Chapter 205

śrīkṛṣṇa uvāca |
śṛṇu tvaṃ rādhike prātarmaṇḍape kuṇḍasannidhau |
rāyakinnaranṛpatirditrimānāyanarṣiṇā || 1 ||
[Analyze grammar]

samaṃ samāyayau patnyā sahito yajamānakaḥ |
rāyarokīśvaro rājā mahākāñcanakarṣiṇā || 2 ||
[Analyze grammar]

tathā svapatnyā sahitaḥ kuṇḍasannidhimāyayau |
rāyaraṇajidbhūpaśca ālrāyasarṣiṇā samam || 3 ||
[Analyze grammar]

patnyā yutastathā kuṇḍasannidhau maṇḍape yayau |
rāyavākakṣako rājā cārulāṣarṣiṇā samam || 4 ||
[Analyze grammar]

patnyā yutastathā kuṇḍasannidhau maṇḍape yayau |
rāyamārīśabhūpaśca dānavarṣiyuto makhe || 5 ||
[Analyze grammar]

patnyā sākaṃ tathā kuṇḍasannidhau maṇḍape yayau |
rāyabāleśvaro rājā mālāvanarṣisaṃyutaḥ || 6 ||
[Analyze grammar]

rājñyā sākaṃ yayau kuṇḍasannidhau maṇḍape tadā |
rāyalambārabhūpaśca rūpartuṛṣiṇā saha || 7 ||
[Analyze grammar]

patnyā yuto yayau yajñe kuṇḍasya sannidhau tadā |
rāyanavārkabhūpaśca vāśṛṃgatanukarṣiṇā || 8 ||
[Analyze grammar]

patnyā sākaṃ yayau yajñamaṇḍape kuṇḍasannidhau |
rāyahuṇḍeśanṛpatirvīrākajanakarṣiṇā || 9 ||
[Analyze grammar]

samaṃ patnyā tvāyayau ca maṇḍape kuṇḍasannidhau |
rāyakūpeśabhūpaśca heyatānarṣiṇā saha || 10 ||
[Analyze grammar]

patnyā sākaṃ yayau yajñamaṇḍape kuṇḍasannidhau |
ityevaṃ daśa rājānau daśakuṇḍān nijīkṛtān || 11 ||
[Analyze grammar]

pratyekasyaiva kuṇḍasya niṣeduḥ sannidhau tadā |
ācāryasya tadā kuṇḍe śrīharirbālanaiṣṭhikaḥ || 12 ||
[Analyze grammar]

lomaśena tu sahito rāyakinnarabhūbhṛtā |
sapatnīkena sākaṃ vai nyaṣīdatparamāsane || 13 ||
[Analyze grammar]

anyakuṇḍarṣisahitā vedaprādhānikā nṛpāḥ |
yathāyogyaṃ lomaśoktā niṣeduryugalātmakāḥ || 14 ||
[Analyze grammar]

rādhike devaviprāśca bhūviprāḥ satyabhūsurāḥ |
prārabhanta tatastatra maṃgalāni śubhasvaraiḥ || 15 ||
[Analyze grammar]

anādiśrīkṛṣṇanārāyaṇaḥ śreṣṭhāsane sthitaḥ |
lakṣmīnārāyaṇaṃ devaṃ sarvatobhadramaṇḍale || 16 ||
[Analyze grammar]

asthāpayaddhariścaivaṃ sarvā mūrtīrnyadhāpayat |
svarṇamayaṃ ca garuḍaṃ dvārapālāṃśca pārṣadān || 17 ||
[Analyze grammar]

asthāpayacchaktiyuktān harirviṣṇostu sannidhau |
gaṇeśasthāpanaṃ caiśānyāṃ tu rudrasya pīṭhakam || 18 ||
[Analyze grammar]

pūrve kṣetrapīṭhaṃ cāgneyyāṃ śaktiprapīṭhakam |
dakṣe gaṇeśapīṭhaṃ nairṛtyāṃ ca vāstupīṭhakam || 19 ||
[Analyze grammar]

vāyavyāṃ yoginīpīṭhaṃ snānapīṭhaṃ tathottare |
grahapīṭhāni sarvāṇi koṇamadhyagagarbhake || 20 ||
[Analyze grammar]

nyasya tatra ca devāṃstānasthāpayat pareśvara |
kuṇḍamaṇḍapavedīśca prokṣyadravyāṇi maṇḍape || 21 ||
[Analyze grammar]

asthāpayacca mukhyāni kaṇāṃśca samidhastathā |
yavavrīhikuśān dūrvādadhicandanasarṣapān || 22 ||
[Analyze grammar]

siddhārtharocanāścāpi phalāni śarkarāstathā |
gandhakusumapūgāni dhūpadīpādikāṃstathā || 23 ||
[Analyze grammar]

ācāryo lomaśastatra cakāra svastikaṃ śubham |
vastrorṇāmudrikāpātramadhuparkādikāṃstathā || 24 ||
[Analyze grammar]

hiraṇyā''rārtrikāsnānapātraśaṃkhadharādikān |
candanāgurukastūrīkarpūrakuṃkumāni ca || 25 ||
[Analyze grammar]

ājyasthālīṃ carusthālīṃ tandūlān bhājanāni ca |
upavītaṃ cāsanāni mudrābhūṣāsumāni ca || 26 ||
[Analyze grammar]

tāmbūlakaṃ tathā tatrā'pekṣitāni nyadhāddhariḥ |
yajamānaḥ sapatnīkaḥ snānaśālāṃ yayau tataḥ || 27 ||
[Analyze grammar]

snānaṃ kṛtvā maṇḍape tvāyayau gaṇapatiṃ tataḥ |
pupūja pracakārāpi mātṛśrāddhaṃ tato nṛpaḥ || 28 ||
[Analyze grammar]

mātṛpūjāṃ vidhāyā'tha dīkṣāṃ jagrāha vaiṣṇavīm |
prāyaścittaṃ cakārā'tha vṛddhiśrāddhaṃ tato'karot || 29 ||
[Analyze grammar]

graharakṣāṃ dhvajāniveśanaṃ śibirabandhanam |
pracakāra tataścācāryādīnāṃ varaṇaṃ nṛpaḥ || 30 ||
[Analyze grammar]

deśakālau samuccārya madhuparkaṃ tato'karot |
ṛtvijāṃ varaṇaṃ cakre brahmaṇo varaṇaṃ tathā || 31 ||
[Analyze grammar]

ācāryavaraṇaṃ cāpi tathā''sanāni sandado |
saṃvaraṇopahārāṃśca niṣkrayaṃ dravyamityapi || 32 ||
[Analyze grammar]

varaṇaṃ jāpakānāṃ ca pāṭhakānāṃ tathāvidham |
sahasrāyutakoṭīnāṃ viprāṇāṃ varaṇaṃ vyadhāt || 33 ||
[Analyze grammar]

cāturvedā brāhmaṇāśca mantrān jepurnijocitān |
puṇyāhavācanaṃ cakrurviprāścāgamavedinaḥ || 34 ||
[Analyze grammar]

svastivāco'vadaṃścāpyāśīrvādāṃśca dadustataḥ |
saptarṣayastathā lakṣamitāḥ sarve maharṣayaḥ || 35 ||
[Analyze grammar]

vardhinīkalaśaṃ tīrthavāribhṛtaṃ nṛpo'mucat |
svarṇa tatra pallavāṃśca ratnānyapi nyadhāttataḥ || 36 ||
[Analyze grammar]

atha śrīlomaśastatrānādikṛṣṇanarāyaṇam |
rādhālakṣmīprabhāśrīmāṇikībhūpārvatīyutam || 37 ||
[Analyze grammar]

sauvarṇa sthāpayāmāsā'pūjayacca vidhānataḥ |
svayaṃ śrīmadvālakṛṣṇaḥ sākṣāttatra vyarājata || 38 ||
[Analyze grammar]

śrīkṛṣṇaṃ rādhikāyuktaṃ nārāyaṇaṃ śriyāyutam |
sauvarṇaṃ sthāpayāmāsa sākṣāt so'pi hyupasthitaḥ || 39 ||
[Analyze grammar]

avatārān śaktiyuktān sthāpayāmāsa vai tadā |
sarve sākṣādatiṣṭhantā'dhvare tatra nijāsane || 40 ||
[Analyze grammar]

vāsudevādikavyūhān sthāpayāmāsa vai tadā |
catvāraste gocarā vai hyupātiṣṭhanta cāpare || 41 ||
[Analyze grammar]

bhūmānaṃ ca hiraṇgarbhaṃ vairājaṃ cāvṛtīśvarān |
sthāpayāmāsa te sarve sākṣāttatrāpyupasthitāḥ || 42 ||
[Analyze grammar]

svasvaśaktiyutāḥ svasvapārṣadādisamanvitāḥ |
īśāno viśvasṛṭ viṣṇuḥ svasvaśaktisamanvitāḥ || 43 ||
[Analyze grammar]

āvāhitāḥ samāgatyā'rājanta gocarāśca te |
mahāmāyā pūruṣaśca tattvānyapi ca tāttvikāḥ || 44 ||
[Analyze grammar]

śaktayaścāpi sākṣādāvāhitāścopatasthire |
brahmapriyāḥ samastāścāvāhitā āyayurmakhe || 45 ||
[Analyze grammar]

sākṣātsarvā vyarājanta maṇḍape tu nijāsane |
brahmā brahmapade'tiṣṭhat sākṣāllokapitāmahaḥ || 46 ||
[Analyze grammar]

rudro rudrapade'tiṣṭhaccaikādaśasvarūpavān |
rudrāṇībhiryuto gaṇairgaṇeśakārtikādibhiḥ || 47 ||
[Analyze grammar]

sākṣānniṣeduḥ sauvarṇā api divyā nijāsane |
āvāhitāśca pitarastathā maharṣayo'pi ca || 48 ||
[Analyze grammar]

sākṣādupasthitāstatra nijāsaneṣu cādhvare |
maruto vasavaḥ sādhyā viśvedevāḥ sureśvarāḥ || 49 ||
[Analyze grammar]

digīśvarā lokapālā āvāhitāśca gocarāḥ |
patnīyutāḥ samāgatya niṣeduścāsaneṣu te || 50 ||
[Analyze grammar]

siddhayo nidhayaścāpi grahāścopagrahādayaḥ |
tārakāścāvāhitāśca sastriyo gocarāstadā || 51 ||
[Analyze grammar]

sākṣānniṣeduḥ sarve te svāsaneṣu samāhitāḥ |
saptarṣayo vālakhilyāḥ kṛttikāśca diśastathā || 52 ||
[Analyze grammar]

ādityāḥ kāmadevaśca manavastithayastathā |
āvāhitāstu sākṣātte hyupātiṣṭhanta cādhvare || 53 ||
[Analyze grammar]

nakṣatrāṇi kalāścāpi trayastriṃśatsurānugāḥ |
guṇā yoginikācakraṃ tīrthāni saritastathā || 54 ||
[Analyze grammar]

sāgarā dīrghikāḥ kūpāḥ sarāṃsi parvatādayaḥ |
āvāhitāścāyayuste sākṣātsarve sumūrtayaḥ || 55 ||
[Analyze grammar]

yakṣāśca rākṣasāścāpi bhūtāḥ pretāḥ piśācakāḥ |
vināyakāśca kūṣmāṇḍā vetālādyā mahādhvare || 56 ||
[Analyze grammar]

svasvakuṭumbasahitāḥ sākṣāt tatrāyayurmakhe |
āvāhitā niṣeduśca nirbhayā maṇḍape tadā || 57 ||
[Analyze grammar]

sūtamāgadhabandyādyā bhāṭacāraṇakinnarāḥ |
vidyādharāḥ kiṃpuruṣā gandharvāḥ siddhakoṭayaḥ || 58 ||
[Analyze grammar]

sākṣātsamāvāhitāste cāgatā maṇḍape sthitāḥ |
cāturvarṇā yatayaśca sādhavaḥ sanakādayaḥ || 59 ||
[Analyze grammar]

āvāhitā naiṣṭhikāśca sarve te maṇḍape sthitāḥ |
garuḍaśca tathā haṃso hastī cāśvaśca kesarī || 60 ||
[Analyze grammar]

vṛṣabhaśconduruścaite āvāhitāḥ samāyayuḥ |
dattāsaneṣu sākṣātte vyarājanta sumaṇḍape || 61 ||
[Analyze grammar]

hanumānādayaściraṃjīvāḥ sākṣāttu maṇḍape |
āvāhitā āyayuśca sarve vai brahmavarcasaḥ || 62 ||
[Analyze grammar]

varṇāstathā''śramā dharmā dharmarājo'nugā'nugaḥ |
citraguptādisahitaḥ śrāvaṇādyaiḥ samāyutaḥ || 63 ||
[Analyze grammar]

kālaḥ samvatsarādyāśca yugā mūrtiyutāśca te |
āvāhitā atiṣṭhanta maṇḍape sarvagocarāḥ || 64 ||
[Analyze grammar]

jalasthāśca sthalasthāśca jantavo'pi tṛṇādayaḥ |
vallikāśca drumādyāśca kalpakandāśca mūlikā || 65 ||
[Analyze grammar]

stambādyāścāyayuścāvāhitāḥ sākṣāddhi maṇḍape |
gṛhadevā grāmadevā vanadevāśca sīmagāḥ || 66 ||
[Analyze grammar]

āraṇyakāstathā devāḥ śākhātoraṇadevatāḥ |
staṃbhadevā dvāradevāḥ kuṇḍadevāśca vai tadā || 67 ||
[Analyze grammar]

dehalīdevatāścāpi pālikādevatāstathā |
prākāradevatāḥ sarve sarvā gopuradevatāḥ || 68 ||
[Analyze grammar]

prāṃgaṇadevatāḥ koṇadevatā bhāradevatāḥ |
pāṭadevā dhvajadevā ghaṭadevāstadā makhe || 69 ||
[Analyze grammar]

daṇḍadevāḥ pīṭhadevāḥ svasvadevīsamanvitāḥ |
āvāhitāstu te sākṣānmūrtimanto'bhavan sthitāḥ || 70 ||
[Analyze grammar]

dharmadevo'tha tatpatnyaḥ putrīputrasamanvitāḥ |
mūrtimatyaḥ samāgatyā''vāhitāstatra cāyayuḥ || 71 ||
[Analyze grammar]

dānavā daityavargāśca kaśyapajāḥ prajādayaḥ |
pakṣiṇaḥ paśavaścāpi jantavaśca sarīsṛpāḥ || 72 ||
[Analyze grammar]

sarpā nāgādayaḥ sarve āvāhitāḥ samāyayuḥ |
mūrtimanto maṇḍape te nyaṣīdan vihitāsane || 73 ||
[Analyze grammar]

sarvadhāmanivāsāśca sarvalokanivāsinaḥ |
sarvasṛṣṭinivāsāścāvāhitāstatra maṇḍape || 74 ||
[Analyze grammar]

mūrtimanto hyatiṣṭhanta dattāsaneṣu cetanāḥ |
jaḍāśca jaḍavargāśca dīnānāthāśca dehinaḥ || 75 ||
[Analyze grammar]

dattayogā maṇḍape te cāyayurdhanyavādinaḥ |
kāśāśca kuśāśca patrāṇi śalākāḥ samidhastathā || 76 ||
[Analyze grammar]

havyānyapi ca kavyāni phalapuṣpakaṇādayaḥ |
rasā dravyāṇi miṣṭāni miṣṭānnāni tvacastathā || 77 ||
[Analyze grammar]

gandhasārāṇi sarvāṇi samūrtāni tadā'dhvare |
maṇḍape cāyayuścāvāhitāḥ sākṣāt sthitāśca te || 78 ||
[Analyze grammar]

kāmadhenugaṇāścāpi kalpavallyaśca mūrtayaḥ |
kalpadrumāścāyayurvai cintāmaṇaya ityapi || 79 ||
[Analyze grammar]

mūrtimantaḥ kalpakośā akṣayapātrakoṭayaḥ |
hetayaḥ śaṃkhacakrādyā makhānāṃ hetayastathā || 80 ||
[Analyze grammar]

sādhanāni samastāni pūjāṃgapātrakoṭayaḥ |
āvāhitā mūrtimantaḥ sarve'tiṣṭhanta maṇḍape || 81 ||
[Analyze grammar]

mantrā vedāśca vidhayaḥ karmakāṇḍaprakārakāḥ |
śuddhayo'pūrvadevāśca mūrtimantastu maṇḍape || 82 ||
[Analyze grammar]

āvāhitāścāyayuste'tiṣṭhanta vihitāsane |
svarā vidyāḥ śāradādyā brahmavidyādikāstathā || 83 ||
[Analyze grammar]

gītayaḥ sāmasūktāni svāhāsvadhāvaṣaṭkulam |
agnayaḥ sarvajātīyā ākāritāśca maṇḍape || 84 ||
[Analyze grammar]

mūrtimanto nyaṣīdan vai dattāsaneṣu te tadā |
devadaityaguravaśca vyāsā vyākhyānamūrtayaḥ || 85 ||
[Analyze grammar]

tapāṃsi yogavidhayo jñānaṃ vairāgyamityapi |
bhaktirvibhūtayaḥ sarvā ākāritāḥ samāyayuḥ || 86 ||
[Analyze grammar]

pratyakṣā yoṣitāṃ vargā atiṣṭhanta samūrtayaḥ |
vighnā avighnarūpāste rogā arogarūpiṇaḥ || 87 ||
[Analyze grammar]

duḥkhānyadūḥkharūpāṇi ākāritāni cāyayuḥ |
dharmavaṃśāstathā'dharmastatpatnyaścāpi vai tadā || 88 ||
[Analyze grammar]

tadvaṃśyāśca makhe te'pi saumyā bhūtvā samāyayuḥ |
adharmo dharmarūpo'bhūttadā rūpaṃ vivartayan || 89 ||
[Analyze grammar]

ānandaśca sukhaṃ śāntistṛptiḥ santoṣakādayaḥ |
āvāhitāścāyayuśca mūrtayo maṇḍape tadā || 90 ||
[Analyze grammar]

śabdādyā viṣayāścāpi ṣaṭkośādyāśca dehagāḥ |
samūrtāścāyayuḥ sarve ākāritāstu maṇḍape || 91 ||
[Analyze grammar]

rādhike maṇḍapaścaivaṃ sarvasṛṣṭisamanvitaḥ |
śobhane'nādikṛṣṇasyopasthitau divyadhāmavat || 92 ||
[Analyze grammar]

anādiśrīkṛṣṇanārāyaṇe śrīkṛṣṇavallabhe |
sarvasvāmini yatrasthe tatra kiṃ pakṣapātanam || 93 ||
[Analyze grammar]

jaḍāśca cetanāścāpi jaḍacetanamiśrakāḥ |
sarve vaṃśā hareḥ santi sarveṣu samavartinaḥ || 94 ||
[Analyze grammar]

rājasāstāmasāścāpi sāttvikā dehino'pi ca |
santaścidaśca sarve vai ānandā mūrtiyoginaḥ || 95 ||
[Analyze grammar]

āvāhitāścāyayuste nyaṣīdan vai sumaṇḍape |
dātā hotā svayaṃ kṛṣṇaḥ parameśaḥ sanātanaḥ || 96 ||
[Analyze grammar]

tatra nyūnaṃ na vai cāsti saṃkoco'pi vikāsitaḥ |
dāridryaṃ prāptamevodāratāṃ vivartitaṃ tadā || 97 ||
[Analyze grammar]

nakāro'pi gatastatra hākāratāṃ vivartitaḥ |
saṃśayo'pi gatastatra niścayatāṃ vivartitaḥ || 98 ||
[Analyze grammar]

bhayaṃ vivṛttaṃ sahasā'prāpannirbhayatāṃ tadā |
nyūnatveṃ vivṛtaṃ cāpyadhikatāṃ tu samāsadat || 99 ||
[Analyze grammar]

ityevaṃ rādhike tatra maṇḍape devatādikāḥ |
mūrtimantaḥ samāgatya niṣeduḥ sthāpane nije || 100 ||
[Analyze grammar]

ya evā'dṛśyarūpaiśca grahītārasta eva ha |
sākṣādupasthitāstatra bālakṛṣṇecchayā'khilāḥ || 101 ||
[Analyze grammar]

ityevaṃ sarvadevānāṃ daśakuṇḍeṣu maṇḍape |
yathāpekṣamabhūd rādhe sthāpanā vedikādiṣu || 102 ||
[Analyze grammar]

sarve nṛpāstathā'kurvan karma yajñīyameva tat |
tataḥ pūjā pravṛttā ca tattadṛṣipraṇoditā || 103 ||
[Analyze grammar]

iti śrīlakṣmīnārāyaṇīyasaṃhitāyāṃ dvitīye tretāsantāne rājñāmṛṣīṇāṃ maṇḍape samāgamanaṃ devapīṭhānāṃ sthāpanā ṛtvigācāryādivaraṇaṃ pratyakṣadevānāṃ virājamānatā cetyādinirūpaṇanāmā pañcādhikadviśatatamo'dhyāyaḥ || 205 ||
[Analyze grammar]