Chapter 228

śrīkṛṣṇa uvāca |
rādhike saptamīprātarmuhūrte cottame punaḥ |
makhakāryaṃ lomaśādyaiḥ kṛtaṃ pūrvadine yathā || 1 ||
[Analyze grammar]

prokṣaṇaṃ svastivāgādi puṇyāhavacanaṃ tathā |
devānāṃ samprabodhaśca pūjanaṃ ca vidhānataḥ || 2 ||
[Analyze grammar]

ārārtrikaṃ balerdānaṃ mahānaivedyakāni ca |
jalārpaṇaṃ tathā tāmbūlārpaṇaṃ pitṛtarpaṇam || 3 ||
[Analyze grammar]

agnāvāhutayaścāpi sarveṣāṃ havyalābhanam |
ārārtrikaṃ ca devānāṃ viprāṇāṃ dakṣiṇādikam || 4 ||
[Analyze grammar]

puṣpāñjalistataḥ parihāraścetyabhavan kramāt |
evaṃ nivartite kārye rājabhiryajamānakaiḥ || 5 ||
[Analyze grammar]

śrīharerājñayā sarve mahīmānottamādayaḥ |
havyāni miṣṭabhojyāni bubhujuśca tataḥ param || 6 ||
[Analyze grammar]

lakṣāyutādyā manujā bubhujurdīnavargiṇaḥ |
atha viśrāntimāsādya sāyaṃ tatrā'bhavatsabhā || 7 ||
[Analyze grammar]

anādiśrībālakṛṣṇasvāmī nārāyaṇādhipaḥ |
prajābhyo hitakṛdvākyānyādideśa kṛpāparaḥ || 8 ||
[Analyze grammar]

yajñaścāhaṃ parabrahma vahnirmukhaṃ tu me matam |
tanmukhena haviḥ sarvaṃ grasāmi bhakṣayāmi ca || 9 ||
[Analyze grammar]

manmūrtau brahmarandhre me'kṣaraṃdhāma virājate |
keśeṣu sarvamuktā me muktānyo bhrakuṭau mama || 10 ||
[Analyze grammar]

mukhe netre gaṇḍayośca kapolayośca karṇayoḥ |
śmaśruṣu cāpyavatārāḥ sarve vasanti mastake || 11 ||
[Analyze grammar]

cibuke nāsikādaṇḍe'vatāriṇyo vasanti me |
kaṇṭhe vyūhā vāsudevādayo vasanti ceśvarāḥ || 12 ||
[Analyze grammar]

skandhe pṛṣṭhe mahāmāyā prakṛtiryā prakīrtyate |
pradhānapuruṣaḥ kālo bhūmā puruṣa ityapi || 13 ||
[Analyze grammar]

mahāviṣṇustathā rudraḥ sadāśivo virāḍapi |
sarve tvete pārśvayorme vartante kukṣisaṃśritāḥ || 14 ||
[Analyze grammar]

īśvarāṇyo mahādevyo mahālakṣmyaśca vai śriyaḥ |
sarvāstāḥ śaktayo vakṣobhāge vasanti me striyaḥ || 15 ||
[Analyze grammar]

brahmaviṣṇumaheśādyāḥ siddhāśceśvarakoṭayaḥ |
vasanti nābhibhāge me sapatnīkā mamodare || 16 ||
[Analyze grammar]

ṛṣayaḥ pitaro devā vasanti jaghane mama |
yakṣā rakṣāṃsi daityāśca dānavā guptaromasu || 17 ||
[Analyze grammar]

gupte kāmādikā devā vasanti rājasā nṛpāḥ |
nitambe bhūtakūṣmāṇḍāḥ pretapiśācakoṭayaḥ || 18 ||
[Analyze grammar]

sakthnorme mānavādyāśca jānvorme cāraṇādayaḥ |
jaṃghayorme talavāsā daityādyāḥ saṃvasanti hi || 19 ||
[Analyze grammar]

patphaṇayoḥ sarpanāgā vasanti ca sarīsṛpāḥ |
vṛkṣavallīprabhṛtayo vasanti romasu drumāḥ || 20 ||
[Analyze grammar]

kīṭapataṃgaśalabhāḥ pakṣiṇaḥ paśavastathā |
śārīrakṣaraṇasthā me vasanti paritaḥ sadā || 21 ||
[Analyze grammar]

ityevaṃ mayi sarvā vai jaḍacetanasṛṣṭayaḥ |
vasantīti mayi tṛpte tṛptāḥ sarve madātmakāḥ || 22 ||
[Analyze grammar]

viṣṇuyāge mahāyāge māṃ prapūjya pareśvaram |
madbhaktān bhojayed yastu phalaṃ tasyā'śvamedhajam || 23 ||
[Analyze grammar]

lakṣmīnārāyaṇaṃ māṃ yaḥ pūjayitvā makhe dvijān |
bhojayet sa labhedatra vājapeyakratoḥ phalam || 24 ||
[Analyze grammar]

kāṃbhareyaṃ bālakṛṣṇaṃ makhe yaḥ pūjayecca mām |
sādhūn saṃbhojayettasya rājasūyakratoḥ phalam || 25 ||
[Analyze grammar]

gopālabālaṃ govindaṃ makhe'tra pūjayettu mām |
satīḥ sādhvīrbhojayecca phalaṃ tasyātirātrajam || 26 ||
[Analyze grammar]

puruṣottamasaṃjñaṃ māṃ makhe'tra pūjayettathā |
bhojayedbālakān yaḥ sa pauṇḍarīkaphalaṃ labhet || 27 ||
[Analyze grammar]

kṛṣṇanārāyaṇaṃ māṃ yaḥ pūjayedadhvare tathā |
anāthān bhojayettasyā'gniṣṭomā'dhvarajaṃ phalam || 28 ||
[Analyze grammar]

brahmapriyāpatiṃ māṃ yo'dhvare'tra pūjayettathā |
kanyakā bhojayed yaḥ sa gavāyanaphalaṃ labhet || 29 ||
[Analyze grammar]

piśaṃgīkāntaṃ māṃ bhaktyā'dhvare'tra pūjayettu yaḥ |
brahmayatīn bhojayecca labhet somakratoḥ phalam || 30 ||
[Analyze grammar]

śrīrādhāmāṇikīnāthaṃ śrīkṛṣṇaṃ māṃ prapūjayet |
gopagopīrbhojayitvā yāyādviśvajitaḥ phalam || 31 ||
[Analyze grammar]

prabhāpāravatīnāthaṃ pūjayenmāṃ makhe tathā |
bhojayecca mahīmānān sautrāmaṇyāḥ phalaṃ labhet || 32 ||
[Analyze grammar]

gaurīnāthaṃ ca māṃ bhaktyā pūjayedadhvare'tra yaḥ |
rudrayāgaphalaṃ yāyād bhojayitvā hi karmaṭhān || 33 ||
[Analyze grammar]

amarīsvāminaṃ māṃ yaḥ pūjayedatra vai makhe |
amarīrbhojayitvā ca brahmayajñaphalaṃ labhet || 34 ||
[Analyze grammar]

brāhmīnāthaṃ ca māṃ bhaktyā makhe'tra pūjayettathā |
brāhmīḥ sādhvīrbhojayitvā mahārudraphalaṃ labhet || 35 ||
[Analyze grammar]

lākṣmaṇīsvāmina māṃ ca makhe'tra pūjayettathā |
labhennārāyaṇaphalaṃ prabhojya sāṃkhyayoginīḥ || 36 ||
[Analyze grammar]

ābriktisvāminaṃ māṃ ca makhe'tra pūjayettathā |
jalahārīrbhojayitvā jalamedhaphalaṃ labhet || 37 ||
[Analyze grammar]

uṣṇālīsvāminaṃ māṃ ca makhe'tra pūjayettathā |
pācinīrbhojayed yaḥ sa labhedannakratoḥ phalam || 38 ||
[Analyze grammar]

īśvarīsvāminaṃ māṃ ca makhe'tra pūjayettathā |
makhabhṛtyān bhojayed yaḥ sa labhenmakhajaṃ phalam || 39 ||
[Analyze grammar]

anādiśrīkṛṣṇanārāyaṇaṃ sarvāvatāriṇam |
muktapatiṃ ca duḥkhahālakṣmīkāntaṃ tu yo'dhvare || 40 ||
[Analyze grammar]

pūjayed bhojayet sarvān sarvamedhaphalaṃ labhet |
mūrtimantaṃ gocaraṃ māṃ prīṇayitvā'tra cādhvare || 41 ||
[Analyze grammar]

yadyadicchenmama bhaktastattatsarvaṃ samāpnuyāt |
dātā'haṃ sarvanātho'smi sarvaṃ dadāmi sevine || 42 ||
[Analyze grammar]

dānānyatra makhe śaktyā deyāni dharmakarmiṇe |
dānairyat sukṛtaṃ cātra tadbhavedakṣayaṃ dhruvam || 43 ||
[Analyze grammar]

yajñavidho gṛhī divyaṃ kiṃkiṇījālamaṇḍitam |
arkaprabhaṃ samāruhya vimānaṃ yāti matpadam || 44 ||
[Analyze grammar]

annānāṃ ca phalānāṃ ca dānaṃ vai samidhāṃ tathā |
oṣadhānāmambarāṇāṃ patrāṇāṃ dānamityapi || 45 ||
[Analyze grammar]

bhaved dadāno dīrghāyuḥ svargabhāṅ mokṣabhāk tataḥ |
saṃhitāpustakadānaṃ yaḥ karoti sa gacchati || 46 ||
[Analyze grammar]

svargaṃ satyaṃ ca vairāgyaṃ mokṣaṃ me cā'kṣaraṃ padam |
yadyadiṣṭatamaṃ loke yaccāpi dayitaṃ gṛhe || 47 ||
[Analyze grammar]

tattat svārthaṃ pradeyaṃ vai tadevā'kṣayamicchatā |
na dānaṃ yaśase dadyānna bhayena na lobhataḥ || 48 ||
[Analyze grammar]

paralokahitāyaiva deyaṃ pātrāya muktaye |
vidyāvate hyanāthāya cārthine śīlayogine || 49 ||
[Analyze grammar]

sādhave dīyate syādakṣayaṃ tadvai mahāphalam |
mama bhaktāḥ sarvasahā nispṛhā jitamānasāḥ || 50 ||
[Analyze grammar]

sarvabhūtahitāḥ santastebhyo dattaṃ mahāphalam |
santastuṣṭāstārayanti dātṝn sahasravaṃśajān || 51 ||
[Analyze grammar]

devālayaṃ dharmaśālāṃ sanmaṭhān kārayed dṛḍhān |
yāvatya iṣṭikāstatra citā devālayādiṣu || 52 ||
[Analyze grammar]

tāvantyabdasahasrāṇi svargeṣu modate kṛtī |
mama mandiranirmātā mama dhāmābhigacchati || 53 ||
[Analyze grammar]

pratiṣṭhayā pārameṣṭhyaṃ prāsādenaiśvaraṃ padam |
pūjāvṛttyā brahmalokaṃ prāpnuyānnātra saṃśayaḥ || 54 ||
[Analyze grammar]

sudhādibhirlepayitvā jīrṇoddhāraṃ prakārayet |
sammārjayellepayecca sevayet pratimāṃ mama || 55 ||
[Analyze grammar]

kūpavāpītaḍāgāni madarthaṃṃ kārayedapi |
gāvaḥ pibanti salilaṃ sādhavo mānavāstathā || 56 ||
[Analyze grammar]

sarvāṇi cāpi sattvāni tṛṣārtāni pibanti ca |
tīrthālaye ca tatpuṇyamaprameyaṃ hi jāyate || 57 ||
[Analyze grammar]

prāsādasyā'bhito ropaṇīyā vṛkṣā hi śākhinaḥ |
ārāmāścāpi kartavyā viśrāntyarthaṃ tu dehinām || 58 ||
[Analyze grammar]

phalopayogino vṛkṣāstathā puṣpopayoginaḥ |
samitpatropayogāśca pitṛdevopabhogadāḥ || 59 ||
[Analyze grammar]

etatatpuṇyamanantaṃ vai sarvasmṛddhipradaṃ bhavet |
bhaktiyuktaṃ kṛtaṃ tattu mama dhāmapradaṃ bhavet || 60 ||
[Analyze grammar]

gṛhasthairvā dhanāḍhyaiśca rājabhistu viśeṣataḥ |
tīrthabhūmiḥ sadā kāryā sajīvanā mahotsavaiḥ || 61 ||
[Analyze grammar]

yajñabhūmiḥ sadā puṇyā nadī puṇyā kratostaṭī |
goyājanī medinī sā sadā mokṣakarī matā || 62 ||
[Analyze grammar]

atra vāse'pi lokānāṃ yāmyānāṃ darśanaṃ na vai |
atra manurdhṛto yena vaiṣṇavastasya mokṣaṇam || 63 ||
[Analyze grammar]

mama pūjā kṛtā yena tasyāpi mokṣaṇaṃ bhavet |
patraṃ puṣpaṃ phalaṃ toyaṃ cānnaṃ yena makhe'rpitam || 64 ||
[Analyze grammar]

tasya muktiṃ kariṣyāmi nayiṣye me'kṣaraṃ padam |
aho yajña iti prājño guṇagrāhī bhavatyapi || 65 ||
[Analyze grammar]

tasya pāpābdhimevā'haṃ jvālayiṣyāmi keśavaḥ |
yajñe dhṛtaṃ ca vastraṃ ca pātraṃ pāyasamityapi || 66 ||
[Analyze grammar]

yaḥ pradāsyati bhaktyā taṃ nayiṣye me'kṣaraṃ padam |
godānaṃ pṛthivīdānaṃ gṛhadānaṃ vidhāsyati || 67 ||
[Analyze grammar]

kanyādānaṃ putradānaṃ kumāradānamityapi |
svarṇadānaṃ rūpyadānaṃ yānavāhanadānakam || 68 ||
[Analyze grammar]

vāṭikodyānadānaṃ ca chatradānaṃ gajārpaṇam |
yaḥ kariṣyati yajñe'tra taṃ nayiṣye'kṣaraṃ padam || 69 ||
[Analyze grammar]

ātmārpaṇaṃ tathā brahmārpaṇaṃ ca gurave'rpaṇam |
sadbhyo'rpaṇaṃ ca yatkiñcid yathāśakti makhe'tra vai || 70 ||
[Analyze grammar]

yaḥ kariṣyati bhaktātmā dāsye'smai cākṣaraṃ padam |
evamuktvā tato rādhe'nādiśrībālakṛṣṇakaḥ || 71 ||
[Analyze grammar]

mantrān dadau manuṣyebhyo makhibhyastatra vaiṣṇavān |
tataḥ sandhyāṃ hariścakre devārārtrikamācarat || 72 ||
[Analyze grammar]

īśānapānaśiṣṭādyā rājādyāḥ śrīharerapi |
ārārtrikaṃ pracakruśca pūjāṃ pūṣpāñjalīn dadau || 73 ||
[Analyze grammar]

prajāśca bhojayāmāsurmahīmānān samāgatān |
yajñīyān karmaṭhān devān sarvāśca dehino'pi ca || 74 ||
[Analyze grammar]

āgantukān kautūhalānnirīkṣakān janānapi |
āgatān vigatāṃścāpi bhojanāni janādayaḥ || 75 ||
[Analyze grammar]

kārayāmāsuratyarthaṃ hareḥ kuṭumbakāni ca |
miṣṭānnādyairvicitraiśca tattatsṛṣṭyucitairapi || 76 ||
[Analyze grammar]

sarvasṛṣṭinivāsāṃśca bhojayāmāsurīśvarāḥ |
jalapānāni miṣṭāni tāmbūlāni dadustataḥ || 77 ||
[Analyze grammar]

rātrāvāsan kathāśrāvāḥ pradarśanāni vai tataḥ |
nidrārāmāstataścāsan sarve vai dehino niśi || 78 ||
[Analyze grammar]

yathocitaṃ virāmasthāḥ prātarjajāgarurdrutam |
maṃgalairvādyaghoṣaiśca gītibhirdevayoṣitām || 79 ||
[Analyze grammar]

sūtamāgadhabandīnāṃ yaśogānaiḥ samantataḥ |
aṣṭamyāṃ rādhike prātarjajāgāra hariḥ svayam || 80 ||
[Analyze grammar]

kṛtāhnikaḥ kṛtapūjaḥ pitarau svau pupūja ha |
brahmapriyādyāḥ sarvāśca hariṃ pupūjurīśvaram || 81 ||
[Analyze grammar]

śrīharirlomaśaṃ natvā jagrāhāśīrvacastataḥ |
rājāno rājabhṛtyāśca rājñyaḥ kṛṣṇaṃ pareśvaram || 82 ||
[Analyze grammar]

pupūjuścandanādyaiśca papuśca caraṇāmṛtam |
tato muhūrtasadbhāve śrutvā vādyadhvaniṃ śubham || 83 ||
[Analyze grammar]

hariryajñasthale bhaktaiḥ sameto maṇḍape yayau |
kṛtaśuddhirhariścāpi rājānaḥ karmaṭhāstathā |
aparā devakoṭyaśceśvarāvatārakoṭayaḥ || 84 ||
[Analyze grammar]

mānavāḥ ṛṣayo devāḥ pitaraḥ sthāvarāstathā |
jaṃgamā naranāryaśca maṇḍape tūrṇamāyayuḥ || 85 ||
[Analyze grammar]

sāmagryo havyarūpiṇyo havyavāhāśca vahnayaḥ |
havyadā yajamānāśca yajñe tatra samāyayuḥ || 86 ||
[Analyze grammar]

viprāḥ karmaprayoktāro vedāḥ svarāśca gītayaḥ |
kāśyapyaśca prajāḥ sarvā maṇḍape tatra cāyayuḥ || 87 ||
[Analyze grammar]

prokṣaṇaṃ svastivācaśca puṇyāhavacanānyapi |
abhavan devatānāṃ prābodhanaṃ ca samantrakam || 88 ||
[Analyze grammar]

snānaṃ prapūjanaṃ patrapuṣpākṣatādivastubhiḥ |
sarvopacāraiḥ subhagairdhūpadīpādibhistathā || 89 ||
[Analyze grammar]

ārārtrikaṃ ca naivedyaṃ jalapānaṃ tathā tadā |
tāmbūlādipradānaṃ ca mahā''hutipradānakam || 90 ||
[Analyze grammar]

pūrvato'pyadhikaṃ jātaṃ havyadānaṃ tadā'nale |
carordānaṃ pāyasādipradānaṃ ca phalārpaṇam || 91 ||
[Analyze grammar]

evaṃ yāvatpradehibhya āhutayaḥ samarpitāḥ |
tṛpyuttaraṃ ca pitṝṇāṃ tarpaṇaṃ cābhavad bahu || 92 ||
[Analyze grammar]

devīnāṃ mātṛkāṇāṃ ceśvarīṇāṃ tarpaṇaṃ tathā |
śaktināṃ vāminīnāṃ ca śrāddhaṃ ca tarpaṇaṃ hyabhūt || 93 ||
[Analyze grammar]

sṛṣṭitrayaṃ prataptaṃ ca parihāraṃ kratostataḥ |
cakāra śrīhariḥ paścād bhojanānyabhavaṃstadā || 94 ||
[Analyze grammar]

madhyāhnottaravelāyāṃ sarve bubhujire janāḥ |
miṣṭānnāni vicitrāṇi sudhā'mṛtāni yāni ca || 95 ||
[Analyze grammar]

divyān rasāṃstathā divyapīyūṣāṇi śubhāni ca |
brahmarasān dhāmarasān siddharasān parottamān || 96 ||
[Analyze grammar]

papurbubhujire devāḥ sṛṣṭitrayanivāsinaḥ |
tṛptā bhojanamāsādya jalapānaṃ tataḥ param || 97 ||
[Analyze grammar]

takrapānaṃ pracakruśca phalādanaṃ ca tatparam |
tāmbūlagrahaṇaṃ kṛtvā viśaśramurnivāsake || 98 ||
[Analyze grammar]

tataḥ sāyaṃ bālakṛṣṇaḥ sabhāyāṃ vai samāyayau |
prajābhyo rādhike naijaṃ copadeśaṃ dadau hariḥ || 99 ||
[Analyze grammar]

iti śrīlakṣmīnārāyaṇīyasaṃhitāyāṃ dvitīye tretāsantāne saptamyāṃ prātarmakhakāryāṇi nirvartya śrīhariṇā kṛtaṃ svasya sarvātmakatvādyupadeśanaṃ bhojanaṃ rātrāvutsavaḥ tataḥ |
prātaraṣṭamyāṃ makhakāryavinirvartanaṃ bhojanama cetyādinirūpaṇanāmā'ṣṭāviṃśatyadhikadviśatatamo'dhyāyaḥ || 228 ||
[Analyze grammar]