Chapter 255

śrīkṛṣṇa uvāca |
rādhike ca tataścāśvapaṭṭalo lomaśaṃ munim |
yogasya ca balaṃ cāpyabalaṃ papraccha kīdṛśam || 1 ||
[Analyze grammar]

aśvapāṭala uvāca |
ṛṣe yogabalaṃ kīdṛg vettamicchāmi cābalam |
yena mukto bhavedvāpi cāvaṣṭabhyeta nirbalaḥ || 2 ||
[Analyze grammar]

śrīlomaśa uvāca |
śaucaṃ tapo dayā satyamahiṃsā steyavarjanam |
prāṇarodho vṛttirodho dhyānaṃ samā hi yoginām || 3 ||
[Analyze grammar]

abhyāso balavān yasya tasya yogaḥ prasiddhyati |
nirbalasyā'bhyasanaṃ ca nirbalaṃ tena bandhanam || 4 ||
[Analyze grammar]

kāmaṃ lobhaṃ ca mohaṃ ca snehaṃ krodhaṃ ca rāgitām |
yogācchitvā'pyabalastu punasteṣvapi sajjate || 5 ||
[Analyze grammar]

yathā matsyāḥ sthūladehā chitvā jālaṃ punarjalam |
viśanti nirbalāstadvat ṣaṭkaṃ viśanti vai punaḥ || 6 ||
[Analyze grammar]

yathā ca balavanto vai mṛgāḥ pāśān vibhidya ca |
paraṃ vanāntaraṃ yānti tadvad yogivarāḥ param || 7 ||
[Analyze grammar]

māyāpāraṃ prayāntyeva baliṣṭhātmaparāyaṇāḥ |
yathā ca balahīnā vai śaśādyā bandhanāni vai || 8 ||
[Analyze grammar]

āsādya nahi nirgantuṃ samarthā yoginastathā |
nirbalā na samarthā vai nirgantuṃ jālato bahiḥ || 9 ||
[Analyze grammar]

jhaṣāśca nirbalā jālaṃ chitvā prayānti naiva ha |
nirbalā yoginastadvanmāyāṃ chitvā prayānti na || 10 ||
[Analyze grammar]

śakunā balino jālaṃ chitvā yānti digantaram |
yogino balino māyāṃ chitvā'mbaraṃ prayānti hi || 11 ||
[Analyze grammar]

balavāṃśca yathā vahniḥ sarvaṃ dahati cāgatam |
baliṣṭhā yogino māyāṃ dahantyeva svatejasā || 12 ||
[Analyze grammar]

nirbalastu yathā vahniḥ śāmyatyevāpi dārubhiḥ |
yogyapi nirbalaḥ ṣaṭke parābhavaṃ prayāti vai || 13 ||
[Analyze grammar]

nadīsroto balahīnaṃ tvākṛṣya nayate jale |
ṣaṭkaṃ tadvannirbalaṃ cākṛṣya nayati māyike || 14 ||
[Analyze grammar]

vāraṇaḥ sabalaḥ sroto viṣṭabhnāti ca gacchati |
baliṣṭhaśca tathā yogī ṣaṭkaṃ nivārya gacchati || 15 ||
[Analyze grammar]

sabalāstu pramucyante nirbalā yānti bandhanam |
pralayotthamahādityo yathā śoṣayate jagat || 16 ||
[Analyze grammar]

mokṣabalotthitayogī doṣān śoṣayate tathā |
yogino yogabalato viśantīśvaramandiram || 17 ||
[Analyze grammar]

devānāmālayān prajāpatisthānāni vāpi ca |
sarvadā'bhyāsaśīlasya balaṃ yogasya vardhate || 18 ||
[Analyze grammar]

tataḥ punarvibhidyaiva māyāṃ prayānti cākṣaram |
kṛtābhyāso yathā dhanvī kuśalo lakṣyavedhakaḥ || 19 ||
[Analyze grammar]

vidhvā lakṣyaṃ jayaṃ yāti tathā'kṣaraṃ prayāti saḥ |
mastake snehapātraṃ ca kṛtābhyāso nidhāya ca || 20 ||
[Analyze grammar]

yathā rajjvā naṭo yātyaskhalito jayameti ca |
tathā'bhyāsabalarddhiścākṣaraṃ yogī prayāti hi || 21 ||
[Analyze grammar]

yathā'bhyāso karṇadhāro nāvā pāraṃ prayāti ca |
tathā yukto balenāpi jagatpāraṃ pragacchati || 22 ||
[Analyze grammar]

sārathiśca balī cāśvānniyamya yāti niścitam |
tathā yukto yogivaryo yātyakṣaraṃ dhruvaṃ padam || 23 ||
[Analyze grammar]

nijātmani pareśaṃ yaḥ paśyatyeva ca yogavit |
māyājālaṃ sa vai chitvā prayātyeva paraṃ padam || 24 ||
[Analyze grammar]

cakreṣu dehasaṃstheṣu saṃvihṛtya malāni tu |
dagdhvā dagdhvā brahmamārgaṃ yāti viyāti vai balāt || 25 ||
[Analyze grammar]

yatheṣṭaṃ ca yadā kalpayatyeva gantumakṣaram |
tadā varṣma vihāyaiva svatantro yāti dhāma tat || 26 ||
[Analyze grammar]

baliṣṭhasyeṣṭadevasyopāstyā balamavāpnuyāt |
abhyāsenātmayogena saṃyamena vṛṣeṇa ca || 27 ||
[Analyze grammar]

tapasā dhyānayogena samādhinā balaṃ vrajet |
kintu rājan mahāraṇye pāraṃ kecitprayānti vai || 28 ||
[Analyze grammar]

baliṣṭhānāṃ vijetāro'raṇye vasanti vai yataḥ |
nārāyaṇaṃ vinā pāraṃ gantuṃ sandehavatpadam || 29 ||
[Analyze grammar]

hriyante'pi baliṣṭhā vai prabaliṣṭhatamā'ribhiḥ |
divyaiśvaryacamatkārasiddhidhāmanivāsibhiḥ || 30 ||
[Analyze grammar]

anādiśrīkṛṣṇanārāyaṇaścāgre yadā bhavet |
pragacchan sa nayatyeva jitvā baliṣṭhasattamān || 31 ||
[Analyze grammar]

nijaṃ paraṃ padaṃ divyaṃ śāśvataṃ mokṣamuttamam |
rājan dehe guṇān matvā mā bhūrbaddhaḥ kadācana || 32 ||
[Analyze grammar]

vivekena pramātavyaṃ kalmāṣāṇāṃ gṛhaṃ vapuḥ |
atra sattvaṃ daśabhāvaṃ me nibodha vadāmi tān || 33 ||
[Analyze grammar]

ānandaḥ prītiruddharṣaḥ prakāśaḥ puṇyakāritā |
santoṣamārjavaṃ śraddhā tyāga aiśvaryamityapi || 34 ||
[Analyze grammar]

tathā rajo navabhāvaṃ me nibodha vadāmi tān |
āstikatvamakārpaṇyaṃ dvandvopasevanaṃ tathā || 35 ||
[Analyze grammar]

kāmo dveṣo mado darpo vādaḥ paruṣatā tathā |
tathā chāyā tamo'bhāvaṃ me nibodha vadāmi te || 36 ||
[Analyze grammar]

tāmasatvaṃ mohanaṃ ca dhūmrabhāvo matikṣayaḥ |
nidrā pramāda ālasyaṃ nāśaśceti tathāvidhāḥ || 37 ||
[Analyze grammar]

buddhitattvaṃ saptabhāvaṃ me nibodha vadāmi te |
ahantā mamatā mānaṃ dairghyaṃ cāśā svapūjyatā || 38 ||
[Analyze grammar]

īśateti manaścāpi ṣaḍbhāvaṃ tān vadāmi te |
cāñcalyaṃ vegavattvaṃ ca saṃśayaśca svatantratā || 39 ||
[Analyze grammar]

snigdhatvaṃ cāpyaviśvāsyaṃ mānase te matāḥ sadā |
indriyaṃ pañcabhāvaṃ ca me nibodha vadāmi te || 40 ||
[Analyze grammar]

atṛptiḥ raṃjanaṃ caudāsīnyaṃ cālocanaṃ gatiḥ |
caturbhāvaṃ bhūtatattvaṃ me nibodha vadāmi tān || 41 ||
[Analyze grammar]

āśrayo bandhanaṃ nāśaḥ prasavaśceti sarvadā |
tribhāvaṃ kośatattva ca ṣaṭkośāste tanusthitāḥ || 42 ||
[Analyze grammar]

romalohitamāṃsāni majjāsthisnāyavaśca te |
bhāvāstu kledyatā mālinyaṃ tathā paribhogyatā || 43 ||
[Analyze grammar]

prāṇo vai dvisvabhāvaśca bhāvau dvau tau nibodha me |
jīvanaṃ bhrāmaṇaṃ ceti tattvāni kathitāni te || 44 ||
[Analyze grammar]

rājan tattvavivekena bhāvāste doṣarūpiṇaḥ |
ātmano mokṣamārge vai vighnāste yadi te tathā || 45 ||
[Analyze grammar]

tān vivicyaikabhāvaṃ vai sukhabhāvaṃ nijātmakam |
parameśe'rpayed bhaktyā mokṣastasya sthito dhruvaḥ || 46 ||
[Analyze grammar]

yadvā bhāvān lokayitvā didṛkṣāntaṃ vidhāpayet |
mānuṣān viṣayān sarvān paiśācān viṣayāṃstathā || 47 ||
[Analyze grammar]

yakṣāṇāṃ viṣayāṃścāpyauragāṇāṃ viṣayāṃstathā |
gāndharvaviṣayāṃścāpi pitṝṇāṃ viṣayāṃstathā || 48 ||
[Analyze grammar]

tiraścāṃ viṣayāṃścāpi marutāṃ viṣayāṃstathā |
patatriviṣayāṃścāpi rājarṣiviṣayāṃstathā || 49 ||
[Analyze grammar]

brahmarṣiviṣayāṃścāpyāsurāṇāṃ viṣayāṃstathā |
viṣayān viśvadevānāṃ yogināṃ viṣayāṃstathā || 50 ||
[Analyze grammar]

prājāpatyānaiśvarāṃśca brāhmānīśvarakoṭijān |
viṣayān samparijñāya sukhaduḥkhe'nubhūya ca || 51 ||
[Analyze grammar]

guṇadoṣān vilokyaiva śāntiṃ prāpya tataḥ param |
ātmanā ca vivekenātmānaṃ mokṣe niveśayet || 52 ||
[Analyze grammar]

jñānavijñānasampannaścopāyairbhāvitaḥ svayam |
prāpnoti mokṣaṇaṃ divyaṃ nityānandākṣaraṃ padam || 53 ||
[Analyze grammar]

rājan saṃkocayet prāṇaṃ saṣaṭkośaṃ ca bhūtake |
bhūtāni mātrayuktāni cendriyāṇi ca vai manaḥ || 54 ||
[Analyze grammar]

ahantādiyutaṃ buddhau vilopayed vivekavān |
buddhiṃ samarpayennaije svarūpe tvātmasaṃjñake || 55 ||
[Analyze grammar]

ātmānaṃ brahmarūpaṃ ca kṛṣṇanārāyaṇe hṛdi |
taṃ mokṣe yojayettena gacchedakṣaradhāma yat || 56 ||
[Analyze grammar]

jñātvā kālasya kavalān devān prajāpatīn ṛṣīn |
saptarṣīṃścāpi rājarṣīn surarṣīṃścyāvitān sadā || 57 ||
[Analyze grammar]

brahmarṣīṃśceśvararṣīṃśca jñātvā kālakṛtāntakān |
na tatra vai cared dhyānaṃ mokṣamārgagatiṃ caran || 58 ||
[Analyze grammar]

pāpināṃ ca gatiṃ jñātvā yāmyaloke'bhisaṃvṛtām |
vicitrayonijanmāni pretabhāvān vilokya ca || 59 ||
[Analyze grammar]

garbhaduḥkhāni vai jñātvā jantūnāṃ kutsitāni ca |
upaplavān praghorāṃśca tārānakṣatrapātanam || 60 ||
[Analyze grammar]

yugalānāmakasmācca viyogaṃ kṛpaṇaṃ tathā |
bhūtānāṃ bhakṣaṇaṃ cāpyanyonyaṃ vilokya nirghṛṇam || 61 ||
[Analyze grammar]

viṣayāṇāṃ ca daurātmyaṃ gatāsūnāṃ na jīvanam |
pāpināṃ duḥkhadāścāpi gatīrvijñāya dāruṇām || 62 ||
[Analyze grammar]

tiraścāṃ duḥkhamālakṣyā''yuṣāṃ kṣayaṃ dine dine |
dehināṃ saṃkṣayaṃ vīkṣya mṛtyuduḥkhaṃ vilokya ca || 63 ||
[Analyze grammar]

dehadoṣān pravijñāya narakāgāratāṃ tathā |
nyasya dehaṃ brahmarandhrād gantavyaṃ paramaṃ padam || 64 ||
[Analyze grammar]

āśrayet prāṇadevaṃ ca vāyudevaṃ tataḥ param |
vyomadevaṃ tataścāpi sūryaraśmiṃ tataḥ param || 65 ||
[Analyze grammar]

cāndraraśmiṃ tataścāpi puṇyaraśmiṃ tataḥ param |
satyaraśmiṃ tataścāpi sattvaraśmiṃ tataḥ param || 66 ||
[Analyze grammar]

īśaraśmiṃ tataścāpi brahmaraśmiṃ tataḥ param |
muktaraśmiṃ tataścāpi paraṃbrahma samarjayet || 67 ||
[Analyze grammar]

paramātmānamāsādya tadbhūtāyatanā'malaḥ |
amṛtaṃ paramaṃ prāpto yatpunarna nivartate || 68 ||
[Analyze grammar]

paramā sā gatiḥ rājan satāṃ ca yogināmapi |
sāttvatānāṃ ca bhaktānāṃ haryarthakṛtakarmaṇām || 69 ||
[Analyze grammar]

tatra jñānaṃ hi sārvajñyaṃ caiśvaryavrātasaṃbhṛtam |
tṛptiḥ sarvātirekā cānandamātrāpi nirbharā || 70 ||
[Analyze grammar]

asaṃgasya hi sārvajñyaṃ nirdvandvāya sadā matam |
ataḥ sārvajñyabhāvena yuktāste nityatoṣiṇaḥ || 71 ||
[Analyze grammar]

nityānandā nityaśāntā nityatṛptā nirāśayāḥ |
sarvadarśina evāpi saṃsārā'darśino hi te || 72 ||
[Analyze grammar]

saṃsāradarśinaścāpi tattadbhāvavivarjitāḥ |
bhāvavikṛtiśūnyāśca pratyāhārādisiddhikāḥ || 73 ||
[Analyze grammar]

grāhyā'grāhyasamarthāste sṛṣṭidoṣavivarjitāḥ |
nimnasṛṣṭikṛtān bhāvān jñāne sinvanti naiva te || 74 ||
[Analyze grammar]

aśvapāṭala uvāca |
kiṃ taddhāmā'kṣaraṃ vidvan yasmānnāvartate punaḥ |
kiṃ ca kṣaraṃ tato bhinnaṃ yasmādāvartate punaḥ || 75 ||
[Analyze grammar]

śrīlomaśa uvāca |
akṣaraṃ dhāma subhagaṃ rājan pareśvarasya yat |
anādiśrīkṛṣṇanārāyaṇasyā'tyavatāriṇaḥ || 76 ||
[Analyze grammar]

parabrahmaṇa evaitannārāyaṇeśvarasya tat |
puruṣottamasaṃjñasyā'kṣarātītasya śāśvatam || 77 ||
[Analyze grammar]

śivaṃ kṣemaṃ cābhilāṣopanītaṃ sarvasiddhimat |
sarveśvareśvarasthānaṃ muktāvāsaṃ parātparam || 78 ||
[Analyze grammar]

yanna kṣarati pūrveṇa yāvatkālena vai kvacit |
āyatyā ca na vai grastaṃ cāvyayaṃ brahmadhāma tat || 79 ||
[Analyze grammar]

golokāccāpi vaikuṇṭhādūrdhvaṃ cānantamacyutam |
yatra dhāmānyanantāni cāvatārakṛtāni vai || 80 ||
[Analyze grammar]

nārāyaṇānāṃ vidyante nārāyaṇīkṛtāni hi |
avatārā nivasanti koṭiśo yatra dhāmasu || 81 ||
[Analyze grammar]

tāni yatra prabhāsante'kṣaraṃ taddhāma sarvagam |
brahmalokaścidākāśo'khaṇḍatejobhuvāṃ nidhiḥ || 82 ||
[Analyze grammar]

yatrā'kṣaraṃ brahma cāpi mūrtimad rājate prabhu |
akṣaraṃ tatparaṃ dhāma tasmātparaṃ hareḥ priyam || 83 ||
[Analyze grammar]

paraṃdhāmā'sti vai yatra parabrahmāsanaṃ sadā |
vartate sarvataḥ śreṣṭhaṃ gajāsanaśubhāsanam || 84 ||
[Analyze grammar]

brahmapriyāḥ samastā vai vartante tatra sevikāḥ |
anādiśrīkṛṣṇanārāyaṇasya muktidāsikāḥ || 85 ||
[Analyze grammar]

muktānyo vai harermūrteḥ śaktayo'nantasiddhayaḥ |
siddhāścānantasaṃkhyāśca sādhyā devā vasanti te || 86 ||
[Analyze grammar]

anādayaśca te muktā vasanti dhāmni tatpare |
ādimuktāstvakṣare vai vasanti dhāmni sarvadā || 87 ||
[Analyze grammar]

etadakṣarasaṃjñaṃ taddhāma māyāparaṃ yataḥ |
guṇātītaṃ mahānandaṃ nityānandādisaṃbhṛtam || 88 ||
[Analyze grammar]

yadromaleśasaukhyena dhāmānyanyāni yāni ca |
ānandāmṛtasaukhyairvaiṃ saṃbhṛtāni bhavanti hi || 89 ||
[Analyze grammar]

anyāśceśvaralokākhyā bhuvastatsaukhyasaṃbhṛtāḥ |
sṛṣṭayaḥ sarvavidhikāstadānandena nanditāḥ || 90 ||
[Analyze grammar]

māyātmikāḥ sṛṣṭayaśca kṣaraṃ kṣaranta eva vai |
triguṇāśca tamo māyā cā'vyaktaṃ puruṣā''hitam || 91 ||
[Analyze grammar]

vyaktarūpaṃ bhavatyeva mahattattvamahaṃ tathā |
vidyāvidye puṇyapāpe vidhyavidhī tathā'parau || 92 ||
[Analyze grammar]

dharmo jñānaṃ virāgaṃ caiśvaryaṃ vyakte pratiṣṭhitam |
tadviruddhaṃ tathā cāpi vyakte sarvaṃ pratiṣṭhitam || 93 ||
[Analyze grammar]

śabdaḥ sparśaḥ raso rūpaṃ gandho vai bhūtasūkṣmakam |
manaścālocanārthaṃ ca śrotratvaṅnetrajihvikāḥ || 94 ||
[Analyze grammar]

ghrāṇaṃ ceti tato'nye ca vākpāṇipādapāyavaḥ |
upasthaṃ ceti karmārthaṃ vyomānilānalāstathā || 95 ||
[Analyze grammar]

vārikṣye ca tataścānye ṣāṭkauśikatanubhṛtaḥ |
etatsarvaṃ kṣarate'harniśaṃ tat kṣaramucyate || 96 ||
[Analyze grammar]

sarveṣāṃ dehabhāve vai caturviṃśatibhūmayaḥ |
nyūnā vā santi kṣarikāḥ kṣaraṃ tasmādudīritam || 97 ||
[Analyze grammar]

yattu mūrtimayaṃ kiñcit sarvaṃ kṣaraṇadharmakam |
jale bhuvi tathākāśe vāyau tejasi tatpare || 98 ||
[Analyze grammar]

puṇyastare siddhipare sattvapaṭalake'pi vā |
kṣarādhāraṃ kṛtsnametat kṣarate vyaktasaṃjñitam || 99 ||
[Analyze grammar]

kṣare'kṣaraṃ sadā cāste hyātmā cākṣara ityapi |
akṣare cātmani sthānaṃ yasya saḥ parameśvaraḥ || 100 ||
[Analyze grammar]

sa eva hṛdi sarvāsu mūrtiṣvātiṣṭhate hariḥ |
bhaja taṃ śrīkṛṣṇanārāyaṇaṃ rājan ramānvitam || 101 ||
[Analyze grammar]

śuklaraktakṛṣṇasṛṣṭisvāminaṃ padmajeśvaram |
pāragaṃ cāntarasthaṃ ca kāṃbhareyaṃ priyaṃ prabhum || 102 ||
[Analyze grammar]

śrīkṛṣṇavallabhaṃ nāthaṃ kuṃkumavāpikeśvaram |
gopālabālakaṃ rājan lomaśeṣṭaṃ patīśvaram || 103 ||
[Analyze grammar]

aśvapaṭṭasaraḥkṣetrādityaṃ brahmapriyāpatim |
bālakṛṣṇaṃ cākṣareśaṃ sarvāntaryāmiṇaṃ prabhum || 104 ||
[Analyze grammar]

sṛṣṭyādau tu bhuvaṃ cemāṃ bhajamānaṃ surāṣṭrikām |
mahāviṣṇusutaṃ śrīmanmahālakṣmyekabālakam || 105 ||
[Analyze grammar]

tato'nekasvarūpaṃ ca bahvavatāradhāriṇam |
tato dharmasutaṃ bhaktisutaṃ kṛṣṇaṃ hariṃ ca tam || 106 ||
[Analyze grammar]

naraṃ nārāyaṇaṃ cāpi brahmaśīlaparāyaṇam |
svāminaṃ tyāginaṃ cāpi sarvajñaṃ deśikaṃ tathā || 107 ||
[Analyze grammar]

ācāryaṃ sadguruṃ dhiṣṇyādhipaṃ sanmaṇḍaleśvaram |
brahmavrataṃ sahājīvaṃ sarvālocakamacyutam || 108 ||
[Analyze grammar]

bhaja rājan parāṃ muktiṃ vraja tanmatkṛpākaṇāt |
ityevaṃ rādhike cāśvapāṭalaṃ nṛpatimṛṣiḥ || 109 ||
[Analyze grammar]

upādiśya virarāma smaran śrīkṛṣṇavallabham |
rājā'pyānandasandohāt saṃbhṛtāntaraharṣitaḥ || 110 ||
[Analyze grammar]

adhikasvādamāsādya parabrahmakathāmṛte |
satṛṣa iva pipāsuḥ punaḥ papraccha lomaśam || 111 ||
[Analyze grammar]

iti śrīlakṣmīnārāyaṇīyasaṃhitāyāṃ dvitīye tretāsantāne lomaśagītāyāṃ nṛpakṛto yogasya balā'balapraśraḥ kṣarā'kṣaralokapraśnaḥ lomaśakṛtottarāṇi cetyādinirūpaṇanāmā |
pañcapañcāśadadhikadviśatatamo'dhyāyaḥ || 255 ||
[Analyze grammar]