Chapter 195

śrīkṛṣṇa uvāca |
rādhike śrībālakṛṣṇo vimānāt samavātarat |
rāyagāmalanṛpatiḥ puṣpahārān dadau gale || 1 ||
[Analyze grammar]

rājñī prakṣālayāmāsa caraṇau paramātmanaḥ |
kanyakāśca kuṭumbaṃ ca rājñaḥ pupūjuracyutam || 2 ||
[Analyze grammar]

gandhākṣataiḥ puṣpasragbhiścandanena sugandhinā |
hārān gucchān dadau cāpi tato rājā hariṃ ca tam || 3 ||
[Analyze grammar]

nyaṣādayad ramyagaje'mbālikāvaraśobhite |
śṛṃgārite'tisubhage caturdante'rjune vare || 4 ||
[Analyze grammar]

uccake saṃsthitaṃ kṛṣṇaṃ janatā samalokayat |
chatraṃ dadhuśca śirasi kumārāścāmare'pi ca || 5 ||
[Analyze grammar]

anyān sarvān mahīmānān śakaṭīṣu nyaṣādayat |
rājā'bhrāmayadīśeśaṃ nagaryāṃ rājamārgake || 6 ||
[Analyze grammar]

rigāprajā hariṃ natvā pupūjuruttamottamaiḥ |
phalai ratnairambarādyaiḥ svarṇarūpyakakambalaiḥ || 7 ||
[Analyze grammar]

puṣpahārairhīrakādyairamūlyavastubhistathā |
gopure catvare saṃge haṭṭake mārgasannidhau || 8 ||
[Analyze grammar]

aṃgaṇe sarvathā lokā apūjayan suvastubhiḥ |
avardhayan śubhā gauryo'kṣatalājābjakesaraiḥ || 9 ||
[Analyze grammar]

hārdikairbhāvanaiścāpi nirīkṣaṇaiḥ sumānasaiḥ |
svāgataṃ sarvato buddhyā cakruḥ kīrtanagītibhiḥ || 10 ||
[Analyze grammar]

rājaprāsādavaryaṃ ca yayau kṛṣṇo'tibhāsvaraḥ |
rājakanyāḥ pañca kṛṣṇahastaṃ jagṛhurādarāt || 11 ||
[Analyze grammar]

rājñī pupūja deveśaṃ jāmātāraṃ tadā mudā |
dadau dānāni subhagā vividhāni pupūja ca || 12 ||
[Analyze grammar]

dadau kanyāḥ pañca kṛṣṇanārāyaṇāya tatra ha |
utsavaṃ ca śubhaṃ cakre rājā kṛtārthatāṃ vahan || 13 ||
[Analyze grammar]

tataḥ pradhānasaudhāni prajāgṛhāṇi sarvaśaḥ |
śreṣṭhināṃ mandirodyānagṛhādīni yayau hariḥ || 14 ||
[Analyze grammar]

bhagavān śrīharistatra sarvatra pūjitaḥ prabhuḥ |
īśāno brahmapatnyaśca gauryo maharṣayastathā || 15 ||
[Analyze grammar]

sarve'pi pūjitāstasyāṃ nagaryāṃ nāgarairmudā |
gaurībhiḥ pūjitaṃ kṛṣṇakuṭumbaṃ bhāvavastubhiḥ || 16 ||
[Analyze grammar]

tato harirnijāvāsaṃ cāyayau sainyaśobhitaḥ |
jalapānaṃ cakārā'tha sabhāṃ cakāra tatra ca || 17 ||
[Analyze grammar]

upādideśa ca janān rādhike kṛṣṇavallabhaḥ |
dharmaḥ pālyaḥ sadā bhaktairarthastena prajāyate || 18 ||
[Analyze grammar]

kevalārthaparo janturacireṇa vinaśyati |
vittaṃ dattaṃ ca vā nyastamasthāne ced vinaśyati || 19 ||
[Analyze grammar]

hiṃsārthaṃ yojitaṃ cāpi pāpāyaiva prakalpate |
yadvā''tmano'pi hiṃsāṃ vā kurute hiṃsakaṃ bhavat || 20 ||
[Analyze grammar]

dharma ūdho bhavatyeva mā chindyāttaṃ kadācana |
ūdhaśchede payolābho kṣīrārthino na jāyate || 21 ||
[Analyze grammar]

ūdhaso'rthamayaṃ dugdhaṃ pragṛhṇīyād vivekavān |
dugdhaṃ dogdhryāḥ sevanena prāpyate nityamuttamam || 22 ||
[Analyze grammar]

evaṃ pṛthvīmupāyena bhuñjāno labhate phalam |
satīṃ gāṃ ca tanuṃ dharmaṃ bhuñjāno labhate phalam || 23 ||
[Analyze grammar]

dogdhrīṃ dhānyaṃ suvarṇaṃ ca rakṣayet pṛthivīṃ ca tām |
dharmaṃ nityaṃ rakṣayecca dogdhrīṃ matvā vivekavān || 24 ||
[Analyze grammar]

bhūtānāṃ rakṣaṇaṃ dharmo dayā sā paramā matā |
dayādharmeṇa kartā vai taratyasārasāgaram || 25 ||
[Analyze grammar]

bhītānāṃ rakṣaṇaṃ kāryaṃ rakṣāphalaṃ sulabhyate |
daśavarṣasahasrāṇi svarge vāsātmakaṃ hi tat || 26 ||
[Analyze grammar]

sviṣṭiḥ svadhītiḥ sutapā yān lokān jayate tataḥ |
tāneva dayayā prājño jayate dharmamācaran || 27 ||
[Analyze grammar]

devatāḥ pitaraḥ santo jīvanti dānadharmaṇā |
anyabhūtāni jīvanti dayāgārhasthyadharmaṇā || 28 ||
[Analyze grammar]

chāyāyāmapsu vāyau ca sukhamuṣṇe pramelane |
agnau vāsasi sūrye ca sukhaṃ śīte pramelane || 29 ||
[Analyze grammar]

śabde sparśe rase rūpe gandhe ca ramate manaḥ |
uṣṇe śītaṃ sādhurūpaṃ prāptavyaṃ sukhadaṃ hṛdi || 30 ||
[Analyze grammar]

śīte coṣṇaṃ kṛṣṇarūpaṃ prāptavyaṃ sukhadaṃ sadā |
teṣu bhogeṣu nā'sakto labhate sukhamuttamam || 31 ||
[Analyze grammar]

anye dharmāḥ śītajānāmanye coṣṇanivāsinām |
uṣṇasthānāṃ snānajaṃ ca phalaṃ yat syācchubhapradam || 32 ||
[Analyze grammar]

śītasthānāṃ yajñadānaistato'dhikaṃ phalaṃ bhavet |
arthadānaṃ mataṃ puṣṭipradaṃ dehasya tuṣṭaye || 33 ||
[Analyze grammar]

artho dvedhā dhanarūpaḥ sukhado'tra bhavet khalu |
parārtho mokṣarūpastu śāśvatikasukhapradaḥ || 34 ||
[Analyze grammar]

abhayasya pradātustu phalaṃ sarvottamottamam |
nahi prāṇasamaṃ dānaṃ mokṣadānaṃ tato'dhikam || 35 ||
[Analyze grammar]

ahaṃ śrībālakṛṣṇo vai svāmiśrīkṛṣṇavallabhaḥ |
dadāmi mokṣadānaṃ ca prāṇadānaṃ dhanādi ca || 36 ||
[Analyze grammar]

śreṣṭhaṃ madhyaṃ kaniṣṭhaṃ ca trayametadvibhajyate |
mokṣadānaṃ paraṃ dānaṃ dātavyaṃ sarvathā bhuvi || 37 ||
[Analyze grammar]

grahītavyaṃ tu taddānaṃ nityānandapradaṃ tu yat |
anyā''dāne bhaved vyādhirmokṣadāne vinaśyati || 38 ||
[Analyze grammar]

mokṣadāne brahmadānaṃ brahmabhūtaṃ karoti hi |
brahmavṛkṣo rakṣyamāṇo madhuhema dadāti vai || 39 ||
[Analyze grammar]

brahmadānaparaṃ dānaṃ nādhikaṃ sṛṣṭimaṇḍale |
mokṣadānaṃ brahmadānaṃ brahmāhaṃ māṃ dadāmi ca || 40 ||
[Analyze grammar]

dharmo'haṃ cārtharūpo'haṃ mokṣo'haṃ mokṣado'pyaham |
mokṣātmānaṃ dadāmyeva mumukṣave prasāditaḥ || 41 ||
[Analyze grammar]

striyaṃ vā brahma vā hanyāt sādhuṃ hanyāttu yo ghṛṇī |
tatpāpaiḥ kriyamāṇaiśca sṛjyate sa daridrakaḥ || 42 ||
[Analyze grammar]

īśāno rudradevaśca hinastyasādhupāpinaḥ |
sādhūn rakṣati sarvātmā madrūpo rudra īśvaraḥ || 42 ||
[Analyze grammar]

ātmā rudro nijaḥ proktaḥ pāpaṃ hanyād yadā svataḥ |
pāpaṃ dveṣo vañcanādi cātmaghātādi nāśayet || 44 ||
[Analyze grammar]

ātmaghāto mokṣaghātastaṃ na kuryāt kadācana |
ātmā svārthī bhavennityaṃ mokṣārthī matsamāgamāt || 45 ||
[Analyze grammar]

dehabhāvaṃ na coheta miśrabhāvaṃ parityajet |
śuṣkairārdraṃ dahyate'pi miśritaṃ ced bhaved yadi || 46 ||
[Analyze grammar]

ātmā duḥkhī jāyate'pi dehamiśro bhaved yadi |
pāpakṛdbhiḥ kathaṃcicca na syānmiśro vivekavān || 47 ||
[Analyze grammar]

rāgadveṣau pāparūpau tyaktavyau muktimicchatā |
pramādamohau pāpau ca tyaktavyau bhūtimicchatā || 48 ||
[Analyze grammar]

puṇyalokaḥ svayaṃ svargaḥ sukhī cātmā divaṃ matam |
pāpaloko'tra nirayo duḥkhī cātmā hyadho mataḥ || 49 ||
[Analyze grammar]

pṛthvī sādhūṃstathā'sādhūn sandhārayati sadṛśī |
sūryaḥ sādhūṃstathā'sādhūn karoti tāpanaṃ samaḥ || 50 ||
[Analyze grammar]

jalaṃ tṛptān karotyeva sādhūnasādhukānapi |
vātaḥ prāṇaṃ sparśanaṃ ca samaṃ karoti dehiṣu || 51 ||
[Analyze grammar]

āpaḥ punanti sarvāṃśca sādhvasādhūn samānataḥ |
atra loke tathā cāsti phalaloke tu bhinnatā || 52 ||
[Analyze grammar]

puṇyaśālikṛte vāri śītaṃ tatropasarpati |
apuṇyasya kṛte vāri dṛṣṭimārgaṃ na gacchati || 53 ||
[Analyze grammar]

puṇyaśālikṛte pṛthvī komalāstaraṇānvitā |
apuṇyasya kṛte pṛthvī kaṇṭakakarkarānvitā || 54 ||
[Analyze grammar]

puṇyaśālikṛte vāyuḥ śītalo gandhisaṃspṛśaḥ |
apuṇyasya kṛte vāyurviṣolbaṇo'tidāruṇaḥ || 55 ||
[Analyze grammar]

puṇyaśālikṛte sūryo yathāpekṣoṣṇatāpradaḥ |
apuṇyasya kṛte sūryo dāhako bhasmasātkaraḥ || 56 ||
[Analyze grammar]

ityevaṃ cāntaraṃ loke phalāḍhye vartate sadā |
puṇyaloko madhumāṃśca ghṛtādaḥ svarṇabhūṣaṇaḥ || 57 ||
[Analyze grammar]

amṛtādo modayukto jarāmṛtyuvivarjitaḥ |
pāpasya loko nirayastamoduḥkhasutāpanaḥ || 58 ||
[Analyze grammar]

kṣuttṛḍvyāptaḥ śokakośaḥ kṣaṇamṛtyuvaśaṃgataḥ |
taṃ lokaṃ gantumicched yo vivekabhraṣṭa eva saḥ || 19 ||
[Analyze grammar]

puṇyalokaṃ prayātuṃ yo vāñcched vivekavān hi saḥ |
śāśvataṃ ca paraṃ lokaṃ mama dhāmā'kṣarābhidham || 60 ||
[Analyze grammar]

gantumicchettu yaḥ prājño mumukṣūttama eva saḥ |
nityapūjo brāhmaṇastallokaṃ samabhigacchati || 61 ||
[Analyze grammar]

nityaṃ dānī makhī rakṣī pūjī kṣatro'pi gacchati |
udyamī copakārī ca dharmī vaiśyo'pi gacchati || 62 ||
[Analyze grammar]

hitī sevī ca santoṣī yāti śūdro'pi śeṣabhuk |
tatra tatrā'nusandhānaṃ mama bhaktyātmakaṃ smṛtam || 63 ||
[Analyze grammar]

ājñāṃ vahate niyato guroryo'skhalito janaḥ |
tasya siddhirbhavatyeva gurobarlānna saṃśayaḥ || 64 ||
[Analyze grammar]

alpaṃ ca sārabhūtaṃ ca karaṇīyaṃ viśeṣataḥ |
yena siddhirdrutaṃ śreyaḥpradā bhavati dehinaḥ || 65 ||
[Analyze grammar]

yeṣāṃ śrībhagavān rakṣyo yeṣāṃ rakṣyaṃ ca kīrtanam |
mama bhaktāstathā rakṣyāste rakṣyā mama sarvadā || 56 ||
[Analyze grammar]

yeṣāṃ purogamā bhaktāḥ santo brahmaparaṃ tvaham |
yadgṛhe bhaktakanyāśca te rakṣyā mama sarvadā || 67 ||
[Analyze grammar]

na kālāt karmatasteṣāṃ māyāto yamato bhayam |
yoṣāṃ cāsmi gṛhe cāhaṃ hṛdaye pūjitaḥ sadā || 68 ||
[Analyze grammar]

sādhūn rakṣet sadā rājā te hi rakṣanti rakṣitāḥ |
āśīreṣāṃ bhaved dhāmapradātrī bandhanāśinī || 69 ||
[Analyze grammar]

dānena tapasā yajñairbhaktyā damena sevayā |
sādhavo vā gṛhasthā vā kṣemamiccheyurātmanaḥ || 70 ||
[Analyze grammar]

apāre pārakartā yaścā'plave plavado'pi yaḥ |
yamāśrityā'tighore'tra saṃsāre sukhino janāḥ || 71 ||
[Analyze grammar]

tyāgī vāpi gṛhī vāpi naro nārī ca vā bhavet |
tārakaṃ bāndhavaṃ matvā sādhuṃ taṃ paripūjayet || 72 ||
[Analyze grammar]

parameśaṃ tathā santaṃ jñānadaṃ ca guruṃ prabhum |
satīṃ sādhvīṃ pūjayecca mokṣado hi yato guruḥ || 73 ||
[Analyze grammar]

kiṃ tairye vṛṣabhā nohyāḥ kiṃ dhenvā vā'pyadugdhayā |
kiṃ patnyā vandhyayā lābhaḥ ko'rthā rājñā'pyarakṣatā || 74 ||
[Analyze grammar]

kiṃ taddhanena dehena sevā sādhorna me bhavet |
kiṃ rājyena ca śuṣkeṇa kiṃ dasyugrastasampadā || 75 ||
[Analyze grammar]

kiṃ niḥsnehena bhogyena kiṃ janu yanna muktidam |
yathā kāṣṭhakṛto hastī śārdūlaścarmakṛd yathā || 76 ||
[Analyze grammar]

yathā ṣaṇḍho yathā kṣāraṃ kṣetraṃ nirvidyako yathā |
yathā meghā''ḍambaraśca kṣatraṃ balavivarjitam || 77 ||
[Analyze grammar]

yathā vrataṃ dānahīnaṃ bhaktaḥ snehavihīnakaḥ |
gururjñānādiśūnyaśca sarvepyete nirarthakāḥ || 78 ||
[Analyze grammar]

saphalaṃ mokṣadaṃ sarvaṃ niṣphalaṃ tadvivarjitam |
ātmalābho na vai yatra sa lābho hānirucyate || 79 ||
[Analyze grammar]

ātmalābhaḥ paro lābhaḥ paramātmasamarpaṇam |
mokṣalābho bhavettena satyalābho mato hi saḥ || 80 ||
[Analyze grammar]

sevayantu sato nityaṃ bhajantu māṃ sadā janāḥ |
rakṣayantu svakaṃ dharma mama dhāma prayāntvapi || 81 ||
[Analyze grammar]

bhavatāmastu vai svasti loke cātra paratra ca |
ityuktvā virarāmā'tha rājā pupūja taṃ prabhum || 82 ||
[Analyze grammar]

prajāścānarcayāmāsurbahuvastubhirādarāt |
rājñī pūjāṃ cakārātha śrīhareḥ kanyakāyutā || 83 ||
[Analyze grammar]

tisraḥ kanyā harerhastaṃ jagṛhuḥ patibhāvitāḥ |
sārthakaṃ ca januścakruḥ prāpya śrīpuruṣottamam || 84 ||
[Analyze grammar]

bhojanaṃ pradadau rājā haraye ca kuṭumbine |
mahīmānebhya evāpi tataḥ svo bubhuje nṛpaḥ || 85 ||
[Analyze grammar]

cakāra sumahāntaṃ cotsavaṃ rātrau prajāyutaḥ |
nṛtyāni kārayāmāsa vādyabhaktyādibhiḥ saha || 86 ||
[Analyze grammar]

rātrau subhojanaṃ labdhvā haryādyāste viśaśramuḥ |
prātaḥ samutthitā vādyaravairmaṃgalaniḥsvanaiḥ || 87 ||
[Analyze grammar]

kṛtāhnikāstu haryādyā gantuṃ sajjāstadā'bhavan |
mantraṃ harirdadau tatra prajābhyastūrṇamarthitam || 88 ||
[Analyze grammar]

rājā śrīharaye svarṇaṃ yautakaṃ bahudhā dadau |
upadāḥ pradadau cāpi hariścāpi dhanaṃ tadā || 89 ||
[Analyze grammar]

lātavāyarṣiṇe prādād yathāyogyaṃ prapūjanam |
rājā dadau vidāyaṃ ca dugdhapānottaraṃ tataḥ || 90 ||
[Analyze grammar]

harirvimānamāruhya tūrṇaṃ śṛṇvan jayadhvanim |
ambare cā'bhavat sarvakuṭumbena samanvitaḥ || 91 ||
[Analyze grammar]

anyayānāni sarvāṇi cāmbare tvabhavaṃstadā |
rājā sainyena sanmānaṃ kṛtavān samayocitam || 92 ||
[Analyze grammar]

phenatantunṛpaścāpi phālanādo munistadā |
ājagmatuḥ samānetuṃ nijarājyaṃ satāṃ patim || 93 ||
[Analyze grammar]

haristenārthitastūrṇaṃ bahumānapuraḥsaraḥ |
vyomnā sarvān prayujyaivā''śīrvādaiḥ prayayau tadā || 94 ||
[Analyze grammar]

anyānyapi vimānāni yayustūrṇaṃ tadāmbare |
phenatantumahārājarāṣṭramullaṃghya khāḍikām || 95 ||
[Analyze grammar]

tūrṇanayānadītīre saṃgamasthe manohare |
nagare trinayākhye tatsamīpodyānamaṇḍale || 96 ||
[Analyze grammar]

rājā puraḥ pragatvaiva sainyasanmānamācarat |
rājadarśitamārgeṇa harirnaijaṃ vimānakam || 97 ||
[Analyze grammar]

avātārayadudyāne rājasaudhasya sannidhau |
vimānāni tathā'nyāni cāvaterustadā'mbarāt || 98 ||
[Analyze grammar]

tadā vādyānyavādyanta jayaśabdāstathā'bhavan |
puṣpavṛṣṭiḥ prajānāṃ cā'bhavadvimānasannidhau || 99 ||
[Analyze grammar]

rādhike kīrtanānyeva gauryo jaguḥ prajājanāḥ |
svāgataṃ paramaṃ rājā cakre yāntrikasadravaiḥ || 100 ||
[Analyze grammar]

iti śrīlakṣmīnārāyaṇīyasaṃhitāyāṃ dvitīye tretāsantāne rāyagāmalarāṣṭre rigānagaryāṃ bhramaṇaṃ pūjanamupadeśanaṃ bhojanaṃ viśramaṇaṃ rātriyāpanaṃ caturdaśīprātardugdhādipānottaraṃ phenatantunṛparāṣṭrābhigamanamityādinirūpaṇanāmā |
pañcanavatyadhikaśatatamo'dhyāyaḥ || 195 ||
[Analyze grammar]