Chapter 259

śrīkṛṣṇa uvāca |
samākarṇaya rādhe tvaṃ tataścāśvanṛpaḥ punaḥ |
papraccha lomaśaṃ yat tat pravadāmi satāṃ hitam || 1 ||
[Analyze grammar]

aśvapāṭala uvāca |
guro svīyaprakāśasya nirvedaḥ śāśvatāśrayaḥ |
kathaṃ vyajāyata tattvaniścayaścākṛterhareḥ || 2 ||
[Analyze grammar]

śrīlomaśa uvāca |
brahmakallolasaṃjñasya pūrvakalpatapasvinaḥ |
bhaktaviprasya putro'bhūnnāmnā trivikramaḥ prabhuḥ || 3 ||
[Analyze grammar]

śrīhareravatāraḥ sa punaḥ kalpāntare hariḥ |
trivikramo babhūvā'yaṃ prabaleḥ rājyahṛt tadā || 4 ||
[Analyze grammar]

so'yaṃ svarṇanadītīre dadarśā'mānavaṃ naram |
akasmād hṛdaye yoge nārāyaṇahradasthale || 5 ||
[Analyze grammar]

śaṃkhacakragadāpadmadhanuḥśūlaśarānvitam |
dhvajasvastikavajrādicihnadakṣakarānvitam || 6 ||
[Analyze grammar]

hasantaṃ tejasā vyāptaṃ prasannaṃ dīrghanetrakam |
ājānubhujamatyarthaṃ cojjvalaṃ śrīsamanvitam || 7 ||
[Analyze grammar]

svīyaprakāśo bhagavān svaṃ dadarśa tadantare |
brahmarūpaṃ vāmanaṃ trivikramaṃ prabalergurum || 8 ||
[Analyze grammar]

nijāṃ mūrtiṃ vilokyaiva śrīmannārāyaṇe tadā |
kṣaṇaṃ mumoha sahasā ko'yaṃ pṛthaṅ vyacintayam || 9 ||
[Analyze grammar]

tato divyadṛśā naijaṃ mūlaṃ rūpaṃ bubodha saḥ |
tuṣṭāva śrīkṛṣṇadevaṃ svāminaṃ parameśvaram || 5910 ||
[Analyze grammar]

antarātman parātmaṃstvaṃ sarvāvatāradhāraka |
sarvāvirbhāvahetustvaṃ sarveṣāṃ hṛdaye sthitaḥ || 11 ||
[Analyze grammar]

sarvaṃ te hṛdaye cāste brahmā'brahmamayaṃ vapuḥ |
ahaṃ pṛthaṅnivāso'smi cā'pṛthaṅavāsavāṃstvayi || 12 ||
[Analyze grammar]

tvameva paramaṃ tattvaṃ kṛpayā me'kṣi gocaraḥ |
gocare mama rūpaṃ cā'parokṣānubhavāñcitam || 13 ||
[Analyze grammar]

ātmadarśanamāsādya paramātmapradarśanam |
ubhadarśanamāsādya kṛtakṛtyo'dya saṃvṛtaḥ || 14 ||
[Analyze grammar]

ājñāṃ dehi kṛpāsindho jagadbandho janārdana |
prāpya tvāṃ paramātmānaṃ prāptavyaṃ nā'vaśiṣyate || 15 ||
[Analyze grammar]

kṛtvā tvadyogamudyānaṃ kartavyaṃ nāvaśiṣyate |
iti stutaḥ prabhuḥ śrīśo'nādikṛṣṇanarāyaṇaḥ || 16 ||
[Analyze grammar]

svīyaprakāśamūrtau taṃ nijasthāyāṃ tato'dhikam |
sarvaṃ saṃsāracakraṃ ca darśayāmāsa caikyataḥ || 17 ||
[Analyze grammar]

īśvarān brahmapuruṣān muktān dhāmānyanekaśaḥ |
devānṛṣīn pitṛgaṇān deveśvarāṃśca mānavān || 18 ||
[Analyze grammar]

uragān rākṣasān daityān dānavānāsurānapi |
paśūn pakṣiṇa evāpi sthāvarān jaḍacetanān || 19 ||
[Analyze grammar]

mahābhūtāni sarvāṇi tattvāni prakṛtiṃ sthirām |
vikārān dehabhājaśca darśayāmāsa tallayān || 5920 ||
[Analyze grammar]

evaṃ pradarśayitvaiva tirobhāvaṃ cakāra ha |
tadidaṃ cā'parokṣaṃ ca jñānaṃ śāśvatamātmagam || 21 ||
[Analyze grammar]

prakāśayitvā tasmai vai hṛdaye'sthāpayad dhruvam |
varadānaṃ dadau tasmai nityaṃ te'stu prabhāmayam || 22 ||
[Analyze grammar]

jñānaṃ cedaṃ svataḥprakāśākhyaṃ māstu tirogatam |
tataḥ ārabhya devo'yaṃ trivikramaḥ svataḥprabhaḥ || 23 ||
[Analyze grammar]

svataḥprakāśayogī ca khyāto babhūva yogiṣu |
sa cārthayat vilokyaiva kṣetraṃ cākṣarasaṃjñakam || 24 ||
[Analyze grammar]

hṛdye harivāsāḍhyaṃ cāśvapaṭṭasaronvitam |
nijavāsārthamatyarthaṃ rūpaṃ divyaṃ tathāvidham || 25 ||
[Analyze grammar]

tathāstviti prāha kṛṣṇanārāyaṇaśca tatkṣaṇam |
divyadeho'bhavattatra caturbhujo narāyaṇaḥ || 26 ||
[Analyze grammar]

mānasaḥ śrīhareḥ śiṣyo nityajñānāśrayaḥ sutaḥ |
nārāyaṇahrade tatra kṛṣṇanārāyaṇena vai || 27 ||
[Analyze grammar]

sākaṃ snātvā tatastūrṇaṃ kuṃkumavāpikāsthalīm |
prāpa yogena vegena balena kṛpayā hareḥ || 28 ||
[Analyze grammar]

evaṃ janmāntaraṃ dehāntaraṃ vṛttyantaraṃ tathā |
kāyākalpaṃ hyavāpāsau putratvaṃ muktasaṃjñayā || 29 ||
[Analyze grammar]

avatārasvarūpeṇa viṣṇurūpeṇa sarvadā |
anādiśrīkṛṣṇanārāyaṇamānasajākṛtim || 5930 ||
[Analyze grammar]

divyāmavāpya satataṃ jātamātro narāyaṇaḥ |
dharmavairāgyasampanno bhaktaḥ ṣoḍaśahāyanaḥ || 31 ||
[Analyze grammar]

babhūva kuṃkume kṣetre prabhuḥ kuṃkumavarṇakaḥ |
naisargaśevadhiḥ sarvavidyānāṃ sa babhūva ha || 32 ||
[Analyze grammar]

sārvajñyāśraya evāpi sarvaiśvaryasamanvitaḥ |
sarvakalyāṇakartā'sau yogidharmaparāyaṇaḥ || 33 ||
[Analyze grammar]

sarvātirekakāryaśca sarvātirekavarṇanaḥ |
vicacārā'kṣare kṣetre tasmai kṛṣṇanarāyaṇaḥ || 34 ||
[Analyze grammar]

anvaśāt sakalān dharmān gurupūrvīprasiddhaye |
laukikān vaidikāṃścāpi mānasāṃśca taduttarān || 35 ||
[Analyze grammar]

śrīkṛṣṇanārāyaṇa uvāca |
putra tvaṃ sāttvatān dharmān niṣevasva hitāvahān |
prāṇaṃ jaya sahasvā'pi kṣutpipāse himātapau || 26 ||
[Analyze grammar]

jitvendriyāṇi tapasā satyaṃ damaṃ prapālaya |
adrohamanasūyāṃ cā''rjavaṃ śīlaṃ prapālaya || 37 ||
[Analyze grammar]

devapitratithiprāptaśeṣānnayātrikāṃ hava |
bhaja kṛṣṇaṃ pareśaṃ māṃ mā svapihi tamomaye || 38 ||
[Analyze grammar]

phenabudbudavatsthairye cetanāśritagatvare |
ākasmike'jñavatputra mā viśvāsaṃ vidhehi vai || 39 ||
[Analyze grammar]

apramattā vinidrāśca nityayatnā hi śatravaḥ |
chidraṃ paśyanti dehe'smin mā tvaṃ tairdharṣito bhava || 5940 ||
[Analyze grammar]

divasāḥ kramaśo yānti kṛntanti vai janāyuṣam |
jīvanaṃ kṣīyate nityaṃ guruṃ śaraṇamāvraja || 41 ||
[Analyze grammar]

ajñāścecchanti dehādyairmāṃsaśoṇitavardhanam |
yadante gatvaraṃ sarvaṃ prasuptā mokṣasādhane || 42 ||
[Analyze grammar]

mā tanmātreṇa putra tvaṃ prayāhi prākṛto yathā |
prāntaduḥkhaikamātreṇa yāmyabhavanavāhinā || 43 ||
[Analyze grammar]

yāhi satāṃ vṛṣasthānāṃ yogināṃ ca mahātmanām |
dharmyaṃ panthānamevāptaṃ mokṣadaṃ cākṣarāntagam || 44 ||
[Analyze grammar]

upāsasva tataḥ samyak pṛccha dhāraya tadvacaḥ |
manomanthaṃ sanniyaccha sthairyamāvaha satpatau || 45 ||
[Analyze grammar]

dharmaṃ niḥśreṇikāṃ dhṛtvā cāruhya bhaktibhūmikām |
ātmaniṣṭhāpravegeṇa yāhi dhāma sanātanam || 46 ||
[Analyze grammar]

vāmataḥ kuru viprendra nāstikān bhaktivarjitān |
āśāṃ tṛṣṇāṃ ruṣaṃ mohaṃ tyaja putra ca dūrataḥ || 47 ||
[Analyze grammar]

nāvaṃ yogaṃ samālambya tara saṃsāravāridhim |
loko'yaṃ mṛtyunā nīto jarayā mardito'bhitaḥ || 48 ||
[Analyze grammar]

vahatyeva vaitaraṇyāṃ jñānapotena taṃ tara |
tiṣṭhantaṃ vā vahantaṃ vā pibantaṃ śayane gatam || 49 ||
[Analyze grammar]

mṛtyuranvīkṣate martyaṃ mā tvaṃ tatkarago bhava |
sañcinvānaṃ sukhārthāṃścā'tṛptaṃ lubdhaṃ ca māninam || 5950 ||
[Analyze grammar]

anirvṛttaṃ vighnamardyaṃ garviṣṭhaṃ ca vimārgagam |
ākasmikagatirmṛtyuḥ suptamādāya gacchati || 51 ||
[Analyze grammar]

andhakāramayaḥ koṣṭho brahmāṇḍodaranāmakaḥ |
tadbahirgamanārthaṃ tvaṃ dīpaṃ jñānaṃ pradhāraya || 52 ||
[Analyze grammar]

anekadehacakreṣu gacchatsu niṣphaleṣu vai |
divyapūṇyena brāhmaṇyaṃ prāptaṃ brahmamayaṃ vaha || 53 ||
[Analyze grammar]

brahmadeho mahān śreyān kṣudrakāmāya nocitaḥ |
mokṣāya dharmalābhāya tapase śreyase mataḥ || 54 ||
[Analyze grammar]

amūlyastādṛśo maṇiścintitārthaphalapradaḥ |
helanīyo na nirmūlyaḥ kṣudrā kapardikā yathā || 55 ||
[Analyze grammar]

gūhate mukhamupariṣṭādantare kāmasaṃbhṛtā |
lajjāṃ pradarśayatyasmai bhoktre parajanāntike || 56 ||
[Analyze grammar]

antarviṣāmṛtavyāptā bandhayituṃ ca tatparā |
yatate nijalābhārthaṃ bhuktvā duḥkhākaroti ca || 57 ||
[Analyze grammar]

tyajantaṃ na tyajatyeṣā yāti sthānāntaraṃ saha |
tiraskṛtā'pi saṃlagnā vāsanāmūlabandhanā || 58 ||
[Analyze grammar]

nirayākhyā svasaudheṣu vāsayatyatithiṃ ciram |
pramattaṃ madapānena paśya māyāviceṣṭitam || 59 ||
[Analyze grammar]

ko nu tatra bhaved baddho rakto vā divyanetrakaḥ |
supātratāṃ dehasaṃlagnāṃ mā'nuprasara karhicit || 5960 ||
[Analyze grammar]

dehaḥ karmāvanaddhaśca punaḥ karmābhisarjakaḥ |
kāmanāśevadhiḥ kopo mā taṃ naijaṃ niśāmaya || 21 ||
[Analyze grammar]

yatra rājabhayaṃ cāste yatra caurabhayaṃ tathā |
tadvihāya dhanaṃ divyaṃ pātheyaṃ cārjayasva ha || 62 ||
[Analyze grammar]

paratra jīvyate yena na ca kāpi viyujyate |
dhruvaṃ tadakṣaraṃ dravyaṃ samarjayasva putraka || 63 ||
[Analyze grammar]

mātā pitā suhṛd bandhuḥ saṃkare nānuyānti hi |
karmaikaṃ kevalaṃ yāti naiṣkarmyaṃ tatsamācara || 64 ||
[Analyze grammar]

hiraṇyasañcayā rājyaṃ dāsā dāsyaḥ prajāḥ priyāḥ |
dehakṣaye nivartante prabhuṃ sahacaraṃ bhaja || 65 ||
[Analyze grammar]

sākṣiṇaṃ cāntarasthaṃ vai brahmānandapradaṃ prabhum |
uddhārakaṃ modanidhiṃ parameśaṃ sadā bhaja || 66 ||
[Analyze grammar]

gṛhasthadharmiṇo lokāḥ prajāpaterbṛhaspateḥ |
śatakratośca lokān saṃvrajanti tvāntanāśinaḥ || 67 ||
[Analyze grammar]

mā tvaṃ vṛttiṃ samādhatsva gārhasthye brahmaputraka |
nirbhayaṃ ca nirantaṃ ca nidhiṃ brahmavrataṃ vaha || 68 ||
[Analyze grammar]

asaṃgo divyadṛṣṭistvaṃ brahmaṇaḥ sannidhiṃ kuru |
samarpya parame kṛṣṇe mayi karma samastakam || 69 ||
[Analyze grammar]

nairguṇyaṃ paramaṃ bhuñjan bhava mukto'kṣare yathā |
grāmavāso bandhanaṃ vai tacchittvā vanamāviśa || 5970 ||
[Analyze grammar]

kiṃ te dhanena suhṛdā bandhunā ca sutena ca |
svataḥprakāśo bhūtvaiva svīyaṃ prakāśaṃ saṃbhaja || 71 ||
[Analyze grammar]

mriyamāṇān samānāṃśca vilokya jagati sthitān |
mariṣyataśca sañcintyā'nvicchā''tmānaṃ guhāgatam || 72 ||
[Analyze grammar]

śubhraṃ śīghraṃ prakurvīta śvaḥ kāryaṃ cādya vai drutam |
kṣaṇāntare na jāne yanmṛtyurādāya yāsyati || 73 ||
[Analyze grammar]

mṛtyuśikhe hi saṃsāre mahākālasya bhakṣaṇe |
gurvāśraye vivekī san mokṣaṃ sarvātmanā vraja || 74 ||
[Analyze grammar]

maraṇaṃ cātmano mokṣastameva sādhaya pradhe |
vidvān mokṣārjanaparastaddhīno jaḍavargagaḥ || 75 ||
[Analyze grammar]

svargasopānakaṃ varṣma mānuṣyaṃ durlabhaṃ tviha |
tena sādhaya mokṣoyaṃ cānantaṃ śāśvataṃ sukham || 76 ||
[Analyze grammar]

yasya matirmokṣamārgādanyatra naiva dhāvati |
sa eva puṇyakarmā'sti cāśocyaḥ sarvamānavaiḥ || 77 ||
[Analyze grammar]

mokṣārthaṃ yanmatiḥ śuddhā dṛḍhā cārabdhatatkṛtiḥ |
anyabhāvādiriktā ca na tasya kālato bhayam || 78 ||
[Analyze grammar]

hatasya puṇyapāpaiśca lubdhasya viṣayātmanaḥ |
snehasambandhamagnasya vidyate kālato bhayam || 79 ||
[Analyze grammar]

mātāpitṛsahasrāṇi putradārā'yutāni ca |
atītāni gate kāle kasya te kasya cā'pyayam || 5980 ||
[Analyze grammar]

eko'haṃ tvātmasaṃjño'smi tvaṃ cātmā caikalaḥ svayam |
anye'nyatra gatāḥ santi paśyantyete na vai mithaḥ || 81 ||
[Analyze grammar]

na teṣāṃ bhavatāṃ kāryaṃ na kāryaṃ tava tairiha |
svakarmabhirgatānyeva tvaṃ svakṛtyairgamiṣyasi || 82 ||
[Analyze grammar]

loko'yaṃ svārthabahulaḥ svārthasnigdhaḥ svayogakṛt |
svārthaṃ prasādhya sahasā tyajanti nirguṇaṃ janam || 83 ||
[Analyze grammar]

samṛddhānāṃ dhanināṃ hi vijanaḥ svajanāyate |
daridrāṇāṃ nirdhanānāṃ svajano vijanāyate || 84 ||
[Analyze grammar]

kalatrayogamāsādya jano'śubhaṃ cinoti ca |
tataḥ kleśabhṛtaṃ janma punarduḥkhaṃ punarjanim || 85 ||
[Analyze grammar]

evamāvartamagnasya vāsanāpreritasya ca |
madhyasāgarabhāgādvai tīrayānaṃ na jāyate || 86 ||
[Analyze grammar]

tatputra dharmamāsādya vairāgyasahacāravān |
jñānadīpātinetraśca bhaktyā yāhi paraṃ padam || 87 ||
[Analyze grammar]

kālaḥ pacati bhūtāni kaṭāhe mohasaṃjñite |
sūryāgninā divākāṣṭhairmāsartudarvikādibhiḥ || 88 ||
[Analyze grammar]

nātra trātāramīkṣe'hamīkṣase tvaṃ na netaraḥ |
na taṃ paśyāmi yasyā'haṃ na taṃ paśyāmi yo mama || 89 ||
[Analyze grammar]

tasmāt sadā pareśaṃ śrīpatiṃ śrīparameśvaram |
karmabhūmau bhajasvātra yena dhāmā'kṣaraṃ vrajeḥ || 5990 ||
[Analyze grammar]

kiṃ janmanā ca dehena jñānena ca vṛṣeṇa ca |
tapasā vanavāsena yena mokṣo bhavenna cet || 91 ||
[Analyze grammar]

aśvapāṭala ityuktaḥ svataḥprakāśa eva ha |
anādiśrīkṛṣṇanārāyaṇoktaṃ cāvadhārya ca || 92 ||
[Analyze grammar]

dadhau mokṣe mano nityaṃ brahmacarye vasan sadā |
kvacid dṛśyaḥ kvaciccā'pyadṛśyo'vartata vai kṣitau || 93 ||
[Analyze grammar]

kuṃkumavāpikākṣetre divyadeho'tibhāsuraḥ |
cirañjīvo mahāmuktaścātimānavavartanaḥ || 94 ||
[Analyze grammar]

sarvasaṃgaviyuktaśca brahmasaṃgamupāgataḥ |
dvedhā bhūtvaikadehena yayāvakṣaramuttamam || 95 ||
[Analyze grammar]

apareṇa sadā cāste kṣetre'trā'kṣarasaṃjñake |
anādiśrīkṛṣṇanārāyaṇe bhāvaparāyaṇaḥ || 96 ||
[Analyze grammar]

sarvavidyāśrayo bhaktyācāryo jñānanidhiḥ prabhuḥ |
caturbhujo dvibhujo vā yatheṣṭānandaśevadhiḥ || 97 ||
[Analyze grammar]

rājaṃstattvaṃ mama yogājjñānamāsādya satvaram |
bhajainaṃ paramātmānaṃ divyadeho bhavā'tra ca || 98 ||
[Analyze grammar]

tīrthaṃ svataḥprakāśākhyaṃ cāśvasarojale hi tat |
vartate divyatādātṛ snānapānādibhirnṛpa || 99 ||
[Analyze grammar]

etajjñānaṃ samāsādya muktatā syānna saṃśayaḥ |
sarvavidyāprakāśaśca bhavedātmaprakāśitā || 59100 ||
[Analyze grammar]

devaprakāśitā syācca ciccaitanyaprakāśitā |
putra jñānena yannaiva dharmeṇa tapasā'pi ca || 101 ||
[Analyze grammar]

prāpyate tallabhyate vai guroḥ prasādaleśataḥ |
ityuktvā rādhike śrīmān lomaśo virarāma ha || 102 ||
[Analyze grammar]

atha rājātisantṛpto hariṃ sve hṛdi saṃsmaran |
kṛtānāṃ phalaviṣaye papraccha svādakarṣitaḥ || 103 ||
[Analyze grammar]

iti śrīlakṣmīnārāyaṇīyasaṃhitāyāṃ dvitīye tretāsantāne lomaśagītāyāṃ brahmakallolātmajasyā'nādiśrīkṛṣṇanārāyaṇopadeśajanyapāvanādhyayanaṃ mokṣasthitiśceti nava |
pañcāśadadhikadviśatatamo'dhyāyaḥ || 259 ||
[Analyze grammar]