Lakshminarayana Samhita [sanskrit]

by Shwetayan Vyas | 1,169,834 words | ISBN-10: 8170801818 | ISBN-13: 9788170801818

The Lakshminarayana Samhita Chapter 203 (Sanskrit text), including grammatical analysis, glossary and relevant print editions. The Lakshmi-narayana-samhita is an encyclopaedic work devoted to Narayana although it deals with various deities. The work is written in Puranic style and divided into four books according to the four Yugas. In total, the work consists of roughly 120,000 metrical verses.

śrīkṛṣṇa uvāca |
rādhike vai tataḥ prātaḥ kṛtāhnikaḥ kṛtādanaḥ |
kṛtābhivṛddhasevaśca bālakṛṣṇaḥ sabhāṃ yayau || 1 ||
[Analyze grammar]

rājā tatrā''yayau tūrṇaṃ pūjādarśanalālasaḥ |
kṛtvā pūjāṃ candanādyairhariṃ tadā''ha sannatiḥ || 2 ||
[Analyze grammar]

adya kartavyaviṣayaṃ tvājñāpaya dayānidhe |
sarva śaktyā sādhayiṣye kratvarthaṃ sevanaṃ prabho || 3 ||
[Analyze grammar]

haristamāha sauvarṇī pratimāṃ śobhanāṃ śubhām |
lakṣmīnārāyaṇasyā'dya prakāraya saratnakām || 4 ||
[Analyze grammar]

navāṃgulāṃ caturbāhuṃ nārāyaṇasya mūrtikām |
lakṣmyāścāṣṭāṃgulāṃ cāpi prakāraya nu kānakīm || 5 ||
[Analyze grammar]

mama pratimāṃ ramyāṃ ca prakāraya daśāṃgulām |
māṇikīṃ svarṇamūrtiṃ ca matkarṇordhvāṃ prakāraya || 6 ||
[Analyze grammar]

lakṣmīṃ matskandhaparyantāṃ matkarṇordhvā ca padmajām |
matskandhordhvāṃ ramāṃ cāpi rādhāṃ matkaṇṭhakocchrayām || 7 ||
[Analyze grammar]

amarīśāṃ tava kanyāṃ jyeṣṭhāṃ manmukhakordhvakām |
rājan kāraya sauvarṇīṃ yajñārthaṃ bahuśobhanām || 8 ||
[Analyze grammar]

mūrtyaṣṭakaṃ kārayitvā satīśivau prakāraya |
sauvarṇau ca gaṇanāthaṃ sauvarṇaṃ samprakāraya || 9 ||
[Analyze grammar]

nandinaṃ kārtikeyaṃ ca tathā samyak prakāraya |
pañcamūrtīstathā rājan kārayitvā ca bhāskaram || 10 ||
[Analyze grammar]

viṣṇuṃ ca kānakaṃ brahmāṇaṃ prakāraya kānakam |
kaṃbharāṃ mātaraṃ cāpi gopālaṃ pitaraṃ mama || 11 ||
[Analyze grammar]

prakāraya ca sauvarṇaṃ pañcakaṃ śobhanaṃ tataḥ |
vāstudevaṃ kānakaṃ ca prakāraya viśālakam || 12 ||
[Analyze grammar]

yūthaṃ ca kānakaṃ sarvadevāvāsaṃ prakāraya |
ityājñāṃ pradadau kṛṣṇo devagṛhaṃ vidhāpaya || 13 ||
[Analyze grammar]

ājñāṃ labdhvā nṛpastūrṇaṃ kārayāmāsa mūrtikāḥ |
bālakṛṣṇo'tha sasmāra nāradaṃ lokavedinam || 14 ||
[Analyze grammar]

sanatkumāraṃ sādhuṃ ca garuḍaṃ vāhanaṃ nijam |
cakraṃ sudarśanaṃ cāpi saccidānandayoginam || 15 ||
[Analyze grammar]

pañcaite divyabodhāśca tūrṇaṃ tatrāyayuḥ puraḥ |
kṛtvā'rhā daṇḍavaccakrurājñāṃ yogyāṃ samārthayan || 16 ||
[Analyze grammar]

bālakṛṣṇastadā tebhyo dadau prasādabhojanam |
pānaṃ hārān karau mūrdhni tataḥ kāryaṃ samādiśat || 17 ||
[Analyze grammar]

āmantraṇadalaṃ tebhyo dadau yajñārthabodhakam |
saptamyāṃ vaiṣṇavo yajñaḥ prārapsyate'tra bhūtale || 18 ||
[Analyze grammar]

amarīṇāṃ pradeśeṣu kenāṭakābhidhe sthale |
maṇisevānagaryāḥ sannidhau viśālabhūtale || 19 ||
[Analyze grammar]

śeṣakāṣṭhāvanānadyāḥ saṃgame vinipārage |
sarastīre'tra dhāmasthairmuktairmuktābhirutsave || 20 ||
[Analyze grammar]

avatāraiḥ samastaiśca tathā taddhāmapārṣadaiḥ |
sarvāvatāriṇībhiśca pārṣadānībhirādarāt || 21 ||
[Analyze grammar]

vyūhairvyūhānikābhiśca nārāyaṇaiḥ samastakaiḥ |
nārāyaṇībhiḥ sarvābhirāgantavyaṃ makhotsave || 22 ||
[Analyze grammar]

viṣṇubhirvaiṣṇavībhiśceśvarairīśvaraśaktibhiḥ |
vairājena ca vairājñyā satyā gaṇaiḥ śivena ca || 23 ||
[Analyze grammar]

māyayā māyikaistatvaiḥ puruṣeṇāpi sarvathā |
āgantavyaṃ mahotsāhairbrahmaṇā brahmaśaktibhiḥ || 24 ||
[Analyze grammar]

brahmacāriyatibhiśca ṛṣibhiḥ sādhavaistathā |
pitṛbhirmātṛbhiścāpi devairdevībhirityapi || 25 ||
[Analyze grammar]

dikpālairlokapālaiścāgantavyaṃ svapriyāyutaiḥ |
suraiḥ surābhiḥ svargasthairbhuvarlokanivāsibhiḥ || 26 ||
[Analyze grammar]

grahanakṣatratārābhirgrahaiḥ pretapiśācakaiḥ |
bhūtakuṣmāṇḍakairvināyakairgaṇaiḥ samantataḥ || 27 ||
[Analyze grammar]

yakṣai rakṣobhiścaivāgantavyaṃ daityaiśca dānavaiḥ |
kāśyapībhiḥ prajābhiśca vetālakaiśca śaktibhiḥ || 28 ||
[Analyze grammar]

rājasaistāmasaiścāpi mānavaiḥ sakuṭumbakaiḥ |
yatibhiryogibhiścāpi vṛkṣaistṛṇaiśca vallibhiḥ || 29 ||
[Analyze grammar]

stambairghāsairjantubhiśca jarājairaṇḍajairapi |
svedajaiḥ kaṇajaiścāpi kandajairjalajaistathā || 30 ||
[Analyze grammar]

āgantavyaṃ parvataiśca nadībhiśca sarovaraiḥ |
tīrthairvanairaraṇyaiśca khātā'khātaiḥ samudrakaiḥ || 31 ||
[Analyze grammar]

āgantavyaṃ kṣetrapālairgṛhadevaiḥ samantataḥ |
kuladevairāyatanairgandharvaiścāraṇādibhiḥ || 32 ||
[Analyze grammar]

sūtairmāgadhakairbandījanairnartakanāṭyibhiḥ |
bahurūpadharairmallairvidyādhraiḥ kinnarādibhiḥ || 33 ||
[Analyze grammar]

gaṇairgaṇikavargaiścā'nāthaiśca bhikṣukairapi |
vanibhiścātalāvāsaiḥ pātālāntanivāsibhiḥ || 34 ||
[Analyze grammar]

phaṇibhirbalibhiścāpi samāgantavyamādarāt |
śāstrairvedaiśca vidyābhirvyavahāraiḥ samantataḥ || 35 ||
[Analyze grammar]

jaḍaiśca cetanaiḥ sarvairāgantavyaṃ mahāmakhe |
ahaṃ brahmapatirbrahmapriyāsvāmī pareśvaraḥ || 36 ||
[Analyze grammar]

avatārī bālakṛṣṇo nimantrayāmi cādhvare |
devadaityagurubhiścācāryairaiśvaryaśālibhiḥ || 37 ||
[Analyze grammar]

viprairmunibhirbrāhmībhiścāgantavyaṃ makhe mama |
saptamyāṃ prātarārabhyaikādaśyāṃ bhādraśuklake || 38 ||
[Analyze grammar]

makhakāryaṃ mataṃ śreṣṭhaṃ cāgantavyaṃ kuṭumbibhiḥ |
anāgatānāṃ śapathaṃ dadāmyahaṃ narāyaṇaḥ || 39 ||
[Analyze grammar]

avaśyaṃ cāmarīdeśaṃ pavitrayantu pāvanāḥ |
naranārāyaṇādyāśca śeṣanārāyaṇādayaḥ || 40 ||
[Analyze grammar]

svasvamuktādisahitāḥ samāyāntu sukhapradāḥ |
śrīramārādhikāgaṃgāśāradātulasīprabhāḥ || 41 ||
[Analyze grammar]

tattaddhāmanivāsinyaḥ samāyāntu mahādhvare |
yoginyo mātaraḥ sarvāḥ kuladevyaśca caṇḍikāḥ || 42 ||
[Analyze grammar]

sarvā vai brahmacāriṇyaḥ samāyāntu mamā'dhvare |
sapatikāḥ saputrāśca savaṃśāḥ sānugāḥ samāḥ || 43 ||
[Analyze grammar]

āyāntu cādhvare'nādikṛṣṇanārāyaṇā'rthitāḥ |
samājo'tra mahān bhāvī brahmāṇḍeśvaraśobhitaḥ || 44 ||
[Analyze grammar]

śatasahasravadanā brahmādyā viṣṇavo'pi ca |
tathottamāḥ samāyāntu sarve śrīvaiṣṇave'dhvare || 45 ||
[Analyze grammar]

āhvayāmyāmantrayāmyākārayāmyahamacyutaḥ |
parabrahmā'kṣarātītaḥ svāmiśrīkṛṣṇavallabhaḥ || 46 ||
[Analyze grammar]

ityevaṃ rādhike yajñā''mantraṇārthāṃ supatrikām |
dadau śrībālakṛṣṇo vai nāradādibhya eva tu || 47 ||
[Analyze grammar]

dadāvanantarūpāṇāṃ dhartṛtvaṃ paramādbhutam |
aiśvaryaṃ cāpi gatikāṃ sarvajñatvaṃ ca satvaram || 48 ||
[Analyze grammar]

sarve yayurharerājñāṃ pragṛhyāmantraṇārthikāḥ |
madhyāhne yamarājaṃ ca sasmāra parameśvaraḥ || 49 ||
[Analyze grammar]

yamalokaṃ bandhaśūnyaṃ kārayāmāsa cājñayā |
sarvān vimocayāmāsa jīvān yamavaśaṃgatān || 50 ||
[Analyze grammar]

yamadūtāṃstadā yajñe karmacārān cakāra ha |
evaṃ nirvartya bhagavān madhyāhne bhojanādikam || 51 ||
[Analyze grammar]

kārayāmāsa sarvebhyo makhārthibhyastataḥ svayam |
bubhuje'tha ca viśrāntiṃ lebhe kṣaṇaṃ tataḥ param || 52 ||
[Analyze grammar]

ādideśa haristatra brahmaṇe viṣṇave tathā |
śaṃkarāya ca sarveṣāmāgamyamānadehinām || 53 ||
[Analyze grammar]

makhārthināṃ narāṇāṃ ca nārīṇāṃ svāgatāya vai |
satyai lakṣmyai sarasvatyai cādideśa tathaiva ca || 54 ||
[Analyze grammar]

naranārāyaṇābhyāṃ cādideśa svāgatāya vai |
dharmadevāya ca vāsudevāyā'pyādideśa ca || 55 ||
[Analyze grammar]

svāgatārthaṃ hi sarveṣāmāgantukamakhārthinām |
atha śrīlomaśaṃ prāha bhāradvājaṃ tathā munim || 56 ||
[Analyze grammar]

divimānāyanaṃ cāpi gāṃgeyān yavakrītinaḥ |
bhavantaḥ svāgataṃ sarve kurvantu sarvadehinām || 57 ||
[Analyze grammar]

āgatānāṃ jalaiścānnaiḥ phalaiḥ puṣpaiśca mandiraiḥ |
āvāsanapradānaiścā'pekṣyavastubhirādarāt || 58 ||
[Analyze grammar]

kalpavṛkṣān kalpalatāḥ kalpamaṇīṃśca kalpagāḥ |
prāha sarvanivāseṣu yajñapattanake'bhitaḥ || 59 ||
[Analyze grammar]

upatiṣṭhantu sarvatra svāgatārthaṃ samanvitāḥ |
yathāpekṣaṃ yatheṣṭaṃ ca vidhāyāpi navaṃ navam || 60 ||
[Analyze grammar]

arpayantu mahīmānebhyastadā sārvavāñcchikam |
brahmahradaṃ ca virajāṃ rasakūpaṃ tathā'mṛtam || 61 ||
[Analyze grammar]

brahmasaro hariḥ prāha tiṣṭhantu ca sthale sthale |
sarvābhivāñcchitaṃ sarvaṃ peyaṃ samarpayantu vai || 62 ||
[Analyze grammar]

pavanaṃ vahnidevaṃ ca prāha vyajanado bhava |
uṣṇado bhava cāpyatra bahurūpadharo bhavān || 63 ||
[Analyze grammar]

vyoma prāha bhavānatra dūraśrutiṃ karotu vai |
siddhīḥ prāha bhavatyo'tra kurvantu prāpaṇādikam || 64 ||
[Analyze grammar]

evaṃ mantrāṃstadā prāha ghoṣayantu makhasthale |
maṃgalāni vicitrāṇi cāgatānāṃ hi mānane || 65 ||
[Analyze grammar]

śāradāśca tadā prāha kurvantu gītikāḥ śubhāḥ |
āgatānāṃ svāgatārthe vādyāni vādayantu vai || 66 ||
[Analyze grammar]

rājabhyaśca hariḥ prāha sainyaiścarantu mānanam |
svāgataṃ sarvalokānāmāgatānāṃ makhārthinām || 67 ||
[Analyze grammar]

vādyairyantradhvānakaiśca kurvantu bahumānanam |
viśvakarmāṇamāhūya bālakṛṣṇo jagāda ha || 68 ||
[Analyze grammar]

muktānāṃ tu nivāsān vai vyomni kṣaṇātprakalpaya |
avatāreśvarāṇāṃ ca tathā vyomni prakalpaya || 69 ||
[Analyze grammar]

devānāmṛṣivaryāṇāṃ vyomni pitṝṇāṃ kalpaya |
brahmāṇḍāntaravāsānā bhūtale yajñapattane || 70 ||
[Analyze grammar]

uttarottarabhūbhāgān prakalpaya kṣaṇānnanu |
divyāṃ dadāmi śaktiṃ te saṃkalpotthaphalātmikām || 71 ||
[Analyze grammar]

kalpaklṛptyabhidhāṃ śreṣṭhāṃ tayā sādhaya satvaram |
ityuktvā virarāmā'sau bhagavān svāsane'bhavat || 72 ||
[Analyze grammar]

tāvad rājā rāyarokīśvaraḥ saṃprārthayaddharim |
adya ced bhavato vāñchā mama rājyaṃ pavitraya || 73 ||
[Analyze grammar]

sphūrtinārīvanāṃ divyāṃ mahākañjīnadītaṭe |
nagarī me samāgatya dvimānāyanarāṣṭrakam || 74 ||
[Analyze grammar]

pavitraya harekṛṣṇa tavā''gamyaṃ na kiñcana |
tathāstviti hariḥ prāha pītvā jalaṃ suśītalam || 75 ||
[Analyze grammar]

vimānaṃ cārurohāpi mātrā pitrā samanvitaḥ |
lālāyanena sahito māṇakyā sahitastathā || 76 ||
[Analyze grammar]

pārṣadairdivyadehaiśca bhṛtyairdāsīśatairapi |
dvādaśabhiśca mukhyābhiḥ satībhiḥ sahito yayau || 77 ||
[Analyze grammar]

sphūrtinārīvanāpuryāmambarāt kṣaṇamātrataḥ |
rājā ṛṣiścakratuśca sanmānaṃ sahagau tadā || 78 ||
[Analyze grammar]

udyāne tvavatīryaiva rājasaudhasamīpataḥ |
sainyena svāgataṃ viṣṇoḥ kurutaḥ sma vidhānataḥ || 79 ||
[Analyze grammar]

pādau prakṣālya vidhinā papaturjalamamṛtam |
candanaiḥ puṣpahāraiśca pupūjatustamādarāt || 80 ||
[Analyze grammar]

anyān sahagatāṃścāpi pupūjaturnṛpo muniḥ |
atha saudhe ninyatuśca śrīpatiṃ nṛpamandire || 81 ||
[Analyze grammar]

ārārtrikaṃ cakārā'sya rājñīdaśakameva tu |
kumārāśca kumāryaśca cakrurnirājanaṃ tataḥ || 82 ||
[Analyze grammar]

harirdivyaṃ darśanaṃ svaṃ caturbhujaṃ dadau ca tān |
āścaryacakitāścāsan kumāryaścaikaviṃśatiḥ || 83 ||
[Analyze grammar]

rājakanyā mātṛvaśyā mātrājñayā ca mohitāḥ |
varamālāṃ bālakṛṣṇakaṇṭhe samārpayaṃstadā || 84 ||
[Analyze grammar]

kṛtakṛtyāstā abhavan prāpya kāntaṃ janārdanam |
rājā tadutsavaṃ cakre rājasaudhe hi śobhanam || 85 ||
[Analyze grammar]

hareśca pādayordravyaṃ koṭisaṃkhyaṃ nyadhānnṛpaḥ |
yautakaṃ pradadau cāpi svarṇahārādikāṃstathā || 86 ||
[Analyze grammar]

bhūṣāmbarāṇi pradadau nīrājanamakārayat |
natvā hariṃ tataḥ śīghraṃ kṣamāmayācata prabhoḥ || 87 ||
[Analyze grammar]

pāvito'haṃ dhṛto haste kanyā svīkṛtya me tvayā |
naijīkṛto'smi bhagavan sadā rakṣaya māyikāt || 88 ||
[Analyze grammar]

rājñyastato hariṃ natvā candrakaṃ bhālake vyadhuḥ |
kṣamāṃ harerayācanna samuddhareti cārthayan || 89 ||
[Analyze grammar]

hariḥ prāhoddhariṣye'haṃ nayiṣye'nte paraṃ padam |
tato divyasvarūpaṃ svaṃ caturbhujaṃ vyalopayat || 90 ||
[Analyze grammar]

sarvato rājasaudheṣu vihṛtya ca tataḥ param |
pradhānānāṃ gṛhāṇyeva gatvā'pāvayadacyutaḥ || 91 ||
[Analyze grammar]

kṛtāṃ pūjāṃ parigṛhya sainyena śobhitaḥ prabhuḥ |
sphūrtinārīvanāpuryāṃ rājamārge gato'bhavat || 92 ||
[Analyze grammar]

darśakaiḥ pūjakaiścāpi prajājanaiḥ supūjitaḥ |
vandito'rcitapādaśca dravyādibhiḥ samarpitaḥ || 93 ||
[Analyze grammar]

amarībhiryaśogānaiḥ śrāvito rañjito'rcanaiḥ |
vardhitaścāśiṣā puṣpairvikīrito'timānitaḥ || 94 ||
[Analyze grammar]

jayaśabdairvādyaśabdaiḥ kīrtitaḥ parameśvaraḥ |
netrapadmaistathā pīto bhāvaiścākarṣito yayau || 95 ||
[Analyze grammar]

pradhānāḥ śreṣṭhinaḥ sarve prajājanāśca yoṣitaḥ |
daduḥ pūjāṃ parigṛhya bhramitvā nagarīṃ tataḥ || 96 ||
[Analyze grammar]

rājasaudhaṃ samāgamya mahākāñcījalaṃ papau |
mahākāṃcananāmānaṛṣiṃ sammānayan prabhuṃ || 97 ||
[Analyze grammar]

dravyaṃ tasmai dadau tatra rājā munirdhanaṃ tu tat |
yajñārthaṃ tu vimāne vai kṛtvā'prāpayadadhvaram || 98 ||
[Analyze grammar]

harirvimānamāruhya kuṭumbasahitastadā |
rājñā rājñyā kanyakābhiḥ saha dvimānarāṣṭrakam || 99 ||
[Analyze grammar]

bhramitvā vyomamārgeṇa dṛṣṭvā deśapradeśakān |
vinipārasarastīraṃ sāyaṃpūrvaṃ samāyayau || 100 ||
[Analyze grammar]

rājasaudhe tvavatīrya viśrāntiṃ prayayau hariḥ |
kanyakāstā brahmasatyaḥ kāntāsu vāsamācaran || 101 ||
[Analyze grammar]

rāyarokīśvaro mahākāñcanarṣirdhanāni vai |
dadaturyajñakāryārthaṃ kuberāya tadā hyubhau || 102 ||
[Analyze grammar]

athākāśe mahīmānavimānāni mahāmbarāt |
akṣarāccāpi golokād vaikuṇṭhādamṛtādapi || 103 ||
[Analyze grammar]

avyākṛtādīśalokādvairājācca hiraṇmayāt |
satyāt svargājjanādeśca merordigbhyaḥ samantataḥ || 104 ||
[Analyze grammar]

puryaṣṭakād bhuvanānāmantarālebhya āyayuḥ |
pātālebhyastrisṛṣṭibhyo vimānāni samāyayuḥ || 105 ||
[Analyze grammar]

āmantritānāṃ yānāni koṭyarbudāni cāyayuḥ |
ambaraṃ channabhāvaṃ vai prāptaṃ vimānakoṭibhiḥ || 106 ||
[Analyze grammar]

svargaṃ svargaṃ mahāsvargaṃ brahmasvargaṃ tadā'bhavat |
sūryavatkāśamānaṃ vai divaṃ dvitīyakaṃ hyabhūt || 107 ||
[Analyze grammar]

rādhike jīvasṛṣṭiśceśvarasṛṣṭistathā parā |
brahmasṛṣṭiḥ sarvavidhā tvāyayau vai nimantraṇāt || 108 ||
[Analyze grammar]

niśā layaṃ gatā tatra śrīhareścaikaromake |
svāgataṃ sma prakurvanti brahmaviṣṇumaheśvarāḥ |
mahīmānāścāmbarāccāvatarantyucitasthalīḥ || 109 ||
[Analyze grammar]

iti śrīlakṣmīnārāyaṇīyasaṃhitāyāṃ dvitīye tretāsantāne rāyakinnaranṛpāya sauvarṇamūrtividhāpanādeśaḥ nāradādīnāṃ kuṃkumāmantraṇapatrikāyuktānāṃ sṛṣṭiṣu preṣaṇaṃ hareḥ rāyarokīśvaranṛparāṣṭragamanaṃ pūjanaṃ sphūrtinārīnagaryāṃ |
deśe ca bhramaṇaṃ punaryajñasthalāgamanaṃ mahīmānānāmāgamaścetyādinirūpaṇanāmā tryadhikadviśatatamo'dhyāyaḥ || 203 ||
[Analyze grammar]

Other editions:

Also see the following editions of the Sanskrit text or (alternative) English translations of the Lakshminarayana Samhita Chapter 203

Cover of edition (2011)

Shri Lakshmi Narayana Samhita
by Chowkhamba Sanskrit Series Office (2011)

शेतायनव्यास (Shwetayan Vyas)

Buy now!
Let's grow together!

For over a decade, this site has never bothered you with ads. I want to keep it that way. But I humbly request your help to keep doing what I do best: provide the world with unbiased truth, wisdom and knowledge.

Let's make the world a better place together!

Like what you read? Consider supporting this website: