Chapter 8

śrīpuruṣottama uvāca |
tvayā lakṣmi tato vīkṣya kāntaṃ purātanaṃ nijam |
varamālā mama kaṇṭhe'rpitā rājñāṃ prapaśyatām || 1 ||
[Analyze grammar]

sarvaḥ samājaścakito mahāścaryaparo'bhavat |
aho vipro rājakanyāṃ prāptavānityabhūt svanaḥ || 2 ||
[Analyze grammar]

daridrāya gatā kanyā bhāgyahīnāya bhikṣiṇe |
asamānasamastāya gatā kanyā tu mṛtyave || 3 ||
[Analyze grammar]

aho rājagṛhe janma bhāgyaṃ dāridryaduḥkhadam |
kalpavallī kāṃcanābhā bhallukakaragā'bhavat || 4 ||
[Analyze grammar]

sauvarṇapadminī ramyā patitā śuṣkakardame |
sthalapadmātmikā mālā vānarasya gale gatā || 5 ||
[Analyze grammar]

svātisalilayugvidyut patitā śuṣkaparvate |
lakṣmīrdivyā rājayogyā daridre patitā'dhunā || 6 ||
[Analyze grammar]

kaumudī candramutsṛjya kṣudratārakamāśritā |
prabhā sūryaṃ parityajya śūnyamambaramāśritā || 7 ||
[Analyze grammar]

vidyā santaṃ vihāyaiva vaitaṇḍikamadhiśritā |
dyaurmahendraṃ parityajya nairṛtaṃ samupāśritā || 8 ||
[Analyze grammar]

kāntiḥ kāntaṃ parityajya bhrāntivad bhrāntamāśritā |
satī satyaṃ vihāyaiva māyayā māyinaṃ gatā || 9 ||
[Analyze grammar]

jaṭā śaṃbhuṃ parityajya vaṭastambaṃ pravalgitā |
gaṃgā viṣṇupadaṃ tyaktvā kṣārasāgaramāgatā || 10 ||
[Analyze grammar]

bhakti dharmaṃ parityajya duḥśīlaṃ samupāgatā |
śayyā yugalaṃ santyajya vidhuraṃ samanusṛtā || 11 ||
[Analyze grammar]

siṃhikā siṃhamutsṛjya śūkaraṃ samupāgatā |
kariṇī hastinaṃ tyaktvā geṇḍukaṃ paśumāśritā || 12 ||
[Analyze grammar]

sarīsṛpaṃ gatā tyaktvā śeṣaṃ nāgaṃ hi nāginī |
kalgirvai mukuṭaṃ tyaktvā yātā cirpaṭaveṭanam || 13 ||
[Analyze grammar]

aho bhāgyasya balitā rājñī vāggharimāśritā |
naivaṃ dṛṣṭaṃ purā kvāpi dṛśyante na janaiḥ kvacit || 14 ||
[Analyze grammar]

divyā cintāmaṇimālā kukkurakaṇṭhamāhitā |
manyāmahe janāścaitad daivenā'syāḥ kṛtaṃ kila || 15 ||
[Analyze grammar]

yadvā samājamālakṣyā'bhibhūtā kanyakā yataḥ |
tejobhirvai samājasya bhānahīnā'karodidam || 16 ||
[Analyze grammar]

anabhīṣṭaṃ hi tajjātaṃ kanyayā neṣyate khalu |
yadvā kanyā na jānāti māleyaṃ varamālikā || 17 ||
[Analyze grammar]

sādhāraṇīṃ samālakṣya daridrāya samarpitā |
varamālā harikāṇāṃ dvitīyā vā bhaviṣyati || 18 ||
[Analyze grammar]

iyaṃ tu viprapūjārthaṃ matā vā kanyakā nviti |
tasmāt kanyā daridrāya na deyā satsu rājasu || 19 ||
[Analyze grammar]

yadvā rājā dadatyasmai hariṣyāmo vayaṃ tu tām |
svayaṃvare'pi sampanne yuddhādhīnā hi kanyakā || 20 ||
[Analyze grammar]

yodhayitvā satī ratnaṃ prāpsyāmo nā'tra saṃśayaḥ |
ityevaṃ bahudhā tatra vadanti sma nṛpādayaḥ || 21 ||
[Analyze grammar]

kanyāyā janakaścāpi kṣaṇaṃ śokaṃ jagāma ha |
vīkṣya kanyā daridrāya gateti jvaramāpa ha || 22 ||
[Analyze grammar]

novācāpi tadā kiñcid bhāgyaṃ matvā sutākṛte |
rājā tu vidhivad dātuṃ samicchati varāya vai || 23 ||
[Analyze grammar]

tāvad rājñī guruścāpi vṛddhā nyaṣedhayannṛpam |
rājan mā kṣiprakāryatra bhavān bhavatu maṇḍape || 24 ||
[Analyze grammar]

ayogyaṃ cedamāpannaṃ kanyā bhrāntā yato'sti vai |
yadvā vicittabhāvā'sti mānasasthairyavarjitā || 25 ||
[Analyze grammar]

tasmānmālā punardeyā svayaṃvarārthameva ha |
rājā vākyaṃ samādṛtya tathā'stviti jagāda tān || 26 ||
[Analyze grammar]

atha rājanyavargo'pi mene yogyaṃ tu tattathā |
kanyā pṛṣṭā muhuścaitadviṣaye janakādibhiḥ || 27 ||
[Analyze grammar]

novāca sā tadā kiñcid rameśeṅgitavedinī |
vipraṃ rājā tadā gatvā kṛtvā dūraṃ ca kanyakām || 28 ||
[Analyze grammar]

nītvā''yayau maṇḍapaṃ ca datvā mālāṃ parāṃ punaḥ |
kanyā vihṛtya sarvatra maṇḍape karamālikā || 29 ||
[Analyze grammar]

evameva samāste sā kasmaicinnārpayatyapi |
na sā vakti na vā'nyaṃ sā paśyati nāpi cecchati || 30 ||
[Analyze grammar]

āsurāṇāṃ vināśasya miṣaṃ cintayatīva sā |
athā'ha tu tadā lakṣmi gopuraṃ tvāṃ samāgatām || 31 ||
[Analyze grammar]

samālāṃ māmakīṃ matvā kare gṛhītavān balāt |
tvāṃ nītvā vāṭamālambya yāvatprayāmi caikalaḥ || 32 ||
[Analyze grammar]

tāvad dūtā bhṛtyavargā yoddhāro māmupāgatāḥ |
atāḍayaṃśca te māṃ vai jagṛhustvāṃ viyojitām || 33 ||
[Analyze grammar]

tadā kolāhalo jātaḥ samājaḥ kṣubhito'bhavat |
balalabhyā khalu kanyā bhṛtyairvai nīyate satī || 34 ||
[Analyze grammar]

mārayantu yodhayantu cāharantu ca kanyakām |
ityevaṃ raṇamūlaṃ vai tadārabdhaṃ kṣaṇādabhūt || 35 ||
[Analyze grammar]

ahaṃ teṣāṃ paśyatāṃ vai śīghraṃ skandhe nidhāya ca |
tvāṃ gṛhītvā pradudrāva śaravarṣā tadā'bhavat || 36 ||
[Analyze grammar]

mayā smṛtaṃ vimānaṃ svaṃ cā'kṣarākhyaṃ mahojjvalam |
dīpyamānaṃ samantādvai mahātejobhiruttamam || 37 ||
[Analyze grammar]

pārṣadairmuktasaṃghaiśca śvetagajairvirājitam |
sarvaśastrabhṛtaṃ lakṣmi divyamuktānikā'nvitam || 38 ||
[Analyze grammar]

tanmadhye sthāpayitvā tvāṃ yuddhārthaṃ dānavaiḥ saha |
sannaddhaścā'bhavaṃstveko vipro'haṃ kṣātrarūpadhṛk || 39 ||
[Analyze grammar]

ājagatkalanaṃ naijaṃ dhanurdhṛtvā mahattamam |
chedayāmāsa sarvān vai śarān śaraiḥ śilīmukhaiḥ || 40 ||
[Analyze grammar]

medayāmāsa kavacān yoddhṝṇāṃ kānakānyapi |
parivārya samastāśca rājāno daityapuṃgavāḥ || 41 ||
[Analyze grammar]

āsurā dānavāścāpi nijaghnurmāṃ samantataḥ |
mayā teṣāṃ prasaṃhāraḥ kartavyeśceti vai tadā || 42 ||
[Analyze grammar]

śaktyā keciddhatāstatra bhūśuṇḍyā ca hatāḥ pare |
anye ca taumaraiścāndrairbāṇaiśca vinipātitāḥ || 43 ||
[Analyze grammar]

pare tu gadayā bhagnā bheditāśca pare'sibhiḥ |
daṇḍenā'nye māritāśca paraśvadhena bheditāḥ || 44 ||
[Analyze grammar]

khaṇḍitā vajravegaiścā'pare prāsairvibheditāḥ |
śūlaiśca vyasavaścānye kṛtāstatra raṇāṃgaṇe || 45 ||
[Analyze grammar]

khaḍgairniṣūditāścānye golakaiḥ kaccarīkṛtāḥ |
cūrṇīkṛtāni varṣmāṇi mudgalairyodhināṃ tadā || 46 ||
[Analyze grammar]

evaṃ lakṣmi mayā tatraikalena koṭiśo'surāḥ |
prāṇairviyujya nākaṃ vā prāpitā vā yamakṣayam || 47 ||
[Analyze grammar]

ākṣaraṃ sthānamevā'pi vaikuṇṭhaṃ cāmṛtaṃ tathā |
abhyākṛtaṃ ca golokaṃ prāpitā balinaḥ khalu || 48 ||
[Analyze grammar]

atha sahasrahasto vai rājā kapālahetukaḥ |
sutalasyā''yayau yoddhuṃ mayā sārdhaṃ tadā mayā || 49 ||
[Analyze grammar]

sudarśanena cakreṇa kartitāḥ sarvabāhavaḥ |
natvā bhūtvā mama bhakto jagāma sa raṇād bahiḥ || 50 ||
[Analyze grammar]

mayā tasmai pradattau vai hastau dvau nādhikau tadā |
udgatau skandhadeśe'sya kṣamāṃ vṛttvā yayau gṛham || 51 ||
[Analyze grammar]

atha rājā śatamūrddho vitalasya mayā saha |
yuyudhe'rdhacandrabāṇairnāmnā sāraṅgavāhanaḥ || 52 ||
[Analyze grammar]

so'pi sūryābhabāṇairvai mayā kaṇṭheṣu kṛntitaḥ |
patito'sya kabandho vai bhūtale pramamāra saḥ || 53 ||
[Analyze grammar]

atalasya tadā rājā sāmarāyodhanābhidhaḥ |
sahasrapād yodhanārthama matsamīpamupāyayau || 54 ||
[Analyze grammar]

mayā nikṛntitāḥ pādāstasya cakreṇa vai tadā |
kabandhastasya ca tadā papāta ca mamāra ca || 55 ||
[Analyze grammar]

atha rājā bhuvastatra navakhaṇḍeśvaro mahān |
mahendrabhīṣaṇo nāmnā yoddhuṃ māṃ prati cāyayau || 56 ||
[Analyze grammar]

śūlān cikṣepa bahuśaḥ kaṇṭhaṃ me kartituṃ hi saḥ |
mayā śūlena dakṣo'sya bāhuḥ skandhād vidāritaḥ || 57 ||
[Analyze grammar]

ekahastastadā śūraścādāya khaḍgamuttamam |
dudrāva māṃ tadācā'haṃ jahāra tacchiro'sinā || 58 ||
[Analyze grammar]

atha svarge ca ye daityā rājyādhikārayojitāḥ |
āyayurvyomamārgeṇa yoddhuṃ mayā vihāyasi || 59 ||
[Analyze grammar]

mayā rūpasahasraiśca yodhitā vividhāyudhaiḥ |
sudarśanena cakreṇa naikacakrairvidāritāḥ || 60 ||
[Analyze grammar]

evaṃ tatrā'rbudāḥ śūrā mama hastaistathā'yudhaiḥ |
gamitāḥ pretabhāvaṃ vai mocitā api bandhanāt || 61 ||
[Analyze grammar]

thurānandaḥ sārvabhaumo jīvagrāheṇa vai mayā |
pāśaiśca raśmibhistatra raṇe baddho vaśīkṛtaḥ || 62 ||
[Analyze grammar]

arudastvaṃ tadā lakṣmi pitṛsnehavaśaṃgatā |
mā mevaṃ cetyavocāśca mayā rājā pramocitaḥ || 63 ||
[Analyze grammar]

nanāma mama caraṇe śaraṇaṃ prāpya bhūpatiḥ |
mayā'bhayapradānena yojito'calabhaktarāṭ || 64 ||
[Analyze grammar]

athā'nyāni dānavānāṃ sainyāni dudruvustadā |
talādiṣu gatāneva tyaktvā bhuvaṃ divaṃ bhuvaḥ || 65 ||
[Analyze grammar]

evaṃ niṣkaṇṭakaṃ kṛtvā bhūtalaṃ svargamityapi |
virarāma tato yuddhādahaṃ me śvaśuragṛhe || 66 ||
[Analyze grammar]

rājā māṃ svālayaṃ ninye madhye vivāhamaṇḍape |
vidhinā dattavān putrīṃ jyotsnāśrīṃ tvāṃ ca me tadā || 67 ||
[Analyze grammar]

yautakaṃ pradadau rājā hyasaṃkhyasvarṇaratnakam |
vimānāni ca yānāni gajavājivṛṣādikān || 68 ||
[Analyze grammar]

dāsān dāsīrnagarāṇi kalpavallīḥ sudhāhradān |
rathān svarṇān narayānān nītvā tvāṃ ca tatastvaham || 69 ||
[Analyze grammar]

kārayitvā mṛtānāṃ ca kriyāstato nijaṃ gṛham |
ājagāma tvayā sākaṃ samprajñānadvijālayam || 70 ||
[Analyze grammar]

tato mayā pṛthivyāṃ vai rājāno brāhmaṇāḥ kṛtāḥ |
viprā'dhīnā''bhavat pṛdhvī daivapaitryakriyāvatī || 71 ||
[Analyze grammar]

bhuvaḥ svargaṃ janādyaṃ ca tattad dhiṣṇyaṃ yathābhavat |
purā tathaiva tattebhyo dattavān vidhinā punaḥ || 72 ||
[Analyze grammar]

evaṃ mayā tadā lakṣmi khalairmocāyitaṃ jagat |
anādiśrīkṛṣṇanārāyaṇena paramātmanā || 73 ||
[Analyze grammar]

puruṣottamakṛṣṇena sarveṣāmavatāriṇā |
anādiśrīprājñanārāyaṇo'haṃ vai tadā'bhavam || 74 ||
[Analyze grammar]

ākalpāntaṃ sthitavāṃśca khaṇḍe bhāmantake tadā |
thurānandaste janako bhakto me tvātmavedanaḥ || 75 ||
[Analyze grammar]

āyuṣo'nte yayau dhāmā'kṣaraṃ me śuddhabhaktimān |
smara jyotsnāṃ śriyaṃ svāṃ tvaṃ sarvaṃ me gocaraṃ hitat || 76 ||
[Analyze grammar]

evamanye'pyavatārā asaṃkhyā me tato'bhavan |
atha cānyacca me prākaṭyaṃ vadāmi śṛṇu priye || 77 ||
[Analyze grammar]

vedhaso vatsare pratyāhārākhye daśakottare |
navame kalpake cāpi manau cāpi dvitīyake || 78 ||
[Analyze grammar]

pūrvakālabalālloke nāstikyaṃ sarvato hyabhūt |
tiṣyayugaprabhāveṇa naṣṭā copāsanā mama || 79 ||
[Analyze grammar]

mandirāṇi vinaṣṭānyāyatanāni gatāni ca |
pratimāśca layaṃ yātāstīrthāni nāśitāni ca || 80 ||
[Analyze grammar]

mānaveṣu tadā vyāpto'bhavad vai pāśavo vṛṣaḥ |
māṃ vyasmaran cālpavidaḥ svalpāyuṣo janāstadā || 81 ||
[Analyze grammar]

gartavāsā vivastrāśca sasyadhānyādijīvinaḥ |
svalpamānāḥ svalpajīvāstiṣyanāstikyasaṃbhṛtāḥ || 82 ||
[Analyze grammar]

vedā me vilayaṃ prāptāḥ karmakāṇḍo layaṃ gataḥ |
pūjanaṃ raṭanaṃ me'pi kīrtanādyaṃ layaṃgatam || 83 ||
[Analyze grammar]

abhūtamiva saṃjātaṃ tadā'haṃ brahmaṇā'rthitaḥ |
dharmabhaktisthāpanārthaṃ kṛpayā gocaro'bhavam || 84 ||
[Analyze grammar]

vīraśarabhanṛpatergṛhe caturbhujaḥ prabhuḥ |
prāvirāsaṃ mahāśīlavratī sādhuvṛṣānvitaḥ || 85 ||
[Analyze grammar]

mama prādurbhāvakāle devāḥ puṣpādivarṣaṇam |
cakrurdundubhayaścāpi devānāṃ vyanadaṃstadā || 86 ||
[Analyze grammar]

tasya rājñī saurabheyī śayyāyāṃ māṃ dadarśa ha |
agarbhajaṃ sarvadivyaguṇopetaṃ suvāñchitam || 87 ||
[Analyze grammar]

nyavedayaddhi sā rājñe paśya bāla mamā'ntike |
rājā prāha mayā devi saṃkalpito'yamarbhakaḥ || 88 ||
[Analyze grammar]

ayonijastava putro vartate taṃ prapālaya |
tāvatputro jātamātro yuvā tatra vyadṛśyata || 89 ||
[Analyze grammar]

sarvavidyāguṇayuktaḥ sarvavijñānaśevadhiḥ |
yogasiddhisusaṃsiddhaḥ sarvabhāṣāprapāragaḥ || 90 ||
[Analyze grammar]

sarvakalāprapūrṇaśca bhaktimārgā'vabodhakaḥ |
yajñopavītayuktaśca brahmacārivṛṣānvitaḥ || 91 ||
[Analyze grammar]

upādideśa saddharmān mānavebhyo'tiharṣataḥ |
brahmacaryamahiṃsāṃ ca satyamastenavartanam || 92 ||
[Analyze grammar]

śaucaṃ santoṣamevāpi pareśārādhanaṃ sadā |
vrataṃ santoṣamevāpi kṣamāṃ vairāgyamityapi || 93 ||
[Analyze grammar]

vṛddhasevāṃ satāṃ sevāṃ parātmasukhavartanam |
dānaṃ dayāṃ ca havanaṃ satkāraṃ pūjanaṃ hareḥ || 94 ||
[Analyze grammar]

tapaścendriyavegānāṃ nigraho mohavarjanam |
sarvātmadarśanaṃ snehaṃ parameśe parātmani || 95 ||
[Analyze grammar]

śravaṇaṃ kīrtanaṃ kṛṣṇasmaraṇaṃ vandanaṃ tathā |
ātmanivedanaṃ kṛṣṇe hareḥ sambandhamuttamam || 96 ||
[Analyze grammar]

ityevaṃ mokṣadharmāścāpyupādideśa vai tadā |
vṛttiṃ pāramahaṃsī ca jagrāha jīvanā'ntikām || 97 ||
[Analyze grammar]

tvaṃ ca lakṣmi mayā''diṣṭā śārdūlarṣestu kanyakā |
mānasī tatra saṃbhūtā jātamātrā ca vāgminī || 98 ||
[Analyze grammar]

yuvatī brahmarūpā ca savaiśvaryasamanvitā |
brahmacaryaparā sādhvī satīdharmā'vabodhikā || 99 ||
[Analyze grammar]

sādhvīdharmamāśritā ca mama vrataparāyaṇā |
nityapūjāparā bhaktimatī mokṣakarī tathā || 100 ||
[Analyze grammar]

pitrā mātrā'rpitā mahyaṃ sādhvīdīkṣārthameva ha |
mayā dīkṣā pradattā te tvaṃ sadā brahmacāriṇī || 101 ||
[Analyze grammar]

gurvī sarvasatīnāṃ cā'bhavaḥ śikṣaṇadāyinī |
tava śāstraṃ tadā sādhvīdharmātmakaṃ hyabhūt priye || 102 ||
[Analyze grammar]

śārdūlikāśrīsaṃhitātmakaṃ kalpāntagaṃ tadā |
āvābhyāṃ ca tadā sarvalokebhyo bhūtale khalu || 103 ||
[Analyze grammar]

upadiṣṭā naiṣṭhikānāṃ dharmā bhaktirharestathā |
asaṃkhyāstāritā jīvā akṣaraṃ prati cāpitāḥ || 104 ||
[Analyze grammar]

etat smara tadā lakṣmi śārdūlikāśriyaṃ nijām |
svāṃ tathā māmanādiśrīvīranārāyaṇaṃ harim || 105 ||
[Analyze grammar]

evamanye'vatārā me tadā'bhavannasaṃkhyakāḥ |
sarvānahaṃ prajānāmi smaraṇānmokṣadā hi te || 106 ||
[Analyze grammar]

iti śrīlakṣmīnārāyaṇīyasaṃhitāyāṃ tṛtīye dvāparasantāne jyotsnāśrīsamarpitā'nādiprājñanārāyaṇakaṇṭhe varamālā tato rājñāṃ yuddham daityadānavā'sugaṇāṃ sudarśanādibhirhariṇā kṛto vināśaḥ thurānandasya mokṣaṇam pṛṣvīsvargādirājyānāṃ mānaveṣu devādiṣu cārpaṇam vedhasaścaikādaśe vatsare naiṣṭhikasādhudharmasthāpanārtham anādivīranārāyaṇasya |
prākaṭyamitinirūpaṇanāmā'ṣṭamo'dhyāyaḥ || 8 ||
[Analyze grammar]