Chapter 214

śrīkṛṣṇa uvāca |
śṛṇu tvaṃ rādhike trayodaśyāṃ prātaḥ kṛtāhnikaḥ |
haristvāsanamāsādya pūjāyāṃ saṃsthito'bhavat || 1 ||
[Analyze grammar]

tāvattatra samāyāto rāyanavārkabhūpatiḥ |
nijarāṣṭraṃ samānetuṃ bhagavantaṃ samārthayat || 2 ||
[Analyze grammar]

haristathā'stviti prāha sarvān sajjān samākarot |
rāyakinnarasamrājaṃ tvāhūya prāha tadvidhim || 3 ||
[Analyze grammar]

rājā sampūjya kṛṣṇaṃ taṃ vidāyaṃ pradadau tataḥ |
haristūrṇaṃ vimānaṃ svaṃ cā'varuhyā'mbare'bhavat || 4 ||
[Analyze grammar]

tadā vādyānyavādyanta vidāye pārameśvare |
rokīśvaro raṇajicca mārīśo vāyukakṣakaḥ || 5 ||
[Analyze grammar]

bāleśvaraśca lambārasta ete bhūbhatastadā |
vidāyaṃ yautakaṃ cāpi sutābhyo haraye daduḥ || 6 ||
[Analyze grammar]

sainyaiḥ sammānito vādyairgītikābhiḥ sabhājitaḥ |
vimānena yayau tūrṇaṃ sarvasārthasamanvitaḥ || 7 ||
[Analyze grammar]

rāyanavārkabhūpasya rāṣṭraṃ miśrasurābhidham |
miśrasurāsaridyoge supārīyasaro'ntike || 8 ||
[Analyze grammar]

ciñcāgopurikāpuryā udyāne copakaṇṭhage |
vāyuśṛṃgatanurnāmā ṛṣiḥ kṛṣṇena vai saha || 9 ||
[Analyze grammar]

vimāne cāgamat tatra rājā pūrvaṃ yayau tathā |
svāgatārthaṃ hareḥ samyak sainyamasajjayad drutam || 10 ||
[Analyze grammar]

tadā vādyānyavādyanta prajānādāśca harṣajāḥ |
vāditrāṇāṃ ninādāścā'bhavan digantacāriṇaḥ || 11 ||
[Analyze grammar]

kanyakāḥ pramadāścāpyagāyan sugītikāḥ śubhāḥ |
māṃgalyadravayuktāścāyayuḥ kṛṣṇasamīpagāḥ || 12 ||
[Analyze grammar]

vimānaṃ nṛpabodhyena mārgeṇā'vātarad bhuvi |
tadā'kṣatānāṃ lājānāṃ puṣpāṇāṃ varṣaṇaṃ hyabhūt || 13 ||
[Analyze grammar]

jayaśabdā jīvaśabdāḥ sarvānanebhya ābhavan |
sthirādvimānakāt kṛṣṇo bahiścāgre hyupasthitaḥ || 14 ||
[Analyze grammar]

tadā lokai rājabhiśca vardhitaḥ kanyakādibhiḥ |
prakṣālya caraṇau rājā papau vāri ca ke nyadhāt || 15 ||
[Analyze grammar]

tato dugdhaṃ dadau pānārthaṃ ca sarvebhya eva ca |
sainyena sahitaṃ kṛṣṇaṃ puryāmabhrāmayanmudā || 16 ||
[Analyze grammar]

prajāḥ pupūjuḥ premṇaiva pradhānāḥ śreṣṭhinastathā |
narā nāryo hyamaryaśca miśrasuryaśca yoṣitaḥ || 17 ||
[Analyze grammar]

dravyaiḥ puṣpairambaraiśca phalai ratnaiśca hīrakaiḥ |
vividhairmukuṭaiścāpi bhūṣābhiḥ samapūjayan || 18 ||
[Analyze grammar]

avardhayannañjalibhirhṛdayārpaṇabhāvanaiḥ |
namanaiśca yathāśaktidānaiścāpi samarhaṇaiḥ || 19 ||
[Analyze grammar]

bhramitvaivaṃ nagaryāṃ svaṃ datvā darśanamuttamam |
āyayau rājasaudhaṃ śrībālakṛṣṇo'nugānvitaḥ || 20 ||
[Analyze grammar]

rājā pupūja ratnādyaiḥ sauvarṇairhārakaistathā |
divyāmbarairdhanaiḥ śreṣṭhairdivyopadābhirādarāt || 21 ||
[Analyze grammar]

ārārtrikaṃ cakārāpi candanādyairapūjayat |
papāta pādayoścāpi kṛtārtho'smīti saṃvadan || 22 ||
[Analyze grammar]

rājñyastasya catasraśca pupūjuḥ parameśvaram |
kanyakāḥ sapta bhūpasya tadā candranibhānanāḥ || 23 ||
[Analyze grammar]

mumuhuḥ śrīpatau kānte jagṛhurmanasā patim |
varamālā dadustāśca kṛṣṇakaṇṭhe suharṣitāḥ || 24 ||
[Analyze grammar]

kṛtakṛtyāśca tā jātā rājā rājñyo'pi vai tathā |
kṛtakṛtyā abhavaṃśca bhāgyaṃ śreṣṭhaṃ hi menire |
rājotsavaṃ cakārāpi madhyāhne harṣasaṃbhṛtam || 25 ||
[Analyze grammar]

tataḥ sarvān sumiṣṭānnaṃ bhojayāmāsa bhūpatiḥ |
tāmbūlakādikaṃ datvā yautakaṃ copadāṃ dadau || 26 ||
[Analyze grammar]

harirjagrāha sarvaṃ tat tanvartuṛṣaye dadau |
yathāyogyaṃ nijayogyaṃ vimāne'sthāpayat tvapi || 27 ||
[Analyze grammar]

viśaśrāma kṣaṇaṃ paścād rājā svarlatikāpurīm |
nijāṃ gantuṃ hariṃ prāha hariḥ sajjo'bhavat kṣaṇāt || 28 ||
[Analyze grammar]

rājā pūrvaṃ yayau tatra puryāṃ sammānamācarat |
vādyaghoṣaiḥ prajāharṣanādaiḥ puṣpādipūjanaiḥ || 29 ||
[Analyze grammar]

mahodyāne cāvatīrya vimānād bhagavāṃstataḥ |
rājoktarītyā nagare cābhramad darśanapradaḥ || 30 ||
[Analyze grammar]

pūjito vandito lokaiḥ vastubhiśca samārpitaḥ |
dṛṣṭaścāvadhṛto naije hṛdaye parameśvaraḥ || 31 ||
[Analyze grammar]

vardhito bahudhā lokaiḥ prasanno'bhūtpareśvaraḥ |
pūjāyāmāgataṃ vāyuśṛṃgatanvarṣaye dadau || 32 ||
[Analyze grammar]

viśaśrāma mahāsaudhe rājño divye suvarṇaje |
tatrāyāto rāyahāṇḍeśvaro mākṣikarāṣṭrapaḥ || 33 ||
[Analyze grammar]

prārthayituṃ hariṃ naijaṃ rājyaṃ tathā''rthayattadā |
hariḥ sajjo'bhavacchīghraṃ sāyaṃ sārthasamanvitaḥ || 34 ||
[Analyze grammar]

rāyanavārkabhūpaśca vidāyaṃ yautakaṃ dadau |
vimānena haristūrṇaṃ vyomnā mākṣikarāṣṭrakam || 35 ||
[Analyze grammar]

niśāmukhe samāyācca mākṣikānagarīṃ prati |
vidyutprakāśaiḥ paritaḥ śobhamānāṃ mahāpurīm || 36 ||
[Analyze grammar]

rāyahaṇḍeśabhūpaśca prāggatvā svāgataṃ vyadhāt |
sainyena vādyaghoṣaiśca dhvajāpatākikādibhiḥ || 37 ||
[Analyze grammar]

puṣpahārairjayaśabdairgītikābhiśca maṃgalaiḥ |
candanādyaiḥ svāgataṃ śrīhareḥ rājā'karottadā || 38 ||
[Analyze grammar]

vimānaṃ cāgataṃ pṛthvyāṃ harirbahiḥ samāyayau |
anantaśākhavidyudbhiḥ kāśite ca divānibhe || 39 ||
[Analyze grammar]

vimānāgre hi bhagavān śuśubhe divi candravat |
taṃ vilokya paraṃbrahma yoṣitaśca prajājanāḥ || 40 ||
[Analyze grammar]

vardhayāmāsuratyarthaṃ hariṃ candanapuṣpakaiḥ |
akṣataiścāpi lājābhirgandhasārairmanoharaiḥ || 41 ||
[Analyze grammar]

rātrau rājā nagaryāṃ vai bhrāmayāmāsa mādhavam |
sainyena sahitaṃ kṛṣṇaṃ prajāḥ pupūjurutsukāḥ || 42 ||
[Analyze grammar]

gopure cāṃgaṇe madhye catvare rājamārgake |
haṭṭāgreṣu ca saudheṣu vardhayāmāsurutsukāḥ || 43 ||
[Analyze grammar]

dravyaiḥ suvarṇamudrābhiḥ phalaiḥ kuṃkumacandanaiḥ |
ambarairnārikelādyairgandhasāraiḥ sugandhibhiḥ || 44 ||
[Analyze grammar]

puṣpahārai ratnahārairamūlyopasuvastubhiḥ |
evaṃ nagaryāṃ bhagavān paribhramya nṛpālayam || 45 ||
[Analyze grammar]

āyayau ca sabhāṃ cakre rātrāvupādideśa ha |
sarveṣāṃ svavṛttitayeṣyamāṇaṃ vai prayojanam || 46 ||
[Analyze grammar]

sukhaṃ ca duḥkhābhāvaścetyubhayaṃ vai prayojanam |
sukhārthaṃ ceṣyate dharmo dharmāt sukhaṃ hi jāyate || 47 ||
[Analyze grammar]

anāgatasya duḥkhasyā'nāgamāya yateta vai |
adharmo duḥkhadaḥ prokto'dharmo hyapuṇyanāmadhṛk || 48 ||
[Analyze grammar]

hiṃsanaṃ parapīḍādi drohaḥ pāpaṃ hyadharmakaḥ |
steyaṃ cānṛtakaraṇaṃ ca pratāraṇaṃ hi pāpakam || 49 ||
[Analyze grammar]

anyāyavartanaṃ cāpi paranāśakarī kriyā |
paravṛttivināśaśca paravastuvināśanam || 50 ||
[Analyze grammar]

svasya mokṣasya hānyādirjñānena varjanaṃ tathā |
maurkhyaṃ ca nijapitroścā'sevanaṃ pātakāni vai || 51 ||
[Analyze grammar]

anyadravyādyāharaṇaṃ cāśritā'rakṣaṇaṃ tathā |
vismṛtirdevadevasya pūjyānāṃ cāvamānanam || 52 ||
[Analyze grammar]

nārīṇāṃ pīḍanaṃ cāpi bālānāṃ pīḍanaṃ vṛthā |
vṛkṣavallyādināśaśca vahnidānaṃ mahāvane || 53 ||
[Analyze grammar]

yatra jīvāḥ pradahyeyustatsarvaṃ pātakaṃ mahat |
manuṣyeṇa na kartavyaṃ svātmanaḥ pīḍanaṃ tathā || 54 ||
[Analyze grammar]

sukhaṃ dehasamutthaṃ vendriyajaṃ cātmajaṃ ca vā |
sarvaṃ prayojanaṃ svasya sādhayatyeva mānavaḥ || 55 ||
[Analyze grammar]

anityaṃ tu sukhaṃ nāśaṃ prāpsyatyeva na saṃśayaḥ |
vicāryetthaṃ ca tannā'rjyaṃ cā'rjyaṃ vai śāśvataṃ sukham || 56 ||
[Analyze grammar]

yajño dānaṃ dayā devāḥ satyaṃ ca sevanaṃ tapaḥ |
sucāritryaṃ sukhadāni yogidharmā ime matāḥ || 57 ||
[Analyze grammar]

aṣṭaitāni pavitrāṇi śreyaḥ prasādadāni vai |
puṇyatīrthābhigamanaṃ sukhadaṃ śāśvate hitam || 58 ||
[Analyze grammar]

puṇyadeśābhigamanaṃ pavitraṃ śreyasāṃpradam |
martyo'nnadhanavastrādyaiścet samṛddhaśca jīvati || 59 ||
[Analyze grammar]

tadā yajñādikaṃ kṛtvā śāśvataṃ sukhamarjayet |
puṇyatīrthāni santyeva sādhavo jagatāṃ hitāḥ || 60 ||
[Analyze grammar]

puṇyadeśāśca santyeva mandire pratimā hareḥ |
tatra gatirmokṣagatistayā sukhaṃ hi śāśvatam || 61 ||
[Analyze grammar]

prāyaścittodvejanena jāyate pāpanāśanam |
punarnaiva prakuryācced bhāvipāpāt pramucyate || 62 ||
[Analyze grammar]

satāṃ saṃgaṃ prakuryāccet kusaṃgāt parimucyate |
sādhutīrthe parisnāto yamakleśātpramucyate || 63 ||
[Analyze grammar]

sādhutīrthī bhavet sādhurharitīrthī haro bhavat |
sugandhasevī sugandhī syāt kṛṣṇagandhī bhavettataḥ || 64 ||
[Analyze grammar]

karmakṛtvā'bhimanyeta nāhamasmīti cetanaḥ |
karmaṇā lipyate naiva padmapatramivā'mbhasā || 61 ||
[Analyze grammar]

chidrāṇi vivṛtānyeva sādhūnāṃ cāvṛṇoti yaḥ |
pāpātipāpakṛccāpi sa kalyāṇaṃ prapadyate || 66 ||
[Analyze grammar]

yathā sūryastamonāśī tathā kalyāṇakṛjjanaḥ |
sarvapāpābhihartā'pi sarvapāpavināśakaḥ || 67 ||
[Analyze grammar]

sevāparo jano nityamāśīrvādān pravindati |
āyurannaṃ dhanaṃ saukhyaṃ vindati sevayā tataḥ || 68 ||
[Analyze grammar]

sādhūnāṃ sevayā saukhyaṃ śāśvataṃ kṛṣṇayogataḥ |
sādhutīrthī bhavettasmānmānavo dīrghadṛṣṭiyuk || 69 ||
[Analyze grammar]

śāśvate sukhakośe te nityaṃ tiṣṭhanti keśave |
tadāśrayiṇāṃ kośaḥ sa śāśvataḥ syādupasthitaḥ || 70 ||
[Analyze grammar]

ahaṃ kośaḥ śāśvato'smi mahānandapariplutaḥ |
santo madānandayuktāḥ kurvantyāndino'parān || 71 ||
[Analyze grammar]

mukhyaṃ prayojanaṃ muktiḥ śāśvataṃ sukhameṣu vai |
sādhuṣvevopalabhyeta sevyāḥ santastato'niśam || 72 ||
[Analyze grammar]

ityuktvā virarāmā'sau bhagavān rādhike tataḥ |
sabhānte nṛpatiḥ pūjāṃ cakāra dravyakoṭibhiḥ || 73 ||
[Analyze grammar]

suvarṇarūpyakapātrairambaraiśca vibhūṣaṇaiḥ |
mukuṭaṃ dhārayāmāsa bālakṛṣṇasya mastake || 74 ||
[Analyze grammar]

kaṇṭhe hārān ratnayuktān sauvarṇān śrīharerdadau |
aurṇān komalaveṣāṃścārpayāmāsa suvarṇinaḥ || 75 ||
[Analyze grammar]

suchatraṃ cāmare śreṣṭhe svarṇadaṇḍaṃ ca vetrakam |
hīrakaimauktikairyuktā mālā dadau ca śobhanāḥ || 76 ||
[Analyze grammar]

ūrmikāḥ karakānyācchādanāni vividhāni ca |
dadau sugandhasāraiśca puṣpā'kṣatairapūjayat || 77 ||
[Analyze grammar]

rājñī hīravatī kṛṣṇapūjāmārārtrikaṃ vyadhāt |
tilakaṃ kauṃkumaṃ bhāle sākṣataṃ candrakaṃ vyadhāt || 78 ||
[Analyze grammar]

mastake'kṣatapuṣpādyairarhaṇāṃ cottamāṃ vyadhāt |
dadau miṣṭānnakavalaṃ mukhe kṛṣṇasya sā tataḥ || 79 ||
[Analyze grammar]

svasyāḥ pārśve sthitāḥ kanyā nava prāha janeśvarī |
kanyākāḥ śrīpatiścāyaṃ rādhāsvāmī hi rājate || 80 ||
[Analyze grammar]

bahujanmakṛtaiḥ puṇyairlabhyate draṣṭumityapi |
eṣa sākṣānmilito'sti kṛpayā svagṛhe'dhunā || 81 ||
[Analyze grammar]

hṛdaye taṃ vāsayantu mā tyajantu kadācana |
pūjayantu hariṃ premṇā sevayantu janārdanam || 82 ||
[Analyze grammar]

sadā bhaktiṃ prakurvantu śrīramākamalā iva |
śrutvaivaṃ kanyakāḥ kṛṣṇe bālakṛṣṇe'timohitāḥ || 83 ||
[Analyze grammar]

mātṛvākyena puṣṭiṃ ca prāptāstaṃ kāntamacyutam |
vavrire phullavadanā hṛṣṭā mālāpradānakaiḥ || 84 ||
[Analyze grammar]

varamālāḥ kṛṣṇakaṇṭhe nyadhurnava tāḥ kanyakāḥ |
tāsāṃ karagrahaṃ cakre bhagavān vidhinā tataḥ || 85 ||
[Analyze grammar]

utsavaṃ kṛtakṛtyaśca rājā cakāra vai niśi |
bhojanāni tataḥ sarvasārthebhya pradadau nṛpaḥ || 86 ||
[Analyze grammar]

prajā api hareḥ pūjāṃ cakrustatrātibhāvataḥ |
rādhādyā bhojanaṃ cakrūstataḥ kṛṣṇo niśāntare || 87 ||
[Analyze grammar]

kanyakāsevito nidrāṃ jagrāha kṣaṇameva tu |
maṃgalairvādyaghoṣaiśca prabubodha prage drutam || 88 ||
[Analyze grammar]

trayodaśyāṃ kṛtasnānapūjanaśca payaḥ papau |
papuścānye'pi dugdhādi huṇḍeśanṛpatergṛhe || 89 ||
[Analyze grammar]

prātaḥ ṛṣiśca vīrākajanarṣi śrīhariṃ prabhum |
pūjayāmāsa vividhairvastubhirvedamantrakaiḥ || 90 ||
[Analyze grammar]

mahāpūjāṃ prakṛtvaiva mokṣaṃ vavre ca śāśvatam |
hariḥ prāha samādhau tvaṃ tiṣṭharṣe mokṣamāvraja || 91 ||
[Analyze grammar]

ityuktaḥ sa ṛṣistūrṇaṃ dhyāne sthiro'bhavat kṣaṇāt |
tāvanmūrti harerdivyāmapaśyat hṛdaye śubhām || 92 ||
[Analyze grammar]

divyatejomayīṃ divyamuktādyaiḥ sevitāṃ tataḥ |
vimānaṃ tvakṣarasaṃjñamapaśyattejasāvṛtam || 93 ||
[Analyze grammar]

bhagavāṃstaṃ rādhike vai haste dhṛtvā vimānake |
nītvā dhāmā'kṣaraṃ naijaṃ prāpayāmāsa tatkṣaṇam || 94 ||
[Analyze grammar]

rājādyāstu ṛṣerdehaṃ cikṣipurgartamadhyake |
dehe jātaścamatkārastaṃ rādhe kathayāmi te || 95 ||
[Analyze grammar]

dehāt tatra samutpannā vīrā hetisamanvitāḥ |
mahādehā baliṣṭhāśca hariṃ natvā'grataḥ sthitāḥ || 96 ||
[Analyze grammar]

vīrākajanaputrāste nivāsaṃ cārthayan prabhoḥ |
haristebhyo dadau vāsaṃ śaṃbhorgaṇeṣu sarvadā || 97 ||
[Analyze grammar]

vīrāste ca janāste ca na tveśānaṃ satīṃ tataḥ |
labdhājñāḥ prayayuḥ sarve kailāsaṃ śāśvataṃ sthalam || 98 ||
[Analyze grammar]

śaṃbhorlabdhamanavaste tāmasā vaiṣṇavāḥ sadā |
vīrajanakhyātimanto'bhavan bhaktā harasya vai || 99 ||
[Analyze grammar]

atha śrīmadbālakṛṣṇaṃ kāmbhareyaṃ mahāprabhum |
rājā cakre daṇḍavacca cakre vai pādavāhanam || 100 ||
[Analyze grammar]

sevāṃ kṛtvā tato nīrājanaṃ vyadhāt sa bhūpatiḥ |
pādadhautajalaṃ divyaṃ papau tasthau samīpataḥ || 101 ||
[Analyze grammar]

tāvat tatra samāyāto rāyakūpeśabhūpatiḥ |
hariṃ netuṃ svanagarīṃ havānākhyāṃ suśālinīm || 102 ||
[Analyze grammar]

hariḥ prāha tathāstvevaṃ śīghraṃ sajjo babhūva ca |
huṇḍeśo yautakaṃ prādād yayāce ca kṣamāṃ hareḥ || 103 ||
[Analyze grammar]

hariścābhayadānaṃ ca datvā vimānamāruhat |
sārthāścāpi vimānasthā abhavan keśavājñayā || 104 ||
[Analyze grammar]

rāyakūpeśabhūpaśca sammānārthaṃ jagāma ha |
pūrvaṃ gatvā nijaṃ sainyaṃ nītvodyāne sthiro'bhavat || 105 ||
[Analyze grammar]

rāyahuṇḍeśabhūpaśca vidāyaṃ mānanaṃ tathā |
jayaśabdairvādyaśabdairgītibhiśca dadau tadā || 106 ||
[Analyze grammar]

hareryānaṃ samāyācca havānāpurikāntikam |
tadā vādyānyavādyanta jayanādāḥ prajākṛtāḥ || 107 ||
[Analyze grammar]

mantravādāstvabhavaṃśca mahodyāne tu rādhike |
prajādyā harṣahṛdayā draṣṭuṃ kṛṣṇaṃ tadā'bhavan || 108 ||
[Analyze grammar]

iti śrīlakṣmīnārāyaṇīyasaṃhitāyāṃ dvitīye tretāsantāne |
trayodaśyāṃ prātaḥ rāyanavārkanṛparāṣṭragamanaṃ ciñcāgopurikāpuryāṃ bhramaṇaṃ pūjanaṃ tataḥ svarlatikāpurīṃ pratigamanaṃ bhramaṇaṃ pūjanaṃ tataḥ sāyaṃ rāyahaṇḍeśvaranṛparāṣdragamanaṃ mākṣikānagaryāṃ |
bhramaṇaṃ pūjanaṃ hyupadeśanaṃ rātrau viśramaṇaṃ bhādraśuklacaturdaśyāṃ vīrākajanarṣipramokṣaṇaṃ rāyakūpeśanṛparāṣṭragamanaṃ cetyādinirūpaṇanāmā caturdaśādhikadviśatatamo'dhyāyaḥ || 214 ||
[Analyze grammar]