Lakshminarayana Samhita [sanskrit]

by Shwetayan Vyas | 1,169,834 words | ISBN-10: 8170801818 | ISBN-13: 9788170801818

The Lakshminarayana Samhita Chapter 233 (Sanskrit text), including grammatical analysis, glossary and relevant print editions. The Lakshmi-narayana-samhita is an encyclopaedic work devoted to Narayana although it deals with various deities. The work is written in Puranic style and divided into four books according to the four Yugas. In total, the work consists of roughly 120,000 metrical verses.

śrīrādhikovāca |
gopīpate harekṛṣṇa śrāvitaṃ paramādbhutam |
anādiśrīkṛṣṇanārāyaṇasya caritaṃ śubham || 1 ||
[Analyze grammar]

pāvanaṃ divyamādyaṃ ca sṛṣṭyāraṃbhe navaṃ navam |
śrutvā śrutvā'ti me śraddhā punaḥ śrotuṃ prajāyate || 2 ||
[Analyze grammar]

na hi tṛpyāmi kāntā''syodgatavāṇyā viśeṣataḥ |
bhūyo me śrāvaya svāmin bālakṛṣṇo mahāprabhuḥ || 3 ||
[Analyze grammar]

kuṃkumavāpikākṣetre kiṃ tataḥ pracakāra ha |
yatkiṃciccaritaṃ divyaṃ laukikaṃ vāpi muktidam || 4 ||
[Analyze grammar]

kauṭumbikaṃ tairthikaṃ vā camatkārayutaṃ ca vā |
svalpaṃ vāpi mahadvāpi śrāvayā''lasyamantarā || 5 ||
[Analyze grammar]

śrīkṛṣṇa uvāca |
śṛṇu kānte priye rādhe puruṣottamasatkathāḥ |
bhuktimuktipradā divyā bhaktānandapravarṣiṇīḥ || 6 ||
[Analyze grammar]

me'pi kathayamānasya tṛptirnaivopajāyate |
puruṣottamasaṃjñasya mama mūlasya satkathāḥ || 7 ||
[Analyze grammar]

api tvaṃ rādhike cāsi mamārdhaṃ puruṣottamī |
so'haṃ tvāṃ mat pṛthakkṛtvā goloke'smi pṛthak sthitaḥ || 8 ||
[Analyze grammar]

mūlarūpāt parabrahmasvarūpāt kṛṣṇarūpavān |
tvadarthe cāsmi niṣpannastava kāmaprapūrtaye || 9 ||
[Analyze grammar]

tvaṃ cāhaṃ ca tathā lakṣmīrnārāyaṇaśca rādhike |
pṛthagbhūtā dṛśyamānā api pṛthaṅn mūlataḥ || 10 ||
[Analyze grammar]

tvādṛśyo mādṛśā mūle pare brahmaṇi koṭiśaḥ |
avatārā virājante mamaikasya tu kā kathā || 11 ||
[Analyze grammar]

tasya śrībālakṛṣṇasya kaṃbharāśrīsutasya vai |
gopāṃlakṛṣṇanandasya brahmapriyāpaterhareḥ || 12 ||
[Analyze grammar]

sarvapateḥ pareśasyā''nandapradāni yāni tu |
caritrāṇi paraṃ cetaḥ kathayāmi nibodha me || 13 ||
[Analyze grammar]

śrotṝṇāṃ cāpi vaktaṝṇāṃ mokṣadānīha sarvathā |
smartṝṇāṃ vāsanānāśakārīṇi śobhanāni ca || 14 ||
[Analyze grammar]

sāttvikārthaṃ sāttvikāni rāgyarthaṃ rājasāni ca |
tāmasārthaṃ tāmasāni muktārthaṃ nirguṇāni ca || 15 ||
[Analyze grammar]

nirguṇo'pi harirmāyāṃ yuktvā tadvānivā'niśam |
vartate guṇināṃ madhye teṣāṃ sukhābhisandhaye || 16 ||
[Analyze grammar]

stryapatyavanto lokāstu svatulyaṃ kalpayanti tam |
strīputrābhijanabaddhaṃ na divyaṃ yad guṇadṛśaḥ || 17 ||
[Analyze grammar]

ahaṃ rādhe nirguṇo'smi kā kathā me parātmanaḥ |
tvaṃ rādhe nirguṇā cāsse kā kathā brahmayoṣitām || 18 ||
[Analyze grammar]

gopā gopyo'pi divyā me golokasthāśca dhenavaḥ |
vaikuṇṭhavāsino divyāḥ kā kathā paramātmanaḥ || 19 ||
[Analyze grammar]

camatkārāstasya divyāḥ kriyā divyā abandhanāḥ |
yogo divyo harestasya ramaṇaṃ rāsanādikam || 20 ||
[Analyze grammar]

dāmpatyaṃ sarvathā divyaṃ divyaścābhijano'sya ca |
divyāstasya guṇāḥ sarve māyā yatra ca tadvidhā || 21 ||
[Analyze grammar]

sarvaṃ divyaṃ mokṣadaṃ ca śāśvatānandadāyakam |
laukikāśca kriyāḥ kṛṣṇe divyā muktisukhapradāḥ || 22 ||
[Analyze grammar]

mahīmānaṃ kathayato hṛdayaṃ me dravatyapi |
madgaṇānāṃ varṇanaṃ na kartuṃ śakto bhavāmi vai || 23 ||
[Analyze grammar]

tarhyanantasya devasya prabhoḥ sarvāvatāriṇāḥ |
varṇanaṃ kartumeveśaḥ ko bhaved rādhike priye || 24 ||
[Analyze grammar]

tvadarthaṃ na ca santoṣaṃ labhe guṇānuvarṇane |
satpātraṃ yatra labhyeta tatra tṛptirna jāyate || 25 ||
[Analyze grammar]

atṛpto'haṃ kathayāmi miṣṭān miṣṭān harerguṇān |
āśvine bhagavān pūrṇimāyāṃ candrodayottaram || 26 ||
[Analyze grammar]

niśīthe svapriyābhirvai rāsotsavaṃ cakāra ha |
sarastaṭe'tidhavale cā''mravaṇe'timañjule || 27 ||
[Analyze grammar]

vidyunmaṇipriyā prāha bālakṛṣṇaṃ susundaram |
kṛṣṇa candrodayo jāto dhāvalyaṃ suvitanyate || 28 ||
[Analyze grammar]

dugdharātriḥ samutpannā mano me rantumicchati |
anyāsāmapi sarvāsāṃ svasṝṇāṃ mānasānyapi || 29 ||
[Analyze grammar]

śārade śītale śānte rantuṃ tvarāṃ dadhatyapi |
tannātha rāsaramaṇaṃ vidhehi śaṃ ca dehi naḥ || 30 ||
[Analyze grammar]

ityukto bhagavān śrīmadbālakṛṣṇo'tibhāvukaḥ |
sarvāsāṃ svāṃganānāṃ sampūrayituṃ manorathān || 31 ||
[Analyze grammar]

divyarūpaṃ dadhārā'sau yannijākṣaradhāmagam |
muralīṃ cāpi jagrāha veṣaṃ rāsārhamādadhe || 32 ||
[Analyze grammar]

mastake ca mayūrāṇāṃ picchānāṃ mukuṭaṃ dadhe |
kuṃkumasya ca tilakaṃ netrayoḥ kajjalaṃ dadhe || 33 ||
[Analyze grammar]

kuṇḍale karṇayoścāpi gaṇḍayoścandrakaṃ dadhe |
kapolayo raṃgabindūn bhāle ca patrikāṃ dadhe || 34 ||
[Analyze grammar]

nārīkeśanibhān keśān skandhayorvistṛtān dadhe |
kaṭake bhujabandhau ca maṇīn prakoṣṭhayordadhe || 35 ||
[Analyze grammar]

kaustubhaṃ mauktikīrmālāḥ puṣpahārān gale dadhe |
kañcukaṃ hematārāḍhyaṃ raktavarṇaṃ śubhaṃ dadhe || 36 ||
[Analyze grammar]

sukhālaṃ śoṇavarṇaṃ kaṭibaddhaṃ dṛḍhaṃ dadhe |
raśanāṃ svarṇasambhūtāṃ kiṃkiṇījālanāditām || 37 ||
[Analyze grammar]

nupūre sandadhe ramye kiṃkiṇīstabakānvite |
ūrmikā hīrakāḍhyāśca gandhaṃ mumoca saurabham || 38 ||
[Analyze grammar]

snehavṛṣṭiṃ pupoṣā'pi sasarjā'naṅgabhāvanām |
yuvabhāvaṃ prakāśayāmāsa yuvatībhāvanām || 39 ||
[Analyze grammar]

mugdhābhāvaṃ tathā madhyābhāvaṃ prauḍhādibhāvanām |
samprāvirbhāvayāmāsa sarvāsu svapriyāsu saḥ || 40 ||
[Analyze grammar]

rādhike'tha tataḥ kṛṣṇaṃ prerayituṃ svayaṃ priyāḥ |
anyāḥ sarvāḥ samāklṛpya veṣaṃ śṛṃgāraśobhitam || 41 ||
[Analyze grammar]

kāntaṃ prati samāgatya prārthayāmāsureva tāḥ |
kṛṣṇakṛṣṇa mahākṛṣṇa bālakṛṣṇa kṣapeśvara || 42 ||
[Analyze grammar]

kṣapāṃ sārthāṃ manaḥpūrtyā vidhehi ramaṇo'si naḥ |
evaṃ śrutvā'tivegāḍhyāṃ vāṇīṃ kāntāgaṇasya saḥ || 43 ||
[Analyze grammar]

rādhike śrībālakṛṣṇaḥ śīghramutthāya cā'layāt |
bahiḥ saraḥ samāgatya dakṣiṇe vai taṭe śubhe || 44 ||
[Analyze grammar]

miṣṭāṃ ninādayāmāsa muralīṃ hṛdayaṃgamām |
tanmiṣṭasvaramādhuryairhṛdayāni tu yoṣitām || 41 ||
[Analyze grammar]

śaityaṃ sukhaṃ ca kampaṃ ca prāpyā'pi dravitāni vai |
kamkamākhyāṃ ratiṃ prāpya kṛṣṇaṃ prati samāyayuḥ || 46 ||
[Analyze grammar]

sarvāstadā nijapatnyaḥ kumāryo lomaśāśramāt |
ṛṣiṃ natvā samāpṛcchya nijaṃ kāntamupāyayuḥ || 47 ||
[Analyze grammar]

sarvānandabharāḥ kanyāḥ sarvaśṛṃgāraśobhitāḥ |
kāntaṃ smṛtvā'grato yāntaṃ dṛṣṭvā śīghraṃ pradudruvuḥ || 48 ||
[Analyze grammar]

kṛṣṇo dṛṣṭvā nijāḥ koṭyarbudasaṃkhyākakāminīḥ |
viśālaṃ rāsaramaṇaṃ talaṃ divyamakalpayat || 49 ||
[Analyze grammar]

na tatra dṛśyate divye tejomaye stare'kṣare |
saraścāmravaṇaṃ cāpyāśramo vā nagarī ca bhūḥ || 50 ||
[Analyze grammar]

divyodyāno mahāñjātaḥ sarvā'kṣaradrumānvitaḥ |
śatayojanavistīrṇaḥ śatastarocchrayastathā || 51 ||
[Analyze grammar]

pratistaraṃ pañcalakṣapramadānāṃ svayoṣitām |
divyānāṃ kanyakānāṃ vai rāsāḥ klṛptāḥ kṛpālunāḥ || 52 ||
[Analyze grammar]

bhūtvā tāvatsvarūpaḥ sa yāvatpriyāḥ prasaṃkhyayā |
divyodyānaḥ samasto vai divyayugalaśobhitaḥ || 53 ||
[Analyze grammar]

rāsabhrāmaṇaśobhāḍhyaḥ prājāyata navakriyaḥ |
mukhyāstu māṇikī rādhā lakṣmīḥ padmāvatī ramā || 54 ||
[Analyze grammar]

sadguṇā mañjulā hāsā muktā ca lalitā jayā |
hemnī dayā ca campā'pi śāntirmanuśca maṃgalā || 55 ||
[Analyze grammar]

śrīścāyayustathā saurāṣṭryaśca catvāriṃśat śatam |
meghanādyaścaturdaśasahasrāṇi tadā''yayuḥ |
ājanābhyastadā miśrāḥ devikāstāḥ samāyayuḥ || 56 ||
[Analyze grammar]

ṣaṣṭhyākhyā mānasā dīpāvalyaśca koṭirāyayuḥ |
talājā kāmadhenavīyakanyāḥ koṭirāyayuḥ || 57 ||
[Analyze grammar]

ārjantyaśca śataṃ krodhanikaikā koṭigahvarāḥ |
sūcī lakṣavanadevyo lakṣarākṣasya āyayuḥ || 58 ||
[Analyze grammar]

kaṃkatālyaḥ ṣaṭ tathā ca daśasāhasramāyayuḥ |
pitṛkanyāścaikalakṣamāyayū rāsamutsukāḥ || 59 ||
[Analyze grammar]

rāsātalyaḥ pañcasahasraṃ vāsantyaśca ṣoḍaśa |
sālamālyaḥ paṃcaśataṃ nāgakanyāśca viṃśatiḥ || 60 ||
[Analyze grammar]

nāginyo daśasāhasraṃ śāvadīnyaḥ sahasrakam |
aindrajālyaḥ sahasraṃ ca vidyāśca pañcasaptatiḥ || 61 ||
[Analyze grammar]

lākṣmaṇyo dve sahasre ca rāsārthaṃ tatra cāyayuḥ |
vaidhasyo dvāsaptatisahasrāṇi tvāyayustadā || 62 ||
[Analyze grammar]

vaiśvāvasvyastriśataṃ ca jummāsemlyaḥ sahasrakam |
sāntapanyaḥ pañcaśataṃ sauratyaśca śataṃ tathā || 63 ||
[Analyze grammar]

bāleśvaryaśca tilaścailavīlā tvekalā''yayau |
dākṣajāvaṃgarīśataṃ prajākanyāsahasrakam || 64 ||
[Analyze grammar]

paitryaśca viṃśatirdaśasahasrasevikāstathā |
prācīnyādyāḥ prajākanyāḥ koṭistatra samāyayuḥ || 65 ||
[Analyze grammar]

sāntāraṇyau ca dve kanye śaibyaḥ śataṃ samāyayuḥ |
thārkūṭasthyaḥ paṃcāśacca vīrajāryaḥ śataṃ tathā || 66 ||
[Analyze grammar]

ṣaṣṭiḥ śāktyakṣikāḥ śataṃ picāśinyaḥ samāyayuḥ |
śatadvayaṃ kāliyāśmastriṃśaduralaketujāḥ || 67 ||
[Analyze grammar]

krāthakyaḥ pañca ca pārtharājyo viṃśatirāyayuḥ |
daśauṣṭrālyaḥ pañca hāṃkāryaśca kāṣṭhalīpañcakam || 68 ||
[Analyze grammar]

ṣaṭ tīrāṇyaścālvīnaryaḥ pañca sapta tu vardhikāḥ |
anāthaikā dve sahasre prakīrṇikādikanyakāḥ || 69 ||
[Analyze grammar]

saptā'lpaketvyaścaikā ca jayakṛṣṇavakanyakā |
pārīśānyaścaikaviṃśatirdve caindurāyosute || 70 ||
[Analyze grammar]

pañcadaśa tu maudrāṇḍyo nava gaṇḍanṛpātmajāḥ |
catasraścaiva līnorṇyaścaikādaśabṛhaccharāḥ || 71 ||
[Analyze grammar]

catvāriṃśadvālalīnyaḥ pañcaiva vārasaiṃhikāḥ |
rāyagāmalikāḥ pañca tisraścānyāḥ samāyayuḥ || 72 ||
[Analyze grammar]

ekalā stokahomī ca kāṣṭhayānī tathaikalā |
ekalā kolakī dve ca dinamānyau samāyayuḥ || 73 ||
[Analyze grammar]

rāyakinnarikāścaikapañcāśattatra cāyayuḥ |
rāyarokīśvarīkanyāścaikaviṃśatirāyayuḥ || 74 ||
[Analyze grammar]

rāṇajityo viṃśatiśca tisro vākakṣikāstathā |
mārīśyaśca tathā tisro bāleśvaryaśca tisṛkāḥ || 75 ||
[Analyze grammar]

ṣaṭ lāmbāryaḥ sapta navārkyaśca nava tu huṇḍaśāḥ |
ekā kūpeśikā catasraḥ kālīmaṇḍalīnikāḥ || 76 ||
[Analyze grammar]

jeleśyaḥ pañca tisrastu pārāvāryaḥ samāyayuḥ |
koṭīśvaryau dve ca kanye tisraḥ sātīśikāstathā || 77 ||
[Analyze grammar]

sapta karkaśikāścāpi catasraścā'ṇḍajārikāḥ |
bālyarājasī caikā ca tisraḥ saumanikāstathā || 78 ||
[Analyze grammar]

dve gavākṣyau pārāṅvṛttyau dve ca rāse samāyayuḥ |
aiśānyaścaikacatvāriṃśacca rāse samāyayuḥ || 79 ||
[Analyze grammar]

rāyapātyaścatustriṃśaccatvāriṃśacca maṃgalāḥ |
ājanābhyo viṃśatisāhasrakanyāḥ samāyayuḥ || 80 ||
[Analyze grammar]

etāḥ sarvāścatuṣkoṭyaścaturlakṣaṃ hi kanyakāḥ |
pañcapañcāśatsāhasrāstathā vai ṣaṭśatāni ca || 81 ||
[Analyze grammar]

viṃśatiḥ kanyakāstāśca kṛṣṇapatnyo'rpaṇā''gatāḥ |
tāsāṃ sakhyaśca kauberyo māhendryo yamakanyakāḥ || 82 ||
[Analyze grammar]

vāyavyo vaiśvakarmyaśca vārkṣyo raudraśca vahnijāḥ |
śrāvaṇyaścāpi khānijyaḥ sāmvatsaryaśca gopikāḥ || 83 ||
[Analyze grammar]

prācīnyaśca piśaṃginyo rāśiyānyaḥ samāyayuḥ |
raumāyaṇyaśca pāraśyo dhaivaryaḥ kinnarīgaṇāḥ || 84 ||
[Analyze grammar]

amaryaśca tathā gauryaḥ paryo hāritikāstathā |
ābriktyo'pi ca pātālyaḥ svargyaścāpsarasastathā || 85 ||
[Analyze grammar]

brahmasaraso gāndharvyo yuvatyo'rbudamāgatāḥ |
saśṛṃgārāḥ saccitsukhaprabhāmaṇḍaladyotitāḥ || 86 ||
[Analyze grammar]

remire bhinnacakreṣu muṣṭyuccapatinā hi tāḥ |
śrīkṛṣṇavallabhāryeṇa svāminā'saṃkhyarūpiṇā || 87 ||
[Analyze grammar]

bhūtvā varṣadvayajyeṣṭho reme rāmo ramāvrajaiḥ |
tālīvādanatālaiśca pādasthagitabhaṃgibhiḥ || 88 ||
[Analyze grammar]

pārśvadānapradānaiścā'ñjalidānaiśca gītibhiḥ |
gaṇḍasparśaiḥ skandhahastairvakṣaḥśleṣairmuhurmuhuḥ || 89 ||
[Analyze grammar]

bhrāmaṇairvividhaiścādyaiḥ paścāpādaistathā'gragaiḥ |
kramaṇaiḥ kṣepaṇaiścāpi netrastanairmano'rpaṇaiḥ || 90 ||
[Analyze grammar]

hāvabhāvairgaṇḍadānai reme cāśleṣaṇaistathā |
koṭiśo māṇḍalānyevaṃ tejaḥstareṣu sarvataḥ || 91 ||
[Analyze grammar]

vidyante rāsinīnāṃ vai rāse kāntaiḥ samantataḥ |
sarvākarṣaṇakartā'yaṃ nārāyaṇapareśvaraḥ || 9 || re |
antarātmā nijaiśvaryānmahānandottamaṃ dadau |
sarvendriyāṇāmānandaṃ divyaṃ savegiśāśvatam || 93 ||
[Analyze grammar]

tathāpyaviplutānandaṃ dadau cāpātareva ha |
darśane sparśane cāpi śravaṇe ghrāṇane'pi ca || 94 ||
[Analyze grammar]

rāsane grahaṇe cāpi pādanyāse ca kīrtane |
āśleṣaṇe pṛṣṭhabhāve cāgre pārśve ca sannidhau || 95 ||
[Analyze grammar]

yuvatīnāṃ svapatnīnāṃ sarvendriyeṣu sarvathā |
sarvendriyāṇāmānandaṃ bahuvegaṃ nyadhātprabhuḥ || 96 ||
[Analyze grammar]

yadānandena cākṛṣṭāḥ sarvāstallīnatāṃ gatāḥ |
ratyānandaṃ pṛthaṅ naiva samaicchaṃstṛptimāgatāḥ || 97 ||
[Analyze grammar]

kāntā''nandapravāhāśca hyātmānandapravāhakaiḥ |
militāḥ kāmakārāśca pravāhā līnato yayuḥ || 98 ||
[Analyze grammar]

brahmānandapravāhe vai kāmānandaḥ kiṃmānakaḥ |
koṭikoṭiprakoṭīnāṃ patīnāṃ sukhade'kṣaye || 99 ||
[Analyze grammar]

bālakṛṣṇāṃgayogotthe ko'yaṃ kāmo hi kaccaraḥ |
kāme kāmatvanikṣeptā svayaṃ patirhi rāsane || 100 ||
[Analyze grammar]

ramate svapriyābhirhi sarvakāmasukhapradaḥ |
tanmūrteḥ saṃgame rādhe mūrdhāṃ yayurhi yoṣitaḥ || 101 ||
[Analyze grammar]

rāsabhramaṇamutsṛjya śayanaṃ tena cakrire |
kṛtvā svoraḥsu kāntaṃ svaṃ mahānandaṃ prapedire || 102 ||
[Analyze grammar]

yugadīrghaṃ sukhaṃ prāpya vinirvṛttiṃ yayuḥ striyaḥ |
vimūrchāśca nijaṃ kāntaṃ samutthāpya ca rāsane || 103 ||
[Analyze grammar]

punarvai bhrāmaṇaṃ cakrustāvaccandro'bdhimāpa ha |
bālakṛṣṇo muralīṃ svāṃ vyanādayanmuhurmuhuḥ || 104 ||
[Analyze grammar]

kṛkavākuprabodhāṃ tāṃ śrutvā prātaḥ prabodhinīm |
sarvāḥ patnyaḥ samaṃ veṣaṃ śṛṃgāraṃ saṃvidhāya ca || 105 ||
[Analyze grammar]

śīghraṃ kāntaṃ samāśliṣya tathā''jñāṃ prāpya satvaram |
prātaḥkṛtyavidhānārthaṃ prayayustāvadeva tāḥ || 106 ||
[Analyze grammar]

sarvaṃ tanmaṇḍalaṃ divyaṃ taijasaṃ saṃvyalīyata |
aśvapaṭṭasarastatrā'dṛśyatā''mravaṇaṃ punaḥ || 107 ||
[Analyze grammar]

ākṣarī pṛthivī bhūmiścāśramo lomaśasya saḥ |
rāso'yaṃ rāsakhelānāṃ cihnāni ramaṇānyapi || 108 ||
[Analyze grammar]

vyalīyantecchayā tasya pareśasya hi rādhike |
sarvāḥ snātvā sarasyeva kṛtvā nityavidhiṃ tataḥ || 109 ||
[Analyze grammar]

yayurnijān samāvāsān bālakṛṣṇo gṛhaṃ yayau |
rādhike'haṃ tadā rādhāṃ draṣṭuṃ tatra hyupāgataḥ || 110 ||
[Analyze grammar]

kīdṛśī ramate rādhā cā'dṛśyaścā'bhavaṃ tadā |
tvayā prasāditaḥ kānto bālakṛṣṇo manoharaḥ || 111 ||
[Analyze grammar]

paśyā''lasyaṃ kiyat prāptaṃ ramaṇena samutthitam |
paśya svahṛdaye kāntaṃ ramantaṃ tadyathāsthitam || 112 ||
[Analyze grammar]

sphurantaṃ paśya gopi tvaṃ cā'vismṛtaṃ pareśvaram |
tasyānandottamalābhāt pūrṇakāmā'si rādhike || 113 ||
[Analyze grammar]

iti śrīlakṣmīnārāyaṇīyasaṃhitāyāṃ dvitīye tretāsantāne āśvinaśaratpūrṇimārātrau sarvanijapatnībhirbālakṛṣṇasya rāsānandaramaṇakrīḍāvarṇananāmā trayastriṃśadadhikadvi |
śatatamo'dhyāyaḥ || 233 ||
[Analyze grammar]

Other print editions:

Also see the following print editions of the Sanskrit text or (alternative) English translations of the Lakshminarayana Samhita Chapter 233

Cover of edition (2011)

Shri Lakshmi Narayana Samhita
by Chowkhamba Sanskrit Series Office (2011)

शेतायनव्यास (Shwetayan Vyas)

Buy now!
Like what you read? Consider supporting this website: