Chapter 170

śrīkṛṣṇa uvāca |
rādhike'tha tathā ṣaṣṭhyāṃ saptamyāmaṣṭamītithau |
navamyāṃ ca daśamyāṃ ca tarpitā hariṇā makhe || 1 ||
[Analyze grammar]

ekādaśyāṃ tarpitāśca yāvadbhirvidhibhistathā |
sarve vai dehino'dehāḥ sthūlasūkṣmā hi nāminaḥ || 2 ||
[Analyze grammar]

jaḍāścetanajātāśca dravyākhyāśca guṇābhidhāḥ |
karmābhidhāśca taddevāstattattattveśvarādayaḥ || 3 ||
[Analyze grammar]

sarvalokanivāsāśca sarve kuṭumbinastathā |
sthāvarā jaṃgamā nāryo narāḥ ṣaṇḍhāśca tarpitāḥ || 4 ||
[Analyze grammar]

abhidheyaṃ na vai kiñcid bhojane hyavaśiṣyate |
evaṃ sarveṣṭiyajño'yaṃ vaiṣṇavo hariṇā kṛtaḥ || 5 ||
[Analyze grammar]

saptāhe nityamāyānti lokalokanivāsinaḥ |
kṛtvā ca darśanaṃ yānti koṭyarbudā narāḥ striyaḥ || 6 ||
[Analyze grammar]

gagane tu vimānānāṃ sāṃkulyaṃ na nivartate |
yāvanto gagane santi surāḥ svargādivāsinaḥ || 7 ||
[Analyze grammar]

tāvanto mānavā bhūmau tāvantaḥ parvatādiṣu |
tāvanta eva vṛkṣeṣu tāvantaśca nadīṣu ca || 8 ||
[Analyze grammar]

naukāsu taṭabhūmyādau tāvantaḥ santi mānavāḥ |
maṇḍapeṣu ca śālāsu saudheṣu gahvareṣvapi || 9 ||
[Analyze grammar]

kuṃjeṣu ca śakaṭyadau tāvanto vāhaneṣvapi |
mānavā mānavā yatra tatra lokayanta eva tu || 10 ||
[Analyze grammar]

dhāmadhāmanivāsāśca lokyante tatra tatra ca |
lokālokanivāsāśca dṛśyante tatra tatra ca || 11 ||
[Analyze grammar]

talastaranivāsāśca lokyante sarvatastadā |
saptāhe cādhvare nityā''gamavṛddhirvilokyate || 12 ||
[Analyze grammar]

svarṇarūpyakahīrāṇāṃ ratnānāṃ bhūṣaṇātmanām |
maṇīnāṃ sarvakāntānāṃ kalpānāṃ śṛṃgiṇo'bhavan || 13 ||
[Analyze grammar]

upadāparvatā jātā yānavāhanakoṭayaḥ |
vastravaibhavabhakṣyāṇāṃ bhogānāṃ śailapaṃktayaḥ || 14 ||
[Analyze grammar]

mauktikānāṃ śikharāṇi miṣṭānnānāṃ tu parvatāḥ |
bhogyopakaraṇānāṃ tu śailagaṃjāstadā'bhavan || 15 ||
[Analyze grammar]

peyānāṃ saritaścāsan gavyānāṃ vārdhayo'bhavan |
śevadhayaśca dravyāṇāṃ cāsan makhe samarpitāḥ || 16 ||
[Analyze grammar]

kubero vasavaścendro merurbṛhaspatistathā |
viṣṇurvīkṣyā'dhvararddhīśca babhūvurlajjayā natāḥ || 17 ||
[Analyze grammar]

annapūrṇā mahimānaṃ vilokya pārameśvaram |
lakṣmīḥ śrīścātra namrā babhūvaturlajjayā'dhvare || 18 ||
[Analyze grammar]

aprameyamatarkyaṃ cā'nupasthitamacintyakam |
yadyadicchati tattvajñastattadaivopatiṣṭhati || 19 ||
[Analyze grammar]

pratāpo'yaṃ harestatra bālakṛṣṇasya rādhike |
andhakuṣṭhidaridrāṇāṃ vyaṃgānāṃ duḥkhināmapi || 20 ||
[Analyze grammar]

āndhyaṃ kuṣṭhaśca dāridryaṃ vyaṃgatā vilayaṃ gatā |
aniṣṭaṃ nāśamāpannaṃ tadeṣṭaṃ prāptameva tu || 21 ||
[Analyze grammar]

svargavat sarvamevā'bhūt makhe'tra pārameśvare |
siddhayo'pi vilokyaitadāścaryaṃ paramaṃ gatāḥ || 22 ||
[Analyze grammar]

aiśvaryāṇi samastāni lajjānamrāṇi cā'bhavan |
māyā'pi mohamāpannā camatkāre harestadā || 23 ||
[Analyze grammar]

bālakṛṣṇaṃ vīkṣituṃ vai koṭyarbudābjamānavāḥ |
samāyānti cānuvelaṃ sammardo jāyate bahuḥ || 24 ||
[Analyze grammar]

nirāśatāṃ tadā yānti janā darśanalālasāḥ |
teṣāṃ bhāvaṃ paraṃ jñātvā vijñāyā''gamanaśramam || 25 ||
[Analyze grammar]

hatāśatāṃ parijñāya bhaktavātsalyavān prabhuḥ |
antarātmā ca tatraiva bhaktāgre gocaro'bhitaḥ || 26 ||
[Analyze grammar]

netrāgre koṭirūpaiśca sthale sthale vilokyate |
yādṛśo maṇḍape cāste homāsane ca yādṛśaḥ || 27 ||
[Analyze grammar]

tādṛśaścānyakuṇḍāgre havanāsanakeṣu ca |
tādṛśo'saṃkhyasaudheṣu maṇḍapeṣu ca tādṛśaḥ || 28 ||
[Analyze grammar]

nadīkūleṣu naukāsu yāneṣvapi ca tādṛśaḥ |
vimāneṣu ca vṛkṣeṣu vane'raṇyeṣu tādṛśaḥ || 29 ||
[Analyze grammar]

bhakteṣu bhaktavṛndeṣu mārgeṣu vīthikādiṣu |
śālāsu candraśālāsu pākaśālāsu tādṛśaḥ || 30 ||
[Analyze grammar]

mahīmānanivāseṣu cātithisthānakeṣvapi |
bhojyaśālāsu śaileṣu vāṭikāsvapi tādṛśaḥ || 31 ||
[Analyze grammar]

ratheṣu śakaṭībhāgeṣvapi cāśvagajādiṣu |
dṛśyeṣu raṃganāṭyeṣu gahvareṣvapi tādṛśaḥ || 32 ||
[Analyze grammar]

jale sthale'mbare vārdhau sarassu ca nadīṣvapi |
vigameṣu ca durgeṣu hariḥ sarvatra dṛśyate || 23 ||
[Analyze grammar]

mandahāsyānanaḥ śubhraḥ sarvabhūṣāvibhūṣitaḥ |
pītavastradharaḥ saumyo bālakṛṣṇo vilokyate || 34 ||
[Analyze grammar]

divyacihnadharaḥ svāmī dhanurdhvajatriśūlavān |
mīnasvastikacakrādyaiḥ śobhitaḥ sa vilokyate || 35 ||
[Analyze grammar]

nīlacañcadvakrakeśaḥ padmapatrāyatekṣaṇaḥ |
kaustubhaśrīśobhitoraḥsthalo lakṣmīprasevitaḥ || 36 ||
[Analyze grammar]

koṭyarkabhādharaḥ kṛṣṇanārāyaṇo vilokyate |
evaṃ śrībālakṛṣṇasya darśanaṃ sarvatodiśam || 37 ||
[Analyze grammar]

bhāvukānāṃ purato'bhūt saptāhe cādhvare tadā |
rādhike bālavṛddhādyaiḥ kṛtaṃ gṛhṇāti pūjanam || 38 ||
[Analyze grammar]

bhojanaṃ ca pramodaṃ ca gṛhṇāti pradadāti ca |
ramate rāsabhāveṣu ramate ca satījane || 39 ||
[Analyze grammar]

ramate sarvalokeṣu sarvarūpadharo'bhavat |
evaṃ dṛṣṭvā camatkāraṃ rādhe'haṃ vismayaṃ gataḥ || 40 ||
[Analyze grammar]

nārāyaṇo'pi vaikuṇṭheśvaraścāha tadā nu mām |
paśya kṛṣṇa mahāścaryaṃ parākāṣṭhāgataṃ tvidam || 41 ||
[Analyze grammar]

rūpaṃ rūpaṃ pratirūpo bālakṛṣṇo hi rājate |
nāsti vai tādṛśī bhūmirbālakṛṣṇo na yatra vai || 42 ||
[Analyze grammar]

ajñātamārgā lokā ye samāyānti makhaṃ prati |
agre teṣāṃ jano bhūtvā jāyate mārgadarśakaḥ || 43 ||
[Analyze grammar]

asvasthamanasāṃ tvagre bhūtvā sa kathako dvijaḥ |
kathāṃ purātanīṃ ramyāṃ kathayatyeva rañjanām || 44 ||
[Analyze grammar]

asvasthavarṣmaṇā pārśve gatvā vaidyasvarūpavān |
svāsthyaprasañjakaṃ tebhyo dadāti cauṣadhaṃ śubham || 45 ||
[Analyze grammar]

camatkāro'dbhutastatra dṛṣṭo mayā tu rādhike |
koṭyarbudābjalokeṣu dehatyāgo na kasyacit || 46 ||
[Analyze grammar]

nā'kasmāttu kṣayaḥ kvāpi kaścid duḥkhī na tatra ca |
na kuṭumbī janaḥ kaścid viyuktaḥ svakuṭumbataḥ || 47 ||
[Analyze grammar]

sammarde na ca bhūṣādi vigataṃ kasyacittadā |
nāṃgamardo'bhavattatra kasyacit pādakaccaraḥ || 48 ||
[Analyze grammar]

na yānaṃ cāpi bhagnaṃ vā na vastu vigamo'bhavat |
adṛṣṭabālakṛṣṇaśca na ko'pi mānavo'bhavat || 49 ||
[Analyze grammar]

aprāptādhvaraśeṣaśca na kaścid dehavānabhūt |
aprāptasvāgataḥ kaścinmahīmāno na vā'bhavat || 50 ||
[Analyze grammar]

ajātapūrṇakāmaśca tadā kopi na cā'bhavat |
alabdhabrahmamantraśca tadā kopi na cā'bhavat || 51 ||
[Analyze grammar]

aho devasya aiśvaryam īśāno'pi mumoha tu |
vāsudevādayo vyūhā dṛṣṭvā''ścaryaṃ prapedire || 52 ||
[Analyze grammar]

lajjānamrā babhūvuste vimadāḥ svabale'bhavan |
aho vibhavo devasya bālakṛṣṇasya cādhvare || 53 ||
[Analyze grammar]

mahāviṣṇustu bhūmānaṃ prāhaivaṃ dhūnayan śiraḥ |
pārvatī māṇikīṃ prāha patyuste'ho camatkṛtiḥ || 54 ||
[Analyze grammar]

kaṃbharā kamalāṃ prāha paśya me putravaibhavam |
kamalā patimodāḍhyā svātmānaṃ bahvamanyata || 55 ||
[Analyze grammar]

kṛṣṇasthāne tathā nārāyaṇasthāne sukarmaṇi |
svayamāste hariḥ kartā mahāścaryaṃ tvidaṃ mama || 56 ||
[Analyze grammar]

aho vai rādhike kṛṣṇaprāptyā gāṃgeyakaistviha |
putrāste sāgarā nimnīkṛtāstīrthavidhāviha || 57 ||
[Analyze grammar]

ketumālo nijārthe'dya sārthako harilabdhitaḥ |
ketuvannanu sañjātaḥ sarvalokeṣu cādyataḥ |
mālāsu ketuvaccāste brahmāṇḍānāṃ nvayaṃ sadā || 58 ||
[Analyze grammar]

bālakṛṣṇaprasaṃgena sadā'dhvareṇa pāvitaḥ |
śvetadvīpasamo bhāvī tvaiśvarye'yaṃ mahattame |
pāvano'yaṃ mahān deśo mokṣadātā bhaviṣyati || 59 ||
[Analyze grammar]

atra mṛtiṃ gatā jīvāḥ sūkṣmāḥ kīṭādayo hyapi |
muktiṃ yāsyanti paramāṃ pāpino'pi ca dehinaḥ || 60 ||
[Analyze grammar]

yajñaṃ sarveṣṭirūpaṃ tu smariṣyantyapi ye janāḥ |
teṣāṃ pāpapraṇāśaśca muktiḥ karagatā bhavet || 61 ||
[Analyze grammar]

namiṣyati bhuvaṃ smṛtvā dūradeśagatā api |
teṣāṃ puṇyaṃ makhajanyaṃ bhaviṣyati na saṃśayaḥ || 62 ||
[Analyze grammar]

api nāma raṭiṣyanti nīparāṃ ca prapīṭhikām |
teṣāṃ pāpavināśaḥ syāt snānajaṃ ca phalaṃ bhavet || 63 ||
[Analyze grammar]

saptaviṃśatikuṇḍān yaḥ śaṃsiṣyati tu mānavaḥ |
bhuktiṃ muktiṃ mahātṛptiṃ smṛddhyādibhiḥ prayāsyati || 64 ||
[Analyze grammar]

api dhūlīṃ saṃgamasya madhyabhūmergrahīṣyati |
mastake vā śarīre vā śuddhātmā sa bhaviṣyati || 65 ||
[Analyze grammar]

api padbhyāṃ śraddhayā tāṃ bhūmiṃ tīrthavidhitsayā |
gamiṣyati tu yaḥ kaścit pade'dhvaraphalaṃ labhet || 66 ||
[Analyze grammar]

api sāptāhavāsaṃ vā dinavāsaṃ tu saṃgame |
kariṣyati janaḥ kaścit svargaṃ tasya tu śāśvatam || 67 ||
[Analyze grammar]

api vrataṃ tu sāptāhaṃ dinamātraṃ phalādinā |
vidhāsyati naro nārī sāmrājyaphalamāpnuyāt || 68 ||
[Analyze grammar]

api dīpaṃ patrapṛṣṭhe prajvālya salile tu yaḥ |
dāsyati tīrthadevāya sa sūryasthānamāpnuyāt || 69 ||
[Analyze grammar]

api pāyasabhojyaṃ yo dīnā'nāthāya dāsyati |
candralokaṃ sa vai prāpyā'mṛtabhojī bhaviṣyati || 70 ||
[Analyze grammar]

api vastraṃ ca vā bhūṣāṃ pāduke kaṃkaṇau ca vā |
chatraṃ vā cāmaraṃ vāpi vyajanaṃ naktakaṃ ca vā || 71 ||
[Analyze grammar]

pātraṃ jolīṃ koṣṭhalīṃ vā cāṃgarakṣakameva vā |
kaupīnaṃ yataye yo'tra dadyāccaindrapadaṃ labhet || 72 ||
[Analyze grammar]

māṇikyāṃ pārvatīṃ lakṣmīṃ prabhāṃ śriyaṃ ca rādhikām |
bālakṛṣṇena sahitāṃ pūjayedatra mokṣabhāk || 73 ||
[Analyze grammar]

gobhyo grāsānatra dadyāt pakṣibhyaśca kaṇān śubhān |
janebhyo bhojanaṃ dadyādatra so'pi ca mokṣabhāg || 74 ||
[Analyze grammar]

jalaṃ dadyāt phalaṃ dadyāt patraṃ puṣpaṃ payo'rpayet |
makhabhūmau saṃgame'tra svargabhāk sa tu mānavaḥ || 75 ||
[Analyze grammar]

śayyāṃ ca gendukaṃ khaṭvāṃ ye'tra dāsyanti bhāvataḥ |
te yāsyanti mahat svargaṃ mahatpuṇyapratāpataḥ || 76 ||
[Analyze grammar]

āsanāni bṛsīścāpi dāsyantyatra catuṣkikāḥ |
te brahmāsanayogyāśca bhaviṣyanti na saṃśayaḥ || 77 ||
[Analyze grammar]

makhabhūmau makhaṃ ye'tra kariṣyanti tu mānavāḥ |
cidākāśaṃ paraṃ dhāma prayāsyanti tu te janāḥ || 78 ||
[Analyze grammar]

hastidānaṃ cāśvadānaṃ reṇḍiyādānamityapi |
haṃsakokilamenānāṃ dānaṃ śukasya cāpi ye || 79 ||
[Analyze grammar]

vṛṣabhāṇāṃ vimānānāṃ yānānāmanasāṃ tathā |
dānaṃ ye'tra kariṣyanti yāsyanti brahmadhāma te || 80 ||
[Analyze grammar]

kanyādānaṃ bhūmidānaṃ putradānaṃ mahattamam |
gṛhadānaṃ kṣetradānaṃ vāṭikādānamityapi || 81 ||
[Analyze grammar]

vṛkṣavallīstambadānaṃ kariṣyantyatra ye janāḥ |
prayāsyantyamṛtaṃ svargaṃ sarvarasāmṛtānvitam || 82 ||
[Analyze grammar]

kāṣṭhadānaṃ copalādipradānaṃ loṣṭhadānakam |
dhātudānaṃ vidhāsyantyāpsyanti te vahnimaṇḍalam || 83 ||
[Analyze grammar]

dadhidugdhādidātāro yāsyanti candramaṇḍalam |
gṛhopakaraṇānāṃ tu dātāro brahmaṇaḥ padam || 84 ||
[Analyze grammar]

rājyadātāra evātrā''psyanti vairājamaṇḍalam |
svarṇarūpyakadātṝṇāṃ golokagamanaṃ bhavet || 85 ||
[Analyze grammar]

vidyādānapradātāro bhaviṣyanti surārhaṇāḥ |
kṛṣeḥ sādhanadātāro bhaviṣyanti kuberakāḥ || 86 ||
[Analyze grammar]

kalākauśalyaśikṣādyā bhaviṣyanti tu viddharāḥ |
etajjalaghaṭaṃ nītvā deśāntare'pi bindukam || 87 ||
[Analyze grammar]

anyasmai ye pradāsyanti cobhayormokṣadaṃ bhavet |
atra jale paśūnāṃ pakṣiṇāṃ picchasthikaṃ patet || 88 ||
[Analyze grammar]

sarvapāpavinirmuktāste yāsyanti paraṃ padam |
api mṛtyusamaye'pi mukhe yasya jalaṃ patet || 89 ||
[Analyze grammar]

śarīre mokṣaṇaṃ vāpi cāsthi yasya patejjale |
te sarve muktimeṣyanti rādhike nātra saṃśayaḥ || 90 ||
[Analyze grammar]

etādṛśī sthalī tveṣā śatayojanavartulā |
nadīdvayāntarālasthā pāvanī varṇanottarā || 91 ||
[Analyze grammar]

makhasthalyāṃ yadi kaścid dīkṣāṃ gṛhṇāti vaiṣṇavīm |
caturbhujo bhaved divyaḥ pārṣadaḥ sa vikuṇṭhake || 92 ||
[Analyze grammar]

nārī dīkṣāvatī divyā caturbhujā haripriyā |
jāyate nityamuktānī punarjanma na vidyate || 93 ||
[Analyze grammar]

lakṣmīnārāyaṇasaṃhitāyāḥ kathāṃ tu ye janāḥ |
śrāvayanti ca śṛṇvanti te'tra mokṣagamā janāḥ || 94 ||
[Analyze grammar]

satībhyo bhojanaṃ dadyāt sādhvībhyaścātra sarvathā |
sādhubhyo bhojanaṃ dadyād dātā mokṣamavāpnuyāt || 95 ||
[Analyze grammar]

atropavāsaniyamaiścariṣyanti tapastu ye |
te śuddhā brahmagā bodhyā muktā divyākṣarārthinaḥ || 96 ||
[Analyze grammar]

kimu te rādhike vacmi yatra kṛṣṇanarāyaṇaḥ |
nārāyaṇāstathā cānye'vatārā īśvarāḥ surāḥ || 97 ||
[Analyze grammar]

pitaraḥ ṛṣayaḥ siddhāḥ satyaḥ sādhvyo yatīśvarāḥ |
yoginyo'rhaṇavargāśca tīrthāni tārakāṇi ca || 98 ||
[Analyze grammar]

āgatyoṣitavantaśca pītavantaḥ sarijjalam |
bhuktavantaśca vanyāni spṛṣṭavantaḥ pratisthalam || 99 ||
[Analyze grammar]

tallīlāsmaraṇādeva bhavanti mokṣabhāginaḥ |
paṭhanācchravaṇāccāsya bhuktiṃ muktiṃ labhed dhruvām || 100 ||
[Analyze grammar]

iti śrīlakṣmīnārāyaṇīyasaṃhitāyāṃ dvitīye tretāsantāne saptāhayajñe samarpitopadāḥ bālakṛṣṇasya koṭyabjarūpadhāritvaṃ yajñabhūmidānādimāhātmyaṃ cetinirūpaṇanāmā saptatyadhikaśatatamo'dhyāyaḥ || 170 ||
[Analyze grammar]