Chapter 3

śrīnārāyaṇīśrīruvāca |
bhagavanme kṛpāsindho vada jijñāsitaṃ tvidam |
dvāpañcāśadvatsareṣu brahmaṇo yatra vatsare || 1 ||
[Analyze grammar]

mukhyāvatārī tvaṃ jāto nāmakarmaguṇānvitaḥ |
tatsarvaṃ śrotumicchāmi tvallīlā muktidā yataḥ || 2 ||
[Analyze grammar]

nānto'sti te'vatārāṇāṃ tadbhāraṃ na dadāmi te |
avatārisvarūpasya prākaṭyaṃ tatpurābhavam || 3 ||
[Analyze grammar]

śrotumicchāmi bhagavan yanme'pi smaraṇaṃ bhavet |
puruṣottamaprākaṭyamātraṃ me vada vatsala || 4 ||
[Analyze grammar]

śrīpuruṣottama uvāca |
śṛṇu nārāyaṇīśri tvaṃ kathayāmi nibodha me |
bhuktimuktipradaṃ tattaccaritraṃ mama bhāmini || 5 ||
[Analyze grammar]

vedhaso vatsare pādme kalpā'ṣṭame'ṣṭame manau |
vedhaso nālakhaṇḍādvai rohiṇā'ṇḍodaro'suraḥ || 6 ||
[Analyze grammar]

jajñe brahmāṇḍatulyo vai śarīreṇa balena ca |
tejasā tāmasenāpi trilokibhakṣako'bhavat || 7 ||
[Analyze grammar]

rudreṇa gadayā cāpi triśūlena pratāḍitaḥ |
dudrāva jalamadhye sa rudrastamanvagāttadā || 8 ||
[Analyze grammar]

pṛthivyāvaraṇaṃ bhittvā praviveśā'ṇḍamaṇḍalam |
satyaṃ tapo janaṃ tyaktvā maharlokamupāyayau || 9 ||
[Analyze grammar]

meroḥ sa gahvare sūkṣmo bhūtvā gupto'vasattataḥ |
rudraḥ svargaṃ vīkṣituṃ vai mahendrālayamāyayau || 10 ||
[Analyze grammar]

devāśca pitaraścāpi maharṣayaḥ samāyayuḥ |
indrasabhā prapūrṇā'bhūt sūryacandrādibhistadā || 11 ||
[Analyze grammar]

rohiṇāṇḍodaro jñātvā'vasaraṃ vavṛdhe tadā |
merutulyodaro bhūtvā mukhyaṃ vyādāya tāṃ sabhām || 12 ||
[Analyze grammar]

sasvargāṃ sūryacandrendrarudranakṣatrasaṃyutām |
nyagilat sahasā sarvaṃ svargaṃ tasyodare'bhavat || 13 ||
[Analyze grammar]

hāhākāro mahāñjātaścukṣubhurbhūtalāni ca |
maharjanādilokāścā'kasmādvai pracakampire || 14 ||
[Analyze grammar]

satyaloke mahān kampastadā jāto'tidāruṇaḥ |
lokālokācalaścāpi muhuḥ kampamagāttadā || 15 ||
[Analyze grammar]

akasmāt pralayaṃ jñātvā svargalokasya devatāḥ |
sarudrendrārkaśaśino rohiṇāṇḍodare sthitāḥ || 16 ||
[Analyze grammar]

tuṣṭuvurbhayamāpannā māṃ tadā puruṣottamam |
parabrahma kṛpāsindho sarvarakṣaka mādhava || 17 ||
[Analyze grammar]

namaste bhagavan sarvāntaryāmin parameśvara |
tvāṃ vinā rakṣako nānyaścākasmikalayādiha || 18 ||
[Analyze grammar]

vidyate prāṇanātha tvaṃ rakṣa rakṣa mahālayāt |
kevayaṃ svargavāsāśca kutrā'tra gahvare gatāḥ || 19 ||
[Analyze grammar]

na jānīmo vayaṃ kṛṣṇanarāyaṇa jagadguro |
svargaṃ divyaṃ sarvatejomayaṃ mahati gahvare || 20 ||
[Analyze grammar]

patitaṃ kiṃ ca vā bhūt sattvaṃ vā nyagiladdhi naḥ |
akāle pralayaḥ prāptastasmād rakṣaya rakṣaya || 21 ||
[Analyze grammar]

śaraṇaṃ tava yātāḥ smaḥ samarpitāḥ svayaṃ surāḥ |
ātmanivedinaste'tra yatheṣṭaṃ kuru naḥ kṛte || 22 ||
[Analyze grammar]

ityevaṃ saṃstutaścā'haṃ brahmaṇā'pi ca saṃstutaḥ |
tvayā sākaṃ tadā nārāyaṇīśri rohitodare || 23 ||
[Analyze grammar]

indrasya mānasaḥ putraḥ sacakraścā'bhavaṃ drutam |
anādiśrīkṛṣṇanārāyaṇaḥ śrīpuruṣottamaḥ || 24 ||
[Analyze grammar]

tvaṃ tadā mānasī putrī rudrasyā'pyabhavaḥ priye |
devāḥ pratyakṣatāṃ prāptaṃ māṃ tadā puruṣottamam || 25 ||
[Analyze grammar]

vilokya magnahṛdayāḥ pupūjurhṛdayā'rpaṇaiḥ |
mayā tūrṇaṃ tadā sudarśanaṃ cakraṃ mahat kṛtam || 26 ||
[Analyze grammar]

koṭyaraṃ kartanaṃ rohitāṇḍodarasya varṣmaṇaḥ |
mayā muktaṃ karāttūrṇaṃ nyakartayat tadā'suram || 27 ||
[Analyze grammar]

parito bahudhā gatvā bhramitvā ca muhurmuhuḥ |
cakrotpanno mahānagniścāsuravarṣmakhaṇḍakān || 28 ||
[Analyze grammar]

koṭidhā tatkartitāṃśca bhasmasāt pracakāra ha |
tacca bhasma tadā svarṇaṃ rohitākhyaṃ hyabhūttdā || 29 ||
[Analyze grammar]

rohitāṇḍodaranāśe jāte svasthāḥ surādayaḥ |
māṃ viditvā'kṣareśaṃ śrīmahendrabālakaṃ prabhum || 30 ||
[Analyze grammar]

rakṣakaṃ parameśānaṃ cendrālaye surālaye |
mahotsavaṃ paraṃ kṛtvā rudro vai devasākṣike || 31 ||
[Analyze grammar]

maṇḍape tvāṃ nijāṃ putrīṃ mānasīṃ me dadau tadā |
ramaṇīṃ daivavidhinā prāptavāṃstvāṃ tadā'pyaham || 32 ||
[Analyze grammar]

mama saṃjñā tadā cāsīdanādidyunarāyaṇaḥ |
tadā svarga tathā devā yathāvat sthāpitā mayā || 33 ||
[Analyze grammar]

mama yogabalenaiva vikṛtaṃ sukṛtaṃ kṛtam |
avatārī svayaṃ so'haṃ yo'haṃ cā'trā'smi so'bhavam || 34 ||
[Analyze grammar]

smara raudri priye tatra līlā me tava yoginīḥ |
me'vatārāstatra varṣe pratyahaṃ bahavo'bhavan || 35 ||
[Analyze grammar]

ityevaṃ kathitaṃ cā'dyaṃ janma me mānasaṃ tadā |
atha dvitīyaṃ janmā'pi dvitīye vatsare śṛṇu || 36 ||
[Analyze grammar]

nālakramābhidhe varṣe brahmaṇaḥ prathame'hani |
tṛtīyasya manorante merurnāmnā hi parvataḥ || 37 ||
[Analyze grammar]

caturdaśastarāṇāṃ vai bhāreṇa mahatā tadā |
ākrānto'bhūttadā pātālā'dho viveśa vai manāk || 38 ||
[Analyze grammar]

caturdaśastarairyuktaḥ surā'surālayānvitaḥ |
nimnabhāvaṃ gate merau bhuvanāni caturdaśa || 39 ||
[Analyze grammar]

bhagnāni meruṇā sākaṃ cādhobhāvaṃ gatāni vai |
bhugnāni merupārśveṣu cākṛṣṭāni samantataḥ || 40 ||
[Analyze grammar]

prajātāni tadā satyaṃ svargaṃ bhūśca rasātalam |
sarvaṃ vai budhnabhāvaṃ ca gataṃ cābhūt samantataḥ || 41 ||
[Analyze grammar]

lokālokācalaścāpi prākāro'ṇḍasya sarvataḥ |
āntarābhimukhaṃ kṛṣṭo hrasvavalayatāṃ yayau || 42 ||
[Analyze grammar]

tathāpi tasya balato bhugnānyapi sthirāṇi vai |
bhuvanānyabhavaṃstatra kṣaṇaṃ saṃkucitānyapi || 43 ||
[Analyze grammar]

brahmaviṣṇumaheśādyāḥ staṃbhanāśaṃ vilokya ca |
brahmāṇḍanāśaṃ matvā tadrakṣārthaṃ parameśvaram || 44 ||
[Analyze grammar]

parabrahma hariṃ kṛṣṇanārāyaṇaṃ prabhuṃ tu mām |
astuvan parayā bhītyā rakṣārthaṃ merubhūbhṛtaḥ || 45 ||
[Analyze grammar]

brahmāṇḍasyāsya rakṣārthaṃ lokānāmavanāya ca |
tvamādhāro'si sarveṣāṃ brahmāṇḍānāṃ pareśvara || 46 ||
[Analyze grammar]

sarvasṛṣṭisthairyaśaktistvayyeva vartate prabho |
tavāntarvartamānatvāt sthiraṃ sarvaṃ pravidyate || 47 ||
[Analyze grammar]

bhagavan bhavadutpannaṃ tvadādhāraṃ samastakam |
tvayā hīnaṃ layaṃ ceyāt trāhi nāśābhisannidheḥ || 48 ||
[Analyze grammar]

vinā staṃbhaṃ gṛhaṃ naiva tiṣṭhedaṇḍaṃ tathā tvidam |
meruṃ vinā bhuvanāni tiṣṭheyurnaiva cāmbare || 49 ||
[Analyze grammar]

merurmūle viśatyeva bhārākrāntaḥ starānvitaḥ |
vayaṃ nāśagatāḥ syāma rakṣaṃ meruṃ tadāśrayam || 50 ||
[Analyze grammar]

itistutvā kṣaṇaṃ dhyānaṃ cakrurmama sureśvarāḥ |
ahaṃ lakṣmi tvayā sākaṃ tūrṇaṃ cākṣaradhāmataḥ || 51 ||
[Analyze grammar]

samāyayau satyaloke vedhasaḥ sannidhau drutam |
surāṇāṃ paśyatāṃ tatra vedhasoṃ'kerbhako'bhavam || 52 ||
[Analyze grammar]

ujjvalaḥ koṭisūryābhaḥ sajaṭaḥ sarvabhūṣaṇaḥ |
hasannaṃke samuvāca vedhasaṃ pitarityaham || 53 ||
[Analyze grammar]

sa māṃ putreti sambodhya māyayā cā'grahīt sutam |
devā natvā hariṃ matvā puṣpādyaiḥ parameśvaram || 54 ||
[Analyze grammar]

māmānarcuḥ stavaṃ cakruḥ rakṣetyūcuḥ punaḥ punaḥ |
anādiśrīmerunārāyaṇanāmā suto'pyaham || 55 ||
[Analyze grammar]

tūrṇaṃ tvāṃ paramāṃ śaktiṃ kṛtvā meroḥ pradhāriṇīm |
mama rūpe'tisampannāṃ līnāṃ kṛtvā'tisatvaram || 56 ||
[Analyze grammar]

devān brahmādikān nītvā saha pātālamāyayau |
merumūlaṃ pṛthivyāṃ yannihitaṃ tadapūjayam || 57 ||
[Analyze grammar]

tvāṃ prapūjya mahānārāyaṇīśri cādideśa ha |
atra śaktisvarūpā tvaṃ viśeti sahasā tadā || 58 ||
[Analyze grammar]

tvaṃ praviṣṭā mahāśaktirmayā sṛṣṭā mayā'nvitā |
mayā merustadā devaiḥ sākaṃ mūle samuddhṛtaḥ || 59 ||
[Analyze grammar]

uttolito'tibalibhiḥ sākaṃ brahmādibhiḥ saha |
yathāpekṣa tato meruśconnatiṃ pragato'bhavat || 60 ||
[Analyze grammar]

bhuvanāni samastāni samasūtratalāni ca |
babhūvurvāsayogyāni devādyāḥ sukhino'bhavan || 61 ||
[Analyze grammar]

tvayā lakṣmi nijacchāyātmikayā dhṛtisaṃjñayā |
tadārabhya dhṛtaścāyaṃ merurmūle ciraṃ sadā || 62 ||
[Analyze grammar]

ahaṃ viveśa ca tatra merau dhāraṇarūpavān |
ambarākarṣaṇarūpo'ntarātmā merugarbhagaḥ || 63 ||
[Analyze grammar]

evaṃ merau paraṃ kṛtvā sthairyaṃ tataḥ surādibhiḥ |
saha mūlāni lokānāṃ merulagnāni vīkṣya ca || 64 ||
[Analyze grammar]

sulagnāni tadā kṛtvā sthirāṇyāsthāya vai kramāt |
rasātalāttathā mahātalāt talātalāttathā || 65 ||
[Analyze grammar]

sutalād vitalāccāpi tathā'talād bhuvaṃ prati |
ājagāma tvayā sākaṃ bhuvaḥ svaśca maharjanam || 66 ||
[Analyze grammar]

tapaḥ satyaṃ paraṃ gatvā cājaputraḥ sthiro'bhavam |
anādiśrīmerunārāyaṇo'haṃ vedhasaḥ sutaḥ || 67 ||
[Analyze grammar]

meruputryā tvayā sākaṃ surādibhirvivāhitaḥ |
ākalpāntaṃ tadā cāsaṃ sarvarakṣaṇahetave || 68 ||
[Analyze grammar]

avatārī svayaṃ kṛṣṇanārāyaṇaḥ pareśvaraḥ |
avatārāstadā varṣe kalpe kalpe mamā'bhavan || 69 ||
[Analyze grammar]

aneke kāryavaśagā yatpāro naiva vidyate |
mahānārāyaṇīśri tvaṃ smara svatsaṃbhava tadā || 70 ||
[Analyze grammar]

mamāpi saṃbhavaṃ merunārāyaṇātmakaṃ śubham |
athā'nye vatsare lakṣmi tṛtīye vedhaso'pi ca || 71 ||
[Analyze grammar]

kathayāmi janurme'tra śṛṇu kṛṣṇanarāyaṇi |
nālordhvavatsare cādye kalpe manau tṛtīyake || 72 ||
[Analyze grammar]

nārāyaṇi tadā svarge bhūtale sūryamaṇḍalam |
aśātitaṃ tu lokānāṃ bhasmasāt kārakaṃ hyabhūt || 73 ||
[Analyze grammar]

lakṣaraśmiyutaṃ cāsīd dāhakaṃ sarvatomukham |
diśāṃ vidiśāṃ lokānāṃ grahāṇāṃ sṛṣṭidehinām || 74 ||
[Analyze grammar]

bhūtalānāṃ ca sarveṣāṃ samudrāṇāṃ ca dāhakam |
bhuvaḥsthānāṃ vāyavīyasṛṣṭīnāṃ dāhakaṃ hyabhūt || 75 ||
[Analyze grammar]

lokālokasyāpi merordāhakaṃ vanavāsinām |
nakṣatrāṇāṃ ca tārāṇāṃ dāhakaṃ janavāsinām || 76 ||
[Analyze grammar]

maharlokanivāsānāṃ tathordhvavāsināmapi |
samantato'bhavaccāpi dāhakaṃ bhasmasātkaram || 77 ||
[Analyze grammar]

taddāhaduḥkhamāsādya manavo devatāstathā |
sarvalokanivāsāśca tuṣṭuvurvedhasaṃ tadā || 78 ||
[Analyze grammar]

brahmā stutiṃ samākarṇya yayau sūryasya śāntaye |
so'pi dagdhaḥ parāvṛtya satyalokaṃ yayau tadā || 79 ||
[Analyze grammar]

śaṃkaro vai mahāśāntiṃ kartuṃ yayau raviṃ prati |
so'pi dagdho namaskṛtya parāvṛtyā'kriyo'bhavat || 80 ||
[Analyze grammar]

tato viṣṇustathā devā militvā parameśvaram |
tuṣṭuvurmāṃ kṛṣṇanārāyaṇaṃ śrīpuruṣottamam || 81 ||
[Analyze grammar]

sūryatejaḥpraśāntyarthaṃ namaścakruḥ punaḥpunaḥ |
koṭisūryapraṇetastvaṃ bhagavan parameśvara || 82 ||
[Analyze grammar]

jagaccakṣurjagatprabhāprada sūryāt prarakṣaya |
vayaṃ trilokavāsāśca tathā'nye cordhvavāsinaḥ || 83 ||
[Analyze grammar]

dagdhā bhavāmaḥ sūryasyā'nalairlakṣaprasarpibhiḥ |
tvayā kṛtaṃ jagat sarvaṃ saprakāśaṃ sukhārthakam || 84 ||
[Analyze grammar]

tadyadi syād dagdhabhasma kiṃ sūryasya prayojanam |
tasmād rakṣaya deveśa taptān śāntān vidhehi naḥ || 85 ||
[Analyze grammar]

ityuktvā pradaduḥ pūjāṃ bahvīṃ me'rpaṇarūpiṇīm |
anādiśrīkṛṣṇanārāyaṇāya paramātmane || 86 ||
[Analyze grammar]

tadā'haṃ kamale sākaṃ tvayā tūrṇaṃ narāyaṇaḥ |
akṣarādāyayau satyaṃ brahmasthānaṃ tataḥ param || 87 ||
[Analyze grammar]

devaiḥ sampūjitaścāhaṃ viṣṇoraṃke'bhavaṃ sutaḥ |
sahasrahastakaḥ saumyaḥ kirīṭakuṇḍalādimān || 88 ||
[Analyze grammar]

śāṇaśastrādiyuktaśca sudhāmṛtaghaṭādimān |
sudarśanaṃ mayā tatra śāṇātmakaṃ kṣaṇāt kṛtam || 89 ||
[Analyze grammar]

sarvāgniśāmakaṃ sudhāmṛtaṃ śātanaśaktikam |
mayā lakṣmi tadā''jñaptā tvaṃ devī śātanī bhava || 90 ||
[Analyze grammar]

sūrye praviśya ca tatrā'mṛtaṃ dhāraya śātani |
auṣṇyaṃ yadvad bhavennyūnaṃ tathā vidhehi satvaram || 91 ||
[Analyze grammar]

tvaṃ cājñāṃ me samādāya tūrṇaṃ vahnisvarūpiṇī |
mahātejomayī bhūtvā'rbudatāpakarī satī || 92 ||
[Analyze grammar]

amṛtaṃ ca samādāya praviṣṭā sūryamaṇḍalam |
śanaiḥ sudhāṃ ca tadgarbhe sannihitavatī tataḥ || 93 ||
[Analyze grammar]

śanaiḥ śanaiḥ kiraṇāni śāntimāptāni vai raveḥ |
tvama ca śanaiḥ śanaistatra svaṃ tejaḥ samupāharaḥ || 94 ||
[Analyze grammar]

tataścā'haṃ tava rūpe śāṇe yantre raviṃ tadā |
dhṛtvā tejo'titīkṣṇāṃśca pradeśānapyaśātayam || 95 ||
[Analyze grammar]

sarvān vibhidya taddeśān devādibhyastadā'dadam |
te cakruścāyudhānyeva cāvyāhatāni vai tadā || 96 ||
[Analyze grammar]

sūryo mayā kṛtastatra sahasrāṃśuḥ sukhapradaḥ |
anyeṃ'śavastvayā lakṣmi līnīkṛtāḥ svavarṣmaṇi || 97 ||
[Analyze grammar]

tata ārabhya sūryaḥ sa lokasampatkaro'bhavat |
sā tvaṃ tataśca tatputrī saurī śātanikā'bhidhā || 98 ||
[Analyze grammar]

abhavaḥ sā mayā viṣṇuputreṇa sūryaśātinā |
anādiśrīkṛṣṇanārāyaṇenāpi vivāhitā || 99 ||
[Analyze grammar]

kalpāntaṃ cā'vasastatra smara tvaṃ tanmayā saha |
āsīnnārāyaṇīśri yat sūryakarmā'bhavaṃ prabhuḥ || 100 ||
[Analyze grammar]

parabrahma svayaṃ sūryakarmā'haṃ cā'bhavaṃ priye |
evaṃ tatrāpi varṣe cā'vatārā mama koṭiśaḥ || 101 ||
[Analyze grammar]

sañjātā dharmaguptyarthaṃ rakṣārthaṃ dehināṃ tathā |
avatārī svayaṃ prokto'nādiviṣṇunarāyaṇaḥ || 102 ||
[Analyze grammar]

tṛtīyaṃ mama vai lakṣmi prākaṭyaṃ tatra vatsare |
jānāmyahaṃ ca tatsarvaṃ hastā''malakavat priye || 103 ||
[Analyze grammar]

māṃ bhajitvā tadā muktiṃ gatā hyasaṃkhyadehinaḥ |
paṭhanācchravaṇāccāpi bhuktirmuktirbhavettathā || 104 ||
[Analyze grammar]

itiśrīlakṣmīnārāyaṇīyasaṃhitāyāṃ tṛtīye dvāparasantāne vedhasaḥ prathame varṣe'nādiśrīdyunārāyaṇasya rohiṇāṇḍodarā'suranigalitasvargarakṣārtham dvitīye varṣe svabhāreṇa |
nimajjato merordhāraṇārtham anādimerunārāyaṇasya tṛtīye varṣe dāhayato raveḥ śātanārtham anādiviṣṇunārāyaṇasya ca prākaṭyamitinirūpaṇanāmā tṛtīyo'dhyāyaḥ || 3 ||
[Analyze grammar]