Chapter 236

śrīkṛṣṇa uvāca |
rādhike bālakṛṣṇastu dhanatrayodaśīdine |
dhanalakṣmyāḥ pūjanaṃ sampracakāra vidhānataḥ || 1 ||
[Analyze grammar]

lakṣmīṃ nijāṃ priyāṃ śrīṃ ca sauvarṇī pratimātmikām |
kārayāmāsa dānārthaṃ tāṃ sumūrtiṃ vidhānataḥ || 2 ||
[Analyze grammar]

prāpūjayat ṣoḍaśādyopacāraiścandanādibhiḥ |
bhojayāmāsa bahudhā pakvānnairnavadhānyajaiḥ || 3 ||
[Analyze grammar]

pratyakṣāṃ ca tato lakṣmīṃ patnīṃ nijāṃ śriyaṃ tathā |
svarṇasihāsane niṣādyā''rcayaccandanādibhiḥ || 4 ||
[Analyze grammar]

keśaveṣādikaṃ cakre svayaṃ kṛṣṇo hi yoṣitoḥ |
kabarīṃ kṛtvā dhammilaṃ granthayāmāsa vai svayam || 5 ||
[Analyze grammar]

puṣpahārān vibhūṣāśca granthayāmāsa tatra ca |
śṛṃgāradravyasadratnairhīrakaiḥ kajjalādibhiḥ || 6 ||
[Analyze grammar]

kuṃkumairgandhasārādyaiḥ kesaraiḥ karakādibhiḥ |
puṣpasragbhiśca bindvādyaistayoḥ śṛṃgāramācarat || 7 ||
[Analyze grammar]

tayoścārārtrikaṃ cakre pratyakṣayorhi kanyayoḥ |
te hyubhe suprasanne ca tadāśīrvacanāni vai || 8 ||
[Analyze grammar]

prāhatuḥ śrīpate lakṣmīpate vivāhamāvaha |
śrīpatiśca tathā lakṣmīpatirlagnena saṃbhava || 9 ||
[Analyze grammar]

rādhāpatiḥ ramāpatiḥ padmāvatīpatirbhava |
māṇikīpatirevāpi brahmapriyāpatirbhava || 10 ||
[Analyze grammar]

duḥkhahālakṣmīpatistvaṃ vivāhavidhinā bhava |
asaṃkhyānītapatnīnāṃ patirlagnena saṃbhava || 11 ||
[Analyze grammar]

samayo'yaṃ vivāhasya tava kṛṣṇa upāgataḥ |
yogyo yuvā bhavasyadya yauvanāṃkuravān prabho || 12 ||
[Analyze grammar]

śubhe samaye śrīkṛṣṇo lakṣmīkṛṣṇo drutaṃ bhava |
kanyakāśca vayaṃ sarvāḥ pratīkṣāmo bivāhanam || 13 ||
[Analyze grammar]

lakṣmīvān dhanavān śreṣṭhaḥ smṛddhimān vaṃśavān bhava |
adyāpi brahmacārī tvaṃ mahāyogī praśasyase || 14 ||
[Analyze grammar]

yogaiśvaryeṇa cāsmākaṃ kāmapūro bhavasyapi |
aviplutaḥ sadā cāste kimasādhyaṃ hi yoginaḥ || 15 ||
[Analyze grammar]

tathāpi vidhinā kṛṣṇotsavaṃ vaivāhikaṃ vaha |
ityukto bhagavān kṛṣṇastathāstvevaṃ jagāda ha || 16 ||
[Analyze grammar]

mārgaśīrṣe kariṣyehaṃ lagnaṃ me sarvayoṣitām |
tāvaddhairyaṃ bhavatyau cāvahatāṃ tvaparāstathā || 17 ||
[Analyze grammar]

ityuktvā dakṣiṇāṃ datvā vyasarjayat prapūjanam |
dakṣiṇā vividhāścāpi dadau śrīlomaśarṣaye || 18 ||
[Analyze grammar]

svarṇamūrtidvayaṃ cāpi dadau śrīlomaśarṣaye |
viprebhyo dakṣiṇāḥ svarṇapātrāṇyapi dhanaṃ dadau || 19 ||
[Analyze grammar]

evaṃ mahotsavaṃ kṛtvā sarovaramagāddhariḥ |
vāsudevīyakaṃ tīrthaṃ yatra cāṇḍāla uddhṛtaḥ || 20 ||
[Analyze grammar]

tatra snātvā vyūhatīrthe vaṭavṛkṣaṃ yayau hariḥ |
tatra brahmapriyāḥ sarvā vihartuṃ samupāgatāḥ || 21 ||
[Analyze grammar]

tābhyo datvā dhanānyeva kuberopahṛtāni vai |
prapūjya sarvapatnīḥ sa kanyakā dakṣiṇādibhiḥ || 22 ||
[Analyze grammar]

prasādya sarvasāmagrīśceṣṭā datvā taṭāntikam |
vihartuṃ barburaṃ vṛkṣaṃ dantadhāvanakaitavāt || 23 ||
[Analyze grammar]

spraṣṭuṃ cāpi yayau bālakṛṣṇo hi rādhike tataḥ |
brahmapriyādyāḥ sarvāstāḥ prapaśyanti tu mādhavam || 24 ||
[Analyze grammar]

yāntaṃ barburavṛkṣāgraṃ gatvā spṛśantameva tam |
dantadhāvanayogyāṃ ca prāntapraśākhikāṃ tadā || 25 ||
[Analyze grammar]

gṛhītvā''karṣayantaṃ ca prapaśyanti sma yoṣitaḥ |
tāvad barburavṛkṣaḥ saḥ samūlaścotpapāta ha || 26 ||
[Analyze grammar]

nanāma bhūtale cāpi tasmād divyo mahānaraḥ |
prāvirbabhūva sahasā māhendrasadṛśo'paraḥ || 27 ||
[Analyze grammar]

dṛṣṭvā hariṃ namaścakre pṛthvyāṃ papāta pādayoḥ |
cakāra daṇḍavattūrṇaṃ tuṣṭāva parameśvaram || 28 ||
[Analyze grammar]

parameśa kṛpāsindhau smṛtvā'haṃ tāritastvayā |
tvaṃ jīvānāṃ samuddhartā mokṣakartā pareśvaraḥ || 29 ||
[Analyze grammar]

vartase'nugrahakartā samuddhartuṃ janāniha |
carmacakṣurna jānāti bhavantaṃ puruṣottamam || 30 ||
[Analyze grammar]

mayā prāptaḥ pareśastvaṃ vṛkṣayonipramokṣakaḥ |
adyā'haṃ vai pragacchāmi divyaṃ svargaṃ tavā''jñayā || 31 ||
[Analyze grammar]

ityuktvā praṇanāmāpi puṣpāṇi barburasya tu |
arpayitvā mādhavasya pādayorgantumicchati || 32 ||
[Analyze grammar]

tāvattatra samāyātā āścaryaṃ paramaṃ gatāḥ |
brahmapriyāḥ samastāstāḥ papracchuḥ kāntameva tāḥ || 33 ||
[Analyze grammar]

ko'yaṃ vṛkṣāt samutpannaḥ kathaṃ vṛkṣo nipātitaḥ |
kautūhalaṃ paraṃ no'tra vadaitatkāraṇaṃ prabho || 34 ||
[Analyze grammar]

śrutvaitad bālakṛṣṇo'pi varṇayituṃ tu taṃ naram |
vṛttāntaṃ ca nijaṃ sarvamājñāpayaddhi tatpuraḥ || 35 ||
[Analyze grammar]

rājā praṇamya sarvāstā āha vṛttāntamadbhutam |
purāhamāsaṃ samrāḍ vai gaurjare sābhrikātaṭe || 26 ||
[Analyze grammar]

barburo nāma rājā vai dharmakarmaparāyaṇaḥ |
prajāpālanadakṣaśca devasādhuprapūjakaḥ || 37 ||
[Analyze grammar]

vratadānaparo nityaṃ nityavṛddhopasevanaḥ |
kṛṣṇakathāparaścāpi vaiṣṇavo duṣṭaśāsakaḥ || 38 ||
[Analyze grammar]

ekadā tvagamaṃ dīrghe'raṇye sābhramatītaṭe |
vanāni vīkṣituṃ parimeyabhṛtyo'tigo vane || 39 ||
[Analyze grammar]

dūrāraṇye prayātena padbhyāṃ cāśvo vilokitaḥ |
saptarūpāśrayo divyaḥ kāntimadromavarmakaḥ || 40 ||
[Analyze grammar]

mukhe śuklaḥ śaphe cauṣṭhe raktaśca pucchapṛṣṭhayoḥ |
bhramare'pyudare bhāge śyāmo nīlastu vai gale || 41 ||
[Analyze grammar]

pītaḥ karṇe pārśvabhāge jaṃghāyāṃ kapiśastathā |
nāḍīmārgeṣu haritaścitraḥ sarvāṃgasandhiṣu || 42 ||
[Analyze grammar]

evaṃvidhaṃ vicitrāśca dṛḍhaṃ puṣṭaṃ balānvitam |
śobhanaṃ saṃvilokyaiva dhartuṃ cā'karavaṃ manaḥ || 43 ||
[Analyze grammar]

śanaiḥ pārśvaṃ tathā gatvā yathā viśvasito bhavet |
dhṛtavāṃstaṃ karṇadeśe raśminā ca gale tataḥ || 44 ||
[Analyze grammar]

gṛhītvaiva ca tatpṛṣṭhāsanaṃ ca kṛtavānaham |
so'pi mayā yathā saṃpreritastathā jagāma ha || 45 ||
[Analyze grammar]

na jāne tvasya sāralyaṃ kutaścārjavamāgatam |
yathā sañcālayāmyenaṃ tathā'gre sa tu gacchati || 46 ||
[Analyze grammar]

evaṃ daivaturaṃgaṃ taṃ jñātvā ninye purīṃ mama |
nijaṃ bhāgyaṃ manyamāno harṣitaścā'bhavaṃ muhuḥ || 47 ||
[Analyze grammar]

daivaṃ taṃ turagaṃ nāhaṃ kṣaṇaṃ dūraṃ karomi vai |
tataḥ sa kopamāpanno māṃ śaśāpa ruṣā vadan || 48 ||
[Analyze grammar]

yasmānmāṃ muñcasi naiva naiva jānāsi māṃ tathā |
naiva tṛptiṃ prayātyeva dṛṣṭvā māṃ bandhanānvitam || 49 ||
[Analyze grammar]

naiva vijñāya tattvaṃ me miṣṭaṃ dadāsi bhāvataḥ |
paśuṃ jñātvā bandhane'tra nijaṃ kṛtvā ruṇatsi mām || 50 ||
[Analyze grammar]

tato rājan mama śāpād bhava barburapādapaḥ |
kaṇṭakī suvane tatra duḥkhaṃ yāhi divāniśam || 51 ||
[Analyze grammar]

ityukto'haṃ tadā śīghraṃ jñātvā pūjyottamaṃ munim |
patitaḥ pādayostasyā'śvasya śīghraṃ vimuktaye || 52 ||
[Analyze grammar]

prārthitaḥ sa mayā devo munirvā'nyo'pi yo bhavān |
ajñāto mama pūjyo'si kṣamāṃ kurvatra bāliśe || 53 ||
[Analyze grammar]

śāpaduḥkhaṃ yathā śīghraṃ nivarteta tathā kuru |
nijarūpaṃ ca me deva pradarśaya namāmi te || 54 ||
[Analyze grammar]

aparāddhaṃ mayā cāvijānatā nānyathā prabho |
tasmāt kṣamāṃ parāṃ kṛtvā nijarūpaṃ pradarśaya || 55 ||
[Analyze grammar]

ityarthito muhuḥ so'śvastiro bhūtvā mahānṛṣiḥ |
āśvalāyananāmā'bhūd rājavaṃśaguruḥ svayam || 56 ||
[Analyze grammar]

ahaṃ ruroda bahudhā jñātvā kulaguruṃ tu tam |
kṣamāṃ dinataro bhūtvā'yācaṃ śāpanivṛttaye || 57 ||
[Analyze grammar]

putro'parāddhān sandhatte pitā kṣamate'harniśam |
śiṣyāddhi guravaścāpi samicchanti parābhavam || 58 ||
[Analyze grammar]

mayā hyajānatā cā'śvalobhena nṛpabhāvataḥ |
aparāddhaṃ tava pūjya kṣamāṃ kuru vidhehi śam || 59 ||
[Analyze grammar]

ityarthito hi bhagavānnāśvalāyanako muniḥ |
kṣamāṃ kṛtvā''ha māṃ tatra kiṃ te vadāmi bhūpate || 60 ||
[Analyze grammar]

mahatāmavamānādvai mahadāsanalaṃghanāt |
pūjyapūjāvilopācca puṇyaṃ naśyati sarvathā || 61 ||
[Analyze grammar]

tava puṇyaṃ samagraṃ vai naṣṭaṃ matpṛṣṭharohaṇāt |
rājabhāktvaṃ na cā'dyā'sti śāpadagdho bhavasyapi || 62 ||
[Analyze grammar]

śāpabhogottaraṃ svargaṃ tava śīghraṃ bhaviṣyati |
parastrīsaṃgamād rājan gurūṇāmavamānanāt || 65 ||
[Analyze grammar]

parapīḍākaraṇāccā''yuṣyanāśo hi jāyate |
asatpakṣagrahāccāpi devasādhuvinindanāt || 64 ||
[Analyze grammar]

satāṃ drohakaraṇāccāyuṣyanāśo hi jāyate |
pitroḥ kaṣṭapradānācca patnīnāṃ pīḍanādapi || 65 ||
[Analyze grammar]

hiṃsāyāḥ karaṇāccāpyāyuṣyanāśo hi jāyate |
madyamāṃsavyavāyādidoṣād dharmaprapīḍanāt || 66 ||
[Analyze grammar]

bhūtā''veśādidoṣāccāpyāyurnāśaḥ prajāyate |
tvayā'parāddhaṃ cātyarthaṃ mayā noktaṃ tu lajjayā || 67 ||
[Analyze grammar]

yadahaṃ gururasyā'smi hyaśvarūpo vane'smi ca |
rājā'yaṃ dṛṣṭavān māṃ sa na jānīyād guruṃ yathā || 68 ||
[Analyze grammar]

tathā rūpaṃ mayā na vyāvartitaṃ tava sannidhau |
dūraṃ kṣaṇāntare rājā gamiṣyati tataḥ param || 69 ||
[Analyze grammar]

mama rūpaṃ dhariṣye'haṃ vicāryetthaṃ turaṃgamaḥ |
abhavaṃ cā'vartayaṃ ca tāvatta bhavatā'ntikam || 70 ||
[Analyze grammar]

samāgatya dhṛtaścāsmi vāhitaśca gṛhaṃ prati |
tathāpyacintayaṃ nā'smai darśayitavyamantataḥ || 71 ||
[Analyze grammar]

madrūpaṃ yanmandurāyāṃ gṛhe mokṣyati māṃ yadā |
nirjane'trā'ndhakāre vā rūpaṃ dhṛtvā nijaṃ gṛhāt || 72 ||
[Analyze grammar]

prayāsye vai vanaṃ tena śoko nā'sya bhaviṣyati |
guroratyaparādhasyetyevamacintayaṃ nṛpa || 73 ||
[Analyze grammar]

tvayā tu lobhabhāvena nāhaṃ tyakto hi nirjane |
cauravad bandhane kṣiptaḥ kārāgāre sthiro yathā || 74 ||
[Analyze grammar]

tato'haṃ krodhamāpannaḥ śāpaṃ vai sṛṣṭavāṃstvayi |
puṇyaṃ tena vinaṣṭaṃ te kṛpā me kiyatī vad || 75 ||
[Analyze grammar]

tato rājatvamadyaiva dagdhaṃ te doṣakāraṇāt |
varburasya drumasyaiva śarīraṃ te bhaviṣyati || 76 ||
[Analyze grammar]

karomyanugrahaṃ te'tra śīghraṃ śāpavināśane |
kuṃkumavāpikākṣetre'kṣarabhūmau saro'ntike || 77 ||
[Analyze grammar]

barburo bhava rājendra jalapānasukhādimān |
anādiśrīkṛṣṇanārāyaṇaḥ śrīparameśvaraḥ || 78 ||
[Analyze grammar]

rājate bhagavāṃstatra tadyogaṃ tvaṃ prayāsyasi |
dantadhāvanalābhārthaṃ tava śākhāṃ grahīṣyati || 79 ||
[Analyze grammar]

svahastena yadā sākṣāt tasya sparśena vai bhavān |
divyabhāvaṃ divyadehaṃ samāsādya hi daivatam || 80 ||
[Analyze grammar]

śīghraṃ yāsyasi nākaṃ tad yatrendro vartate sadā |
tatra kalpaṃ svargasukhaṃ bhuktvā'kṣaraṃ prayāsyasi || 81 ||
[Analyze grammar]

tyaja cintāṃ vāsanāṃ ca rājye putre priyāsvapi |
gatāḥ pūrve hi rājāno gamiṣyantyapare'pi ca || 82 ||
[Analyze grammar]

hareryogād gatā ye te gatā bhavanti netare |
ityevaṃ māṃ jagādā'tha munirvanāntaraṃ yayau || 83 ||
[Analyze grammar]

svasti te'stviti māṃ coktvā yāntaṃ dṛṣṭvā mṛto'pyaham |
aśvapaṭṭasarastīre'bhavaṃ barvurapādapaḥ || 84 ||
[Analyze grammar]

daśavarṣāṇi jātāni me'tra barburavarṣmaṇi |
tvayā samuddhṛtaḥ kṛṣṇa śāpapāpaṃ vināśitam || 85 ||
[Analyze grammar]

puṇyavānasmi sañjātastava sparśena muktida |
kiṃkaro'smi śaraṇyastvaṃ dehi maṃtraṃ ca vaiṣṇavam || 86 ||
[Analyze grammar]

yena tvante bhavenmokṣo me tathā tvaṃ vidhatsva vai |
rājā'haṃ rājarūpaṃ tvaṃ naijaṃ me tvaṃ pradarśaya || 87 ||
[Analyze grammar]

yatsvarūpaṃ sadā dhyātvā svargānmokṣamavāpnuyām |
ityarthitastadā rādhe hariḥ rājasvarūpadhṛk || 88 ||
[Analyze grammar]

pṛthurājasvarūpo'bhūd bhaktecchāpūraṇāya vai |
dadau maṃtraṃ ca tasmai sa vaiṣṇavaṃ ṣoḍaśārṇakam || 89 ||
[Analyze grammar]

oḥ namaḥ śrīkṛṣṇanārāyaṇāya svāmine svāhā |
gṛhītvā tu manuṃ tvenaṃ vimānavaramāsthitaḥ || 90 ||
[Analyze grammar]

puṣpādyairvardhayitvaiva śrīkṛṣṇaṃ puruṣottamam |
brahmapriyāstathā sarvā yayau svargaṃ surārcitaḥ || 91 ||
[Analyze grammar]

bālakṛṣṇaṃ tadā brahmapriyāḥ pṛthusvarūpiṇam |
vyalokayan patiṃ naijaṃ trailokyanṛpatiṃ prabhum || 92 ||
[Analyze grammar]

dhanuścakradharaṃ viṣṇuṃ dṛḍhaṃ yuvānamacyutam |
mohamāptāśca tāḥ patnyo remire pṛthunā tadā || 93 ||
[Analyze grammar]

āmravaṇe ciraṃ paścāt pūjayitvā kṛpānidhim |
prayayuḥ sarasastīre sasnuśca patinā saha || 94 ||
[Analyze grammar]

tīrthaṃ tad varburākhyaṃ ca pṛthutīrthaṃ tato'bhavat |
tatra vāsād bhavet svargaṃ śāpanāśaśca mokṣaṇam || 95 ||
[Analyze grammar]

anādiśrībālakṛṣṇaḥ snātvā dhṛtvā'mbarāṇi ca |
brahmapriyāḥ sukhayitvā preṣayitvā''śramaṃ tataḥ || 96 ||
[Analyze grammar]

svagehaṃ cāyayau rātrau lakṣmīpūjāṃ punastataḥ |
cakāra bhagavān rātrau ghṛtadīpān cakāra ha || 97 ||
[Analyze grammar]

ārārtrikaṃ ca naivedyaṃ prārthayadvai śriyai tadā |
prasannā sā'bhavallakṣmīḥ smṛddhā'bhavad gṛhe gṛhe || 98 ||
[Analyze grammar]

ityevaṃ rādhike kṛtvotsavaṃ nidrāṃ jagāma saḥ |
paṭhanācchravaṇādasya lakṣmīvān mokṣago bhavet || 99 ||
[Analyze grammar]

śāpitānāṃ śāpamokṣaścāparādhavināśanam |
apuṇyānāṃ puṇyalabdhirbhavennātrā'sti saṃśayaḥ || 100 ||
[Analyze grammar]

iti śrīlakṣmīnārāyaṇīyasaṃhitāyāṃ dvitīye tretāsantāne hariṇā dhanatrayodaśyāṃ dhanalakṣmīpūjā brahmapriyāpūjā barburanṛpasya āśvalāyanarṣiśaptasya barburavṛkṣībhūtasya |
mokṣaṇaṃ pṛthutīrthasthāpanaṃ barburasya svargaṃ prati preṣaṇaṃ cetyādinirūpaṇanāmā ṣaṭtriṃśadadhikadviśatatamo'dhyāyaḥ || 236 ||
[Analyze grammar]