Chapter 258

śrīkṛṣṇa uvāca |
rādhike lomaśaścāśvapāṭalaṃ ca tataḥ param |
kuśalāyāḥ prativādaṃ prāha yathā'bhisaṃbhavam || 1 ||
[Analyze grammar]

śrīlomaśa uvāca |
aśvapāṭala kuśalā yogapāraṃ gatā satī |
tattvajñānānaladagdhakaṣāyovāca tacchrṛṇu || 2 ||
[Analyze grammar]

kuśalovāca |
śṛṇvānarta bhavānāste tulādvayakṛtāspadaḥ |
gārhasthyaṃ rakṣyase vākyairyogitvaṃ ca vitanyase || 3 ||
[Analyze grammar]

kuśalāyāścā'kauśalyaṃ bodhayase pradūṣaṇaiḥ |
kalmaṣaṃ cedṛśaṃ rājan mukte cāste kathaṃ tvayi || 4 ||
[Analyze grammar]

āptaṃ vākyaṃ pramāṇaṃ vai yogyatādisamanvitam |
śaktyopabṛṃhitaṃ jātisārūpyādisabhājitam || 5 ||
[Analyze grammar]

jalpādidoṣaśūnyaṃ ca bhrāntikṣetrānna codgatam |
lakṣaṇāśleṣabhāvādyaiḥ spaṣṭaṃ spaṣṭārthasaṃbhṛtam || 6 ||
[Analyze grammar]

vākyaṃ tādṛkpramāṇaṃ me cānartaikamanāḥ śṛṇu |
yathā piṣṭaṃ ca pāṣāṇo meghaśca dhūmramaṇḍalam || 7 ||
[Analyze grammar]

saṃśliṣṭāni tathā''narta saṃśliṣṭāḥ prāṇadhāriṇaḥ |
śabdaḥ sparśo raso gandho rūpaṃ khavā''bbhūvahnayaḥ || 8 ||
[Analyze grammar]

saṃśliṣṭāḥ piṣṭavad rājan śilāvatte tathā''tmani |
vilīyante meghavacca viśīryante ca dhūmravat || 9 ||
[Analyze grammar]

na svatvaṃ te vijānanti kathaṃ parapravedanam |
manastaiḥ saha saṃyuktaṃ tadā bāhye'nuyanti ca || 10 ||
[Analyze grammar]

codbhūtatvaṃ ca tatrāpi mahattvaṃ bāhyayogitā |
ātmano yogitā cāpi grāhye bhavanti hetavaḥ || 11 ||
[Analyze grammar]

evaṃ sarvatra bāhyānāṃ grahaṇe hetavaḥ khalu |
manaḥ saṃkalpya madbhāvaṃ tato buddhirviniścayam || 12 ||
[Analyze grammar]

karotyevābhimānena mataṃ cātmani darpaṇe |
nikṣipati tadātmā'yaṃ mamedamiti manyate || 13 ||
[Analyze grammar]

vāsanā jāyate taiśca dṛṣṭamuktaiḥ smṛtipradā |
avidyā ca tamo vāpi sauṣuptā'jñānamuttaram || 14 ||
[Analyze grammar]

bhramātmakaṃ ca vā tatra smaraṇaṃ jāyate muhuḥ |
tataḥ sukhāsukhe lābhālābhau priyā'priye'pi ca || 15 ||
[Analyze grammar]

tatra kālo bhaveddhetuḥ prakṛtiśca prapūrikā |
adṛṣṭaṃ yādṛśaṃ tādṛk phalaṃ sampadyate tataḥ || 16 ||
[Analyze grammar]

caturviṃśatisaṃghātaścaiva vedanakāraṇam |
avyaktāṃ na vijānāti jānāti vyaktarūpiṇīm || 17 ||
[Analyze grammar]

sthūladarśī sa evokto mamāhaṃmiśritaḥ sa ca |
avyaktāṃ yo vijānāti sa tvātmānaṃ prapaśyati || 18 ||
[Analyze grammar]

adhyātmacintakaḥ so'yaṃ paraṃ pāraṃ prayāsyati |
vyaktāḥ kalāḥ prākṛtā yāḥ sarve vayaṃ narāḥ striyaḥ || 19 ||
[Analyze grammar]

bindugarbhāsanāḥ pūrve śukraśoṇitapiṇḍikāḥ |
kalalāṃ daśarātreṇa budbudṃ peśikā tataḥ || 20 ||
[Analyze grammar]

tataścāṃgāni jāyante nakharomāntakāni ca |
navame māsi bālaśca strī vā purmoṃśca vetarat || 21 ||
[Analyze grammar]

liṃgādhīnāni nāmāni tataḥ kumāratādikam |
sukumārāvayavānāṃ nāma kumārasaṃjñakam || 22 ||
[Analyze grammar]

abuddhasyeva tasyaiva bāliśasya tu bālatā |
yuvabhāvena kāmena yunaktīti yuvā mataḥ || 23 ||
[Analyze grammar]

tiṣṭhaṃstiṣṭhan prayātyeva vīro bhūtvā sthavīrakaḥ |
evaṃ kṣaṇekṣaṇe'nyeṣāṃ kalānāṃ ca vivartanāt || 24 ||
[Analyze grammar]

nāmarūpādibhedaśca sūkṣmo'yaṃ na vibhāvyate |
nātyayo na prabhavaścaiteṣāṃ saṃlakṣyate nṛpa || 25 ||
[Analyze grammar]

dīpārcivad dhāvato'sya sarvalokasya sarvadā |
kaḥ ko'yaṃ vā kutaśceti kimarthaṃ kasya kena vā || 26 ||
[Analyze grammar]

kuto no vā kathaṃ kasya kena vā neti kaḥ kimu |
ityete khalu sambandhā bhūtānāṃ svāṃgakairapi || 27 ||
[Analyze grammar]

naivaṃ parasparaṃ śaktyā jñātuṃ gatvaraśālinām |
ādityāt kiraṇānyeva samidbhyo vahnayo yathā || 28 ||
[Analyze grammar]

jāyante kṣaṇikā ye vai śakyante naiva niścitum |
tathā sarve prākṛtā vai jantavaḥ saṃhatātmanaḥ || 29 ||
[Analyze grammar]

saṃghātarūpā jāyante mriyante ca kṣaṇe kṣaṇe |
ātmā nityaḥ śāśvato'sti svastho'saṃghāta eva saḥ || 30 ||
[Analyze grammar]

sa ced yogaṃ samāpanno vivekī muktavatsthitaḥ |
paśyatyeva ca saṃghātaṃ gatvaraṃ śāśvataṃ nijam || 31 ||
[Analyze grammar]

ātmanyevātmanā''tmānaṃ yadi tvaṃ svaṃ prapaśyasi |
anātmānaṃ pṛthagbhāvaṃ kṣaṇikaṃ cet prapaśyasi || 32 ||
[Analyze grammar]

evamevā''tmanā''tmānaṃ parātmānaṃ samastagam |
yuktayogābhilābhena śāśvataṃ cet prapaśyasi || 33 ||
[Analyze grammar]

tathaivātmani cānyasmin samatāṃ ced vyavasyasi |
atha māṃ kā'si kasyeti kimarthamanupṛcchasi || 34 ||
[Analyze grammar]

idaṃ me syādidaṃ neti dvandvairmuktasya te nṛpa |
kā'si kasmāt kimarthaṃ vā vacanaiḥ kiṃ prayojanam || 35 ||
[Analyze grammar]

tathāpyanabhisandhāya pṛthagbhāvaṃ ca gatvaram |
aikyaṃ dehena sandhāya praśne kā tvayi muktatā || 36 ||
[Analyze grammar]

rājye śatrau ca mitre ca madhyasthe cājaye jaye |
mamāhaṃvedini kṣatre tvayi kā nāma muktatā || 37 ||
[Analyze grammar]

dharmārthakāmanāsakte phalasaṃgānuyāyinī |
rājabhāvena garviṣṭhe kā nāma tvayi muktatā || 38 ||
[Analyze grammar]

nare nāryāṃ surūpe ca kurūpe bhedalokini |
dehabhāvena saṃvyāpte kā nāma tvayi muktatā || 39 ||
[Analyze grammar]

dehadharmān puraskṛtya saṃgadoṣābhidhāyinī |
prākṛtaṃ bhāvamāpanne kā nāma tvayi muktatā || 40 ||
[Analyze grammar]

yogena vartamāne'pi cāyogena viḍambine |
prākṛtaṃ sparśamāpanne kā nāma tvayi muktatā || 41 ||
[Analyze grammar]

jñānasya śevadhistvaṃ vai bhāṣase māṃ striyaṃ kṛtim |
matvā vīkṣya ca rājendra kā nāma tvayi muktatā || 42 ||
[Analyze grammar]

prākṛte prākṛto bhāvaścetane cetano hi saḥ |
yasya nāsti samaṃ cakṣuḥ kā tasmin muktatā tvayi || 43 ||
[Analyze grammar]

kuśalo'yaṃ cetano'sti saṃghāte parivartite |
rājan viddhi ca māṃ divyaṃ cetanaṃ saṃgavarjitam || 44 ||
[Analyze grammar]

kā kasya ca kutaḥ kena kimarthaṃ dehasaṃgatam |
tadbhinno'haṃ bhavāmyeṣa paśyātmānaṃ narīsthitam || 45 ||
[Analyze grammar]

draṣṭuṃ cecchakyase naivaṃ saṃghātā''vṛttimān bhavān |
tadayuktasya te mokṣe'bhimatirniṣphalā nṛpa || 46 ||
[Analyze grammar]

sādhubhiḥ sannivāryā sā hyapathyabhojinastava |
yajjñātvā vartane nāsti jñāne nāsti tatastaram || 47 ||
[Analyze grammar]

vyavahāre sutarāṃ nāstīti kiṃ yogajaṃ phalam |
vṛthā śramo vṛthā mānaṃ vṛthā vāgdūṣaṇaṃ tathā || 48 ||
[Analyze grammar]

vṛthā satsaṃgayatnaśca yadi dehaṃ prapaśyasi |
ātmā nārī naro nāpi napuṃsako na cāsti ca || 49 ||
[Analyze grammar]

tvaṃ tathā''sse ca ced rājan cekṣase na kathaṃ pare |
prākṛtāni prasaṃvīkṣya pṛthakkṛtvā''tmatattvataḥ || 50 ||
[Analyze grammar]

sarvatrā''tmānamāpaśyet kimanyanmuktalakṣaṇam |
saṃgasthānāni sarvāṇi paśyet parātmani prabhau || 51 ||
[Analyze grammar]

ātmakrīḍa ātmaratirmuktasyaiva hi lakṣaṇam |
mokṣe sthitasya saṃgāḍhyasthānānyapi ca me śṛṇu || 52 ||
[Analyze grammar]

rājyād rāṣṭrasya sāmānyād rājadhānī hi bandhanam |
tato'pi rājasaudhaśca sāmānyaṃ bandhanaṃ hi tat || 53 ||
[Analyze grammar]

tato'pi svagṛhaṃ tatra śayyā svīyā hi bandhanam |
sā'pi cā'rdhā strīsahitā vinā striyaṃ na bandhanam || 54 ||
[Analyze grammar]

tryapi kāmakriyāmātraṃ bandhanaṃ na tataḥ param |
tatrāpi vāsanā cet syād bandhanaṃ saṃgamūlakam || 55 ||
[Analyze grammar]

dhātulābhe kāraṇaṃ ca bhojanaṃ cauṣadhādikam |
bandhanaṃ vai tato rājñaḥ sevakādi ca bandhanam || 56 ||
[Analyze grammar]

evaṃ stryādiprasaṃgena phalenāpīha yujyate |
bhojanācchādanavastrābhūṣaṇeṣu ca bandhanam || 57 ||
[Analyze grammar]

nigrahānugrahau cāpi rājño bhavato bandhane |
pāratantryaṃ sadā rājñaḥ svalpakārye'pi mānataḥ || 58 ||
[Analyze grammar]

bhṛtyavaśyatvamevāpi yuddhasandhiṣu sarvathā |
strīṣu krīḍāvihāreṣu mantre cāmātyamaṇḍale || 59 ||
[Analyze grammar]

paroktādyanugāmitvaṃ kuto rājñaḥ svatantratā |
mantrivaśe sthitaścāste neṣṭaṃ cāpyavaśaścaret || 60 ||
[Analyze grammar]

nidrāṃ kāle na labhate vyāpṛtaḥ svārthibhirjanaiḥ |
śayane'pi kvacit suptaścotthāpyate'ridūtakaiḥ || 61 ||
[Analyze grammar]

dāsībhiśca kvacinnityaṃ cājñāyāṃ kriyate vaśaḥ |
uttiṣṭha snāhi saṃgṛhṇa piba prāśa bravīhi ca || 62 ||
[Analyze grammar]

śṛṇu cāgaccha ca paśya viramasva ramasva ca |
ityevaṃ paratantro'yaṃ rājā saṃgavaśaḥ sadā || 63 ||
[Analyze grammar]

yācakāśca samāyānti dātuṃ notsahate'pi ca |
dāne koṣakṣaye cintā vairaṃ cādānake bhavet || 64 ||
[Analyze grammar]

rakṣaṇe satataṃ cintā cintāsaṃgī nṛpaḥ sadā |
rājā sarvān śaṃkate vai mṛtyubhayena noditaḥ || 65 ||
[Analyze grammar]

parasparaṃ bhayavanto bhavanti nṛpatajjanāḥ |
sarvaḥ sve sve gṛhe rājā sarvaḥ sve sve gṛhe gṛhī || 66 ||
[Analyze grammar]

nigrahānugrahavantaḥ sarve tulyā gṛhe gṛhe |
putrā dārā gṛhaṃ cātmā kośo mitrāṇi saṃcayāḥ || 67 ||
[Analyze grammar]

sarveṣāṃ tulyabhāvāste saṃgadā bandhanāni vai |
hato deśaśca grāmaśca dagdho vāho hato mama || 68 ||
[Analyze grammar]

dhanaṃ naṣṭaṃ ca sasyāni dagdhāni ca himāgninā |
pakṣibhirbhakṣitaṃ kṣetraṃ caurairhṛtāśca dhenavaḥ || 69 ||
[Analyze grammar]

rogairhataṃ bhojanaṃ me svatantratā hatā'ribhiḥ |
vāgbāṇādyairdharṣito'haṃ copthāpito nṛpāsanāt || 70 ||
[Analyze grammar]

ityevaṃ saṃgabhāvaiśca mithyājñānairhi tapyate |
niyantṛjanyaduḥkhaiśca mānasai rāgaroṣajaiḥ || 71 ||
[Analyze grammar]

rogā'vamānajanyaiśca duḥkhairvai paritapyate |
amuktasaṃgaḥ satataṃ prasahya duḥkhabhogavān || 72 ||
[Analyze grammar]

tadalpasukhamatyarthaṃ bahuduḥkhamasāravat |
taptāṃgārāsanaṃ rājyaṃ ko'bhipadyeta yogavit || 73 ||
[Analyze grammar]

mamedaṃ nagaraṃ rājyaṃ manyase dhanamuttamam |
kastvaṃ kasya dhanaṃ rājyaṃ nagaraṃ vada cātmavit || 74 ||
[Analyze grammar]

pāñcabhautikadeho'yaṃ tava vahnau pravekṣyati |
mamāpi ca tathā tatra tulyatā na viśeṣatā || 75 ||
[Analyze grammar]

dehasya saṃgadharmasyā'saṃgo nāsti kutaścana |
ādhārādheyabhāvasya prākṛtasya kṣayārthinaḥ || 76 ||
[Analyze grammar]

cetanasya tvasaṃgasya nāsti saṃgaḥ kutaścana |
ādhārādheyaśūnyasyā'prākṛtasya sadā sataḥ || 77 ||
[Analyze grammar]

vada rājan samarthā'haṃ jñāne vaktuṃ sahasradhā |
strīdehe nābhiṣaṃgo me kutastava parigrahe || 78 ||
[Analyze grammar]

na strīṃ matvā saṃgabhāvaṃ vyaktaṃ vaktuṃ tvamarhasi |
nanu nāma tvayā mokṣaḥ kṛtsnaḥ patnīvratācchrataḥ || 79 ||
[Analyze grammar]

asaṃgaścāpyapāśastvaṃ kathaṃ sakto'si rājyake |
śrutaṃ te niṣphalaṃ sarvaṃ dehabhāvena saṃjuṣaḥ || 80 ||
[Analyze grammar]

śrutaṃ vā nirgataṃ karṇāt śāṭhyamātreṇa vartase |
yadvā naiva dhṛtaṃ vā pācitaṃ naiva tvayā''tmanā || 81 ||
[Analyze grammar]

yena tvaṃ tiṣṭhase saṃge laukike daihike'dhunā |
baddhastvaṃ dṛśyase cātman prākṛto bhikṣuko yathā || 82 ||
[Analyze grammar]

mayā''tmanā praveśaśca kṛtastvayyātmani prabhau |
kiṃ tavā'pakṛtaṃ tatra nityamuktasya me vada || 83 ||
[Analyze grammar]

sādhūnāṃ śūnyavāsitvaṃ niyamo'sti sadā nṛpa |
śūnye praveśamāsādya mayā kiṃ te'tra dūṣitam || 84 ||
[Analyze grammar]

na bāhubhyāṃ na corubhyāṃ nāṃgaiḥ spṛśāmi sarvathā |
mā vaktatyaṃ sabhāyāṃ vai tvayā mayā śubhāśubham || 85 ||
[Analyze grammar]

strīpuṃsoḥ samavāyākhyaṃ sadasadvā kṛtaṃ mithaḥ |
sādhavo guravaścaite tvaṃ ca rājā gurūttamaḥ || 86 ||
[Analyze grammar]

yogiṣu yogivādā vai na vaktavyāḥ kadācana |
padmapatre jalaṃ tiṣṭhadasaṃgaṃ tiṣṭhate yathā || 87 ||
[Analyze grammar]

tathā tvayi nivatsyāmi niḥsaṃgena nijātmanā |
yogivṛttyā nivatsyāmi cātmalābhādhisiddhaye || 88 ||
[Analyze grammar]

yatra vai sādhavo dhīrā yatayo yogapāragāḥ |
parameśapadārūḍhāḥ samūrtā nivasanti vai || 89 ||
[Analyze grammar]

tatra vāsaṃ yogavṛttyā ka ātmā nā'bhivāñcchati |
yadi tvayi mama vāse sparśaṃ jānāsi cennṛpa || 90 ||
[Analyze grammar]

jñānaṃ kṛtamabījaṃ te sarvaṃ vai vāgvibhūṣaṇam |
sa gārhasthyāccyutastvaṃ vai muktisthitiṃ na vindasi || 91 ||
[Analyze grammar]

ubhayorantarālastho bhavasīha viḍambakaḥ |
nahi muktasya muktena jñasya jñena samāgame || 92 ||
[Analyze grammar]

jāyate dharmasāṃkaryaṃ sadharmayorhi yojanam |
sattvena sattvayogaścātmanā yogastathātmanaḥ || 93 ||
[Analyze grammar]

yoginā yogino yogastatra saṃkaratā na vai |
brahmajñastvaṃ tathā rājan brahmajñā'haṃ savarṇikā || 94 ||
[Analyze grammar]

āvayormelane naiva varṇasaṃkaratā matā |
brahmaputrīdehavāṃśca brahmā vai somanāthake || 95 ||
[Analyze grammar]

somanāthapratiṣṭhārthaṃ cāhūtaḥ śaśinā purā |
tadā yajñe samutpannā mānasī kuśalā kriyā || 96 ||
[Analyze grammar]

satīrūpā'hamevāsmi kriyākhyā kuśalābhidhā |
kraturyajñastasya patnī dehabhāvena cedṛśī || 97 ||
[Analyze grammar]

ātmabhāvena sādhvī ca yogapāraṃgatā'smi ca |
tasmād rājan bhavāmyatra cātmā nāsmi narī vidhā || 98 ||
[Analyze grammar]

nātrā'sti saṃkaraḥ kaścit samabhāvāgame punaḥ |
mokṣe te bhāvitāṃ buddhiṃ śrutvā ca kuśalaiṣiṇī || 99 ||
[Analyze grammar]

kuśalā tava mokṣasya jijñāsārthamihā''gatā |
saurāṣṭre'trā'kṣare kṣetre cāśvapaṭṭasarovare || 100 ||
[Analyze grammar]

kṛtasthānā kuṃkumākhyavāpyāstīre vasāmi ca |
ekarātriṃ śarīre te sthitvā yāsyāmi matsthalīm || 101 ||
[Analyze grammar]

nā'haṃ lubdhe ciraṃ rājan tiṣṭhāmi brahmayoginī |
ātithyenā''tmabhāvena mānitā jñānabhojanaiḥ || 100 ||
[Analyze grammar]

aprāpya tulyayogasthaṃ śvo gamiṣyāmi matsthalīm |
yatra tulyagatiścāste lomaśo yogavittamaḥ || 102 ||
[Analyze grammar]

svīyaprakāśo bhagavānātmavittama ityapi |
tatraikībhūya kuśalā brahmānandaṃ vahāmi vai || 104 ||
[Analyze grammar]

rājan dhṛtaṃ mayā rūpaṃ kiyadyogabalāṃ sabhām |
vīkṣituṃ vīkṣitaṃ sarvaṃ yatrā'gryo dehadarśanaḥ || 105 ||
[Analyze grammar]

ime stabdhā hi munayo dehadarśanayoginaḥ |
kimahaṃ te pravakṣyāmi mā stabdho bhava bhūpate || 106 ||
[Analyze grammar]

naivaṃ cātmabalaṃ rājan vardhate dehadarśinām |
nātmalābho bhaveccāpi sadṛśānāṃ vihāriṇām || 107 ||
[Analyze grammar]

na gārhasthyād bhavenmuktiścātmarūpo na yāvatā |
vartate muktasaṃgo vai tāvatsaṃsāralagnatā || 108 ||
[Analyze grammar]

ānarta mā ruṣaṃ dhehi tathyaṃ bhakṣaya pācaya |
yogeśvaratāsiddhyarthaṃ cāśvapaṭṭasaro vraja || 109 ||
[Analyze grammar]

svīyaprakāśaṃ yogīndraṃ lomaśaṃ yogisadgurum |
santuṣṭāṃ yoginīṃ devīṃ saṃbhajasvā'cyuto bhava || 110 ||
[Analyze grammar]

śrīlomaśa uvāca |
ityevaṃ vadamānāṃ tāṃ tvānarto bhūpatistadā |
neme vāsārhahṛdayaṃ dadau tatra samādhinā || 111 ||
[Analyze grammar]

saṃvādaṃ cātmanostatra cāprātaścakraturhyubhau |
ṛṣayo jñātabhāvāśca svasvasthānaṃ yayustataḥ || 112 ||
[Analyze grammar]

aśvapāṭala cānarto jñātvā naijāṃ hi nimnatām |
kuśalātaḥ parāṃ kāṣṭhāṃ viveda sahayoginaḥ || 113 ||
[Analyze grammar]

tatastayā samaṃ prāyādaśvapaṭṭasarovaram |
yatra pūrṇaṃ yogabalaṃ hyavāpya lomaśānmuneḥ || 114 ||
[Analyze grammar]

svasya prakāśādātmīyaṃ bodhaṃ prāpya mahottamam |
santuṣṭāyoginītaśca brāhmīṃ sthitiṃ praśikṣya ca || 115 ||
[Analyze grammar]

ānartaḥ prayayau naijaṃ camatkārapuraṃ prati |
tasmād rājan gṛhasthānāṃ tyāgitvaṃ samapekṣate || 116 ||
[Analyze grammar]

yadvā tyāgavatāṃ yogānmokṣo hastagato bhavet |
sādhūnāṃ saṃgamāt kṛṣṇanārāyaṇo miled dhruvam || 117 ||
[Analyze grammar]

apūrṇasyāpi pūrṇatvaṃ sarvayatne samāpyate |
asannyastā gṛhasthā vai sannyastā guruyogataḥ || 118 ||
[Analyze grammar]

prajāyanta kuśalāyā yogenā''nartako yathā |
tādṛśānāṃ satāṃ yogād gṛhasthāḥ paramāṃ gatim || 119 ||
[Analyze grammar]

prayāntyeva na sandeho māyālubdhā api dhruvam |
ityuktvā rādhike śrīmān lomaśo maunamāvahat || 120 ||
[Analyze grammar]

aśvapāṭalarājā'pi śrutvā tṛptiṃ jagāma ha |
tattīrthaṃ kuśalātīrthaṃ cānartatīrthamityapi || 121 ||
[Analyze grammar]

yogitīrthaṃ cāśvapaṭṭasarojale pravidyate |
yatsnānād yadvāripānādātmadarśanamṛcchati || 122 ||
[Analyze grammar]

iti śrīlakṣmīnārāyaṇīyasaṃhitāyāṃ dvitīye tretāsantāne lomaśagītāyām ānartarājena saha brahmaputrīkuśalāsādhvyā vivādo gārhasthye'pi tyāgāt sādhusamāgamādvā mukti |
rityādinirūpaṇanāmā'ṣṭapañcāśadadhikadviśatatamo'dhyāyaḥ || 258 ||
[Analyze grammar]