Chapter 254

śrīkṛṣṇa uvāca |
rādhike'śvapāṭalaśca papraccha devatoṣaṇam |
ātmano ramaṇaṃ cāpi nirvighnaṃ yena jāyate || 1 ||
[Analyze grammar]

aśvapāṭala uvāca |
maharṣe suralokeṣu vāso vai surayājinām |
brahmaloke nivāsaśca jāyate brahmayājinām || 2 ||
[Analyze grammar]

īśvarāṇāṃ tu loke'pi tattadīśvarayājinām |
dhāmasu cāvatārāṇāṃ yajanādvasatirbhavet || 3 || || 5 ||
[Analyze grammar]

devānāṃ toṣaṇaṃ yena yenopāyena jāyate |
vadā'tra me kṛpāṃ kṛtvetareṣāmapi dhāminām || 4 ||
[Analyze grammar]

śrīlomaśa uvāca |
devāstuṣyanti yajñena pūjayopāstibhistathā |
naivedyabalibhiścāpi mantrārādhanatadvrataiḥ || 5 ||
[Analyze grammar]

satyenā'hiṃsayā śuddhyā śīlena ca vṛṣeṇa ca |
ātmasamarpaṇenā'pi mānatāśaraṇādibhiḥ || 6 ||
[Analyze grammar]

anuṣṭhānena kṛcchreṇa dānena smaraṇena ca |
utsavena kīrtanādyairdevāstuṣyanti bhūpate || 7 ||
[Analyze grammar]

ātmaśuddhyā vivekena puṇyakarmabhirādarāt |
tuṣṭā devā dadatyevaihikaṃ svargyaṃ sukhaṃ nijam || 8 ||
[Analyze grammar]

īśvarāḥ pitaraḥ śrāddhairmahodyāpanakarmabhiḥ |
pārāyaṇairvedavidyādhyayanaiḥ pratimārhaṇaiḥ || 9 ||
[Analyze grammar]

mandire vidhitaḥ pratiṣṭhāpanaiḥ pūjanādibhiḥ |
mahotsavairvedadharmaistuṣyantīśvarakoṭayaḥ || 10 ||
[Analyze grammar]

avatārā harerbhāvā bhaktyārādhanayā tathā |
pūjayā mūrtisevādyaistīrthatadvratabhāvanaiḥ || 11 ||
[Analyze grammar]

ājñayā'rpaṇarītyā ca tatkathāśravaṇadibhiḥ |
ananyaśaraṇāgatyā niṣṭhyaikaikatānayā || 12 ||
[Analyze grammar]

satataṃ cānuvṛttyā ca smṛtyā dhyānena sevayā |
pavitratayā vṛttyā ca nairmalyayutayā'niśam || 13 ||
[Analyze grammar]

tacchaktitatpārṣadādisevayā'rpaṇatāśrayaiḥ |
tattacchṛṃgāradānādyairmānasaiḥ pūjanādibhiḥ || 14 ||
[Analyze grammar]

tadbhaktānāṃ strīnarāṇāṃ sevanairbhojanārpaṇaiḥ |
avatārāḥ pratuṣyanti tattadaiśvaryadāyinaḥ || 15 ||
[Analyze grammar]

tattaddhāmapradātāro bhavanti bhaktitoṣitāḥ |
paramātmā'nādikṛṣṇanārāyaṇastu bhūpate || 16 ||
[Analyze grammar]

sarvārpaṇātmabhaktyaiva tuṣyatyatra śriyaḥ patiḥ |
viśvāsabhaktyā nyāsena dāsyena sthirasevayā || 17 ||
[Analyze grammar]

ānukūlyānuvṛttyā ca varaṇenā'rhaṇena ca |
kaiṃkaryeṇā'pyasaṃgena pūjanena vṛṣeṇa ca || 18 ||
[Analyze grammar]

dhyānena bhajanenāpi cā''tmā'rpaṇena tuṣyati |
bhāvanā tu mahān hetuḥ snehastasya pratoṣaṇe || 19 ||
[Analyze grammar]

svalpaṃ vāpi mahadvāpi pūjanaṃ bhāvanānvitam |
toṣayatyeva govindaṃ sarvavṛttyaikanirmitam || 20 ||
[Analyze grammar]

yena kenāpi bhāvena satatasmaraṇena ca |
tanmayavitpravāheṇa premarajjumayena ca || 21 ||
[Analyze grammar]

sarvāntarātmadṛṣṭyā ca sarvatṛptikriyādibhiḥ |
tadīyānāṃ svāgataiśca sādhūnāṃ sevanādibhiḥ || 22 ||
[Analyze grammar]

sāttvatānāṃ toṣaṇaiśca dīnānāmupakārataḥ |
anāthānāṃ poṣaṇaiścā'drohaiśca sarvadehinām || 23 ||
[Analyze grammar]

sarvairbhāgavatairdharmaistattvajñānaiḥ svavedanaiḥ |
tatkathākaraṇaiścāpi tadguṇānāṃ ca varṇanaiḥ || 24 ||
[Analyze grammar]

tannāmaraṭaṇaiścāpi tadarthanyāsayojanaiḥ |
tanmayākāravṛttyā ca tatsṛṣṭidharmarakṣaṇaiḥ || 25 ||
[Analyze grammar]

tatsnehārpaṇasarvasvaiḥ parabrahma pratuṣyati |
jaḍacetanavargāṇāṃ yathāpekṣapradānakaiḥ || 26 ||
[Analyze grammar]

dānadharmaiḥ sattvavratairadrohā'vañcanādibhiḥ |
satāṃ dharmaiśca bhaktānāṃ bhaktānīnāṃ ca toṣaṇaiḥ || 27 ||
[Analyze grammar]

sarveṣu saṃsthitaścāste hariḥ śrīkṛṣṇavallabhaḥ |
sarvāstvasyaiva kṛṣṇasya pratimā jaḍacetanāḥ || 28 ||
[Analyze grammar]

narā nāryaścetaracca sarvasṛṣṭisthadehinaḥ |
tatra sarvatra tadbuddhyā sattvarajastamassvapi || 29 ||
[Analyze grammar]

tanmūrtiṃ sevayāmyeva sa vai tuṣyatu matpatiḥ |
anādiśrīkṛṣṇanārāyaṇaḥ śrīkambharāsutaḥ || 30 ||
[Analyze grammar]

gopālanandanaḥ kṛṣṇasya vallabho preṣṭha īśitā |
lakṣmīrādhāramāmāṇikyāramāpadmajāpatiḥ || 31 ||
[Analyze grammar]

brahmapriyāpatirmuktapatiḥ śrīpuruṣottamaḥ |
satāṃ patiścātmapatiḥ sarvapatiḥ patirmama || 32 ||
[Analyze grammar]

itikṛtvā bhajettaṃ cā'ntaryāmiṇaṃ hi dehiṣu |
taddṛṣṭyā tadbhāvanayā tadarpaṇakriyādibhiḥ || 33 ||
[Analyze grammar]

aphalākāṃkṣiṇā bhāvyaṃ tatra sarvatra pūjane |
tuṣyatyeva tathā kṛṣṇaścādṛtaḥ sarvadehiṣu || 34 ||
[Analyze grammar]

tavā'smīha paritrāhi rakṣeti prārthayet sadā |
harenātha harekṛṣṇa bālakṛṣṇa tavāsmyaham || 35 ||
[Analyze grammar]

yathā vartayase māṃ ca tathā varte tavā''jñayā |
tavaiva sarvamevedaṃ nānyat tvāmantarā nviha || 36 ||
[Analyze grammar]

mama dṛṣṭipathe sarvaṃ tavaiva ca tvameva ca |
ityevaṃ bhagavaddṛṣṭyā bhāvitasya tu dehinaḥ || 37 ||
[Analyze grammar]

kāmāt krodhācca mohācca svārthād bhaktyā''śrayādapi |
vartamānasya śaraṇe patitasya tadātmanaḥ || 38 ||
[Analyze grammar]

tūrṇaṃ tuṣyati bhagavān dayālurbhaktavatsalaḥ |
nā'trā'nyat sādhanaṃ vāpi dravyaṃ vā havanādikam || 39 ||
[Analyze grammar]

apekṣate toṣaṇārthaṃ yastasya tasya tuṣyati |
ayaṃ me nā'parasyeti hareḥ kṛpā hi tatprasūḥ || 40 ||
[Analyze grammar]

kṛpayā labhyate kṛṣṇaḥ kṛpayā nīyate'kṣaram |
kṛpayā svapadaṃ cāpi samarpayati satpatiḥ || 41 ||
[Analyze grammar]

hīnabhāvanayā naiva bhavanti vai surādayaḥ |
santuṣṭāḥ sarvadharmebhyo bahiṣkṛtena karmaṇā || 42 ||
[Analyze grammar]

bhaktaiḥ saha surādyā vai svāminaḥ sevakaistathā |
dāsairniyāmakāścāpi tuṣṭā ramanta īśvarāḥ || 43 ||
[Analyze grammar]

ajñānāvṛtasattvānāṃ mātsaryādimaṣījuṣām |
lobhādidoṣakṛṣṭānāṃ svargo mokṣo na toṣaṇam || 44 ||
[Analyze grammar]

prājño bhakto'kṣaraṃ yāti ramate sukhibhiḥ saha |
balaṃ nijeṣṭadevasya prāpya śāntiṃ samaśnute || 45 ||
[Analyze grammar]

daivata dehināṃ karma kṛṣṇārthaṃ yat kṛtaṃ hi tat |
devatvaṃ kṛṣṇabhajanaṃ śuddhiḥ svādhyāya ityapi || 46 ||
[Analyze grammar]

vrataṃ śīlaṃ jayaścāpīndriyāṇāṃ sādhunā matā |
kalaho nindanaṃ cāpi kāpaṭyaṃ dhūrtatādikāḥ || 47 ||
[Analyze grammar]

asādhutvaṃ veditavyaṃ mṛtyustaiḥ saha vartate |
parīkṣya mṛtyuryatrāste vihāya tāni buddhimān || 48 ||
[Analyze grammar]

mṛtyuṃ vivāsayed dūre harerāśrayaṇādiha |
mṛtyubhītirahitaśca caredākṣarasādhanam || 49 ||
[Analyze grammar]

parabrahmālayalabdhiryathā syāttaccarennṛpa |
ityevaṃ vartamānasya yasmānnaiva nivartate || 50 ||
[Analyze grammar]

tadakṣarasya lokasya prāptirbharveddhi śāśvatī |
bhaktyā saṃprāpyate dhāma vāso niravadhiryataḥ || 51 ||
[Analyze grammar]

aśvapāṭala uvāca |
ātmānātmavivekena muktirvai kīdṛśī bhavet |
harerupāstyā muktiśca kīdṛśī saṃbhaved guro || 52 ||
[Analyze grammar]

yogābhyāsena vā muktiḥ kīdṛśī syād vadātra me |
dharmamātrāśrayeṇā'pi muktirvai kīdṛśī matā || 53 ||
[Analyze grammar]

gurorāśrayamātreṇa bhavedvā na bhavecca sā |
niḥsaṃśayo mokṣalābhaḥ keneti vada me guro || 54 ||
[Analyze grammar]

śrīlomaśa uvāca |
deho vai pañcabhūtaiścendriyairāntarikairapi |
karaṇaiḥ prāṇaistriguṇaistanmātraiḥ saṃhato mataḥ || 55 ||
[Analyze grammar]

ātmā tebhyaḥ pṛthaṅ nityaścetanaścā'vibandhanaḥ |
nityamukto nityaśuddho nityabuddho vasan sadā || 56 ||
[Analyze grammar]

jaḍacetanavijñānādṛjñānakṣayakāraṇāt |
tattvābhyāsānnāsmi na me nā'haṃ ceti prakāśanāt || 57 ||
[Analyze grammar]

karmakṣayena dehādvai mukto mukto hi nirguṇaḥ |
saccidānandarūpo vai janyaprakāśavarjitaḥ || 58 ||
[Analyze grammar]

svarūpakalpasthitiko muktyātmā cābhipadyate |
na vai sukhī na cākāraḥ sadā jāḍyāśrayo bhavet || 59 ||
[Analyze grammar]

jāḍyasya hāriṇaṃ kṛṣṇaṃ parameśaṃ bhajed yadi |
brahmadhāmni parameśasvarūpo'bhiniṣpadyate || 60 ||
[Analyze grammar]

yathā haristathā bhaktaḥ sālokyaṃ sārṣṭimantikam |
sārūpyaṃ samavāpnoti sarvāmodān samaśnute || 61 ||
[Analyze grammar]

brahmahrade kṛtasnāno brāhmīṃ tanuṃ hyavāpya ca |
brāhmamukto divyaguṇaḥ sampadyate harīcchayā || 62 ||
[Analyze grammar]

na tatrā'yaṃ hi saṃghāto dehaḥ prākṛtakāraṇaḥ |
ātmaiva tattvamekaṃ ca samūrtaṃ svaprabhāvataḥ || 63 ||
[Analyze grammar]

upāsitahareryogāt samartho mūrtirūpakaḥ |
mukto bhavati muktau vai māyā tatra na vartate || 64 ||
[Analyze grammar]

sarvakāmarasasvādaḥ sarvagandhasukhāśrayaḥ |
sarvaiśvaryayuto nityānandāmodasya śevadhiḥ || 65 ||
[Analyze grammar]

avyayānandamagnaśca brahmaṇā saha modate |
sarvān kāmānātmasaṃsthān bhuṃkte brahmasvarūpavān || 66 ||
[Analyze grammar]

parabrahmāptayogaśca sarvānandabhṛto bhavet |
na nyūnaṃ śrīhareścāsti bhaktamuktasya tatra ha || 67 ||
[Analyze grammar]

evaṃ copāstiyogena muktiṃ śreṣṭhā bhavetparā |
yogino yogayatnasthā yadi kṛṣṇamupāsate || 68 ||
[Analyze grammar]

tadā coktāṃ parāṃ muktiṃ vindati nātra saṃśayaḥ |
yadi cānyānīśvarādīn vairājādīnupāsate || 69 ||
[Analyze grammar]

tadeśvarakṛtān lokānāpnuvantīśvarā yathā |
prākṛtaiśvaryamuktiḥ sā mahālaye kṣayāvahā || 70 ||
[Analyze grammar]

siddhīḥ prāpya sthitiṃ labdhvā cānte nijā'vaśeṣavat |
layaṃ vā'nyeśvarabhāvaṃ devatvaṃ vā'bhiyanti ca || 71 ||
[Analyze grammar]

sahasradhābhavanādisamaiśvaryāṇi bhuṃjate |
sā nikṛṣṭā pātadā ca muktirnimnasthalātparā || 72 ||
[Analyze grammar]

dhyānayogācca vā mūrtau harerlīnatvarūpiṇī |
aikātmyamuktireteṣāmabhinnādisamādhibhiḥ || 73 ||
[Analyze grammar]

svāmisevakabhāvādivarjitā sā prajāyate |
parameśe sadā tirobhāvarūpā na vai pṛthak || 74 ||
[Analyze grammar]

rājan dhyānavaśātte ca tallīnāstanmayāḥ khalu |
parameśe parameśāḥ sampadyante'bhavāḥ punaḥ || 75 ||
[Analyze grammar]

eṣā śreṣṭhatarā muktiryā sthitiḥ pārameśvarī |
dāsarūpeṇa sevā'tra śiṣyate na kathaṃcana || 76 ||
[Analyze grammar]

dharmamātreṇa yā muktiḥ sā tu bhogā'viyoginī |
svargasatyādilokeṣu sadeho vāsa eva ha || 77 ||
[Analyze grammar]

dharmaṃ bhuktvā punaḥ pṛthvyāṃ janmanā ca vṛṣārjanam |
punaḥ svargaṃ punaḥ pṛthvī punareva pracakrakam || 78 ||
[Analyze grammar]

evaṃ jāte'pi dharmaḥ sa yadi bhāgavatātmakaḥ |
brahmasambandharūpo vā nairguṇyanāmadheyakaḥ || 79 ||
[Analyze grammar]

sevātmako hareḥ syāccedadhvare dakṣiṇātmakaḥ |
dānātmako harestuṣṭyai tadā muktirhi śāśvatī || 80 ||
[Analyze grammar]

dharmo vai svārthamātreṇa kṛto naiva hi muktaye |
parārthabuddhyā'nuṣṭhitaḥ kalyāṇāya sa jāyate || 81 ||
[Analyze grammar]

parameśā'rpaṇabuddhyā kṛtaścenmokṣado'kṣare |
evaṃ rājan kriyāḥ sarvāḥ śubhā vā'pyaśubhāstathā || 82 ||
[Analyze grammar]

asaṃgabhāvajāḥ kṛṣṇārpaṇabhāvena nirvṛtāḥ |
kṛṣṇasmaraṇasampādyāḥ sarvā mokṣapradā hi tāḥ || 83 ||
[Analyze grammar]

api kṣetrādhipaḥ kṣetraṃ saṃskṛtyotkhātya karṣati |
vapate sasyakaṇiśān lunātyapi ca khādati || 84 ||
[Analyze grammar]

sarva brahmārpaṇaṃ kṛtvā karoti kururājavat |
yadvā janakavaccāpi kūrmibrahmarṣivacca vā || 85 ||
[Analyze grammar]

tatsarvaṃ jāyate nirdoṣakaṃ kalmaṣavarjitam |
svarṇakāraḥ satyavṛttyā sampādayati bhūṣaṇam || 86 ||
[Analyze grammar]

kṛṣṇārpaṇaṃ kṛtaṃ cettat śailpyaṃ mokṣapradaṃ bhavet |
haryarthaṃ yatkṛtaṃ sarvaṃ nirguṇaṃ mokṣadaṃ matam || 87 ||
[Analyze grammar]

hariṃ vinā kṛtaṃ sarvaṃ niṣphalaṃ duḥkhadaṃ ca vā |
abhyasyanti dvijā vedān haryanusmṛtivarjitān || 88 ||
[Analyze grammar]

cettadā'bhyasanaṃ śuno bhakṣaṇaṃ ceva jāyate |
vinā maṇerhi māhātmyaṃ gopālo mahiṣīgale || 89 ||
[Analyze grammar]

badhnāti kaṃkaraṃ matvā mūlyaṃ tasya phalaṃ na ca |
api śālagrāmaśilāṃ matvā viṣṇuṃ sanātanam || 90 ||
[Analyze grammar]

rakṣanti vaiṣṇavāḥ santaḥ sevayanti divāniśam |
teṣāṃ viṣṇurhi tadrūpaḥ sevāṃ matvā vibhāvitām || 91 ||
[Analyze grammar]

caturbhujaḥ prāvirbhūy dṛśyate cākṣigocaraḥ |
sa eva bhāvabhinnaścet tirobhavati drāk tataḥ || 92 ||
[Analyze grammar]

sa evā''rādhanāsnehapāśitaścet pareśvaraḥ |
parabrahmā'vatāryeva kṛṣṇanārāyaṇaḥ prabhuḥ || 93 ||
[Analyze grammar]

avatārāvatāryevā'nādyanantastathā''ntaraḥ |
prakāśate hṛdi cāgre tato nayati cākṣaram || 94 ||
[Analyze grammar]

tasmād rājan kriyāyogāḥ kṛtā dehendriyādibhiḥ |
svārthārthaṃ bandhakā hyete haryarthaṃ mokṣadā hi te || 95 ||
[Analyze grammar]

santaḥ kṛṣṇaprasaṃgena divyāḥ kṛṣṇahṛdātmakāḥ |
kṛṣṇaiśvaryabhṛtā mokṣapradā bhavanti saukhyadāḥ || 96 ||
[Analyze grammar]

divyalokapradā divyānandadāścākṣarapradāḥ |
bhagavatpratimāyogapradāśca jñānadāyinaḥ || 97 ||
[Analyze grammar]

vighnaghnāḥ prākṛtāvartanāśakā bhramavārakāḥ |
duḥkhadoṣanivārāśca brahmalokasya dāyakāḥ || 98 ||
[Analyze grammar]

teṣāṃ sevā prakartavyāḥ sarvāḥ saṃśayavarjitāḥ |
yathā te bhagavanmūrtiviśeṣā itimatya vai || 99 ||
[Analyze grammar]

yathā patnyāṃ ca putre ca pitrośca bāndhave nije |
prītiścāste svārthaparā'hamamatvaprayojitā || 100 ||
[Analyze grammar]

tathā prītiḥ sadā kāryā sadgurau mokṣadā hi sā |
dharmo vā dharmayajño vā puṇyaṃ dānaṃ śubhā kriyā || 101 ||
[Analyze grammar]

anādiśrīkṛṣṇanārāyaṇe sarvaṃ samarpayet |
tadā muktirmahāmuktirbrahmasāyujyarūpiṇī || 102 ||
[Analyze grammar]

brahmasārṣṭisvarūpā ca brahmalokapradāyinī |
parabrahmasamamūrtikāriṇī cottamāttamā || 103 ||
[Analyze grammar]

prāpyate mānavenaiva dehena prabhaviṣṇunā |
prabhuṇā saha saṃyogaḥ prāptavyaṃ nāvaśiṣyate || 104 ||
[Analyze grammar]

gopyaḥ prāptāḥ paraṃ yogaṃ tathā brahmapriyāḥ khalu |
muktāḥ prāptāḥ paraṃ yogaṃ nā'nyayogasya vāñchayā || 105 ||
[Analyze grammar]

ityevaṃ tvaṃ bhūpate'tra pratyakṣaṃ yogamāvaha |
vapuḥ kṛtvā paraṃ divyaṃ śāśvataṃ yogamāvaha || 106 ||
[Analyze grammar]

rādhike lomaśastvevaṃ rājñe pradāya cāntaram |
virarāmopadeśaṃ ca mumude nṛpatirbahu || 107 ||
[Analyze grammar]

iti śrīlakṣmīnārāyaṇīyasaṃhitāyāṃ dvitīye tretāsantāne lomaśagītāyāṃ nṛpakṛto devādīnāṃ toṣaṇahetupraśnaḥ vivekopāsanāyogadharmagurubhiḥ kīdṛśī muktiritipraśnaḥ lomaśoktottarāṇi cetyādinirūpaṇanāmā catuḥpañcāśadadhikadviśatatamo'dhyāyaḥ || 254 ||
[Analyze grammar]