Chapter 296

śrīkṛṣṇa uvāca |
rādhike yatra bhagavān samuvāha ca maṇḍape |
kanyakāstatra vai tīrthamudvāhasaṃjñakaṃ sadā || 1 ||
[Analyze grammar]

varaṇāyāṃ tathā koṭitīrthaṃ mokṣapradaṃ śubham |
koṭyarbudā'bjarūpeṇa bhagavāṃstā gṛhītavān || 2 ||
[Analyze grammar]

tadā śivapuraṃ tīrthaṃ pārvatīpattanaṃ tathā |
maṇḍapākhyaṃ yajñatīrthaṃ sārabhūtalamucyate || 3 ||
[Analyze grammar]

paṃcamyāṃ tripraharānte vidāyaṃ śaṃkaro dadau |
kṛṣṇapakṣasamastebhyo bahudravyāṇi sandadau || 4 ||
[Analyze grammar]

kṛṣṇasya pūjanaṃ cakre pituścāpi kṣamāpanam |
mahīmānādivargāṇāṃ nyūnasevākṣamāpanam || 5 ||
[Analyze grammar]

arthayāmāsa sagalatkaṇṭho vai śivarāṭ svayam |
śivachatro'pi rājā'sau kṣamāṃ tadā''rthayanmuhuḥ || 6 ||
[Analyze grammar]

bhojyapānādikaṃ śreṣṭhaṃ prapakvānnaṃ ghṛtāktakam |
pātheyaṃ pradadau cāpi rakṣakaprāpakārthakam || 7 ||
[Analyze grammar]

yautakaṃ ca nyadhāt sarvaṃ śreṣṭhe vimānake haraḥ |
vaimānikaṃ dadau cāpi gaṇaṃ vimānavāhakam || 8 ||
[Analyze grammar]

atha vādyānyavādyanta vidāyasūcakāni tu |
yantraśabdā ajāyanta gītiśabdāḥ śubhāstadā || 9 ||
[Analyze grammar]

śiveśvaro mimelā'pi gopālaṃ kṛṣṇakaṃ hṛdā |
kṣamāpanīyaḥ sevāyāṃ nyūnatvehamuvāca ha || 10 ||
[Analyze grammar]

āgantavyaṃ nijaṃ matvā gṛhaṃ māṃ ca kuṭumbakam |
putrī ca bhavadīyeti matvā rakṣyā hi mānada || 11 ||
[Analyze grammar]

kuśalaṃ lekhanīyaṃ ca prāpya kuṃkumavāpikām |
tadbhātṛbhyo lakṣmiṇaśca kuṭumbijanatastathā || 12 ||
[Analyze grammar]

bhāvavadbhyastathā bhrātṛputrebhyaḥ sakalo hariḥ |
devamayasamastebhyaḥ kṣamāmayācateśvaraḥ || 13 ||
[Analyze grammar]

akṣarānmuktavṛndāśca vāsudevāttathā kṣamām |
pradyumnādaniruddhācca bhūnmaścāpi virājakāt || 14 ||
[Analyze grammar]

avatārasamastebhyo nārāyaṇānnarāttathā |
viṣṇoścāpi mahāviṣṇorbrahmaṇaḥ śaṃkarāttathā || 15 ||
[Analyze grammar]

aryamṇaśca sanatkumārādibhyaśca satastathā |
munisādhudevadevīrnārībhyo'yācata kṣamām || 16 ||
[Analyze grammar]

nṛpavipralokapāladikpāladevadhiṣṇyagāt |
mānavebhyo bālakṛṣṇasambandhistrībhya ityapi || 17 ||
[Analyze grammar]

kṣamāmayācatā'thā'pi yogyaṃ vidāyakaṃ dadau |
nāgalokagatebhyaśca bhūsaṃsthasarvadehinaḥ || 18 ||
[Analyze grammar]

saurāṣṭrīyanaranārībhyo'yācateśvaraḥ kṣamām |
vidāyaṃ jalapānaṃ ca miṣṭamiṣṭaṃ sumasrajaḥ || 19 ||
[Analyze grammar]

dadāvebhyaḥ śivasvāmī mimela vakṣasā ca tān |
pūjyā''ryābhyāḥ kṣamāmayācata hastāñjalirharaḥ || 20 ||
[Analyze grammar]

śivā ca pārvatī devī sarvā mātṝstadā drutam |
kaṃbharāṃ śrīṃ namaskṛtya kṣamāṃ tābhyo'bhyayācata || 21 ||
[Analyze grammar]

anyā āryāḥ samarcyaiva natvā dīnasvabhāvinī |
kṣamāmayācatā'bhyo vāgdoṣātmikāṃ ca sevane || 22 ||
[Analyze grammar]

vastudāne rakṣaṇe ca mānane svāgate tathā |
bhojane svāpane pāne nyūne kṣamāmayācata || 23 ||
[Analyze grammar]

mama putrī tava putrī mātastāṃ tvaṃ prarakṣaya |
vṛttāntaṃ ca kvacit hṛdyaṃ sampreṣaya suvatsale || 24 ||
[Analyze grammar]

vadhūṭībhyaḥ kṣamāmayācata rakṣata naijikīm |
lakṣmīṃ ceti samuvāca vidāyaṃ tūcitaṃ dadau || 25 ||
[Analyze grammar]

puṣpahārān dadau cāpi jalapānādikaṃ dadau |
śivachatro'pi ca tadā kṣamāṃ varamayācata || 26 ||
[Analyze grammar]

śiveśvaro'pi ca tadā kṣamāṃ varamayācata |
śaivachatrī nṛpī kṣamāṃ kambharāyā ayācata || 27 ||
[Analyze grammar]

kāntāḥ sarvā mātāpitṝn nemire cāśrulekṣaṇāḥ |
jayādyāścandrapālādyāste'pi kṣamāmayācire || 28 ||
[Analyze grammar]

jyeṣṭhā'śokā svasā lakṣmyāḥ nanāndṛtastadā drutam |
santoṣāyā varasvasṛtaḥ kṣamāmapyayācata || 29 ||
[Analyze grammar]

bhātṛjāyāḥ kṣamāmayācire striyo'parāstadā |
evaṃ parasparaṃ nāryaḥ kṣemaṃ ca kuśalaṃ narāḥ || 30 ||
[Analyze grammar]

pṛṣṭvā datvā vidāyaṃ ca puṣpahārān dadurmithaḥ |
kanyāpakṣā mahīmānā śrīkṛṣṇādyāstataḥ param || 31 ||
[Analyze grammar]

saṃkarṣaṇastathā rudraḥ śaṃkaraḥ śeṣa ityapi |
mahākālo yamaścāpi yakṣeśo bhūtabhairavāḥ || 32 ||
[Analyze grammar]

skando gaṇeśo nandī ca vīrabhadrādayastathā |
koṭikoṭyadhikāḥ sarve tathā caṇḍyādiśaktayaḥ || 33 ||
[Analyze grammar]

bālakṛṣṇāt kāṃbhareyāttathā gopālakṛṣṇataḥ |
vāsudevādvyāsadevāt kapilācca narāyaṇāt || 34 ||
[Analyze grammar]

viṣṇordharmād virājācca kṣamāṃ tadā yayācire |
kuśalaṃ ca sukhaṃ kṣemaṃ snehabhāvaṃ yayācire || 35 ||
[Analyze grammar]

rādhā lakṣmīḥ satī durgā sarasvatī narāyaṇī |
kamalā ṛṣipatnyaśca devyaśca gaṇikāstathā || 36 ||
[Analyze grammar]

gaṇāśca sevakāścāpi kaṃbharāmātaraṃ tadā |
mahālakṣmīṃ tathā lakṣmīṃ sāvitrīṃ vaiṣṇavīṃ tathā || 37 ||
[Analyze grammar]

sūryaṃ candraṃ vasūn sādhyān saṃjñāṃ ca rohiṇīṃ tathā |
natvā''bhyo'yācan kṣamāṃ tu devīrdevyaḥ sukhaṃ ca śam || 38 ||
[Analyze grammar]

vidāyaṃ pradaduścāpi puṣpahārā'kṣatādikam |
evaṃ sarve mahīmānāḥ sṛṣṭitrayanivāsinaḥ || 39 ||
[Analyze grammar]

narā nāryo militvaiva kṣamāṃ mitho yayācire |
śrīharaye ca kāntābhyaścāśīrvādān dadustadā || 40 ||
[Analyze grammar]

sajjā babhūvuḥ sarve vai svasvapakṣā narāḥ striyaḥ |
kṛṣṇaḥ kāntāścopaviṣṭuṃ yadā vimānamāyayuḥ || 41 ||
[Analyze grammar]

mātāpitṛpade nyasya mastakāni ca kanyakāḥ |
kṣaṇaṃ tu rodanaṃ cakrustadā snehaviyogajam || 42 ||
[Analyze grammar]

jānakyādyā mātaraśca kanyāḥ kṛtvā svavakṣasi |
mumucuścāśrūṇi caiva siṣicurnetrajairjalaiḥ || 43 ||
[Analyze grammar]

jīvāmaśca kathaṃ putryo vo vinā prāṇadurlabhāḥ |
no gṛhācchrībālakṛṣṇagṛhaṃ yātha hi vatsikāḥ || 44 ||
[Analyze grammar]

ityuktvā putrikā naijā nyaṣādayan vimānake |
pitaro'pi tadā dhairyaṃ dadurnyaṣādayan sutāḥ || 45 ||
[Analyze grammar]

mumocā'pyaśrūṇi svāmī bālakṛṣṇo'pi māyayā |
vimānaṃ cārohayāmāsa śrīgopālakṛṣṇakaḥ || 46 ||
[Analyze grammar]

putraṃ kāntāḥ kuṭumbaṃ ca tadā śivādayaḥ khalu |
viśiṣṭaṃ yautakaṃ cāpyarpayāmāsuḥ samutsukāḥ || 47 ||
[Analyze grammar]

gajāṃśca turagān dāsīḥ kiṃkarāṃśca suvarṇakam |
ratnānyamūlyabhūṣāśca pātrāṇi surabhīstathā || 48 ||
[Analyze grammar]

ambarāṇyāsanopakaraṇānyapi śubhāni ca |
sajjāḥ sarve nijapakṣāḥ puṣpahārādipūjitāḥ || 49 ||
[Analyze grammar]

āruruhurvimānāni naiko'pyatrā'vaśiṣyate |
tatra bherīninādaśca gateraśrūyatottamaḥ || 50 ||
[Analyze grammar]

vāditrāṇāṃ ninādairmiśrito vyaṅgulanādanaiḥ |
jayārāvairvardhitaścā'vyāpnot samantatastadā || 51 ||
[Analyze grammar]

drutaṃ sarvāṇyapi vimānāni kāmagamāni vai |
vyomnā yayuḥ sukhaṃ paścimāṃ diśaṃ vai sahasrakam || 52 ||
[Analyze grammar]

āgantavyaravāstatrā'jāyanta śivayoginām |
śivasvāmī tadā kṛṣṇanarāyaṇāt pareśvarāt || 53 ||
[Analyze grammar]

aprārthayad drutaṃ naijāmantimāṃ janmamokṣikām |
kadā nātha kṛpāsindho cāsmān sammokṣayiṣyase |
jātismaro'smi deveśa lakṣmīrlabdhā tvayā tava || 54 ||
[Analyze grammar]

śrībālakṛṣṇa uvāca |
varṣottaraṃ mokṣayiṣye smara māṃ hṛdaye'nvaham |
āmantrayāmi sarvāścā''gantavyaṃ me janurdine || 55 ||
[Analyze grammar]

kuṃkumavāpikākṣetre corjakṛṣṇāṣṭamīdine |
tato manorathaṃ śaṃbho pārayiṣye tavā'rthitam || 56 ||
[Analyze grammar]

ityuktvā bhagavānnaijaṃ vimānaṃ cairayattadā |
śiveśvaraścā''prayāgaṃ naijavimānakena vai || 57 ||
[Analyze grammar]

kāśīrājastathā kṛṣṇaḥ saṃkarṣaṇādayo'pi ca |
prahituṃ prayayuścāpi pītvā triveṇikājalam || 58 ||
[Analyze grammar]

nyavartanta tataḥ sarve prāvartanta puro'mbare |
indraprasthavanaṃ vyomno dṛṣṭvā vīkṣya sarasvatīm || 59 ||
[Analyze grammar]

ānarttaṃ cāyayuḥ kṣetraṃ kuṃkumavāpikā'kṣaram |
sāyaṃ prāpuścā'śvapaṭṭasarastīraṃ viśālakam || 60 ||
[Analyze grammar]

tadā vādyānyavādyanta jayaśabdāśca khe'bhavan |
bhūtale janatāśabdā jayabodhāstadā'bhavan || 61 ||
[Analyze grammar]

śāvadīnā mahākālī kṣetrapā mumude tathā |
vārinaraḥ kṣetrapālo mumude ca jagarja ca || 62 ||
[Analyze grammar]

jayanādān pracakruśca devāstīrthāni pādapāḥ |
maṇḍapākhyastathā mukto bhūmipāśca samāgatāḥ || 63 ||
[Analyze grammar]

prajā jayaninādāṃśca pracakruścātiharṣitāḥ |
yātrikā jayanādāṃśca cakrustadā pravīkṣya kham || 64 ||
[Analyze grammar]

darśanārthaṃ prajāḥ sarvā dudruvurambaradṛśaḥ |
hariṃ prasasmaruścāpi hariṇīḥ sasmarustathā || 65 ||
[Analyze grammar]

avaterurvimānāni sahasraṃ vyomamārgataḥ |
yathāvakāśaṃ bhūmau tu harervimānamityapi || 66 ||
[Analyze grammar]

paścime śobhane bhāge'vātatāra suśobhanam |
śrīmadgopālakṛṣṇaścā'vatīrya sarvasaṃgataḥ || 67 ||
[Analyze grammar]

praviśya svapurīṃ ramyāṃ kārayāmāsa maṃgalam |
vādyāni vādayāmāsa drutaṃ manoharāṇi vai || 68 ||
[Analyze grammar]

kambharā cāmarīdevyastathā'nyā yoṣitastadā |
lakṣmīṃ tasyāḥ sakhīḥ sarvā vilokya satvaraṃ tadā || 69 ||
[Analyze grammar]

akṣarabrahmaṇā tatra svasmānnavaṃ vinirmitam |
koṭyarbudābjakanyānāṃ kāntānāṃ bhinnaveśanam || 70 ||
[Analyze grammar]

brahmapriyāpattanaṃ ca prabhuṃ śrīkṛṣṇamīśvaram |
catuḥkoṭicaturlakṣaṣaṭpañcāśatsahasrakāḥ || 71 ||
[Analyze grammar]

kāntāḥ praveśayāmāsurlakṣmīṃ cābhyudaye kṣaṇe |
maṃgalaṃ kārayāmāsuḥ praveśavidhipūrvakam || 72 ||
[Analyze grammar]

gaṇeśādeḥ pūjanaṃ ca maṇḍapasya prapūjanam |
gurośca pūjanaṃ yūpapūjanaṃ devatārcanam || 73 ||
[Analyze grammar]

viprādyaiḥ kārayāmāsurjalapānaṃ dadustataḥ |
mahīmānā mahāmaṇḍapottame jagmureva ha || 74 ||
[Analyze grammar]

tato gopālakṛṣṇo vai bhojanāni niśāgame |
kārayāmāsa sarvāṃśca mahīmānān prajā api || 75 ||
[Analyze grammar]

sarvān dāsān dāsikāśca kṣetrapān karmacāriṇaḥ |
hariṇīrbālakṛṣṇaṃ ca bhojayāmāsa kaṃbharā || 76 ||
[Analyze grammar]

caturvidhaṃ bhojayitvā muktānīśān surādikān |
mahīmānānnarānnārīrmunīnnṛpāṃśca bāndhavān || 77 ||
[Analyze grammar]

sṛṣṭitrayanivāsāṃśca viprān bhaṭṭān nijān parān |
tāmbūlādi pradāyaiva parihāraṃ cakāra ha || 78 ||
[Analyze grammar]

dhanaṃ ca dāpayāmāsa viprebhyo dakṣiṇāstadā |
suratnāni vicitrāṇi dhanānyapi bahūni ca || 79 ||
[Analyze grammar]

maṃgalaṃ kārayāmāsa gopālaḥ kṛṣṇaraṃjanam |
bhuktvā viśrāntimāpuśca prasvāpaṃ lebhire tataḥ || 80 ||
[Analyze grammar]

yuvatyo bālakṛṣṇasya pratistrīrūpayoginaḥ |
pratigṛhaṃ pracakruśca sevanaṃ navaharṣitāḥ || 81 ||
[Analyze grammar]

aviplutamahāsattvamahāvīryaḥ pareśvaraḥ |
parabrahmanijānandaṃ dadau tābhyo hyasīmakam || 82 ||
[Analyze grammar]

mahānandasamādhau mūrchitāḥ kṣaṇena sadṛśīm |
niśāṃ bubudhuḥ kāminyo kāntakṛtāṃ yugāyitām || 83 ||
[Analyze grammar]

rādhike rāsarātrirme tasyā agre lavāyate |
pareśasya tu sāmarthyaṃ kenāpi naiva pāryate || 84 ||
[Analyze grammar]

atha śrīśivadevā'dyāḥ prayāgātprayayurgṛham |
varṇayanto guṇān sveṣāṃ sambandhipārameśvarān || 85 ||
[Analyze grammar]

dhanyabhāgyānyamanyanta kṛṣṇādyā api mādhavāḥ |
pārvatīpattanaṃ gatvā sarve'pi bubhujustataḥ || 86 ||
[Analyze grammar]

pānatāmbūlakaṃ labdhvā suṣvupuḥ sukhanidrayā |
ṣaṣṭhyā prātarvinidrāścābhavan maṃgalavādyakaiḥ || 87 ||
[Analyze grammar]

kṛtasnānārhaṇāḥ sarve dugdhapānaṃ vyayadhustataḥ |
bhojanāni pracakruśca miṣṭānnapāyasāni ca || 88 ||
[Analyze grammar]

jalapānāni jagṛhustāmbūlakāni vai tathā |
madhyāhne ca pralebhuste viśrāntiṃ ca tataḥ param || 89 ||
[Analyze grammar]

sammilitvā narā nāryaḥ sambandhinaḥ suhṛjjanāḥ |
gopya īśānyaśca satyaḥ sādhvyo devyastathā''rṣikāḥ || 90 ||
[Analyze grammar]

mānavyaśca surāṇyaśca gaṇyaśca phaṇikāstathā |
bhūtyaścāpi tathā'nyāśca gaṇāśca pārṣadāstathā || 91 ||
[Analyze grammar]

gopāśca kuśalaṃ kṣemaṃ nyūnasevākṣamāpanam |
parasparaṃ samabhyarthya śiveśvaraśca pārvatī || 92 ||
[Analyze grammar]

kṣamāṃ tu mahīmānānāṃ yācitvā'tha vidāyakam |
dadatuśca yathāyogyaṃ tathocatustadā khalu || 93 ||
[Analyze grammar]

bhavatāṃ cāgamaiḥ sarvavidhiḥ suśobhano'bhavat |
sarveṣāmupakāryo'smi kṣantavyo me'parādhakaḥ || 94 ||
[Analyze grammar]

girijā'pi satībhyaśca kṣamāmayācatā'pi vai |
punaścāgantavyamatrā'pi kṛpā kāryā sadā mayi || 95 ||
[Analyze grammar]

ityuvāca tato vidāyakaṃ dhanādikaṃ dadau |
puruṣān vai śivasvāmī pūjayāmāsa hārakaiḥ || 96 ||
[Analyze grammar]

nārīvargān himaputrī tathā'śokakumārikā |
pūjayāmāsatuścāpi vidāyaṃ dadatustathā || 97 ||
[Analyze grammar]

bhūṣāmbarāṇi pātrāṇi sādhanānyuttamānyapi |
tataścakre parihāraṃ mahīmānāśca vai tataḥ || 98 ||
[Analyze grammar]

sajjā bhūtvā vimānāni cāruruhuḥ samastakāḥ |
śrutvā gamanavādyānāṃ ghoṣān vyomni drutaṃ tadā || 99 ||
[Analyze grammar]

gamayāmāsa sahasā vimānāni samantataḥ |
yathāmārgaṃ yayuḥ sarve śivarājastataḥ khalu || 100 ||
[Analyze grammar]

ājñāpayāmāsa gaṇān cakruste parihārakam |
śivapuraṃ maṇḍapaṃ ca pārvatyānagaraṃ tathā || 101 ||
[Analyze grammar]

kailāsaṃ sahasā tiro'bhāvayannativegataḥ |
śiveśvaraḥ śivachatraḥ pāritoṣikamuttamam || 102 ||
[Analyze grammar]

karmacāribhya evāpi dadatuśca yathocitam |
viśrāntiṃ cāvāyatuśca smarantau kṛṣṇamīśvaram || 103 ||
[Analyze grammar]

anādiśrīkṛṣṇanārāyaṇaṃ ca bhejire sadā |
rādhike lokarītyaiva lokeśāścācarantyapi || 104 ||
[Analyze grammar]

pātheyāni cottamāni prārpitāni dināntare |
prāghūṇikebhya evaite praśaṃsanto yayurgṛhān || 105 ||
[Analyze grammar]

vidāyaṃ bahumānaṃ ca gṛhītvā yaśa uttamam |
śivaśaktipreritāśca yayurnaijālayāniti || 106 ||
[Analyze grammar]

iti śrīlakṣmīnārāyaṇīyasaṃhitāyāṃ dvitīye tretāsantāne prodvāhatīrthaṃ koṭitīrthaṃ yajñatīrthaṃ mahīmānānāṃ vidāyaṃ mithaḥ kṣamāyācanā viyoge śokaḥ vimānānāṃ pragamanaṃ kuṃkumavāpikṣetrāgamo dānaṃ maṃgalaṃ gṛhapraveśo bhojanāni nāgarīṇāmānandavihārānidrādi cetinirūpaṇanāmā ṣaṇṇavatyadhikadviśatatamo'dhyāyaḥ || 296 ||
[Analyze grammar]