Chapter 222

śrīkṛṣṇa uvāca |
rādhike śrībālakṛṣṇaścopādideśa tatprajāḥ |
prātareva nṛpasaudhe viśāle hitakṛtprabhuḥ || 1 ||
[Analyze grammar]

rāyasomananṛpatiḥ śuśrāva sakuṭumbakaḥ |
narā nāryaḥ pradhānādyāḥ sahasraśo'pi śuśruvuḥ || 2 ||
[Analyze grammar]

harau tyāgaḥ sadā kāryaḥ pravṛtteḥ karmaṇāṃ tathā |
evaṃ tyāgī tu nairguṇyaṃ vindati mokṣasādhanam || 3 ||
[Analyze grammar]

tyāge yasya hutaṃ karma na tasya phaladaṃ bhavet |
nirbandhān samparityajya rāgahīno bhavet sadā || 4 ||
[Analyze grammar]

aśokaṃ māṃ parabrahmā''tiṣṭhed yena mahatsukham |
ajitaṃ tu jayet prājño manaḥ saṃgeṣvasaṃgataḥ || 5 ||
[Analyze grammar]

indriyairgṛhyate yat tat tyājyaṃ grāhyaṃ na bhāvataḥ |
mano nigṛhya vai prāṇān dhārayet paramātmani || 6 ||
[Analyze grammar]

evaṃ dhāraṇayā syādvai nirvāṇaṃ śāśvataṃ sukham |
sukhaṃ vai brahmaṇaḥ prāpyaṃ brahmārpaṇena sarvathā || 7 ||
[Analyze grammar]

satyaṃ brahma sadā grāhyaṃ cānṛtaṃ heyameva ca |
anṛtaṃ tu tamaḥ proktamāndhyapradaṃ ca gartadam || 8 ||
[Analyze grammar]

vāsanārajjuyuktasya garte patanamāsthitam |
avāsanasya tṛptasya prakāśo dhāmadaḥ smṛtaḥ || 9 ||
[Analyze grammar]

prakāśaṃ tu samālambya yateta duḥkhahānaye |
tamonāśāya satataṃ satāṃ samāgamādibhiḥ || 10 ||
[Analyze grammar]

śārīrairmānasairvāpi duḥkhairnodvijate tu yaḥ |
mama saṃgī sukhaṃ vetti sa eva mama mārgagaḥ || 11 ||
[Analyze grammar]

yatra duḥkhaṃ sa nirayaḥ sukhaṃ tu paramaṃ padam |
tyaktaduḥkhasamārambhaḥ svargastasya na durlabhaḥ || 12 ||
[Analyze grammar]

brahmavratena doṣāṃśca dagdhvā jayetparaṃ padam |
muktyāśramaṃ yaścarate muktabuddhirharipriyaḥ || 13 ||
[Analyze grammar]

sarvaṃ hutvā harau brahmalokaṃ janaḥ sa vindati |
santaḥ sevyā brahmabhaktā brahmāptistena jāyate || 14 ||
[Analyze grammar]

ācāraniratāḥ santo mama bhaktiparāyaṇāḥ |
pālyaḥ sadā śubhācāro gṛhasthairapi bhūtaye || 15 ||
[Analyze grammar]

śaucamāvaśyakaṃ kāryaṃ devānāṃ pūjanaṃ tathā |
pitṝṇāṃ tarpaṇaṃ cāpi vṛddhānāṃ mānanaṃ tathā || 16 ||
[Analyze grammar]

sūryaṃ sadopatiṣṭheta sandhyākāle hariṃ smaret |
śuciḥ kuryād bhojanaṃ ca na nindyānmānavādikān || 17 ||
[Analyze grammar]

devālayaṃ guruṃ sādhuṃ sādhvīṃ vṛṣaṃ catuṣpatham |
dhārmikaṃ divyapuruṣaṃ nityaṃ kuryāt pradakṣiṇam || 18 ||
[Analyze grammar]

atithīnāṃ ca bhṛtyānāṃ rakṣaṇaṃ bhojanādibhiḥ |
anāthānāṃ copakāraṃ kuryācchakto bhavedyadi || 19 ||
[Analyze grammar]

dvivāraṃ caikavāraṃ vā bhojanaṃ nā'ntarā tu tat |
evaṃ bhakṣayitā proktaścopavāsī sadā sukhī || 20 ||
[Analyze grammar]

yajñakārye pradātā ca ṛtau dānī na cānyathā |
evaṃ dānto brahmacārī sadā bhavati śobhanaḥ || 21 ||
[Analyze grammar]

amṛtaṃ devabhuktaṃ vai pathyaṃ tathā'mṛtaṃ matam |
pāṃktaṃ grāhyaṃ yasya sosti devavanmānavaḥ sukhī || 22 ||
[Analyze grammar]

santastūpāsate devaprasādaṃ cāyuṣaḥ pradam |
santaścopāsanīyā vai prasādakāmanāvatā || 23 ||
[Analyze grammar]

guroḥ sevā prakartavyā kartavyaṃ cābhivādanam |
gurūnabhyarcya yujyante hyāyuṣā yaśasā śriyā || 24 ||
[Analyze grammar]

tīrthānāṃ guravastīrthaṃ śucīnāṃ guravaḥ śuciḥ |
śiṣṭakṛtaṃ praśastaṃ tad gopucchaṃ pāvanaṃ sadā || 25 ||
[Analyze grammar]

darśane sparśane nityaṃ guruṃ sādhuṃ hi sevayet |
sādhorvai mastakaṃ keśāḥ romāṇi pāvanāni vai || 26 ||
[Analyze grammar]

satāṃ pādarajo mokṣapradaṃ pāpapraṇāśakam |
sādhūnāṃ sparśanaṃ puṇyaṃ netre puṇye sadā mate || 27 ||
[Analyze grammar]

karṇau puṇyau hi sādhūnāṃ nāsā puṇyā sugandhinī |
bhālaṃ vai tu satāṃ puṇyaṃ gaṇḍagālau hi puṇyakau || 28 ||
[Analyze grammar]

kapolau sarvathā puṇyau hāsyaṃ puṇyaṃ manoharam |
dantā jihvā tathauṣṭhau ca puṇyadāḥ pāvanāḥ satām || 29 ||
[Analyze grammar]

kaṇṭhaḥ puṇyastathā śabdo vāṇī puṇyā sarasvatī |
kathā puṇyā hi sādhūnāṃ puṇyadā saṃgatiḥ satām || 30 ||
[Analyze grammar]

skandhau puṇyau bāhuhastau puṇyau karāṃgulidhrajāḥ |
nakhāḥ puṇyāśca rekhāśca prakoṣṭhaḥ puṇyadastathā || 31 ||
[Analyze grammar]

kaphoṇikā tathā cipīṭikā puṇyā satāṃ sadā |
hastatale sadā puṇyaprade vakṣaśca puṇyakṛt || 32 ||
[Analyze grammar]

stanacihno sadā puṇyau nābhiḥ puṇyā ca pāvanī |
udaraṃ puṇyakṛccāpi kaṭiḥ puṇyatamā satām || 33 ||
[Analyze grammar]

guptaṃ supāvanaṃ cāpi jaghanaṃ pāvanaṃ sadā |
nitambau pāvanau cāpi sakthinī pāvane tathā || 34 ||
[Analyze grammar]

indriyāṇi pāvanāni jānū ca pāvanau sadā |
jaṃghe pāvanakāriṇyau ghūṭike pāvane tathā || 35 ||
[Analyze grammar]

pattale caraṇau cāṃgulikā nakhāśca pāvanāḥ |
tvaṅmāṃsaṃ rudhiraṃ divyaṃ divyaṃ tathā'sthimaṇḍalam || 36 ||
[Analyze grammar]

majjā medo rasaścāpi pāvanā dhātavaḥ satām |
śrīhareriva sādhūnāṃ sarve pāvanakārakam || 37 ||
[Analyze grammar]

trividhā bhagavatputrāḥ pāvanā bhagavāniva |
santo vai bhagavatputrā dīkṣitāśca gṛhāśramāḥ || 38 ||
[Analyze grammar]

vaṃśodbhavāstathā putrāstrayaste pāvanottamāḥ |
bhagavadbhaktisampannāsturyāste pāvanā api || 39 ||
[Analyze grammar]

dīkṣayā karmaṇā bhaktyā jñānena ca samanvitāḥ |
santaḥ śrīharitulyāste pāvanā jagatāṃ matāḥ || 40 ||
[Analyze grammar]

tatprasādaḥ pāpahartā tajjalaṃ gāṃgato'dhikam |
tatsevā pāpahā sarvā brahmārpaṇaṃ tadarpaṇam || 41 ||
[Analyze grammar]

sādhavo yaṃ tu vṛkṣādi spṛśanti taravo'pi te |
divyā mokṣapradā loke jāyante pāpanāśakāḥ || 42 ||
[Analyze grammar]

yadvastraṃ dhāryate sadbhiḥ kārpāsaṃ vaurṇameva vā |
kauśeyaṃ drutvaksvarūpaṃ divyaṃ tatpāvanaṃ sadā || 43 ||
[Analyze grammar]

paśuḥ pakṣī jano vā'nyaḥ sādhunā spṛṣṭa eva yaḥ |
sa vai divyo bhavatyāśu bhūtapiṇḍo'pyalaukikaḥ || 44 ||
[Analyze grammar]

aśuddhaṃ jāyate śuddhaṃ sādhusparśena pāvanam |
pāpaṃ pāpataraṃ vāpi sādhusparśād viśuddhyati || 45 ||
[Analyze grammar]

sādhunā yad dhṛtaṃ dehe tacchuddhaṃ nātra saṃśayaḥ |
jalaṃ tīrthaṃ bhavatyāśu sādhunā sevituṃ tu yat || 46 ||
[Analyze grammar]

pṛthvī satā sevitā ca tīrthībhūtā bhavatyati |
patraṃ puṣpaṃ phalaṃ toyaṃ dhāryaṃ bhakṣyaṃ ca vā'param || 47 ||
[Analyze grammar]

yadyat sādhuprasaṃgaṃ vai prāptaṃ śuddhaṃ hi tanmatam |
sādhusevī sadā śuddhaḥ sādhvī divyā harestanūḥ || 48 ||
[Analyze grammar]

vāhanaṃ cāsanaṃ vācyaṃ śuddhaṃ sādhuprasevitam |
sāyaṃ prātaśca sādhūnāṃ pūjanaṃ svargamokṣadam || 49 ||
[Analyze grammar]

sādhusevā paro dharmaḥ sādhusevā dhanaṃ param |
sādhusevā paraḥ kāmo mokṣo'pi sādhusevanāt || 50 ||
[Analyze grammar]

hṛdayaṃ sādhuvṛttānāṃ sādhutāṃ yāti sarvathā |
sañcitaṃ sādhutādravyaṃ pade dhāmni sahāyadam || 51 ||
[Analyze grammar]

sādhutā sarvabhūtānāṃ śāntidā kṣemavāhinī |
arjayet sādhutāṃ tasmād dhāmamārge sahāyinīm || 52 ||
[Analyze grammar]

devarṣipitṝṇāṃ yoniḥ sādhutā brahmasevinām |
muktānāṃ sādhutā yonistāṃ seveta sadā budhaḥ || 53 ||
[Analyze grammar]

maraṇaṃ dhruvamevā'sti kṛtaṃ bhuktaṃ gataṃ tu tat |
nūtanaṃ nārjitaṃ puṇyaṃ bhaviṣyati kimatsyasi || 54 ||
[Analyze grammar]

ityevaṃ samvicāryaiva puṇyapradā hi sādhavaḥ |
sevanīyā hi satataṃ pitaro devatāstathā || 55 ||
[Analyze grammar]

sevāphalaṃ mahatsvargaṃ tvagre sthāsyati niścitam |
prasannatāphalaṃ guroścāgre sthāsyati niścitam || 56 ||
[Analyze grammar]

iti nirṇīya satataṃ sevyantāṃ sādhavo'malāḥ |
bhagavanmūrtayaḥ santi sādhavaḥ supratiṣṭhitāḥ || 57 ||
[Analyze grammar]

yasmāt sṛṣṭiriyaṃ jātā yato'vatārakoṭayaḥ |
yasmādaiśvaryamāsādya jāyante ceśvarādayaḥ || 58 ||
[Analyze grammar]

ṛṣayaḥ pitaro devā yamarcayanti nityaśaḥ |
yataḥ sūryādayastejaḥpradhānāḥ saṃbhavantyapi || 59 ||
[Analyze grammar]

yato bhūtāni jāyante yasmāt hriyanta eva ca |
indriyāṇi mano buddhiryasmājjātāni santi ca || 60 ||
[Analyze grammar]

tatra sākṣī sthito devaścetano'nukriyāparaḥ |
taṃ niyamyā''ntare cāste yaḥ prabhuḥ puruṣottamaḥ || 61 ||
[Analyze grammar]

yena sarvamidaṃ vyāptaṃ vartate cāpiyāti ca |
taṃ samāśritya deveśaṃ labhate śamamuttamam || 62 ||
[Analyze grammar]

tyaktvā vai prākṛtaṃ bhāvaṃ divyabhāvamupetya yaḥ |
ātmaratirbhaved bhaktaḥ sa gacchetparamāṃ gatim || 63 ||
[Analyze grammar]

yathā vāricaraḥ pakṣī vāriṇā nahi lipyate |
kṛtaprajñastathā loke sthitaścāpi na lipyate || 64 ||
[Analyze grammar]

iṣṭadevakṛpāprāptatuṣṭisantoṣavān naraḥ |
aśocannaprahṛṣyeśca tiṣṭhate corṇanābhivat || 65 ||
[Analyze grammar]

vāsanākhyāṃ dṛḍhāṃ granthiṃ hṛdayasthāṃ nijātmanaḥ |
vicchitvā sukhamāsīta paraṃdhāma sa cāpnuyāt || 66 ||
[Analyze grammar]

malino jalamādāya yathā śuddhati cāplutaḥ |
tathā māyākaluṣo'pi śuddhiṃ yāti satāṃ grahāt || 67 ||
[Analyze grammar]

mahāraṇyasya pārajño na vai muhyati tatra vai |
tathā māyāntavijñātā na vai tattveṣu muhyati || 68 ||
[Analyze grammar]

trivargo yasya viditaḥ prekṣya bhuktvā pramuñcati |
abaddhasya nirīhasya brahmamārgaḥ prakāśate || 69 ||
[Analyze grammar]

viduṣāṃ na bhayaṃ cāsti tvajñānāṃ nirbhayaṃ na vai |
ubhayeṣāṃ hareryoge cātyantikabhayaṃ na vai || 70 ||
[Analyze grammar]

yatkāryaṃ jāyate loke'nabhisandhiprapūrvakam |
na tad bandhāya jāyeta priyaṃ vā'priyakaṃ samam || 71 ||
[Analyze grammar]

lokamāturamālokya sādhūṃścā'nāturāṃstathā |
sādhuvṛttiṃ samāśritya māṃ bhajed yastareddhi saḥ || 72 ||
[Analyze grammar]

śocato naiva paśyedvai yena śoko na naśyati |
aśocataḥ sadā paśyed yenā''pyeta satāṃ sukham || 73 ||
[Analyze grammar]

satāṃ mārgānusāreṇa ye prayānti janāstviha |
satāṃ gatiṃ labhante te prayānti paramaṃ padam || 74 ||
[Analyze grammar]

yatrā'haṃ satataṃ cā'smi virājito mahāhariḥ |
anantakoṭimuktaiḥ saṃsevito dhyāta eva ca || 75 ||
[Analyze grammar]

ityuktvā rādhike'nādikṛṣṇanārāyaṇaḥ prabhuḥ |
virarāma dadau mantrān vaiṣṇavān vai tadā svayam || 76 ||
[Analyze grammar]

rājā prajāḥ punaḥ kṛṣṇaṃ pupūjurbahuvastubhiḥ |
harirgantumiyeṣā'tha rājā dadau vidāyakam || 77 ||
[Analyze grammar]

yautakaṃ ca dadau śreṣṭhaṃ hariḥ sajjo babhūva ha |
tāvattatra samāyāto rājārāyapatirnṛpaḥ || 78 ||
[Analyze grammar]

rājagirarṣisahitaḥ prārthayituṃ prabhuṃ harim |
netuṃ svakīyabhavanam ārṣajatanurāṣṭrakam || 79 ||
[Analyze grammar]

vyenojarāśānagarīṃ parībhāsaritastaṭe |
āvāsayituṃ satataṃ bhagavantaṃ tadā''rthayat || 80 ||
[Analyze grammar]

hariḥ kṛpāvaśastasmai tathāstviti nyavedayat |
adya vai samayo nāsti gantavyaṃ tvadhare drutam || 81 ||
[Analyze grammar]

śvaḥ pañcamyāṃ bhaved yajñārambho brāhmīlarāṣṭrake |
tasmād yajñaṃ samāpyaiva trayodaśyāṃ prage nṛpa || 82 ||
[Analyze grammar]

bhavadrājye samāyāsye sāyaṃ naivātra saṃśayaḥ |
bhavanmano'nusāreṇa sthāsye tavā''laye'dhikam || 83 ||
[Analyze grammar]

bhavatā tu makhe tatrā''gantavyaṃ pañcamīprage |
ekādaśyāṃ tu madhyāhne samāptiḥ saṃbhaviṣyati || 84 ||
[Analyze grammar]

ityukto hariṇā bhūpaḥ svīcakāra harervacaḥ |
pūjayitvā yayau naijaṃ rāṣṭraṃ tūrṇaṃ vimānagaḥ || 85 ||
[Analyze grammar]

atha rājā dvitīyo'pi samāyācchrīhariṃ prati |
urugavākṣanṛpatiḥ rāyagrāmāpurīpatiḥ || 86 ||
[Analyze grammar]

urogamanarāṣṭreśaḥ prārthayatparameśvaram |
mānatrivedaṛṣirāṭ prārthayaccāpi mādhavam || 87 ||
[Analyze grammar]

mama rāṣṭraṃ prajāścāpi pāvayā''gatya keśava |
haristathā'stviti prāha sajjo vimānago'bhavat || 88 ||
[Analyze grammar]

sārthā vimānagāścāpyabhavaṃstadā prajājanāḥ |
rājādyāśca vidāye vai janā nādān samūcire || 89 ||
[Analyze grammar]

bahuvādyānyavādyanta vimānaṃ cāmbare'bhavat |
nataṃ prajājanaiḥ puṣpākṣatādyaiḥ pūjitaṃ tu khe || 90 ||
[Analyze grammar]

prasasāra tataścāgre urogamanarāṣṭrakam |
āyayau śīghrameveti rājā hyavātarat puraḥ || 91 ||
[Analyze grammar]

sammānaṃ svāgataṃ cakre rāyagrāmāpurīpatiḥ |
śṛṃgāritā'bhūnnagarī prāsādaḥ śobhito'bhavat || 92 ||
[Analyze grammar]

dhvajādyaiḥ patrakadalīstambhatoraṇasvastikaiḥ |
kalaśai raṃgavallyādyairjalasecanakaistathā || 93 ||
[Analyze grammar]

evaṃvidhāyā puryāśca sannidhau sāgarāntike |
vimānaṃ śrīharernaijaṃ saṃketenā'nayadbhuvam || 94 ||
[Analyze grammar]

tadā vādyānyavādyanta jayaśabdāstathā'bhavan |
bheryādyā nedire nārīgītayaścā'bhavan śubhāḥ || 95 ||
[Analyze grammar]

yantrīśabdā garjanāśca prajānāṃ harṣasadgiraḥ |
abhavan svāgatārthaṃ vai vimānaṃ samavardhayan || 96 ||
[Analyze grammar]

prajāḥ puṣpākṣatādyaiśca haristvagre samāyayau |
vanditaḥ pūjito rājñā rājñyā prajābhirityapi || 97 ||
[Analyze grammar]

niṣasāda śubhe svarṇāsane śrībhagavāṃstadā |
rādhike stabakān hārān harergale dadau nṛpaḥ || 98 ||
[Analyze grammar]

iti śrīlakṣmīnārāyaṇīyasaṃhitāyāṃ dvitīye tretāsantāne pātragonayarāṣṭrīyaprajābhya upadeśanaṃ vidāyaṃ tato rājārāyapatirājyam ārṣajatanurāṣṭraṃ prati gamanaprārthanāṃ svīkṛtya tata urogamanarāṣṭraṃ prati gamanaṃ sammānanamityādinirūpaṇanāmā dvāviṃśatyadhikadviśatatamo'dhyāyaḥ || 222 ||
[Analyze grammar]