Chapter 251

śrīkṛṣṇa uvāca |
rādhike ca tato rājā cā'śvapāṭalako gurum |
papraccha lomaśaṃ dharmakratuṃ brūhīha kīdṛśam || 1 ||
[Analyze grammar]

lomaśaḥ prāha rājan yat prāṇināṃ drohakṛt bhavet |
tatsarvathā parityājyaṃ dharmakratuḥ sa eva saḥ || 2 ||
[Analyze grammar]

prāṇino duḥkhinaḥ kṛtvā devāstuṣyanti naiva ha |
sarve bhavantu sukhino yathā devāstathāvidhāḥ || 3 ||
[Analyze grammar]

vartante'nugrahaparāstasmādadrohakaḥ kratuḥ |
ahiṃsā vai dharmamakho hiṃsā yamagṛhaṃ matam || 4 ||
[Analyze grammar]

adrohaḥ sarvajantūnāṃ yajñaḥ satāṃ svabhāvajaḥ |
snehavṛttyopakāro vai dharmayajño'sti bhūtale || 5 ||
[Analyze grammar]

aśvapāṭala uvāca |
ātmā śuddho'sti cet kena pāpātmā jāyate hi saḥ |
kathaṃ dharmabhṛdātmā ca kathaṃ rāgaṃ pramuñcati || 6 ||
[Analyze grammar]

kathaṃ muktiṃ prayātyeva kutra vāsaṃ karoti ca |
kīdṛśaṃ vartanaṃ tatra yasmānnāvartate punaḥ || 7 ||
[Analyze grammar]

śrīlomaśa uvāca |
saccidānandarūpo'yaṃ cātmā māyāvivarjitaḥ |
ahaṃmamatvahīnaśca saṃgāt tadvān bhavatyapi || 8 ||
[Analyze grammar]

saṃgo māyāprasaṃgaśca sānnidhyaṃ cāntare sadā |
tenā''kṛṣṭo bhavatyeva pāpātmā doṣasaṃbhṛtaḥ || 9 ||
[Analyze grammar]

jñānābhāve ca māyāyāḥ saṃgaṃ vai labhate yatiḥ |
jñānena saṃgadoṣāśca naśyantyeva vivekinaḥ || 10 ||
[Analyze grammar]

jñātvā jñātvā viṣayāṃstu cecchā tatra pravartate |
tadāptyarthaṃ pravṛttiśca nivṛttirvā prajāyate || 11 ||
[Analyze grammar]

rāgaḥ pravartakastatreṣṭatājñānena jāyate |
dveṣo nivartakaścāpyaniṣṭatābodhanād bhavet || 12 ||
[Analyze grammar]

yadarthaṃ yatate tatrārabhate karma dehajam |
aindriyikaṃ ca vā'bhyāsaṃ tena karoti dehabhāk || 13 ||
[Analyze grammar]

rāgādyāḥ sudṛḍhāstena doṣā bhavanti duḥkhadāḥ |
lobho mohaḥ prajāyete dharmasthitivināśakau || 14 ||
[Analyze grammar]

vyājena jāyate dharmo vyājataścarati vṛṣam |
vṛṣavad rocate'rtha vyājenaiva dhanaistataḥ || 15 ||
[Analyze grammar]

kurute dehavānajñaḥ pāpaṃ parātmaduḥkhakṛt |
vardhate'syā'dharmasargaścintanāt kāraṇāttataḥ || 16 ||
[Analyze grammar]

ekaśīlā militvaiva vardhayanti ca pāpakam |
pāpavṛddhāvaśāntiścodvejanaṃ vighnadarśanam || 17 ||
[Analyze grammar]

kalaho rogayogaśca dhananāśo daridratā |
jananāśo'vamānaṃ cā'yaśaścā'gaṇanā jane || 18 ||
[Analyze grammar]

cauryaṃ tenā'nṛtavādaḥ kāpaṭyaṃ chaladharmitā |
pravartante'bhayāḥ sarve pāpātmasu prakarṣataḥ || 19 ||
[Analyze grammar]

na te sukhinaścātra kuta eva paratra tu |
punaryāmyagatiścāpi tiryagyoniḥ punaḥ punaḥ || 20 ||
[Analyze grammar]

atha dharmabhṛtāṃ mārgaṃ śṛṇu rājan sukhapradam |
pūrvapūrvānupuṇyena sārthasaṃgena vā janaḥ || 21 ||
[Analyze grammar]

satsaṃgena sadā dehī śubhaṃ sarvaṃ pravāñcchati |
kuśalaṃ prakarotyeva satyaṃ vadati nā'nṛtam || 22 ||
[Analyze grammar]

satyaṃ vicintayatyeba satyaṃ karoti sādhanam |
satyena vartate nityaṃ rāgaṃ dveṣaṃ na vindati || 23 ||
[Analyze grammar]

vijñavṛttyā hitaṃ svasya parasyāpi karoti ca |
lobhaṃ mohaṃ vihāyaiva pravartate śubhāya vai || 24 ||
[Analyze grammar]

kuśalenaiva dharmeṇa dehayātrāṃ karoti ca |
dānena sevayā saṃkīrtanena bhajanena ca || 25 ||
[Analyze grammar]

yajñena mālayā devapūjayā tapasā tathā |
satsaṃgavṛddhyā nityaṃ ca vindati dharmamuttamam || 26 ||
[Analyze grammar]

vṛddhānāṃ sevayā lokasevayā vardhate vṛṣaḥ |
doṣān vijñāya sarvān sa tyajatyeva ca dūrataḥ || 27 ||
[Analyze grammar]

guṇān vijñāya gṛhṇāti guṇeṣu ramate sadā |
satsaṃgasārthamāsādya vardhayatyeva sadvṛṣam || 28 ||
[Analyze grammar]

sādhūn prasevate nityaṃ sādhudharmān prasevate |
sādhvācārā'bhyāsavaśād vardhante'sya vṛṣāḥ sadā || 29 ||
[Analyze grammar]

prajñā vṛṣe sthirā cāsya nānyatra ramate kvacit |
dharmapravṛttimān dehī dhanārthaṃ yatate'pi ca || 30 ||
[Analyze grammar]

dharmadhanaṃ samavāpya dharme vyayaṃ karoti ca |
dharmamitrāṇi jāyante dharmiṇo vai svabhāvataḥ || 31 ||
[Analyze grammar]

dharmātmā dharmaśīlaśca dharmasatsaṃgaśobhitaḥ |
dharmajanyaṃ sukhaṃ cātra labhate'pi paratra ca || 32 ||
[Analyze grammar]

svarge svargapare loke prabhutvaṃ labhate tathā |
śabde sparśe rase rūpe gandhe bhoge prabhutvakam || 33 ||
[Analyze grammar]

evaṃ dharmaphalaṃ labdhvā modate nispṛho yathā |
jñānadṛṣṭyā ca nirvedaṃ poṣayatyeva mānase || 34 ||
[Analyze grammar]

bhogeṣu satsvapi vidvān naiva badhnāti tatra hi |
abhāvayatastasyaiva mano vairāgyavegavat || 35 ||
[Analyze grammar]

na kāmānanusañcāraṃ karotyasya kadācana |
dharmaṃ naiva jahātyeva kaṣṭe cāpadi vaiśase || 36 ||
[Analyze grammar]

lokaṃ kṣayātmaka dṛṣṭvā dharme'pi rāgahīnatām |
prāpyātmano muktimārgaṃ mārgayatyeva yatnavān || 37 ||
[Analyze grammar]

yatate cānvahaṃ mokṣābhyāse hyupāyamāśrayan |
śanaiḥ śanaiśca sopānaṃ mokṣasya labhate tataḥ || 38 ||
[Analyze grammar]

pāpmānaṃ sarvamevā'yaṃ karotyeva na vai kvacit |
jahātyeva samāyātaṃ pāpaṃ śuddhiṃ pravindati || 39 ||
[Analyze grammar]

vimalātmā ca santoṣī devāśrayaparāyaṇaḥ |
vyarthavārtādirahito mokṣaṃ vai labhate param || 40 ||
[Analyze grammar]

vaikuṇṭhe cāpi goloke'kṣare dhāmni pare ca vā |
yathopāstiṃ prayātyeva mokṣasthalaṃ parātparam || 41 ||
[Analyze grammar]

tatra brahmahade snātvā brahmatanuḥ hariryathā |
sampadyate surūpeṇa divyarūpeṇa tādṛśaḥ || 42 ||
[Analyze grammar]

jakṣan krīḍan ramamāṇaścāste'śnute'khilepsitam |
ekadhā vahudhā cāpi bhavatyeva yathepsitam || 43 ||
[Analyze grammar]

sarvarasaḥ sarvagandhaḥ sarvānandaḥ prajāyate |
sarvasukhaḥ sarvarūpaḥ sarvasiddhiguṇāśrayaḥ || 44 ||
[Analyze grammar]

parabrahmasvarūpaśca tatsāmarthyasamanvitaḥ |
tatsevātatparo muktaḥ prajāyate'timodanaḥ || 45 ||
[Analyze grammar]

brahmamūrtermahat saukhyaṃ pravāhaiḥ sa sametyapi |
karāgre sarvasṛṣṭīśca prapaśyatyeva muktarāṭ || 46 ||
[Analyze grammar]

sārvajñyaṃ jāyate cāsyeśvaratvaṃ saṃprajāyate |
nātra vā'nyatra loke'syā''vartanaṃ jāyate kvacit || 47 ||
[Analyze grammar]

yatra yatra prayātyeva tatra dhāmā'kṣaraṃ puraḥ |
prakāśate'sya nā'nyadvai divyanetrasya sarvathā || 48 ||
[Analyze grammar]

kriyā divyā bhavatyasya māyā'sya saṃgato'pi ca |
divyaiva jāyate tūrṇaṃ tattvādīnāṃ tu kā kathā || 49 ||
[Analyze grammar]

mānave suraloke vai paitṛke cārṣake'pi vā |
aiśvare vā'vatārabhyāṃ divyo mukto'yameva ha || 50 ||
[Analyze grammar]

yatra kvāpi vased vāpi yatra kvāpi caredapi |
sarvaṃ divyaṃ karotyeva mokṣaṃ dadāti dehine || 51 ||
[Analyze grammar]

asyaiva darśanānmuktāḥ sparśanādapi mokṣiṇaḥ |
saṃgāt prasevayā muktā jāyante strīnarādayaḥ || 52 ||
[Analyze grammar]

yathā dhāmni tathā sṛṣṭau dehe vā muktasaṃsthitau |
sarvaṃ samaṃ bhavedasya bhinnatā nā'sya vartane || 53 ||
[Analyze grammar]

evaṃ prāptāṃ gatiṃ nityāṃ sukhinīṃ modinīṃ satīm |
ānandinīṃ priyāṃ mukto'nubhavatyeva sarvadā || 54 ||
[Analyze grammar]

rājaṃstvaṃ dharmamārgaṃ vai sādhūnāmavalambya ca |
gatiṃ labhasva vai proktāṃ kimanyena vināśinā || 55 ||
[Analyze grammar]

vijñānaṃ sārathiṃ kṛtvā bhaktiṃ kṛtvā sahāyinīm |
dharmaṃ cāgragatiṃ kṛtvā yāhi brahma sanātanam || 56 ||
[Analyze grammar]

aśvapāṭala uvāca |
kathaṃ doṣavināśaḥ syād yena dharmagatirbhavet |
vijñāpaya maharṣe tvaṃ yena śreyo hi dehinaḥ || 57 ||
[Analyze grammar]

śrīlomaśa uvāca |
jayet krodhaṃ kṣamayaiva vicāreṇa punaḥ punaḥ |
jayet kāmaṃ hyanābhogāt saṃkalpasaṃgavarjanāt || 58 ||
[Analyze grammar]

svapnaṃ jayecca tapasā'nāhāreṇa ca sattvataḥ |
bhayaṃ jayettadutthānaparityāgād vivekataḥ || 59 ||
[Analyze grammar]

ātmaśīlābhyasanācca mṛtyubhītiṃ sadā tyajet |
dhairyeṇa kāmanāmicchāṃ dveṣaṃ jayet kaliṃ tathā || 60 ||
[Analyze grammar]

bhrāntiṃ mohaṃ mamakāra bhedajñānānnivartayet |
yāthārthyajñānalābhena viparyadādikaṃ tyajet || 61 ||
[Analyze grammar]

upadravān jayet sarvān kauśalyena vidhānataḥ |
rogān jayet hetujayāt pathyajīrṇamitāśanāt || 62 ||
[Analyze grammar]

lobhaṃ tṛṣṇāṃ vivekādvā santoṣāt prajayedapi |
viṣayān viṣabodhādvā tattvadṛṣṭyā jayedapi || 63 ||
[Analyze grammar]

adharmaṃ cātmakṛpayā jayedanarthabhāvataḥ |
dharmaṃ pālanabuddhyā ca jayenmokṣapradaṃ caret || 64 ||
[Analyze grammar]

āśāṃ jayennirutthānād bhāviphalguvidhānataḥ |
arthaṃ cānarthabuddhyā ca jayet saṃgavivarjanāt || 65 ||
[Analyze grammar]

snehaṃ cānityadṛṣṭyā ca bandhanādivivekataḥ |
kṣudhāṃ jayed yātrayā ca yogenā''vaśyakena ca || 66 ||
[Analyze grammar]

mānaṃ jayedanāvṛttyā kāruṇyena vivekataḥ |
santoṣācca jayed gṛdhnā vivekajñānatastathā || 67 ||
[Analyze grammar]

tandrāṃ jayet svasthabhāvādutthānācca balādapi |
saṃśayaṃ śāstravacanācca nirṇayāt prajayet sadā || 68 ||
[Analyze grammar]

vāgdoṣān munibhāvena manodoṣāṃśca vidyayā |
pāvitryeṇa jayeccāpi kalmaṣaṃ tāmasaṃ sadā || 69 ||
[Analyze grammar]

jñānadṛṣṭyā tamaścāpi jayedajñānasaṃjñitam |
ātmabodhena ca jñānaṃ mānasaṃ prajayed yatiḥ || 70 ||
[Analyze grammar]

ātmānaṃ ca jayetparameśe samarpaṇena tu |
tadarpaṇāt sarvadoṣā śiṣṭā naśyanti drāk khalu || 71 ||
[Analyze grammar]

tadā vivardhate tejo brahmalokaprakāśakam |
siddhayaścodbhavantyasya vijñānaṃ sampravardhate || 72 ||
[Analyze grammar]

satāmācāramāptaḥ san vartamānaḥ satāśraye |
svecchayaiva ninīṣet sa brahmā'kṣaraṃ paraṃ padam || 73 ||
[Analyze grammar]

eṣa mārgo vimuktervai rājan śubhāśrayaḥ sadā |
yatra vighnā na jāyante nirvighnasya hareḥ śrayāt || 74 ||
[Analyze grammar]

divyendriyakriyāhāro divyasadguṇavartanaḥ |
divyakṛṣṇe kṛtasthāno yāti brahma sanātanam || 75 ||
[Analyze grammar]

saṃghāte saṃsthiteścāpi mukto naiva hi tapyate |
baddho hi tapyate tasya sambandhāstāpadāyinaḥ || 76 ||
[Analyze grammar]

nātmā'sti kasyacit kaścinnāsya kaścana vidyate |
kathaṃ gṛhṇātyayaṃ duḥkhaṃ parotpannaṃ nijātmani || 77 ||
[Analyze grammar]

naiva sañjāyate cātmā nāpi vipadyate kvacit |
muktvā dehaṃ prāpya kṛṣṇaṃ prayāti paramāṃ gatim || 78 ||
[Analyze grammar]

puṇyapāpamayo dehaḥ karmakṣayena naśyati |
tato dehī pramuktaḥ san brahmatvamupagacchati || 79 ||
[Analyze grammar]

puṇyapāpakṣayārthaṃ hi kṛṣṇārpaṇaṃ vidhīyate |
tathā nairguṇyamāsādya yāti brahmaparāṃ gatim || 80 ||
[Analyze grammar]

arthāḥ smṛddhibharāścāpi bāḍhaṃ duḥkhabharā yataḥ |
svādalālāvagūḍhāste mohayantyavicakṣaṇam || 81 ||
[Analyze grammar]

sarvendriyasukhaṃ divyaṃ vitṛṣṇasya tu kalmaṣam |
satṛṣṇena mamatvena kalpitaṃ svārthapūrtikam || 82 ||
[Analyze grammar]

tadeva paritāpāya nāśe sampadyate'dhikam |
tasmāt tāpakaraṃ pūrvaṃ tāpaṃ matvā na cārjayet || 83 ||
[Analyze grammar]

kṛtakṛtyaḥ sadā matvā bhūtvā'pyevaṃ na saṃjvaret |
iṣṭāniṣṭāvubhau tyaktvā pareśe sarvamarpayet || 84 ||
[Analyze grammar]

prāṇāntikaṃ paraṃ rogaṃ tṛṣṇātmakaṃ parityajet |
apūryamāṇaṃ pātālaṃ tṛṣṇātmakaṃ ca cāviśet || 85 ||
[Analyze grammar]

śīlaṃ santoṣamevāpi śāntiṃ bhaktiṃ kṣamāṃ matim |
sevāṃ samarpaṇaṃ kṛtvā brahmadhāma samāviśet || 86 ||
[Analyze grammar]

paśyan mṛtyuṃ śikhāvāsaṃ kālaṃ ca prāṇavāsinam |
karma cātmakṛtāvāsaṃ brahmavāsaṃ samarjayet || 87 ||
[Analyze grammar]

ahorātrāṇi yāntyeva yātrā bhavati khaṇḍitā |
rātryāṃ rātryāṃ vyatītāyāmāyurvindati hasvatām || 88 ||
[Analyze grammar]

puṣpavad dehinaṃ mṛtyurnayatyapūrṇakāminam |
ātmakāryaṃ tu prathamaṃ kurvīta daihikaṃ tataḥ || 89 ||
[Analyze grammar]

dehasambandhajaṃ paścād yena na syāt pratāritaḥ |
akṛteṣvapi kāryeṣu mṛtyurādāya gacchati || 90 ||
[Analyze grammar]

nahi kaścid vijānāti kadā mṛtyurbhaviṣyati |
suptaṃ vā jāgrataṃ svasthaṃ mṛtyurādāya gacchati || 91 ||
[Analyze grammar]

kurvantaṃ bahusaṃkalpān putrasmṛddhipaśusthitim |
anyavyāsaktahṛdayaṃ mṛtyurādāya gacchati || 92 ||
[Analyze grammar]

na mṛtyupṛtanāṃ kaścinnivartayitumudbalaḥ |
brahmabalo bhaktibalo mṛtyuṃ dūrayituṃ kṣamaḥ || 93 ||
[Analyze grammar]

brahmavidyāprakāśāḍhyaḥ satsaṃgayānavāhanaḥ |
śrīkṛṣṇasārathiṃ prāpto mṛtyuṃ tīrtvā'kṣaraṃ vrajet || 94 ||
[Analyze grammar]

mā mohaṃ vraja rājendra kṛte puṇye kathaṃcana |
svarge ca gatvarasaṃjñe sannaddho bhava keśave || 95 ||
[Analyze grammar]

keśavaḥ kālakālo'sti mṛtyormṛtyuḥ pareśvaraḥ |
sarvakarmaphalajyoṣṭā tasmin kāryaṃ samarpaya || 96 ||
[Analyze grammar]

nirbhīko bhava rājendra bhayaṃ kośo hi karmaṇām |
muñca nārāyaṇe deve vikośo bhava pārthiva || 97 ||
[Analyze grammar]

gṛhṇā'nādikṛṣṇanārāyaṇapādaṃ hi nirbhayam |
kāṃbhareyapade sthitvā śāśvatānandabhāg bhava || 98 ||
[Analyze grammar]

ityuktvā rādhike tatra lomaśo virarāma ha |
rājā'śvapāṭalaḥ śāntiṃ cāvāpa pārabheśvarīm || 99 ||
[Analyze grammar]

bahu matvā'mṛtaṃ śrīmallomaśānanavāhitam |
tṛpto'pi ca punastṛptiṃ nādhijagāma bhaktarāṭ || 100 ||
[Analyze grammar]

iti śrīlakṣmīnārāyaṇīyasaṃhitāyāṃ dvitīye tretāsantāne lomaśagītāyāmaśvapāṭalakṛtānām ātmanaḥ pāpātmakatve puṇyātmakatve muktibhāve doṣavināśabhāve ca praśnānāṃ |
śrīlomaśakṛtottaradānamityādinirūpaṇanāmaikapañcāśadadhikadviśatatamo'dhyāyaḥ || 251 ||
[Analyze grammar]