Chapter 168

śrīkṛṣṇa uvāca |
śṛṇu tvaṃ rādhike'nādikṛṣṇanārāyaṇaḥ svayam |
akṣarākhyaṃ pārṣadaṃ svaṃ sasmāra tūrṇameva ha || 1 ||
[Analyze grammar]

āgataścākṣarastatra kuṃkumavāpikāsthale |
natvā tasthā haristasmai dadāvājñāṃ śubhaśrutim || 2 ||
[Analyze grammar]

ketumāle mahān yajño bhaviṣyatīti patrikām |
kuṃkumāḍhyāṃ sarvasṛṣṭāśamantraṇārthamarthadām || 3 ||
[Analyze grammar]

śīghraṃ divyaiḥ pārṣadaistvaṃ sampreṣaya ca mā ciram |
ityuktvā bhagavān tasmai dadau tāṃ patrikāṃ yathā || 4 ||
[Analyze grammar]

anādiśrīkṛṣṇanārāyaṇo vijayatetamām |
ketumāle sāprapauṭhāniṣṭhāparāsamāgame || 5 ||
[Analyze grammar]

śrāvaṇe śuklapañcamyāṃ sarveṣṭiṃ vaiṣṇavaṃ makham |
kariṣyati trilokasthaistatrāgantavyamādarāt || 6 ||
[Analyze grammar]

gṛhṇīmaścātithilābhaṃ makhalābhaṃ vidantu ca |
ekādaśyāṃ pūrṇahavo bhaviṣyati sukhotsavaiḥ || 7 ||
[Analyze grammar]

avatārā īśvarāśca pitaraḥ ṛṣidevatāḥ |
mānavāḥ kāśyapāḥ sarve pātālādinivāsinaḥ || 8 ||
[Analyze grammar]

sthāvarā jaṃgamāścāpi samāyāntu makhe sukhāḥ |
lomaśaśca yavakrītaḥ kapilaśca bṛhaspatiḥ || 9 ||
[Analyze grammar]

sanatkumāro bhagavān uralaketubhūpatiḥ |
īśānaśca vayamete nivedayāma ādarāt || 10 ||
[Analyze grammar]

jīvaloke īśaloke brahmaloke vasanti ye |
āgantavyaṃ samastaistairnārāyaṇo'pi vacmyaham || 11 ||
[Analyze grammar]

anādiśrīkṛṣṇanārāyaṇastrivārakaṃ dale |
pratijñāya punarvacmi sarve cāyāntu vai makhe || 12 ||
[Analyze grammar]

kuṃkumavāpikākṣetrāt tṛtīyāyāmahaṃ makhe |
gamiṣyāmi bhavadbhiścopasthātavyaṃ tadā makhe || 13 ||
[Analyze grammar]

pārṣadāḥ sarvadhāmasthāḥ pārṣadānyaśca śaktayaḥ |
samāyāntu mahīmānasevārthaṃ pūrvake dine || 14 ||
[Analyze grammar]

ityevaṃ patrikāḥ koṭirūpiṇīḥ samapraiṣayat |
sarvalokeṣu bhagavān kṛṣṇanārāyaṇaḥ svayam || 15 ||
[Analyze grammar]

cidākāśena ca bhūtākāśena māyayā tathā |
mahākālena dharmeṇa dvārā vai sarvasṛṣṭiṣu || 16 ||
[Analyze grammar]

sṛṣṭyādau rādhike sarvatattvānāṃ lokalokinām |
āsīt kuṭumbavad yogaḥ saṃsargo melanaṃ gatiḥ || 17 ||
[Analyze grammar]

tatra naivāsti cāścaryaṃ yatraite dvārarūpiṇaḥ |
ahaṃ golokagaścāpi tvayā sākaṃ tadā'gamam || 18 ||
[Analyze grammar]

sarve nārāyaṇāstatrā'gacchan vilokya patrikāḥ |
sarvasṛṣṭijanāstatra cāyayuḥ snehasaṃbhṛtāḥ || 19 ||
[Analyze grammar]

vārdhayastu janānāṃ vai vimānānāṃ tadāmbare |
pradṛśyante sarvadikṣu tvāyānto makhabhūmikām || 20 ||
[Analyze grammar]

koṭyarbudābjapadmāni tvāyayuḥ pratidikstarāt |
yāvanto muktakoṭyaśca tāvantaḥ pārṣadādayaḥ || 21 ||
[Analyze grammar]

tāvatyaḥ śaktayaścāpi muktānyaḥ siddhayastathā |
tāvantaśceśvarāḥ sarve svasvaśaktyādiśobhitāḥ || 22 ||
[Analyze grammar]

tāvantaśca maheśādyāstāvantaścāṇḍavāsinaḥ |
surā'surāścidacido dravyaguṇakriyādikāḥ || 23 ||
[Analyze grammar]

vedā vidyāśca tīrthāni tattvāni dharmavistarāḥ |
tāvanta eva khanijāḥ sarvasvarganivāsijaḥ || 24 ||
[Analyze grammar]

vivarasthāśca miśrasthā vyatiriktāstathā'nvitāḥ |
parabrahmamayāḥ sarve triguṇāstatra cāyayuḥ || 25 ||
[Analyze grammar]

sarvasṛṣṭinivāsānāṃ darśanaṃ durlabhaṃ tu yat |
makhe'tra sulabhaṃ tadvai nārāyaṇakṛpāvaśāt || 26 ||
[Analyze grammar]

kiṃ vaktavyaṃ tadā rādhe'nyathākartā haristadā |
kartā'kartā'pi siddhaḥ sa nānyaśaktistu tādṛśī || 27 ||
[Analyze grammar]

cumbyante sarvasāmagryo yādṛśaṃ cumbakaṃ bhavet |
cumbako'tra parabrahma sarvā''kṛṣṭiḥ kathaṃ na vai || 28 ||
[Analyze grammar]

varṇayituṃ na śaknomi yathā''kṛṣṭāḥ prajā makhe |
ataḥ pūrvaṃ mayā''kṛṣṭā na dṛṣṭā vai makhāntare || 29 ||
[Analyze grammar]

utsavātte samāyānti kīrtanairvādyanartanaiḥ |
vadantaśca parabrahmā''mantrayatyeva no'pyaho || 30 ||
[Analyze grammar]

evaṃ vai gamyamāneṣu sarveṣu ca samantataḥ |
anādiśrīkṛṣṇanārāyaṇaḥ prasthānamācarat || 31 ||
[Analyze grammar]

ṛṣibhirmunibhiḥ sākaṃ kṣetrapālādibhistathā |
tīrthaiḥ saurāṣṭradeśīyaiḥ prajājanaiḥ kuṭumbibhiḥ || 32 ||
[Analyze grammar]

brahmapriyābhiḥ sarvābhiḥ koṭyarbudābjasaṃkhyakaiḥ |
bhaktaistathā kuṭumbena sahā''rohad vimānakam || 33 ||
[Analyze grammar]

vimāneṣu sahasreṣu tathā'nyā bhaktakoṭayaḥ |
ārohan vyomamārgeṇa jayanādān pracakrire || 34 ||
[Analyze grammar]

sādhavaśca tathā siddhāḥ satyo'nvīyustadā harim |
ākāśaṃ vyanadat sarvaṃ vimānavādyagarjanaiḥ || 35 ||
[Analyze grammar]

agre vedā mūrtimantaḥ prayānti mantrighoṣiṇaḥ |
vetradharyaḥ śāradādyā gāyanti guṇakīrtanam || 36 ||
[Analyze grammar]

devavādyavimānāni kavayo yānti vai tataḥ |
niśānadhvajaḍaṃkādyāstato yānti jayadhvanāḥ || 37 ||
[Analyze grammar]

tato muktāstataḥ patnyo brahmapriyā asaṃkhyakāḥ |
tato vimānaṃ kṛṣṇasya tataśca rakṣiṇo janāḥ || 38 ||
[Analyze grammar]

pārṣadāśca tataḥ sarve prajāstataḥ surāṣṭrajāḥ |
kṣetrapālāḥ sarvapaścāḥ samāyānti makhe tadā || 39 ||
[Analyze grammar]

himālayaḥ svayaṃ yadvad gagane kiṃ pragacchati |
svargaṃ vā svayamāgatya kṣityuttare pragacchati || 40 ||
[Analyze grammar]

sāgarā ratnaśobhāḍhyā yānti vā nākameva kim |
ityevaṃ darśanaṃ vyomni kṛṣṇanārāyaṇasya vai || 41 ||
[Analyze grammar]

prasthānasārthayānasyā'bhavattadā vilakṣaṇam |
tṛtīyāyā dine madhyāhnottaraṃ bhagavān svayam || 42 ||
[Analyze grammar]

ghaṭikāsu daśasveva vyatītāsu makhāmbaram |
prāpa tadā jayadhvānā'ntarīkṣe khe sthale'bhavan || 43 ||
[Analyze grammar]

arbudā'rbudakoṭyaśca darśakānāṃ viniryayuḥ |
ākāśaṃ tejasā vyāptaṃ vilakṣaṇena cā'bhavat || 44 ||
[Analyze grammar]

sūryavahnayādayo yatra vilīnā naiva gocarāḥ |
lokānāṃ darśanayogyānyāsan naitrāṇi vai tadā || 45 ||
[Analyze grammar]

anādiśrīkṛṣṇanārāyaṇasya kṛpayaiva ha |
śrīharestejasā sarve tejomayaṃ hyabhūttadā || 46 ||
[Analyze grammar]

api kṛṣṇāḥ śilāḥ sarvā bhāsante maṇayo yathā |
api kṛṣṇaṃ bhūtalaṃ tu candrojjvalamabhūttadā || 47 ||
[Analyze grammar]

api romāṇi keśāśca svarṇavarṇāstadābhavan |
api kākā bhramarāśca haṃsā iva ca kokilāḥ || 48 ||
[Analyze grammar]

api nīlaṃ tadā vyomā'bhavaccāndraṃ talaṃ yathā |
apyāntarāṇi lokānāmabhavan brahmabhāni tu || 49 ||
[Analyze grammar]

bhautikaṃ tu tadā divyaṃ yāvattvakṣaravaddhyabhūt |
svargabhūvyomatattvānāṃ bhedo'pi vilayaṃ gataḥ || 50 ||
[Analyze grammar]

saptarūpāṇi sarvāṇi śvetavarṇāni cā'bhavan |
māyāyāstāmaso rakto bhāvo'pi sattvatāṃ yayau || 51 ||
[Analyze grammar]

api sarvāśca sāmagryo brahmamayyastadā'bhavan |
brahmabhavanatulyāśca tadā grāmā gṛhāṇi ca || 52 ||
[Analyze grammar]

sarvaṃ brahmamayaṃ cābhūd bālakṛṣṇasya tejasā |
divyopahārapūjādyaiḥ prajā nṛpā maharṣayaḥ || 53 ||
[Analyze grammar]

rādhike svāgatārthaṃ copatasthire samutsukāḥ |
jayanādān prakurvantaścitrayantaḥ pratikṛtīḥ || 54 ||
[Analyze grammar]

sāñjalayaḥ sārhaṇāśca sabhāvāḥ snehilānanāḥ |
praphullanetrapadmāśca premabharā''ntarāstathā || 55 ||
[Analyze grammar]

nāryaḥ kukṣau dhṛtabālā narāścyutaśirodhṛtāḥ |
ūrdhvalagnavṛttayaścottānānanāstadā'bhavan || 56 ||
[Analyze grammar]

anādiśrīkṛṣṇanārāyaṇaḥ śrībhagavān prabhuḥ |
tirobhāvayadugraṃ tattejo'mbarādavātaran || 57 ||
[Analyze grammar]

sarvadṛśyo'bhavaccāpi sthūladṛśyo'bhavat prabhuḥ |
ambarāt suramuktānāṃ puṣpavṛṣṭistadā'bhavat || 58 ||
[Analyze grammar]

candanānāṃ śubhā vṛṣṭiścā'kṣatānāṃ tathā'bhavat |
svarṇarūpyakahīrāṇāṃ vṛṣṭistadā'mbarādabhūt || 59 ||
[Analyze grammar]

klṛptagopurasopānaiḥ śanaiḥ kṛṣṇo hyavātarat |
caturdantārjunahastiyāne kṛṣṇaṃ nyaṣādayat || 60 ||
[Analyze grammar]

nṛpāḥ sarve svarṇaratnahārān gucchān samārpayan |
nemuśca daṇḍavat devyo rājñyaḥ kanyā vyavardhayan || 61 ||
[Analyze grammar]

bhagavantaṃ tvakṣatādyaiścāṃkuraiścandanaiḥ sumaiḥ |
netrapuṭākhyakamalairduḥkhahāñjalibhirmuhuḥ || 62 ||
[Analyze grammar]

śāṭīprāntaistathā copasthānaiḥ svastikahastakaiḥ |
hṛdayaiḥ premabhāvaiśca namanaistamavardhayan || 63 ||
[Analyze grammar]

jayaśabdaiśca lājābhiḥ kusumaistīrthavāribhiḥ |
avardhayan hariṃ bālakṛṣṇaṃ nārāyaṇaṃ prajāḥ || 64 ||
[Analyze grammar]

vyajanaiścāmaraiśchatraiḥ sugandhiśītalairjalaiḥ |
gandhasārānvitaiḥ kṛṣṇaṃ śreṣṭhino sukhayan mudā || 65 ||
[Analyze grammar]

nārikelaiḥ śarkarābhiḥ kuṃkumābīralālakaiḥ |
māṃgalikaphalādyaiśca bālakṛṣṇaṃ vyavardhayan || 66 ||
[Analyze grammar]

svarṇarathe śatacakre divyasiṃhāsane prabhuḥ |
rājamānaśca gṛhṇāti janārpitopadāstadā || 67 ||
[Analyze grammar]

kāṃścid dṛṣṭyā netrakoṇaiḥ smitairhastaiśca kena ca |
bhāvaistu vividhaiḥ kṛṣṇo mānayāmāsa vai prajāḥ || 68 ||
[Analyze grammar]

sarvebhyo hāsavadanairbahurūpaistadā hariḥ |
samantato dadau naijaṃ darśanaṃ kṛpayā ciram || 69 ||
[Analyze grammar]

yathā cāgre tathā paśce yathā pārśve tathordhvake |
tathaiva sarvanetreṣu hṛdayeṣvapyadṛśyata || 70 ||
[Analyze grammar]

kebhyaściddhārapuṣpāṇi dadātyeva prasādataḥ |
kebhyaściddhīrakān mauktikādīn ratnāni gucchakān || 71 ||
[Analyze grammar]

dadātyeva mahārājaḥ prāsādikān pareśvaraḥ |
phalāni tāmbūlakāni pūgyādīni dadāti ca || 72 ||
[Analyze grammar]

nārikelāni vastrāṇi pūjāyāmāgatāni ca |
svāgatārthopadātmāni prāsādīni dadāti vai || 73 ||
[Analyze grammar]

śatakrośeṣu sarvatra datvā svadarśanaṃ hariḥ |
gajayānena vai rātrau nivāsālayamāyayau || 74 ||
[Analyze grammar]

jalapānādikaṃ cakruḥ sarve sārthāśca bhojanam |
dattālayeṣu yogyeṣu viśaśramuśca vai tataḥ || 75 ||
[Analyze grammar]

sakuṭumbo hariścāpi brahmapriyāsamanvitaḥ |
ṣaḍyukcatvāriṃśadūrdhvaṃ śatayuk bubhuje svayam || 76 ||
[Analyze grammar]

papau śāntiṃ jagāmā'tha nidrāṃ yogamayīmapi |
āprātaścāpi jagrāha dāsadāsīprasevitaḥ || 77 ||
[Analyze grammar]

rātrau sthale sthale tatra babhūvuḥ kīrtanāni tu |
kathāḥ prāgvṛttamiśrāśca saṃpracakrurmaharṣayaḥ || 78 ||
[Analyze grammar]

cāraṇā vaṃśavistārān itivṛttajuṣastadā |
itihāsān jagaduśca samāje bhūbhṛtāṃ tadā || 79 ||
[Analyze grammar]

sādhavo jñānavārtāśca cakrurmokṣavidhipradāḥ |
nāryo gāyanti rāgādyairgītikāḥ kṛṣṇamānasāḥ || 80 ||
[Analyze grammar]

kanyakā rāsamābadhya bhramanti vartulāni ca |
gāyanti tālikādhvānairnupūraghurghurīgataiḥ || 81 ||
[Analyze grammar]

nartakyo nartanaṃ raṃge kurvanti dhanisaṃkule |
vādyakā vādyakuśalā vādayanti ramanti ca || 82 ||
[Analyze grammar]

naṭā nāṭyaṃ prakurvanti darśayanti ca pāṭavam |
kavayo racanāvyāptā dṛśyante śaṃsinastadā || 83 ||
[Analyze grammar]

mallāḥ kurvanti yuddhāni lokarañjanakāni ca |
pradarśanāni dṛśyante sṛṣṭisṛṣṭyantarāṇi ca || 84 ||
[Analyze grammar]

indrajālāni lokyante racitāni suvedibhiḥ |
hāsyaśālāsu hāsyāni narmāṇi ca bhavantyapi || 85 ||
[Analyze grammar]

prakāśyante vahnicūrṇairvidyudagnisuśilpibhiḥ |
vahnāvākārarūpāṇi cāmbare garjanāni ca || 86 ||
[Analyze grammar]

khelanāni vahniyogaiḥ kṣipyante tvambare'pi ca |
bhavanti garjanā vyomni prasphoṭadravyacitratā || 87 ||
[Analyze grammar]

bahurūpadharāścāddi rūpyante kauśalairnijaiḥ |
bhaṇḍakā veṣakāścāpi rañjayanti prajāstadā || 88 ||
[Analyze grammar]

vṛṣabhāṇāṃ mahiṣāṇāṃ rāṇḍiyānāṃ pragarviṇām |
kariṇāṃ bhallukānāṃ vānarāṇāṃ yodhanāni ca || 89 ||
[Analyze grammar]

rātrāvutsavarūpeṇā'bhavaṃstadā tu rādhike |
dvandvavādyānyavādyanta tūpaśabdāḥ punaḥ punaḥ || 90 ||
[Analyze grammar]

ajāyanta murādīnāṃ vipañcīnāṃ svarāstadā |
apsarasāṃ kanyakānāṃ gītayaḥ sarvato'bhavan || 91 ||
[Analyze grammar]

vaidikā dhvanayastatrā''rṣāṇāmapyabhavan kṣitau |
napuṃsakānāṃ narmāṇi puttalīkhelanāni ca || 92 ||
[Analyze grammar]

gāruḍīnāṃ ca vidyānāṃ prayogāśca tadā'bhavan |
kalpajālasya racanā vividhāśca kvacitsthale || 93 ||
[Analyze grammar]

rāse kṛṣṇakṛtā līlā gopījanavibhūṣitāḥ |
kutraciccā'bhavaṃstatra bhaktibhedairmanogamāḥ || 94 ||
[Analyze grammar]

rāmādityanarādityalīlāścāpi kvacitsthale |
bālakṛṣṇacamatkārāḥ kvacitkurvanti tadvidaḥ || 95 ||
[Analyze grammar]

evaṃ rātrau tadā rādhe janānāṃ bhūmivāsinām |
tathānyeṣāṃ yatheṣṭānyāsannānandotsavāni vai || 96 ||
[Analyze grammar]

śrīmadgopālakṛṣṇasya tathā śrīkambharāśriyaḥ |
yaśogānāni yoṣitsu sarvasthale tadā'bhavan || 97 ||
[Analyze grammar]

kuṃkumavāpikākṣetraṃ surāṣṭaṃ cājanābhigam |
tadā gītiṣu sarvāsāṃ dhanyavādena śasyate || 98 ||
[Analyze grammar]

gāṃgeyāstu tadā bālā bālikā bhūbhṛtastathā |
ṛṣayo brahmabhaktāśca praśasyante ca gītiṣu || 99 ||
[Analyze grammar]

dvinadīsaṃgamaścāpi tīrthaṃ sudarśanaṃ tathā |
yajñatīrthaṃ śatakrośaṃ śasyante rādhike'bhitaḥ || 100 ||
[Analyze grammar]

evaṃ tṛtīyarātriḥ sā vyatīyāya sukhocchrayā |
prātarjātaṃ caturthyāstu kṛṣṇo nidrāṃ jahāti ca || 101 ||
[Analyze grammar]

maṃgalāni ca turyāṇi hyavādyanta samantataḥ |
agāyanta yaśovārtāḥ sūtamāgadhabandayaḥ || 102 ||
[Analyze grammar]

rādhike śrīharirnidrāṃ tatyāja maṃgalaśravāḥ |
unnidraṃ sarvataḥ kṣetraṃ cābhūt krośaśatāntaram || 103 ||
[Analyze grammar]

iti śrīlakṣmīnārāyaṇīyasaṃhitāyāṃ dvitīye tretāsantāne yajñamaṃgalapatrikāprakāśanaṃ sarvasṛṣṭivāsināmāgamanaṃ śrīhareḥ sakuṭumbasaurāṣṭrīyaprajāsahitasya vimānairyajñabhūmigamanaṃ svāgataṃ bhramaṇaṃ viśrāntirmanorañjanādīni cetinirūpaṇanāmā'ṣṭaṣaṣṭyadhikaśatatamo'dhyāyaḥ || 168 ||
[Analyze grammar]