Chapter 247

śrīkṛṣṇa uvāca |
rādhike prātarutthāya yajamāno'śvapāṭalaḥ |
rājā kṛtāhnikaścāpi lomaśo'nyamaharṣayaḥ || 1 ||
[Analyze grammar]

kṛtāhnikā yajñabhūmimāyayuśca samāhitāḥ |
yāvatsāmagryādiyuktāsturye'hnyekādaśīdine || 2 ||
[Analyze grammar]

svastivācaḥ prokṣaṇādi svāṃgaśuddhiṃ tathā'param |
sarvaṃ karma ca naityoktaṃ cakruryathoditaṃ tathā || 3 ||
[Analyze grammar]

viśeṣataḥ pravakṣyāmi śṛṇu samāsatastvidam |
prātaḥ pravargyopasadbhyāṃ pracarya ca tataḥ param || 4 ||
[Analyze grammar]

udvāsyāpi pravargyaṃ prakṣipya pātrāṇi cottare |
agnīṣomaphalapaśostantramārabdhavān guruḥ || 5 ||
[Analyze grammar]

idhmakāṣṭhāni cādhāyā''havanīye'prakāśayat |
ādāya jvalitaṃ vahniṃ sīmamādāya vai saha || 6 ||
[Analyze grammar]

mahāvedyantargatāyāṃ vedyāṃ vahniṃ nyadhāpayat |
sa vahnirgārhapatyaśca prājahitākhya ityapi || 7 ||
[Analyze grammar]

somaṃ cā'sthāpayaddhavirdhānaśakaṭe eva ca |
dhṛtvā cātvālapāṃsūṃśca taiśca dhiṣṇyānupā'vapat || 8 ||
[Analyze grammar]

vapāyāgaṃ vidhāya subrahmaṇyāhvānamācarat |
adhvaryurvai tataḥ somābhiṣavāya rasarddhaye || 9 ||
[Analyze grammar]

taḍāgād vasatīvarījalaṃ ghaṭe samāharat |
śālāmukhīyakaṃ cāsthāpayan madhyandine tataḥ || 10 ||
[Analyze grammar]

paśupuroḍāśayāgaṃ prānivartayadeva ha |
sāyāhne'pi hṛdayādiphalāṃgayajanaṃ vyadhāt || 11 ||
[Analyze grammar]

kṛtvāṃgāni ca patnīsaṃyājāntānyasamāpayat |
bhojanāni vyadhuḥ sarve yathāyogyaṃ yathāvratam || 12 ||
[Analyze grammar]

rātrāvadhvaryurevāpi vasatīvarīdhraṃ ghaṭam |
skandhenādāya vedyāśca parito viharan nyadhāt || 13 ||
[Analyze grammar]

tataśca pratiprasthātā vatsāpākaraṇādikam |
śvo'pekṣitāmikṣārthakaṃ dadhnā saṃskāramācarat || 14 ||
[Analyze grammar]

dadhigrahārthaṃ ca dadhi picchalaṃ samapādayat |
savanīyahaviṣyārthaṃ barhirāharaṇaṃ vyadhāt || 15 ||
[Analyze grammar]

virāmo yajñakāryasya tatastadā vyajāyata |
sapatnīko yajamāno rātrau jāgaraṇaṃ vyadhāt || 16 ||
[Analyze grammar]

anādiśrīkṛṣṇanārāyotsavaprapūrvakam |
ṣoḍaśādipadārthaiśca pūjanaṃ śrīharervyadhāt || 17 ||
[Analyze grammar]

vratasyodyāpanaṃ rātrau cakāra nṛpatistathā |
ṛṣayo'pi janāścāpi cakruḥ saṃkīrtanaṃ hareḥ || 18 ||
[Analyze grammar]

prātaḥ pūrvaṃ hariḥ sākṣānmuralīdhara eva saḥ |
anādiśrīkṛṣṇanārāyaṇo rādhāramāyutaḥ || 19 ||
[Analyze grammar]

divyarūpadharo divyatejomaṇḍalamaṇḍitaḥ |
sākṣādbabhūva sarveṣāṃ dhṛtābhūṣo hasan hariḥ || 20 ||
[Analyze grammar]

kaṃbharā dakṣiṇe yasya vāme gopālakṛṣṇakaḥ |
māṇikyādyā brahmasatyaḥ parito yasya cā'bhavan || 21 ||
[Analyze grammar]

prasanno'smi vratenā'dya yajñenāpi viśeṣataḥ |
phaladātā'smi mokṣātma svargātma yadabhīpsitam || 22 ||
[Analyze grammar]

tato rājādya kṛṣṇaṃ pupūjuḥ prāptavastubhiḥ |
haristvadṛśyatāṃ prāptaḥ svīyasārthayutaḥ prabhuḥ || 23 ||
[Analyze grammar]

lomaśo'pi tataḥ sarvānupādideśa pāvanam |
dharmo naikavidhastvasti lokeṣu ca janeṣu ca || 24 ||
[Analyze grammar]

yajñadharmaḥ svayaṃ nārāyaṇātmā brahmalokadaḥ |
sevādharmo mahānāśīrvādadvārā divaḥpradaḥ || 25 ||
[Analyze grammar]

sarvabhūtā'drohadharmaḥ parasaukhyaprado'sti vai |
prasannatā pareṣāṃ vai mahānandarddhisampradā || 16 ||
[Analyze grammar]

devānāṃ tuṣṭirevāpi maharṣīṇāṃ tathāvidhā |
āgantukānāṃ tuṣṭiśca paralokasahāyinī || 27 ||
[Analyze grammar]

purā maharṣijaṭilāyananāmā vane vasan |
tapaścacāra bahudhā sthiradeho'calaḥ sadā || 28 ||
[Analyze grammar]

jaṭāyāmasya caṭakā nīḍaṃ cakāra garbhiṇī |
tāṃ dayāvān maharṣiḥ sa tūpapraikṣata vai tataḥ || 29 ||
[Analyze grammar]

tṛṇatantvāḍhyanīḍe vai jaṭāyāṃ caṭakā tu sā |
apātayattu svāṇḍāni tānyabudhyata vai ṛṣiḥ || 30 ||
[Analyze grammar]

budhvā'pi na cacālaiṣo dharme kṛtamanāstathā |
sarvabhūtāśrayadānaṃ dharmaḥ śaraṇyarakṣaṇam |
aṇḍebhyastvatha puṣṭebhyaścājāyanta śakuntakāḥ || 31 ||
[Analyze grammar]

vyavardhanta ca tatraiva jātapakṣāstathā'bhavan |
uḍḍīyoḍḍīya sāyaṃ te punarāyānti vai niśi |
viśramya ca punaryānti prātaḥ kaṇābhivāñcchayā || 32 ||
[Analyze grammar]

atha kāle gate jātapravāsāḥ pakṣiṇastu te |
nopāvartanta ca yadā prātiṣṭhata tadā ṛṣiḥ || 33 ||
[Analyze grammar]

sa cā'manyata dharmo'yaṃ siddho mama tapaḥparaḥ |
sa cāśrayaṃ dadātyeva kṛtvā''śramaṃ drumānvitam || 34 ||
[Analyze grammar]

atithīn sarvarūpāṃśca pūjayatyeva sādaram |
nārāyaṇaḥ svayaṃ tatra samāyātaḥ parīkṣitum || 35 ||
[Analyze grammar]

vyādharūpo mṛtaṃ mṛgaṃ skandhe kṛtvā samāyayau |
dehyāśrayaṃ tathā cullīṃ pātraṃ ca samidhastathā || 36 ||
[Analyze grammar]

cāṇḍālo'haṃ kukkurādo dehi te yadi rocate |
jaṭāyano vicāryaiva dadau cullīṃ samit tathā || 37 ||
[Analyze grammar]

pātraṃ vahniṃ dadau cāpi parṇaśālāṃ dadau tathā |
āśrayā''gatalokasya sevane na kṣatirbhavet || 38 ||
[Analyze grammar]

itivratākhye dharme me cetikṛtvā dadau tadā |
śvādaḥ sarvaṃ paripācya bubhuje tṛptipūrvakam || 39 ||
[Analyze grammar]

sarvaṃ tathā'vaśiṣṭaṃ ca māṃsaṃ śālātale'kṣipat |
sarvāmaśuddhāṃ kṛtvaiva niṣasāda bahiḥ sthale || 40 ||
[Analyze grammar]

pramārjayeti cājñāṃ sa kṛtavān tanmaharṣaye |
maharṣiḥ suprasannastāṃ śālāṃ śuddhāṃ vyadhāpayat || 41 ||
[Analyze grammar]

śvādāya prāha cet kiṃcidapekṣitaṃ dadāmi te |
śvādaḥ prāha caraṇau me mardanaṃ samapekṣataḥ || 42 ||
[Analyze grammar]

ṛṣistasya pādasaṃvāhanaṃ cakāra bhāvataḥ |
phalapatrajalapānaṃ dadau bhāvena vai punaḥ || 43 ||
[Analyze grammar]

prīyatāṃ bhagavānatra śaraṇāntarvasan prabhuḥ |
ityuktvā pradadau vāri tāvadantarhito'bhavat || 44 ||
[Analyze grammar]

tejasā vyāptadehaśca divyarūpo babhūva ha |
caturbhujaḥ prabhuḥ śrīmān lakṣmīśrīsevito hariḥ || 45 ||
[Analyze grammar]

jaṭilāyana evāsau nanāma pādayoḥ prabhoḥ |
kṛpā kṛtā hare cātra kṛtakṛtyaḥ kṛtastvayā || 46 ||
[Analyze grammar]

dehi dhāmā'kṣaraṃ nātha darśanottarameva te |
tathāstviti hariḥ prāha ṛṣirdehaṃ vihāya ca || 47 ||
[Analyze grammar]

yayau dhāmā'kṣaraṃ tatra sevādharmeṇa sarvathā |
tasmād yajñaiśca dānaiśca gṛhaiśca vastubhistathā || 48 ||
[Analyze grammar]

sevanīyā atithayastatra nārāyaṇo milet |
śaraṇāgatarakṣā vai nārāyaṇasya sevanam || 49 ||
[Analyze grammar]

tadantarātmā bhagavān prasanno jāyate dhruvam |
taṃ pralakṣya samuddiśya dehinaṃ sevayejjanaḥ || 50 ||
[Analyze grammar]

sa ca yajño mahānāste yajñaprāptipradaḥ śubhaḥ |
hariṃ vinā mahāyajñā ayajñāste bhavanti vai || 51 ||
[Analyze grammar]

athā'nye'pi ca manyante krayavikrayamokṣaṇam |
lokānāmupakārārthaṃ kṛtaṃ sarvaṃ ca nirguṇam || 52 ||
[Analyze grammar]

sarvadehiṣu vai cāste parameśo'ntare sthitaḥ |
krayī vā vikrayī nārāyaṇaḥ svayaṃ na cā'paraḥ || 53 ||
[Analyze grammar]

lābhaṃ prāpyā''nandameti cāhartā parameśvaraḥ |
dātā dhanaṃ tathā prāpyā''nandameti pareśvaraḥ || 54 ||
[Analyze grammar]

śākavikrayanāmā vai purā kaścid vaṇigjanaḥ |
satyamārgaṃ samāśrityā'karodvai krayavikrayau || 55 ||
[Analyze grammar]

pūrvaṃ prātaḥ svapitarau prapūjya sa vaṇigjanaḥ |
bhojayitvā nideśaṃ saṃgṛhītvā yāti cā''paṇam || 56 ||
[Analyze grammar]

śākāni tulayā so'pi dadāti krayiṇe tadā |
krayī bālo'thavā vṛddho yuvā vā cetaro'pi vā || 57 ||
[Analyze grammar]

strī vā kanyā ca vā'pakvabuddhiryaḥ ko'pyupasthitaḥ |
namaste viṣṇave coktvā dadātyeva tadarthitam || 58 ||
[Analyze grammar]

na nyūnaṃ vartate tatra tulāyāṃ vai manāgapi |
dadāti ceśvarabhāvād bhikṣukāyā'pi vai phalam || 59 ||
[Analyze grammar]

kramavāreṇa sarvebhyo dadātyeva na vikramāt |
yathāyogyaṃ dadātyeva matvā tatra narāyaṇam || 60 ||
[Analyze grammar]

sa ca nityaṃ vikrayaṃ saṃkurvan jñānaṃ karoti vai |
krayiṇaḥ sarvathā yūyaṃ bhajadhvaṃ parameśvaram || 61 ||
[Analyze grammar]

sarveṣāṃ yaḥ suhṛnnityaṃ sarveṣāṃ suhite rataḥ |
karmaṇā manasā vācā'ntarātmānaṃ bhajadhvamut || 62 ||
[Analyze grammar]

dveṣaṃ kāmaṃ tyajataiva smarata śrīpareśvaram |
kāṃścinnaivā'nuruṃnddhavaṃ mā virodhayata kaiḥ saha || 63 ||
[Analyze grammar]

samaṃ nārāyaṇaṃ tatra jñātvā bhajata taṃ harim |
divyabhāvāśca bhavata samaloṣṭhāśmakāñcanāḥ || 64 ||
[Analyze grammar]

yathā'ndhā badhirā naiva paśyantyākarṇayantyapi |
tathā bhāvyaṃ viṣayeṣu prāndhaiśca badhiraiḥ sadā || 65 ||
[Analyze grammar]

parameśe tvanandhatvaṃ cā'bādhiryaṃ kathāśrave |
mūkatvaṃ tvanyaviṣaye parameśe tu vāgmitā || 66 ||
[Analyze grammar]

evaṃ sarvaṃ vidhātavyaṃ nārāyaṇe sacetanam |
acetanaṃ viṣayeṣu prāptavyaṃ mānavairiha || 67 ||
[Analyze grammar]

yathā vṛddhā''turakṛśā nispṛhā vai nisargataḥ |
tayā bhāvyaṃ viṣayeṣu spṛhāhīnairjanairiha || 68 ||
[Analyze grammar]

yadā svasya bhayaṃ nāsti svasmād bhayaṃ na vidyate |
rāgadveṣādiśūnyasya brahmaprāptiḥ suniścitā || 69 ||
[Analyze grammar]

pāpabhāvaviyuktasya brahmasampattiruttamā |
yatrā'bhayaṃ mahān dharmaḥ sa prāpnotyabhayaṃ padam || 70 ||
[Analyze grammar]

yasmād bhayaṃ pareṣāṃ syāt tasya tvāyānmahadbhayam |
ahiṃsāḥ sādhavo loke bhayadā na yathā kvacit || 71 ||
[Analyze grammar]

tathā vṛttiṃ cāśrayata prayāta brahmaśāśvatam |
adrohavṛttiścā'cauryaṃ cā'sthārthaścā'pratāraṇam || 72 ||
[Analyze grammar]

yasya dharmā ime rūḍhāstasya brahma prakāśate |
bhavantyubhayadānena samā nānye makhādayaḥ || 73 ||
[Analyze grammar]

loke yaḥ sarvadehibhyo dadātyabhayadakṣiṇāḥ |
sa sarvayajñairījānaḥ prāpnotyabhayadakṣiṇām || 74 ||
[Analyze grammar]

sarvabhūtātmabhūto vai nārāyaṇo nirīkṣakaḥ |
dadātyabhayadātre vai cā'kṣaraṃ nirbhayaṃ padam || 75 ||
[Analyze grammar]

kṛṣyācārā hiṃsrabhāvāstṛṇacchedādikāryakāḥ |
vṛṣabhādivāhabhāvāḥ kleśadā hi bhayānvitāḥ || 76 ||
[Analyze grammar]

paśūn lokā vāhayanti badhnanti damayanti ca |
mānuṣā mānuṣāneva dāsabhāvena bhuñjate || 77 ||
[Analyze grammar]

aśvādīn vāhanān kṛtvā nayanti bahukardamān |
bhayadā hiṃsrakā lokāstatphalaṃ yānti vai bhayam || 78 ||
[Analyze grammar]

aghnyā iti gavāṃ nāma ka etā hantumarhati |
agniṣome vatsanāma priyaṃ vṛkṣaphalaṃ tu yat || 79 ||
[Analyze grammar]

vatsāpākaraṇaṃ tadvai hṛdayaṃ rasapakvatā |
aṃgānyapi phalasyaiva tena kṛṣṇaḥ pratuṣyati || 80 ||
[Analyze grammar]

nā'haṃ hanmi tṛṇaṃ vāpi phalaṃ vāpi kareṇa vai |
na śastreṇa netareṇa cā'bhayaṃ pālayāmi yat || 81 ||
[Analyze grammar]

śākapatrādikaṃ yogyaṃ pakvaṃ vṛkṣād viyujyate |
tasyaiva krayaṇaṃ kṛtvā vikrayaṃ prakaromi vai || 82 ||
[Analyze grammar]

sukhaḥdukhe same me sto na hi me staḥ priyā'priye |
evaṃ dharmaṃ pālayadhvaṃ janāstvabhayadānakam || 83 ||
[Analyze grammar]

tena muktimavāpsyanti bhavanto'bhayavartanāḥ |
nārāyaṇo hi bhagavāṃstena tuṣyati sarvadā || 84 ||
[Analyze grammar]

namo brāhmaṇayajñāya namaḥ prajādhvarāya ca |
namaḥ sevāpravīṇebhyo janebhyaśca namonamaḥ || 85 ||
[Analyze grammar]

sukṛtena suhavyena devāstuṣyanti sarvadā |
namaskāreṇa havyena stotreṇa hṛdayena ca || 86 ||
[Analyze grammar]

yajñāhutyā susantuṣṭā ādityā varṣayanti hi |
tataḥ sasyarasānnāni tebhyaḥ prajāpravardhanam || 87 ||
[Analyze grammar]

prajāḥ kurvanti yajñāṃśca brahma tuṣyati tatra ca |
brahmatoṣakarā bhaktāstoṣayantyaparānapi || 88 ||
[Analyze grammar]

tasmād bhaktiṃ prakurvantu sarvaṃ yad brahmadaivatam |
brahmatṛptau jagatsarvaṃ tṛptameva na saṃśayaḥ || 89 ||
[Analyze grammar]

yajñe tṛptāḥ sarvadevāḥ syuryasya brahmatarpaṇam |
tasya prajñānatṛptasya nityatṛptiḥ sukhodayā || 90 ||
[Analyze grammar]

dharmādhārā dharmodayā brahmadhyānaparāśca ye |
bhaktivijñānasampannāḥ paraṃ pāraṃ titīrṣavaḥ || 91 ||
[Analyze grammar]

sarvasthitaṃ parabrahma dṛṣṭvā labdhvā vicārya ca |
puṇyātpuṇyatamaṃ sthānaṃ prāpnuvantyakṣaraṃ padam || 92 ||
[Analyze grammar]

yatra gatvā na śoko'sti na cyāvo na vyathā mṛtiḥ |
naitādṛśānāṃ svargārthaṃ yajanaṃ vā yaśo'rthakam || 93 ||
[Analyze grammar]

satāmācararūpaṃ tad yajanaṃ drohavarjitam |
brahmatṛptiparaṃ samidoṣadhiphalamūlakaiḥ || 94 ||
[Analyze grammar]

svargārthaṃ puṇyamevā'sti nairguṇyaṃ muktaye bhavet |
tadahaṃ hṛdaye kṛtvā nairguṇyaṃ tvācarāmi vai || 949 ||
[Analyze grammar]

anye yajanti yajñeṣu smṛddhyarthaṃ kṛtaniścayāḥ |
tena te devayānena yathā yānti divaṃ punaḥ || 96 ||
[Analyze grammar]

āvṛtiṃ te'bhigacchanti nā''vartante tu nirguṇāḥ |
svayaṃ yūpānupādāya yajante svāptadakṣiṇaiḥ || 97 ||
[Analyze grammar]

punaḥ svargaṃ punarbhūmirbhramāvarto na līyate |
tasmād bhavantu vai brahmayajanā nānyayājinaḥ || 98 ||
[Analyze grammar]

brahma vai daivataṃ kṛtvā yajñe mokṣaṃ prayāntu ca |
ātmatīrthe makhaṃ śuklaṃ kurvantu divyabhāvanaiḥ || 99 ||
[Analyze grammar]

evaṃ kṛtopadeśaśca śākavikrayako vaṇik |
sarvasevāparo nityaṃ cābhajat puruṣottamam || 100 ||
[Analyze grammar]

śrīharistvekadā cāyāt krayī bhūtvā tadantikam |
dehi śākaṃ śāśvataṃ me pāravālikamāha tam || 101 ||
[Analyze grammar]

vaṇig budhvā pāravālaṃ śākaṃ dadau tu śārṅgiṇe |
namaḥ pāravalāyaiva kṛṣṇāya kramiṇe'rthine || 101 ||
[Analyze grammar]

pāraṃ yo balayatyeva saṃsārābdheśca te namaḥ |
ityuktvā daṇḍavaccakre cakriṇe divyadṛṣṭimān || 103 ||
[Analyze grammar]

tataścaturbhujo bhūtvā haristaṃ pāṇinā'spṛśat |
mīnadhvajadhanuḥśūlāsvastikacakracihninā || 104 ||
[Analyze grammar]

ninye vimāne saṃsthāpya divyaṃ kṛtvā'kṣaraṃ padam |
ityevaṃ makhamārgeṇa ye bhajante hariṃ sadā || 105 ||
[Analyze grammar]

te prayānti harerdhāma hariṇā saha naiṣṭhikāḥ |
tasmād bhajantu satataṃ cāntarasthaṃ narāyaṇam || 106 ||
[Analyze grammar]

anādiśrīkṛṣṇanārāyaṇaṃ gopālanandanam |
kambharābālakaṃ śrīśaṃ prabhuṃ śrīkṛṣṇavallabham || 107 ||
[Analyze grammar]

śrīkṛṣṇavallabhaṃ nāthaṃ bhagavantaṃ parātparam |
ityuktvā lomaśo brāhme muhūrte prayayau saraḥ || 108 ||
[Analyze grammar]

rādhike ca tataḥ sarve snānārthaṃ prayayuḥ saraḥ |
jāgaraṇaṃ prakṛtvaiva pūjāṃ kṛtvā ca naityikīm || 109 ||
[Analyze grammar]

maharṣayo yajamānastathā'nye makhino janāḥ |
somakarmārthamāyātā maṇḍape pañcame dine || 110 ||
[Analyze grammar]

nityaprāptaṃ vidhāyaiva viśeṣaṃ ca samācaran |
rādhike te pravakṣyāmi sarvapuṇyapradaṃ śubham || 111 ||
[Analyze grammar]

itiśrīlakṣmīnārāyaṇīyasaṃhitāyāṃ dvitīye tretāsantāne caturthe divase somayāgasyaikādaśyāṃ kṛtyaṃ jāgaraṇamudyāpanamupadeśanaṃ cetyādinirūpaṇanāmā saptacatvāriṃśadadhikadviśatatamo'dhyāyaḥ || 247 ||
[Analyze grammar]