Chapter 275

śrīkṛṣṇa uvāca |
rādhike nāradastābhyastato'kathayad yaddhi tat |
kathayāmi samastaṃ te śṛṇu tvekāgramānasā || 1 ||
[Analyze grammar]

nārada uvāca |
āgato'haṃ satyalokādaśvapaṭṭasarovaram |
pṛthvyāṃ paścimasaurāṣṭre yatrā''ste puruṣottamaḥ || 2 ||
[Analyze grammar]

tena sākaṃ pṛthivyāṃ ca vyacaraṃ yajñakarmaṇe |
yatrā''yātā dhāmamuktāstathā'nyadhāmapārṣadāḥ || 3 ||
[Analyze grammar]

pārṣadānyastathā satya īśvarāṇyaśca devatāḥ |
mānavyo nāgakāntāśca sādhvyaḥ siddhivarāstathā || 4 ||
[Analyze grammar]

avatārāḥ samastāśceśvarāścāpi ca sādhavaḥ |
siddhā brahmavratāścāpi pitaraśca tatharṣayaḥ || 5 ||
[Analyze grammar]

ārṣyaḥ sarvāstathā devā devānyaśca samāgatāḥ |
mānavāśca divaḥpālā lokapālā maheśvarāḥ || 6 ||
[Analyze grammar]

ādityā vasavo rudrā aśvinau tatstriyastathā |
vahnayaśca marutaśca nidhayaśca grahāstathā || 7 ||
[Analyze grammar]

diśaḥ kāmaśca menevastithayaśca kalāstathā |
tattvāni sarvatīrthāni nadyaḥ sarāṃsi sāgarāḥ || 8 ||
[Analyze grammar]

parvatāśca vālakhilyā vāyudehā'surādayaḥ |
daityā bhaktā dānavāśca pakṣāśca rākṣasāstathā || 9 ||
[Analyze grammar]

siddhacāraṇagandharvā vidyādhrāḥ kinnarāstathā |
uragā kiṃpuruṣāśca vṛkṣāstṛṇāni vallayaḥ || 10 ||
[Analyze grammar]

dharmādyā yāmyabhaktādyāḥ śaivāḥ kailāsavāsinaḥ |
vaikuṇṭhaśvetadugdhābdhivāsā badarīvāsinaḥ || 11 ||
[Analyze grammar]

meruvāsā āvaraṇavāsāḥ pātālavāsinaḥ |
asaṃkhyadevakoṭyaśca prāyayurvai makhe makhe || 12 ||
[Analyze grammar]

sarve praśaṃsanti kṛṣṇaṃ bālakṛṣṇaṃ pareśvaram |
vandante taṃ cārhayanti stuvanti kaṃbharāsutam || 13 ||
[Analyze grammar]

tatprasādaṃ taccaraṇāmṛtaṃ pibanti te tadā |
lokapālā dhāmapālāḥ sṛṣṭipālā narāyaṇāḥ || 14 ||
[Analyze grammar]

nārāyaṇāśca ye te ca tadājñāmudvahanti ca |
etat sarvaṃ mayā tatra pratyakṣaṃ tvavalokitam || 15 ||
[Analyze grammar]

śaṃkarastu svayaṃ yasyā'kṣarakṣetre nivāsakṛt |
kṣetrapālatayā cāste hyaśvapaṭṭasaro'bhitaḥ || 16 ||
[Analyze grammar]

śrīkṛṣṇaḥ śrīrāmadevo naro nārāyaṇastathā |
vāsudevādayo vyūhāḥ sanatkumārayogirāṭ || 17 ||
[Analyze grammar]

tathā'nye ceśvarāḥ śreṣṭhāḥ saṃkarṣaṇādayo'pi ca |
mahāviṣṇustathā bhūmā vairājaśca sadāśivaḥ || 18 ||
[Analyze grammar]

yasyā''jñāṃ saṃvahante ca kālamāyāyameśvarāḥ |
yasmād bhavanti bhūtāni puṣyante cābhiyanti ca || 19 ||
[Analyze grammar]

antarātmā tu yaḥ proktaḥ sākṣī ca bhagavān svayam |
parabrahma ca yaḥ prokto yasmāt sarvamidaṃ tatam || 20 ||
[Analyze grammar]

vidyuto bhāni sūryaśca candro vahnistathā dhruvaḥ |
yattejasā pravidyante tejasvinaḥ prabhākarāḥ || 21 ||
[Analyze grammar]

yatpraveśena bhūtāni bhavanti jñānavantyapi |
yenāste jīvalokasya prakāśaṃ vai nijātmani || 22 ||
[Analyze grammar]

sarvaprakāśadātā saḥ kuṃkumavāpikāsthale |
virājate hi bhagavānakṣarātīta eva yaḥ || 23 ||
[Analyze grammar]

mānavena svarūpeṇa gopālakṛṣṇabālakaḥ |
ityevaṃ te praśaṃsanti vai mahīmānakā makhe || 24 ||
[Analyze grammar]

koṭirūpadharaḥ so'pi bālakṛṣṇo janārdanaḥ |
koṭibhaktānekapade milatyeva ca vakṣasi || 25 ||
[Analyze grammar]

mayā dṛṣṭaṃ hi sākṣāttat śrutaṃ sarvaṃ praśaṃsitam |
śrutā ca yoṣitāṃ vāṇī sthale sthalyāṃ mahotsave || 26 ||
[Analyze grammar]

dhanyā vayaṃ surūpasya sarveśvasya yoginaḥ |
darśanaṃ tvadya kurmo yatpuṇyapāro na vidyate || 27 ||
[Analyze grammar]

aho'sya darśanācchāntiḥ śāśvatī samajāyate |
asmākaṃ netrayordairghyaṃ sāphalyaṃ vindate'dya vai || 28 ||
[Analyze grammar]

dūrato'pi mahānando jāyate'sya vilokane |
abhinnapūravegāḍhyaṃ yāvatsukhottaraṃ sukham || 29 ||
[Analyze grammar]

anubhūyate cāsmābhiḥ sarvendriyasukhaṃ mahat |
yasya dūrāvalokena yadīdṛśaṃ paraṃ sukham || 30 ||
[Analyze grammar]

tadā sākṣāttasya patnyāḥ pārśvaśayanayoṣitaḥ |
śiveśvarasutā lakṣmyā divyāyāḥ kīdṛśaṃ bhavet || 31 ||
[Analyze grammar]

ardhāṃgī ceśvarī yā vai nārāyaṇī pareśvarī |
sūryacandranibhau yasyāḥ kapolau gaṇḍakau tathā || 32 ||
[Analyze grammar]

suvarṇasadṛśaṃ yasyā vapuścampakapuṣpavat |
alaktakanibhe yasyāḥ karapādatale tathā || 33 ||
[Analyze grammar]

pakvabimbasamau yasyā oṣṭhau prītinivāsinau |
kadalīstambhasadṛśe sakthinī cāpi śobhane || 34 ||
[Analyze grammar]

padmapatrāyatanetre yasyā rūpaṃ hyanuttamam |
kṛṣṇanārāyaṇavakṣovāsā yā parameśvarī || 35 ||
[Analyze grammar]

yā ca vāsayati kṛṣṇaṃ kāntaṃ vai nijavakṣasi |
sākṣāt sarvāṃgasaṃyuktā kīdṛśī sukhinī bhavet || 36 ||
[Analyze grammar]

aho dhanyā śivaputrī sukhaṃ kṛṣṇāt samaśnute |
dhanyā sā pārvatī devī yatsukhāt sukhinī śivā || 37 ||
[Analyze grammar]

ramāyāḥ kamalāyā vā śriyā vā kṛṣṇayoṣitaḥ |
vṛndāyā vā tulasyā vā bhārgavyā vā ca tatsukham || 38 ||
[Analyze grammar]

lalāṭe likhitaṃ kārṣṇaṃ yallakṣmyā likhitaṃ sadā |
aho nedṛṅparaṃ bhāgyamasmākaṃ yanna ceyate || 39 ||
[Analyze grammar]

na cā'smākaṃ patiḥ so'yaṃ kṛṣṇanārāyaṇaḥ prabhuḥ |
vyarthaṃ janma striyā loke kṛṣṇayogasukhaṃ vinā || 40 ||
[Analyze grammar]

vyarthaṃ sarvaṃ pātivratyaṃ patiḥ kṛṣṇo na ced yadi |
aho vai śivakanyāyāḥ sāphalyaṃ gaurave tathā || 41 ||
[Analyze grammar]

sarvarasān sarvagandhān sarvasparśān sukhairbhṛtān |
sarvaśabdān sarvadṛśyān sarvānandān bhunakti yā || 42 ||
[Analyze grammar]

sarvānandāśrayaṃ kṛṣṇaṃ kāntaṃ labdhvā jitendriyam |
akhaṇḍavīryaṃ sarveśaṃ bhuṃkte yā śivakanyakā || 43 ||
[Analyze grammar]

kāśīsthā'pi sadā kṛṣṇe lagnā cāste'prakāśitā |
paśyanti divyanetrāśca satyaḥ sādhvyo divāniśam || 44 ||
[Analyze grammar]

ityevaṃ vai mayā kīrtiḥ śrutā nārīgaṇānmuhuḥ |
so'haṃ didṛkṣurevā'saṃ jijñāsuśca punaḥ punaḥ || 45 ||
[Analyze grammar]

pṛṣṭvā pṛṣṭvā śanaiścā'tra bhavatīgehamāgataḥ |
saṃśrutaṃ duḥkhahālakṣmīritināmāpi vai muhuḥ || 46 ||
[Analyze grammar]

kīdṛśī sā kasya kanyā kīdṛgguṇā bhavediti |
yadi syādatra sā devī draṣṭavyā sā mayā sati || 47 ||
[Analyze grammar]

kvā''ste kīdṛk svarūpā sā kimavasthā kimambarā |
kiṃnisargā kiṃsupiṇḍā kiṃsaṃsthānā bhavatyapi || 48 ||
[Analyze grammar]

kimākṛtiḥ kiṃsuprabhā kiyadvarṣā hi bhāminī |
kimānanā ca kiṃvegā kiṃbhāvā kiṃsulakṣaṇā || 49 ||
[Analyze grammar]

kiṃkalā kiṃsvarā kisaṃvarṇā kiṃpatkarojjvalā |
kiṃbhālā kiṃsuṣṭhukeśī kimātmā kiṃsusiddhikā || 50 ||
[Analyze grammar]

kiṃprabhāvā kiṃsukhāḍhyā kiṃbhānā kiṃsubodhinī |
kiṃkāryā kibhaktimatī kiṃdivyā ca kimāntarā || 51 ||
[Analyze grammar]

kiṃvidyā kiṃcihnaśobhā kimucchrayā ca kiṃgatiḥ |
kiṃvāsā ca kiṃsakhī ca kiṃbhūṣā kiṃghaṭāchaṭā || 52 ||
[Analyze grammar]

kiṃbalā kiṃsusattvā ca kiṃbhojanā kiṃtāpasī |
kiṃsantoṣā ca kiṃśaucā kiṃsvādhyāyā ca kiṃvṛṣā || 53 ||
[Analyze grammar]

kiṃhārdā kiṃpremapātrā kiṃkauśalyā ca kiṃmatiḥ |
kimaṃgā kiṃdhanā kiṃcaṃcalā kiṃlekhanā hi sā || 54 ||
[Analyze grammar]

kiṃruciḥ kiṃpravādā ca kiṃvṛttiḥ kiṃpravartanā |
kiṃtrikā kiṃsamāraṃbhamadhyaprāntaphalā tathā || 55 ||
[Analyze grammar]

kiṃkriyā kiṃviśeṣā ca kiṃsāmānyā kiṃmadhyamā |
kiṃviśvāsā ca kiṃyogā kiṃbodhā kimupāsanā || 56 ||
[Analyze grammar]

kimārādhanikā kiṃśṛṃgārā kiṃsaṃvirāgiṇī |
kiṃtuṣṭā kiṃgṛdhnikā ca kimāśā ca kimicchukī || 57 ||
[Analyze grammar]

kiṃtarkā kiṃniścayā ca kiṃvādā kiṃpramāṇikā |
kiṃprameyā kiṃprayogā kiṃsiddhāntā kiṃnigrahā || 58 ||
[Analyze grammar]

kiṃvedā kiṃsādhanā ca kiṃpriyā kiṃvitarjinī |
kiṃyamā kiṃniyamā ca kiṃdhyānā ca kimāsanā || 59 ||
[Analyze grammar]

kiṃprāṇā kiṃratiścāste kiṃkāmā śivakanyakā |
evaṃdraṣṭuṃ ca jijñāsā me jātā'ti tato'pyaham || 60 ||
[Analyze grammar]

samāgato'yaṃ devarṣirnārado bhagavanmanaḥ |
brahmaputraśca rudrasya bhrātā devarṣikīrtimān || 61 ||
[Analyze grammar]

viṣṇubhaktaḥ sthairyahīnaḥ sarvathā kalahapriyaḥ |
yeṣāṃ gṛhaṃ pragacchāmi te yadi mānayanti me || 62 ||
[Analyze grammar]

vacāṃsi vai mayoktāni teṣāṃ sukhakaro'smyaham |
nā''driyante yadi lokā vacāṃsi toṣayanti na || 63 ||
[Analyze grammar]

tadā teṣāṃ gṛhe kṛtvā kalahaṃ cātiduḥsaham |
pravrajāmi paraṃ gehaṃ yatra me mānanaṃ bhavet || 64 ||
[Analyze grammar]

kanyakā me darśayanti karau bhāgyaṃ vilokitum |
ahaṃ dṛṣṭvā samastaṃ ca kathayāmi sukhapradam || 65 ||
[Analyze grammar]

asukhaṃ ca bhavet kiñcit tadahaṃ nāśayāmyapi |
asatkāraṃ mama kṛtvā labhante na sukhaṃ janāḥ || 66 ||
[Analyze grammar]

susatkāraṃ labhante te mama vāco'nuvartinaḥ |
mama godohamātraṃ vai vāsaścaikatra jāyate || 67 ||
[Analyze grammar]

tathāpi bhaktimāvīkṣya vasāmyapi divāniśam |
tato viśeṣavāso me smṛddhisvargaprado bhavet || 68 ||
[Analyze grammar]

tato'pyadhikavāso me nārāyaṇāptidāyakaḥ |
tato'pyadhikavāsaśca parabrahmapradāyakaḥ || 69 ||
[Analyze grammar]

muktiṃ dadāmi vacanānmuktiṃ dadāmi kīrtanāt |
kleśaṃ dadāmi kalayā sukhaṃ dadāmi toṣaṇāt || 70 ||
[Analyze grammar]

viṣaṃ dadāmi vārtāyāṃ yatra nā'haṃ pratoṣitaḥ |
pāyayāmyamṛtaṃ cāpi yatrā'haṃ sevito'bhavam || 71 ||
[Analyze grammar]

jijñāsā yatra pūrṇā me tatra svargottamaṃ sukham |
datvā prayāmi cānyatra jānantviti vrataṃ mama || 72 ||
[Analyze grammar]

harekṛṣṇa harekṛṣṇa bālakṛṣṇa harehare |
śrīpate kaṃbharāputra lakṣmīpate harehare || 73 ||
[Analyze grammar]

śiveśvarasutākānta hare gopālanandana |
brahmapriyāpate kṛṣṇa bālakṛṣṇa harehare || 74 ||
[Analyze grammar]

anādiśrīkṛṣṇanārāyaṇa brahmapate hare |
satpate sarvakāntānāṃ kānta kṛṣṇa harehare || 75 ||
[Analyze grammar]

śrīkṛṣṇavallabhasvāmin kuṃvarakṛṣṇarūpavān |
deśika śrotriya svātman sarvātman śeṣaṇāśraya || 76 ||
[Analyze grammar]

ityevaṃ bhajanaṃ kṛtvā virarāma sa nāradaḥ |
lakṣmīrvai manasā vācā karmaṇā nāradaṃ prati || 77 ||
[Analyze grammar]

dattendriyāntaravṛttistallīnā hi tadā'bhavat |
satī śivā''ha devarṣi dhanyaṃ bhāgyamṛṣe mama || 78 ||
[Analyze grammar]

bhavān kṛṣṇasvarūpo yanmadgṛhaṃ samupāgataḥ |
matputryāśca mahadbhāgyaṃ yat sataste'tra darśanam || 79 ||
[Analyze grammar]

nārado'haṃ vijānāmi śatajanmakṛtaṃ yadi |
puṇyaṃ sammilitaṃ tena janma vai mānavaṃ labhet || 80 ||
[Analyze grammar]

punastatra kṛtā yajñāḥ syuḥ śataṃ tarhi vai divam |
prāpyetendrasamakālaṃ tato'tra bhūtale sa tu || 81 ||
[Analyze grammar]

śeṣapuṇyaprabhāveṇa śreṣṭhamānavatāṃ labhet |
tatra viprapratāpena satāmāśīrbhirityapi || 82 ||
[Analyze grammar]

rājyaṃ bhaktimayaṃ śreṣṭhaṃ prāpnuyāt sukhadaṃ śubham |
tatra devakṛtā sevā sevā'tithijanasya ca || 83 ||
[Analyze grammar]

prāpayatyeva sadbuddhiṃ smṛddhiṃ vaṃśasya vallikām |
pitṛtoṣeṇa tatrāpi putrāḥ putryo bhavanti ca || 84 ||
[Analyze grammar]

satāṃ sevāpratāpena jāyante sukhino janāḥ |
satāṃ sevā dhanadātrī bhūmidātrī sukhapradā || 85 ||
[Analyze grammar]

sā ca dharmeṇa bhaktyā ca tapasā ca tathā vrataiḥ |
milatyevā'nyathā naiva satāṃ sevā hi durlabhā || 86 ||
[Analyze grammar]

anugraheṇa dayayā satāṃ sevā'bhipadyate |
pātivratyena dharmeṇa satāṃ sevā'bhipadyate || 87 ||
[Analyze grammar]

paropakāraśīlānāmannasatravidhāyinām |
sadādānaparāṇāṃ vā satāṃ lābhaḥ prajāyate || 88 ||
[Analyze grammar]

bhaktānāṃ saumyabhāvānāṃ sarvārpaṇavidhāyinām |
satāṃ satkārakartṝṇāṃ satāṃ lābhaḥ prajāyate || 89 ||
[Analyze grammar]

nityaṃ tīrthasvabhāvānāṃ nityaṃ kathāṃ suśṛṇvatām |
nityaṃ vandanaśīlānāṃ satāṃ lābhaḥ prajāyate || 90 ||
[Analyze grammar]

nityaṃ devārhaṇasthānāṃ nityaṃ satkārakāriṇām |
nityaṃ sādhusmṛtimatāṃ satāṃ lābhaḥ prajāyate || 91 ||
[Analyze grammar]

ātmaśreyo'bhilāṣāṇāṃ sevāvṛttijuṣāṃ tathā |
jijñāsūnāṃ sevakānāṃ satāṃ lābhaḥ prajāyate || 92 ||
[Analyze grammar]

sato mārgayamāṇānāṃ satāṃ guṇānuśālinām |
satāṃ gṛhe satāṃ yoge satāṃ lābhaḥ prajāyate || 93 ||
[Analyze grammar]

sadgurūṇāṃ nivāseṣu satāṃ mahotsavādiṣu |
satāṃ prasaṃgāt satataṃ satāṃ lābhaḥ prajāyate || 94 ||
[Analyze grammar]

satyavratasthitānāṃ ca satparabrahmayājinām |
hareḥ pārṣadayogānāṃ satāṃ lābhaḥ prajāyate || 95 ||
[Analyze grammar]

harerbhaktimatāṃ gehe bhaktānāṃ yoṣitāṃ gṛhe |
viraktānāṃ samūheṣu satāṃ lābhaḥ prajāyate || 96 ||
[Analyze grammar]

sanmitrāṇāṃ prasaṃgena saddeśasya nivāsanāt |
satkālasya ca yogena satāṃ sevā prajāyate || 97 ||
[Analyze grammar]

satāṃ dīkṣāprasaṃgena satāṃ mantragraheṇa ca |
satāṃ snehavaśenā'pi satāṃ sevā prajāyate || 98 ||
[Analyze grammar]

āstikyenā''mantraṇena yaśasā satkulena ca |
sambandhena ca mahatāṃ satāṃ sevā prajāyate || 99 ||
[Analyze grammar]

śrīhareḥ kṛpayā vāpi hareḥ patnyāḥ samāśrayāt |
harervāsena vā nityaṃ satāṃ sevā'bhipadyate || 100 ||
[Analyze grammar]

adya nārada vāso me śmaśānaḥ śaṃkarālayaḥ |
pāvito bhavatā sādho satā bhaktimatā hareḥ || 101 ||
[Analyze grammar]

tava pādaprasaṃgena pāvitaṃ sakalaṃ jagat |
muktimārgaṃ prayātyeva madgṛhaṃ cāpi pāvitam || 102 ||
[Analyze grammar]

śrāvitaṃ śubhadaṃ sarvaṃ kṛṣṇasambandhajaṃ sukham |
kṛṣṇanārāyaṇakīrtiḥ śrāvitā pāvanī tvayā || 103 ||
[Analyze grammar]

pāvitaṃ hṛdayaṃ me'tra matputryāścā'pi te'ntike |
sthitāyāḥ svarṇavarṇāyā lakṣmyā nārada jīva yat || 104 ||
[Analyze grammar]

aho bhāgyaṃ mama putryā yannāma jagatītraye |
khyāyate sarvabhūteṣu dhanyā'haṃ mama putrikā || 105 ||
[Analyze grammar]

putri lakṣmi namaskāraṃ kuru śrīnāradāya vai |
pādasaṃvāhanaṃ cāpi tailāṃgamardanaṃ kuru || 106 ||
[Analyze grammar]

jalamannaṃ miṣṭamiṣṭaṃ gariṣṭaṃ dehi mā ciram |
paryaṃkaṃ ca madhuparkaṃ dehi pānaṃ manastathā || 107 ||
[Analyze grammar]

yathecchati satāṃ varyo nārado'yaṃ hariḥ svayam |
tathainaṃ ca parīkṣāṃ te kartuṃ dehi samastikām || 108 ||
[Analyze grammar]

brahmabhrātuśca vai śaṃbhoḥ kanyā tvaṃ duḥkhahe sute |
ayaṃ putro brahmaṇaśca mama putro tavā'grajaḥ || 109 ||
[Analyze grammar]

sambandhato bhavatyeva guruścāpi mahānṛṣiḥ |
nārado'yaṃ hareraṃśastava pūjyo'sti me'pi ca || 110 ||
[Analyze grammar]

putri yathā susantuṣṭo bhavettathā prasevaya |
ityuktā''jākarīlakṣmīrnāradāya nanāma ha || 111 ||
[Analyze grammar]

jalapānaṃ tathā miṣṭamannaṃ dadau śubhāsanam |
paryaṃkaṃ svarṇavarṇaṃ ca dadau puṣpasrajādikam || 112 ||
[Analyze grammar]

pādasaṃvāhanaṃ cakre lakṣmīḥ śrīnāradasya ca |
rādhike śramanāśaṃ ca viśramya nārado vyadhāt || 113 ||
[Analyze grammar]

nārado'pi yathoktāni lakṣaṇāni nyabhālayat |
sarvaśreṣṭhāni vai tatra pūrvadṛṣṭāni vai punaḥ || 114 ||
[Analyze grammar]

satī ca jānakī śīghraṃ śiveśvaraṃ patiṃ nijam |
āhvayat sumahodyānagataṃ viśveśvaraṃ mudā || 115 ||
[Analyze grammar]

iti śrīlakṣmīnārāyaṇīyasaṃhitāyāṃ dvitīye tretāsantāne pārvatīsatyai nāradoktaśrīkṛṣṇanārāyaṇamahimā lakṣmīmahimā satāṃ samāgamalābhakāraṇāni nāradasammānanaṃ cetyādivṛttāntāvedananāmā pañcasaptatyadhikadviśatatamo'dhyāyaḥ || 275 ||
[Analyze grammar]