Chapter 9

śrīpuruṣottama uvāca |
śṛṇu nārāyaṇīśri tvaṃ dvādaśe tu pradhāraṇe |
vatsare brahmaṇastatra ṣaṣṭhe kalpe'ṣṭame manau || 1 ||
[Analyze grammar]

śoṇabhadro'bhavadvaiśyo mama bhakto jitendriyaḥ |
sarvayajñaparaḥ sarvadānadātā'tithipriyaḥ || 2 ||
[Analyze grammar]

lakṣagodhanayuktaśca kṛṣivyāpārasaṃbhṛtaḥ |
krayavikrayakuśalo rājeva rājamānitaḥ || 3 ||
[Analyze grammar]

satyapyanantavibhave sammāne ca prajottare |
vyavasāyeṣvasaṃkhyeṣu sahasreṣvanugeṣvapi || 4 ||
[Analyze grammar]

bhagavantaṃ sa māṃ naiva vismaratyeva vai kvacit |
prātarbrāhme muhūrte sa samutthāya harermama || 5 ||
[Analyze grammar]

dhyānaṃ nityaṃ karotyeva sarvāgānāṃ muhurmuhuḥ |
dhyānatṛptastatastālīvādanaiḥ saha me'bhidhāḥ || 6 ||
[Analyze grammar]

harekṛṣṇa hare kṛṣṇanārāyaṇa prabho hare |
anādiśrīkṛṣṇanārāyaṇa śrīpuruṣottama || 7 ||
[Analyze grammar]

ityevaṃ kīrtayatyeva tataḥ snātvā nadījale |
paitṛkānañjalīndatvā kṛtvā sandhyāṃ mamā'rcanam || 8 ||
[Analyze grammar]

mama sauvarṇamūrtau sa vidhatte sarvavastubhiḥ |
āvāhanaṃ cāsanaṃ ca pādyamarghyaṃ tathā''camam || 9 ||
[Analyze grammar]

dantadhāvanamevā'pi gaṇḍūṣān mukhaśodhanam |
śaucaṃ mṛdā tathā śuddhiṃ jalaśaucaṃ tataḥ param || 10 ||
[Analyze grammar]

tailasugandhibhiścāṃgābhyaṃganaṃ cāṃgamardanam |
dugdhena dadhnā caivā'pi sarpiṣā madhunā tathā || 11 ||
[Analyze grammar]

śarkarayā tīrthavārbhiścābhiṣekā''plavaṃ tathā |
vastrāmārjanamevā'pi cāmūlyāmbaradhāraṇam || 12 ||
[Analyze grammar]

sugandhisattvadānaṃ ca śobhādravyārpaṇaṃ tathā |
kajjalaṃ netrayoścāpi bhāle tilakamuttamam || 13 ||
[Analyze grammar]

candrakaṃ śirasi tailaṃ rañjanaṃ karapattale |
bhūṣaṇāni samastāni pāduke puṣpamālikāḥ || 14 ||
[Analyze grammar]

kuṃkumaṃ cābīrakaṃ ca gulālaṃ candanaṃ śubham |
akṣatān kusumānyeva dhūpaṃ dīpaṃ nivedanam || 15 ||
[Analyze grammar]

bhojanāni vicitrāṇi tāmbūlakaṃ jalāni ca |
tulasīmañjarīpatraṃ svarṇahīrakamālikāḥ || 16 ||
[Analyze grammar]

ārārtrikaṃ daṇḍavacca stavanaṃ ca pradakṣiṇam |
dakṣiṇāṃ ca namaskāraṃ cāparādhakṣamāpanam || 17 ||
[Analyze grammar]

puṣpāñjaliṃ tataḥ pūjāparihāraṃ vidhāya saḥ |
sādhujanānatithīṃśca viprān namaskarotyapi || 18 ||
[Analyze grammar]

gāḥ satīrbālakān dīnānanāthān bhikṣukānapi |
samāgatān prasammānya pūjayatyeva nityaśaḥ || 19 ||
[Analyze grammar]

bhojanādi kārayitvā yathāpekṣaṃ dadāti ca |
varṣe varṣe navadhānyāgame satraṃ mahattamam || 20 ||
[Analyze grammar]

vaiṣṇavaṃ prakarotyeva bhuñjate suramānavāḥ |
evaṃ tena kṛto yajño navadhānyakratuḥ śubhaḥ || 21 ||
[Analyze grammar]

lakṣaśaḥ sādhavo yatra viprādyāścāpi cāgatāḥ |
saptāhe tatra vai yajñe mama bhaktasya nityaśaḥ || 22 ||
[Analyze grammar]

ahamadṛśyarūpeṇāgatyārpitaṃ nivedanam |
gṛhītvā śivasatteśri bhuktvā prayāmi dhāma me || 23 ||
[Analyze grammar]

evaṃ yajñe sampravṛtte viprāṇāṃ bahuśāstriṇām |
bhinnadeśā''gatānāṃ ca bhinnakriyāpravedinām || 24 ||
[Analyze grammar]

karmakāṇḍe'ṅgavaimatye viguṇe rudrakarmaṇi |
yajñāṃgakarmavaiguṇye jāte vahneḥ prakopanāt || 25 ||
[Analyze grammar]

akasmānmaṇḍapasyordhve vitāne vahnimaṇḍalam |
kuṇḍādutplutya sahasā lagnaṃ dāhakaraṃ tadā || 26 ||
[Analyze grammar]

prasāraṇaṃ ca tvaritaṃ sajvālaṃ samabhūd drutam |
maṇḍapo jvalitastūrṇaṃ vahniścāpi samantataḥ || 27 ||
[Analyze grammar]

sajvālaḥ samprasarito vāyunā supravardhitaḥ |
havyeṣu cāpi sarvatra nivāseṣu gṛheṣu ca || 28 ||
[Analyze grammar]

vastreṣu yajñaśālāsu mānaveṣvapi vai tadā |
krūraśca krūrakarmā ca vahnirvyavardhatolbaṇaḥ || 29 ||
[Analyze grammar]

kālī karālī vikarālī ca nīlā ca lohitā |
piśaṃgī cārjunā haridvarṇā jvālā vicitrikāḥ || 30 ||
[Analyze grammar]

jvālābhistatra pañcāśatsahasrāṇi tu mānavāḥ |
bhasmībhūtā abhavaṃśca hāhākāro'bhavattataḥ || 31 ||
[Analyze grammar]

śoṇabhadro mama bhaktaḥ paraṃ śokamavāpa ha |
mṛtānāṃ sarvakāryāṇi kṛtavāṃstatra bhaktarāṭ || 32 ||
[Analyze grammar]

atha teṣāṃ bahuhatyāpātakeṣu nimittavān |
vaiśyo'yaṃ yajamānaḥ sa mahacchokena pīḍitaḥ || 33 ||
[Analyze grammar]

śāntiṃ nā'vāpa nidrāṃ vā nā'vāpa cirameva ha |
ārādhanāṃ mama cakre mṛtoddhāracikīrṣayā || 34 ||
[Analyze grammar]

annaṃ jalaṃ parityajyā'naśanaṃ vratamācarat |
rātrindivaṃ bhajanaṃ me cakre madgatamānasaḥ || 35 ||
[Analyze grammar]

bhagavattvaṃ svayaṃ putro bhūtvoddhāraṃ kuru prabho |
yajñadhvaṃsakalaṃkaṃ ca nivāraya janārdana || 36 ||
[Analyze grammar]

evaṃ māṃ cārthayataśca gataṃ varṣaṃ vinā'danam |
vinā jalaṃ gataṃ varṣaṃ maraṇārthakayoginaḥ || 37 ||
[Analyze grammar]

tato'haṃ dattavāṃstasmai varaṃ putro bhavāmi te |
anādiśrīkṛṣṇanārāyaṇaḥ śrīpuruṣottamaḥ || 38 ||
[Analyze grammar]

ityuktvā mānasaḥ putrastasyā'gre samupasthitaḥ |
tatpatnī śīlavratinī nāmnā bhadreśvarī satī || 39 ||
[Analyze grammar]

dṛṣṭvā māṃ bālakaṃ ramyaṃ sarvatejobhivardhitam |
sarvasiddhipradaṃ saumyaṃ sarvābharaṇabhūṣitam || 40 ||
[Analyze grammar]

divyaṃ divyaguṇopetaṃ jagrāhotsavamāninī |
tadā'mbarād babhūvāpi divyakusumavarṣaṇam || 41 ||
[Analyze grammar]

muktā devā īśvarāśca vyavardhayanta māṃ sumaiḥ |
jayadhvānairvādyaghoṣaiścandanākṣatapūjanaiḥ || 42 ||
[Analyze grammar]

janmotsavo janakena kṛto me sarvato'dhikaḥ |
anaśanaṃ parityajya bhojayāmāsa koṭiśaḥ || 43 ||
[Analyze grammar]

sādhūn bhaktān dīnavargānanāthān dvijasattamān |
kanyakā bālakāṃścāpi śoṇabhadrastadā dine || 44 ||
[Analyze grammar]

dānāni sarvavastūnāṃ śreṣṭhāni pradadau pitā |
gṛhe gṛhe tadā kṛṣṇajanmanā vai samutsavāḥ || 45 ||
[Analyze grammar]

abhavan śivakanyeśri tadā tvaṃ māṃ samarthayaḥ |
mayā janma grahītavyaṃ yadyājñāṃ dehi me prabho || 46 ||
[Analyze grammar]

mayā tathā'stviti proktā tvaṃ tadā vaiśyaputrikā |
sarayūkāsatīnāmnyāḥ striyāḥ putrī śubhānanā || 47 ||
[Analyze grammar]

mānasī vai sarobhadrāśrīnāmnī tvaṃ vyajāyathāḥ |
sarvalakṣaṇasampannā harivatsānvitā hṛdi || 48 ||
[Analyze grammar]

dīpajyotiḥsamaṃ svarṇarekhācihnaṃ hṛdantare |
tadūrdhve ca hareścihnaṃ caturbhujaṃ sumūrtikam || 49 ||
[Analyze grammar]

svarṇavarṇaṃ ca te tatrā''sīd vilokya ca tat prasūḥ |
tava vai pitaraṃ nāmnā sāravatsaṃ jagāda ha || 50 ||
[Analyze grammar]

putrīyaṃ sarvaśobhāḍhyā vartate kamalā nanu |
hṛdaye'syā hariścāste svarṇarekhāḍhyamūrtimān || 51 ||
[Analyze grammar]

tasmād deyā bhagavate śrīkṛṣṇaparamātmane |
nā'nyasmai ceti vaiśyo'pi tatsatyaṃ cābhyamanyata || 52 ||
[Analyze grammar]

jātamātrā yuvatī ca mātrā pitrā susadguṇā |
śrutvā putraṃ śoṇabhadravaiśyasya parameśvaram || 53 ||
[Analyze grammar]

saṃkalpena pradattā tvaṃ mahyaṃ śrīpataye tadā |
mayā kṛtastato yajño mṛtoddhārakṛte punaḥ || 54 ||
[Analyze grammar]

tatrāraṃbhe samāgatya pitrābhyāṃ tava padmaje |
arpitā vidhinā mahyaṃ gṛhītā maṇḍape mayā || 55 ||
[Analyze grammar]

ādhvare eva vidhinā tato'dhvaramakārayam |
tvayā sākaṃ sarobhadre mayā yajñaḥ pravartitaḥ || 56 ||
[Analyze grammar]

āhūtāḥ pretavargāste yathāvad vidhinā tataḥ |
śrāddhaiḥ paitryaiḥ piṇḍadānairhavanairdaivakarmabhiḥ || 57 ||
[Analyze grammar]

tāritāḥ sarva evaite havyaprasādabhojanaiḥ |
sarve caturbhujāḥ pañcāśatsahasrāṇi te tadā || 58 ||
[Analyze grammar]

pretā vivṛtya ca tadā bhūtvā caturbhujāḥ surāḥ |
pārṣadā maṇḍape tatra vimānavaramāsthitāḥ || 59 ||
[Analyze grammar]

preṣitāśca mayā sarve vaikuṇṭhaṃ dhāma cottamam |
mocitāste tataḥ pitroḥ sevāyāṃ sarvadā'bhavam || 60 ||
[Analyze grammar]

anādiśrībhadranārāyaṇaḥ śrīpuruṣottamaḥ |
anye'pi cāvatārā me bahavastatra kalpake || 61 ||
[Analyze grammar]

kāryavaśāt prajātā vai vedmi tān sarvaśaḥ priye |
smara tāṃ tvāṃ sarobhadrāṃ śrībhadrasya tu me priyām || 62 ||
[Analyze grammar]

athā'nyaṃ me prakaṭaṃ ca bhāvaṃ śṛṇu śivātmaje |
vedhaso vatsare trayodaśe pradhyānasaṃjñake || 63 ||
[Analyze grammar]

tṛtīyakalpake turye manau merostu dakṣiṇe |
aghamarṣaṇakhaṇḍe vai bhūtale brahmacāriṇī || 64 ||
[Analyze grammar]

yoginī yogasāmarthyā tuṃgabhadrāsanā'bhidhā |
babhūva bahusāmarthyā mama bhaktiparāyaṇā || 61 ||
[Analyze grammar]

dinārdhaṃ mama pūjāyāṃ yāpayatyeva nirjane |
madhyāhne phalamūlādi cāhṛtyā''raṇyavṛkṣajam || 66 ||
[Analyze grammar]

nivedya mahyaṃ cāśnāti paitryaṃ karoti tatparam |
sāyaṃ māṃ bhajate nityaṃ parameśaṃ jagadgurum || 67 ||
[Analyze grammar]

rātrau dhyātvā svapityeva prātardhyānaṃ karotyapi |
snāne dhyāne jape home tarpaṇe bhajane sthale || 68 ||
[Analyze grammar]

jale'mbare divā rātrau māṃ smaratyeva yoginī |
dīrghābhyāsavaśādeṣā sarvasiddhinidhānikā || 69 ||
[Analyze grammar]

abhavat tvaṃ yathā lakṣmi tathaiśvaryasamanvitā |
ātmajñānaparā vāṇīsiddhā saṃkalpasiddhikā || 70 ||
[Analyze grammar]

dehasiddhā dvandvasparśarahitā sarvato'dhikā |
vyajāyata mahāsādhvī cartumakartumanyathā || 71 ||
[Analyze grammar]

samarthā vyomagā cāpi parakāyapraveśinī |
grahanakṣatratārāṇāṃ gatirodhabalānvitā || 72 ||
[Analyze grammar]

harivratā sadā kṛṣṇapativratā hi bhāminī |
bhaktarakṣākarī dīnā'nātharakṣākarī sadā || 73 ||
[Analyze grammar]

satāṃ sevākarī cāpi dharmakarmaparāyaṇā |
evaṃ sā vartamānā ca mahāraṇye sadā niśi || 74 ||
[Analyze grammar]

andhakāre nirgatānāhārārthaṃ rākṣasāṃstathā |
bhūtapretapiśācādīn vyalokayati hiṃsrakān || 75 ||
[Analyze grammar]

suptapakṣipaśuvrātabhakṣakān pāpakāriṇaḥ |
andhakāre paśavaśca bhītā api ca jāgratāḥ || 76 ||
[Analyze grammar]

adṛṣṭipātavaśagāḥ śaknuvanti na dhāvitum |
dhāvamānāṃśca gṛhṇanti prasahya balirākṣasāḥ || 77 ||
[Analyze grammar]

krandamānān dehinaśca pratirātri ca sā satī |
paraduḥkhanivārārthaṃ vyacārayanmuhurmuhuḥ || 78 ||
[Analyze grammar]

sārvadikaṃ mahāduḥkhaṃ yathā naśyeddhi dehinām |
tathā dīrghaṃ vicāryaiva rākṣasānāṃ vināśinīm || 79 ||
[Analyze grammar]

mahālakṣmīṃ prasasmāra tvāṃ krūrāṃ duḥkhahāriṇīm |
mayā''jñaptā bhavatī ca tasyāḥ pratyakṣatāṃ gatā || 80 ||
[Analyze grammar]

kanyakā ṣoḍaśabhujā sarvaśastrapradhāriṇī |
sā ca prasannavadanā yayāce tvāṃ svaputrikām || 81 ||
[Analyze grammar]

mānasī tvaṃ tadā putrī bhūtvā tadāśrame sthitā |
sarvarākṣasabhūtānāṃ hantrī paśvādirakṣiṇī || 82 ||
[Analyze grammar]

nāmnā kāryavaśāt sarvabhadrāśrīriti śobhanā |
yatinīdharmavaśagā sarvasāmarthyaśālinī || 83 ||
[Analyze grammar]

kalyāṇakāriṇī sādhvī yuvatī yoginī śubhā |
athaivaṃ vartamānāyāstasyā āraṇyakaṃ sthalam || 84 ||
[Analyze grammar]

vihāya rākṣasāḥ sarve yayuścānyadaraṇyakam |
tatraivaṃ hiṃsyamānāśca prāṇino rākṣasādibhiḥ || 85 ||
[Analyze grammar]

vivaśāstvanmātaraṃ ca rakṣayitrīṃ hi dehinām |
āśrutya cāgatāścāpyārthayaṃstvāmavanārthikām || 86 ||
[Analyze grammar]

mātā tvāṃ pradadau tebhyo rakṣārthaṃ tvaṃ gatā tataḥ |
tvadbhayāttadaraṇyāśca rākṣasāścerayad gatāḥ || 87 ||
[Analyze grammar]

araṇyaṃ tatra vai cāpi hiṃsanaṃ tādṛśaṃ hyabhūt |
rākṣasaiste paśavaśca prārthayan sarvabhadrikām || 88 ||
[Analyze grammar]

ityevaṃ sarvataḥ sarvabhadrikāhvānameva ha |
ajāyata hi lokeṣu khyātā rakṣākarī yataḥ || 89 ||
[Analyze grammar]

mātā vicārayāmāsa naivaṃ pāro bhaviṣyati |
putrī me na gṛhe cāste carate'raṇyake satī || 90 ||
[Analyze grammar]

rākṣasānāṃ vināśārthaṃ sevālābho na me'styapi |
tato'haṃ tādṛśaṃ kurve putrī me gṛhamāvaset || 91 ||
[Analyze grammar]

rākṣasānāṃ balaṃ cāpi svabhāvānnāśamāvrajet |
rātriryathā bhavennaiva tathā kurve samantataḥ || 92 ||
[Analyze grammar]

rātrau balaṃ piśācānāṃ bhūtānāṃ rakṣasāṃ tathā |
tasmād rātrirmā bhavatu cetyevaṃ tvatprasūstadā || 93 ||
[Analyze grammar]

haste jalaṃ gṛhītvaiva vicāryyā'ñjalivāri tat |
abhimantryā'mbare prākṣipat punaḥ punareva sā || 94 ||
[Analyze grammar]

jyotiṣāṃ ca grahāṇāṃ ca sūryādīnāṃ gatiḥ sthirā |
agatiścāstu vai yena divā vai sarvadā bhavet || 95 ||
[Analyze grammar]

nopeyācca niśā cāstamanaṃ sūryasya mā bhavet |
iti prakṣiptasalilabindavaḥ svargamāruhan || 96 ||
[Analyze grammar]

pratibandhakarā devāḥ sarvasāmarthyaraśmayaḥ |
sūryagatistadā ruddhā ruddhaṃ nakṣatramaṇḍalam || 97 ||
[Analyze grammar]

sarvaṃ vai dhruvatāṃ prāptaṃ sarvadā divaso'bhavat |
astamanaṃ gataṃ cāstaṃ punarnāyātameva tat || 98 ||
[Analyze grammar]

sāyaṃ sandhyā tato luptā dinaṃ dīrghatamaṃ hyabhūt |
sarve sāyaṃ pratīkṣante kadā sāyaṃ bhavediti || 99 ||
[Analyze grammar]

ākulaṃ vyākulaṃ sarvaṃ devamānavamaṇḍalam |
tena jātaṃ tadā'staucchrīpatiṃ māṃ puruṣottamam || 100 ||
[Analyze grammar]

prātarmadhyāhnakāryāṇi samastāni gatāni vai |
bubhukṣitāḥ surādyāśca janāśca ṛtuvarjitāḥ || 101 ||
[Analyze grammar]

sarvama sātatyasūryasya raśmibhistāpasecitam |
dagdhabhāvonmukhaṃ jātaṃ candrakāntirna labhyate || 102 ||
[Analyze grammar]

amṛtaṃ prāpyate naivauṣadhibhiścāpyaraṇyake |
śuṣkāyante drumādyāśca tāpadharmaprasecitāḥ || 103 ||
[Analyze grammar]

ekalābhe ca mahatī hāniścaivaṃ samāpatat |
uṣmaṇā mānavādyāśconmattatāṃ tu tadā''pnuvan || 104 ||
[Analyze grammar]

jalāni sarasāṃ tatra śuṣkāṇi līnatāṃ tataḥ |
gatāni sarvataścaivaṃ duḥkhamugramavartata || 105 ||
[Analyze grammar]

rākṣasānāṃ balaṃ naṣṭaṃ pātālaṃ viviśuśca te |
bhūtapretapiśācādyā viviśurgahvarāṇi ca || 106 ||
[Analyze grammar]

tebhyo duḥkhama na cā'styeva kintu tāpena tāpanam |
duḥkhamasahyamāpannaṃ tasmād rakṣa pareśvara || 107 ||
[Analyze grammar]

rakṣa rakṣa kṛpāsindho trilokī stabdhatāṃ gatā |
akriyā grahatārāśca dinamānaṃ layaṃ gatam || 108 ||
[Analyze grammar]

rātrirlayaṃ gatā kṛṣṇanārāyaṇa jagacchayā |
candrodayastathā nāsti māsāvadhirlayaṃ gataḥ || 109 ||
[Analyze grammar]

ṛtavo naiva jāyante phalanti nauṣadhivrajāḥ |
śaityaṃ layaṃ gataṃ sarvama vahniścotpadyate vane || 110 ||
[Analyze grammar]

rakṣa rakṣa kṛpāsindho dinabandho pratāpanāt |
astuvanniti trailokyāṃ dehino māṃ tadā priye || 111 ||
[Analyze grammar]

iti śrīlakṣmīnārāyaṇīyasaṃhitāyāṃ tṛtīye dvāparasantāne vedhaso dvādaśe vatsare śoṇabhadrayajñe dagdhānāṃ mokṣārthamanādibhadranārāyaṇasyatrayodaśe pradhyānavatsare tumagabhadrāsanāyoginyā kṛtasūryādigatinirodhe parameśaprārthanādītinirūpaṇanāmā navamo'dhyāyaḥ || 9 ||
[Analyze grammar]