Chapter 256

śrīkṛṣṇa uvāca |
rādhike ca tato rājā papraccha lomaśaṃ tu yat |
kathayāmi samāsena hṛdayena nibodha me || 1 ||
[Analyze grammar]

aśvapāṭala uvāca |
kṣaraścāyaṃ hi saṃsārastatrā'kṣaro hi cetanaḥ |
kathaṃ na muñcati tvetat kṣaraṃ yātyakṣaraṃ na saḥ || 2 ||
[Analyze grammar]

lomaśa uvāca |
garbhe karmavaśāt suptaḥ pacyate pakvamannavat |
bhūtasaṃskāratādātmyam āpanna iva bharjitaḥ || 3 ||
[Analyze grammar]

kṣaradharmān samāsādyā'jñānadaśā'bhibhāvitaḥ |
kṣarātmā sva iti bhrāntiṃ prāptaḥ prasūyate tataḥ || 4 ||
[Analyze grammar]

ahaṃ bālo naro nārī bāhyaśabdairvibṛṃhitaḥ |
śuklalohitakṛṣṇārthabhānabhrāntipramīlitaḥ || 5 ||
[Analyze grammar]

saṃkīrṇakalpanāṃ prāptaḥ sārthasaṃgairjaḍīkṛtaḥ |
kṛśaḥ sthūlo duḥkhī sukhī mamā'haṃtvaṃprabodhitaḥ || 6 ||
[Analyze grammar]

karmapāśāyuṣyarajjubandhitaścā'vaśīkṛtaḥ |
prāṇakoṣṭhalikāgranthigrathitaścā'vināśitaḥ || 7 ||
[Analyze grammar]

māyātāpapariṣekaśokitaśca dṛḍhīkṛtaḥ |
ṣāṭkauśikarasairliptastatraiva ca kṛtāsanaḥ || 8 ||
[Analyze grammar]

mahālepairlepitaśca neṣṭe nirgantumaprabhuḥ |
tatraiva tāmasaṃ vāpi rājasaṃ sāttvikaṃ ca vā || 9 ||
[Analyze grammar]

pravāhaṃ ca rasaṃ pakvaṃ svādaṃ cābhyastametyayam |
puṣṭimeti tatastaistairindriyāhṛtasadrasaiḥ || 10 ||
[Analyze grammar]

sukhānandaiśca puṣṇāti dhāvatyeva tadarthakaḥ |
tadarthaṃ yatate cāpi jñātuṃ prāptuṃ punaḥ punaḥ || 11 ||
[Analyze grammar]

bhoktuṃ tyaktuṃ navīkartuṃ sañcayituṃ navaṃ punaḥ |
tadvegavāsanākṣipto mūḍhaḥ kṣare kṣarātmakaḥ || 12 ||
[Analyze grammar]

abhinnaścā'pṛthagbhūtvā vartate keśakarṣitaḥ |
dehadharmaparo bhūtvā dehānandena nanditaḥ || 13 ||
[Analyze grammar]

punaḥ puṇyaṃ karotyeva divyadehādilabdhaye |
evaṃ cakreṇa vai gacchan dehāt karma tato vapuḥ || 14 ||
[Analyze grammar]

punaḥ karma punardehaścetyevaṃ kṣaragartake |
muhuḥ patati cā'jñātmā muhurmodaṃ ca vāñchati || 15 ||
[Analyze grammar]

nā'syaivaṃ vartamānasya kṣarānmuktiḥ kvacid bhavet |
pratyuta vardhate moho bandhanaṃ saṃsṛtistathā || 16 ||
[Analyze grammar]

mohānmohaṃ cānuvrajya dṛṣṭvā dṛṣṭvā navaṃ navam |
prāptuṃ bhoktuṃ ca yatate karma badhnāti tanmayam || 17 ||
[Analyze grammar]

dehād dehasahasrāṇi karmabhiścābhipadyate |
tiryakṣu devavargeṣu mānuṣeṣu ca pakṣiṣu || 18 ||
[Analyze grammar]

daityadānavarakṣassu jāyate ca punaḥ punaḥ |
dvandvāneti ca nirdvandvastāsu tāsveva yoniṣu || 19 ||
[Analyze grammar]

devabhogān sādhyabhogān siddhabhogānanuttamān |
īśvarāṇāṃ tathā bhogānāptuṃ mathnāti sarvaśaḥ || 20 ||
[Analyze grammar]

roge bhoge vihāre codvege kṣaye kṣatau kṣate |
śarīrātmā bhramabhinno mameti cābhimanyate || 21 ||
[Analyze grammar]

bhinnadeheṣu kurvan vai rājyaṃ śete vibhinnake |
śayane genduke kvāpi bile dvaidhe ca kardame || 22 ||
[Analyze grammar]

iṣṭikāyāṃ ca gagane garte ca gahvare kṣitau |
kaṇṭake bhasmani kṣīṇe jale phale'nile nale || 23 ||
[Analyze grammar]

dadhan vastrāṇi ramyāṇi aurṇāni kambalāni ca |
tārṇāni rājasānyeva kārdameyāni carma ca || 24 ||
[Analyze grammar]

yadyadyonau prajāyeta tattadvastraparigraham |
bhojanāni vicitrāṇi gandhānyagandhakāni ca || 25 ||
[Analyze grammar]

kledaśaivālabhakṣyāṇi manyate svāni vaibhramāt |
vividhāni ca kṛcchrāṇi bhuṃkte vratāni siddhaye || 26 ||
[Analyze grammar]

kurute cā'pyabhīṣṭāni tānyanudravati pragaḥ |
ātmarūpaguṇān lābhān vividhān hṛdayapriyān || 27 ||
[Analyze grammar]

dhāvate cānubhogārthaṃ bhoktavyāni mayeti ca |
mamatvenāvṛto nityaṃ tatraiva parivartate || 28 ||
[Analyze grammar]

sargakoṭisahasreṣu triṣu lokeṣu tatphalam |
yathākarma samaśnāti maraṇāntāsu mūrtiṣu || 29 ||
[Analyze grammar]

aśanārahitaścāpi sāśanaḥ samajāyate |
nirindriyo'pi manute sendriyaṃ svaṃ vraṇānvitam || 30 ||
[Analyze grammar]

aliṃgo liṃgavantaṃ cā'mṛtyurmṛtyubhayānvitam |
aduḥkho duḥkhinaṃ cāpyakṣaro'pi manyate kṣaram || 31 ||
[Analyze grammar]

evaṃ kṣarābhimānena kṣarānniryāti naiva saḥ |
rājannajñānabhāvasya nā'syānte vidyate kvacit || 32 ||
[Analyze grammar]

ṛte gurūpaniṣadṃ śāstrāṇāṃ pariśīlanam |
satsaṃgaṃ satkathālābhaṃ hareḥ satāṃ prasevanam || 33 ||
[Analyze grammar]

anugrahaṃ hṛtsthaharermuktānāmanuvartanam |
ārādhanaṃ hareścāpi dhyānaṃ tasya parātmanaḥ || 34 ||
[Analyze grammar]

etāni sādhanānyeva divyāni divyadāni hi |
ātmanā yujyate cātmā parātmā tatra yujyate || 35 ||
[Analyze grammar]

tadā pāraṃ paraṃ yātyakṣarātparasthitaṃ prabhum |
yāvaddhariṃ śrayennaiva satsaṃgaṃ nācaredapi || 36 ||
[Analyze grammar]

bhaktiṃ vidhāpayennaivopāsanāṃ na samācaret |
pratyakṣasya hareḥ sevāṃ guroḥ sevāṃ satāṃ tathā || 37 ||
[Analyze grammar]

yāvatkuryānna vai tāvatsaṃsāro'sya na līyate |
sargakoṭisahasrāṇi patanāntāni gacchati || 38 ||
[Analyze grammar]

dhāmnā dhāmasahasrāṇi maraṇāntāni yāti ca |
māyāmāyikasevābhimāyikastriguṇo bhavet || 39 ||
[Analyze grammar]

māyāsambandhayogena māyāguṇamayo bhavet |
ratyarthamabhisambandhādanyonyaguṇasaṃśrayāt || 40 ||
[Analyze grammar]

ṛtau garbhāśrayād rūpaṃ māyikaṃ labhate muhuḥ |
evaṃ vai jāyamānasya mokṣadharmaḥ kuto bhavet || 41 ||
[Analyze grammar]

tasmād granthiṃ vāsanākhyāṃ chitvā bhitvā ca saṃvrajet |
tṛṣṇākṣayaṃ tapasaiva kṛtvā jñānena vāpi ca || 42 ||
[Analyze grammar]

vivekena pṛthakkṛtvā matvā''tmānaṃ hyamāyikam |
jñānaprakāśamārgeṇa gantavyaṃ satpathena ca || 43 ||
[Analyze grammar]

tadā guṇā viyujyante nirguṇādvai cidātmanaḥ |
āgarbhādeva puṇyena guṇabhinnaṃ samīkṣate || 44 ||
[Analyze grammar]

prahlādavattathā madālasābālā ivāpi ca |
śrīhareḥ kṛpayā yadvā divyacakṣuḥ prakāśate || 45 ||
[Analyze grammar]

ātmā'nātmavivekena guṇahānyā nijaṃ nijaḥ |
paraṃ paśyati yuktātmā parātparaṃ hariṃ tathā || 46 ||
[Analyze grammar]

ekāgratā balaṃ tatra dhyānabalaṃ ca kāraṇam |
vimuktaḥ sarvasaṃgebhyo brāhme muhūrtake sthiraḥ || 47 ||
[Analyze grammar]

dhārayettu manaḥ kṛṣṇe'pararātre hṛdantare |
buddhyā vṛttiṃ sthirīkṛtyā'pyakaṃpo niścalo bhavan || 48 ||
[Analyze grammar]

hariṃ paśyati cāntaḥsthaṃ tadā yukto bhavatyayam |
yuktasya sarvadā bhānaṃ parameśaparāyaṇam || 49 ||
[Analyze grammar]

nānyacchṛṇoti cāghrāti na rasyati na paśyati |
naiva spṛśati gṛhṇāti yāti vakti ca mehati || 50 ||
[Analyze grammar]

na manute na ca saṃkalpayate manyate na ca |
na buddhyati tadā cātmā parātmani pramodate || 51 ||
[Analyze grammar]

prakāśate'mbare sūryo nirvāte dīpako yathā |
taṃ prapaśyanti munayo brahmayonaya īśvarāḥ || 52 ||
[Analyze grammar]

taṃ paraṃ paramātmānaṃ dṛśyetātmadṛśā tadā |
ātmadṛṣṭirmatā vidyā avidyā mānasī dṛśiḥ || 53 ||
[Analyze grammar]

avidyā sarganāśāḍhyā vidyā muktirhi śāśvatī |
avyaktaṃ sṛjate'vidyāṃ vidyā cātmā'bhipadyate || 54 ||
[Analyze grammar]

avidyayā mṛtiṃ yāyād vidyayā'mṛtamṛcchati |
vidyālābhe tvātmano vai viveko bahuśākhavān || 55 ||
[Analyze grammar]

kṛtātmanaḥ prajāyeta śṛṇu rājan vadāmi te |
kiṃ mayā kṛtametāvatkālena māyikena vai || 56 ||
[Analyze grammar]

ajñeneva jhaṣeṇātra jālaṃ samanuvartitam |
jalādanyanna jānāti matsyo jalāptajīvanaḥ || 57 ||
[Analyze grammar]

tathā nā'haṃ paraṃ kaṃcijjñātavān bhramachāditaḥ |
mamācāre bhrame dhigdhigastu mohānuvartane || 58 ||
[Analyze grammar]

mohānuvartanaṃ prāpya nā'vediṣaṃ pareśvaram |
māyayā'haṃ sthitaśchanno vañcitaḥ paramātmani || 59 ||
[Analyze grammar]

māyayā'haṃ vaśīkṛtaḥ kālametaṃ na buddhavān |
vañcito'smyanayā yaddhi mokṣamārgaṃ na labdhavān || 60 ||
[Analyze grammar]

na cā'yamaparādho'syā aparādho mamāpi ca |
yo'hamatrā'vasaṃ sakto lubdho viṣayavāsanaḥ || 61 ||
[Analyze grammar]

arūpaścāpyamūrtaśca rūpamūrto'bhavaṃ tayā |
prākṛtena mamatvena dharṣito vañcitastataḥ || 62 ||
[Analyze grammar]

mamakāravihīnena mayā mamatvasañjuṣā |
kiṃ kṛtaṃ prakṣipya mokṣaṃ nirayaṃ yat pralabdhavān || 63 ||
[Analyze grammar]

nānayā mama kāryaṃ vai śiṣyate vārayoṣitā |
ātmānaṃ bahudhā kṛtvā yā māṃ yunakti vañcane || 64 ||
[Analyze grammar]

athedānīṃ prabuddho'smi kṛpayā sadgurorhareḥ |
apetyemāṃ śrayāmyadya parameśaṃ guruṃ prabhum || 65 ||
[Analyze grammar]

sāmyaṃ yāsyāmi devena nānayā kūṭayoṣitā |
kṣemaṃ kṛṣṇena yāsyāmi vrajiṣyāmi paraṃ padam || 66 ||
[Analyze grammar]

evaṃ kṛtvā vivekotthaṃ nirṇayaṃ cātmanā tataḥ |
saṃgadharmā hareḥ saṃgāddharitulyo'bhipadyate || 67 ||
[Analyze grammar]

etaduktaṃ parabrahma yasmānnāvartate punaḥ |
rājan yena paraṃ jñānaṃ prāptaṃ cedṃ pramokṣadam || 68 ||
[Analyze grammar]

yena kṣarā'kṣare jñāte bhayaṃ tasya na vidyate |
śreyaḥ prakurvataścātra bhayaṃ cāpi na yasya ha || 69 ||
[Analyze grammar]

tasya bhayaṃ pare loke kadāpi naiva jāyate |
dharmaṃ satāṃ hitaṃ puṃsāṃ cāśrayato bhayaṃ na vai || 70 ||
[Analyze grammar]

svādukāmukakāmānāṃ vaitṛṣṇyaṃ nirbhayaṃ sadā |
jñāne dharme paricayaṃ kurvato na bhayaṃ kvacit || 71 ||
[Analyze grammar]

nityaṃ vai bahudātuśca sādhūnāṃ sevinaḥ sadā |
satāṃ satkāraśīlasya bhayaṃ naiva bhavet kvacit || 72 ||
[Analyze grammar]

nyāyamarhāya dātuśca hṛdā śuddhasya vedinaḥ |
viraktasya visaṃgasya bhayaṃ naiva bhavet kvacit || 73 ||
[Analyze grammar]

sarvanirhṛtadoṣasya sarvaprāṇiprasevinaḥ |
paropakāraśīlasya bhayaṃ naiva bhavet kvacit || 74 ||
[Analyze grammar]

titikṣoḥ sahamānasya krodhahīnasya dehinaḥ |
saralasya hitakarturbhayaṃ naiva prapadyate || 75 ||
[Analyze grammar]

śubhāśrayasya dātuśca saṃyamino dayājuṣaḥ |
sarvatra mānabhāvasya bhayaṃ naiva bhavet kvacit || 76 ||
[Analyze grammar]

dhṛtātmanaḥ praśāntasya prājñasya bhakticāriṇaḥ |
tapasvinaḥ sevakasya bhayaṃ naiva hi jāyate || 77 ||
[Analyze grammar]

dharmādharmavimuktasya sarvasaṃśayanāśinaḥ |
janmamṛtyuvimuktasya paraṃ śreyo hi niścitam || 78 ||
[Analyze grammar]

puṇyapāpavimuktasya brahmānugrahayoginaḥ |
dehatrayātiriktasya paraṃ śreyo hi niścitam || 79 ||
[Analyze grammar]

mūlaprakṛtitattve ca vikārāṇāṃ ca ṣoḍaśe |
prakṛtivikṛtau cāpi yo baddhaḥ sa mucyate || 80 ||
[Analyze grammar]

anyaṃ dehaṃ nijaṃ cānyaṃ vidyād yaḥ sa na lipyate |
anyacca maśakaṃ vidyādanyadudumbaraṃ tathā || 81 ||
[Analyze grammar]

navodumbarayogena maśakastatra lipyate |
anya ca matsyakaṃ vidyādanyad vidyājjalaṃ tathā || 82 ||
[Analyze grammar]

na cāpāṃ saṃprasaṃgena matsyastatra pralipyate |
anyaścāgniścullikānyā cullyāgnirnaiva lipyate || 83 ||
[Analyze grammar]

jalaṃ cānyan padmamanyadadbhiḥ padmaṃ na lipyate |
eteṣāṃ sahavāsaśca nivāso mitha eva ha || 84 ||
[Analyze grammar]

tathāpyetatpṛthagbhāvaṃ yaḥ paśyati sa paśyati |
evaṃ vai paśyatastatrāśrayanāśe na bandhanama || 85 ||
[Analyze grammar]

tattajjīvanapūrāccedadhikaṃ jīvanaṃ milet |
tato jīvanamāsādya sukhaṃ tatra pramodate || 86 ||
[Analyze grammar]

paramātmā jīvanaṃ vai sarvānandā'mṛtapradam |
tamāśrayaṃ samāsādya bhayaṃ mṛtyurna nāśanam || 87 ||
[Analyze grammar]

paraṃśreyaḥ paraṃbrahma parāmuktiḥ paraṃ padam |
ajarāmaralokaścā'vyayānandasukhābdhikam || 88 ||
[Analyze grammar]

yukto muktaḥ sadā cātra nijātmani samaśnute |
nityaprasādastṛptātmā sukhasvapananirvṛtaḥ || 89 ||
[Analyze grammar]

meghairyathā śilā naiva calatyayaṃ tathāvidhaḥ |
na kampettu kṛtairghoṣagarjanāgītavādanaiḥ || 90 ||
[Analyze grammar]

tailapātraṃ kare kṛtvā rajjvā naṭaḥ prayāti ca |
sthālyā'pi saṃyatātmā vai nirbhayaḥ kampavarjitaḥ || 91 ||
[Analyze grammar]

nā'sya pātrāt sravate ca tailabindurmanāgapi |
prayāti cottaraprāntaṃ tayā yukto jayaṃ labhet || 92 ||
[Analyze grammar]

etādṛśo brahmayuktaḥ paśyati brahma cātra ha |
parabrahma samāsādya mukto mokṣamavāpnuyāt || 93 ||
[Analyze grammar]

ityevaṃ rādhike bhūpaṃ copadiśya ca lomaśaḥ |
śāntiṃ cāvāpa rājā ca punaḥ papraccha tatsṛtim || 94 ||
[Analyze grammar]

yathā muktā mahātmāno muktā naiḥśreyasārthinaḥ |
prayānti cotkramaṇādyaistāni papraccha lomine || 95 ||
[Analyze grammar]

iti śrīlakṣmīnārāyaṇīyasaṃhitāyāṃ dvitīye tretāsantāne lomaśagītāyām ātmanaḥ kṣaramocanaṃ cākṣaragamanaṃ ca kathaṃ neti praśraḥ taduttaraṃ tanmocanaṃ tadgamanaṃ cetyādinirūpaṇanāmā ṣaṭpañcāśadadhikadviśatatamo'dhyāyaḥ || 256 ||
[Analyze grammar]