Chapter 169

śrīkṛṣṇa uvāca |
rādhike prātarutthāya bhagavān snānamācarat |
dhyānaṃ japaṃ tathā homaṃ svādhyāyaṃ tarpaṇaṃ tathā || 1 ||
[Analyze grammar]

pūjanaṃ nijarūpasya pitṛdarśanavandanam |
sādhūnāṃ ca satīnāṃ ca darśanaṃ cākarottataḥ || 2 ||
[Analyze grammar]

dugdhāmṛtaṃ manāk pītvā yajñabhūmyavalokanam |
kartuṃ kariṇamāruhya niryayau sa nijālayāt || 3 ||
[Analyze grammar]

sapakṣahastī vyomnaivā'sañcarat sarvabhūmiṣu |
vyalokayacchubhāṃ bhūmiṃ sudarśanaṃ pragṛhya ca || 4 ||
[Analyze grammar]

līnaṃ prakāśitaṃ jātaṃ yatra tatraiva vedikām |
viśvakarmakṛtāṃ vīkṣya prasannaḥ sthānamāyayau || 5 ||
[Analyze grammar]

praśaśaṃsa hariśceśānaṃ devaṃ sarvadṛṣṭikam |
bhaktaṃ devāyanaṃ viśvakarmāṇaṃ kapilādikān || 6 ||
[Analyze grammar]

devaguruṃ gaṇeśādīn praśaśaṃsa tadā hariḥ |
sāmagrīdāyakān sarvān dāsān dāsīśca koṭiśaḥ || 7 ||
[Analyze grammar]

sarvabhūpālakāṃścāpi praśaśaṃsa haristadā |
sarvatattvāni bhagavān praśaśaṃsa muhurmuhuḥ || 8 ||
[Analyze grammar]

rājānaḥ ṛṣayaḥ satyaḥ sādhavaḥ pārṣadādayaḥ |
vrahmapriyādyāśca tataścakruḥ pūjāṃ harestadā || 9 ||
[Analyze grammar]

lomaśādīn harirnatvā viśrāntiṃ mandire'labhat |
prātaḥ peyāni bhojyāni sarvebhyo'dāpayat prabhuḥ || 10 ||
[Analyze grammar]

rasaśālāḥ pravartante dīyante bhojanāni ca |
yathāyogyāni ceṣṭāni sarvebhyaḥ pūrṇatṛptaye || 11 ||
[Analyze grammar]

prātarārabhya vai bhakṣyaṃ peyaṃ cānyadapekṣitam |
sātatyena pravāheṇa dīyate cā''niśāmukham || 12 ||
[Analyze grammar]

yathā yāni tu tattvāni varṣmāṇi yādṛśāni ca |
yādṛśaṃ pathyameteṣāṃ tādṛg dadati vallikāḥ || 13 ||
[Analyze grammar]

maṇayo dhenavaścāpi vṛkṣāśca kalpacintanāḥ |
muktā muktānya evāpi siddhayaḥ śrīramādayaḥ || 14 ||
[Analyze grammar]

brāhmyaḥ suśaktayo'nantā aiśvaryāṇi guṇāstathā |
arpayanti samastebhyo'pekṣyabhojyāni vai tadā || 15 ||
[Analyze grammar]

pratimandirametebhyaḥ prāpayantīṣṭabhojyakam |
yadyadapekṣitaṃ sarvaṃ tvadhikaṃ prāpayanti hi || 16 ||
[Analyze grammar]

tvaṃ rādhe'marṣamāpannā dṛṣṭvā gāṃgeyagauravam |
kinna smarasi śāntā ca mayā tvaṃ sunayaiḥ kṛtā || 17 ||
[Analyze grammar]

bhojitā vanditā tvaṃ tu gaṃgayā pādavāhitā |
śṛṃgāritā kavaryā ca prasannā tvaṃ tadā hyabhūḥ || 18 ||
[Analyze grammar]

caturthyāṃ rādhike tatra prāghūṇikā viśeṣataḥ |
samāyayurvimānaiśca koṭiśo mānavā dine || 19 ||
[Analyze grammar]

rāśiyānapradeśebhyo ṣoḍaśalakṣamānavāḥ |
prāgjyotirdeśato lakṣamānavāścāyayustadā || 20 ||
[Analyze grammar]

prācīnadeśataścāpi daśalakṣāṇi cāyayuḥ |
brahmadeśāllakṣajanā uṣṭrālayācca lakṣakam || 21 ||
[Analyze grammar]

ājanābhāt koṭijanā abriktāt koṭiśo janāḥ |
āraktāllakṣajanatāścottarādapi cāyayuḥ || 22 ||
[Analyze grammar]

mānavānāṃ koṭicatuṣṭayaṃ tatrā'bhavattadā |
tadanyānāṃ tu lokānāṃ sṛṣṭitrayanivāsinām || 23 ||
[Analyze grammar]

āgatānāṃ dehināṃ tu saṃkhyāsaṃkhyā na vidyate |
mahīmānālayā bhūmau jale'nile'ntarīkṣake || 24 ||
[Analyze grammar]

meghe girau ca vivare'mbare tattveṣu sarvaśaḥ |
racitāścābhavan viśvakarmaṇā sūkṣmadarśinā || 25 ||
[Analyze grammar]

siddhimantastadā cāṇūbhūya miśrīprabhūya ca |
līnībhūyā'pi yajñe'tra tiṣṭhanti harimānasaḥ || 26 ||
[Analyze grammar]

pare brahmaṇi sarveṣāṃ tvakṣare cāpi dhāmani |
āntarabhāvavāsena samāveśo'bhavattadā || 27 ||
[Analyze grammar]

mamuḥ sarve pare dhāmnyakṣare sākṣādvirājite |
āścaryaṃ nāsti rādhe'tra sarvāśrayo yato hariḥ || 28 ||
[Analyze grammar]

aṇudeśe sarvasṛṣṭīḥ samāveśayituṃ kṣamaḥ |
svalpe sthale viśālatvaṃ pradarśayitumarhati || 29 ||
[Analyze grammar]

tatkṛtyantaṃ na vinde'haṃ ko'nyo jñātuṃ tadā'rhati |
aṇau sṛṣṭīḥ kṣaṇe kalpān darśayituṃ sa cārhati || 30 ||
[Analyze grammar]

jalagaṇḍūṣamātreṇa tarpayituṃ trilokajān |
kaṇabhakṣaṇamātreṇa tṛptiṃ dātuṃ sa cārhati || 31 ||
[Analyze grammar]

asaṃbhāvyaṃ tathā'tarkyaṃ tathā'śakyaṃ na mādhave |
yanmūrteḥ sarvamevedaṃ samabhūt cekṣaṇātpurā || 32 ||
[Analyze grammar]

yatsaṃkalpātpunarhrāsaṃ cānte tatraiva yāsyati |
ko'haṃ kā tvaṃ tathā cānye nārāyaṇāścaturbhujāḥ || 33 ||
[Analyze grammar]

tadagre śaktimanto vai yanmūrterabhavāma ha |
alaṃ cātivacobhiśca sarvādhāro harirhi saḥ || 34 ||
[Analyze grammar]

sarvānakarot sukhino makhe saṃbhāvanādibhiḥ |
atha śrībālakṛṣṇo'sau caturthyāṃ madhyage ravau || 35 ||
[Analyze grammar]

mantrān dadau nṛpebhyaśca janatābhyaśca maṇḍape |
koṭirūpadharo bālakṛṣṇaḥ sarvatra so'bhavat || 36 ||
[Analyze grammar]

pratyāśrayaṃ tadā vṛṣyāṃ kuśajāyāṃ niṣadya ca |
sajalaṃ bhaktakarṇeṣu mantrānaśrāvayat prabhuḥ || 37 ||
[Analyze grammar]

śaraṇaṃ śrīkṛṣṇanārāyaṇo'stu mama sarvadā |
oṃ namaḥ śrīkṛṣṇanārāyaṇāya svāmine svāhā || 38 ||
[Analyze grammar]

kālamāyāpāpakarmaśatruyāmyakuhṛdbhayāt |
śūlamīnadhvajadhanuścakrasvastikavānava || 39 ||
[Analyze grammar]

brahmā'haṃ śrīkṛṣṇanārāyaṇabhakto'smi śāśvataḥ |
anādiśrīkṛṣṇanārāyaṇaḥ svāmī patiśca me || 40 ||
[Analyze grammar]

bālakṛṣṇaḥ parabrahma mama vai śāśvataḥ patiḥ |
pitā bandhuḥ suhṛnmitraṃ rakṣakaḥ pālako'stu saḥ || 41 ||
[Analyze grammar]

śrīkṛṣṇavallabhaḥ kṛṣṇaḥ svāmī me'yaṃ patirhi me |
evaṃ śaraṇamantraṃ cārpaṇamantraṃ ca rakṣakam || 42 ||
[Analyze grammar]

manuṃ ca brahmabhāvaṃ ca mantraṃ svāmyanivedakam |
sarvasvaṃ ca manuṃ kṛṣṇanārāyaṇaḥ pareśvaraḥ || 43 ||
[Analyze grammar]

yathādhikāraṃ saṃvīkṣyā''bālavṛddhanarīnarān |
kṛtārthān śrāvayāmāsa cakāra mānavān bahūn || 44 ||
[Analyze grammar]

tato vai bhojanaṃ cakrurdīkṣitāśca harirjanāḥ |
lakṣmīnārāyaṇasaṃhitākhyānaṃ sāyameva vai |
lomaśaḥ pracakārā'tha cakre nīrājanaṃ hareḥ || 45 ||
[Analyze grammar]

jāyante cotsavāstatra rātrau tu bhojanottaram |
sarveṣāṃ sukhadā rādhe'pararātre viśaśramuḥ || 46 ||
[Analyze grammar]

pañcamyāṃ ca prage brāhme muhūrte śrīhariḥ svayam |
sasnau tu saṃgame nadyoḥ sarve sasnustataḥ param || 47 ||
[Analyze grammar]

nityavidhīn vidhāyā'tha kṛtvā devārhaṇādikam |
kṛṣṇanārāyaṇo yajñamaṇḍapaṃ śīghramāyayau || 48 ||
[Analyze grammar]

rājānaśca prajāḥ sarve ṛṣayo munayastathā |
karmacārāḥ ṛtvijaśca jāpakādyāḥ samāyayuḥ || 49 ||
[Analyze grammar]

vāditrāṇāṃ ninādāśca tadā'bhavan susūcakāḥ |
adhvarasya kriyākāṇḍaṃ kurvantu bhūsurā iti || 50 ||
[Analyze grammar]

anādiśrīkṛṣṇanārāyaṇaścājijñapad dvijān |
viprādyā maṃgalaṃ cakrarvedamantraiḥ prasusvaram || 51 ||
[Analyze grammar]

ācāryo lomaśastatra deśakālāvakīrtayat |
gaṇeśasmaraṇaṃ kṛtvā kṛṣṇanārāyaṇaḥ prabhuḥ || 52 ||
[Analyze grammar]

ācāryavaraṇaṃ cakre natvā śrīlomaśaṃ gurum |
prakoṣṭhe bandhanaṃ cakre cakre cāvāhanaṃ kṣiteḥ || 53 ||
[Analyze grammar]

pañcagavyakuśairbhūmeḥ prokṣaṇaṃ pracakāra ha |
bhūtādyapakramārthaṃ ca prākṣipat śvetasarṣapān || 54 ||
[Analyze grammar]

evaṃ bhūmiṃ pūjayitvā prāyaścittaṃ cakāra ha |
ācamanaṃ prāṇāyāmaṃ kṛtvā cakre prapūjanam || 55 ||
[Analyze grammar]

svātmakasya gaṇeśasya ṣoḍaśopasuvastubhiḥ |
puṇyāhavācanaṃ cakre kalaśasthāpanaṃ tathā || 56 ||
[Analyze grammar]

āśīrvādān dadustatra brāhmaṇā vedavedinaḥ |
śāntipāṭhāñjagurvārisekaṃ cakrustadā dvijāḥ || 57 ||
[Analyze grammar]

svastivāco jaguścāpi cakruḥ kṛṣṇābhisecanam |
mātṛkāpūjanaṃ cakrurnāndīśrāddhaṃ pracakrire || 58 ||
[Analyze grammar]

tadaṃgadakṣiṇādānaṃ cakāra parameśvaraḥ |
pratyekācāryavaraṇaṃ brahmavaraṇamityapi || 59 ||
[Analyze grammar]

ṛtvijāṃ varaṇaṃ dvārapālavaraṇamityapi |
jāpakānāṃ varaṇaṃ ca cakre pupūja tāṃstataḥ || 60 ||
[Analyze grammar]

tataḥ pṛthivīṃ sampūjya cakre digrakṣaṇaṃ tataḥ |
samprokṣya yajñasāmagrīḥ svastimantrān jagāda ha || 61 ||
[Analyze grammar]

maṇḍapapūjanaṃ vāstupūjanaṃ pracakāra ha |
vāstudevārhaṇaṃ sarvaṃ vidhinā pracakāra ha || 62 ||
[Analyze grammar]

kalaśasthāpanaṃ cakre phalauṣadhimṛdārpaṇam |
darbhapavitradānaṃ ca tīrthāvāhanamityapi || 63 ||
[Analyze grammar]

athā'gnyuttāraṇa cakre sarvadevān pupūja ca |
prāṇapratiṣṭhāmantrāṃśca jagāda parameśvaraḥ || 64 ||
[Analyze grammar]

yoginīkṣetrapālāṃśca pupūja vidhinā hariḥ |
pīṭhadevārhaṇaṃ cakre baliṃ dadau nanāma ca || 65 ||
[Analyze grammar]

maṇḍapasyā'rhaṇaṃ cakre brahmapūjāṃ cakāra ha |
tathā maṇḍapadevānāmarhaṇaṃ pracakāra ca || 66 ||
[Analyze grammar]

ṣoḍaśādistambhapūjāṃ bahirdevādipūjanam |
śākhādevaprapūjāṃ ca dhvajānāṃ pūjanaṃ tathā || 67 ||
[Analyze grammar]

sarvakalaśapūjāṃ ca vedapūjāṃ cakāra ha |
vedīkuṇḍeṣu sarveṣu kuṇḍapūjāṃ cakāra ca || 68 ||
[Analyze grammar]

kuṇḍamadhye viśvakarmapūjanaṃ pracakāra saḥ |
mekhalāpūjanaṃ tatra devānāṃ pūjanaṃ tathā || 69 ||
[Analyze grammar]

yonipūjāṃ kaṇṭhapūjāṃ nābhipūjāṃ cakāra saḥ |
vāstupūruṣapūjāṃ ca vahnisthāpanamācarat || 70 ||
[Analyze grammar]

navagrahārhaṇaṃ cādhidevatārhaṇamācarat |
pratyadhidevatāpūjāṃ nāgapūjāṃ samācarat || 71 ||
[Analyze grammar]

lokapālārhaṇaṃ cakre gaṇeśabhūtapūjanam |
dikpālapūjanaṃ cakre śrīdevīpūjanaṃ tathā || 72 ||
[Analyze grammar]

maṇḍalasthāpitadevārhaṇaṃ cakre haristathā |
kalaśārhaṇamevāpi ṣaṭpañcāśatsurārhaṇam || 73 ||
[Analyze grammar]

ṛṣīṇāṃ pūjanaṃ pitṛpūjanaṃ siddhapūjanam |
mṛtyukālārhaṇaṃ cakre saritsāgarapūjanam || 74 ||
[Analyze grammar]

śailā''yudhā'rhaṇaṃ cakre ārṣīdevīprapūjanam |
kalaśasthāpanaṃ kṛtvā varuṇārhaṇamācarat || 75 ||
[Analyze grammar]

caturviṃśatyavatārān vāsudevādikānapi |
īśvarān tatsatīḥ sādhvī sarvāśca harirārcayat || 76 ||
[Analyze grammar]

tridevapārṣadān sarvān sarvadhāmanivāsinaḥ |
brahmasṛṣṭimayān sarvān īśasṛṣṭimayānapi || 77 ||
[Analyze grammar]

jīvasṛṣṭimayān sarvān śrīkṛṣṇaḥ samapūjayat |
caturdaśasu lokeṣu ye vasanti tu dehinaḥ || 78 ||
[Analyze grammar]

jaḍān divyān cetanāṃśca gurūn dāsīśca dāsakān |
catuḥkhaniṣu cotpannān sarvān kṛṣṇo hyapūjayat || 79 ||
[Analyze grammar]

pratikuṇḍaṃ ca rājānastathā cakruḥ prapūjanam |
tattanmaharṣiguruṇā yathoddiṣṭaṃ tathā vyadhuḥ || 80 ||
[Analyze grammar]

dravyatyāgaṃ kuṇḍavahnau cakāra parameśvaraḥ |
prokṣaṇīprokṣaṇaṃ cakre tathā''jyahavanaṃ vyadhāt || 81 ||
[Analyze grammar]

caruṃ tvagnau samāropya tathā'vasthāpya tatsthale |
samidho havanaṃ cakre sruveṇā''jyāhutīrdadau || 82 ||
[Analyze grammar]

svāhā devāyā'mukāyetyevaṃ homaṃ cakāra saḥ |
brahmasṛṣṭīśvarasṛṣṭijīvasṛṣṭibhya eva ca || 83 ||
[Analyze grammar]

yajñadevebhya evā'pi bahvāhutīrdadau prabhuḥ |
kuṇḍamaṇḍapavāstūnāṃ devatābhyo havaṃ dadau |
satīsādhvīsevikāśaktibhyaḥ kṛṣṇo havaṃ dadau || 84 ||
[Analyze grammar]

yoginībhyaśca muktābhyo brahmapriyābhya ityapi |
sarvāṃgavyāpinībhyaḥ siddhibhyaḥ kṛṣṇo havaṃ dadau || 85 ||
[Analyze grammar]

ādityavasurudrāśvikumārebhyo havaṃ dadau |
avatārasahitāya nijāya cāhutīrdadau || 86 ||
[Analyze grammar]

carvāhutīrdadau cāmṛtātmikāstṛptaye hariḥ |
yūpāropaṃ tataścakre yūpadevānapūjayat || 87 ||
[Analyze grammar]

yūpamasiñcayaccāpi baliṃ yūpāya vai dadau |
nidrākalaśapūjāṃ ca prākārayaddharistataḥ || 88 ||
[Analyze grammar]

āmantritān jīvajātān yajñe bhāgaṃ harirdadau |
pāyasānnaṃ ghṛtaṃ dugdhaṃ phalāni ca rasān dadau || 89 ||
[Analyze grammar]

yathā yathā makhe vahnau sahasrāyutadhārikāḥ |
patantyāhutayo havyātmikāstathā tathā'bhitaḥ || 90 ||
[Analyze grammar]

sarve jīvāstṛptimanto jāyante haryanugrahāt |
vrīhayaśca yavā nivārādyā munyannakāni ca || 91 ||
[Analyze grammar]

kharjurā rasavantaśca kaṇā miṣṭarasānvitāḥ |
oṣadhayaśca samidhaḥ phalāni rasavanti ca || 92 ||
[Analyze grammar]

śarkarādyāstathā miṣṭānnāni cāhutayo'bhavan |
vahnayaḥ sarvajātīyāścāgatya tṛptimāvahan || 93 ||
[Analyze grammar]

agnimukhā dehinaśca ye'nye brahmamukhāstathā |
kṛṣṇamukhāstathā sarve sādhumukhāstathā'pare || 94 ||
[Analyze grammar]

satīmukhyo devikāmukhyaśca yāḥ śaktayastathā |
svāhāmukhyaśca yā lakṣmīśrīmukhyaśca tathā'parāḥ || 95 ||
[Analyze grammar]

annapūrṇānanā yāśca sarvāstāstṛptimāvahan |
jaḍacetanatattvāni tṛptāni vividhairhavaiḥ || 96 ||
[Analyze grammar]

pūrṇāhutiṃ dadau paścādārārtrikaṃ tato'karot |
sarvadevādisattvānāṃ viśrāntiṃ pradadau tataḥ || 97 ||
[Analyze grammar]

evaṃ vai saptaviṃśatyātmakeṣu kuṇḍakeṣu ca |
sarvatra ṛṣibhiḥ pūjābalidānahavāḥ kṛtāḥ || 98 ||
[Analyze grammar]

rājabhiryugalaiścāpi havanecchāyutaistathā |
gṛhīto havalābhaśca bālakṛṣṇājñayā makhe || 99 ||
[Analyze grammar]

dakṣiṇāḥ pratipūjāyāṃ bhūyasyo'rpyanta eva ca |
phalāhārā rasāhārā annāhārā hyatipriyāḥ || 100 ||
[Analyze grammar]

dīyante sarvajantubhyaḥ svasvāhārāstu śārṅgiṇā |
kalpacintāmaṇijanyā dīyante bhakṣyasadrasāḥ || 101 ||
[Analyze grammar]

evaṃ nirvartitaṃ ramyaṃ pañcamīhavanaṃ śubham |
tataḥ sarvānabjakoṭyarbudapadmādisaṃkhyakān || 102 ||
[Analyze grammar]

muktān dhāmāni muktānīścāvatārāṃśca tatpriyāḥ |
pārṣadān pārṣadānīśca bhojayāmāsa cāmṛtān || 103 ||
[Analyze grammar]

miṣṭānnāni ca divyāni peyānyanantakāni ca |
bhakṣyabhojyāni sarvāṇi lehyānyapi śubhāni ca || 104 ||
[Analyze grammar]

brahmapriyāstathā bhaktāḥ satīḥ sādhvīrharipriyāḥ |
bhojayāmāsa bhagavān kanyakā bahusaṃkhyakāḥ || 105 ||
[Analyze grammar]

īśvarānīśvarāṇīśca māyāṃ māyākuṭumbakam |
caturviṃśatitattvāni bhojayāmāsa mādhavaḥ || 106 ||
[Analyze grammar]

aṣṭāvaraṇalokasthān brahmeśaviṣṇusevakān |
tridevadāsadāsīśca bhojayāmāsa mādhavaḥ || 107 ||
[Analyze grammar]

tridevadevikāḥ sarvā brahmacaryā'dhikanyakāḥ |
devīḥ kumārikā yoginīḥ sāṃkhyayoginīḥ satīḥ || 108 ||
[Analyze grammar]

sarvāḥ saṃbhojayāmāsa vrataikādaśikādikāḥ |
tithirūpān devikānāṃ gaṇānapsarasastathā || 109 ||
[Analyze grammar]

sarvāḥ saṃbhojayāmāsa bhagavān kṛṣṇavallabhaḥ |
merusthān satyalokasthān maharjanatapaḥsthitān || 110 ||
[Analyze grammar]

ṛṣīn pitṝn tathā''rṣīśca pitṛkā mātṛkāstathā |
svaḥsthān devān devikāśca bhuvarlokasthitāṃstathā || 111 ||
[Analyze grammar]

bhūsthānnarān nārīvargān jarāyujā'ṇḍajāṃstathā |
svedajānudbhitprajātān bhojayāmāsa mādhavaḥ || 112 ||
[Analyze grammar]

tīrthānyaraṇyasaritaḥ parvatān sāgarādikān |
api kīṭapataṃgādyān bhojayāmāsa mādhavaḥ || 113 ||
[Analyze grammar]

brahmaputrān rājasāṃśca tāmasān sarvajātikān |
dharmādharmaprajātāṃśca kāśyapān sūryacandrajān || 114 ||
[Analyze grammar]

pātālasthān rākṣasāṃśca yakṣān gandharvakinnarān |
saptatalino bhūtāṃśca pretān yamālayasthitān || 115 ||
[Analyze grammar]

kiṃpuṃso māgadhān sūtān bandijanānabhojayat |
cāraṇān śūdrajātīyān vidyādhrān vanavāsinaḥ || 116 ||
[Analyze grammar]

krūrān sattvān ḍākinīśca śākinīśca tathā'parāḥ |
cāṇḍālān śvapacān paśūn bhojayāmāsa mādhavaḥ || 117 ||
[Analyze grammar]

sarpānnāgān pakṣigaṇān kuṣmāṇḍān pravināyakān |
daityān devānāsurāṃśca bhojayāmāsa mādhavaḥ || 118 ||
[Analyze grammar]

jaḍaṃ ca cetanaṃ sarvam ādhārādheyamiśritam |
bubhuje yajñabhāgaṃ vai kratoḥ prāsādikaṃ śubham || 119 ||
[Analyze grammar]

sarvaṃ trisṛṣṭijaṃ nityamanityaṃ sthirajaṃgamam |
bhuktvā yajñaprasādaṃ sutṛptimāpa hi śāśvatīm || 120 ||
[Analyze grammar]

rādhādyā me priyāḥ sarvāstṛptimāptā prasādajām |
ityevaṃ rādhike yajñakāryaṃ cādyadine'bhavat || 121 ||
[Analyze grammar]

iti śrīlakṣmīnārāyaṇīyasaṃhitāyāṃ dvitīye tretāsantāne yajñe bhūmipūjanaṃ vāstukuṇḍamaṇḍapādidevānāṃ pūjanaṃ brahmasṛṣṭīśvarasṛṣṭijīvasṛṣṭidehināṃ pūjanaṃ havanaṃ mahāpūrṇāhutidānaṃ |
bhojanadānaṃ cetyādinirūpaṇanāmā navaṣaṣṭyadhikaśatatamo'dhyāyaḥ || 169 ||
[Analyze grammar]