Chapter 4

śrīpuruṣottama uvāca |
śṛṇu nārāyaṇīśri tvaṃ caturthaṃ mama vartanam |
candrarakṣākaraṃ svarge gāyatāṃ mokṣadaṃ param || 1 ||
[Analyze grammar]

stāvane vatsare'jasya kalpe caturthake tadā |
dvādaśe ca manau vartamāne'suro'tidāruṇaḥ || 2 ||
[Analyze grammar]

dhūmro nāmnā'bhavad raudraḥ śaṃbhormastakapṛṣṭhataḥ |
samutpanno vyomadeho'ntarīkṣago bhayaṃkaraḥ || 3 ||
[Analyze grammar]

śaṃbhorlalāṭe bhāvantaṃ dṛṣṭvā kāntamayaṃ maṇim |
spardhāṃ kṛtvā yayau vyomni cāvāptuṃ vai niśāmaṇim || 4 ||
[Analyze grammar]

candramasaṃ samāhartuṃ yatnaṃ tadā'karod bahum |
candreṇa vāryamāṇaḥ sa niśitaiḥ śastrahetibhiḥ || 5 ||
[Analyze grammar]

nipapātā'mbarādadrau śvetaśṛṃgābhidhe tadā |
śaṃbhumuddiśya ca tapaḥ śaṃbhuputro'karottataḥ || 6 ||
[Analyze grammar]

nirāhāro'bhavattvekayugaṃ tato hi śaṃkaraḥ |
prasannaḥ prāha dhūmraṃ taṃ putraṃ mastakapṛṣṭhajam || 7 ||
[Analyze grammar]

vada kiṃ rocate te'dya kathaṃ tapasi vartase |
vadeṣṭaṃ pradadāmyeva mā kṛthāstapa ugrakam || 8 ||
[Analyze grammar]

ityuktaścā'suraḥ prāha varaṃ dehi jayāvaham |
candraṃ jeṣyāmyayatnena tathecchāmi na cetarat || 9 ||
[Analyze grammar]

tathā'stviti haraḥ prāha dadau dhūmrāya śūlakam |
apradhṛṣyamavināśyaṃ cakrāccāpi bale'dhikam || 10 ||
[Analyze grammar]

tadādāya tu dhūmraḥ sa mervadriṃ prathamaṃ yayau |
sārvabhaumajayaṃ kartuṃ tṛṣṇātantuprapreritaḥ || 11 ||
[Analyze grammar]

meruvāsān surān jitvā pṛthvyāṃ jetuṃ nṛpān yayau |
jitvā bhūmau bhūbhṛtaśca pātālān prayayau tataḥ || 12 ||
[Analyze grammar]

daityānnāgānkacchapāṃśca makarānmatsyakāṃstathā |
nakrān jitvā phaṇadhrāṃśca jitvā yayāvaraṇyakam || 13 ||
[Analyze grammar]

vidyādharāṃśca gandharvān jitvā ca kinnarāṃstataḥ |
guhyakān cāraṇān jitvā yayau saṃyamanīṃ purīm || 14 ||
[Analyze grammar]

yamadūtāṃstadā jitvā yuyudhe sa yamena vai |
yamo daṇḍena kālenā'suraḥ śūlena vai mithaḥ || 15 ||
[Analyze grammar]

yuyudhāte tu naikasya parājayo'tra vidyate |
yamena saṃsmṛto rudro'sureṇa saṃsmṛto haraḥ || 16 ||
[Analyze grammar]

hararudrau samāyātau madhyasthau sambabhūvatuḥ |
vārayāmāsatustau ca yayatuḥ śaṃsitau gṛham || 17 ||
[Analyze grammar]

athā'suro garvayukto yayau cendraṃ divaspatim |
indro jñātvā mahādevadattaṃ śūlamajayyakam || 18 ||
[Analyze grammar]

utthāya saumyabhāvena satkāraṃ kṛtavān śubham |
asurāya dadau ramyaṃ hāraṃ maṇyabhinirmitam || 19 ||
[Analyze grammar]

pūjayāmāsa ca śaṃbhoḥ śūlaṃ bahuvidhānataḥ |
asuro'pi vinā roṣaṃ mṛdurbhūtvā vilokya tat || 20 ||
[Analyze grammar]

yayau sūryaṃ vijetuṃ ca sūryaścāstaṃ drutaṃ yayau |
yayau tadā'suro'jaṃ ca vijetuṃ parameṣṭhinam || 21 ||
[Analyze grammar]

brahmā jñātvā śāṃbhavaṃ tat triśūlaṃ sampupūja ha |
madhuparkaṃ dadau cāpyasurāya mānanaṃ dadau || 22 ||
[Analyze grammar]

dhūmrastvāsanamāsādya sauvarṇaṃ bahuśobhanam |
mumude ca mṛdurbhūtvā natvā'jaṃ prayayau divam || 23 ||
[Analyze grammar]

candraṃ dṛṣṭvā pūrṇabhāsaṃ yayau taṃ prati satvaram |
sadā candrastatra cāsīnnīrogaḥ sakalaḥ sadā || 24 ||
[Analyze grammar]

ekarūpaḥ kṣayavṛddhivarjitaḥ śāśvataḥ sukhaḥ |
grahagrāsādihīnaśca pūrṇakalaḥ samantataḥ || 25 ||
[Analyze grammar]

tādṛśaṃ pūrṇapīyūṣaṃ gatvā dhūmro bhayānakam |
śatacandrāyataṃ rūpaṃ kṛtvā jagrāha pāṇinā || 26 ||
[Analyze grammar]

sparśaiḥ sudhā'mṛtānāṃ tu kiraṇānāṃ mahāsuraḥ |
sukhaṃ mahānandabhṛtaṃ hyavāpā'pūrvamuttamam || 27 ||
[Analyze grammar]

ataścandre jātalobho jagrāsa śaśinaṃ mukhe |
hāhākāro mahānāsīt svarge pṛthvyāṃ samantataḥ || 28 ||
[Analyze grammar]

amṛtasya nidhānaṃ vai śītatejobhṛtaṃ maṇim |
tajjyotsnāmanavāpyaivauṣadhayo'tivijīvanāḥ || 29 ||
[Analyze grammar]

mṛtaprāyā abhavaṃśca devāścā'mṛtavarjitāḥ |
kiraṇādhārajīvāśca sarve maraṇaśālinaḥ || 30 ||
[Analyze grammar]

tadā jātāścātha devāḥ svaguroḥ śaraṇaṃ yayuḥ |
sadaspatirdevaguruścā'staut māṃ parameśvaram || 31 ||
[Analyze grammar]

candrasya rakṣaṇārthāya lokarakṣaṇahetave |
namo devādhidevāya sūryacandrapracakṣuṣe || 32 ||
[Analyze grammar]

sarvāntaryāmiṇe rakṣākarāya paramātmane |
puruṣottamasaṃjñāya sudhāpradāya śārṅgiṇe || 33 ||
[Analyze grammar]

grahanakṣatratārāṇāṃ bhāskarāya mahātmane |
namaścāntaravedyāya cā'bhaktakṣayakāriṇe || 34 ||
[Analyze grammar]

samāyāhi hare śīghraṃ rakṣāṃ tvaṃ śaśinaḥ kuru |
mahādevo dhyānamagnaścirakārī virājate || 35 ||
[Analyze grammar]

śīghraṃ dhūmrād rakṣa muktapate śrīparameśvara |
stutaścaivaṃ tadā cāhaṃ nārāyaṇīśri satvaram || 36 ||
[Analyze grammar]

tvayā sākaṃ tvājagāma devagurorgṛhaṃ divi |
drāgevā'dṛśyarūpo'pi tadaṅge mānasaḥ sutaḥ || 37 ||
[Analyze grammar]

samabhavaṃ subālo'haṃ sarvabhūṣaṇabhūṣitaḥ |
śaṃkhacakragadāpadmaśūlaśaktiśarā''yudhaḥ || 38 ||
[Analyze grammar]

vajradhanurdaṇḍapāśakhaṅgacarmavirājitaḥ |
tvaṃ tadā tu mayā''jñaptā praviṣṭā cā'surodare || 39 ||
[Analyze grammar]

candramasi sthirā jātā cāndrī kalāprarakṣiṇī |
tvadbalādvai tadā lakṣmi candro mūrcchāṃ na cāptavān || 40 ||
[Analyze grammar]

nāpi tejovihīnaśca nāpi cāmṛtavarjitaḥ |
nāpi saṃpācito garbhe dhūmrāsureṇa vahninā || 41 ||
[Analyze grammar]

evamevā'bhavadgarbhe yathāpūrvaṃ tathā'bhavat |
athā'ha pūjito devairdevagurvaṃkaśobhitaḥ || 42 ||
[Analyze grammar]

prārthito'suranāśārthaṃ jagāmā'haṃ mahāsuram |
devasainyena sahito yuyudhe candraghātinā || 43 ||
[Analyze grammar]

tadā lakṣmi mayā''jñaptā kanyārūpā'bhavaḥ kṣaṇam |
asuro dhūmrasaṃjño'pi tvāṃ vilokya mumoha ca || 44 ||
[Analyze grammar]

śūlaṃ visṛjya ca kṣaṇaṃ tvāṃ dhartuṃ yatnamācarat |
tvayā śūlaṃ tadā grastaṃ mamājñayā hi śāṃkaram || 45 ||
[Analyze grammar]

mayā cakreṇa vai śīghraṃ hato'suraḥ sahasradhā |
dhūmro vināśamāpanno bhasmasādabhavattadā || 46 ||
[Analyze grammar]

candraḥ pūrṇakalastatra nirjagāmodarād bahiḥ |
tvaṃ ca śūladharī cāndrī kanyā nāmnā tu kaumudī || 47 ||
[Analyze grammar]

vardhitā sarvadevādyaiḥ pūjitā parameśvarī |
ahaṃ sarvaiḥ pūjitaśca vardhito vanditastathā || 48 ||
[Analyze grammar]

devaguroḥ sutaścā'haṃ bhagavān puruṣottamaḥ |
candramasā harirjñātvā vanditaḥ pūjitastathā || 49 ||
[Analyze grammar]

kanyā tvaṃ kaumudīnāmnī dattā mahyaṃ tadā priye |
mayā vivāhitā tvaṃ ca devagurorgṛhoṣiṇā || 50 ||
[Analyze grammar]

anādiśrīdevanārāyaṇanāmnā narāyaṇi |
tataḥ sasmāra śaṃbhuṃ ca devagurorgṛhe'pyaham || 51 ||
[Analyze grammar]

śaṃbhustūrṇaṃ samāyāto jñātvā māṃ parameśvaram |
dhūmrāsuraṃ vinaṣṭaṃ ca jñātvā mumoda vai haraḥ || 52 ||
[Analyze grammar]

triśūlaṃ pradadau śaṃbhuścandramase hi śāśvatam |
pitā tubhyaṃ dadau śūlaṃ yautakaṃ śāśvataṃ śivam || 53 ||
[Analyze grammar]

tvayā mahyaṃ pradattaṃ ca mayā haste surekhakam |
kṛtaṃ dhṛtaṃ sarvadaiva paśya dakṣe kare mama || 54 ||
[Analyze grammar]

triśūlaṃ rekhitaṃ cāste prākaṭyaṃ yāti cecchayā |
smara lakṣmi tava prākaṭyaṃ ca me'pi tadā'bhavam || 55 ||
[Analyze grammar]

avatārī svayaṃ cā''saṃ tadā devanarāyaṇaḥ |
avatārāstadā me'pyāsaṃśca koṭisahasraśaḥ || 56 ||
[Analyze grammar]

ākalpāntaṃ cā'bhavaṃ vai tvayā sākaṃ gurorgṛhe |
athā'jasya pañcame vatsare yo'haṃ tadā'bhavam || 57 ||
[Analyze grammar]

ādye kalpe cādyamanau tvaṃ cā'bhavaḥ kathāṃ śṛṇu |
vyomabāṇābhidhe varṣe prākkalpe prathame manau || 58 ||
[Analyze grammar]

vidyamāne brahmaputrā maharṣayo'jasaṃsadi |
saṃhatāśca pracakrurvai vicāraṃ vedavādinaḥ || 59 ||
[Analyze grammar]

brahmāṇḍe bhūtalaṃ karmabhūmiḥ phalapradā'sti yat |
tatra kṛtaṃ dehibhirvai dattaṃ dānaṃ vṛṣādikam || 60 ||
[Analyze grammar]

anyalokagataiḥ sarvaiḥ prāpyate bhojanādikam |
bhūtale yatpradattaṃ ca jalānnāmbarabhūṣaṇam || 61 ||
[Analyze grammar]

kṣetravāṭīrūpyakanyāsuvarṇagṛhasādhanam |
havyaṃ kavyaṃ baliḥ puṇyaṃ vrataṃ śrāddhaṃ sahāyakam || 62 ||
[Analyze grammar]

sarvaṃ lokāntare dātrā kartrā''pyate'yutottaram |
yathā jīvanti sannyāsā vānaprasthāśca naiṣṭhikāḥ || 63 ||
[Analyze grammar]

gārhasthyamupasaṃlambya tathā''lambya kṣitau kṛtam |
jīvanti svargadevāśca pitaraśca maharṣayaḥ || 64 ||
[Analyze grammar]

sukṛtaṃ tad yajñakāryaṃ jīvanaṃ sarvadehinām |
viprāṇāṃ bhojanaṃ yatra devānāṃ havyamityapi || 65 ||
[Analyze grammar]

śrāddhaṃ ca pitṛdevānāmṛṣīṇāṃ puṇyamityapi |
soma sudhā'mṛtaṃ bhojyaṃ yajñe sarvaṃ hi labhyate || 66 ||
[Analyze grammar]

tasmād yajñaḥ prakartavyaḥ śikṣaṇīyaḥ kriyātmakaḥ |
mānavebhyo bhūdevebhyaḥ kriyāsantānahetave || 67 ||
[Analyze grammar]

kratutantau samārabdhe sandhite yojite kṛte |
yajñānāṃ sampracāreṇa jīvanaṃ syānnirāmayam || 68 ||
[Analyze grammar]

tasmād gacchāma evā'dya maharṣayo hi bhūtalam |
devān pitṝn saha nītvā''cariṣyāmaḥ kratūttamam || 69 ||
[Analyze grammar]

itisammantrya munayaḥ pitaraśca sureśvarāḥ |
āyayurbhūtalaṃ lakṣmi yajñārthaṃ merusannidhau || 70 ||
[Analyze grammar]

pālāśā''raṇyake sarve svargaṃgāyāstaṭe sthitāḥ |
prayatante sma yajñārthaṃ bhinnakarmaniyojitāḥ || 71 ||
[Analyze grammar]

prathamo'yaṃ yato yajñaḥ kramaṃ jānanti naiva te |
na kaścit sarvayajñānāmabhyāsī karmagocaraḥ || 72 ||
[Analyze grammar]

yathākramaviniryoktā deve pitari bhūsure |
maharṣau vā tadā tatrā'bhavat karmakramābhivit || 73 ||
[Analyze grammar]

tataste mohamāpannāḥ karmakāṇḍā'pravedinaḥ |
idaṃ pūrvamidaṃ pūrvamevamāgrahiṇo'bhavan || 74 ||
[Analyze grammar]

aniścitte kratukrame tadaṃgānāṃ krame'pi ca |
vedhaḥputro brahmakumārākhyau naiṣṭhikaśīlavān || 75 ||
[Analyze grammar]

yajamānaṃ cāha tatra jyotiṣmannāmakaṃ manum |
vayaṃ sarve karmakāṇḍe hyapūrvagocarāḥ khalu || 76 ||
[Analyze grammar]

viguṇe tu phalaṃ yajñe viparītaṃ bhavediti |
yajñadraṣṭā yajñavaktā nānyo nārāyaṇaṃ vinā || 77 ||
[Analyze grammar]

parabrahmā'kṣarātītaṃ śrīhariṃ puruṣottamam |
tamevā''rādhayāmo'tra saṃhatya kramahetave || 78 ||
[Analyze grammar]

sa cā''gatya kratuṃ sarvaṃ śikṣayiṣyati yajñakṛt |
yajñadevaḥ sa yajñātmā yajñajño yajñakārakaḥ || 79 ||
[Analyze grammar]

ityukto vai manuścānye svīcakrustadvacastataḥ |
parameśaṃ militvaivā''rādhayāmāsurutsukāḥ || 80 ||
[Analyze grammar]

maharṣayaśca pitaro devatā bhūsurādayaḥ |
oṃ namo yajñarūpāya parameśāya karmiṇe || 81 ||
[Analyze grammar]

yajñadevāya yajñāya yajñajñāya kratukṛte |
yajñaśāstre'dhvarakāryakāriṇe paramātmane || 82 ||
[Analyze grammar]

namo'ntaryāmiṇe naśca sāhāyyadāya śārṅgiṇe |
ityastuvan surādyā māṃ yajñārthaṃ puruṣottamam || 83 ||
[Analyze grammar]

tadā'haṃ tu tvayā sākaṃ śrutvā'kṣare'pi cārthanām |
agacchaṃ gāṃgatīraṃ vai meroḥ pālāśakṛdvanam || 84 ||
[Analyze grammar]

brahmakumāranikaṭe bālo'hamṛṣiveṣadhṛk |
sarvavidyāmayaḥ sarvamantradraṣṭā niyogavān || 85 ||
[Analyze grammar]

yāvadvidhipravīṇo'haṃ yāvatpātradharo dvijaḥ |
sarvakramābhivettā ca sarvadravyādibodhavān || 86 ||
[Analyze grammar]

dvitīyo vai yathā brahmā tathā prakaṭito'bhavam |
sarve dṛṣṭvā tu māṃ vipraṃ koṭibhāskarabhāsuram || 87 ||
[Analyze grammar]

sahasotthāya nemurmāṃ kastvaṃ papracchurutsukāḥ |
adhvaro'haṃ hi bhagavān bhavadārādhanāphalam || 88 ||
[Analyze grammar]

ityuktvā'haṃ bālarūpo brahmakumārakā'ṅkagaḥ |
abhavaṃ putrabhāvenā'bhāvayat so'pi māṃ tathā || 89 ||
[Analyze grammar]

tvaṃ tadā cāviśo jyotiṣmanmanau bhūyasī satī |
athā'haṃ ca samāśvāsya sarvān yajñārthakarmasu || 90 ||
[Analyze grammar]

niyujya kramavāraṃ tān prāvartayaṃ kratuṃ tadā |
anādiśrīkṛṣṇanārāyaṇo'haṃ parameśvaraḥ || 91 ||
[Analyze grammar]

anādiśrīyajñanārāyaṇo bhūtvā vyadhāpayam |
avabhṛthāntaṃ yajñaṃ taṃ vaiṣṇavaṃ sārvabhaumikam || 92 ||
[Analyze grammar]

adhvaro'haṃ manostasmād yayāce dakṣiṇāṃ tadā |
bhūyasīṃ yajñabhūmau vai maṇḍape vedikāntike || 93 ||
[Analyze grammar]

tadā tvaṃ kanyakā nāmnā bhūyasī dakṣiṇā'bhidhā |
prādurabhavaḥ kalyāṇi kanyakā vai madarthinī || 94 ||
[Analyze grammar]

manorjyotiṣmataḥ putrī nārāyaṇī hi bhūyasī |
adhvare'mbarabhūṣāḍhyā koṭisvarṇadhanānvitā || 95 ||
[Analyze grammar]

madyogyā yācamānāya mahyaṃ vai manunā'rpitā |
tata ārabhya tadvarṣe sahasrakalpakātmake || 96 ||
[Analyze grammar]

mayā''diṣṭaprakāreṇā'dhvarāḥ sarve pravartitāḥ |
kalpāyuścā'bhavaṃstatra tvayā sākaṃ mahādhvaraḥ || 97 ||
[Analyze grammar]

yajñanārāyaṇaḥ so'haṃ cānādiḥ puruṣottamaḥ |
avatārī svayaṃ svāmī parabrahma pareśvaraḥ || 98 ||
[Analyze grammar]

bhūyasī dakṣiṇānāmnī tvaṃ me patnī tadā'bhavaḥ |
smara nārāyaṇīśri tvaṃ tatkalpaṃ taṃ ca vatsaram || 99 ||
[Analyze grammar]

tato'nye me'vatārāśca tatrā'bhavan hi koṭiśaḥ |
vedmi sarvānahaṃ lakṣmi nānye smaranti tānapi || 100 ||
[Analyze grammar]

sarvayajñasvarūpo'smi sarve yajñā mayi sthitāḥ |
sarvayajñā mūrtayo me sarvayajñapravartakaḥ || 101 ||
[Analyze grammar]

bhoktā sarveṣu yajñeṣu sarvā'dhvaraphalapradaḥ |
sarvakriyākalāpajñaścā'haṃ bhavāmi cādhvare || 102 ||
[Analyze grammar]

tvāṃ vinā naiva tiṣṭhāmi daive paitrye tathā''rṣake |
mānave vā vidhau lakṣmi dāne'rhaṇe ca pūjane || 103 ||
[Analyze grammar]

jape vrate krame jñāne sākaṃ tvayā vṛṣe'pi ca |
upatiṣṭhāmi deveśi śiveśvari na cānyathā || 104 ||
[Analyze grammar]

ityevaṃ cādhvaraṃ janma kathitaṃ vai tvayā saha |
paṭhanācchravaṇāccāpi mahādhvaraphalaṃ bhavet || 105 ||
[Analyze grammar]

tavāpi smaraṇāllakṣmi bhūyasīdakṣiṇāphalam |
sampatsiddhirbhavedatra paratra mokṣaṇaṃ bhavet || 106 ||
[Analyze grammar]

iti śrīlakṣmīnārāyaṇīyasaṃhitāyāṃ tṛtīye dvāparasantāne vedhasaścaturthavatsare dhūmrāsuranāśārthaṃ candrarakṣārtham anādidevanārāyaṇasya pañcamavatsare'dhvaratantusampādanārtham |
anādiyajñanārāyaṇasya ca prākaṭyamitinirūpaṇanāmā caturtho'dhyāyaḥ || 4 ||
[Analyze grammar]