Chapter 178

śrīkṛṣṇa uvāca |
śṛṇu tvaṃ rādhike devi prāṇapriye surūpiṇi |
jarasthalīṃ yayau kṛṣṇanārāyaṇo vimānataḥ || 1 ||
[Analyze grammar]

pṛthurājakuṭumbaṃ ca sahā'bhūt hariṇā tadā |
vimānasthaṃ svāgatārthaṃ cā'vārohayadacyutam || 2 ||
[Analyze grammar]

vādyaghoṣairjayanādairyantrasphoṭanaghoṣaṇaiḥ |
bherīḍaṃkakavigalaiḥ kṛtadhvānairninādayan || 3 ||
[Analyze grammar]

rājā gṛhṇan hārapūjāṃ samīpastho'bhavad bhuvi |
pṛthātīre mahodyāne rājasaudhavirājite || 4 ||
[Analyze grammar]

viśāle bhūtale vyomno hyavārohayadīśvaraḥ |
dadau hārān svayaṃ rājā śrīśāya paramātmane || 5 ||
[Analyze grammar]

rājño kṛpī dadau hārān kaṃbharāyai śriyai tadā |
tasyāḥ kumārikā hārān dadrurbrahmapriyāgale || 6 ||
[Analyze grammar]

viṃśatisaṃkhyakāḥ sarvāḥ pupūjuścāparā api |
kumārāḥ śatasaṃkhyāśca pupūjuśca ṛṣīṃstathā || 7 ||
[Analyze grammar]

svāgataṃ kuśalaṃ pṛṣṭvā rājā nyaṣādayaddharim |
divye siṃhāsane rājasabhāsthe janatānvitaḥ || 8 ||
[Analyze grammar]

hariśca janatāḥ sarvāḥ papraccha kuśalaṃ śubham |
caturdaśyāṃ tadā sāyaṃ nagare'bhrāmayaddharim || 9 ||
[Analyze grammar]

tato nadītaṭe gatvā sandhyāṃ rātrau samācarat |
śrīhariḥ ṛṣibhiḥ sārdhaṃ tato bhojanamācarat || 10 ||
[Analyze grammar]

rātrau viśrāntimāsādya prātarbubodha satvaram |
nityapūjādikaṃ kṛtvā sabhāyāṃ rājapūjitaḥ || 11 ||
[Analyze grammar]

upadeśaṃ dadau kṛṣṇanārāyaṇaḥ svayaṃ prabhuḥ |
rājan varṣāsu cābhrāṇi jāyante yānti līnatām || 12 ||
[Analyze grammar]

tathā sarvāṇi bhūtāni jāyante ca viśanti ca |
adya vā śvaḥ paraśvo vā tato'gre vā viyojanam || 13 ||
[Analyze grammar]

saṃghātānāṃ militānāṃ bhaviṣyati na saṃśayaḥ |
garbhe dehā vipacyante bahiḥ puṣṭiṃ prayānti ca || 14 ||
[Analyze grammar]

jarāyāṃ khalu jātāyāṃ hasantyeva vichittaye |
asthiraṃ mānasaṃ yadvaccañcalaṃ ca pratārakam || 15 ||
[Analyze grammar]

tathā varṣmā'pi boddhavyaṃ viśeṣo nātra vidyate |
kadā kvaitad viyuktaṃ ca bhaviṣyatīti mānavaḥ || 16 ||
[Analyze grammar]

nirṇetuṃ naiva śaknoti rakṣitaṃ cāpi yāsyati |
rājyaṃ kulaṃ kuṭumbaṃ ca jñātiḥ prajāśca sevakāḥ || 17 ||
[Analyze grammar]

pūrvakarmānusāreṇa striyo'patyāni santi ca |
bhagavatprāptireteṣāṃ bahupuṇyaiḥ prajāyate || 18 ||
[Analyze grammar]

tava puṇyasya nānto'sti kuṭumbasyāpi te nṛpa |
yenā'dya tvadgṛhe vāso maharṣīṇāṃ mayā saha || 19 ||
[Analyze grammar]

prajānāṃ te mahadbhāgyaṃ yāsāṃ vai darśanaṃ mama |
rāṣṭraṃ puṇyaṃ tava cādya jātaṃ tīrthasvarūpakam || 20 ||
[Analyze grammar]

ityevaṃ śrīhariṃ tatropadiśantaṃ nṛpaḥ svayam |
papraccha śrīhariṃ natvā nijapūrvabhavādikam || 21 ||
[Analyze grammar]

ko'hamāsaṃ purā kṛṣṇa ka ime mama bāndhavāḥ |
kuṭumbaṃ ca mama sarvaṃ prajā me vada mādhava || 22 ||
[Analyze grammar]

itipṛṣṭo hariḥ prāha śṛṇu rājan kathāṃ tava |
purā kalpe bhavānāsīnmuniścāraṇyakā'bhidhaḥ || 23 ||
[Analyze grammar]

vanyaphalādano vṛkṣastambe vāsakaraḥ sadā |
mahāmārgāṣṭakaṃ yatra yujyate svāśramāntike || 24 ||
[Analyze grammar]

mānavā mārgakairyānti cāyānti ca tavāśrame |
viśramya ca kṣaṇaṃ bhuktvā tvaddattāni phalāni tu || 25 ||
[Analyze grammar]

pītvā jalaṃ ca natvā tvāṃ prayānti ca yatheṣṭakam |
teṣāṃ sevā tvayā tatra phalairjalairvidhīyate || 26 ||
[Analyze grammar]

bṛsyādibhiścāśrayasya pradānena ciraṃ muhuḥ |
nijasevāṃ bhavāṃstaiścā'kārayannaiva sarvathā || 27 ||
[Analyze grammar]

yatastvaṃ jñānavānāsīḥ ṛṇaṃ kāryaṃ na sarvathā |
dātavyameva sarvebhyo grāhyaṃ naiva rajo'pi tu || 28 ||
[Analyze grammar]

pratigrahe tathā''dāne teṣāmṛṇaṃ prajāyate |
mānuṣyeṇa tu dehena ṛṇaṃ kāryaṃ na vai kvacit || 29 ||
[Analyze grammar]

ṛṇakartā punarjanma sameti nātra saṃśayaḥ |
sevayā jāyate mokṣaḥ sevayā svargamāpyate || 30 ||
[Analyze grammar]

sevābhiścāśiṣaḥ prāpya bhavanti cirajīvinaḥ |
dattaṃ sarvaṃ purā paścādāpyate niyamād dhruvam || 31 ||
[Analyze grammar]

tasmād deyaṃ yathāśakti dātavyaṃ śraddhayā muhuḥ |
puṃse nāryai prāṇine vā yasmai kasmaicidātmane || 32 ||
[Analyze grammar]

evaṃ matvā tvayā dattaṃ bahvātmānaḥ prasāditāḥ |
tavāśrame tadā pañcaviṃśatiḥ ṛṣayo'bhavan || 33 ||
[Analyze grammar]

tvayā tulyāḥ sevakāste sarvasevāparāyaṇāḥ |
evaṃ bhavadbhiḥ sarvaiścā'nāthā nāryo narādayaḥ || 34 ||
[Analyze grammar]

sevitā āśrayaṃ datvā bālāśca vanavāsinaḥ |
yuṣmākamāśrame saukhyaṃ dṛṣṭvā sevāṃ vilokya ca || 35 ||
[Analyze grammar]

daridrāśca tathā'nāthāstatra nyūṣurnirantaram |
ṣaḍviṃśatibhūsurāṇāmājñāyāṃ tu sthitāḥ sadā || 36 ||
[Analyze grammar]

sevante'bhyāgatān sarvān puṇyaṃ cāpyarjayanti hi |
sakāmāḥ sarva evai te sevakāḥ sevayanti vai || 37 ||
[Analyze grammar]

ṛṣīṇāmāśritāścāśramasthā jātāḥ kuṭumbavat |
maṇḍalaṃ tanmanuṣyāṇāṃ sahasrottaratāṃ gatam || 38 ||
[Analyze grammar]

ṣaḍviṃśatyāśritaṃ tadvai vartate sevakādivat |
taiśca vijñānavārtāyāṃ paralokagatau kila || 39 ||
[Analyze grammar]

prārthitāśca bhavanto'gresarā viprā dayālavaḥ |
asmān vihāya gantavyaṃ naiva yuṣmābhiravyayam || 40 ||
[Analyze grammar]

svargaṃ mokṣaṃ ca vā viprā nītvā gantavyameva naḥ |
āśriteṣu tathāstviti dayayā cārpitaṃ vacaḥ || 41 ||
[Analyze grammar]

dayaiṣā bandhanarūpā varivarti bhavatkṛte |
sādhubhistu dayā kāryā jīvaduḥkhaharā śubhā || 42 ||
[Analyze grammar]

na tu kāryā tathā yatra svasyāpi bandhanaṃ bhavet |
bhavadbhistu kṛtā sveṣāṃ bandhadā yatra te khalu || 43 ||
[Analyze grammar]

tatra sthātavyarūpā vai puṇyaśevadhibhiḥ purā |
paropakārapuṇyena bhavanto viṃśatiśca ṣaṭ || 44 ||
[Analyze grammar]

tathā pāre sahasraṃ cāśrite yanmaṇḍalaṃ ca tat |
naityake tu laye cākasmike sāyaṃ samāgate || 45 ||
[Analyze grammar]

sarve dehān vihāyaiva svargalokamito gatāḥ |
tato maharlokameva gatvā niśāṃ tu vaidhasīm || 46 ||
[Analyze grammar]

kṣapayitvā punaḥ sṛṣṭau svargamāśritya devatāḥ |
caturdaśa tu manavastathā dvādaśa sūryakāḥ || 47 ||
[Analyze grammar]

jātāḥ kalpe gate tatra svargavāsāḥ sukhāśrayāḥ |
āśritāḥ sarva evaite ye yasya sevakāḥ purā || 48 ||
[Analyze grammar]

abhavaṃste tathā teṣāṃ kuṭumbaṃ samajāyata |
gataḥ kalpaḥ susampūrṇaḥ sevāpuṇyaiḥ purārjitaiḥ || 49 ||
[Analyze grammar]

svarge bhukto devasṛṣṭau tadā'haṃ bhagavān svayam |
anādiśrīkṛṣṇanārāyaṇaḥ śrīkṛṣṇavallabhaḥ || 50 ||
[Analyze grammar]

rājarājasvarūpeṇa bhavatāṃ sarvasandhiṣu |
paṭṭābhiṣekadātā'haṃ cābhuvaṃ tatra tatra ca || 51 ||
[Analyze grammar]

sūryāṇāṃ ca manūnāṃ ca śāsako'haṃ tadā khalu |
arthitaśca bhavadbhirvai mokṣārthaṃ sevayā tadā || 52 ||
[Analyze grammar]

mayā vicārya puṇyaṃ vai hyekajanmottaraṃ tataḥ |
mokṣostu bhavatāṃ ceti tathāstviti vaco'rpitam || 53 ||
[Analyze grammar]

nā'bhuktaṃ kṣīyate karma koṭikalpe gate'pi tu |
svargabhogāvaśiṣṭaṃ ca bhoktavyaṃ bhūtale bhavet || 54 ||
[Analyze grammar]

karmabhogātmabhūmau tad bhogārthaṃ cāgataṃ hi vaḥ |
kalpe kṣīṇe punaḥ sṛṣṭau śubhabhogārthameva ha || 55 ||
[Analyze grammar]

bhavanto'tra kuṭumbairvai saha jātā bhavanti ca |
bhavānāraṇyakaścāsīt tṛtīyaśca manustataḥ || 56 ||
[Analyze grammar]

ādyaścoralaketuśca dvitīyaḥ krathako manuḥ |
uṣṭrālarājā caturtho'bhūnmanustatra kalpake || 57 ||
[Analyze grammar]

haṃkāro'yaṃ pañcamo'bhūt ṣaṣṭhastu jayakāṣṭhalaḥ |
tīrāṇaḥ saptamaścāsīt alvīnarastathā'ṣṭamaḥ || 58 ||
[Analyze grammar]

jinavarddhirnavamo'bhūd daśamastvalpaketukaḥ |
ekādaśo jayakṛṣṇo dvādaśo yajñaśānakaḥ || 59 ||
[Analyze grammar]

trayodaśaścendurāyo gaṇakastu caturdaśaḥ |
ete vai manavaścāsan bhavanto'trakṣitīśvarāḥ || 60 ||
[Analyze grammar]

athā''san dvādaśa sūryā mudrāṇḍaḥ prathamo'bhavat |
līnorṇo'rko dvitīyo'bhūd vṛhaccharastṛtīyakaḥ || 61 ||
[Analyze grammar]

balalīnaścaturthaśca pañcamo varasiṃhakaḥ |
rāyagāmalakaḥ ṣaṣṭhaḥ saptamaḥ phenatantukaḥ || 62 ||
[Analyze grammar]

stokahomaścāṣṭamārko navamaḥ kāṣṭhayānakaḥ |
daśamaḥ kolako rājā ekādaśoṃ'garājakaḥ || 63 ||
[Analyze grammar]

śākuntarājā'pyabhavat dvādaśo'rkastadā purā |
evaṃ sūryā rājarājeśvarasya mama mūrtayaḥ || 64 ||
[Analyze grammar]

mamāveśena cāsan vai bhavanto viṃśatiśca ṣaṭ |
rājāno'tra samudbhūtā manavo'rkāḥ śubhāśrayāḥ || 65 ||
[Analyze grammar]

rājarājeśvarayogastadāsīd bhavatāṃ tataḥ |
svarge vāmanayogaśca punarāsīt pare dine || 66 ||
[Analyze grammar]

anādiśrīkṛṣṇanārāyaṇasyā'tra kṣitau mama |
mahāpuṇyapratāpena yogo jāto'sti vaḥ punaḥ || 67 ||
[Analyze grammar]

anāthā ye tu te sarve nāryo narāśca bālakāḥ |
bālikāḥ sevakāḥ svarge tadāsan vaḥ kuṭumbinaḥ || 68 ||
[Analyze grammar]

atra bhūmau tu te jātāḥ kuṭumbino'pi vaḥ punaḥ |
yajñe mayā samastebhyo lābho datto hi gocaraḥ || 69 ||
[Analyze grammar]

pṛṣṭaṃ yad bhavatā tasmāt kathitaṃ prāgbhavaṃ hi vaḥ |
jānāmyahaṃ ca tatsarva bhavadbhirvismṛtaṃ hi tat || 70 ||
[Analyze grammar]

bhavadbhistu vane vanyairyā sevā dehināṃ kṛtā |
tatpuṇyairmanurājyāni bhuktvā rājyāni vai raveḥ || 71 ||
[Analyze grammar]

adyātra śeṣabhogārthaṃ jātā rājāna eva ha |
mama yogena puṇyena purātanena cāpi vai || 72 ||
[Analyze grammar]

saṃskārāṇāṃ balaiścāpi gāṃgeyāśca maharṣayaḥ |
kṛpāsthalādyā deśe'tra sthitā yuṣmābhirarjitāḥ || 73 ||
[Analyze grammar]

sevitāḥ sarvathā premṇā''śīrvādāścārjitāstathā |
tenā'haṃ punarevā'tra sarvaṃ smṛtvā purātanam || 74 ||
[Analyze grammar]

vṛkāyanaṃ nīlakarṇaṃ yajñārthaṃ samapreṣayam |
prabodhārthaṃ ca mokṣārthaṃ lomaśādīnmunīṃstathā || 75 ||
[Analyze grammar]

ahaṃ svayaṃ cāgato'smi smṛtvā bhaktāṃśca vastathā |
imāḥ prajāśca yāḥ sarvāḥ purā''san bhavatāṃ puraḥ || 76 ||
[Analyze grammar]

śamyajanā atithayo yairjagdhāni phalāni ca |
tāḥ prajā vaḥ pradeśeṣu puṇyā bhaktā bhavanti hi || 77 ||
[Analyze grammar]

teṣāṃ bhāgyaṃ paraṃ manye bhagavadyojanaṃ yataḥ |
nālpapuṇyena labhyeta bhagavān bhūtabhāvanaḥ || 78 ||
[Analyze grammar]

nālpapuṇyena labhyante sādhavo brahmavedinaḥ |
nālpapuṇyena labhyante bāndhavā bhaktitatparāḥ || 79 ||
[Analyze grammar]

nālpapuṇyena labhyeta kuṭumbaṃ sevaka hareḥ |
satī nārī sevikā ca putrā bhaktā nideśagāḥ || 80 ||
[Analyze grammar]

putryo bhaktiyutāḥ kṛṣṇanārāyaṇaparātmani |
mṛtyā dharmayutāḥ satyavratāḥ santoṣakāriṇaḥ || 81 ||
[Analyze grammar]

karmacārāḥ puṣṭidāśca dharmakārye sahāyadāḥ |
duḥkhe bhāgagrahāścāpi na milantyalpapuṇyataḥ || 82 ||
[Analyze grammar]

sāṃsārikaṃ sukhaṃ puṇyairlabhyate'nantakālikam |
parabrahmasukhaṃ sevādharmeṇa labhyate hareḥ || 83 ||
[Analyze grammar]

asaṃkhyaṃ cāpyanantaṃ ca na ca grastaṃ kadācana |
na hrastaṃ na pariṇataṃ tatsukhaṃ duḥkhavarjitam || 84 ||
[Analyze grammar]

mānuṣasya tu sāphalyaṃ rājan brahmasamarpaṇam |
yuṣmābhī rājabhistattu kṛtaṃ yajñamahotsave || 85 ||
[Analyze grammar]

kṛtakṛtyā bhavanto'tra jātā mamāśrayādiha |
prasanno'smi pūjito'smi sarvabhāvairmahāmakhe || 86 ||
[Analyze grammar]

gṛhe niveśito'smyadya gṛhaṃ te pāvanaṃ sadā |
bhaja māṃ premabhāvena prakāraya sumandiram || 87 ||
[Analyze grammar]

pratiṣṭhāpaya māṃ tatra dvibhujaṃ parameśvaram |
yathādṛṣṭaṃ yathālabdhaṃ surūpaṃ māṇikīyutam || 88 ||
[Analyze grammar]

lakṣmīyutaṃ divyabhāvaṃ prasevaya ca sarvadā |
sahā'rdhapañcaṣaṣṭhyaṃgulocchrayaṃ ca gajāsane || 89 ||
[Analyze grammar]

tathā śrīpadmābhyāṃyuktaṃ ramāyuktaṃ mahāsane |
pratiṣṭhāpaya māṃ nityaṃ prapūjaya sukhaṃ labha || 90 ||
[Analyze grammar]

ityādiśyā'rhaṇāṃ prāpya bhojayitvā janānatha |
svayaṃ bhuktvā bahūn kṛtvā nijamantrādhisaṃśritān || 91 ||
[Analyze grammar]

prāpya viśrāntimalpāṃ ca madhyāhne rājamaṇḍalaiḥ |
pradhānādyaiḥ praharānte pūjitaḥ śrīharistataḥ || 92 ||
[Analyze grammar]

iyeṣa bahudhā rājñā'rthitaścoṣṭrālakena ha |
yugaśāvena muninā cārthitaḥ parameśvaraḥ || 93 ||
[Analyze grammar]

uṣṭrālaṃ tanmahadrājyaṃ gantuṃ madhyāhnakottaram |
tāvadvai pṛthurājasya kanyakāḥ viṃśatistadā || 94 ||
[Analyze grammar]

mātṛbhiḥ saha saṃgatya pūjanārthamupāyayuḥ |
varamālā'kṣatapuṣpasugandhipātrahastakāḥ || 95 ||
[Analyze grammar]

svayaṃvarasvarūpeṇa hareḥ kaṇṭhe tu rādhike |
viṃśatyā cārpitā mālā vaivāhikā hi tatkṣaṇe || 96 ||
[Analyze grammar]

kumāradānavidhinā jagṛhuśca hareḥ karam |
premṇā sarvā hariṃ nibhālayāmāsuḥ samutsukāḥ || 97 ||
[Analyze grammar]

pitaraṃ tāḥ praṇamyaiva mātṝśca vṛddhamaṇḍalam |
āśiṣaḥ sarvathā''sādya brahmapriyāstadā'bhavan || 98 ||
[Analyze grammar]

utsavaḥ satvaraṃ sarvaiḥ kṛto mālādikārpaṇaiḥ |
vimānāni tadā''saṃśca prasthānasamparāṇi tu || 99 ||
[Analyze grammar]

kanyakāviṃśatiḥ kṛṣṇanārāyaṇena vai saha |
gantukāmā vimāne śrīhareḥ priyāsu sarvathā || 100 ||
[Analyze grammar]

sammīlya prasthitāścānye sarve vimānamāsthitāḥ |
kuṭumbaṃ ca hareḥ sarva maharṣayastathā'pare || 101 ||
[Analyze grammar]

tadā vādyānyavādyanta maṃgalaśravaṇāni vai |
gītikāścāpyagāyanta kīrtanaṃ ca vyajāyata || 102 ||
[Analyze grammar]

ārārtrikena vidhinā puṣpāñjalyādibhistathā |
vardhitaḥ śrīharistūrṇaṃ tatsthalāccāmbare'bhavat || 103 ||
[Analyze grammar]

jayaśabdairyantraghoṣairharṣanādaiḥ saha prabhoḥ |
vimānaṃ cā'nyayānāni vyomnyagre'saṃcaran sukhāt || 104 ||
[Analyze grammar]

prajāścā''gamyamevātra punarvai kṛpayā prabho |
ityāhurbahudhā vākyairatoṣayan pareśvaram || 105 ||
[Analyze grammar]

kṣaṇamātrād rādhike vai vimānānyambarāttadā |
yugaśāvena nirdiṣṭamārgeṇoṣṭrālarāṣṭrakam || 106 ||
[Analyze grammar]

āyayurdinapānadyāstaṭe viyānikāṃ purīm |
dadarśa rādhike vyomnā rāṣṭraṃ suśobhitaṃ hariḥ || 107 ||
[Analyze grammar]

iti śrīlakṣmīnārāyaṇīyasaṃhitāyāṃ dvitīye tretāsantāne pṛthurājadhānīṃ jarasthalīṃ gatvā svāgatamāsādya harirūpādideśa ṣaḍviṃśatinṛpāṇāṃ prākkalpe ṛṣitvaṃ manutvaṃ sūryatvaṃ |
cetyāha tato viśramya pūrṇimāyām uṣṭrālarāṣṭramupāgamadityādinirūpaṇanāmā'ṣṭasaptatyadhikaśatatamo'dhyāyaḥ || 178 ||
[Analyze grammar]