Chapter 2

śrīnārāyaṇīśrīruvāca |
vedhaso'sya harekṛṣṇa puruṣottama matpate |
dvāpañcāśadvatsarāṇāṃ nāmāni vettumeva me || 1 ||
[Analyze grammar]

icchā prajāyate tasmād vada śrīpuruṣottama |
manūnāṃ cāpi ca caturdaśānāṃ nāmamātrakam || 2 ||
[Analyze grammar]

vettumicchāmi bhagavan kalpe vārāhake tvaham |
ekapañcāśattame'bde ye kalpāścāntato gatāḥ || 3 ||
[Analyze grammar]

tānapi vettumicchāmi tava prākaṭyayoginaḥ |
saṃkṣepād vada me kānta yadi bhāro na vidyate || 4 ||
[Analyze grammar]

śrīpuruṣottama uvāca |
brahmaṇo'sya vatsarastu prathamaḥ padmavatsaraḥ |
nālakramo dvitīyaśca nālordhvagastṛtīyakaḥ || 5 ||
[Analyze grammar]

turyaṃ stāvanavarṣaṃ ca vyomavāṇaṃ tu pañcamam |
ṣaṣṭhaṃ tapovapsaraṃ ca saptamaṃ yamavatsaram || 6 ||
[Analyze grammar]

niyamaṃ cāṣṭamaṃ cāpi varṣaṃ navamamāsanam |
daśamaṃ prāṇarodhākhyaṃ caikādaśaṃ pratihṛtiḥ || 7 ||
[Analyze grammar]

dvādaśaṃ dhāraṇaṃ varṣaṃ dhyānavarṣaṃ trayodaśam |
caturdaśaṃ tu mananaṃ pañcadaśaṃ samādhikam || 8 ||
[Analyze grammar]

ṣoḍaśaṃ prajñātavarṣaṃ brahmaṇaḥ parikīrtitam |
aprajñātaṃ saptadaśaṃ cāṣṭādaśaṃ tu līnatā || 9 ||
[Analyze grammar]

navadaśaṃ vatsaraṃ tu sākṣātkārābhidhaṃ tataḥ |
viṃśatitamavarṣaṃ ca sṛṣṭibhānābhidhaṃ tataḥ || 10 ||
[Analyze grammar]

ekaviṃśatitamaṃ vai vedavatsarasaṃjñakam |
rudravatsaranāmnā ca dvāviṃśo vatsarastataḥ || 11 ||
[Analyze grammar]

sanātanastrayoviṃśaścaturviṃśastathā''rṣakaḥ |
dharmavarṣaṃ pañcaviṃśaṃ ṣaḍviṃśo'naṅgavatsaraḥ || 12 ||
[Analyze grammar]

saptaviṃśo'dharmasaṃjño'ṣṭāviṃśo'nalavatsaraḥ |
navaviṃśaṃ pitṛvarṣaṃ triṃśastu devavatsaraḥ || 13 ||
[Analyze grammar]

ekatriṃśaṃ mānavākhyaṃ dvātriṃśaṃ kalpapādapam |
trayastriṃśaṃ sasyasaṃjñaṃ catustriṃśaṃ tu pāśavam || 14 ||
[Analyze grammar]

pañcatriṃśaṃ yākṣavarṣaṃ ṣaḍviṃśaṃ rākṣasābhigham |
saptatriṃśaṃ cāṇḍajākhyamaṣṭātriṃśaṃ tu gharmajam || 15 ||
[Analyze grammar]

navatriṃśaṃ nāgavarṣaṃ catvāriṃśaṃ tu yādasam |
adhvarākhyaścaikacatvāriṃśo vai vatsarastataḥ || 16 ||
[Analyze grammar]

hiraṇyavatsaraṃ dvācatvāriśaṃ ca tataḥ param |
rājataṃ tricatvāriṃśaṃ kāpālakaṃ tataḥ param || 17 ||
[Analyze grammar]

apsarovatsaraṃ pañcacatvāriṃśaṃ tato'bhavat |
brahmasarovatsaraṃ ca svardhūnīvatsaraṃ tataḥ || 18 ||
[Analyze grammar]

arcimārgā'bhidhamaṣṭacatvāriṃśaṃ ca vatsaram |
abdhimanthaṃ tato varṣaṃ nāradākhyaṃ ca vatsaram || 19 ||
[Analyze grammar]

ekapañcāśattama somanāthavatsaraṃ tataḥ |
dvipañcāśattamaṃ varṣaṃ vaiṣṇavākhyaṃ bhaviṣyati || 20 ||
[Analyze grammar]

gāyatrīvatsaraṃ tripañcāśattamaṃ pravartsyate |
ekapañcāśattame'yaṃ vārāho nāma kalpakaḥ || 21 ||
[Analyze grammar]

mayā vārāharūpeṇa kṣitirjalāt samuddhṛtā |
atra vai manavo bhūpā bhaviṣyanti caturdaśa || 22 ||
[Analyze grammar]

svāyaṃbhuvo manuḥ pūrvastataḥ svārociṣo manuḥ |
uttamaśca tāmasaśca raivataścākṣuṣastataḥ || 23 ||
[Analyze grammar]

vaivasvataśca sāvarṇī cāṣṭamo manureva ha |
navamo dakṣasāvarṇī brahmasāvarṇikastataḥ || 24 ||
[Analyze grammar]

tataśca dharmasāvarṇiḥ rudrasāvarṇikastataḥ |
tataśca devasāvarṇiścendrasāvarṇikastataḥ || 25 ||
[Analyze grammar]

caturdaśaite manavaścendrāścāpi caturdaśa |
divase samprajāyante rātrau tāvān layo mataḥ || 26 ||
[Analyze grammar]

kalpe kalpe bhavāmyeva pṛthivyāṃ puruṣottamaḥ |
te pañcāśatsahasrāṇi kalpāstu brahmaṇo gatāḥ || 27 ||
[Analyze grammar]

nārāyaṇi hyavatārī tāvatsaṃkhyo'bhavaṃ kṣitau |
anādiśrīkṛṣṇanārāyaṇaḥ śrīpuruṣottamaḥ || 28 ||
[Analyze grammar]

yuge yuge tvavatārā me bhavanti yathākriyam |
teṣāṃ saṃkhyā na cāstyeva jānāmyahaṃ na cetare || 29 ||
[Analyze grammar]

tatra nāmānyanantāni bhavanti guṇakarmabhiḥ |
kintu kalpe tvekavāraṃ bhavāmi puruṣottamaḥ || 30 ||
[Analyze grammar]

anādiśrīkṛṣṇanārāyaṇo'haṃ bālakṛṣṇakaḥ |
avatārī koṭibhaktabhaktānīpatirīśapaḥ || 31 ||
[Analyze grammar]

yatra kalpe samāraṃbhe yo'vatāro bhavenmama |
tena nāmnā'pi ca mayā sa vai kalpaḥ prakāśyate || 32 ||
[Analyze grammar]

tasmāt kalpābhidhānāni madvijñānakṛtāni vai |
na śakyamānupūrvyeṇa teṣāṃ vaktuṃ pravistaram || 33 ||
[Analyze grammar]

anāditvāddhi kālasya hyasaṃkhyānācca vedhasām |
ābhūtasamplavo hyetadahorātraṃ smṛtaṃ tataḥ || 34 ||
[Analyze grammar]

trailokye yāni sattvāni gatimanti dhruvāṇi ca |
ābhūtebhyaḥ pralīyante tasmādābhūtasamplavaḥ || 35 ||
[Analyze grammar]

caturyugasahasrānte divase brahmaṇo gate |
suṣupsurviśvasṛṭ naijāṃ rātriṃ vai kurute tataḥ || 36 ||
[Analyze grammar]

tataḥ sa vasati rātriṃ tamasyekārṇave jale |
prātaḥ sisṛkṣayā yukto yathāpūrvaṃ karoti ca || 37 ||
[Analyze grammar]

vatsarāraṃbhadivase brahmā yadyat karoti hi |
pradhānaṃ karma tannāmnā vatsaro vāpi jāyate || 38 ||
[Analyze grammar]

tatpañcāśattame varṣe vedhasaḥ kalpakeṣvaham |
bahuvāraṃ samutpanno nārāyaṇyā tvayā samam || 39 ||
[Analyze grammar]

brāhmakalpe pādmakalpe vairājakalpake tathā |
śvetakalpe lohite ca kṛṣṇakalpe'bhavaṃ tathā || 40 ||
[Analyze grammar]

sanatkalpe bhavakalpe bhuvaḥ kalpe'bhavaṃ tathā |
tapaḥkalpe bhāvakalpe raṃbhakalpe ṛtau tathā || 41 ||
[Analyze grammar]

ṛtukalpe vahnikalpe havyavāhanake'pi ca |
anādiśrīkṛṣṇanārāyaṇaścāhaṃ tadā'bhavam || 42 ||
[Analyze grammar]

sāvitrakalpe bhuvaḥkalpe cośikakalpake |
kuśike cāpi gāndhāre ṛṣabhe ṣaṭjakalpake || 43 ||
[Analyze grammar]

mārjālīye madhyame ca vairāje kalpake'pi ca |
niṣāde prāṇake cāpi meghavāhye'bhavaṃstathā || 44 ||
[Analyze grammar]

cintake cā'kūtike vijñātau mānase'pi ca |
bhāve rathantare śvetalohite raktavāsasi || 45 ||
[Analyze grammar]

pīte ca sitakalpe ca viśvarūpe'bhavaṃstathā |
tadanyeṣu ca kalpeṣu yathākāryaṃ narāyaṇi || 46 ||
[Analyze grammar]

abhavaṃścā'bhavaṃścāpi me'vatārā asaṃkhyakāḥ |
kalpe kalpe'pi bahudhā śrīstvaṃ bahvī prajāyase || 47 ||
[Analyze grammar]

mama patnī yathā tvadya vivāhyā mama jāyase |
tava nāmānyanantāni te'vatārā asaṃkhyakāḥ || 48 ||
[Analyze grammar]

jānāmyahaṃ tu tatsarvaṃ nārāyaṇīśri sarvathā |
nārāyaṇi tvidaṃ sarvaṃ vyāptaṃ mamaiva tejasā || 49 ||
[Analyze grammar]

mama lakṣmyā mamaiśvayairmadguṇairmadvibhūtibhiḥ |
madaṃśairmama sāmarthyairmama sampatsamṛddhibhiḥ || 50 ||
[Analyze grammar]

pataṃge cāpi mattejaḥ pradīpe'pi ca māmakam |
vidyuti grahanakṣatratārāsu śaśisūryayoḥ || 51 ||
[Analyze grammar]

mama tejo hi sarvatra tejasvino mayā hi te |
maṇyoṣadhiṣu dyumārge svarge jane tapasyapi || 52 ||
[Analyze grammar]

maharloke satyaloke merau tejo hi māmakam |
lokāloke śaṃkare ca viṣṇau cāje virājake || 53 ||
[Analyze grammar]

mahāviṣṇau pradhāneśe prakṛtīśe'kṣare'pi ca |
mukteṣu cāpi sarveṣu cāvatāreṣu sarvathā || 54 ||
[Analyze grammar]

aiśvaryaguṇatejāṃsi mamaiva santi tāni vai |
mama mūrteḥ kiraṇaiste puṣṭiṃ tṛptiṃ vidanti ca || 55 ||
[Analyze grammar]

puruṣottamamūrteśca kiraṇānāṃ vicitratā |
puṣṇāti muktajātāni vibhinnatṛptidānataḥ || 56 ||
[Analyze grammar]

sadā ṣoḍaśavarṣo'haṃ caikamāno'kṣare pare |
poṣayāmi muktajanān mahānandādidānakaiḥ || 57 ||
[Analyze grammar]

mama tejāṃsi sarvāṇi mahānandamatāni vai |
śāntiśītalatātṛptisudhābhṛtāni santi ca || 58 ||
[Analyze grammar]

tadbhoktāro muktajanā muktānyaśca tvayā saha |
śāśvatānandapūrṇāste nityatṛptā bhavanti hi || 59 ||
[Analyze grammar]

romṇāṃ mūrteḥ kiraṇāni niryānti rasabhṛnti vai |
sṛṣṭitrayasyauṣadhayaḥ puṣṇanti tadrasaiḥ sadā || 60 ||
[Analyze grammar]

muktāśca tadrasaiḥ puṣṭāḥ sarvadaikapramāṇinaḥ |
eṣāṃ tejāṃsi netrābhyāṃ niryānti bhāskarāṇi vai || 61 ||
[Analyze grammar]

tatprabhābhiḥ prapaśyanti sṛṣṭitrayasya dehinaḥ |
dakṣanetrakiraṇebhyaḥ sūryā bhavanti sarvaśaḥ || 62 ||
[Analyze grammar]

vāmanetrakiraṇebhyaścandrā bhavanti sarvaśaḥ |
mastakasya ca paridherbhavanti stanayitnavaḥ || 63 ||
[Analyze grammar]

sṛṣṭitrayasya vai vidyutpravāhāśca bhavantyapi |
mukhamādhuryatejāṃsi nissarantyabhito hareḥ || 64 ||
[Analyze grammar]

tanmādhuryamadhubhiśca tṛpyanti muktakoṭayaḥ |
tṛptibhṛdbhirhi kiraṇaiḥ sṛṣṭitrayasya dehinaḥ || 65 ||
[Analyze grammar]

kapolābhyāṃ mama mūrterniryānti mohinīprabhāḥ |
tābhirmuktāstatheśādyā mugdhā mūrtau bhavanti vai || 66 ||
[Analyze grammar]

oṣṭhābhyāṃ cāmṛtabhṛnti niryānti kiraṇāni vai |
tadrasāmṛtapānena tṛpyanti trisṛjisthitāḥ || 67 ||
[Analyze grammar]

netraprāntāt prabhavanti tejāṃsi premabhṛnti ca |
taiścākṛṣṭāḥ premabhāgā jāyante trisṛjisthitāḥ || 68 ||
[Analyze grammar]

sudhābhṛtāni dantebhyo jāyante kiraṇāni vai |
sudhāpānaiḥ sṛṣṭayo vai sarvāstṛpyanti sarvadā || 69 ||
[Analyze grammar]

pīyūṣāṇāṃ kiraṇāni bhālamadhyād bhavanti vai |
pīyūṣapānatṛptāśca jāyante trisṛjisthitāḥ || 70 ||
[Analyze grammar]

karṇābhyāṃ saṃprajāyante tāratejaḥsvarātmakāḥ |
tejaḥpravāhāstaiḥ sarve śṛṇvanti divyakarṇakāḥ || 71 ||
[Analyze grammar]

mūrterabhito jāyante miṣṭasparśāḥ sukhāvahāḥ |
spārśanaiḥ kiraṇaiḥ spṛṣṭā bhuñjate sukhamācyutam || 72 ||
[Analyze grammar]

jihvātaḥ kiraṇānīṣṭamiṣṭarasāni yānti hi |
sarvasṛṣṭijanāstaistu rasyante'danti tadrasam || 73 ||
[Analyze grammar]

nāsikātaḥ kiraṇāni gandhavanti prayānti ca |
tadgandhaiḥ sarvasṛṣṭisthā jighranti vai sugandhikam || 74 ||
[Analyze grammar]

śrīharerme hṛdayāttu nissarantyabhitaḥ khalu |
śāśvatānandapūrṇāni kiraṇāni sukhāni vai || 75 ||
[Analyze grammar]

tairmahānandamagnāśca vartante trisṛjisthitāḥ |
mama mūrghnaścidākāśātmakabrahmākhyarandhrataḥ || 76 ||
[Analyze grammar]

prabhavanti mahānandā miṣṭā vāṇī parā tathā |
tābhyaḥ sṛṣṭitrayasthāśca vyāharanti vacāṃsi hi || 77 ||
[Analyze grammar]

madvācā vāgminaḥ sarve matkṛtārthānuyoginaḥ |
maddhastābhyāṃ kiraṇāni kriyāvanti prayānti ca || 78 ||
[Analyze grammar]

taiśca sṛṣṭitrayasthā vai bhavanti yatnaśīlinaḥ |
mamodarāt kiraṇāni niryānti paritastathā || 79 ||
[Analyze grammar]

prāṇadāni ca taiḥ sarve jīvanti trisṛjisthitāḥ |
mama prajananād yāntyānandāḍhyakiraṇāni vai || 80 ||
[Analyze grammar]

tanmātrayā''nandavantaḥ sṛṣṭitrayasthadehinaḥ |
manmūrteḥ pādayoryānti vihārakiraṇāni vai || 81 ||
[Analyze grammar]

tairbhavanti sagatikāḥ sṛṣṭitrayasya dehinaḥ |
manmūrteḥ kaṭibhāgācca prayānti kiraṇāni ha || 82 ||
[Analyze grammar]

sabalāni ca taiḥ sarve balavanto bhavanti hi |
pṛṣṭhadaṇḍāt kiraṇānyādhāravanti prayānti ca || 83 ||
[Analyze grammar]

tena lokāṇḍakoṭyaścā''dhārastaṃbhāśritāḥ sadā |
mama pāyūtsarjabhāso yānti vai sṛṣṭikoṭiṣu || 84 ||
[Analyze grammar]

tābhirbhābhiḥ samutsargo jananāni bhavanti ca |
mama nitambabhāgābhyāṃ kiraṇāni prayānti ca || 85 ||
[Analyze grammar]

āsyaśaktyā''sanabaddhāḥ sarve lokā bhavanti taiḥ |
mamā''ntaragatā bhāsaḥ prayānti sarvasṛṣṭiṣu || 86 ||
[Analyze grammar]

tābhirbhābhirmananaṃ ca bodhanaṃ mānanaṃ tathā |
cintanaṃ nirṇayaṃ sākṣādvijñānaṃ yānti dehinaḥ || 87 ||
[Analyze grammar]

mama kaustubhakiraṇaiḥ pradīpāḥ saṃbhavanti ca |
mama saundaryakiraṇaiḥ sundaryaḥ sṛṣṭayastvimāḥ || 88 ||
[Analyze grammar]

mama lakṣmyāśca kiraṇairgṛhiṇyaḥ sarvasṛṣṭiṣu |
gṛhalakṣmyo bhavantyeva sarvasaubhāgyaśobhitāḥ || 89 ||
[Analyze grammar]

mama vātsalyakiraṇaiḥ snehabaddhā hi sṛṣṭayaḥ |
mamodāryaprabhābhiścaudāryayuktā hi sṛṣṭayaḥ || 90 ||
[Analyze grammar]

mamā'bhirūpakiraṇaiḥ sarvaṃ rūpānvitaṃ sadā |
mama kalpākhyakiraṇaiḥ kāmāvasāyitādikāḥ || 91 ||
[Analyze grammar]

siddhayaḥ sampravartante kalpapādapavallayaḥ |
mama dharmapradaraśmibhiśca tṛpyaṃ sṛjitrayam || 92 ||
[Analyze grammar]

pākaṃ ca pariṇāmaṃ ca prayānti taiśca sṛṣṭayaḥ |
mama raudraiśca kiraṇaistirobhāvaṃ prayāntyapi || 93 ||
[Analyze grammar]

sthairyaśaktimayaiścāpi kiraṇaiḥ sarvamaṇḍalam |
sṛṣṭitrayātmakaṃ svasvakramasthairye pravartate || 94 ||
[Analyze grammar]

mamā''pūrakakiraṇairāpūryante hi sṛṣṭayaḥ |
mama puṇyakakiraṇaiḥ pūyante ceśvarādayaḥ || 95 ||
[Analyze grammar]

mama vijñānakiraṇaiḥ sārvajñyaṃ yanti dehinaḥ |
mama kṛpāprabhābhiśca samudyanti hi dehinaḥ || 96 ||
[Analyze grammar]

mama śobhāprabhābhiśca śobhante sṛṣṭināyakāḥ |
mama guptapratejobhirnigūḍhaiśvaryayoginaḥ || 97 ||
[Analyze grammar]

mama mūrternididhyāsairmanmayāḥ sādhavaḥ sadā |
saditi mama cākhyāsti tadvanto ye bhavanti vai || 98 ||
[Analyze grammar]

mamā''tyantasayujāste santo manmūrtayaḥ priyāḥ |
bhavatyaḥ kāśikākṣetre vidhāyāgniṃ pradakṣiṇam || 99 ||
[Analyze grammar]

mama sāyujyamāpannāḥ satyo manmūrtayaḥ priyāḥ |
māmārādhya mama yoga gatāste mūrtayo mama || 100 ||
[Analyze grammar]

muktāśceśāḥ surā viprāḥ santo gāvaśca kanyakāḥ |
kumārā brahmaśīlāśca satyaśca mūrtayo mama || 101 ||
[Analyze grammar]

mama mūrteḥ kiraṇaiśca sattāvadbhiḥ sṛjitraye |
prajāyante tu rājāno madyogānmūrtayo mama || 102 ||
[Analyze grammar]

indraḥ svāyaṃbhuvo brahmā vairājastatpitā'pi ca |
tatpituśca pitā cāpi sarvāstā mama mūrtayaḥ || 103 ||
[Analyze grammar]

śacī śatasvarūpā sāvitrī vairājikā tathā |
mahālakṣmīḥ pradhānā ca prakṛtirmama mūrtayaḥ || 104 ||
[Analyze grammar]

vāsudevādayo vyūhāḥ śrīkṛṣṇādyāśca mūrtayaḥ |
nārāyaṇāstathā santaḥ sādhvyaśca mama mūrtayaḥ || 105 ||
[Analyze grammar]

agnirviṣṇuḥ suvarṇaṃ ca hṛdayaṃ cetanaṃ guruḥ |
yugalaṃ tulasī satyaṃ sarvadā mama mūrtayaḥ || 106 ||
[Analyze grammar]

vedaḥ sūryo vyavasāyo daṇḍaḥ sneho'tithiḥ sukham |
arbhakaścāśrito'nātho vidyārthī mama mūrtayaḥ || 107 ||
[Analyze grammar]

rājā''cāryaḥ pradhānaścopadeṣṭā vyāsa ārtihāḥ |
rakṣakaḥ pālakaḥ svāmī śaraṇyo mama mūrtayaḥ || 108 ||
[Analyze grammar]

yajñaḥ śrāddha pūjanaṃ ca svāgataṃ madhuparkakam |
dakṣiṇā havyakavyādi manmayaṃ mama mūrtayaḥ || 109 ||
[Analyze grammar]

kaṇḍanī peṣaṇī cullī jalakumbhī ca mārjanī |
madarthaṃ tūpayuktāstāḥ pāvanyo mama mūrtayaḥ || 110 ||
[Analyze grammar]

śayyā yānaṃ vāhanaṃ ca godhanādyaṃ gṛhādikam |
madarthaṃ copayuktaṃ cet sarvaṃ manmūrtirūpi tat || 111 ||
[Analyze grammar]

sarvaṃ madanvitaṃ nārāyaṇīśri tvaṃ yathā mama |
madarthaṃ cet kṛtaṃ sarvaṃ mama sāyujyadaṃ bhavet || 112 ||
[Analyze grammar]

ityevaṃ kathitaṃ te'tra bhojanaṃ mūrtirūpyaham |
sarveṣāṃ pṛccha me cānyajjijñāsitaṃ tu te yadi || 113 ||
[Analyze grammar]

paṭhitvemaṃ tathā śrutvā madbhāvaṃ cāpnuyāt priye |
muktiṃ muktiṃ labhet tīrthaphalaṃ yogaphalaṃ labhet || 114 ||
[Analyze grammar]

iti śrīlakṣmīnārāyaṇīyasaṃhitāyāṃ tṛtīye dvāparasantāne vedhaso dvāpañcāśadvatsaranāmāni vartamānakalpīyacaturdaśamanunāmāni pañcāśadvarṣīyā'ntimacatvāriṃśatkalpanāmāni puruṣottamakiraṇapoṣyaṃ sṛṣṭitrayādītivibhūtivarṇanamityādinirūpaṇanāmā dvitīyo'dhyāyaḥ || 2 ||
[Analyze grammar]