Chapter 230

śrīkṛṣṇa uvāca |
rādhike yajñabhūmau ca yāni tīrthāni cāvasan |
tānyāha śrībālakṛṣṇaścāmrajānīsarittaṭe || 1 ||
[Analyze grammar]

yatra nārāyaṇaścāsmi yajñakartā pareśvaraḥ |
sā bhūmistvakṣaratulyā divyā divyagatipradā || 2 ||
[Analyze grammar]

āmrajānīnadī divyā svargaṃgā badarīsutā |
āmrajānyapsarā divyā nareṇa nijaśaktitaḥ || 3 ||
[Analyze grammar]

āmramañjarikābhiśca pramṛdyotpāditā purā |
tapaścaryāpravighnārthaṃ purā mahendra āyayau || 4 ||
[Analyze grammar]

bahvapsarobhiḥ sahito badaryāṃ śrīhareḥ puraḥ |
nārāyaṇena tāḥ sarvā nṛtyantyaścendradeśitāḥ || 5 ||
[Analyze grammar]

vilokitāstatastāsāṃ garvabhaṃgāya vai mayā |
badaryāṃ ca naradvārā hyurvaśī prakaṭīkṛtā || 6 ||
[Analyze grammar]

tasyāstu sannidhau sarvāstadā śyāmā ivā'bhavan |
rūpagarvaṃ vihāyaiva tatra kṣamāmayācire || 7 ||
[Analyze grammar]

tadā mayā tu tāḥ sarvā mantreṇa vaiṣṇavīkṛtāḥ |
āmrajānīṃ yayāce vai mahendro rūpasundarīm || 8 ||
[Analyze grammar]

sā mayā tu mahendrāyā'rpitā tvekasvarūpiṇī |
dvitīyā brahmacaryasthā matputrī mama sannidhau || 9 ||
[Analyze grammar]

badaryāṃ sā vasatyeva sā'tra jalasvarūpiṇī |
pārākarṣitapaścaryāphaladānārthamāgatā || 10 ||
[Analyze grammar]

pārāko nāma rājarṣiḥ pitṝṇāṃ muktaye'tra vai |
tapaścacāra paramaṃ varṣāṇāṃ tu sahasrakam || 11 ||
[Analyze grammar]

pūrvajānāṃ pratṛptyarthaṃ jalārthaṃ so'pyakalpayat |
māṃ dhyāyan jalalābhārthaṃ tīrthaṃ śreṣṭhamayācata || 12 ||
[Analyze grammar]

mama mūrtiṃ pratuṣṭāva dhyānamagno'tibhāvataḥ |
mayā hṛdā prasannena smṛtā putrī madāśrayā || 13 ||
[Analyze grammar]

seyaṃ jalasvarūpā'bhūt putrī mamā''jñayā tadā |
saptadhārāsvarūpā sā bhūtvā brāhmīlabhūtale || 14 ||
[Analyze grammar]

pravāheṇa gatā yatra yatra pitara āsate |
tatra tatra kṛtasteṣāṃ mokṣo yayuśca te'kṣaram || 15 ||
[Analyze grammar]

seyaṃ cā'mrajanī divyā mokṣadā vartate nadī |
tasyā rūpāṇi saptā'tra āmrajānī varīyasī || 16 ||
[Analyze grammar]

rākāntikāsanā cāpi dvitīyā sā prakīrtitā |
gonikaṣā tṛtīyā ca goyājñī ca caturthikā || 17 ||
[Analyze grammar]

mādvārikā pañcamī ca ṣaṣṭhī sā puruṣā matā |
mānāsanā saptamī ca sarvā mokṣapradā hi tāḥ || 18 ||
[Analyze grammar]

śāntārāmā purī ceyaṃ pāreśvaraṃ ca pattanam |
āmrajānīsamudrasaṃgamaśca mokṣadaḥ sadā || 19 ||
[Analyze grammar]

mahāpāpātipāpānāṃ kṣālakaḥ saṃgamo hyayam |
atra bhūmau tu yajñānāṃ tīrthānāṃ bhūbhṛtāṃ tathā || 20 ||
[Analyze grammar]

mervādīnāṃ ca sarasāṃ nadīnāṃ vāsa eva ca |
mayā saṃkalpitastasmāt tīrthānyatra vasantu vai || 21 ||
[Analyze grammar]

āmrajānyāṃ ṣaḍanyāsāṃ nadīnāṃ saṃgameṣviha |
muktāstathā'vatārāśceśvarā devā vasantvapi || 22 ||
[Analyze grammar]

devyaśca śaktayaścāpi sāgarāḥ saritastathā |
sarvatīrthanivāso'tra bhavatviti nideśanam || 23 ||
[Analyze grammar]

bālakṛṣṇasthalī śāntārāmapāreśvarāntare |
sarvatīrthanivāsā vai pāvanyakṣarasannibhā || 24 ||
[Analyze grammar]

goyājanyā gavākṣāyā madhye pṛthivī yāvatī |
triśatakrośaparyantā sarvā mokṣapradā śubhā || 25 ||
[Analyze grammar]

atra snānena muktiḥ syād vāpyāṃ kūpe taḍāgake |
nadīnāṃ jalapānena mama dhāma vrajejjanaḥ || 26 ||
[Analyze grammar]

svalpānnadānakaraṇād yajñajaṃ phalamāpnuyāt |
godānāt svarṇadānācca svargaṃ labhenna saṃśayaḥ || 27 ||
[Analyze grammar]

kanyādānaṃ bhuvo dānaṃ vastradānaṃ gavārpaṇam |
bhūṣādānaṃ cānnadānaṃ pātradānaṃ kariṣyati || 28 ||
[Analyze grammar]

atra bhūmau tasya rājasūyaphalaṃ bhaviṣyati |
oṣadhānāṃ pradānaṃ ca vidyādānaṃ jalārpaṇam || 29 ||
[Analyze grammar]

rasadānaṃ chatradānaṃ copakaraṇadānakam |
gṛhadānaṃ vāhanānāṃ dānaṃ jñānapradānakam || 30 ||
[Analyze grammar]

yaḥ kariṣyati tasyā'tra sarvayajñaphalaṃ bhavet |
vṛkṣāropaṃ phaladānaṃ dharmaśālāṃ ca vedikām || 31 ||
[Analyze grammar]

gṛhaṃ saudhaṃ nadīghaṭṭaṃ kārayiṣyati yo janaḥ |
tasya svargaṃ bhaved dhrauvyaṃ tvante mokṣo bhavedapi || 32 ||
[Analyze grammar]

śubhe kāle śubhe pātre dattaṃ cātrā'kṣayaṃ bhavet |
śayyādānaṃ bṛsīdānaṃ corṇāmbarapradānakam || 33 ||
[Analyze grammar]

dāsyatyatra bhavettasya svargaṃ ceha samṛddhayaḥ |
vividhā rājabhogāśca vaṃśavistārasampadaḥ || 34 ||
[Analyze grammar]

atra tīrthaṃ tu ye lokāḥ saptasaritsu yatra vā |
kariṣyanti jalapānaṃ snānaṃ caiṣyanti te divam || 35 ||
[Analyze grammar]

ityuktvā śrīharistatra rādhike virarāma ha |
īśvarādyā nijāvāsaṃ cakrustīrthasvarūpiṇaḥ || 36 ||
[Analyze grammar]

saptanadyaḥ samāyātāḥ kanyakāstatra vai kṣaṇe |
candanādyaiḥ svapitaraṃ bālakṛṣṇaṃ pareśvaram || 37 ||
[Analyze grammar]

pupūjuḥ pādayornatvā prāhurvasā'tra sarvadā |
haristathā'stviti prāha mūrtirūpaḥ svayaṃprabhuḥ || 38 ||
[Analyze grammar]

tata ārabhya tatraiva mandireṣvavasat sadā |
rājabhyaśca dadau svarṇamūrtīḥ śrīhariracyutaḥ || 39 ||
[Analyze grammar]

kanyakāstā yayustīrtharūpiṇyo vai nijālayān |
rājāno'pi tataścakrurmandirāṇi sarittaṭe || 40 ||
[Analyze grammar]

suvarṇamūrtīsteṣu prātiṣṭhipan vidhinā nṛpāḥ |
evaṃ vai rādhike śrīmadbālakṛṣṇaḥ pareśvaraḥ || 41 ||
[Analyze grammar]

upādiśyā'tha pradadau pāritoṣikarūpiṇaḥ |
suvarṇasthālān mahataḥ suvarṇotthakamaṇḍalūn || 42 ||
[Analyze grammar]

suvarṇahārān vividhān mukuṭān kānakāṃstathā |
svarṇasrajaḥ kuṇḍalāni śṛṃkhalāḥ kaṭakāni ca || 43 ||
[Analyze grammar]

hemaratnāni bhūṣāśca hemasūtrāmbarāṇyapi |
svarṇahīrakasadratnapātrāṇi kalaśāṃstathā || 44 ||
[Analyze grammar]

veṣān śāṭīḥ kañcukīśca kauśeyīḥ svarṇabuṭṭikāḥ |
yānavāhanadāsāṃśca dāsīśca mudrikāstathā || 45 ||
[Analyze grammar]

evaṃvidhāni pradadau sampāritoṣikāni vai |
tato dadau dhanyavādān mahīmānebhya cādhvare || 46 ||
[Analyze grammar]

yajñasāhāyyakartṝṃścāśīrbhistatrāpyayūyujat |
atra rātrau pāyasāni bhojanāni phalāni ca || 47 ||
[Analyze grammar]

akārayaddhi bhagavān sarvāṃstatra mahotsave |
nṛtyagītotsavānte ca viśaśrāma pareśvaraḥ || 48 ||
[Analyze grammar]

nidrāṃ jagrāha bhagavān prātarbubodha maṃgalaiḥ |
kṛtāhnikaḥ kṛtapūjo mātāpitṛprasevakaḥ || 49 ||
[Analyze grammar]

āsane niṣasādā'thā''yayustatra nṛpādayaḥ |
arcanaṃ śrīhareścakruḥ sannyadhuścopadāḥ puraḥ || 50 ||
[Analyze grammar]

dvādaśyāṃ ca tataḥ sarvānabhojayat prabhuḥ svayam |
miṣṭānnāni vicitrāṇi rasān peyāni yānyapi || 51 ||
[Analyze grammar]

bhakṣyabhojyānyanekāni bhojayāmāsa sarvaśaḥ |
svayaṃ sububhuje kṛṣṇastataḥ sabhāṃ cakāra ha || 52 ||
[Analyze grammar]

avabhṛthārthaṃ prayayuḥ sarve bhagavatā saha |
āsaṃstatra tu nārīṇāṃ devīnāṃ gītikā śubhāḥ || 53 ||
[Analyze grammar]

vādyānāṃ ninadāścāpi vedaghoṣāśca bhūsadām |
āmrajānyāṃ gonikaṣāsaṃgame'vabhathaṃ tadā || 54 ||
[Analyze grammar]

cakrurmukhyaṃ mahāsnānaṃ varuṇādyarcanaṃ tathā |
ye ye yatrā'bhavaṃścāpi tatra sasnuśca tatra ca || 55 ||
[Analyze grammar]

tūpaśabdā yantraśabdāḥ śatadhnīdhvanayo'bhavan |
saritsāgarasaṃyoge saritāṃ saṃgame tathā || 56 ||
[Analyze grammar]

vimānairdivyayānaiśca gatvā sasnuḥ prajājanāḥ |
īśvarāścāpi devādyā dehinaḥ sasnurityapi || 57 ||
[Analyze grammar]

tataścāyayurāvāsān śrīharyādyā vimānakaiḥ |
madhyāhnottaravelāyāṃ pitṛśrāddhāni cācaran || 58 ||
[Analyze grammar]

sarve'pi pitarastatra mūrtimantaḥ samāgatāḥ |
tṛptiṃ prāpya vimānaiśca yayuḥ svargaṃ sahasraśaḥ || 59 ||
[Analyze grammar]

atha bhojanaṃ miṣṭānnaṃ bhojayāmāsa mādhavaḥ |
sarve bubhujurmiṣṭānnaṃ punastatra sabhā'bhavat || 60 ||
[Analyze grammar]

vidāyaṃ śrīharistatra pradadau tu yathocitam |
karmaṭhebhyaḥ karmakartṛbhyaśca sahāyivargiṇe || 61 ||
[Analyze grammar]

muktebhyaśceśvarebhyaścā'vatārebhyaśca śobhanam |
īśvarāṇībhya evāpi muktānībhyastathā dadau || 62 ||
[Analyze grammar]

devībhyo devatābhyaścā''rṣībhyo munibhya ityapi |
mānavībhyo manuṣyebhyo maharṣibhyo'pi sandadau || 63 ||
[Analyze grammar]

jaḍebhyaścetanebhyaśca sarvebhyo'pi dadau hariḥ |
yathocitaṃ vidāyaṃ vai kalpayoṣidbhya ityapi || 64 ||
[Analyze grammar]

karmakartrībhya evāpi dāsadāsībhya ityapi |
pradadau svarṇahārāṃśca svarṇamudrāyathocitāḥ || 65 ||
[Analyze grammar]

āgantavyaṃ ceti punaryadā yajñe smarāmyaham |
ityevaṃ śrīhariḥ prāha tato labdhvā vidāyakam || 66 ||
[Analyze grammar]

sabhāṃ vyasarjayat paścānmahīmānāḥ pratasthire |
nijāṃllokānpradeśāṃśca grāmān sāyaṃ hi sarvaśaḥ || 67 ||
[Analyze grammar]

dvādaśyāmevamevāpi samājāḥ svagṛhān yayuḥ |
rātrau śrībhagavānāste rājabhiḥ sevitaḥ sukham || 68 ||
[Analyze grammar]

brahmapriyādibhiścāpi kuṭumbena samanvitaḥ |
nidrāṃ viśrāntirūpāṃ cāvāpa prātarbubodha ca || 69 ||
[Analyze grammar]

trayodaśyāṃ māṃgalikairvādyādyairgītibhirhariḥ |
kṛtasnānāhnikaḥ kṛṣṇo niṣasāda varāsane || 70 ||
[Analyze grammar]

īśānapānaśiṣṭaśca rājā rājñī ca kanyakāḥ |
hariṃ pūjayituṃ prātaścāyayuste tadā hareḥ || 71 ||
[Analyze grammar]

nīrājanāṃ pracakruśca pupūjuścandanādibhiḥ |
brāhmīlyaḥ kanyakāścaikacatvāriṃśannṛpasya tu || 72 ||
[Analyze grammar]

varamālāṃ hareḥ kaṇṭhe daduḥ kāntaṃ hariṃ vyadhuḥ |
rājā tvatiprasanno'bhūd yautakaṃ paramaṃ dadau || 73 ||
[Analyze grammar]

rājñī cāpi kṛtakṛtyā hyabhūt tatra mumoda ha |
yautakaṃ haraye prādāt svarṇarūpyadhanādikam || 74 ||
[Analyze grammar]

vimānaṃ cāyataṃ cāpi dāsān dāsīḥ śatā'dhikāḥ |
rājā mahotsavaṃ cakre kanyādānanimittataḥ || 75 ||
[Analyze grammar]

madhyāhne bhojanaṃ śreṣṭhaṃ dadau rājā'tibhāvataḥ |
anyebhyaścāpi sarvebhyo rājabhyo bhojanaṃ dadau || 76 ||
[Analyze grammar]

vidāyaṃ pradadau paścād rājabhyo nṛpatirmahān |
rājānaḥ prayayurnaijān deśān vimānasaṃsthitāḥ || 77 ||
[Analyze grammar]

tatra tāvat trayodaśyāṃ śrīmān rāyapatirnṛpaḥ |
rāyagirarṣisahitaḥ prārthayāmāsa keśavam || 78 ||
[Analyze grammar]

nijadeśaṃ samāgantuṃ pāvayituṃ nijāṃ purīm |
haristathā'stviti prāha viśvakarmādikāṃstataḥ || 79 ||
[Analyze grammar]

sarvayajñīyavastūnāṃ parihārārthameva ha |
maṇḍapādikadivyānāṃ samādideśa tūrṇakam || 80 ||
[Analyze grammar]

śīghraṃ sāyaṃ viśvakarmā tirobhāvayadeva tat |
atha sajjo'bhavat kṛṣṇaḥ kuṭumbādyairyutastadā || 81 ||
[Analyze grammar]

śaṃkarādyaiḥ pārṣadaiśca tathā sarvamaharṣibhiḥ |
tāvad rājā sainyayukto vidāye mānane hareḥ || 82 ||
[Analyze grammar]

avādayattadā ramyavāditrāṇi muhurmuhuḥ |
hariḥ sammānamādāya puṣpahārān śubhān śubhān || 83 ||
[Analyze grammar]

brāhmīlībhiścākṣatādyairvardhitaḥ pūjito hariḥ |
jayaśabdaiḥ śrāvitaścā''ruroha svavimānakam || 84 ||
[Analyze grammar]

kuṭumbena saha kṛṣṇo maharṣiśaṃkarādibhiḥ |
vimānago'bhavaccātha prasasārāmbare'gragam || 85 ||
[Analyze grammar]

vidāyayantraśabdāścā'bhavaṃścāti nṛpājñayā |
rājārāyapatiścāgre vimānena yayau drutam || 86 ||
[Analyze grammar]

svāgatārthaṃ harestatra sainyaṃ prāsajjayad drutam |
ārṣajatanurāṣṭre sve parīnāsaritastaṭe || 87 ||
[Analyze grammar]

vyenojarāśāpuryāṃ vai mahodyāne viśālake |
sammānārthaṃ sainyayutastasthau rājā samālikaḥ || 88 ||
[Analyze grammar]

tāvadākāśamārgādvai vimānaṃ śobhanaṃ tadā |
sūryavaccā''gataṃ śīghraṃ dyotayan vidiśo diśaḥ || 89 ||
[Analyze grammar]

tadā vādyānyavādyanta jayaśabdāstathā'bhavan |
paryaḥ samantato vīkṣaṇārthaṃ dudruvurādarāt || 90 ||
[Analyze grammar]

rājadarśitamārgeṇa vimānaṃ śrīharirbhuvi |
udyānamadhye bhūbhāge'vātārayacchannaiḥ śanaiḥ |
harirvimānataḥ śīghraṃ tvagrabhāge bahiryayau || 91 ||
[Analyze grammar]

janānāṃ puṣpavṛṣṭirvai vimānopari cābhavat |
akṣatādyairvardhitaśca prajābhiḥ parameśvaraḥ || 92 ||
[Analyze grammar]

rājā svarṇasrajaḥ kaṇṭhe kṛṣṇasyā'dhānnanāma ca |
tadā rājñī puṣpamālāṃ kṛṣṇakaṇṭhe nyadhānmudā || 93 ||
[Analyze grammar]

kumārāśca kumāryaścandanādyairarhaṇāṃ vyadhuḥ |
siṃhāsane niṣasāda haristatra kṣaṇaṃ tataḥ || 94 ||
[Analyze grammar]

datvā svadarśanaṃ siṃhāsanāttūtthāya catvare |
āyayau nṛpatistaṃ sugaje śṛṃgārite mudā || 95 ||
[Analyze grammar]

kuṭumbaṃ śrīhareścāpi nyaṣādayad gajādiṣu |
śakaṭīṣu ca vāheṣu yathāyogyaṃ ca yoṣitaḥ || 96 ||
[Analyze grammar]

śibikāsu tathā divyagantrīṣu ca nyaṣādayat |
atha vādyādininadairgītibhiśca suvardhitaḥ || 97 ||
[Analyze grammar]

harṣanādairjayaśabdaistathā gāyanakīrtanaiḥ |
vyenojarāśāpuryāṃ śrīhariḥ saṃbhrāmito'bhitaḥ || 98 ||
[Analyze grammar]

gopurāgre ca rājanyairnagaryāṃ ca pradhānakaiḥ |
catvareṣu prajābhiśca haṭṭāgre dhanikaiḥ prabhuḥ || 99 ||
[Analyze grammar]

pūjitaścāpi rathyāgre yoṣidbhiḥ kṛṣṇavallabhaḥ |
svarṇamudrādidānaiśca nārikelaphalādibhiḥ || 100 ||
[Analyze grammar]

vastrapātravibhūṣābhiścandanā'kṣatavāribhiḥ |
vardhitaścābhitaḥ puryāṃ bhramitvā sainyaśobhitaḥ || 101 ||
[Analyze grammar]

samāyayau śubhāvāsaṃ rājasaudhaṃ haristataḥ |
jalapānaṃ vidhāyaiva viśrāntimāpa dharmapaḥ || 102 ||
[Analyze grammar]

gṛhītvā bhojanaṃ rātrau nidrāṃ jagrāha keśavaḥ |
brahmapriyādibhiḥ saṃsevitaḥ kṛṣṇanarāyaṇaḥ || 103 ||
[Analyze grammar]

iti śrīlakṣmīnārāyaṇīyasaṃhitāyāṃ dvitīye tretāsantāne āmrajānyādisaptasaritsu devatīrthānāṃ vāso māhātmyamavabhṛtham pāritoṣikam rātriyāpanaṃ prātarvidāyaṃ mahīmānamaṇḍapādiparihārastato rājārāyapatirāṣṭragamanaṃ vyenojarāśāpuryāṃ bhramaṇaṃ bhojanaṃ rātrau śayanaṃ cetyādinirūpaṇanāmā triṃśadadhikadviśatatamo'dhyāyaḥ || 230 ||
[Analyze grammar]