Chapter 199

śrīkṛṣṇa uvāca |
śṛṇu tvaṃ rādhike śrīmadbālakṛṣṇo hariḥ svayam |
leparāṣṭranṛpaṃ sainyasahitaṃ bhuvyalokayat || 1 ||
[Analyze grammar]

svāgatārthaṃ sthitaṃ naije mahodyāne'tivistṛte |
rājadarśitamārgeṇa bhagavān kṛṣṇavallabhaḥ || 2 ||
[Analyze grammar]

vimānamambarāt pṛthvyāṃ muramāṣāpurītaṭe |
viśāle ramyabhāge cāvātārayat suśobhite || 3 ||
[Analyze grammar]

anyānyapi vimānāni cāvateruḥ samīpataḥ |
tadā vādyānyavādyanta jayanādāstathā'bhavan || 4 ||
[Analyze grammar]

gaurīṇāṃ gītikāścāsan prajānāṃ harṣaghoṣaṇāḥ |
vimānācca hariḥ śīghraṃ bahistatra samāyayau || 5 ||
[Analyze grammar]

rājñā ca prajayā rājñyā maharṣiṇā'rcitaḥ prabhuḥ |
hāraiḥ suśekharaiḥ puṣpaiścandanairakṣatādibhiḥ || 6 ||
[Analyze grammar]

anye'pi pūjitāstatra mahīmānāḥ prajājanaiḥ |
narayāne hariṃ rājā niṣādyā'nyān gajādiṣu || 7 ||
[Analyze grammar]

muramāṣānagaryāṃ cā'bhrāmayad bahumānataḥ |
rājavaṃśaḥ pradhānāśca śreṣṭhinaḥ paṇḍitā api || 8 ||
[Analyze grammar]

narā nāryo gopurādau rājamārge susaṃgame |
catvarādau ca śālāsu pūjayāmāsurādarāt || 9 ||
[Analyze grammar]

bahvībhistūpadābhiśca svarṇaratnavibhūṣaṇaiḥ |
anekadivyabhūṣābhiḥ kambalaiśca dhanaistathā || 10 ||
[Analyze grammar]

sthale sthale pracakruste nīrājanaṃ samarhaṇam |
gauryaḥ puṣpādibhiḥ kṛṣṇaṃ vardhayāmāsurīśvaram || 11 ||
[Analyze grammar]

evaṃ bhramitvā nagarīṃ rājasaudhaṃ sa āyayau |
sabhāṃ kṛtvā janānāha bhagavān hitakārakaḥ || 12 ||
[Analyze grammar]

saccidānandarūpo vai parameśaḥ sanātanaḥ |
pūjanīyo bhajanīyo mānavairmokṣakāṃkṣibhiḥ || 13 ||
[Analyze grammar]

satyaṃ vrataṃ paraṃ sādhu na satyād vidyate param |
hānidaṃ satyamevāpi vaktavyaṃ na kadācana || 14 ||
[Analyze grammar]

ahiṃsārthāya bhūtānāṃ dharmapravacanaṃ kṛtam |
dhāraṇād dharma ityāhurdharmeṇa vidhṛtāḥ prajāḥ || 15 ||
[Analyze grammar]

yaḥ syāddhāraṇasaṃyuktaḥ sa dharma itiniścayaḥ |
yaḥ syādahiṃsāsaṃyuktaḥ sa dharma itiniścayaḥ || 16 ||
[Analyze grammar]

hiṃsāyāṃ satyavacane'nṛtaṃ dharma itisthitiḥ |
anṛte'pi ca hiṃsāyāṃ dharma itisthitiḥ || 17 ||
[Analyze grammar]

satye'nṛte vā hiṃsāyāṃ maunaṃ dharma itisthitiḥ |
jīvarakṣā satyaśiṣṭā satyaṃ brahma yato matam || 18 ||
[Analyze grammar]

caurebhyo na dhanaṃ vācyaṃ satyaṃ tatra na bhūṣaṇam |
tebhyaḥ satyaṃ na cākhyeyaṃ sa dharma itiniścayaḥ || 19 ||
[Analyze grammar]

akūjanena cenmokṣo nā'vakūjet kathaṃcana |
avaśyaṃ kūjitavye vā svalpaṃ cānṛtamiśritam || 20 ||
[Analyze grammar]

dharma eva bhavettatra śreyaskaraṃ tadā'nṛtam |
śapatho'pi pravaktavyo yadi cauraiḥ pramucyate || 21 ||
[Analyze grammar]

prāṇātyaye vivāhe cānṛtaṃ satyaṃ taducyate |
arthasya rakṣaṇārthāya parasya prāṇadhāraṇe || 22 ||
[Analyze grammar]

anṛtaṃ satyamevā'sti dharmatattvaṃ nigūḍhakam |
sādhubhyo nā'nṛtaṃ vācyaṃ tārakāste hi dehinām || 23 ||
[Analyze grammar]

teṣvanṛtaṃ sadā pāpaṃ satyapūtaṃ tato vadet |
satyaṃ brahmasvarūpaṃ vai vrataṃ śreṣṭhatamaṃ matam || 24 ||
[Analyze grammar]

karmaṇā manasā vācā satyaṃ dharmaṃ samācaret |
satyavratasya duḥkhāni nopayānti kadācana || 25 ||
[Analyze grammar]

saṃyatātmā vitṛṣṇaśca duḥkhadurgaṃ taratyapi |
daṃbhācāravihīnaśca viṣayāṇāṃ vinigrahī || 26 ||
[Analyze grammar]

ahiṃsako nātivādī duḥkhadurge taratyapi |
dātā yācakatāhīno'tithisaṃpūjakastathā || 27 ||
[Analyze grammar]

anasūyo'tisevākṛt mātāpitrorguroḥ satām |
pāpahīno nyāyavṛttirduḥkhadurgaṃ taratyapi || 28 ||
[Analyze grammar]

satyavrato'nyakaṣṭasya nivārakaḥ śuciḥ sthiraḥ |
kuhakena vihīnaśca duḥkhadurgaṃ taratyapi || 29 ||
[Analyze grammar]

tāpaso brahmavarcaskaḥ śāntaḥ sattvātivartanaḥ |
trāsaśūnyo'bhayadaśca duḥkhadurgaṃ taratyapi || 30 ||
[Analyze grammar]

samadṛṣṭiśca sarvatra paraśrīvardhakastathā |
grāmyārthavinivṛttaśca duḥkhadurgaṃ taratyapi || 31 ||
[Analyze grammar]

sarvadevanamoyuktaḥ sadā kṛṣṇakathāśravaḥ |
śraddhadhānaḥ śāntacitto duḥkhadurgaṃ taratyapi || 32 ||
[Analyze grammar]

amānī mānado mānyo devarṣipitṛpūjakaḥ |
akrodhaḥ krodhaśamano duḥkhadurgaṃ taratyapi || 33 ||
[Analyze grammar]

jitajihvo jitaśiśno jitanārāyaṇo'pi ca |
jitatṛṣṇo jitavṛttirduḥkhadurgaṃ taratyapi || 34 ||
[Analyze grammar]

yatrā'haṃ padmaraktākṣaḥ pītavāsā janārdanaḥ |
suhṛd bhrātā ca mitraṃ ca sambandhī ca sukhapradaḥ || 35 ||
[Analyze grammar]

kāmbhareyo bālakṛṣṇo gopālabālako'cyutaḥ |
sthito'smi hitakṛd yatra bhaktasya hṛdi sannidhau || 36 ||
[Analyze grammar]

brahmapriyāpriyaḥ kāntaḥ śrīpatiryatra cāsmi tam |
māṃ hariryaścāśrayati duḥkhadurgaṃ taratyasau || 37 ||
[Analyze grammar]

satyo'haṃ satyadharmo'haṃ duḥkhānāṃ nāśako'pyaham |
māṃ viditvā''śrayantaśca duḥkhadurgaṃ tarantyapi || 38 ||
[Analyze grammar]

tasmād bhajata māṃ nityaṃ māmevāpsyatha dhāmni me |
ityuktvā pradadau mantraṃ bhagavān śaraṇārthine || 39 ||
[Analyze grammar]

rājñe cāpi prajābhyaśca tato rājā'rcayaddharim |
rājñī kanyāyutā kṛṣṇaṃ rādhe prāpūjayattadā || 40 ||
[Analyze grammar]

kanyaikā kṛṣṇakāntaṃ taṃ kare jagrāha bhāvataḥ |
vivāhavidhinā prāpya kṛtakṛtyā babhūva ha || 41 ||
[Analyze grammar]

sabhāṃ visarjayitvaiva sa rājā mahīmānakān |
bhojayāmāsa vividhānnāni rasya phalāni ca || 42 ||
[Analyze grammar]

utsavaṃ subhagaṃ cakre rājā bhādrasya cārjune |
tṛtīyāyā niśāyāṃ ca viśaśramustataḥ param || 41 ||
[Analyze grammar]

sarve prātaḥ kṛtasnānāścakruḥ pāyasabhojanam |
tāvad gāṃgeyaputryaścāyayustvarthayituṃ hareḥ || 44 ||
[Analyze grammar]

nārāyaṇaṃ namaskṛtya kanyāstā varadānakam |
vavrire bālakṛṣṇādvai tīrthīkartuṃ saridvarāḥ || 45 ||
[Analyze grammar]

snāhi nārāyaṇa kṛṣṇavallabhaśrīpate jale |
sarvā vayaṃ bhaviṣyāmastīrthātmikāstavāplavāt || 46 ||
[Analyze grammar]

haristathāstviti prāha dhṛtvā rūpāṇyanekaśaḥ |
kṛpayā prayayau śīghraṃ snātuṃ nadīṣu vai tathā || 47 ||
[Analyze grammar]

sarassu ca samudreṣu yayāvanekarūpadhṛk |
tathaikarūpataḥ kṛṣṇo rājate rājasannidhau || 48 ||
[Analyze grammar]

kolakākhyo mahārājo divyadṛṣṭyā pradattayā |
sarvaṃ paśyati tatraiva muramāṣāsthito'pi san || 49 ||
[Analyze grammar]

hariḥ sasnau nīparāyāṃ nistārāyāṃ tathā tadā |
pṛthāyāṃ dinapāyāṃ sevikāyāṃ snānamācarat || 50 ||
[Analyze grammar]

trivarāyāṃ rāhuṇāyāṃ senāyāṃ snānamācarat |
indirāyāṃ gavādakavitāyāṃ snānamācarat || 51 ||
[Analyze grammar]

gavādayānānadyāṃ trigirāyāṃ snānamācarat |
dūrānadyāṃ gurūṇāyāṃ mitrāyāṃ snānamācarat || 52 ||
[Analyze grammar]

senāyāṃ lavavārāyāṃ dvilīnāyāṃ tathā'plavam |
sukautukyāṃ sthāyinadyāṃ cālpāpāyāṃ tathā'karot || 53 ||
[Analyze grammar]

audaryāṃ viṣṇutulyāyāṃ prapīṭhāyāṃ samāplavam |
niyamānājale dūnānadyāṃ ca pāyupaśyake || 54 ||
[Analyze grammar]

sarasyapi leṇḍuge yonige snānaṃ samācarat |
trinayāyāṃ ca hīnāyāṃ paṃcorāyāṃ samāplavam || 55 ||
[Analyze grammar]

kāmāyāṃ cāpi volgāyāṃ donāyāṃ snānamācarat |
ājavābdhau śvetavārdhau kṛṣṇābdhau kāśyapeyake || 56 ||
[Analyze grammar]

bālatrike'bdhau bhagavān sasnau vai yugapattadā |
catvāriṃśadrūpadhartā bhagavān bhūtabhāvanaḥ || 57 ||
[Analyze grammar]

vidhāya tīrtharūpāstāḥ kanyakāśca sarāṃsi ca |
upakanyāśca vai tatrādyātmikāḥ saṃvidhāya ca || 58 ||
[Analyze grammar]

śīghraṃ tiro'bhavat kṛṣṇaḥ kolakālayamāyayau |
kolakastu tadā kṛṣṇamāhātmyaṃ saṃbubodha ha || 59 ||
[Analyze grammar]

avatārāvatāryeva paramātmā parātparaḥ |
so'yaṃ nārāyaṇaḥ sākṣājjāmātā me'bhavat prabhuḥ || 60 ||
[Analyze grammar]

kṛtakṛtyo'hamevā'smi vasā'tra bhagavan sadā |
mamā''vāse tava yogye kṛpāṃ kuru janārdana || 61 ||
[Analyze grammar]

ityevaṃ cārthayattāvanmadhyāhnaḥ samajāyata |
yavakrītādayaḥ sarve gāṃgeyāśca maharṣayaḥ || 62 ||
[Analyze grammar]

āyayurdarśanārthaṃ vai hariṇā saṃsmṛtāstadā |
niṣeduste praṇamyaiva bālakṛṣṇasya sannidhau || 63 ||
[Analyze grammar]

lomaśādyāstathā vṛkāyanāśca nīlakarṇakaḥ |
īśāno'nye gaṇāścāpi pārṣadāḥ saṃsmṛtāstadā || 64 ||
[Analyze grammar]

āyayuḥ sannidhau sarve kolarājasya mandire |
hariḥ prāha kṛtaṃ kāryaṃ ketumālasya sarvataḥ || 65 ||
[Analyze grammar]

deśāḥ sampāvitāḥ sarve rājāno bhaktimāśritāḥ |
prajā bhaktāḥ prajātāśca tīrthānyapi kṛtāni ca || 66 ||
[Analyze grammar]

ṛṣayaścāpi santuṣṭā jātā dānādibhistathā |
brahmapriyāstathā gauryaḥ sukhamayyo mayā kṛtāḥ || 67 ||
[Analyze grammar]

parvatāḥ pāvitāścātra sarvaṃ pūrṇaṃ tato'bhavat |
adhunā tatra gantavyaṃ yatrarṣimaṇḍalaṃ vadet || 68 ||
[Analyze grammar]

bhavanto me pramāṇaṃ vai sādhavaśca maharṣayaḥ |
ityuktvā bālakṛṣṇaśca ṛṣivākyaṃ pratīkṣate || 69 ||
[Analyze grammar]

tāvad vyomnaḥ sakāśādvai puṣpavṛṣṭirvavarṣa vai |
jayaśabdaiḥ saha sādhuḥ saccidānandasaṃjñakaḥ || 70 ||
[Analyze grammar]

lālāyano maharṣiryaḥ pūrvaṃ cottarato hyagāt |
poṣapūrṇātithau paścāt tuṣito'pi suro hyagāt || 71 ||
[Analyze grammar]

tāvubhau suvimānasthau tvāgatau kolakālaye |
bālakṛṣṇaṃ bhajamānau jayaśabdān pracakratuḥ || 72 ||
[Analyze grammar]

tīrthīkurvan ketumālaṃ jayatvakṣaradhāmapaḥ |
harekṛṣṇa bālakṛṣṇasvāmiśrīkṛṣṇavallabha || 73 ||
[Analyze grammar]

kāmbhareya brahmaśaktisvāmingopālanandana |
vardhayā'tra ciraṃ tiṣṭha deśān saṃkuru pāvanān || 74 ||
[Analyze grammar]

ityevaṃ vyāharantau tau vimānaṃ bhāskaropamam |
avatārayatāṃ rājālayodyāne śanaiḥ śanaiḥ || 75 ||
[Analyze grammar]

nirgatau tau vimānācca munī sāttvatapuṃgavau |
puṣpamālānvitau bhaktibharau kṛṣṇe'timānasau || 76 ||
[Analyze grammar]

nematuḥ śrībālakṛṣṇaṃ samāgatya samīpataḥ |
daṇḍavat puṣpahārādyairānarcatuḥ pareśvaram || 77 ||
[Analyze grammar]

sāśrunetrau galatkarṇau jātapulakitāṅgakau |
haryājñayā''sanayośca niṣedatuḥ samīpataḥ || 78 ||
[Analyze grammar]

harirutthāya caraṇau dadau vakṣasi vai tayoḥ |
nyadhāddhastau mastake ca bāhubhyāṃ pariṣasvaje || 79 ||
[Analyze grammar]

papraccha kuśalaṃ tābhyāṃ bhaktikāryaprasāraṇam |
ūcatustau kṛpayā te yogakṣemau pravartataḥ || 80 ||
[Analyze grammar]

kenāṭāścāmarīdeśā bhavataḥ kṛpayā prabho |
mumukṣuvāsitāḥ santi pratīkṣante tavāgamam || 81 ||
[Analyze grammar]

āgatya tatra kartavyo viṣṇukraturhi pāvanaḥ |
tāḥ prajāḥ pāvayitavyā amarīkapradeśajāḥ || 82 ||
[Analyze grammar]

rājānaśca prajāścāpi maharṣayaśca tadgatāḥ |
āgamaṃ te pratīkṣante kṛtārthīkuru tatprajāḥ || 83 ||
[Analyze grammar]

ityarthito hariḥ śrīmallomaśaṃ śaṃkaraṃ tathā |
maharṣīn paripapraccha kiṃ kartavyaṃ vadantu mām || 84 ||
[Analyze grammar]

sarve prāhuryathā lālāyanaḥ prārthayate prabho |
tathā kartavyamevā'tra tārako hi bhavān yataḥ || 85 ||
[Analyze grammar]

yavakrīto nīlakarṇo vṛkāyanaśca lomaśaḥ |
gāṃgeyāśca vayaṃ sarve śaṃkarādyā yathādiśaḥ || 86 ||
[Analyze grammar]

tathā kurmo na sandeho lokatāraṇahetave |
evaṃ pratyuttare prāpte bhagavān naranāṭyadhṛk || 87 ||
[Analyze grammar]

tathāstviti prāha lālāyanaṃ tuṣitadaivatam |
hāritarṣirnāmataśca prāha tatra tadā harim || 88 ||
[Analyze grammar]

gacchāmyahaṃ hare pūrvaṃ mama śiṣyapradeśakān |
garimākhyān hāritāṃśca mādhyasthān kuru pāvanān || 89 ||
[Analyze grammar]

ityuktvā''jñāṃ śiro dhṛtvā yayau vimānataḥ puraḥ |
garimākhyapradeśāṃśca svāgatārthamasañjayat || 90 ||
[Analyze grammar]

aparānāvikāpuryā dinamānārkabhūpatiḥ |
hāritarṣipraśiṣyaśca svāgatārthaṃ hareḥ śubhaiḥ || 91 ||
[Analyze grammar]

maṃgalairvividhaiḥ kalpaiḥ śṛṃgāraṃ samasajjayat |
athātra kolako rājā parameśaṃ munīn satīḥ || 92 ||
[Analyze grammar]

mahīmānān paramānnaistṛptayāmāsa bhojanaiḥ |
pūjayāmāsa bahudhā samarpaṇaiśca sarvathā || 93 ||
[Analyze grammar]

arthayāmāsa rātryaikyaṃ sthātuṃ nijālaye prabhum |
haristathā'stviti prāha rājā rātrau mahotsavam || 94 ||
[Analyze grammar]

kārayāmāsa subhagaṃ nṛtyamallapradarśanaiḥ |
niśānidrottaraṃ prātarhariḥ kṛtāhniko drutam || 95 ||
[Analyze grammar]

gantuṃ sajjo'bhavattūrṇaṃ rājā mānā'rhaṇāṃ vyadhāt |
sainyena mānitaścāpi prajābhirmānitaśca saḥ || 96 ||
[Analyze grammar]

vimānaṃ cārurohā'nye cāruruhurnijānyapi |
yaśaḥkīrtyādi śṛṇvan śrīkṛṣṇanārāyaṇaḥ prabhuḥ || 97 ||
[Analyze grammar]

gāṃgaiyairnaijikaiścāpi vyomamārgeṇa sattvaram |
samudraṃ tu samullaṃghya garimāpṛthivīṃ yayau || 98 ||
[Analyze grammar]

hāritāṃstānpradeśāṃśca vyalokayattadāmbarāt |
svāgatārthaṃ hāritarṣidinamānārkabhūpatī || 99 ||
[Analyze grammar]

yatrāstāṃ tāvaparānāvikāpuryāṃ puraḥsthitau |
tau vilokya dhvajacihnairambare sthairyamāptavān || 100 ||
[Analyze grammar]

sainyakṛtaṃ svāgataṃ saṃvilokya bhagavān hariḥ |
rādhike bālakṛṣṇaḥ sa mumude tvantarīkṣagaḥ || 101 ||
[Analyze grammar]

itiśrīlakṣmīnārāyaṇīyasaṃhitāyāṃ dvitīye tretāsantāne kolakanṛpasya muramāṣānagaryāṃ śrīharestṛtīyāyāṃ bhramaṇaṃ pūjanamupadeśanaṃ bhojanaṃ gāṃgeyakanyādikṛtaprārthanayā tajjaleṣu bahurūpāṇi dhṛtvā yugapat snānena tīrthī |
karaṇatā rātrau viśrāntirbhādraśuklacaturthyāṃ dinamānārkanṛpakhaṇḍaṃ prati gamanamityādinirūpaṇanāmā navanavatyadhikaśatatamo'dhyāyaḥ || 199 ||
[Analyze grammar]