Chapter 193

śrīkṛṣṇa uvāca |
śṛṇu rādhe tato rājā'vatarantaṃ vimānataḥ |
bhagavantaṃ bālakṛṣṇaṃ puṣpahāraṃ gale dadau || 1 ||
[Analyze grammar]

ratnahāraṃ dadau kaṇṭhe kare gucchaṃ tu puṣpajam |
rājñī sākṣatacandraṃ ca kauṃkumaṃ pracakāra ha || 2 ||
[Analyze grammar]

kumārikāḥ kṛṣṇapādau prakṣālyā'mṛtamāpapuḥ |
rājñaḥ kuṭumbaṃ cāmātyāḥ pradhānādyāḥ prajāstathā || 3 ||
[Analyze grammar]

śrīhareḥ svāgataṃ cakruḥ pūjābhistatra sādaram |
jalapānaṃ ca haraye rājā dadau sugandhimat || 4 ||
[Analyze grammar]

anyānapi janān sarvān jalapānamakārayat |
hariṃ rājā gajayāne sauvarṇe sannyaṣādayat || 5 ||
[Analyze grammar]

kuṭumbaṃ gajayāneṣu maharṣīn vṛṣavājibhiḥ |
vāhiteṣu ramyapaṭṭīgantrīṣu sa nyaṣādayat || 6 ||
[Analyze grammar]

brahmapriyāstu divyāsu paṭṭagantrīṣu bhūpatiḥ |
nyaṣādayattato rājā hastiyāne tvarūruhat || 7 ||
[Analyze grammar]

vālīnāyāṃ nagaryāṃ sasainyo rājā hariṃ prabhum |
abhrāmayad rājamārgeṇānyarathyādicatvare || 8 ||
[Analyze grammar]

agre ḍaṃkakanādo vai yāti coṣṭrasya pṛṣṭhake |
tato vājivaro yāti sadhvajo vāhakānvitaḥ || 9 ||
[Analyze grammar]

tato hastī mahān yāti dundubhidhvānabodhanaḥ |
śṛṃgāritāstu te vāhāḥ śobhante devatā yathā || 10 ||
[Analyze grammar]

tato yāti ratho divyaḥ puttalīcakraśobhitaḥ |
puṣpahārādidānārthaṃ prajāyai kṛṣṇapūjane || 11 ||
[Analyze grammar]

tataḥ svarṇamayī gantrī viśālā yantravāhitā |
yatra jhāṃjhapakhājādimaṇḍalī kīrtanārthinī || 12 ||
[Analyze grammar]

yatra dhvānakarāścāśvavārāḥ sakuntasaddhvajāḥ |
tato yāti mahān hastī yatra rājakumārakāḥ || 13 ||
[Analyze grammar]

tato yānti coṣṭragantryo yatra pradhānajāḥ prajāḥ |
tato yānti siṃhaveṣā vāditranādino janāḥ || 14 ||
[Analyze grammar]

tato vyāghrapraveśāśca vigulādininādinaḥ |
atha saptagajā yānti brahmarṣivāhanāstadā || 15 ||
[Analyze grammar]

tato'śvavārayugalāḥ svarṇaveṣāśca śastriṇaḥ |
vādyayuktagaṇā yānti dundubhyānakadhāriṇaḥ || 16 ||
[Analyze grammar]

paṭahadhrāstato yānti paṭṭaghāśca tataḥ param |
tato gaṇā yathā śaṃbhoḥ śataśo bhṛtyapārṣadāḥ || 17 ||
[Analyze grammar]

tato bhṛtyā rājagantrīvaryāsu vai sahasraśaḥ |
tato vādyāni cānyāni miṣṭamadhurasadravaiḥ || 18 ||
[Analyze grammar]

bodhayanti janān paścād yānti brahmapriyā imāḥ |
tato gantrīṣu sarvāsu gauryaḥ śṛṃgāritā yayuḥ || 19 ||
[Analyze grammar]

tataḥ kuṭumbaṃ kṛṣṇasya gajeṣu yāti śobhitam |
tata īṣānadevaśca gajapṛṣṭhe virājate || 20 ||
[Analyze grammar]

tato rājñī rājamātā svarṇagantryāṃ virājate |
tataḥ kumārakāḥ sarve kumārikāstataḥ param || 21 ||
[Analyze grammar]

gajayantrīṣu rājante tato rājā suśobhitaḥ |
balalīno mahārājaḥ śrīkṛṣṇena tu satkṛtaḥ || 22 ||
[Analyze grammar]

hastiyāne bālakṛṣṇasannidhau rājate puraḥ |
dhṛtachatraḥ pārśvabhāge cāmaradhrau pratiṣṭhataḥ || 23 ||
[Analyze grammar]

pṛṣṭhe mahāśvavārāśca gajavārāḥ prayānti ca |
tato gauryaḥ svarṇaveṣāḥ prayānti maṃgalasvarāḥ || 24 ||
[Analyze grammar]

mastake kṛtakalaśāḥ phalapatrajalānvitāḥ |
yānti gītiparāḥ sarvā rakṣakāśca tataḥ param || 25 ||
[Analyze grammar]

yantradhvānakarāścāpi cānte prayānti vai tadā |
gauryaḥ prajāpriyāścāpi prayānti saṃghaśastadā || 26 ||
[Analyze grammar]

rājamārgāḥ saṃkulitāstadā''san mānavairati |
catvarāścandraśālāścālayāḥ saudhāḥ pratardikāḥ || 27 ||
[Analyze grammar]

vitardyaḥ saṃgamā rathyāyogāḥ pārśvapadasṛtiḥ |
vallabhyaścāṃgaṇānyagārāṇi gopurabhūmikāḥ || 28 ||
[Analyze grammar]

vṛkṣaśākhā durgabhāgā bhittikā gṛhaveṣakāḥ |
koṇāḥ kaphoṇāścottānā madhyabhārā nalājalāḥ || 29 ||
[Analyze grammar]

ucchrayā jīrṇabhāgāśca gaṇḍordhvā gṛhabhūmayaḥ |
udyānā mārgabhāgāśca pārśvaprākāravṛttikāḥ || 30 ||
[Analyze grammar]

sarvaṃ saṃkulitaṃ cāsīnmānavairdarśanārthibhiḥ |
nagarī koṭimānuṣyairmarditā darśanārthakaiḥ || 31 ||
[Analyze grammar]

svargasyendrāvatīnāmnī yathā'śobhata sā purī |
catvarāḥ puṣpastabakaiḥ kṛtrimodyānakīkṛtāḥ || 32 ||
[Analyze grammar]

rathyādvārāṇi ca śṛṃgāritāni gopurādibhiḥ |
haṭṭāṃgaṇāni sarvāṇi śobhitāni ca toraṇaiḥ || 33 ||
[Analyze grammar]

mārgapārśvaprabhāgāśca śobhitāḥ kadalīvanaiḥ |
agārāṇi raṅgavallīsvastikādyaiḥ kṛtāni ca || 34 ||
[Analyze grammar]

mārgoparyantarīkṣaṃ śobhitaṃ patākikādhvajaiḥ |
vāvaṭābhistoraṇaiśca saṃśobhitāḥ subhūmikāḥ || 39 ||
[Analyze grammar]

kalaśaiḥ śrīphalaiścāpi dvāraśākhāḥ suśobhitāḥ |
kanyābhirgauravarṇābhiḥ śobhitā vallabhībhuvaḥ || 36 ||
[Analyze grammar]

śobhitāni gavākṣāṇi mṛgākṣīṇāṃ mukhābjakaiḥ |
saudhā dhavalavarṇāśca vāvaṭābhiḥ suśobhitāḥ || 27 ||
[Analyze grammar]

śikharāṇi ghūmmaṭāni stūpāni vedhakāni ca |
ghaṭīśṛṃgāṇi sarvāṇi śobhitāni śubhadhvajaiḥ || 38 ||
[Analyze grammar]

jayaśabdairvādyaśabdairyantrīdhvānaiḥ sugītibhiḥ |
garjitā daśadikṣveṣā purī vālganikā'bhavat || 39 ||
[Analyze grammar]

gopure rakṣibhiḥ kṛṣṇaḥ pūjitaśca pradhānakaiḥ |
agre sainyaiḥ pūjitaśca rājakīyairjanaistataḥ || 40 ||
[Analyze grammar]

śreṣṭhibhiḥ satkulaiścāpyāpaṇibhiḥ sthānibhistathā |
pūjitaḥ sarvavargaiśca yoṣidbhiśca naraistathā || 41 ||
[Analyze grammar]

upadābhiḥ phalādyaiśca kaṇādyairbhūṣaṇādibhiḥ |
ambaraiḥ kambalādyaiśca hāraiḥ sragbhiḥ suvarṇajaiḥ || 42 ||
[Analyze grammar]

akṣataiḥ kuṃkumaiścāpi ratnahīrakahārakaiḥ |
puṣpaiśca vardhitaḥ kṛṣṇanārāyaṇo'tibhāvataḥ || 43 ||
[Analyze grammar]

evaṃ bhramitvā nagarīṃ rājasaudhaṃ samāyayau |
rājā saṃpūjayāmāsa koṭiratnārpaṇairharim || 44 ||
[Analyze grammar]

rātrau pūjāṃ vratasyaivaikādaśyāṃ pracakāra ha |
jāgaraṇaṃ sabhāyāṃ ca dharmādeśayutaṃ hariḥ || 45 ||
[Analyze grammar]

pracakārotsavayuktaṃ kṛṣṇakīrtanasaṃyutam |
rādhike ca mahīmānāścakrurviśrāntimādarāt || 46 ||
[Analyze grammar]

hariścopādideśaiva sarvān jāgaraṇasthitān |
jāgratyeva nare vratasthite nidrotthadūṣaṇam || 47 ||
[Analyze grammar]

vrataghnaṃ nopasaṃyāti caitajjāgaraṇe phalam |
vrataṃ pūrṇaṃ bhaveccāpi tamobhāvo niruddhyate || 48 ||
[Analyze grammar]

prasahyāpi bhaved bhaktirharau santoṣakāriṇī |
śrīharau toṣite sarvaṃ saphalaṃ mānavaṃ janu || 49 ||
[Analyze grammar]

tadarthaṃ vai vrataṃ loke kartavyaṃ sāvadhāninā |
udaye yā tithistvāste saikādaśī vratarthinī || 50 ||
[Analyze grammar]

sūryasyodayanaṃ matvā kāryā tvekādaśī sadā |
mama janmāṣṭamī prātarjanmanyaṣṭamikodaye || 51 ||
[Analyze grammar]

ūrje kṛṣṇe sadā grāhyā śaratpūrṇottarā''gatā |
evaṃ cānyāśca tithayo grāhyā sūryodaye sthitāḥ || 52 ||
[Analyze grammar]

nakṣatraṃ vāsaraṃ vāpyālambya setsyanti mānavāḥ |
tanna mukhyaṃ mataṃ me vai tithirme hyudaye matam || 53 ||
[Analyze grammar]

vrataṃ tatraiva kartavyaṃ yadvrate yatra yā tithiḥ |
titheḥ kvāpi kṣayo nāsti kṣīṇā candrodaye matā || 54 ||
[Analyze grammar]

candrodaye ca vā sūryodaye'stitvaṃ titherdhruvam |
rātrāvutsavakārye tu tithiścandrodayā matā || 55 ||
[Analyze grammar]

dine tūtsavakārye tu sūryodayā matā tithiḥ |
evaṃ vratāni kāryāṇi madbalāttāni sarvathā || 56 ||
[Analyze grammar]

puṇyadāni pūrṇakāni bhavanti nātra saṃśayaḥ |
mohinī brahmajā vedhā matsambandhe na hānidā || 57 ||
[Analyze grammar]

iti mamājñāṃ jñātvaiva vratāni cottamāni vai |
kartavyāni sadā bhaktairmadājñā phaladāyinī || 58 ||
[Analyze grammar]

yatkāle yasya devāderutsavo janma vā layaḥ |
tatkṣaṇe yā tithiścāste sā vrate śobhanā sadā || 59 ||
[Analyze grammar]

sūryodayastathā candrodayo vā tārakodayaḥ |
gauṇastatraiva mantavyaḥ kṣaṇaṃ mukhyaṃ divāniśam || 60 ||
[Analyze grammar]

etad vihāya manujāḥ kariṣyanti vratāni cet |
bhinnamatāni tatraiva bhaviṣyanti na saṃśayaḥ || 61 ||
[Analyze grammar]

vratacchedakarāṇyeva bhaviṣyanti tu tāni vai |
tasmāt kṣaṇaḥ sadā grāhyo vrate sarvavidhotsave || 62 ||
[Analyze grammar]

tena dharmo vardhate vai nānyathā tu kadācana |
śraddhayā vardhate puṇyaṃ kālayuktaṃ viśeṣataḥ || 63 ||
[Analyze grammar]

pātrayuktaṃ tato'pyati vardhate pātrasadbalāt |
pātraṃ cāhaṃ parabrahma sevanīyo vrataṃ mahat || 64 ||
[Analyze grammar]

mātāpitrorguroścāpi śuśrūṣā vratamuttamam |
ācāryasādhuśuśrūṣā vrataṃ puṇyapradaṃ mahat || 65 ||
[Analyze grammar]

janasevāḥ prapāḥ kūpāḥ śayanāni śubhāni ca |
dānāni kārayed bhaktyā vrataṃ puṇyapradaṃ hi tat || 66 ||
[Analyze grammar]

ahiṃsā satyamakrodho vṛttidānaṃ prapālanam |
vṛddhānāṃ sevanaṃ putradārāṇāṃ bharaṇaṃ vratam || 67 ||
[Analyze grammar]

dakṣiṇā yajñakāryeṣu dātavyā bhūtimicchatā |
pākayajñāḥ prakartavyāḥ kaṇayajñāśca bhūtidāḥ || 68 ||
[Analyze grammar]

arhān pūjayato nityaṃ saṃvibhāgena sarvathā |
vrataṃ tasya bhavettadvai svargadaṃ nātra saṃśayaḥ || 69 ||
[Analyze grammar]

jñātisambandhimitrāṇāmāpaduddharturatra tu |
puṇyaṃ svargapradṃ syādvai vratametatparaṃ sadā || 70 ||
[Analyze grammar]

sarvasatkārakartustu svargaṃ dhruvaṃ na saṃśayaḥ |
pitṛyajñaṃ bhūtayajñaṃ cātitheḥ pūjanādikam || 71 ||
[Analyze grammar]

devayajñaṃ kurvatastu svargaṃ dhruvaṃ na saṃśayaḥ |
dīkṣāyā grahaṇaṃ cāpi śiṣṭānāṃ pūjanaṃ sadā || 72 ||
[Analyze grammar]

devānāṃ smaraṇaṃ cāpi śaraṇāgatarakṣaṇam |
akauṭilyena vṛttiśca vrataṃ brahma divaḥ pradam || 73 ||
[Analyze grammar]

sarvabhūteṣu dayayā pravṛttasya tu dehinaḥ |
paritrāṇaparasyā'tra vrataṃ svargapradaṃ bhavet || 74 ||
[Analyze grammar]

āgatānāṃ svāgatādikarturyogyakriyāvatām |
pūjayiturvinamrasya vrataṃ svargapradaṃ bhavet || 75 ||
[Analyze grammar]

kuṭumbasya vaśe sthātuḥ sādhūnāṃ vacane'pi ca |
śāstrāṇāṃ vacane sthāturvrataṃ mokṣapradaṃ bhavet || 76 ||
[Analyze grammar]

āśrame yatra kutrāpi tadvṛṣe'vasthitasya tu |
vrataṃ dharmamayaṃ svargyaṃ bhavatyeva na saṃśayaḥ || 77 ||
[Analyze grammar]

sthānamānaṃ kulamānaṃ vayomānaṃ guṇārhaṇam |
kurvan varteta loke yastasya nākaṃ suniścitam || 78 ||
[Analyze grammar]

deśadharmān jñātidharmān prajādharmān vilokya ca |
tattathā vartate yaśca vrataṃ tasyedamuttamam || 79 ||
[Analyze grammar]

gṛhastho'pi na vai lubdhaḥ smṛddhau ca viṣaye dhane |
dehe vā daihike vā'pi vrataṃ sādhusamaṃ bhavet || 80 ||
[Analyze grammar]

dharmārāmā dharmaparā dharmasāhāyyadā janāḥ |
dharmāvāsā bhavantyeva gārhasthye'pi hi sādhavaḥ || 81 ||
[Analyze grammar]

ātmopamaśca yo loke bhūteṣu vartate sadā |
paraduḥkhaharo dehī pratyeha labhate sukham || 82 ||
[Analyze grammar]

dharmodayā dharmavīryā dharmapālādhvarakṣakāḥ |
tyāgadharmāśritāḥ śīghraṃ tarantyeva bhavāmbudhim || 83 ||
[Analyze grammar]

yadā dutstho'sya saṃkalpo nivṛtto mūlato bhavet |
dehī sattvagatiṃ prāptastato brahma samaśnute || 84 ||
[Analyze grammar]

tasmāt sarve'pi saṃkalpā nyasanīyā mayi prabhau |
ātmā nivedanīyaśca dāsye mokṣaṃ tu dhāma me || 85 ||
[Analyze grammar]

ityuktvā virarāmā'sau bālakṛṣṇaḥ pareśvaraḥ |
rājā pupūja devaṃ ca lakṣmīnārāyaṇaṃ tathā || 86 ||
[Analyze grammar]

satīśānaṃ maheśaṃ sapupūja paramādarāt |
prātaḥ snānādikaṃ kṛtvā pūjanādi vidhāya ca || 87 ||
[Analyze grammar]

rājā prakārayāmāsa miṣṭānnādyaiśca pāraṇām |
śrīhariḥ pāraṇāṃ kṛtvā viśrāntiṃ cāpa yāvatā || 88 ||
[Analyze grammar]

tāvad rājñī śrīratīśā pūjopakaraṇānvitā |
catvāriṃśatkanyakābhirgaurībhiḥ saha cāyayau || 89 ||
[Analyze grammar]

pupūja paramātmānaṃ pādāmṛtaṃ papau tataḥ |
catvāriṃśatkanyakāśca hareḥ pāṇiṃ prajagṛhuḥ || 90 ||
[Analyze grammar]

tadā vādyānyavādyanta rājājñayā ca gītayaḥ |
agāyanta ca gaurībhirutsavo nṛtyasaṃyutaḥ || 91 ||
[Analyze grammar]

ajāyata nṛpaśca svaṃ kṛtakṛtyamamanyata |
upadā yautakaṃ cāpi rājā dadau tu śārṅgiṇe || 92 ||
[Analyze grammar]

ratnahārān svarṇabhūṣāḥ kambalāmbarabhūtikāḥ |
hariḥ prāpya ca tatsarvaṃ nṛpājñayā drutaṃ tadā || 93 ||
[Analyze grammar]

gantuṃ sajjo'bhavacchīghraṃ rājā'bhojayadacyutam |
mahīmānān samagrāṃścā'bhojayatpāyasādikam || 94 ||
[Analyze grammar]

sainyaṃ tato'bhavatsajjaṃ prasthāne mānadaṃ tadā |
avādayacca tūryāṇi cakre jayaninādanam || 95 ||
[Analyze grammar]

vimānāni tadā sarvāṇyevā'bhavan vihāyasi |
āruroha mahārājaḥ pūjitaḥ prajayā'bhitaḥ || 96 ||
[Analyze grammar]

āruruhustathā sarve pālanādarṣibodhitāḥ |
varasiṃhanṛpeṇāpi nimantritāśca te tadā || 97 ||
[Analyze grammar]

gatimanto'bhavan vyomni śṛṇvanto vai jayadhvanīn |
harervimānamagamad varasiṃhasya rāṣṭrakam || 98 ||
[Analyze grammar]

rājā pūrvaṃ varasiṃho'vātatārarṣisaṃyutaḥ |
svāgatārthaṃ hareḥ sainyaṃ sajjaṃ cāsthāpayatpuraḥ || 99 ||
[Analyze grammar]

viṣṇutulyānadītīre vāśīlānagarītaṭe |
harervimānamālokya sainyaṃ svāgatamācarat || 100 ||
[Analyze grammar]

vicitravādyadhvanibhiryantragarjanayā tathā |
gītikābhiśca gaurīṇāṃ vyoma nādamayaṃ hyabhūt || 101 ||
[Analyze grammar]

rājadarśitamārgeṇa vimānaṃ bhuvamāgatam |
hareścānyāni ca vimānāni cāpyāgatāni vai || 102 ||
[Analyze grammar]

vimānopari puṣpāṇāṃ vṛṣṭiḥ prajākṛtā'bhavat |
rādhike janatā cābhūd vihvalā darśanāya ca || 103 ||
[Analyze grammar]

iti śrīlakṣmīnārāyaṇīyasaṃhitāyāṃ dvitīye tretāsantāne vālīnānagaryāṃ śrīharerdhamaṇaṃ pūjanaṃ jāgaraṇaṃ vratopadeśanaṃ dvādaśyāṃ pāraṇaṃ tato vāśīlānagarīṃ prati gamanamityādinirūpaṇanāmā trinavatyadhikaśatatamo'dhyāyaḥ || 193 ||
[Analyze grammar]