Chapter 10

śrīpuruṣottama uvāca |
tato vai śivasatyeśri kṛṣṇanārāyaṇi priye |
ahaṃ vimānamāruhyā'kṣaradhāmnaḥ samāgataḥ || 1 ||
[Analyze grammar]

devatānāṃ sabhāyāṃ vai devāḥ pupūjurutsukāḥ |
tathā nivedayāñcakruḥ sarve gaternirodhanam || 2 ||
[Analyze grammar]

tajjanyaṃ sumahatkaṣṭaṃ mānavā api tāpanam |
mayā tatkāraṇaṃ tatra sabhāyāṃ samudāhṛtam || 3 ||
[Analyze grammar]

rākṣasānāṃ balaṃ loke rātrau bhavati sarvadā |
bhūtapretapiśācānāṃ balaṃ rātrau bhavatyapi || 4 ||
[Analyze grammar]

te rātrau suptabhūtāni bhakṣayanti vaneṣu vai |
tatratyāḥ prāṇinastuṃgabhadrāsanāṃ tu yoginīm || 5 ||
[Analyze grammar]

ārthayan vai prarakṣārthaṃ sā tu lakṣmīṃ samārthayat |
lakṣmīnārāyaṇau tasyāḥ putrītve vartate'dhunā || 6 ||
[Analyze grammar]

tathā vai rakṣitāḥ sarve rakṣobhirdehinaḥ khalu |
tathāpi sarvakhaṇḍeṣu rākṣasāḥ santi bhūriśaḥ || 7 ||
[Analyze grammar]

lakṣmyāsteṣu gamane tu mātā bhavati caikalā |
putrī bhramati lokeṣu putryāḥ sukhaṃ na cāpyate || 8 ||
[Analyze grammar]

tasmād rātrirbhavennaiva tathā kāryaṃ vicārya sā |
grahacakraṃ svabalenā'rodhayat tuṃgabhadrikā || 9 ||
[Analyze grammar]

mama bhaktā mahāsādhvī yoginyaiśvaryaśevadhiḥ |
etadvai kāraṇaṃ gateḥ rodhasya vidyate param || 10 ||
[Analyze grammar]

tasmāttatraiva yāmo'tra yayā gatirnirodhitā |
ityevaṃ saṃvicāryaiva sadevo'haṃ narāyaṇi || 11 ||
[Analyze grammar]

āyayau yatra te mātā tuṃgabhadrāsanā'sti ca |
sā vimānāni saṃvīkṣya yogadṛṣṭyā mahāsatī || 12 ||
[Analyze grammar]

vanamadhye svāgatārthaṃ svargaṃ tvanyad vyadhāt hṛdā |
udyānāni vicitrāṇi kalpadrumānnijeṣṭadān || 13 ||
[Analyze grammar]

jalāmṛtānāṃ suhṛdān sarito jalasaṃbhṛtāḥ |
snānādiśreṣṭhaśālāśca prāsādān devayogyakān || 14 ||
[Analyze grammar]

svarṇakalaśaśobhāḍhyān dhavalān candrasannibhān |
yajñaśālāḥ pākaśālāḥ śayyāśālāḥ suśobhanāḥ || 15 ||
[Analyze grammar]

vihāraśālā yogyāśca strīśālā madhyaśālikāḥ |
veṣāṇāṃ sukapāṭāṃśca bhūṣaṇānāṃ ca peṭikāḥ || 16 ||
[Analyze grammar]

ratnānāṃ hīrakāṇāṃ ca suvarṇānāṃ sukośikāḥ |
ghṛtakulyā dadhikulyāḥ payaḥkulyāḥ susaṃbhṛtāḥ || 17 ||
[Analyze grammar]

amṛtānāṃ rasānāṃ ca miṣṭānnānāṃ mahānasān |
dolānāṃ darpaṇānāṃ ca bhogyānāṃ bhittikoṭarān || 18 ||
[Analyze grammar]

vāsanāṃ sunivāsānāṃ gṛhāṇi śobhanāni ca |
cakāra sā tathā vidyutpravāhāṇāṃ pradīpakān || 19 ||
[Analyze grammar]

pavanānāṃ nisargotthataraṃgān sā tadā'karot |
candanānāṃ supuṣpāṇāṃ hīrakāṇāṃ ca mālikāḥ || 20 ||
[Analyze grammar]

madhuparkādipātrāṇi dhṛtvā sthitāśca dāsikāḥ |
kanyakāḥ koṭisaṃkhyāśca pracakāra hi yoginī || 21 ||
[Analyze grammar]

vāditravādikāścāpi nṛtyakīrtanakārikāḥ |
dhvajadhartrīstathā kanyā dugdhakāñcanasannibhāḥ || 22 ||
[Analyze grammar]

saṃkalpenā'karotatra tuṃgabhadrāsanāṃ satī |
akṣayārthāni pātrāṇi kuṃkumā'kṣatapātrikāḥ || 23 ||
[Analyze grammar]

pādasaṃvāhanādyarthaṃ sā'karot kanyakā navāḥ |
svargānnyūnaṃ na yatrāste tādṛśaṃ nagaraṃ navam || 24 ||
[Analyze grammar]

svargākhyaṃ sā vyaracayannijaiśvaryabalena ha |
tūrṇaṃ sā svāgatārthaṃ ca gopurā'gre hyupasthitā || 25 ||
[Analyze grammar]

devāḥ sarve vibhūtīstā vīkṣyā''ścaryaṃ paraṃ gatāḥ |
tūrṇamākāśamārgādvai vayaṃ vane'vaterima || 26 ||
[Analyze grammar]

gopurāgre'saṃkhyakanyāstvājagmuḥ svāgatārthikāḥ |
sammānaṃ sarvadevānāṃ cakrire mālikā'rpaṇaiḥ || 27 ||
[Analyze grammar]

kuṃkumā'kṣatapuṣpādyairjayaghoṣaiḥ pracakrire |
ninyire sarvadevāṃśca vāsān yogyān yathākṛtān || 28 ||
[Analyze grammar]

dadustā madhuparkādi bhojyāmṛtasudhādikam |
jalapānaṃ sevanādi cakrurdehapramardanam || 29 ||
[Analyze grammar]

tṛptā devā vayaṃ sarve kanyābhistoṣitāḥ kṣaṇam |
svargaṃ svargaṃ cāparaṃ ca tadabhūnnyūnameva na || 30 ||
[Analyze grammar]

devā visasmarurnaijān bhogān kṣaṇaṃ tu mohitāḥ |
atha kṣaṇānte sādhvī sā tuṃgabhadrāsanā satī || 31 ||
[Analyze grammar]

devānāmāgame hetuṃ jijñāsitavatī hyabhūt |
sā ca tūrṇaṃ sabhāsaudhe samāgatya surān satī || 32 ||
[Analyze grammar]

āhūya nijabhāgyaṃ vai nyavedayat surāntike |
aho me pāvitaṃ sarvaṃ kulaṃ vanaṃ ca pāvitam || 33 ||
[Analyze grammar]

pāvitaṃ bhūtalaṃ caitadāśramo mama pāvitaḥ |
bhavadbhirbhagavadbhiśca samāgatya mama gṛham || 34 ||
[Analyze grammar]

svargamevā'paraṃ tvadya kṛtaṃ dhanyā'smi sarvathā |
yadgṛhe koṭipuṇyānāṃ puñjāḥ syurvai purā'rjitāḥ || 35 ||
[Analyze grammar]

tatra devāḥ samāyānti sākṣānnārāyaṇānvitāḥ |
upasthitā'smi sevāyāṃ cājñāyāṃ dyunivāsinām || 36 ||
[Analyze grammar]

eṣā dāsī bhavatāṃ vai varte vijñāpayantu mām |
ityuktvā pragatiṃ kṛtvā svarṇāsanasthitān surān || 37 ||
[Analyze grammar]

sūryaṃ candraṃ ca śukraṃ ca grahān saptarṣisattamān |
nakṣatrāṇi mahendraṃ ca guruṃ cāgastyamityapi || 38 ||
[Analyze grammar]

vīkṣya vīkṣya namaścakre kṛṣṇanārāyaṇaṃ muhuḥ |
māṃ pravīkṣya punarnetrāśrubhṛtā tatra sannidhau || 39 ||
[Analyze grammar]

cāyayau tūrṇamevā'pi patitā pādayoḥ satī |
arpitā'smītyuvācā'pi māṃ hariṃ puruṣottamam || 40 ||
[Analyze grammar]

bṛhaspatistadā tatra tvājñāpito mayā drutam |
vyajjñipat satīṃ tatra mātaraṃ te śṛṇu priye || 41 ||
[Analyze grammar]

vayaṃ bhaktā'nugāḥ sarve devā nārāyaṇāśritāḥ |
bhaktānāmaparādhe tu bhayaṃ yāmo'tidūrataḥ || 42 ||
[Analyze grammar]

bhavatī bhaktisampannā pūjyā mānyā satī ca naḥ |
ete devā namaskurmaḥ prasannā bhava yogini || 43 ||
[Analyze grammar]

rākṣasānāṃ balahānikṛte tvayā tu bhāmini |
prahacakragatiḥ ruddhā rātrināśārthameva ha || 44 ||
[Analyze grammar]

kintu lokavināśo'yaṃ tāpena samupasthitaḥ |
dharmakāryāṇi ruddhāni ṛtavo'pi layaṃ gatāḥ || 45 ||
[Analyze grammar]

grahāṇāṃ gatyadhīnaṃ vai sarvaṃ jagat pramodate |
tasmād devi gatyarodhaṃ bhikṣayāmastavā'grataḥ || 46 ||
[Analyze grammar]

eṣa nārāyaṇo devaḥ śrīpatiḥ puruṣottamaḥ |
bhikṣārthaṃ tvāgataścātra devakoṭibhiranvitaḥ || 47 ||
[Analyze grammar]

vayaṃ cātithayaste smo nānyamarthaṃ paraṃ hyapi |
rocayāmastavāgre'tra dehi bhikṣāṃ śubhakriye || 48 ||
[Analyze grammar]

śrutvā nārāyaṇi lakṣmi tava mātā tadā satī |
prāha devānahaṃ cāpi bhikṣayāmi śubhāspadam || 49 ||
[Analyze grammar]

parameśaṃ cākṣareśaṃ śrīpatiṃ puruṣottamam |
yadarthaṃ yoginī cāsmi yaṃ bhajāmi pumuttamam || 50 ||
[Analyze grammar]

devā yadyarpayantyenaṃ parameśaṃ sanātanam |
parabrahma prabhuṃ mahyaṃ dadāmyarodhanaṃ gateḥ || 51 ||
[Analyze grammar]

mama śreyaḥ paraṃ syācca bhavatāṃ śreya ityapi |
lokānāṃ śreya evā'pi bhavet sarvaṃ śubhāspadam || 52 ||
[Analyze grammar]

atha devāstadā prāhuḥ svatantraḥ puruṣottamaḥ |
na niyojyaḥ sa cā'smākaṃ śṛṇotyeva svayaṃ prabhuḥ || 53 ||
[Analyze grammar]

yatheṣṭaṃ sarvasaukhyārthaṃ kariṣyati janārdanaḥ |
śrutvaivaṃ devavākyāni tadā'haṃ śivaśaṃjike || 54 ||
[Analyze grammar]

apṛcchaṃ mātaraṃ te tu kimicchasi suyogini |
sā prāha bhagavaṃste'tra dāsī lakṣmīḥ sutā mama || 55 ||
[Analyze grammar]

vartate tvatpratīkṣāyāṃ tāṃ gṛhāṇa nijapriyām |
navaṃ svargamidaṃ sarvaṃ yautakaṃ tvatkṛte kṛtam || 56 ||
[Analyze grammar]

kanyāśca koṭiśaścemāstvadarthaṃ parikalpitāḥ |
vivāhavidhinā sarvā gṛhāṇa puruṣottama || 57 ||
[Analyze grammar]

jāmātā me gṛhe bhūtvā vasā'tra śāśvatīḥ samāḥ |
ityarthaye tato rātrirdivā sarvaṃ bhaviṣyati || 58 ||
[Analyze grammar]

bhaktā'haṃ ca bhavān bhaktavatsalaḥ khyāyate prabho |
devānāṃ hitakṛccāste lokānāṃ ca mamāpi ca || 59 ||
[Analyze grammar]

samartho'si tathākartuṃ prayatnaste na vidyate |
sarvaṃ gṛhāṇa bhagavan dehi me vacanaṃ śubham || 60 ||
[Analyze grammar]

jalaṃ gṛhāṇa haste ca gṛhītaṃ vada māṃ tviha |
tato'haṃ sarvadevānāṃ gatyarodhaṃ karomi vai || 61 ||
[Analyze grammar]

hariścā'haṃ hasaṃstasyai omityevaṃ jagāda ha |
jalaṃ kare prajagrāha devā jayaṃ pracakrire || 62 ||
[Analyze grammar]

atha vādyānyavādyanta prasannā devatāstadā |
puṣpavarṣāṇi devīnāṃ tadā sadasi cā'bhavan || 63 ||
[Analyze grammar]

prasannāḥ kanyakāḥ sarvāstatrābhijinmuhūrtake |
tuṃgabhadrāsanā putrīṃ kṣaṇenā''bhūṣaṇānvitām || 64 ||
[Analyze grammar]

śṛṃgāritāṃ ca yuvatīmarpayāmāsa paśyatām |
varamālā gale me ca tvayā tatra nidhāpitā || 65 ||
[Analyze grammar]

mama haste tava hastastadā mātrā samarpitaḥ |
mama siṃhāsane tvaṃ ca tatraivārdhe niṣāditā || 66 ||
[Analyze grammar]

athā'nyāḥ kanyakāstūrṇaṃ yathājñāścāgatāḥ puraḥ |
varamālā dadustāśca koṭirūpadharasya me || 67 ||
[Analyze grammar]

kaṇṭhe śīghraṃ tadā tatra bṛhaspatiḥ svayaṃ guruḥ |
vedamantrān lagnayogyān jagau kuṇḍaṃ prakalpitam || 68 ||
[Analyze grammar]

saṃkalpena ca śīghraṃ vai kārayāmāsa yoginā |
viśvakarmaprakartrā ca sthāpayāmāsa cānalam || 69 ||
[Analyze grammar]

havanaṃ kārayāmāsa dāpayāmāsa kanyakāḥ |
tvaṃ mukhyā cāparāḥ koṭikanyakā mama patnikāḥ || 70 ||
[Analyze grammar]

sarvāḥ prāptā mayā tatra puruṣottamayoginā |
tava mātrā pradattāstā imāḥ santyatra yāḥ striyaḥ || 71 ||
[Analyze grammar]

tava sapatnikā vargāstāstā mama purā striyaḥ |
śivasvāmigṛhe yāśca mayā kāśyāṃ vivāhitā || 72 ||
[Analyze grammar]

tatra koṭistriyastāśca bhavanti kanyakāstu tāḥ |
smara sarvaṃ purāvṛttaṃ lakṣmi divyaṃ caritrakam || 73 ||
[Analyze grammar]

athā'haṃ śīghramevaiva kṛtvā vahniṃ pradakṣiṇam |
āsane saṃsthitastatra vardhitaṃ yugalaṃ tadā || 74 ||
[Analyze grammar]

yugalāni samastāni vardhitāni śubhāśiṣā |
kuṃkumā'kṣatapuṣpādyaiḥ parihāro'bhavattataḥ || 75 ||
[Analyze grammar]

bhojanāni vicitrāṇi peyāni vividhāni ca |
upabhogyāni sarvāṇi tvanmātā pradadau tataḥ || 76 ||
[Analyze grammar]

sarve tṛptāstadā jātā madhyāhno nātivartate |
eka eva kṣaṇaḥ so'yamabhijinnāmanāmakaḥ || 77 ||
[Analyze grammar]

vartate tatra vai lakṣmi vinā'rkasya gatiṃ tadā |
athā''jñaptāḥ pūjitāśca devāḥ sarve tatastayā || 78 ||
[Analyze grammar]

aparādhakṣamāṃ yācitvā satī devakoṭikān |
praṇamya copadā datvā vyasarjayat tadā divam || 79 ||
[Analyze grammar]

ahaṃ sākaṃ tvayā cānyābhiḥ sahovāsa sarvadā |
puruṣottamapurākhyaṃ svargākhyaṃ nagaraṃ ca tat || 80 ||
[Analyze grammar]

tadā prasiddhimāpannaṃ samāsīt kalpakāntagam |
devānāṃ gatayastūrṇaṃ vyajāyanta tadā priye || 81 ||
[Analyze grammar]

madhyāhnottaravelā ca pravartate śanaistadā |
evaṃ cā'haṃ sarvabhadrāśrīpatiḥ puruṣottamaḥ || 82 ||
[Analyze grammar]

tadā'bhavaṃ tuṃgabhadrāputrīpatiḥ pareśvaraḥ |
tatra sarvāsu me putrāḥ śataṃ śataṃ ca śobhanāḥ || 83 ||
[Analyze grammar]

putrikā viṃśatirviṃśatiścā'bhavan suśobhanāḥ |
kalpāyuṣaśca te sarve santīdānīṃ ca te'kṣare || 84 ||
[Analyze grammar]

dhāmni muktā mama sarve smara paśya subhadrike |
anādiśrīkṛṣṇanārāyaṇaḥ śrīpuruṣottamaḥ || 85 ||
[Analyze grammar]

satyāḥ prakāryasiddhyarthaṃ tadgṛhaṃ nyavasaṃ tathā |
bhaktā madakṣaraṃ sādhvi bhaktagṛhaṃ mama gṛham || 86 ||
[Analyze grammar]

yatra tvaṃ tatra me vāso bhavatyeva sadā priye |
tava yogena cānyāsāṃ mama yogo bhavatyapi || 87 ||
[Analyze grammar]

duḥkhaharaḥ sukhakaraḥ sarvāsāṃ cābhavaṃstadā |
khyāto'bhavamanādiśrīharinārāyaṇaḥ prabhuḥ || 88 ||
[Analyze grammar]

tvaṃ ca nāmnā sarvabhadrāśrīrmahārājabhāminī |
anyāḥ sarvāstadā khyātiṃ gatā vai śrīharipriyāḥ || 89 ||
[Analyze grammar]

prākaṭyaṃ tatra caivaivaṃ parasya me'vatāriṇaḥ |
avatārāśca me tatrā'saṃkhyā jātāstadā priye || 90 ||
[Analyze grammar]

jānāmyetatsarvameva karanyastasuratnavat |
smara tvaṃ divyarūpāṇi camatkārāṃstadā kṛtān || 91 ||
[Analyze grammar]

atha rātrau prajātāyāmandhakāre ca saṃvṛte |
rākṣasā ye kvaciccāsan teṣāmupadravo'bhavat || 92 ||
[Analyze grammar]

anādiśrīharinārāyaṇaḥ so'haṃ sthalaṃ tu tat |
gatvā gatvā hatavāṃstān rākṣasān sarvabhūmitaḥ || 93 ||
[Analyze grammar]

te cātalādilokeṣu gatā vivāsitā mayā |
rakṣā kṛtā mānavānāṃ hariṇā vai sthale sthale || 94 ||
[Analyze grammar]

ṛṣibhyastāpasebhyaścāraṇyāni ca vanāni ca |
gahvarāṇi pradattāni nivāsārthaṃ mayā tadā || 95 ||
[Analyze grammar]

gṛhasthadharmā svargādipradāḥ saṃsthāpitā mayā |
bhaktiśca muktimārgaśca sthāpitau paramātmanā || 96 ||
[Analyze grammar]

hyādhavaśca tathā sādhvyastatra mayā pradīkṣitāḥ |
koṭiśaḥ sarvabhadrāśri mokṣamārgaḥ pravartitaḥ || 97 ||
[Analyze grammar]

mātre te tuṃgabhadrāyai mokṣapadaṃ mayā'rpitam |
asaṃkhyebhyo mānavebhyo muktapadaṃ tathā'rpitam || 98 ||
[Analyze grammar]

ta ete mama vartante pārṣadāḥ pūrvakalpagāḥ |
tīrthāni bhūtale tatra tadā kṛtāni vai mayā || 99 ||
[Analyze grammar]

yajñamārgāstathā mokṣakarāstadā pravartitāḥ |
ityevaṃ mama vai sarvabhadre prākaṭyamīritam || 100 ||
[Analyze grammar]

paṭhanācchravaṇādasya smaraṇānmama kīrtanāt |
bhuktirmuktirbhaveccāpi mama dhāmagatirdhruvā || 101 ||
[Analyze grammar]

iti śrīlakṣmīnārāyaṇīyasaṃhitāyāṃ tṛtīye dvaparasantāne'kṣarātpuruṣottamasya devaiḥ saha tuṃgabhadrāsanāgṛhāgamaḥ pūjanaṃ grahāṇāṃ gatyarthamabhyarthanam tuṃgabhadrāsanāyā hareḥ svaputrīgrahaṇārthaṃ gṛhajāmātṛtayā sthityarthaṃ prārthanā hareḥ svīkāro vivāhotsavo grahādīnāṃ gatiḥ |
anādiśrīharinārāyaṇarūpeṇakṛtadharmasthāpanādītyādinirūpaṇanāmā daśamo'dhyāyaḥ || 10 ||
[Analyze grammar]