Chapter 292

śrīkṛṣṇa uvāca |
koṭibhirmunibhiḥ sākaṃ rādhike śrībṛhaspatiḥ |
saṃsthito'bhūdakṣatādipūjāpātrairhareḥ puraḥ || 1 ||
[Analyze grammar]

maṇḍapākhyaṃ puraṃ ramyaṃ pañcāśadyojanātmakam |
abhivyāpyeśvararājadarśanārthaṃ sthitāḥ prajāḥ || 2 ||
[Analyze grammar]

śrīkṛṣṇaḥ śrīhariṃ tatra praṇanāma svayaṃ tvaham |
brāhmaṇāḥ saṃpraṇemuśca vedamantrān jagustadā || 3 ||
[Analyze grammar]

yavāṃkurān daduścāpi bālakṛṣṇakare tadā |
puṣpagucchaṃ dadau kṛṣṇaḥ kare gale ca mālikām || 4 ||
[Analyze grammar]

bṛhaspatiḥ puṣpahāraṃ kādambakaṃ dadau gale |
sākṣatakuṃkumacandraṃ bhāle gurustathā'karot || 5 ||
[Analyze grammar]

lājābhirvardhayāmāsurnāryaḥ kanyāprapakṣikāḥ |
jalapānaṃ dadau tatreśvarāya ca bṛhaspatiḥ || 6 ||
[Analyze grammar]

puraṃ praveśayāmāsa bālakṛṣṇasya vāhinīm |
sarvāṃ divyasvarūpāṃ ca dadṛśuḥ sarvathā prajāḥ || 7 ||
[Analyze grammar]

devakanyā nāgakanyā rājakanyāśca yoṣitaḥ |
munikanyāśceśakanyāḥ prapaśyantīśvaraṃ harim || 8 ||
[Analyze grammar]

paśyanti yoṣitaḥ sarvā nimeṣarahitena vai |
śivasvāmī prapūjārthaṃ gopurāgre samāyayau || 9 ||
[Analyze grammar]

prapūjya kuśalaṃ pṛṣṭvā prasannaṃ pracakāra ha |
vasuṃ ca pitaraṃ cāpi tathā'nyānmahīmānakān || 10 ||
[Analyze grammar]

mahīmānastriyo nemuḥ prapaśya parameśvaram |
prasannavadanaṃ kāntaṃ manoharaṃ surūpiṇam || 11 ||
[Analyze grammar]

sarvaśobhānvitaṃ pūjya sarveṣṭaṃ hṛdayaṃgamam |
ratnendrasāraśobhāḍhyabhūvimānasthitaṃ prabhum || 12 ||
[Analyze grammar]

sarveṣāṃ paramātmānaṃ bhaktānugrahagocaram |
navīnacāndradhavalaṃ śobhitaṃ hārarājibhiḥ || 13 ||
[Analyze grammar]

candanokṣitasarvāṃgaṃ bahumālāvibhūṣitam |
ratnakeyūravalayaratnamālābhirujjvalam || 14 ||
[Analyze grammar]

ratnakuṇḍalabhūṣābhirgaṇḍasthalīvirājitam |
ratnendrasāranirmāṇakvaṇanmaṃjirarañjitam || 15 ||
[Analyze grammar]

sasmitaṃ gucchahastaṃ ca paśyantaṃ ratnadarpaṇam |
muktaiḥ saṃsevitaṃ śvetacāmaraiśchatrakena ca || 16 ||
[Analyze grammar]

pārśve svataḥprakāśena mukhyeśvareṇa rājitam |
navayauvanasampannaṃ śaratkamalalocanam || 17 ||
[Analyze grammar]

śaratpūrṇendutulyāsyaṃ sarvānugrahakārakam |
koṭikandarpasaundaryaṃ cākṣarātītamacyutam || 18 ||
[Analyze grammar]

tīrthapūtaṃ kīrtipūtaṃ sureśvarādivanditam |
paramāhlādakaṃ deveśvaraṃ saundaryaśevadhim || 19 ||
[Analyze grammar]

dūrvayā paṭṭasūtraṃ ca kadalyāḥ sphuṭamañjarīm |
dadhānaṃ ca pracūḍāyāṃ mālamālyābhimālikām || 20 ||
[Analyze grammar]

puṣpaṃ nārīpradattaṃ ca sugandhigucchamuttamam |
etādṛśaṃ hariṃ dṛṣṭvā mūrcchāmāpuḥ striyastadā || 21 ||
[Analyze grammar]

lakṣmyāstu jīvanaṃ dhanyaṃ ślāghyamityūcurīpsitam |
himajā śrīḥ dadarśāpi tārakaṃ taṃ punaḥ punaḥ || 22 ||
[Analyze grammar]

śiveśvaraḥ viprayuktaḥ sāmātyaḥ sapurohitaḥ |
samāgatya nanāmā'pi devadevaṃ hariṃ prabhum || 23 ||
[Analyze grammar]

vasvagre maṇḍape dīrghe kārayāmāsa nartanam |
nartakānāṃ cātiramyaṃ gāndharvāṇāṃ ca gāyanam || 24 ||
[Analyze grammar]

gāyikānāṃ gītikāśca nartakīnāṃ ca nṛtyakam |
vādyānāṃ śabdabhedāṃśca kārayāmāsa vai puraḥ || 25 ||
[Analyze grammar]

āsphoṭānāṃ sphoṭanāni vidyutkhelanakāni ca |
yantrāṇāṃ sphoṭananādān dundubhīnāṃ sugarjanāḥ || 26 ||
[Analyze grammar]

kārayāmāsa vāhinyāścāgre tvagre śivastadā |
vardhayāmāsurevā'pi prajāḥ śrībālakṛṣṇakam || 27 ||
[Analyze grammar]

evaṃ tadā puṇyayātrā viśrāntigṛhamāyayau |
kṛṣṇo vimānakāt samuttīrya gopuramāsthitaḥ || 28 ||
[Analyze grammar]

pārvatyā vardhito duḥkhahāñjalibhiḥ punaḥ punaḥ |
tīrthajalena caraṇau prakṣālitau harestu vai || 29 ||
[Analyze grammar]

candanākṣatapuṣpādyaiḥ pūjito maṃgaladravaiḥ |
yavāṃkuraiśca dūrvābhiḥ pūjitaśca sugandhikaiḥ || 30 ||
[Analyze grammar]

lājābhiśca tathā nīrājanaiḥ sampūjitastadā |
vipraiśca guruṇā cāśīrvākyaiḥ saṃvardhitastadā || 31 ||
[Analyze grammar]

prokṣitaśca tataḥ pārśve viśrāntimandire kṣaṇam |
svarṇasihāsane nītvā sarvaśāntiprade śubhe || 32 ||
[Analyze grammar]

hariṃ niṣādayāmāsa tathā sarvāgryapūjyakān |
pitarau śivadeveśca pupūja svāgatena ha || 33 ||
[Analyze grammar]

bhojanaṃ madhuparkākhyaṃ jalapānena saṃyutam |
dadau tadā śivasvāmī śāntyarthaṃ vyāvahārikam || 34 ||
[Analyze grammar]

tadā kanyāḥ koṭiśo'pi naijaṃ śṛṃgāramādadhuḥ |
yogayogyā'mbarabhūṣā dhārayāmāsurutsukāḥ || 35 ||
[Analyze grammar]

gandhasugandhadehāśca raṃgarāgayutāstathā |
bindubindvīyutāścāpi sajjāstadā'bhavan sthitāḥ || 36 ||
[Analyze grammar]

pratīkṣante yadā lakṣmyāḥ dānaṃ harirgrahīṣyati |
tadā'smākaṃ karān kṛṣṇanārāyaṇo grahīṣyati || 37 ||
[Analyze grammar]

iti lakṣmyāśca śṛṃgāraṃ sakhyastadā vyadhuḥ śubham |
nakhān vai rañjayāmāsuḥ sthalapadmanibhān śubhān || 38 ||
[Analyze grammar]

alaktakena karayoḥ pādayośca talānyapi |
oṣṭhau raktena raṃgeṇa rañjayāmāsureva ca || 39 ||
[Analyze grammar]

kuṃkumakardamenāpi kapolau dvau ca karṇakau |
locane kajjalenā'pi tvañjayāmāsureva ha || 40 ||
[Analyze grammar]

lalāṭaṃ kaisareṇā'pi candanena suśobhitam |
dehaṃ ca candanenāpi cakruḥ sugandhisaṃbhṛtam || 41 ||
[Analyze grammar]

gandhasāraistathā dehaṃ sugandhāḍhyaṃ vyadhuśca tāḥ |
keśān prasādhayāmāsustailasāreṇa gandhinā || 42 ||
[Analyze grammar]

kabarīṃ ca pracakrustāḥ śobhanāmujjvalāṃ śubhām |
dhammilaṃ bandhayāmāsuḥ sthalapadmasraganvitam || 43 ||
[Analyze grammar]

sukundakalikāhārayuktaṃ ca paritastathā |
mālatīpuṣpasaṃyuktaṃ gumphitaṃ citratantubhiḥ || 44 ||
[Analyze grammar]

prānte ramyā'mbarakhaṇḍaṃ kauśeyaṃ citraśobhitam |
pārijātaprasūnānāṃ śekhareṇa virājitam || 45 ||
[Analyze grammar]

sauvarṇamaṇimālābhirgolāyitaṃ śubhāspadam |
candrakāntamaṇiṃ tatra nyadhuḥ prakāśahetave || 46 ||
[Analyze grammar]

sūryakāntaṃ brahmarandhrasthale nyadhuśca taijasam |
strīyogyaṃ sumukuṭaṃ tā nyadhuśca mastakopari || 47 ||
[Analyze grammar]

maṇihārakaratnāḍhyaṃ sauvarṇaṃ raṃgaraṃgitam |
śekharāstatra lambante maṇimauktikapuṣpajāḥ || 48 ||
[Analyze grammar]

tantikā svarṇapārāṇāṃ bahuratnādigumphitā |
bhāle tā dhārayāmāsuḥ kārayāmāsureva ca || 49 ||
[Analyze grammar]

madhye sucandrikābindvīṃ kāśmīreṇa draveṇa ha |
sā'kṣatāṃ ca tathā viśālake bhāle ca kaisarīḥ || 50 ||
[Analyze grammar]

rekhā vakrā vyadhuścordhvāḥ koṇavakrāḥ śubhāstadā |
madhye madhye catuṣkyāṃ ca bindvīścakruśca kauṃkumīḥ || 51 ||
[Analyze grammar]

cākacakyakaraṃ cūrṇaṃ manāg vikīritaṃ vyadhuḥ |
puṣpahārān nidadhuśca dānayogyān hi maṃgale || 52 ||
[Analyze grammar]

sauvarṇīṃ mauktikāḍhyāṃ ca natthikāṃ sumanoharām |
dhārayāmāsurevāpi svalpāṃ ca śreṣṭhavālikām || 53 ||
[Analyze grammar]

cibukaṃ harikāḍhyaṃ ca sauvarṇaṃ pradadustathā |
bindvīṃ gāle daduścāpi karṇayoḥ kuṇḍale daduḥ || 54 ||
[Analyze grammar]

īrike'pi ca sauvarṇe hīrakādisamanvite |
daduśca karṇayoḥ pañcasarike karṇaśṛṃkhale || 55 ||
[Analyze grammar]

sūkṣmahīrakasannaddhe phullike patrike daduḥ |
sauvarṇīṃ kaṇṭhahaṭhikāṃ maṇinaddhāṃ dadustadā || 56 ||
[Analyze grammar]

kauśeyīṃ kucabandhīṃ ca kauśeyakīṃ ca kaṃcukīm |
svarṇabuṭṭāliśobhāḍhyāṃ svarṇatārālisaṃbhṛtām || 57 ||
[Analyze grammar]

divyahīrakaratnādigumphitāṃ hīragranthitām |
keśā'calī nidadhuśca skandhayościpikānvitām || 558 ||
[Analyze grammar]

sauvarṇarūpyakajanyāṃ śalākāṃ bandhikāṃ daduḥ |
orṇīṃ sauvarṇatārāḍhyāṃ kārpaṭiko dadustathā || 59 ||
[Analyze grammar]

rañjitāṃ raktaśobhāḍhyāṃ kucayoḥ kuṃkumaṃ daduḥ |
śāṭīṃ svarṇamayīṃ ramyāṃ sūkṣmahīrakasaṃbhṛtām || 60 ||
[Analyze grammar]

sūkṣmatāramayīṃ mṛdvīṃ dhārayāmāsurutsukāḥ |
kaṃsadorakabandhādyairbandhayāmāsurambaram || 61 ||
[Analyze grammar]

cippiṭaiḥ sūkṣmarūpābhiḥ śalākābhistathā''ntaram |
bhujāntare tathā vakṣo'ntare kaṭyantare'mbaram || 62 ||
[Analyze grammar]

bandhayāmāsurevā'pi daduścāntaraghargharīm |
mahatīṃ ghargharīṃ cāpi sauvarṇatāragumphitām || 63 ||
[Analyze grammar]

harikaiḥ svalpakā''darśairmaṇibhiḥ khacitāṃ śubhām |
raktavarṇāṃ citrayuktāṃ prāntapiśaṃginīṃ tathā || 64 ||
[Analyze grammar]

kaṭyāṃ kaisarapaṭṭyāḍhyāṃ saṃhitahīranāḍikām |
pādayośca daduḥ pattrāṇike makhamalātmike || 65 ||
[Analyze grammar]

komale sthalapadmābhe sauvarṇaratnagumphite |
aṃgulīyakamevā'pi pratyaṃgulaṃ saśṛṃkhalam || 66 ||
[Analyze grammar]

paṃcāṃgulapraparyāptaṃ sauvarṇaṃ ca dadustadā |
pañcajayoścordhvabhāge sauvarṇīṃ kacchapīṃ daduḥ || 67 ||
[Analyze grammar]

ūrmikā api nidadhurhīrakādisamanvitāḥ |
padmakaṃ hastake cāpi nupūre patprakoṣṭhayoḥ || 68 ||
[Analyze grammar]

sauvarṇe siṃhaśobhāḍhye kiṃkiṇījālanādite |
kāmbike ca tathā kaṭakike māṇikyasaṃyute || 69 ||
[Analyze grammar]

mañjīrake ca sauvarṇe daduḥ prakoṣṭhayoḥ śriyāḥ |
raśanāṃ cāpi sauvarṇīṃ kaṭyāṃ daduḥ samauktikīm || 70 ||
[Analyze grammar]

kaṭake hīrakanaddhe vyaṃgiḍikāḥ suvarṇajāḥ |
ratnahīrakasannaddhāḥ śṛṃgale tu prakoṣṭhayoḥ || 71 ||
[Analyze grammar]

padmakāḍhye kaṃkaṇe ca valayāni dadustathā |
bhujabandhau kānakau ca maṃgale dalake daduḥ || 72 ||
[Analyze grammar]

sauvarṇe śubhakaṭake daduśca śṛṃkhale'pi ca |
svastikaṃ kānakaṃ cāpi candrakaṃ bhujayordaduḥ || 73 ||
[Analyze grammar]

kaṇṭhe hemamayān hārān ratnahīrakaśobhitān |
mudgamālāṃ yavamālāṃ jambūmālāṃ dadustathā || 74 ||
[Analyze grammar]

plakṣapatraṃ kānakaṃ ca kaṇṭhīṃ mauktikamālikām |
saptaśṛṃkhalikāhāraṃ sūkṣmapatrīṃ śubhāṃ nyadhuḥ || 75 ||
[Analyze grammar]

catuṣkikādalīṃ mālāṃ badrīmālāṃ ca māṣikām |
hīrakaiḥ saṃbhṛtāṃ śreṣṭhāṃ koṭimūlyāṃ ca taijasīm || 76 ||
[Analyze grammar]

sarvaśobhākarīṃ netracaurīṃ paṭṭikakañcukīm |
dhārayāmāsurevā'pi naktakaṃ karayordaduḥ || 77 ||
[Analyze grammar]

iti śṛṃgāritā kanyā lakṣmīrlakṣmīsakhījanaiḥ |
sarvāḥ kanyāḥ koṭiśo'pi śṛṃgāritāstadā'bhavan || 78 ||
[Analyze grammar]

udvahiṣyati naḥ kṛṣṇo suyoge kṛṣṇayoriti |
atha vādyānyavādyanta sarvāṇi vasuyātriṇām || 79 ||
[Analyze grammar]

āpte śubhe kṣaṇe śreṣṭhe nakṣatre maṃgalāvahe |
sarvasaubhāgyade yoge māhendre sampadāṃ prade || 80 ||
[Analyze grammar]

mahānandaprade śreṣṭhodaye siddhisamanvite |
lagneśānvitasaṃllagne prodvāhocitaśobhane || 81 ||
[Analyze grammar]

sadgrahāṇāṃ dṛṣṭiśuddhe cā'satāṃ dṛṣṭivarjite |
candratārāśuddhiyukte vedhadoṣādivarjite || 82 ||
[Analyze grammar]

śalākādikahīne ca sadā sukhaprade kṣaṇe |
dampatyoḥ sukhayogye ca samaye bālakṛṣṇakaḥ || 83 ||
[Analyze grammar]

āyayau śivadevasya kailāsamāḍapā'ṅgaṇam |
bṛhaspatinā vipraiścarṣibhirniśyarthito hariḥ || 84 ||
[Analyze grammar]

lomaśādyaiśca sahito jñātibhirbāndhavaiḥ saha |
pitrā mātrā nṛpaiḥ sārdhaṃ sambandhibhiḥ suhṛjjanaiḥ || 85 ||
[Analyze grammar]

suraiśca pitṛbhiḥ sārdhaṃ sādhubhiryatibhiḥ saha |
pārṣadaiśceśvarairmuktairbhaṭṭaiścāpi purohitaiḥ || 86 ||
[Analyze grammar]

sṛṣṭipālaiḥ samastaiśca vedīmaṇḍapamāyayau |
raṃbhāstambhasahasraiśca svarṇapaṭṭavibhūṣitaiḥ || 87 ||
[Analyze grammar]

campakā'śokacūtānāṃ candanānāṃ ca toraṇaiḥ |
sarvarūpāḍhyapuṣpāṇāṃ mālābhiḥ supariṣkṛtam || 88 ||
[Analyze grammar]

maṃgalasvarṇakalaśaiḥ phalapallavaśobhitaiḥ |
kastūrikā'kṣatairlājādūrvākuṃkumapūjitaiḥ || 89 ||
[Analyze grammar]

puṣpaiḥ parṇaiścandanaiśca ratnairvastraiḥ samanvitaiḥ |
parito bhrājamānaiśca maṇḍitaṃ sumanoharam || 90 ||
[Analyze grammar]

śaṃbhorvai pakṣagaiḥ sarvairmahīmānaiśca veṣṭitam |
pārṣadaiścā'vatāraiśca saṃkarṣaṇapurogamaiḥ || 91 ||
[Analyze grammar]

īśvarairdaivatābhiścarṣibhirnṛpairdigīśvaraiḥ |
kailāsavāsibhiścāpi sṛṣṭitrayanivāsibhiḥ || 92 ||
[Analyze grammar]

purohitairbrāhmaṇaiśca yatibhiścā'vadhūtakaiḥ |
gaṇaiśca yoginībhiśca kanyāpitṛbhirityapi || 93 ||
[Analyze grammar]

ratnendrasāranirmāṇavedīyuktaṃ śubhāspadam |
raṃgaiścāndanacūrṇaiśca kastūrīkuṃkumādibhiḥ || 94 ||
[Analyze grammar]

sugandhisārakaiścāpi sugandhitaṃ suraṃgitam |
nānāmaṇiprabhāvyāptaṃ dhūpasugandhavāsitam || 95 ||
[Analyze grammar]

citraśobhānvitaṃ ramyaṃ gāndharvīgītikāyutam |
saṃgītanāditaṃ vidyādharīnṛtyasuśobhitam || 96 ||
[Analyze grammar]

parito yuvatībhiśca vīkṣitaṃ maṃgalāyanam |
māṃgalikaṃ ghaṭaṃ dhṛtvā guruṇā ca purodhasā || 97 ||
[Analyze grammar]

śobhitaṃ kalpavallyādirājitaṃ dānamaṇḍapam |
kuśahastena bhūpena dānārthaṃ copatiṣṭhatā || 98 ||
[Analyze grammar]

dānavastusahitena śobhitaṃ yajñamaṇḍapam |
samantādūrdhvabhāgeṣu koṭyabjakanyakādibhiḥ || 99 ||
[Analyze grammar]

prodvāhyābhirbhūṣitābhiḥ pitrādikayutādibhiḥ |
kṛtādhivāsaṃ ramyaṃ taṃ maṇḍapaṃ bālakṛṣṇakaḥ || 100 ||
[Analyze grammar]

mukhyadvāraṃ tvājagāma pūjito vardhito dvijaiḥ |
śiveśvarastatra cāgre pūjanārthaṃ samāyayau || 101 ||
[Analyze grammar]

bālakṛṣṇo hi bhagavān samayaṃ prāpya satvaram |
sarvā ājñāpayāmāsa kāntā yāḥ svasya tāstadā || 102 ||
[Analyze grammar]

mayā'rpitāni vastrāṇi bhūṣāḥ śṛṃgārakāṇi ca |
sarvāṇyudvāhayogyāni dhṛtvā''yāntu sumaṇḍape || 103 ||
[Analyze grammar]

udvāho bhavatīnāṃ vai kāryo mayā śriyā saha |
śrutvā sarvāḥ sajjībhūyā''yayurvṛdhyā'pi maṇḍape || 104 ||
[Analyze grammar]

svasvapitrādisahitā dānārthaṃ samupasthitāḥ |
śivasvāmikṛte naijakanyārthaṃ tu vidhau tadā || 105 ||
[Analyze grammar]

sarvāsāṃ vidhirevāsmin vidhau tatrā'pyavartata |
śṛṇvāścaryaṃ rādhike koṭyarbudābjādhiyoṣitām || 106 ||
[Analyze grammar]

kṛte kṛṣṇo yaccamatkārādi tatra vyadarśayat |
śiveśvaraḥ karmakāṇḍaṃ prāvartayaddhi sarvataḥ || 107 ||
[Analyze grammar]

iti śrīlakṣmīnārāyaṇīyasaṃhitāyāṃ dvitīye tretāsantāne bālakṛṣṇasya gopure pūjanaṃ darśanaṃ tadagre nartanaṃ cāsphoṭanaṃ viśrāntimandire viśramaṇaṃ madhuparkadānaṃ sarvakanyakānāṃ |
lakṣmyāśca śṛṃgāraḥ devasya tudānamaṇḍapamukhyadvāraṃ pratyāgamanamityādinirūpaṇanāmā dvānavatyadhikadviśatatamo'dhyāyaḥ || 292 ||
[Analyze grammar]