Chapter 210

śrīkṛṣṇa uvāca |
śṛṇu tvaṃ rādhike prātaḥ snātvā kṛṣṇanarāyaṇaḥ |
kṛtvā tu naityikī pūjāṃ yajñabhūmiṃ jagāma ha || 1 ||
[Analyze grammar]

lomaśādyāḥ ṛṣayaśca rājāno yajamānakāḥ |
prajā devāḥ sureśāśca karmaṭhāścopatasthire || 2 ||
[Analyze grammar]

yajñahavyāni navyāni tatrāhṛtāni sarvataḥ |
kāmadrumādibhistatra rasāḥ sampratipāditāḥ || 3 ||
[Analyze grammar]

svastivāco'bhavaṃścāpi puṇyāhavacanānyapi |
vādyaghoṣā abhavaṃśca vedadhvanaya ityapi || 4 ||
[Analyze grammar]

yajamānāśca rājāno navamyāṃ prātareva te |
yathāsthānaṃ samāgatya karmakāṇḍe kṛtādarāḥ || 5 ||
[Analyze grammar]

sāvadhānā abhavaṃśca jāyante kramaśaḥ kriyāḥ |
prokṣaṇāni pūjanāni naivedyabalayo'rpitāḥ || 6 ||
[Analyze grammar]

vahnau havyapradānāni jātānyāhutayo'bhavan |
devatātarpaṇaṃ jātaṃ surādyāstṛptimāgatāḥ || 7 ||
[Analyze grammar]

brahmasṛṣṭīśvarasṛṣṭijīvasṛṣṭisthadehinaḥ |
yajñāhutibhiḥ pratyakṣaṃ tṛptiṃ gatāstadā'dhvare || 8 ||
[Analyze grammar]

antyāhutiṃ tathā puṣpāñjaliṃ dadau harirmakhe |
parihāraṃ cakārā'tha bhojanānyadadāt prabhuḥ || 9 ||
[Analyze grammar]

meśubhānnaṃ mohanasthālānnaṃ mudgajalaḍaḍu'kān |
sukhadāṃ cūrṇalaḍaḍūṃ'śca mauktikān śaṣkulīstathā || 10 ||
[Analyze grammar]

śāṭakān ghṛtapūrāṃścāpūpāṃśca śatachidrakān |
piṇḍakān barphikāṃ miṣṭapūrṇapolīśca pūrikāḥ || 11 ||
[Analyze grammar]

khājakān pāyasān kṣīraṃ saṃyāvaṃ ca birañjakam |
kaṃsāraṃ bundikālaḍḍūn śarkarāghṛtalaḍḍukān || 12 ||
[Analyze grammar]

śrīkhaṇḍaṃ rājikārāddhaṃ kvathikāṃ sūpamityapi |
odanaṃ bahuśākāni patrabhājāśca bhojanāḥ || 13 ||
[Analyze grammar]

caṇakā māṣakāścāpi śrapitā bharjitāstathā |
vaṭikāḥ phullavaṭakā polikāścāmṛtāni ca || 14 ||
[Analyze grammar]

divyabhojyāni muktānāṃ sattvabhojyāni ceśinām |
sudhābhojyāni devānāṃ cāmabhojyāni pitṝṇām || 15 ||
[Analyze grammar]

rasabhojyāni tattvānāṃ madabhojyāni rakṣasām |
yathāyogyāni bhojyāni sarveṣāṃ dehināṃ tathā || 16 ||
[Analyze grammar]

yajñaprasādarūpāṇi tṛptidānyabhavaṃstadā |
takraṃ bahuvidhaṃ śubhraṃ cāmblamiṣṭaṃ sugandhi ca || 17 ||
[Analyze grammar]

pācakaṃ śāntidaṃ tatrāmīkṣāghaṃ cābhavattathā |
madhūni naikarūpāṇi madhuparkāṇi yānyapi || 18 ||
[Analyze grammar]

tiktāmblakaṭucūrṇāni caṭanyaścābhavaṃstadā |
āranālāni ramyāṇi phalāni vividhāni ca || 19 ||
[Analyze grammar]

tāmbūlakāni divyāni dehibhyo'dāpayaddhariḥ |
evaṃ sarvān bhojayitvā tataḥ saṃbubhuje prabhuḥ || 20 ||
[Analyze grammar]

kuṭumbasahitaḥ śrīśo viśaśrāma kṣaṇaṃ tathā |
madhyāhne rāyamārīśo nṛpaḥ prārthayadacyutam || 21 ||
[Analyze grammar]

nijadvīpaṃ samāgantuṃ hariḥ sajjo babhūva ha |
anyān yathāpekṣitāṃśca nityayogasthitān prabhuḥ || 22 ||
[Analyze grammar]

pitrādīnīśvaraṃ śaṃbhuṃ satīṃ kuṭumbakaṃ nijam |
ṛṣīn lomaśamukhyāṃśca nītvā vimānamāsthitaḥ || 23 ||
[Analyze grammar]

tadā rājā ca rājñī ca dānavarṣistathā puraḥ |
vimānena yayuścāgre dvīpamālīsmarābhidham || 24 ||
[Analyze grammar]

ṛddhīśā nagarī saṃśobhābhiścalaṃkṛtā tadā |
sainyena svāgatārthaṃ copasthitiḥ racitā drutam || 25 ||
[Analyze grammar]

tāvad vimānaṃ kṛṣṇasya vardhimullaṃghya khāḍikām |
dvīpānuccāvacāṃścāpyullaṃghya rāṣṭraṃ suśobhanam || 26 ||
[Analyze grammar]

ālīsmaraṃ hariḥ prāpa vimānaṃ bhūtale'nayan |
ṛddhīśāyā mahodyāne nṛpālayasya sannidhau || 27 ||
[Analyze grammar]

tadā vādyānyavādyanta jayadhvānāstathā'bhavan |
gītikāḥ smaranārīṇāṃ prajānāṃ jayagarjanāḥ || 28 ||
[Analyze grammar]

susvāgataiḥ patākādyairdhvajairlājā'kṣatādibhiḥ |
toraṇaiḥ puṣpahārādyairañjalyādibhireva ca || 29 ||
[Analyze grammar]

namanaiḥ puṣpadānaiśca sammānaṃ śrīharerabhūt |
vimānācchrīharistūrṇaṃ bahiryadā''yayau tataḥ || 30 ||
[Analyze grammar]

rāyamārīśabhūpastrī rājñī kuśalakuṇḍalā |
pādau tīrthajalaiḥ saṃprakṣālayāmāsa satvaram || 31 ||
[Analyze grammar]

harestaccaraṇotthaṃ ca jalaṃ papurnṛpādayaḥ |
kuṃkumaiścaraṇau rañjayitvā mudrāśca jagṛhuḥ || 32 ||
[Analyze grammar]

puṣpahārān gandhavāri gandhasārān dadau tathā |
duḥkhahāñjalibhirnāryaḥ smārikāḥ kṛṣṇameva tāḥ || 33 ||
[Analyze grammar]

pupūjurbahubhāvena kanyakā bhāvagarbhitāḥ |
atha kṛṣṇaṃ mahāsaudhe rājā nyaṣādayat kṣaṇam || 34 ||
[Analyze grammar]

siṃhāsane svake nītvā dadau dhanaṃ tu koṭikam |
sauvarṇaṃ cāmbarādyaṃ cīrṇaṃ sarvaṃ kūpyamityapi || 35 ||
[Analyze grammar]

ratnalakṣaṃ pradadau ca tadā kanyātrayaṃ śubham |
mugdhaṃ kṛṣṇagale mālātrayaṃ samārpayat patim || 36 ||
[Analyze grammar]

matvā mātṛvaco'vāpya kṛṣṇavallabhamuttamam |
patiṃ kanyātrayaṃ prāpa rājā santoṣito'bhavat || 37 ||
[Analyze grammar]

rājñī jātā kṛtakṛtyā tato dugdhaṃ papau prabhuḥ |
anye dugdhaṃ papuścāpi drutaṃ kṛṣṇo vimānake || 38 ||
[Analyze grammar]

sthitvā svalpe ṛddhīśāyāṃ nagaryāṃ sainyavardhitaḥ |
prajābhiścārthitaḥ saṃvihṛtya gṛhāṇi sarvataḥ || 39 ||
[Analyze grammar]

pāvanāni tadā kṛtvā datvā svaṃ darśanaṃ śubham |
prajābhiśca kṛtaṃ naikavidhopadābhirarcanam || 40 ||
[Analyze grammar]

gṛhītvā rājasaudhaṃ cā''yayau svāmī hariḥ prabhuḥ |
rājyasiṃhāsane sthitvopādideśa prajādikān || 41 ||
[Analyze grammar]

mama yogo mahatpuṇyairjāto'styatra mahārṇave |
bhavatāṃ bhāvanākṛṣṭaḥ samāyāto'smi dūrataḥ || 42 ||
[Analyze grammar]

madarthe dīyate sarvaṃ śāśvataṃ jāyate hi tat |
nirguṇaṃ mama yogena mokṣadaṃ jāyate hi tat || 43 ||
[Analyze grammar]

āśāṃ vihāya cānyasmin māyike'khilavastuni |
ramate cātmayogeṣu mokṣamārgaṃ sa vindati || 44 ||
[Analyze grammar]

āśā duḥkhagṛhaṃ śaśvat himavatsamaniścalam |
mahodadhisamaṃ cāpyagādhaṃ doṣasamanvitam || 45 ||
[Analyze grammar]

nabhaḥsamamapāraṃ ca rauravaṃ jīvataḥ sthitam |
api rājyasthito rājā cāśayā mṛgayākṛte || 46 ||
[Analyze grammar]

vane duḥkhaṃ tathā''pnoti yathā kṣudro hi lubdhakaḥ |
api sarvendriyatṛptaḥ kāmanāśādhṛto bhavet || 47 ||
[Analyze grammar]

anyāyakāmabhogena mahadduḥkhamavāpnuyāt |
antarīkṣaṃ tathā kāmo dvayorjyāyān nu ko bhavet || 48 ||
[Analyze grammar]

iti praśne'ntarīkṣaṃ vai jyāyaḥ kāmo na hi kvacit |
antarīkṣasya pāraṃ vai yānti yogijanāḥ kvacit || 49 ||
[Analyze grammar]

āśāyā naiva pāraṃ saṃlabhante tadanusṛtāḥ |
ṛṣabho nāma bhakto me purā śrībadarīvanam || 50 ||
[Analyze grammar]

upāyayau mama divyaṃ naranārāyaṇāśramam |
yatra me badarī ramyā hrado vaihāyaso'malaḥ || 51 ||
[Analyze grammar]

aśvaśirā ṛṣiryatra yatra gaṃgā'tipāvanī |
tatrāgatyāśrame ramye maṇḍape mama sannidhau || 52 ||
[Analyze grammar]

natvā vāsārthamevā'sau dṛṣṭvā''śramarṣisatkuṭīm |
parṇakuṭīṃ yayau kartuṃ dīrghavāsecchayā punaḥ || 53 ||
[Analyze grammar]

tena mārge ṛṣirnānnā tanurdṛṣṭastapodhanaḥ |
ūrdhve tvaṣṭaguṇo dehe kṛśatāyāṃ tṛṇeśavat || 54 ||
[Analyze grammar]

kaniṣṭhikāsamastvasya darśanaṃ cādbhutaṃ hyabhūt |
taṃ natvā ṛṣabhastasthau dattāsane viveśa ha || 55 ||
[Analyze grammar]

pṛṣṭaḥ kuśalamevāpi kathayāmāsa sāntvanam |
tathā''ha parṇaśālāṃ ca kartumicchāmi cātra vai || 56 ||
[Analyze grammar]

tapaḥ kartuṃ tathecchāmi śāntiṃ vindāmi yena ca |
tatsarvaṃ kartumicchāmi śādhi me tvaṃ tano mune || 57 ||
[Analyze grammar]

tanuḥ prāha mayā naiva kṛtā'tra parṇasatkuṭī |
yataḥ sarvaṃ naśvaraṃ vai kasyārthe parṇajā kuṭī || 58 ||
[Analyze grammar]

yāvadicchā ca te tvāste parṇaśālāvidhāpane |
tāvacchāntirna te syādvai tṛṣṇāśālāvṛtasya vai || 59 ||
[Analyze grammar]

nistṛṣṇasya nirīhasya niricchasya mahatsukham |
tapasā'pi sukhaṃ naiva yadīcchā tatra jāgrati || 60 ||
[Analyze grammar]

parṇakuṭyāṃ niviṣṭasya na syād brahmapraveśanam |
āśākuṭīvihīnasya bhaved brahmapraveśanam || 61 ||
[Analyze grammar]

brahmāveśitalokasya śāntiḥ śāśvatayoginī |
tasmādāśāṃ parityajyā'ntarīkṣādapi dīrghikām || 62 ||
[Analyze grammar]

cidākāśe parṇakuṭyāṃ labha viśrāntimacyute |
tanunaivaṃ samuktaḥ sa ṛṣabho jñānacakṣuṣā || 63 ||
[Analyze grammar]

parṇakuṭīṃ parityajyā'bhajanmāṃ parameśvaram |
mamāṃ'śo matsvarūpaḥ so'bhavanmokṣagatistataḥ || 64 ||
[Analyze grammar]

tasmādāśāṃ parityajya mano mayi samarpayet |
sarvaṃ mayi samarpyaiva śāśvataṃ sukhamāpnuyāt || 65 ||
[Analyze grammar]

āśā kṛtā kṛśā yena puṣṭātmā sa mato mama |
āśā puṣṭā bhaved yasya kṛśaḥ syāt sa na saṃśayaḥ || 66 ||
[Analyze grammar]

yā saktā sarvabhūteṣu kṛtaghneṣvalaseṣu ca |
nṛśaṃseṣu hiṃsakeṣu yā'pakāriṣu vidyate || 67 ||
[Analyze grammar]

putrastrīdhanasaudheṣu dehendriyeṣu bhuktiṣu |
vārdhakye putrahīnānāṃ putre rājñāṃ ca rāṣṭrake || 68 ||
[Analyze grammar]

pradānakāṃkṣiṇīnāṃ ca kanyānāṃ suvilāsane |
lubdhānāṃ priyaviṣaye ḍimbhānāṃ mātari dhruvā || 69 ||
[Analyze grammar]

yā''śā kṛtā kṛśā yena sa śāntimadhigacchati |
ṣaṣṭivarṣasahasrāṇi gautamastapa ācarat || 70 ||
[Analyze grammar]

upāyāto dharmarājastamugratapasaṃ munim |
gautamo dharmarājāya namaskutyā''sanaṃ dadau || 71 ||
[Analyze grammar]

prapaccha kuśalaṃ cāpi svāgataṃ cākarottataḥ |
dharmarājo gautamaṃ saṃpapraccha tapasā mune || 72 ||
[Analyze grammar]

kiṃ te prayojanaṃ cāste kathaṃ karoṣi dustapaḥ |
gautamaḥ prāha śāntyarthaṃ tapaścarāmi duścaram || 73 ||
[Analyze grammar]

yena yāsye puṇyakṛtāṃllokān sukhādisaṃbhṛtān |
yamaḥ prāha vicāraste vimārgaṃ pratigacchati || 74 ||
[Analyze grammar]

puṇyakṛtāṃ tathā'puṇyakṛtāṃ lokeṣu sadṛśam |
tṛṣṇājanyaṃ mahāduḥkhaṃ bādhate puṇyaśālinaḥ || 75 ||
[Analyze grammar]

dhāmākṣaraṃ vinā'nyatra tārṣṇaṃ duḥkhaṃ pravidyate |
tasmādāśāṃ vihāyaiva tiṣṭha brahmaṇi niścalaḥ || 76 ||
[Analyze grammar]

sarvāṃ śāntiṃ brahmayogādavināśāmavāpsyasi |
āśāvataḥ sukhaṃ nāsti yayā te tapato'pi vai || 7 ||
[Analyze grammar]

yāvadāśā ca tṛṣṇā ca tathehā svārthagṛdhnikā |
icchā'bhilāṣā kāmaśca tāvad vyakteḥ kathaṃ sukham || 77 ||
[Analyze grammar]

sarvaṃ ceṣṭaṃ nivṛttaṃ ca yasya bhavati sarvathā |
tasyā'bdhiḥ śāśvataścopatiṣṭhedānandasaṃbhṛtaḥ || 79 ||
[Analyze grammar]

tasmānnārāyaṇaḥ sākṣād yeṣāmicchāsvavasthitaḥ |
santo'pi brahmavettārasta eva śāntisaṃbhujaḥ || 80 ||
[Analyze grammar]

śrutvaivaṃ gautamastyaktvā tapo bhaktau vyavasthitaḥ |
nirāśaḥ śāntahṛdayaḥ parāṃ śāntiṃ gatastadā || 81 ||
[Analyze grammar]

tasmānnṛpaiḥ prajābhiśca narairnārībhireva ca |
yaṣṭavyo'haṃ mahāyajñaiḥ santoṣaṇīyaḥ sevayā || 82 ||
[Analyze grammar]

icchārpaṇena sākṣācca bhajanīyo'hameva ca |
evaṃ māṃ prāpya sevābhirmokṣaṃ naijaṃ prasādhayet || 83 ||
[Analyze grammar]

bhavantaśca janāḥ sarve prajā rājādayo'pi ca |
mayi nārāyaṇe kṛṣṇe karmaṇā manasā girā || 84 ||
[Analyze grammar]

sarvaṃ samarpya māṃ kṛṣṇe bhajantu gatalālasāḥ |
mahāśāntiṃ paramāṃ me dāsye'kṣare pare sthitām || 883 ||
[Analyze grammar]

ityuktvā śrīhariḥ rādhe cāha mantraṃ prajādiṣu |
bhaktiṃ dadau nijāṃ paścād virarāma mahāprabhuḥ || 86 ||
[Analyze grammar]

rājā rājñī prajāścāpi bhojayāmāsuracyutam |
sārthān saṃbhojayāmāsuḥ rājādyāścakrurādanam || 87 ||
[Analyze grammar]

tataḥ pūjāṃ parigṛhya vimānamadhyarohayat |
sarvān svayaṃ cāruroha gantuṃ ca makhabhūmikām || 88 ||
[Analyze grammar]

sammānaṃ bahudhā cakruḥ prajāḥ sainyāni yoṣitaḥ |
sasāra ca tataḥ kṛṣṇo rājñā ca ṛṣiṇā saha || 89 ||
[Analyze grammar]

dvīpe dvīpāntare cāpi sāyaṃ vai kāśimaṃ yayau |
dvivāmaṃ ca yayau paścānmīlavīlaṃ samāyayau || 90 ||
[Analyze grammar]

tato'dhvarapradeśaṃ sa āyayau ca niśāṃśake |
snātvā sandhyā tatra cakre nijāvāse ca bhojanam || 91 ||
[Analyze grammar]

viśaśrāma ca nidrāyāṃ rāyamārīśakanyakāḥ |
tisraḥ siṣevire kāntaṃ bhagavantaṃ navaṃ patim || 92 ||
[Analyze grammar]

prātaḥkāle vedaghoṣairmaṃgalāvahatūryakaiḥ |
gītibhirvādyaghoṣaiśca jajāgāra hariḥ stavaiḥ || 93 ||
[Analyze grammar]

rājādhirājo bhagavān kṛtasnānavidhistataḥ |
pitarau pūjayāmāsa bhaktebhyo darśanaṃ dadau || 94 ||
[Analyze grammar]

kṛtāhnikaḥ suveṣaśca makhabhūmiṃ samāgataḥ |
dānavarṣiṃ tathā rāyamārīśabhūpatiṃ tadā || 95 ||
[Analyze grammar]

prāhedaṃ koṭidravyaṃ yat pūjāyāṃ mama cāgatam |
bhavatośca prajānāṃ ca sarvaṃ makhe'stu cārpitam || 96 ||
[Analyze grammar]

ityuktvā''hūya kośeśaṃ kuberaṃ pradadau ca tat |
makhe vyayārthaṃ dhanarāḍayuṃkta sarvameva tat || 97 ||
[Analyze grammar]

ityevaṃ rādhike'nādikṛṣṇanārāyaṇaḥ svayam |
pāvayitvā janān deśān narāṃśca yoṣitastathā || 98 ||
[Analyze grammar]

saṃgṛhya śaraṇe muktiyogyān karotyanugrahāt |
bālān vṛddhān madhyarūpān yūnaḥ sarvāśca dehinaḥ || 99 ||
[Analyze grammar]

pāvayitvā mokṣayogyān karoti parameśvaraḥ |
api kanyā bhūbhṛtāṃ ca mugdhāḥ samarpitāḥ svayam || 100 ||
[Analyze grammar]

parigṛhyāpi vidhinā nijayogaṃ dadāti saḥ |
kṛpāpārāvārarūpo divyo'pi janatāśrayaḥ || 101 ||
[Analyze grammar]

adivyān mānavān dehān svīkṛtyāpi pramokṣaṇam |
dadātīti kṛpā tasyā''nandavārdherhareḥ priye || 102 ||
[Analyze grammar]

alepyasya na lepo'sti kālamāyeśituḥ kvacit |
sarvaṃ cāsya śarīraṃ vai bhogyaṃ cādhīnakaṃ tathā || 103 ||
[Analyze grammar]

viśeṣeṇa parigṛhya pāvayatyeva bhaktigam |
nityatṛptasya nāstyeva parādhīnā hi tṛptikā || 104 ||
[Analyze grammar]

sarvānandapradaḥ so'yaṃ sarvatra jayatetamām |
rādhe bhaktyaiva bhagavān bhaktādhīno bhavatyapi || 105 ||
[Analyze grammar]

yo yathā taṃ prapadyeta taṃ tathā bhajate prabhuḥ |
yā yathā sevata kṛṣṇaṃ kṛṣṇastāṃ sevate tathā || 106 ||
[Analyze grammar]

iti śrīlakṣmīnārāyaṇīyasaṃhitāyāṃ dvitīye tretāsantāne navamyāṃ yajñakāryottaraṃ rāyamārīśabhūparāṣṭre ālīsmaradvīpe ṛddhīśāpurīṃ pratigamanaṃ bhramaṇaṃ pūjanamupadeśanaṃ kāśimadvivāmamīlavīladvīpān pāvayitvā makhabhūmāvāgamanaṃ rātrau viśrāntiścetyādinirūpaṇanāmā daśādhikadviśatatamo'dhyāyaḥ || 210 ||
[Analyze grammar]