Chapter 191

śrīkṛṣṇa uvāca |
śṛṇu tvaṃ rādhike pūrtagaṇḍarṣirgaṇḍako nṛpaḥ |
rājñī kumārikāścāpi kumārāśca tathā'pare || 1 ||
[Analyze grammar]

bāndhavāścāmātyavargāḥ svāgatārthaṃ puro'bhavan |
vimānamambarād rājodyāne hyavātaraddhareḥ || 2 ||
[Analyze grammar]

anyānyapi vimānāni cāvateruḥ samantataḥ |
tadā vādyānyavādyanta tūryanādāstadā'bhavan || 3 ||
[Analyze grammar]

agāyanta ca gītāni jayaśabdā babhūvire |
paṭahānāṃ vigulānāṃ dundubhīnāṃ ravottamāḥ || 4 ||
[Analyze grammar]

prajāharṣabharaiḥ śabdairdiśo hyanādayan daśa |
harirvimānādutthāya śreṇyā bahiḥ samāgamat || 5 ||
[Analyze grammar]

rājā ṛṣiḥ kuṭumbādyāḥ puṣpādyaiḥ samavardhayan |
hārairakṣatavaryaiśca lājābhiḥ svāgataṃ vyadhuḥ || 6 ||
[Analyze grammar]

gajayanvyā harikṛṣṇaṃ rājā nyaṣādayattathā |
anyān yathocitavāheṣvapi sadvāhaneṣu ca || 7 ||
[Analyze grammar]

gantryādiṣu paṭolle ca śakaṭīṣu nyaṣādayat |
vādyaśabdaiḥ saha deveśvaraṃ līśavanāṃ purīm || 8 ||
[Analyze grammar]

bhrāmayāmāsa sotsāhaḥ prajāścakruḥ samarhaṇam |
darśanaṃ pādapūjāṃ ca bahūpadābhirādarāt || 9 ||
[Analyze grammar]

samudratīraśobhāṃ ca vilokya bhagavāṃstataḥ |
rājaprāsādake śreṣṭhe samāyāt sakuṭumbakaḥ || 10 ||
[Analyze grammar]

rājā rājñyā ca kanyābhiḥ pūjitaḥ kṛṣṇavallabhaḥ |
candanairgandhasāraiśca kusumairambaraiḥ śubhaiḥ || 11 ||
[Analyze grammar]

śītahāraiścaurṇaveṣai ratnairābhūṣaṇādibhiḥ |
dravyaiḥ phalaiḥ prapūjāṃ śrīhareścakruḥ pradhānakāḥ || 12 ||
[Analyze grammar]

atha gaṇḍasya vai kanyā nava tatra kumārikā |
karagrahaṃ hareścakrurvivāhavidhinā drutam || 13 ||
[Analyze grammar]

rājā babhūva ca bhāgyāt kṛtakṛtyo nṛpī hyapi |
tadutsavaṃ mahāntaṃ ca cakre pūjanamānanaiḥ || 14 ||
[Analyze grammar]

bhojanaṃ kārayāmāsa rājā pakvānnapūritam |
nartanaṃ gāyanaṃ tatra kārayāmāsa bhūpatiḥ || 15 ||
[Analyze grammar]

rājā kṛṣṇāya bahudhā'rpayāmāsa vibhūtikāḥ |
bhagavān pūrṇagaṇḍāya ṛṣaye tā dadau tadā || 16 ||
[Analyze grammar]

bhuktvā viśrāntimāpuśca pānatāmbūlacarvaṇaiḥ |
dugdhapānaiḥ svayaṃ rājā mahīmānānarañjayat || 17 ||
[Analyze grammar]

atha sāyaṃ sabhāsthāne bālakṛṣṇaḥ prajājanān |
upādideśa bahudhā śāntivākyāni cāṃjasā || 18 ||
[Analyze grammar]

rājye vā vāṭikāyāṃ vā gṛhe vāpi vane'pi vā |
antarvṛttiparo dehī vivekī śāntimṛcchati || 19 ||
[Analyze grammar]

tṛṣgātantuṃ suvicchidya bhogyavṛttiṃ vihāya ca |
ātmasthityā sutiṣṭhed yaḥ sa śāntimadhigacchati || 20 ||
[Analyze grammar]

īhā coparatā yasya liṅgaṃ nirliṅgatāṃ gatam |
rasanā nīrasā yasya sa śāntimadhigacchati || 21 ||
[Analyze grammar]

śabdāstvākāśabhāgāśca sparśā dāvānalopamāḥ |
rūpāṇi kuṣṭhatulyāni yasya śāntiṃ sa ṛcchati || 22 ||
[Analyze grammar]

nāryaḥ prāṇaharā yasya yasyā naraśca rākṣasaḥ |
dṛśyate manasā tyāgāt sa śāntiṃ sā'bhiyāti vai || 23 ||
[Analyze grammar]

dhātavo malarūpāśca kuṭumbaṃ vānarāyitam |
bhṛtyāḥ kṣayasamā yasya sa śāntimabhiyāti vai || 24 ||
[Analyze grammar]

śiṣyāḥ śatrusamā yasya putrā bhakṣaṇatatparā |
deho yasya sadā rugṇaḥ sa śāntimabhiyāti vai || 25 ||
[Analyze grammar]

vairāgyaṃ vartate yasya rāgasthalaṃ tu duḥkhadam |
snehasthalaṃ nā'nukūlaṃ sa śāntimabhiyāti vai || 26 ||
[Analyze grammar]

bahubhoge bahuduḥkhe śāntiṃ yāti vivekavān |
nā'haṃ deho na me bhogyaṃ nā'haṃ bhoktā hi dīnavat || 27 ||
[Analyze grammar]

nā'haṃ jaḍādhīna evaṃ vivekī śāntimṛcchati |
nadīnāṃ ramyabhāgeṣu vanodyāneṣu mandire || 28 ||
[Analyze grammar]

devālayeṣu tīrtheṣu nirjane śāntibhāg bhavet |
yadā yatra na vai santi śatravo bahirāntarāḥ || 29 ||
[Analyze grammar]

āgantukāśca vā nityāstadā śāntiṃ pragacchati |
kṣataduḥkho yathā nidrāvaśo duḥkhaṃ na vetti hi || 30 ||
[Analyze grammar]

jagaddhato'pi jīvātmā tūryāgato na khidyati |
vāsanāprahataḥ prāṇī sādhusaṃgatimṛcchati || 31 ||
[Analyze grammar]

sādhusevārataḥ syāccet sādhvīṃ śāntiṃ sa gacchati |
satāṃ guṇān pragṛhṇīyāt satāṃ śīlaṃ samācaret || 32 ||
[Analyze grammar]

agrāhyaṃ varjayennityaṃ grāhyaṃ śubhaṃ samārthayet |
taraṃgān mānasān dehī śamayet śāntimān bhavet || 33 ||
[Analyze grammar]

vikalpān saṃśayān mohān tyajet guroranugrahāt |
tarkān hetūn vivādāṃśca tyajennijamanīṣayā || 34 ||
[Analyze grammar]

udvegān dāvahetūṃśca jñātvā dūrād vivarjayet |
āyatiṃ suvicāryaiva vartayet nirabhiplavaḥ || 35 ||
[Analyze grammar]

hariṃ śaraṇamāsādya phalaṃ tatra samarpayet |
ārabheta hariṃ dhyātvā māṃ kartāraṃ vibhāvya yaḥ || 36 ||
[Analyze grammar]

madanusyūtabhāvena kuryāddhitaṃ hitārthadam |
svasya vā'nyasya sutarāṃ śreyaskṛtaṃ samācaret || 37 ||
[Analyze grammar]

jñānavijñānakośena dhanāḍhyatvaṃ vicārayet |
aparigrahasampannastṛpto'tiśāntimāvahet || 38 ||
[Analyze grammar]

evaṃ vicārya satataṃ rājñā rājñyā prajādibhiḥ |
anyonyahitamāśritya vartitavyaṃ suśāntaye || 39 ||
[Analyze grammar]

sevāṃ prajānāṃ rakṣāṃ ca rājarakṣāṃ parasparam |
ātmabuddhyā sutabuddhyā samācaret suśāntidām || 40 ||
[Analyze grammar]

bṛhaspatirviśālākṣaḥ kāvyaḥ prācetasastathā |
bharadvājo mahendraśca gauraśirā manustathā || 41 ||
[Analyze grammar]

brahmavādāsta evaite rakṣāṃ dharmaṃ parasparam |
praśaṃsanti sadā kalpe kalpe rājapratāhitam || 42 ||
[Analyze grammar]

dānaṃ satāṃ sadā sevā satāṃ saṃgrahaṇaṃ tathā |
dākṣyaṃ satyaṃ cārjavaṃ cā'vekṣā samantatastathā || 43 ||
[Analyze grammar]

sīdatāṃ ca samuddhāraḥ kulīnānāṃ prasañjanam |
sādhūnāmaparityāgaḥ sevā buddhimatāmapi || 44 ||
[Analyze grammar]

śatrumitraudāsyakānāṃ nirīkṣaṇaṃ pare svake |
nītidharmānusaraṇaṃ cānāryavarjanaṃ sadā || 45 ||
[Analyze grammar]

utthānaṃ sarvathā yogyaṃ loke kārye harau matau |
mokṣe tyāge ca vairāgye dharmā rakṣāparā nvime || 46 ||
[Analyze grammar]

rakṣaṇīyāḥ sadā rājñā prajayā cāmṛtehayā |
utthānenā'mṛtaṃ prāptāḥ surā mahendrasaṃhitāḥ || 47 ||
[Analyze grammar]

utthānena vihīnasya rakṣā dūraṃ prayāti hi |
dharmotthānaṃ sadā kāryaṃ dharmiṣṭhāṃ cācaret kriyām || 48 ||
[Analyze grammar]

yadyapyasya vipattiḥ syād rakṣādharmasya dehinaḥ |
so'pyasya vipulo dharmo yato rakṣā'hameva vai || 49 ||
[Analyze grammar]

rakṣā ca rakṣakaścāhaṃ rakṣyaścāpyahameva ca |
sadā rakṣākaraṃ cāhaṃ rakṣayāmi na saṃśayaḥ || 50 ||
[Analyze grammar]

arakṣakān krūrabhāvān na rakṣāmi kadācana |
rakṣako rājavargaśca matsvarūpo'sti bhūtale || 51 ||
[Analyze grammar]

tasmād rakṣā mama dharmo matkṛtā pālyatāṃ janaiḥ |
ityucyamāne śrīkṛṣṇe nārāyaṇe parātmani || 52 ||
[Analyze grammar]

rādhike gaṇḍako rājā papraccha śrīnarāyaṇam |
rājaśabdaḥ kathaṃ kasmāt kadā vai bhavatā kṛtaḥ || 53 ||
[Analyze grammar]

tulyaśārīrabhāve'pi tulyendriyātmake'pi ca |
tulyaduḥkhasukhe tulyavikāre tulyavigrahe || 54 ||
[Analyze grammar]

tulyaśukrāsthimajje ca tulyamāṃsādisaṃbhṛte |
tulyaprāṇaśarīre ca tulyamṛtyubhavānvite || 55 ||
[Analyze grammar]

evaṃvidhe'pi caikasmin rājatā kathamūrdhvagā |
kathameko viśiṣṭāṃśca śūrāṃśca paṇḍitānapi || 56 ||
[Analyze grammar]

adhitiṣṭhati sattāvān pṛthvīṃ rakṣati caikalaḥ |
prasādena tathaikasya lokaḥ sarvaḥ prasīdati || 57 ||
[Analyze grammar]

ekasminneva rāṣṭraṃ ca devavad yāti sannatim |
bhagavaṃstatkathaṃ sāmye'pyeṣā vai rājatā'tigā || 58 ||
[Analyze grammar]

vartate sarvamūrdhanyā vadātra kāraṇaṃ tu kim |
śrutvā prāha hariḥ rādhe rājaniyamajāṃ kathām || 59 ||
[Analyze grammar]

ādau kṛtayuge cātra nāsīd rājyaṃ na rājyapaḥ |
na rājā na ca daṇḍo'bhūd daṇḍyo nāsīcca daṇḍakṛt || 60 ||
[Analyze grammar]

satyadharmaiḥ prajā brāhmyo rakṣanti sma parasparam |
kalpavṛkṣāḥ kalpavallyaścintāmaṇiśca kāmagauḥ || 61 ||
[Analyze grammar]

āsaiṃstena prajāḥ sarvāḥ svātmādhīnāḥ sukhāstadā |
atha kāle kṛtānte ca kalpanāyāṃ balāni tu || 62 ||
[Analyze grammar]

kṣīṇatāṃ saṃgatānyeva tadā svatvaṃ pravartitam |
mamedaṃ kalpavṛkṣaṃ ca na tavedaṃ vivāditam || 63 ||
[Analyze grammar]

evaṃ mamatāmohau ca prajāsvāviśatāṃ tadā |
cintāḥ saṃkalparūpāśca niṣphalāśca tadā'bhavan || 64 ||
[Analyze grammar]

tṛṣṇādoṣā'bhiveśena dharmaḥ satyo vyanīnaśat |
lobhasya vaśamāpannā aprāptasyā'bhimarśinaḥ || 65 ||
[Analyze grammar]

kāmo'paro mahān doṣaḥ prajāsu pratyapadyata |
kāmaparān janān rāgo'niṣṭakṛd vai samaspṛśat || 66 ||
[Analyze grammar]

tena kāryaṃ tathā kāryaṃ nābhyajānanta mohitāḥ |
agamyāgamanaṃ cāpi vācyāvācyaṃ vyajāyata || 67 ||
[Analyze grammar]

bhakṣyābhakṣyaṃ tathā dūṣyādūṣyaṃ ca pratyapadyata |
viplute mānave loke brahmabhāvo nanāśa ha || 68 ||
[Analyze grammar]

brahmanāśe dharmanāśo devāstrāsaṃ tato'gaman |
yayuśca pitaraṃ cā'jaṃ prasādyocuḥ suduḥkhinaḥ || 69 ||
[Analyze grammar]

brahman mānavaloke vai satyaṃ brahma layaṃ gatam |
dharmo nāśaṃ gatastena vayaṃ svāhāvivarjitāḥ || 70 ||
[Analyze grammar]

kṣīṇatāṃ ca gatāḥ smo'dya mānavaiḥ samatāṃ gatāḥ |
ato niḥśreyasaṃ yattad dhyāyasveha pitāmaha || 71 ||
[Analyze grammar]

brahmā''ha bhavatāṃ śreyaścintayāmi bhayāpaham |
tatastretāmukhe brahmā dharmaṃ cārthaṃ ca kāmanām || 72 ||
[Analyze grammar]

mokṣaṃ ceti caturvargaṃ dharmaṃ cakre pṛthagguṇam |
dharmarūpān niyamāṃśca daṇḍarakṣādikalpitān || 73 ||
[Analyze grammar]

cakre yajñādirūpāṃśca karmaphalādimiśritān |
artharūpān padārthāṃśca kṣetravāṭīgṛhādikān || 74 ||
[Analyze grammar]

dhanasampatsvarūpāṃśca cakre svatvādibodhakān |
kāmarūpān niyamāṃśca ṛtūn parasparānvitān || 75 ||
[Analyze grammar]

mohādiniyamāṃścakre svasvabhogyavyavasthitān |
mokṣadharmaṃ sāmarūpaṃ cārpaṇaṃ mayi mādhave || 76 ||
[Analyze grammar]

trivargārpaṇamevāpi mokṣadaṃ cetyanirṇayat |
anyāni bahudhānyeva prakārāṇi hyanirṇayat || 77 ||
[Analyze grammar]

tāṃ nītiṃ śaṃkaraḥ pūrvaṃ jagrāheśānako hyayam |
śaṃkaroktaṃ ca tacchāstraṃ vaiśālākṣaṃ tadā'bhavat || 78 ||
[Analyze grammar]

indrastasmātprajagrāha bāhudantakameva tat |
bṛhaspatirlilekhedaṃ bārhaspatyaṃ tato'bhavat || 79 ||
[Analyze grammar]

auśanasaṃ tato jātaṃ tato nītiḥ pravartitā |
devairviṣṇuścārthitaśca nītiśāstravidaṃ prati || 80 ||
[Analyze grammar]

tato nārāyaṇaścāhaṃ dadau vai mānasaṃ sutam |
virajasaṃ tatputro'bhūt kīrtimān tasya putrakaḥ || 81 ||
[Analyze grammar]

kardamo'bhūt tasya putro'naṃganāmā subuddhimān |
prajārakṣayitā sādhurdaṇḍanītiviśāradaḥ || 82 ||
[Analyze grammar]

tatsuto'bhūdaṃgarājo mṛtyuputrīṃ sunīthikām |
vivāhya venaṃ krūraṃ vai putramekamajījanat || 83 ||
[Analyze grammar]

taṃ venaṃ dveṣiṇaṃ mantrakuśairjaghnurmaharṣayaḥ |
mamanthurdakṣiṇaṃ corumṛṣayo venadehajam || 84 ||
[Analyze grammar]

niṣādaṃ janayāmāsurniṣādāśca tato'bhavan |
bhūyo'sya dakṣiṇaṃ pāṇiṃ mamanthuste maharṣayaḥ || 85 ||
[Analyze grammar]

tato'haṃ pṛthurūpaścā'bhavaṃ śastrī ca varmavān |
nītiśāstrajña evā'haṃ rājaśabdamavāptavān || 86 ||
[Analyze grammar]

mayā devaiḥ saha bhūmiḥ samapāṭā vidhāpitā |
saṃkalpena mayā sarvā rājyasmṛddhirnavīkṛtā || 87 ||
[Analyze grammar]

ādye tu yugaparyāye rājyaṃ vai sthāpitaṃ mayā |
pṛthvī dugdhā prajārthaṃ ca prajā daṇḍena rakṣitā || 88 ||
[Analyze grammar]

rañjanādvai prajāḥ prāhuḥ rājā pṛthuriti kṣitau |
kṣatatrāṇāt kṣatriyo'haṃ tato'bhavaṃ dvijo'pi san || 89 ||
[Analyze grammar]

pṛthivīsthāpanaṃ rājyasthāpanaṃ cāhameva tu |
viṣṇuḥ sanātanastatrā'karavaṃ nītiyojim || 90 ||
[Analyze grammar]

mallalāṭāttadā jātaṃ kamalaṃ kānakaṃ śubham |
śrīḥsaṃbhūtā tato devī kamalā dharmapatnikā || 91 ||
[Analyze grammar]

śrīrartharūpā'bhūd rājye kāmadā mokṣadā api |
vaiṣṇavī śrīryadā rājye vartate mokṣadā tu sā || 92 ||
[Analyze grammar]

evaṃ tataḥ samārabhya devāśca naradevatāḥ |
budhaistulyāḥ śabditāśca madaṃśā bhūbhṛto yataḥ || 93 ||
[Analyze grammar]

śraiṣṭhyamevaṃ mayā nyastaṃ rājñi rājatvasaṃjñakam |
tena rājñā prajābhiśca draṣṭavyo'haṃ nijātmasu || 94 ||
[Analyze grammar]

pūjanīyo vandanīyaścārpaṇīyo'tibhāvataḥ |
mayyarpitāstu māmeva prāpsyanti nātra saṃśayaḥ || 95 ||
[Analyze grammar]

māṃ vihāyā'bhimantāro naijaṃ padaṃ tu ye nṛpāḥ |
kṣayaṃ yāsyanti te nyūnaṃ rājavaṃśā daridrakāḥ || 96 ||
[Analyze grammar]

ityevaṃ nirṇayaṃ jñātvā bhajantu māṃ janārdanam |
rājarājeśvaraṃ nityaṃ caturvargaṃ nidhāya ca || 97 ||
[Analyze grammar]

mayyeveti hariḥ prāha rādhike ca sabhājanāḥ |
jagṛhustadvacāṃsyeva nemuḥ sarve tato yayuḥ || 98 ||
[Analyze grammar]

hariḥ prāpa nijāvāsaṃ rājasaudhe ca bhojanam |
cakārā'nye mahīmānāścakrurbhojanamādarāt || 99 ||
[Analyze grammar]

viśrāntiṃ ca tataḥ prāpuḥ rātrau sarve'pi nidritāḥ |
rādhike rājakanyāstaṃ kṛṣṇakāntaṃ siṣevire || 100 ||
[Analyze grammar]

iti śrīlakṣmīnārāyaṇīyasaṃhitāyāṃ dvitīye tretāsantāne gaṇḍakarājadhānīṃ prati gamanaṃ līśavanānagaryāṃ bhramaṇaṃ pūjanaṃ bhojanamupadeśanaṃ rātrau viśramaṇaṃ cetyādinirūpaṇanāmaikanavatyadhikaśatatamo'dhyāyaḥ || 191 ||
[Analyze grammar]