mokṣaḥ syādevamarthyaḥ pareśvaraḥ |
yuge vā yugadaśake manau vā'nyamanau sthite || 35 ||
[Analyze grammar]

pratyakṣaḥ śrīhariścāyād dadyānmuktiṃ ca śāśvatīm |
sarvebhyo mānavebhyaśca yathā yatnastathā'tra vai || 36 ||
[Analyze grammar]

dehenā'nena kartavyo mahān svalpastu naiva ha |
ityāniścitya kamale tāvubhau bhaktisaṃyutau || 37 ||
[Analyze grammar]

mama mūrteḥ samīpasthau jagrahaturvrata dṛḍham |
adyā''rabhya japayajñaḥ kartavyaḥ śrīhareḥ śubhaḥ || 38 ||
[Analyze grammar]

rātriṃdivaṃ vyomavāsaṃ kṛtvā bhuktvaikakālikam |
phalaṃ caikavidhaṃ vāri pātavyaṃ caikavārakam || 39 ||
[Analyze grammar]

yāvaddharirmilennaiva kartavyaṃ tāvadeva hi |
śīlaṃ vrataṃ sadā rakṣyaṃ vane vastavyameva ca || 40 ||
[Analyze grammar]

ityevaṃ vrataniyamaṃ gṛhītvā dampatī hi tau |
yugādidinamārabhya cakratustapa uttamam || 41 ||
[Analyze grammar]

dehasya dhāraṇe śaktau yatheṣṭaṃ tyajane'pi ca |
kālasya rodhane śaktau mṛtyuñjayau babhūvatuḥ || 42 ||
[Analyze grammar]

aniśaṃ māṃ bhajamānau nārāyaṇaparāyaṇau |
babhūvatuḥ priyau me'pi mama bhaktiparāyaṇau || 43 ||
[Analyze grammar]

mayā tvadṛśyarūpaṃ ca tadrakṣārthaṃ sudarśanam |
sthāpitaṃ tadvane pārśve kālādibhayanuttaye || 44 ||
[Analyze grammar]

dāvānalo'tivṛṣṭiśca jhaṃjhāvāto'tiśītatā |
himavṛṣṭiśca vā krūraprāṇivighnādikaṃ sadā || 45 ||
[Analyze grammar]

nivāryate hi cakreṇa bhaktarakṣākareṇa me |
adhairyasaṃbhṛtordvayoryugacatuṣṭayam || 46 ||
[Analyze grammar]

vyatītaṃ ca tataścā'haṃ viprarūpo yayau puraḥ |
bhikṣāṃ dehīti madhyāhne'vocaṃ tayoḥ samīpataḥ || 47 ||
[Analyze grammar]

śīghramutthāya viprāya jalaṃ phalaṃ tathā''sanam |
pādyaṃ ca madhuparkaṃ ca namaskāraḥ kṣamāpanam || 48 ||
[Analyze grammar]

nārāyaṇaḥ prasanno'stu cetyuktvā'rpitameva me |
labdhvā mayoktau tau bhaktau śreyo vāmastu sarvadā || 49 ||
[Analyze grammar]

omityuktvā''haturmāṃ tau hi sarveṣāṃ dehināmiha |
śreyo yathā bhavet śreṣṭhamāśīrvādān pradehi nau || 50 ||
[Analyze grammar]

mayoktaṃ pāpino jīvā bhavanti vāsanāmayāḥ |
teṣāṃ śreyo bhaveccāpi tapoyogasamādhibhiḥ || 51 ||
[Analyze grammar]

bahukālānuṣṭhitaiśca nālpakālena vai khalu |
tāvāhaturhariścātra nau kadā vai miliṣyati || 52 ||
[Analyze grammar]

sarvamānavamokṣārthaṃ kadā sākṣānmiliṣyati |
sarvadehipramokṣārthaṃ kadā kṛṣṇo miliṣyati || 53 ||
[Analyze grammar]

mayā śrutvā tadoktaṃ vai vāṃ harirmilito'sti vai |
sarvamānavamokṣārthamardhamanvantare gate || 54 ||
[Analyze grammar]

miliṣyati hariḥ sākṣāttapobhaktivalādiha |
pūrṇe manvantare yāte tiraścāmapi muktaye || 55 ||
[Analyze grammar]

miliṣyati prabhuścātra yathābuddhi vadāmyaham |
ityāśrutya sīmavākyaṃ prahṛṣṭau tāvubhāvapi || 56 ||
[Analyze grammar]

pādayoḥ patitau me ca pupūjatuḥ punaḥ punaḥ |
nematuśca muhuḥ pādarajaḥ sma lihatastadā || 57 ||
[Analyze grammar]

ayaṃ nārāyaṇaśceti vijñāya tau samutsuko |
darśanaṃ nijarūpasya dehīti vadataḥ sma mām || 58 ||
[Analyze grammar]

ahaṃ tadā prasannaśca dadau divyaṃ svadarśanam |
śaṃkhacakragadāpadmadharaṃ prasannatānvitam || 59 ||
[Analyze grammar]

anekakoṭicandrabhānanaṃ cābharaṇānvitam |
pādasaṃvāhanaṃ cakratuśca vividhapūjanam || 60 ||
[Analyze grammar]

varārthaṃ kathitau tau ca prārthayāmāsatustadā |
mānavānāṃ kṣitisthānāṃ tatsambandhavatāṃ tathā || 61 ||
[Analyze grammar]

prāṇināṃ paramāṃ muktimicchāvo yugapat prabho |
varaṃ varāṇāṃ śreṣṭhaṃ taṃ sarvābhayapradānakam || 62 ||
[Analyze grammar]

dehi nātha kṛpāsindho prasanno bhava keśava |
itinārāyaṇīśri prārthayatāṃ tau varaṃ param || 63 ||
[Analyze grammar]

mayoktau bhavatormokṣakaraṇārthamahaṃ tviha |
samāyāto'smi tūrṇaṃ cāgacchatāṃ vai mayā saha || 64 ||
[Analyze grammar]

āvāhatuḥ prabho mokṣo nau te yogānna saṃśayaḥ |
jñāta eva ca jīvānāṃ mānavānāṃ tu mokṣaṇam || 65 ||
[Analyze grammar]

vinā''vāṃ na prayāsyāvo yatheṣṭaṃ kuru vatsale |
hariḥ prāha tathecchā'pi pūrṇā kālena vai kvacit || 66 ||
[Analyze grammar]

bhaviṣyati tapobhaktyā yāmi vāṃ kuśalaṃ bhavet |
ityuktvā'haṃ tirobhāvaṃ tūrṇaṃ jagāma padmaje || 67 ||
[Analyze grammar]

tau prasannau pūrṇakāmau vardhamānapraharṣaṇau |
cakraturmama bhaktiṃ ca smarantau viprarūpiṇam || 68 ||
[Analyze grammar]

nityaṃ navotsāhavantau catvāriṃśadyugāvadhim |
cakratuśca tapobhaktiṃ tadā'haṃ punarāyayau || 69 ||
[Analyze grammar]

śaṃkhacakragadāpadmadharaḥ śrībhagavān svayam |
tāpasau mama bhaktau tu śuṣkadehau jagāda ha || 70 ||
[Analyze grammar]

manuṣyān bhūsthitān sarvān nītvā yātaṃ mamā'kṣaram |
evaṃ phalaṃ tapaso vāṃ pradātuṃ samupāgataḥ || 71 ||
[Analyze grammar]

svīkurutaṃ tapaḥsiddhiṃ manuṣyāṇāṃ pramuktidām |
tatastau māṃ prapūjyaiva saṃsevya paramādarāt || 72 ||
[Analyze grammar]

āhaturbhagavannatra manuṣyāṇāṃ gṛhe gṛhe |
gāvo'śvāḥkariṇaścoṣṭrā ajāścāśvatarā mṛgāḥ || 73 ||
[Analyze grammar]

ūraṇāḥ śvāpadāścāpi siṃhāśca gavayādikāḥ |
ye ye vai paśavaḥ santi śukādyāḥ pakṣiṇaśca ye || 74 ||
[Analyze grammar]

sarīsṛpādyā ye cāpi ye manuṣyopayoginaḥ |
sarve te mānavaiḥ sākaṃ muktimīyustathā kuru || 75 ||
[Analyze grammar]

tān vihāya manuṣyāṇāṃ muktiṃ necchāva eva ha |
śrutvā'haṃ cā'vadaṃ tābhyāṃ cireṇaiva bhaviṣyati || 76 ||
[Analyze grammar]

tatastau harṣasampannau jātau kālāvadhiṃ gatau |
pūjāṃ prāpya tatastūrṇamahamadṛśyatāṃ yayau || 77 ||
[Analyze grammar]

atha bhaktau ca tau tadvat tapobhaktiparāyaṇau |
ajāyatāṃ mayi snigdhau jalānnarahitau tataḥ || 78 ||
[Analyze grammar]

tapaḥ pūrṇaṃ tayorjātaṃ bhaktiḥ pūrṇā'bhavat tadā |
tṛṇaśchannau mṛttikākhyau tapasā jātavigrahau || 79 ||
[Analyze grammar]

manvantare gate kāle madarthaṃ tau babhūvatuḥ |
dehināmupakārārthaṃ muktyarthaṃ paśudehinām || 80 ||
[Analyze grammar]

abhīdānapradānārthaṃ tyaktasaukhyau babhūvatuḥ |
mama yogapradānārthaṃ jīvānāṃ sarvathā hi tau || 81 ||
[Analyze grammar]

pāṣāṇamṛttikākalpau tapobhaktau babhūvatuḥ |
tato'haṃ sahasā tatra lakṣmyā ca pārṣadaiḥ saha || 82 ||
[Analyze grammar]

sarvapūjādisāmagrīyukto vai samupāyayau |
īśvarāścātha munayo devāśca ṛṣayo'pi ca || 83 ||
[Analyze grammar]

āyayuḥ sarvatīrthāni tatra sthale nu māṃ tadā |
dundubhayaśca devānāmavādyanta tadā'mbare || 84 ||
[Analyze grammar]

candanānāṃ suvṛṣṭiścā'mṛtavṛṣṭistadā'bhavat |
jayanādāśca bhūtānāmabhavanparito'bhitaḥ || 85 ||
[Analyze grammar]

vimānānyapyasaṃkhyānyāyātāni svargiṇāṃ tadā |
madicchayā ca muktānāṃ koṭayaḥ samupāgatāḥ || 86 ||
[Analyze grammar]

koṭikoṭivimānāni koṭikoṭīśvarāstathā |
koṭikoṭisurāścāpi koṭikoṭimaharṣayaḥ || 87 ||
[Analyze grammar]

ambaraṃ sarvathā vyāptamabhavan tadvimānakaiḥ |
anādiśrīkṛṣṇanārāṇo'haṃ puruṣottamaḥ || 88 ||
[Analyze grammar]

avatīrya vimānācca brahmahradajalaṃ sthale |
tayostapaso bhūmau vai mṛttikāyāṃ nikuñjake || 89 ||
[Analyze grammar]

añjalinā'kṣipaṃ tatra tāvad bhūmermahānalaḥ |
divyatejomayaḥ prāvirāsīt svargādhitaijasaḥ || 90 ||
[Analyze grammar]

tejomadhyaḥ tato jātā divyā tanurdvijasya ha |
śaṃkhacakragadāpadmadharā mūrtiḥ suśobhanā || 91 ||
[Analyze grammar]

ākṣaramuktasadṛśī tatpatnī ca tathāvidhā |
muktānikāsvarūpā cā'bhavat tatra ramādṛśī || 92 ||
[Analyze grammar]

ubhau mayā''bhāṣitau ca kṣemaṃ mokṣaṃ sukhaṃ prati |
āhatustau kṛpayaiva pāraṃ yātau tavā''śritau || 93 ||
[Analyze grammar]

muktiyogyau samanujaiḥ satatsambandhidehibhiḥ |
paśupakṣyādibhiḥ sākaṃ jātau cedabhidhāritau || 94 ||
[Analyze grammar]

tadā nārāyaṇakṛṣṇa parameśa parātpara |
muktiṃ dehi manuḥ kālo vyatīto vacanāttava || 95 ||
[Analyze grammar]

abhīpradānakaṃ dehi parameśvara mādhava |
vimānāni hyasaṃkhyāni samāyātāni yāni ca || 96 ||
[Analyze grammar]

namastebhyo bhavatā'tra sahitebhyo'pi koṭidhā |
namaḥ samastabhūtātman parameśa namo'stu te || 97 ||
[Analyze grammar]

akṣarādhipate cāntaryāmin bhaktārthapūraka |
kuru muktiṃ dehināṃ vai madarthitāṃ tu satvaram || 98 ||
[Analyze grammar]

kṣamā'parādhaṃ bhagavan manukālena vai mayā |
tapobhaktyā niruddhastvaṃ sarveṣāṃ mokṣahetave || 99 ||
[Analyze grammar]

aparādhaparārdhāni mayā kṛtāni keśava |
kṣāntvā dhāmāni sarvān vai dehino naya mādhava || 100 ||
[Analyze grammar]

yathāyogyāni dhāmāni naya svatantrako'si yat |
nā''graho bhagavanme'tra svarge satye tathā'kṣare || 101 ||
[Analyze grammar]

ityarthitaṃ mama sarvaṃ vidhehi parameśvara |
asaṃkhyā'bhayadānecchā pūritā svāminā tvayā || 102 ||
[Analyze grammar]

iti śrīlakṣmīnārāyaṇīyasaṃhitāyāṃ tṛtīye dvāparasantāne vedhasaścaikaviṃśe varṣe sarvabhūmidehimokṣārthaṃ tapasyato rādhanikāpuṇyarātaviprayormanvantarakāle gate vāñcchāpūraṇārthaṃ |
śrīpuruṣottamanārāyaṇasya sarveśvaradevādisahitasyasamāgamanamityādinirūpaṇanāmā'ṣṭādaśo'dhyāyaḥ || 18 ||
[Analyze grammar]