Chapter 209

śrīkṛṣṇa uvāca |
śṛṇu tvaṃ rādhike prātaḥ kṛtasnānavidhiḥ prabhuḥ |
pūjāṃ kartuṃ niṣasādā''sane sauvarṇaśobhane || 1 ||
[Analyze grammar]

yajñanārāyaṇaṃ tatra pūjayāmāsa vastubhiḥ |
ṣoḍaśādibhirutkṛṣṭaistāvattatra samāyayau || 1 ||
[Analyze grammar]

lomaśarṣiḥ pūjanārthaṃ pupūja parameśvaram |
brahmapriyāśca rājānaḥ samāyayustathā''rcayan || 3 ||
[Analyze grammar]

tāvad vādyānyavādyanta yajñakāryamahotsave |
gamanārthaṃ ca rājānaḥ prajā maharṣayastathā || 4 ||
[Analyze grammar]

brahmādyā īśvarāḥ sarve yajñabhūmiṃ drutaṃ yayuḥ |
saṃbhārān bhūbhṛto'pīṣṭān cakrurekatritān makhe || 5 ||
[Analyze grammar]

dugdhaṃ samidhaḥ kāṣṭhādi kaṇāḥ phalāni śālayaḥ |
sarvaṃ copasthitaṃ tatra kṛtaṃ devādibhiḥ kṣaṇāt || 6 ||
[Analyze grammar]

ācāryo devatāḥ sarve ṛtvijo jāpakāstathā |
karmaṭhā yajamānāśca sahāyāścopatasthire || 7 ||
[Analyze grammar]

svastivāco'bhavaṃstatra brāhmaṇānāṃ śubhapradāḥ |
puṇyāhavācanaṃ cāpi vedaghoṣāstadā'bhavan || 8 ||
[Analyze grammar]

yathāsthānasthiteṣveva sarveṣu yājñikeṣu ca |
dehaśuddhirdaśasnānaṃ gurupādābhivandanam || 9 ||
[Analyze grammar]

saṃkalpo digrakṣaṇaṃ ca kalaśārādhanaṃ tathā |
gaṇeśapūjanaṃ cāpi mātṛkāpūjanaṃ tathā || 10 ||
[Analyze grammar]

nāndīśrāddhaṃ tathārghaṃ ca madhuparkaṃ tato'bhavat |
abhiṣeko vardhinīpūjanaṃ vāstuprapūjanam || 11 ||
[Analyze grammar]

maṇḍapārcanamevā'tha sarvatobhadrapūjanam |
devatāpūjanaṃ yantradevānāmarhaṇaṃ tathā || 12 ||
[Analyze grammar]

agneruttāraṇaṃ pīṭhadevānāṃ pūjanaṃ tataḥ |
kuṇḍapūjā devapūjā tato'gnipūjanaṃ śubham || 13 ||
[Analyze grammar]

grahāṇāṃ yoginīnāṃ ca pūjanaṃ kṣetrapā'rcanam |
muktānāmavatārāṇāmīśvarāṇāṃ prapūjanam || 14 ||
[Analyze grammar]

īśvarīṇāṃ brahmayoṣitpūjanaṃ brahmacāriṇām |
sāṃkhyayoginyarhaṇaṃ ca satīnāṃ pūjanaṃ satām || 15 ||
[Analyze grammar]

pitṝṇāṃ ca ṛṣīṇāṃ ca dikpālānāṃ prapūjanam |
lokapālārhaṇaṃ cāpi svargasthānāṃ prapūjanam || 16 ||
[Analyze grammar]

trayastriṃśatsurāṇāṃ ca pañcadevārhaṇaṃ tathā |
bhuvarlokanivāsānāṃ pūjanaṃ rakṣasāṃ tathā || 17 ||
[Analyze grammar]

bhūtapretapiśācānāṃ mānavānāṃ samarhaṇam |
catuḥkhanisthajīvānāṃ pūjanaṃ dāsavargiṇām || 18 ||
[Analyze grammar]

jaḍānāṃ cetanānāṃ ca tīrthānāṃ pūjanādikam |
rasapradānāṃ sarveṣāṃ sthāvarāṇāṃ prapūjanam || 19 ||
[Analyze grammar]

jantūnāṃ cāpi tattvānāmatalādinivāsinām |
pūjanaṃ śrīmahāviṣṇorviṣṇośca pūjanaṃ tathā || 20 ||
[Analyze grammar]

śaṃkhaghaṇṭārhaṇaṃ prāṇapūjanaṃ ca nivedanam |
havanaṃ bahumiṣṭānnairājyairghṛtādibhistathā || 21 ||
[Analyze grammar]

nīrājanaṃ ca vai balidānaṃ puṣpāñjalistathā |
dakṣiṇā ca namaskāraḥ stutiścāśīḥpradānakam || 22 ||
[Analyze grammar]

parihāro bhojanāni kramāt sarvaṃ makhe hyabhūt |
koṭiśo lakṣaśo devā tṛptiṃ prāptā mahāmakhe || 23 ||
[Analyze grammar]

aṣṭamyāmeva madhyāhne tathā sarvaṃ vidhānakam |
kṛtvā śrīmadbālakṛṣṇo bubhuje sakuṭumbakaḥ || 24 ||
[Analyze grammar]

jagrāha tāmbūlakaṃ ca kṣaṇaṃ viśrāntimāpa ha |
tāvattatra nṛpaścāyāt prārthanārthaṃ samutsukaḥ || 25 ||
[Analyze grammar]

cārulāṣarṣisahito rāyavākakṣako nṛpaḥ |
nijarāṣṭraṃ jalasthaṃ vai dvīpaṃ viṣaturīyakam || 26 ||
[Analyze grammar]

tūryapadāṃ purīṃ cāpi pāvayituṃ tadā''rthayat |
hariḥ prāha tathā'stvevaṃ śīghraṃ sajjobhavattadā || 27 ||
[Analyze grammar]

anādiśrīkṛṣṇanārāyaṇaḥ śrīkambharāsutaḥ |
pitarau bhrātaraścāpi santuṣṭā bhaginī tathā || 28 ||
[Analyze grammar]

amṛtā bhrātṛjāyā ca brahmapriyāśca vai satī |
śaṃkaro lomaśaścāpi cārulāṣaṛṣistathā || 29 ||
[Analyze grammar]

rāyavākakṣako rājā vimānayostadā drutam |
āruruhuryayuḥ sarve parimeyapadānugāḥ || 30 ||
[Analyze grammar]

samudrakhāḍikāṃ samullaṃghya dvīpamupāyayuḥ |
viṣaturīyasaṃjñaṃ te rājā cāgre gato'bhavat || 31 ||
[Analyze grammar]

turyapadānagaryāṃ sa haryarthaṃ svāgataṃ vyadhāt |
rājñyā sainyena sahito rājā sammānamācarat || 31 ||
[Analyze grammar]

vimānaṃ nikaṭe rājasaudhasyodyānamaṇḍale |
uttārya śrīharistasmād vimānādbahirāyayau || 33 ||
[Analyze grammar]

rājā puṣpādibhiḥ pūjāṃ cakre śrīmādhavasya ha |
kuṃkumādyaistathā'maryaḥ pupūjuḥ parameśvaram || 34 ||
[Analyze grammar]

jayaśabdā vādyaśabdāstadā'bhavan samantataḥ |
vardhayāmāsurīśeśaṃ puṣpalājā'kṣatādibhiḥ || 35 ||
[Analyze grammar]

prajāśca vardhayāmāsurharṣanādaiḥ pareśvaram |
tato rājā hariṃ svalpe vimāne cādhyarohayat || 36 ||
[Analyze grammar]

kuṭumbaṃ ca vimāneṣu tathaiva cādhyarohayat |
nagaryā pratibhavanaṃ vimānairabhigamya ca || 37 ||
[Analyze grammar]

pāvanāni janānāṃ vai gṛhāṇi pracakāra ha |
pūjāṃ mahopacārāṃśca dhanaṃ dravyaṃ suratnakam || 38 ||
[Analyze grammar]

prāpya kṛtvā pāvanāni gṛhāṇi punareva ha |
bhramitvā nagarīṃ divyāṃ datvā naijaṃ ca darśanam || 39 ||
[Analyze grammar]

ājagāma nṛpāvāsaṃ divyaṃ saudhaṃ haristataḥ |
viśaśrāma kṣaṇaṃ dugdhaṃ papau sarve tataḥ papuḥ || 40 ||
[Analyze grammar]

rājā rājñī kumārāśca kanyakātrayamityapi |
pupūjuḥ śrīkṛṣṇanārāyaṇaśrīkṛṣṇavallabham || 41 ||
[Analyze grammar]

upadābhirvividhābhiścandanākṣatakuṃkumaiḥ |
anyahārairmahāratnaistato nīrājanaṃ vyadhuḥ || 42 ||
[Analyze grammar]

kanyātrayaṃ harau mugdhaṃ varamālā dadurgale |
harirjagrāha hastāṃśca tāsāṃ rājñīmatena vai || 43 ||
[Analyze grammar]

kanyā jātāḥ kṛtakṛtyāḥ prāpya kāntaṃ surūpiṇam |
rājā mumoda bahudhā rājñī cāti mumoda ha || 44 ||
[Analyze grammar]

haristebhyo dadau samyagupadeśaṃ sukhapradam |
rājasaudhe mahāsiṃhāsane niṣadya cotsave || 45 ||
[Analyze grammar]

sadā bhaktirhareḥ kāryā'kṣareśasya mamāśritā |
satāṃ sevā sadā kāryā puṇyadā mokṣadā śubhā || 46 ||
[Analyze grammar]

rakṣaṇaṃ sarvabhūtānāṃ kartavyaṃ dayayā'nvaham |
yasminnarthe hitaṃ yat syāttad grāhyaṃ netarat kvacit || 47 ||
[Analyze grammar]

ātmasaṃyamanaṃ buddhyā grāhyabuddhyā tu vartanam |
parāmarśena mokṣaśca prāptavyo dehinā tviha || 48 ||
[Analyze grammar]

anuyuñjīta kṛtyāni dharmajñānamayāni ca |
āgamairupadiṣṭāni gurūditāni yāni ca || 49 ||
[Analyze grammar]

dharmāṇāmavirodhena sarveṣāṃ priyamācaret |
dharmamevābhirakṣedvai nijārthaṃ sādhayet kṛtī || 50 ||
[Analyze grammar]

śāstraṃ dharmo brāhmaṇasya daṇḍaḥ kṣatrasya vai vṛṣaḥ |
kṛṣṭirvaiśyasya dharmo'sti sevakasya ca sevanam || 51 ||
[Analyze grammar]

satyaṃ dharmo hi sarvasya dharmāḍhyā devatāḥ smṛtāḥ |
mānavā devatulyāste sarveṣāṃ prāṇarūpiṇaḥ || 52 ||
[Analyze grammar]

śāstraṃ śāsanakartṛ syād bhartṛpratyayalakṣaṇam |
brahmaṇā lokarakṣārthaṃ mannideśāt purā kṛtam || 513 ||
[Analyze grammar]

vyavahārasukhārthaṃ ca bhartṛpratyayalakṣaṇaḥ |
daṇḍo vinirmitaścāpi kṣātradharmātmakaḥ śubhaḥ || 54 ||
[Analyze grammar]

vyavahāro'paraścāpyudyamarūpo vinirmitaḥ |
bibharti janatāḥ sarvā nītilabdhānnanāṇakaiḥ || 55 ||
[Analyze grammar]

āyotpādanarūpaḥ sa bhartṛpratyayalakṣaṇaḥ |
tṛtīyaḥ puruṣaścāpi nirmitaḥ sukhasādhanaḥ || 56 ||
[Analyze grammar]

ājñā''deśātmakaścānyaḥ puruṣo'pi vinirmitaḥ |
sarveṣāṃ dīnavarṇānāṃ bhartṛpratyayalakṣaṇaḥ || 57 ||
[Analyze grammar]

ādeśe saṃsthitāścāpnuvanti bharaṇasādhanam |
lokānāmeva sarveṣāṃ sasurā'surarakṣasām || 58 ||
[Analyze grammar]

samanuṣyoragavatāṃ sthāvarāṇāṃ tathaiva ca |
caturdhā'yaṃ vyavahāro bhartṛpratyayalakṣaṇaḥ || 59 ||
[Analyze grammar]

sukhasampatpravāhārthaṃ kṛto'sti pūrvato mayā |
dharmayukto mama bhaktyā yuto yo matparāyaṇaḥ || 60 ||
[Analyze grammar]

bhūtvā varteta satataṃ tadbhartā'haṃ bhavāmi vai |
karmaṇāṃ ca svabhāvānāṃ puṇyānāṃ vyavasāyinām || 61 ||
[Analyze grammar]

prayatnānāmahaṃ bhartā bhartṝṇāṃ cāpi bhartṛkaḥ |
śāstā niyāmakaścāhaṃ lokayātrākaro'pyaham || 62 ||
[Analyze grammar]

evaṃ jñātvā ca māṃ lokā bhajeran vai taranti te |
dharmamūlaḥ sadaivārthastathā'rthaphalanaṃ ratiḥ || 63 ||
[Analyze grammar]

dharmārthakāmanāḥ sarvā manomūlotthitāstviha |
pravṛttirūpiṇaḥ sarve dharmādyā bhavayoginaḥ || 64 ||
[Analyze grammar]

samūlebhyaśca vai tebhyo nivṛttirmokṣa ucyate |
dharmāccharīrayogaśca śārīro'rthaḥ sahāyakṛt || 65 ||
[Analyze grammar]

kāmaḥ phalaṃ mahābandhaḥ sarve tvete rajasvalāḥ |
tān vihāya viśeṣāṃścā'rajasko bhaktimān mayi || 66 ||
[Analyze grammar]

vartate yogayuktātmā brahmabhūyāya kalpate |
dharmo na cenmama prāptiprado'rtho'pi na cettathā || 67 ||
[Analyze grammar]

kāmo na cenmama prāptipradaste'narthakā matāḥ |
arthānanartharūpāṃstān yuñjīta mayi vā tyajet || 68 ||
[Analyze grammar]

anyathā viṣaye buddhiryāsyatyeva vihāriṇaḥ |
mokṣārthe saṃhṛtā buddhirvināśaṃ vai vrajettataḥ || 69 ||
[Analyze grammar]

buddhināśo mahānmohastāmaso'pi vivardhate |
tasmānnāstikatā syācca durācārastato bhavet || 70 ||
[Analyze grammar]

durācārātprajā naṣṭā bhavatyeva hi sāṃkarī |
sādhavo na gṛhaṃ yānti durācāragatasya vai || 71 ||
[Analyze grammar]

pāpānyasya tu vardhante duḥkhaṃ jīvitamṛcchati |
jīvato'pi nirayo'yaṃ cāsukhaṃ jīvanaṃ yataḥ || 72 ||
[Analyze grammar]

tasmāttaddoṣanāśārthaṃ sukhārthaṃ sattvabhāvataḥ |
brahmaniṣṭhān praseveta bhaktiyuktān harerjanān || 73 ||
[Analyze grammar]

japennāma sadā me'trā'rpayet sarvaṃ tathā mayi |
dharmaṃ cārthaṃ ca kāmaṃ ca mokṣāya kalpate hi saḥ || 74 ||
[Analyze grammar]

sādhūn prasādayennityaṃ karmaṇā manasā girā |
tavā'smīti vadennityaṃ praṇamet sevanaṃ caret || 75 ||
[Analyze grammar]

satāmāśīrvacobhiśca prasādena ca sevayā |
samāgamena yogena pāvano jāyate janaḥ || 76 ||
[Analyze grammar]

apāpo'yaṃ satāṃ saṃgaḥ sarvadoṣanikṛntanaḥ |
pāpānyapi ca kṛcchrāṇi śamayennātra saṃśayaḥ || 77 ||
[Analyze grammar]

guravaḥ sādhavo loke śreṣṭhā mokṣapradā mama |
suvarṇaṃ sarvathā śreṣṭhaṃ sarvāṃśe sādhavastathā || 78 ||
[Analyze grammar]

āpādakeśaparyantāḥ pāvanāḥ kṛṣṇamūrtayaḥ |
yathākathañcitprāptāste dāsyanti mama yojanam || 79 ||
[Analyze grammar]

kārayiṣyanti me bhaktiṃ yāpayiṣyanti dhāma me |
tasmāt sevyā mama bhaktimantrayuktā hi sādhavaḥ || 80 ||
[Analyze grammar]

guravaste paraṃ dharmaṃ mahābhāgavataṃ mama |
brūyustaṃ ye tvācarayeyuste yāsyanti parā'kṣaram || 81 ||
[Analyze grammar]

gurūṇāṃ tu prasādādvai paraṃ śreya avāpnuyuḥ |
sarvadharmottamaṃ śīlaṃ śīladharmā hi sādhavaḥ || 82 ||
[Analyze grammar]

śīlena hi trayo lokāḥ śakyā jetuṃ na saṃśayaḥ |
nahi kiñcidasādhyaṃ vai loke śīlavatāṃ bhavet || 83 ||
[Analyze grammar]

etatpṛthivyāmamṛtaṃ śīlaṃ sarvottamottamam |
etāvacchreya evāsti śīlaṃ yatra pratiṣṭhitam || 84 ||
[Analyze grammar]

sādhūnāṃ cāvatārāṇāṃ satīnāṃ pariśīlanam |
sevā śīlaṃ paraṃ proktaṃ brahmaśīlaṃ vrataṃ param || 85 ||
[Analyze grammar]

yathāvad guruvṛttyā vai samaṃ nānyaddhi vidyate |
pūrvakalpe'bhavadrājā prahlādaḥ śīlavān sadā || 86 ||
[Analyze grammar]

sādhuśīlanamevā'sya vrataṃ śreṣṭhaṃ tadā'bhavat |
tamenaṃ tu samāgatya vṛhaspatiḥ purā śubham || 87 ||
[Analyze grammar]

prahlādāya dadau jñānaṃ bhaktirūpaṃ sanātanam |
prasthite tu gurau rājā dakṣiṇārthaṃ tadā'vadat || 88 ||
[Analyze grammar]

bṛhaspatiryayāce vai dakṣiṇāṃ śīlarūpiṇīm |
prahlādaśca dadau śīlaṃ yāvat tāvacca dehataḥ || 89 ||
[Analyze grammar]

śīlaṃ divyaṃ viniryātaṃ śrīścāpi niryayau saha |
prahlādaścābhavattatra nistejo dharmavarjitaḥ || 90 ||
[Analyze grammar]

śīlahīnaḥ śriyāhīnaḥ papraccha puruṣaṃ ca tam |
kastvaṃ kasmāt prayāsyevaṃ vada me tu yathāyatham || 91 ||
[Analyze grammar]

śīlaṃ prāha vrataṃ cāsmi dāne dattaḥ prayāmyaham |
mayi yāte ca dharmo'yaṃ puruṣo'pi prayāti ca || 92 ||
[Analyze grammar]

dharmavaṃśyā ime cānye prayānti paśya pārthiva |
mayi yāte dharmapatnī bhaktiryāti tathā ramā || 93 ||
[Analyze grammar]

lakṣmīḥ śrīrbhūḥ samagrāśca prayāntyeva haripriyāḥ |
tacchrutvā bhayamāpannaḥ prahlādaḥ śīlavarjanāt || 94 ||
[Analyze grammar]

yatra nāsti satāṃ sevā śīlaṃ cendriyanigrahaḥ |
adrohaḥ sarvabhūtānāṃ tatra nārāyaṇo na ca || 95 ||
[Analyze grammar]

yatra nārāyaṇo nā'smi yatra nāsti ramā mama |
tatra mokṣo na vai cāste tasmād bhavantu śīlinaḥ || 96 ||
[Analyze grammar]

satāṃ me ca samarhāṃ vai sevāṃ kurvantu nityadā |
sarvabhūtānugrahaṃ ca śīlaṃ samāsato hi tat || 97 ||
[Analyze grammar]

sampadaṃ bhuñjate śīlāḥ śāśvatīṃ madanugrahāt |
aśīlāścedāpnuvanti bhuñjate na ciraṃ hi te || 98 ||
[Analyze grammar]

yajñadānādikāryārthaṃ dattā samattu nirguṇā |
etaddeśīyalokā vai bhavantu yajñavṛttayaḥ || 99 ||
[Analyze grammar]

sukhino dānaśīlāśca tathā śīlavṛṣānvitāḥ |
ityuktvā virarāmaiva bhagavān rādhike tataḥ || 100 ||
[Analyze grammar]

prajābhiḥ pūjitaḥ kṛṣṇo rājñā rājñyā samarhitaḥ |
mantrān dadau prajābhyaśca dugdhapānaṃ cakāra ha || 101 ||
[Analyze grammar]

rājasaudhe caraṇau svau datvā kṛtvā ca pāvanam |
sāyaṃ svāgatamānena vādyaghoṣādibhirhariḥ || 102 ||
[Analyze grammar]

vimānaṃ svaṃ samāruhya sarvasārthasamanvitaḥ |
dvinaskaṃ pārśvarājyaṃ ca milvilaṃ dvīpamityapi || 103 ||
[Analyze grammar]

vilāsadvīpamevāpi bulandadvīpamityapi |
vimānena tadā gatvā vihṛtya gagane tadā || 104 ||
[Analyze grammar]

vilokya śrīharistūrṇaṃ rātrau vaihāyasā drutam |
aṣṭamyāmāyayau yajñabhūmiṃ nijālaye śubham || 105 ||
[Analyze grammar]

snānaṃ sandhyāṃ cakārā'pi bhojanaṃ jagṛhe hariḥ |
tathā'nye bhojanaṃ cakrurdravyaṃ yajñe harirdadau || 106 ||
[Analyze grammar]

viśaśrāma sukhaṃ rātrau kanyātrayeṇa sevitaḥ |
yoganidrāvaśaḥ kṛṣṇaḥ prātarbubodha maṃgalaiḥ || 107 ||
[Analyze grammar]

gītibhirvedaghoṣaiśca tūryasvanaiśca kīrtanaiḥ |
sūtamāgadhabandyādyairbodhitaḥ parameśvaraḥ || 108 ||
[Analyze grammar]

rādhike svasvarūpaṃ sa dadhyau kṣaṇaṃ parātparam |
akṣarātītarūpaṃ yat pūrṇabrahmaparātmakam || 109 ||
[Analyze grammar]

iti śrīlakṣmīnārāyaṇīyasaṃhitāyāṃ dvitīye tretāsantāne bhādraśuklā'ṣṭamyāṃ yajñe sarvakarmaṇāmantimāhutiparyantānāṃ karaṇaṃ bhojanaṃ tato rāyavākakṣakanṛpārthito haristadrājyaṃ viṣaturīyadvīpaṃ dvinaskaṃ milvilāṃ ca gatvā pāvayitvopadiśya rātrau् punarmakhabhūmimājagāma viśaśrāmetyādinirūpaṇanāmā navādhikadviśatatamo'dhyāyaḥ || 209 ||
[Analyze grammar]