Chapter 187

śrīkṛṣṇa uvāca |
golokarāśeśvari bālakṛṣṇo vimānamadhyād bahirājagāma |
dadarśa lakṣādhikamānuṣāṇāṃ sammardamāścaryakaraṃ tadānīm || 1 ||
[Analyze grammar]

cakorajātīyasamastakānāṃ |
yathendutejovalaye'kṣivṛttiḥ |
tathā'khilasvāgatakārakāṇāṃ |
pareśvare'bhūd varade'kṣivṛttiḥ || 2 ||
[Analyze grammar]

yathā mayūrā ghanadarśanena |
bhavanti kekāninade'timagnāḥ |
tathā prajāḥ śrīharidarśanena |
tadā'bhavan vai jayanādamagnāḥ || 3 ||
[Analyze grammar]

yathā ghane svātijale'tihṛṣṭā |
nandanti vai cātakapakṣisārthāḥ |
tathā ghanaśyāmaphale'tihṛṣṭā |
ānanditāḥ svāgatapakṣisārthāḥ || 4 ||
[Analyze grammar]

yathā tu bālā madhurāṃ suśarkarā |
māsādya modātibhṛtā bhavantyapi |
tathā prajāḥ sveṣṭasudhānanaṃ prabhuṃ |
samprāpya modātibhṛtāstadā'bhavan || 5 ||
[Analyze grammar]

yathā satī kāntamatīva sundaraṃ |
ciraṃ viyuktaṃ hyadhigamya modate |
tathā prajāstaṃ parakāntamacyutaṃ |
sadāviyuktaṃ pratilabhya harṣitāḥ || 6 ||
[Analyze grammar]

yathā pataṃgā hyatitejasānalaṃ |
vilokya kṛṣṭā abhiyanti mohitāḥ |
tathā prajāṃgāni samujjvalaṃ prabhuṃ |
vilokya kṛṣṭāni patanti mohini || 7 ||
[Analyze grammar]

yathā niśeśaṃ prasamīkṣya pūrṇinaṃ |
jagatsu vārāṃnidhayo dravantyabhi |
tathā'kṣareśaṃ prasamīkṣya pūrṇakaṃ |
prajābjakoṭyo'bhimukhaṃ dravantyapi || 8 ||
[Analyze grammar]

yathā''pya lauhāni tu lauhakāntaṃ |
nisargatastatparito'bhiyanti |
tathā''pyalokā bahulokakāntaṃ |
nisargato bālahariṃ prayānti || 9 ||
[Analyze grammar]

yathā tu nadyo jaladhiṃ prayānti |
yatheṣṭalabhye hṛdayāni yānti |
tathā prajānāṃ hṛdayāni kṛṣṇe |
samastadigbhyo hyabhavan gatāni || 10 ||
[Analyze grammar]

śrībālakṛṣṇo'mitatejasā'nvito |
babhūva madhyāhnagabhāskaropamaḥ |
suśvetarūpātimanoharaprajā |
babhūvurunnidrasarojasannibhāḥ || 11 ||
[Analyze grammar]

tadā vimānaṃ hariṇā tvadhiṣṭhitaṃ |
puṣpābjalakṣaiḥ kusumāyanaṃ hyabhūt |
vicitrajātīyasumādhivāṭikā |
bhramodvahaṃ mandaraśṛṃgamīkṣitam || 12 ||
[Analyze grammar]

haristadā'bhūt khalu puṣpavṛkṣaḥ |
sarvauṣadhimiśraṇagucchaśobhaḥ |
nijākṣarasyānanagahvarādvā |
viniṣkramannakṣaramuktaśobhaḥ || 13 ||
[Analyze grammar]

dhṛto'cyutenā'cyutahīrakānvitaḥ |
suvarṇamāṇikyasuratnamuktavān |
kirīṭavaryo nijamūrdhni kalgiyug |
yathāsthitaḥ saṃśuśubhe divaspatiḥ || 14 ||
[Analyze grammar]

nisargajā'saṃkhyakaraśmijālavān |
mukhābhitejaḥ paridhiḥ samantataḥ |
sahasrabhāvṛttaniśāṃpatiḥ sthito |
hyabhinnatāyāḥ smṛtimātanotyapi || 15 ||
[Analyze grammar]

viśālabhālaṃ sitakaisaradvayo |
rdhvarekhayuksattilakena bhāyujā |
janebhya āvedayati dvimārgakau |
sureśvarasyā'kṣaradhāmakasya ca || 16 ||
[Analyze grammar]

netre viśāle ca manohare priye |
sucañcale premabhare'timañjule |
anantavātsalyavivarṣiṇī hare |
stadā vibhinnāṅgitabodhinī mate || 17 ||
[Analyze grammar]

pravālaraktāyanakādharau hareḥ |
sānandamandasmitasaṃbhṛtau tadā |
ākarṣaṇaṃ cā''dadhataśca yoṣitāṃ |
samastabhāvairmanasāṃ tathā''tmanām || 18 ||
[Analyze grammar]

suvartulau kuṃkumaraṃgasaṃspṛśau |
samunnatau kāntivilāsinau hareḥ |
ānandapūrṇau maṇitulyabhāsvarau |
mṛdū samāstāṃ hṛdayaṃgamau śubhau || 19 ||
[Analyze grammar]

adakṣahasto dhṛtapuṣpagucchako |
varaprado'bhūcca tadā samunnataḥ |
dhanurdhvajasvastikaśūlamatsyakā |
''bāṇāḍhyadakṣo'bhayadaḥ karo'bhavat || 20 ||
[Analyze grammar]

viśālavakṣaḥsthalaśobhicañca |
nnavīnavaicitryasupuṣpamālāḥ |
sammiśraṇaṃ prāpya ca kaustubhena |
śriyo mukhaṃ vakṣasi darśayanti || 21 ||
[Analyze grammar]

skandhau dṛḍhau puṣpasumālikābhi |
rvyāptau tathā karṇasukuṇḍalāktau |
ratnatviṣā pāravatīprabhe ca |
rādhārame'darśayatāṃ bhujasthale || 22 ||
[Analyze grammar]

tadodaraṃ divyasupuṣpahārai |
śchannaṃ harervyaṃjayati prajābhyaḥ |
hārātmaniḥśreṇikayā viśantu |
vakṣaḥsthale bhaktiyujo madūrdhvam || 23 ||
[Analyze grammar]

asaṃkhyadāsīparisevitāṃ'ghri |
dvayaṃ vyarājat sthalapadmakābham |
janapravāhaiḥ satataṃ nataṃ cā'' |
nanyapradaṃ svalpasamarpitasya || 24 ||
[Analyze grammar]

haristadā bhūpatibhistu samrāḍ |
rājā prajābhiśca guruḥ praśiṣyaiḥ |
sadbhiśca sādhuḥ pramadābhiriṣṭo |
dīnaiśca dātā kavibhiḥ purāṇaḥ || 25 ||
[Analyze grammar]

prāpyaśca bhaktairaṇureva yogibhiḥ |
rūpapriyābhirnaṭavaryaveśakaḥ |
kāntaḥ satībhiḥ ṛṣibhiśca vaidiko |
manoharaḥ sarvajanairapekṣitaḥ || 26 ||
[Analyze grammar]

sopānamārgeṇa harirhasan śanai |
ravātatāreśvarapuṣpavārṣṭitaḥ |
purāṃganādyakṣatavardhito janai |
rjayadhvaniśrāvita āptakāmanaḥ || 27 ||
[Analyze grammar]

pradarśayan naijajanūṃṣi vai muhuḥ |
sopānakebhyaḥ samavātatāra ha |
rājā sṛtau kauśikakomalāmbaraṃ |
samāstaratpādanidhānakakramāt || 28 ||
[Analyze grammar]

yatrā'bhavacchobhanakānako rathaḥ |
śataikasauvarṇaghaṭādhiśṛṃgavān |
aṣṭaikacakrātisuvegavānapi |
catūradairvāraṇasaptakairyutaḥ || 29 ||
[Analyze grammar]

madhye parībhiḥ paritaḥ parībhiḥ |
surāṅganādyarpitamālikābhiḥ |
bhrasanmukhābhiḥ priyasundarībhiḥ |
śṛṃgāritaḥ puṣpavimānatulyaḥ || 30 ||
[Analyze grammar]

rājā parīśānaka eva taṃ hariṃ |
nināya tūrṇaṃ sakuṭumbakaṃ prabhum |
rathe samārohayadīśvareśvaraṃ |
nyaṣādayat kānakavāraṇāsane || 31 ||
[Analyze grammar]

pupūja hārairvividhairvicitraiḥ |
sugandhisāraiḥ sumacandanaiśca |
lājā'kṣataiḥ śītasugandhivārbhiḥ |
sauvarṇabhūṣābhiramūlyavastraiḥ || 32 ||
[Analyze grammar]

dadau ca rājā suravālamuttamaṃ |
kauśeyamapyuttamarukmabuṭṭukam |
tathā dadau kañcukamujjvalaṃ tathā |
vidhaṃ mahābhūpatidhāryamuttamam || 33 ||
[Analyze grammar]

dadau ca hīrāñcitaratnarājibhiḥ |
samanvitaṃ sanmukuṭaṃ sakalgikam |
dadau vibhūṣāśca suvarṇavaikṛtā |
dadhāra sarvān bhagavān pareśvaraḥ || 34 ||
[Analyze grammar]

papau jalaṃ śrīharipādadhautaṃ |
dadhāra mūrdhni svakuṭumbayuk ca |
harirdadau kaṇṭhagatāṃ sumālāṃ |
gucchaṃ ca rājñe svakṛpābhiśaṃsam || 35 ||
[Analyze grammar]

janāstu lakṣādhikagauramūrtayaḥ |
surālayāt kiṃ sugatāstadā'bhavan |
candrābhaśobhāḥ khalu śuklavarṇakāḥ |
supiṃganetrāstanudīrghayaṣṭayaḥ || 36 ||
[Analyze grammar]

gauryaśca kanyā pramadā yuvatyo |
vṛddhā api svalpanigūḍhadehya |
samānaraṅgyo dhṛtacitrachatryo |
vivṛttakeśyaśca piśaṃganetryaḥ || 37 ||
[Analyze grammar]

saṃlagnaveṣā mṛduśoṇakāntikāḥ |
susūkṣmapārṣṇibhramipādarakṣikāḥ |
sukuṇṭhitāntāmbaradṛśyavarṇikā |
gauryaḥ pragauryo'pyabhavan suharṣitāḥ || 38 ||
[Analyze grammar]

nedurmahādundubhayastadānīṃ |
vyaṃgūlavādyāni mayūrakāṇi |
vipañcikā vaṃśaninādakāni |
vīṇāstathā bandikatūryakāṇi || 39 ||
[Analyze grammar]

jayapraṇādā hyabhavaṃstadā'bhito |
yaśoguṇānāṃ bahukīrtanānyapi |
sahasrakaṇṭhasvaramiśritānyapi |
tadā'bhavan gītikakīrtanānyapi || 40 ||
[Analyze grammar]

sahasraśo yāntrikabandhukīkṛtā |
stūpīkṛtā golakabhedanaiḥ kṛtāḥ |
śabdāḥ sukarṇyāśca tadā'bhavan śubhāḥ |
oṃnādamāptāḥ parameśabodhakāḥ || 41 ||
[Analyze grammar]

mahāmahāsainyakṛtā ninādāḥ |
praharṣaśabdā vyagaman kakutsu |
gajābhinādāsturagābhinādā |
vyāneśire brahmagamā vidikṣu || 42 ||
[Analyze grammar]

dantipragantrīmanu gantrya āśu |
vimānatulyāḥ śataśaḥ sahasram |
śrībālakṛṣṇānugarohitāścā |
'gacchan śanaistulyasuśobhitāśca || 43 ||
[Analyze grammar]

dhvajāpatākottamavāvaṭādyaiḥ |
sauvarṇaśṛṃgaiḥ kalaśairanekaiḥ |
divyātidivyairabhitoraṇaiśca |
rathā aśobhanta maharṣiyuktāḥ || 44 ||
[Analyze grammar]

parīprabhābhāsasamūrdhvavarṇā |
brahmapriyāḥ kāñcanacārubhāsyaḥ |
sauvarṇayāneṣu virājayantyo |
golokavaikuṇṭhamatiṃ nayanti || 45 ||
[Analyze grammar]

tadā janā darśanakāriṇaste |
narāśca nāryo mumuhurharau vai |
rūpānurūpāvayavetiramye |
gopālabāle hyati kāmbhareye || 46 ||
[Analyze grammar]

tadā'śvavārī khalu yojanāyatā |
'bhavajjanānāmatimardasaṃkulā |
anekahastyaśvakareṇukarṣabhai |
rhaṃsaiḥ prageṇḍairgaruḍairgaveyakaiḥ || 47 ||
[Analyze grammar]

yānairvimānairanasobhiruttamai |
rvāṣpopayānaiścaraṇābhiyāyibhiḥ |
sadbhirnṛpai rājakumārakaiḥ prajā |
janaiḥ samastairnagarīnivāsibhiḥ || 48 ||
[Analyze grammar]

ārṣairjanaiḥ sadgurusāṃkhyayogibhiḥ |
pativratābhiḥ paramāśramādibhiḥ |
gāṃgeyakaiḥ raudragaṇādibhistathā |
'śvavārikā sainyayutā hi śobhate || 49 ||
[Analyze grammar]

niśamya vijñāya purāntarasthā |
narā vilāsinya apīśvareśam |
sasaṃbhramaṃ tyaktasamastakāryā |
draṣṭuṃ hariṃ yānti bahirgṛhebhyaḥ || 50 ||
[Analyze grammar]

taddarśanātyutsukamānasāste |
ghaṇṭāpathānte kṛtapaṃktidurgāḥ |
anyonyasammarditadehabhāgā |
vilokayāmāsurudagranetrāḥ || 51 ||
[Analyze grammar]

sthitāstu mārge hyapi viprakaṣṭe |
niśamya vāditraninādamuccaiḥ |
haryāgamāśaikanibaddhanetrāḥ |
samucchritāḥ prāñjalayaḥ praṇemuḥ || 52 ||
[Analyze grammar]

sauvarṇachatreṇa sucāmarādyaiḥ |
sāmrājyacihnaiḥ suvirājamānaḥ |
purīṃ dadarśā'dbhutabhūriśobhāṃ |
susaṃskṛtāṃ sarvarasaiḥ prapūrṇām || 53 ||
[Analyze grammar]

sugandhivārbhiśca madairgajānāṃ |
saṃsiktaghaṇṭāpathacatvarāṃ ca |
susvastikaiḥ svarṇaghaṭaiśca raṃbhā |
stambhai rasālādidalaiḥ suśobhām || 54 ||
[Analyze grammar]

puṣpākṣataiḥ kṛtrimagopuraiśca |
mahoccadurgāḍhyasugopuraiśca |
tathoccasaudhairbahubhūmikaiśca |
sodyānabhāgairatiśobhamānām || 55 ||
[Analyze grammar]

gṛhe gṛhe puṣpitavallikābhiḥ |
sugandhitaiḥ pallavitairdrumaiśca |
kuṇḍasthamūlaiḥ stabakaiḥ sumāḍhyai |
ryutāṃ ca sasyāḍhyasuvāṭikābhiḥ || 56 ||
[Analyze grammar]

sarovarairmadhyasupaṭṭabhūmi |
ścārāmabhūmiśca vihārabhūmiḥ |
vyākhyānabhūmirnaṭikādibhūmiḥ |
pradarśanai raṃjanakairyutāṃ ca || 57 ||
[Analyze grammar]

kalāpraśālābhiranantikābhi |
rbhiṣakpraśālābhirabhīṣṭikābhiḥ |
rasapraśālābhiravantikābhiḥ |
saddharmaśālābhiratīva yuktām || 58 ||
[Analyze grammar]

vidyādhraśālābhiranugrikābhiḥ |
saṅgītaśālābhiramītaśobhām |
satsaṃgaśālābhirabhīṣṭamodāṃ |
yantrādiśālābhirajasraghoṣām || 99 ||
[Analyze grammar]

nakṣatravedhairghanavedhakaiśca |
sāmudravedhairgrahavedhakaiśca |
videśavedhaiḥ samayapravedhai |
rvāyupravedhaiḥ samatattvavedhaiḥ || 60 ||
[Analyze grammar]

uṣṇapravedhaiḥ sahitāṃ praśīta |
vedhairghaṭīvedhakayantrayuktām |
vidyutpravedhai rasavedhakaiśca |
svarādivedhaiśca pradarśyavedhaiḥ || 61 ||
[Analyze grammar]

gantrīpravedhaiḥ śakaṭīpravedhai |
rdehapravedhaiḥ pṛthivīpravedhaiḥ |
jalāntavedhaiḥ sahitāṃ suśobhāṃ |
vijñānadhāṃ tāṃ nagarīṃ dadarśa || 62 ||
[Analyze grammar]

vimānasaṃghaiḥ satataṃ ravāḍhyāṃ |
parīsamābhiḥ pramadābhirāptām |
vyomāntacumbyūrdhvasubhaumaśālāṃ |
dyāṃ cāparāṃ tāṃ nagarīṃ dadarśa || 63 ||
[Analyze grammar]

śṛṃgāritāṃ cāgurudhūpadīpai |
rdhvajaiḥ patākābhirabhīṣṭabhāvyām |
jalasravābhirnalanālikābhi |
stāraiḥ svanākarṣaṇakāribhiśca || 64 ||
[Analyze grammar]

dūraśravaistārakadīpakaiśca |
sthale sthale mānasasaṃharāṃ ca |
parīśanāmnīṃ bhagavān dadarśa |
surāṃganāmaṃdiraśobhitāṃ ca || 65 ||
[Analyze grammar]

tāṃ sampraviṣṭaṃ sumanoharāṃgaṃ |
 pūrṇendutulyaṃ navayauvanāḍhyam |
svarṇātapatreṇa ca cāmarābhyāṃ |
sammānitaṃ taṃ dadṛśuḥ prajāśca || 66 ||
[Analyze grammar]

āruhya harmyāṇi parīstriyastadā |
sasaṃbhramāstyaktasamastavṛttikāḥ |
vyatyastavastrābharaṇā gavākṣakaiḥ |
sthirekṣaṇāstaṃ dadṛśuḥ paraṃ priyam || 67 ||
[Analyze grammar]

sthale sthale saudhakavallabhīgata |
strīmaṇḍalairakṣatapuṣpacandanaiḥ |
saṃvardhitaḥ śrīpatirīśvareśvaro |
jagrāha tāsāṃ hṛdayārpitārpitam || 68 ||
[Analyze grammar]

tathaiva haṭṭāgrakṛtekṣaṇāstadā |
vaṇikjanā mānanamasya vai vyadhuḥ |
nārīphalaiḥ śuṣkaphalaiśca bījakai |
rmudrābhiriṣṭābhirathāmbarādibhiḥ || 69 ||
[Analyze grammar]

viprāstadā sākṣatacandanādyaiḥ |
puṣpīyahārairabhivādanādyaiḥ |
vedasthamantraiḥ subhagāṃ pracakru |
ruccaiśca sāmāni jaguḥ saharṣāḥ || 70 ||
[Analyze grammar]

dhanāḍhyavargā dhanadānakaiśca |
dīnā janā mānasadānakaiśca |
bhaktā janā bhaktisamarpaṇaiśca |
harestadā svāgatakaṃ vyadhuśca || 71 ||
[Analyze grammar]

rājā nagaryāṃ paritaḥ sasainyakaḥ |
prabhuṃ samabhrāmayadantasīmnikām |
purīṃ vilokyaiva hariḥ praśāsanaṃ |
vyadhāt parīśānapurīpraśaṃsanam || 72 ||
[Analyze grammar]

nṛpasya saudhe ca maharṣikuṭyāṃ |
śreṣṭhipradhānādikamandireṣu |
vidhāya padbhyāṃ bahupāvanīṃ kṣmāṃ |
purīṃ sutīrthaṃ pracakāra kṛṣṇaḥ || 73 ||
[Analyze grammar]

evaṃ paribhramya nivartanaṃ vyadhād |
rājādhirājo nṛpamandiraṃ prati |
āgatya yānād bahiretya mandiraṃ |
prati prapanno'bhavadiṣṭaśāntaye || 74 ||
[Analyze grammar]

jalaṃ papau śāntimavāpa vai kṣaṇaṃ |
tataḥ sabhāyāṃ samupājagāma ca |
uccāsane rājakṛte vidhāpite |
virājamāno'bhavadacyutastadā || 75 ||
[Analyze grammar]

upādideśā'tha janān nṛpādikān |
parāvareśo jagaduddhṛtisthitiḥ |
tūṣṇīṃ nyaṣīdan sakalāḥ prajājanā |
rādhe cakorā iva candramānasāḥ || 76 ||
[Analyze grammar]

dadhurmanāṃsīndriyavṛttikā harau |
samastakānte nijabhaktakāntide |
sadā sudhāvarṣiṇi sādhuvṛttike |
nijātmakānte priyakṛṣṇavallabhe || 77 ||
[Analyze grammar]

iti śrīlakṣmīnārāyaṇīyasaṃhitāyāṃ dvitīye tretāsantāne prajānāṃ sammardo hareḥ śobhā gajayānārohaṇaṃ prajānāmākarṣaṇaṃ parīśānānagaryā bhramaṇaṃ rājasaudhāgamanaṃ cetyādinirūpaṇanāmā saptāśītyadhikaśatatamo'dhyāyaḥ || 187 ||
[Analyze grammar]