Chapter 288

śrīkṛṣṇa uvāca |
rādhike ca tataḥ śrīmadbālakṛṣṇastataḥ param |
rādhārūpaḥ svayaṃ bhūtvā yayau śrīpārvatī gṛham || 1 ||
[Analyze grammar]

tvāṃ sā snuṣā pārvatī ca vīkṣyotthāyā''sanaṃ dadau |
rahasye'syai rādhikā provāca śṛṇu hitāvaham || 2 ||
[Analyze grammar]

mātā sā kathyate putryāḥ śreyaskarī sadā bhavet |
dānamātraṃ na draṣṭavyaṃ draṣṭavyo'syāstathā''yatiḥ || 3 ||
[Analyze grammar]

uttare syāt sutā nityasukhinīti matā matiḥ |
nārīvargeṣu duḥkhaṃ cet sāpatnyaṃ sarvato'dhikam || 4 ||
[Analyze grammar]

mayā tvadya śrutaṃ tadvai yasmai pradīyate sutā |
sa cāsti bālyato bhūmau patirvai koṭiyoṣitām || 5 ||
[Analyze grammar]

yāstāḥ sarvāścāgatā vai pitrādibhiḥ samaṃ tviha |
pratyakṣaṃ vartate tvetat putrī syāt tatra duḥkhitā || 6 ||
[Analyze grammar]

mamā'sti tatra vaimatyaṃ tasmād deyā na pārvati |
bahustrīṇāṃ samavāye bhogā bhinno bhavanti hi || 7 ||
[Analyze grammar]

sampadā ca vibhāgāḥ syuḥ paryāptāḥ syurna te tataḥ |
bahunārīmataḥ puṃso nāryastṛptiṃ na yanti hi || 8 ||
[Analyze grammar]

rājñāṃ saṃghaṭata sarvaṃ pṛthvīrājyavataḥ khalu |
ayaṃ tu vidyate vipro jāmātā vaiśyakarmavān || 9 ||
[Analyze grammar]

nāsti grāmo'sya vāṭī vā kṣetraṃ vā cāpaṇādikam |
bhikṣā tvasyā'sti vṛttirvai kathaṃ syāt sukhinī sutā || 10 ||
[Analyze grammar]

gṛhe nā'syā'sti vittaṃ vai darśayatyadhikaṃ bahiḥ |
nāradoktyā'rpitā cāpi vāgdāne'pi viyujyate || 11 ||
[Analyze grammar]

tasmād deyā na vai lakṣmīḥ susukhā duḥkhinī bhavet |
vada snuṣe mataṃ te'tra mayoktaṃ tapatā hṛdā || 12 ||
[Analyze grammar]

arogāya kumārāya suśīlāya suyogine |
dhanavate'dvibhāryāya sutā deyā surūpiṇe || 13 ||
[Analyze grammar]

kuṭumbine samasthāya godhanāya mahīmate |
svabāhūpārjitasampadyuktāya guṇaśāline || 14 ||
[Analyze grammar]

kīrtimate samarthāya kāmanāpūrakāya ca |
patnīṃ tu devatāṃ matvā sukhadātre yaśasvine || 15 ||
[Analyze grammar]

rāmāya dharmayuktāya kanyā deyā suvedine |
anye guṇāstato vīkṣyā asāpatnyottaraṃ tadā || 16 ||
[Analyze grammar]

sāpatnyaṃ dūṣaṇaṃ tvāgryaṃ narakaṃ sarvadā gṛhe |
apatyānāṃ mānyatā ca dhruvavannaiva syācca vā || 17 ||
[Analyze grammar]

rohiṇyāṃ pakṣapātaśca candrasyeva bhavettathā |
virajāyāśca rādhāyā me yathā tu kaliḥ purā || 18 ||
[Analyze grammar]

goloke'pyabhavattena duḥkhaṃ sāpatnyameva yat |
mayoktaṃ me tu yadbhātaṃ snuṣe kuru yathocitam || 19 ||
[Analyze grammar]

ityevaṃ rādhike rādhāvākyaṃ śrutvā tu pārvatī |
śiveśvarapriyā prāha pūjyā nirṇayamuttamam || 20 ||
[Analyze grammar]

puṇyo'yaṃ bālakṛṣṇo'sti parabrahma sanātanaḥ |
patiḥ pūrṇānandaśca sāgaraḥ saritāṃ yathā || 21 ||
[Analyze grammar]

pūrṇasmṛddhaḥ pūrṇavīryaḥ pūrṇaguṇo virājate |
asmādeva samutpannaṃ sarvaṃ vai sṛṣṭimaṇḍalam || 22 ||
[Analyze grammar]

rogaścintā ca sā nāsti pūrṇakāmasya vai prabhoḥ |
kumāratvaṃ sadā cāste'viplutasyā'sya yoginaḥ || 23 ||
[Analyze grammar]

śīlākhyaṃ ca vrataṃ tvasya gīyate śrutimūrdhasu |
yogī cāyaṃ yogavettā nirodhavān sadā'sti ca || 24 ||
[Analyze grammar]

sarvaṃ dhanaṃ kṛtaṃ yena so'yaṃ vai śreṣṭhisattamaḥ |
medinī ca kṛtā tena vasavastena nirmitāḥ || 25 ||
[Analyze grammar]

kuberatvaṃ nirmitaṃ ca tenā'to dhanavattamaḥ |
yāvatyo'sya bhaveyuśca bhāryāstāvattanūdharaḥ || 26 ||
[Analyze grammar]

bhāryāṃ bhāryāṃ pṛthag bhuṃkte vartate'pi pṛthak sadā |
advibhāryastataścā'yaṃ candramovanna dūṣaṇam || 27 ||
[Analyze grammar]

rūpaṃ rūpaṃ pratirūpo babhūvā'yaṃ surūpavān |
kuṭumbaṃ cā'kṣare dhāmni cā'saṃkhyaṃ yasya vidyate || 28 ||
[Analyze grammar]

yasyaiva pratibimbāni santyavatārakoṭayaḥ |
īśvarā manavo rudrā lokapālāśca viṣṇavaḥ || 29 ||
[Analyze grammar]

asyaiva santyavatārā ādityāḥ ṛṣayo'malāḥ |
kuṭumbaṃ tvasya vidyate sārvabhaumaṃ mayā śrutam || 30 ||
[Analyze grammar]

sarvāsu samabhāvena tvāste'yaṃ puruṣottamaḥ |
pratyutā'dhikabhāvena yāvat tṛptiḥ prajāyate || 31 ||
[Analyze grammar]

samastho viṣamastho vā patnyāḥ sukhaprado'sti saḥ |
godhanaṃ cāpi goloke śreṣṭhaṃ mataṃ tvayā mayā || 32 ||
[Analyze grammar]

kāmadughāḥ sadā tvasya sevāyāṃ santi saṃśrutam |
mahī cā'sya samagrā'sti rājānaḥ śvaśurā yataḥ || 33 ||
[Analyze grammar]

svabāhūpārjitā sampat sākṣādatra vilokyate |
kāśīyātrā'sya vai cāste koṭisṛṣṭisamanvitā || 34 ||
[Analyze grammar]

asya mātā svayaṃ mahālakṣmīreva virājate |
pitā cāsya mahāviṣṇurgopālo'sti virājakṛt || 35 ||
[Analyze grammar]

aṣṭau mahāguṇāścātra vidyante śrutibodhitāḥ |
nityā apahatapāpmatvādayaḥ parameśvare || 36 ||
[Analyze grammar]

satyaṃ śaucaṃ tathā'nye ca navatriṃśadguṇāstathā |
asaṃkhyāśca guṇāstvatra vidyante nityayoginaḥ || 37 ||
[Analyze grammar]

kīrtirvedeṣu cāsyā'sti dhāmasu ceśvareṣvapi |
deveṣu mānave loke sarvapātālakeṣvapi || 38 ||
[Analyze grammar]

samartho'sti mokṣado'sti mokṣārthaṃ kanyakā mayā |
dattā'sti dīyate cāpi kā tatra parivedanā || 39 ||
[Analyze grammar]

kāmanāpūrakaścā'yaṃ vidyate parameśvaraḥ |
bhaktakāmaprapūro'sti sarvakāmaprapūrakaḥ || 40 ||
[Analyze grammar]

patnīṃ svāṃ devatātulyāṃ manyate'sau sadīśvaraḥ |
sukhadoyaṃ yaśoyukto rāmo ramaṇako hi saḥ || 41 ||
[Analyze grammar]

sarvadharmabharo'styeva vidvānasti purātanaḥ |
asāpatnyaṃ sadā cātra bahubhāryayute'styapi || 42 ||
[Analyze grammar]

nātra nyūnaguṇaiśvaryaṃ yena vai dhruvavad bhavet |
candravad vā ca golokavadvā nātra tu saṃbhavet || 43 ||
[Analyze grammar]

haste'sya santi cihnāni matsyadhvajadhanūṃṣi ca |
śaraśūlasvasticakradaṇḍādyāḥ pārameśvarāḥ || 44 ||
[Analyze grammar]

śarīre'sya bhavantyeva sāmudralakṣaṇānyapi |
mayā śrutaṃ samastaṃ tannāradasya mukhāttataḥ || 45 ||
[Analyze grammar]

kanyā dattā sthale sthāne'rpaṇayogye pareśvare |
tasmānmātaḥ suputrī me sukhinī bhāgyaśālinī || 46 ||
[Analyze grammar]

anādiśrīkṛṣṇanārāyaṇaṃ labdhvā varottamam |
tayā tapaḥ purā bālye ghoraṃ taptaṃ himālaye || 47 ||
[Analyze grammar]

hanūmadāśrame tatra so'yaṃ divyarūpadhṛk |
varaṃ lakṣmyai patitvena datvā cā'dṛśyatāṃ gataḥ || 48 ||
[Analyze grammar]

tataḥ putrī gṛhaṃ yātā māmāha tamudantakam |
tata ārabhya sā pratīkṣate dvādaśavarṣakam |
svasyāḥ kṛṣṇasya tu varṣaṃ pūrṇaṃ coktaṃ caturdaśam || 49 ||
[Analyze grammar]

so'yaṃ vai vidyate śreṣṭhaḥ samayaḥ samupāgataḥ |
mama gṛhe samāyāto bhagavān puruṣottamaḥ || 50 ||
[Analyze grammar]

kṛtakṛtyā bhavāmyadya pūjyo me puruṣottamaḥ |
mahālakṣmīrvidhātryasyā vidyate bhāgyaśālinī || 51 ||
[Analyze grammar]

kṛtakṛtyā ca me putrī tava pautrī sadā''ryake |
ityuktā rādhikā sā ca maunamāśritya cāśiṣā || 52 ||
[Analyze grammar]

samāyujya yayau naijālayaṃ sā'pi tiro'bhavat |
bālakṛṣṇo dṛḍhaṃ jñātvā bhāvaṃ tu vṛddhayornije || 53 ||
[Analyze grammar]

mumude cātihṛṣṭaśca lakṣmīṃ prati yayau rahaḥ |
viprarūpo bālakṛṣṇaḥ provāca hradayā'gamam || 54 ||
[Analyze grammar]

śṛṇu putri pradānaṃ te mayā śrutaṃ pravartate |
rājaputrīṃ pariṇetumāgato'styapi bhūsuraḥ || 55 ||
[Analyze grammar]

bhikṣuko'sau rājyahīnaḥ śruto mayā'bdhitīragaḥ |
dhīvaro hi yathā tadvad gopālo vartate'pyasau || 56 ||
[Analyze grammar]

nā'sya gṛhe'sti vai sampannā'yaṃ vadhūvrato'sti ca |
paraṃ naiva kumāro'pi koṭinārīpatirhi saḥ || 57 ||
[Analyze grammar]

śruto mayaivaṃvidhiko nāryo'syā'pyāgatāstviha |
vidyante hi samānārthaṃ tvayā saha sthitāstviha || 58 ||
[Analyze grammar]

maṇḍape tvāgamiṣyanti bhramiṣyanti pradakṣiṇam |
vahniṃ sākṣye'tra saṃsthāpya sapatnyaste hi kanyake || 59 ||
[Analyze grammar]

kimidaṃ rocate tubhyaṃ sapatnyastava maṇḍape |
mā taṃ vṛṇu rājaputri bahunārīpatiṃ dvijam || 60 ||
[Analyze grammar]

rājānaṃ vṛṇu rājendri nārāyaṇāṃśameva ha |
dharmiṣṭhaṃ ca garīyāṃsaṃ dātāraṃ sarvasampadām || 61 ||
[Analyze grammar]

tvaṃ cāste sundarī ramyā ramā rāmāsu pūjitā |
navayauvanasaṃveśā tejasojjvalitā satī || 62 ||
[Analyze grammar]

taptakāñcanavarṇābhā śuddhasattvasvarūpiṇī |
pativratā satyaśīlā śāntā śreṣṭhaguṇānvitā || 63 ||
[Analyze grammar]

indrāṇī varuṇānī ca rohiṇī ca kalāvatī |
svāhā saṃjñā ca sāvitrī kuberāṇī ca vidyase || 64 ||
[Analyze grammar]

anyāsu śreṣṭhakāntāsu śreṣṭhatamā virājase |
śaratpūrṇenduśobhāḍhyā śaratkamalalocanā || 65 ||
[Analyze grammar]

mā vipraṃ vṛṇu rājendri bhikṣukaṃ dūravāsinam |
śrutvaivaṃ kanyakā prāha viprarūpaṃ nijaṃ patim || 66 ||
[Analyze grammar]

vipro'si mama pūjyo'si mā'vocastadvacaḥ punaḥ |
anyathā daṇḍapātraṃ syāḥ yāhi tatrā''gato yataḥ || 67 ||
[Analyze grammar]

bhikṣuko yādṛśo vāpi tādṛśo vā bhavedapi |
mayā parīkṣitaḥ pūrvaṃ paścādaṃgīkṛto mama || 68 ||
[Analyze grammar]

rājyaṃ yasyā'sti vai sārvabhaumaṃ sṛṣṭitrayātmakam |
kṣīrābdhitīragaḥ so'yaṃ sarvajño dhīvaro patiḥ || 69 ||
[Analyze grammar]

gavāṃ ca tejasāṃ cāpi pālako'sau virājate |
sarvāśca sampadastvasya ceśāvāsyamidaṃ yataḥ || 70 ||
[Analyze grammar]

bhaktimatīvrato nityaṃ vartate hi priyāvrataḥ |
koṭinārīpatiścāpi sadordhvasattvavānayam || 71 ||
[Analyze grammar]

sadā kumārakaścāste jānāmyenaṃ purābhave |
tathā vidito'styevā'khaṇḍordhvaretāḥ prayogavān || 72 ||
[Analyze grammar]

vipra nāryaḥ koṭisaṃkhyā yadi me maṇḍape tviha |
mama pṛṣṭhe bhramiṣyanti tatra me gauravaṃ bhavet || 73 ||
[Analyze grammar]

sapatnīnāṃ hi sarvāsāmagrapūjyā bhavāmi yat |
agnisākṣye mama sāmye bhavantu koṭiyoṣitaḥ || 74 ||
[Analyze grammar]

asya tato'pyadhikāśca bhavantu me'tra gauravam |
paripūrṇo milennāthastadā'śaṃ vṛṇuyāddhi kā || 76 ||
[Analyze grammar]

yathā so'yaṃ dūravāsā tathā'haṃ dūravāsinī |
dvayorvai melanaṃ yogyaṃ mā cintā vaha bhūsura || 76 ||
[Analyze grammar]

indrādyā yadvaśe santi brahmādyāśca vaśe'sya tu |
vairājādyā vaśe cā'sya vyūhāścāsya vaśe'pi ca || 77 ||
[Analyze grammar]

avatārā vaśe cāsya kā kanyā vṛṇuyānna tam |
pūrvākhyānaṃ ca vedoktaṃ jānāsyeva na tacchruṇu || 78 ||
[Analyze grammar]

kṛpayā bhagavān sākṣācchrīpatiḥ puruṣottamaḥ |
uddhārārthaṃ hi lokānāṃ bhaktānāṃ cāpi sarvathā || 79 ||
[Analyze grammar]

bālakṛṣṇo'yamevā''ste paripūrṇatamaḥ prabhuḥ |
kambharāśrīsakāśādvai gopālakṛṣṇasadgṛhe || 80 ||
[Analyze grammar]

jāto'sti parameśaḥ sa rādhāramāsatīpatiḥ |
vidhātuśca vidhātā saḥ brahmeśaśeṣavanditaḥ || 81 ||
[Analyze grammar]

jyotiḥsvarūpo bhagavān paramātmā parātparaḥ |
nirliptaśca nirīhaśca sākṣī ca sarvakarmaṇām || 82 ||
[Analyze grammar]

hṛdayasthaśca sarvasthastadarthaṃ cāhamāgatā |
dhāmnaḥ pūrvaṃ tamevā'tra varayāmi na cetaram || 83 ||
[Analyze grammar]

samarpitā'haṃ tatraiva svātmanā paramātmani |
vidhātrā likhitā rekhā tasyārthaṃ mama bhūsura || 84 ||
[Analyze grammar]

paśya taṃ paramātmānaṃ bhaktānugrahavigraham |
dhyānānurodhahetuṃ ca nityadivyasurūpiṇam || 85 ||
[Analyze grammar]

darśanāt kuru viprendra svajanmakarmakhaṇḍanam |
yaṃ na jānanti catvāro vedāḥ santaśca devatāḥ || 86 ||
[Analyze grammar]

saddhendrāśca munīndrāśca devā brahmādayo hyapi |
dhyāyante dhyānamagnāśca yogino'pi na yanti yam || 87 ||
[Analyze grammar]

sarasvatī jaḍībhūtā varṇane yasya jāyate |
sahasravaktraḥ śeṣo'pi pañcavaktraḥ sadāśivaḥ || 88 ||
[Analyze grammar]

caturmukho jagaddhātā kumāraḥ kārtikastathā |
ṛṣayo munayaścāpi bhaktāḥ paramavaiṣṇavāḥ || 89 ||
[Analyze grammar]

akṣamāḥ stavane yasya dhyānā'sādhyaśca yoginām |
bālikā'haṃ vipravarya tadgaṇān kathayāmi kim || 90 ||
[Analyze grammar]

vṛtā'smi taṃ sadā vipra tadarthaṃ cāsmi bhāminī |
kanyā cāpi tadarthā'haṃ viśveśvarasya putrikā || 91 ||
[Analyze grammar]

bhaktaputrīha sañjātā bhūmau bhagavadarthinī |
pātivratyaṃ hi tannāma kanyātve yo hṛdi sthitaḥ || 92 ||
[Analyze grammar]

manasā ca dhṛto nāthaḥ sa eva jīvanaṃ sadā |
hṛdayasya pradānaṃ vai hṛdayena prajāyate || 93 ||
[Analyze grammar]

sthūladehapradānaṃ tu paścātsthūlena jāyate |
vyavahārapravāhārthaṃ loke'sti kalpitaḥ sthūlaḥ || 94 ||
[Analyze grammar]

so'yaṃ me'dya vijānīhi yāhi taddarśanaṃ kuru |
yāvattvayā na dṛṣṭo'sti sarvakānto mahāprabhuḥ || 95 ||
[Analyze grammar]

anādiśrīkṛṣṇanārāyaṇaḥ śrīprāṇavallabhaḥ |
tāvadvai bhāṣase me'trā'śrāvyaṃ vipra kṣamāṃ vaha || 96 ||
[Analyze grammar]

ityukto bhagavānāha dārḍhyaṃ cedṛk tavā'sti cet |
kṣantavyaṃ yanmayoktaṃ tat prayāmi paśya māṃ punaḥ || 97 ||
[Analyze grammar]

ityuktvā nijanāmāḍhyaṃ dadau svarṇāṃgulīyakam |
darśanaṃ divyarūpaṃ ca dadau svaparicāyakam || 98 ||
[Analyze grammar]

hārakeyūrakaṭakakuṇḍalādyairvirājitam |
śaṃkhacakragadāpadmapītāmbarādiśobhitam || 99 ||
[Analyze grammar]

lakṣmīrnāthaṃ dvijātmānaṃ dṛṣṭaṃ vīkṣya yathārthakam |
pādayoḥ patitā śīghraṃ kṣaṇaṃ taṃ pariṣasvaje || 100 ||
[Analyze grammar]

priye sāyaṃ samāyāmītyuktvā miṣṭaṃ vacaḥ priyam |
tūrṇaṃ tirobabhūvaiva sā tvānandapariplutā || 101 ||
[Analyze grammar]

viveda na kṣaṇaṃ tatrātmānaṃ tadgatamānasā |
bhānamāsādya śanakaiḥ pramodānvitavigrahā || 102 ||
[Analyze grammar]

dhanyabhāgyaṃ nijaṃ mene rādhike ramaṇīvarā |
gāmbhīryaṃ rakṣamāṇā sā novācedaṃ prakāśane || 103 ||
[Analyze grammar]

ityevaṃ bhagavān bhāvaṃ vividā'nyatsvarūpadhṛk |
ātmanivedibhaktānāṃ bhaktivaśyo'bhavaddhi saḥ || 104 ||
[Analyze grammar]

iti śrīlakṣmīnārāyaṇīyasaṃhitāyāṃ dvitīye tretāsantāne bālakṛṣṇasya rādhārūpasya pārvatyā saha kanyā na deyetisamvādaḥ viprarūpasya mā vipraṃ bhikṣukaṃ vṛṇu iti lakṣmyā saha saṃvādaḥ taduttarāṇi dārḍhyaṃ cetyādinirūpaṇanāmā'ṣṭāśītyadhikadviśatatamo'dhyāyaḥ || 288 ||
[Analyze grammar]