Lakshminarayana Samhita [sanskrit]

by Shwetayan Vyas | 1,169,834 words | ISBN-10: 8170801818 | ISBN-13: 9788170801818

The Lakshminarayana Samhita Chapter 167 (Sanskrit text), including grammatical analysis, glossary and relevant print editions. The Lakshmi-narayana-samhita is an encyclopaedic work devoted to Narayana although it deals with various deities. The work is written in Puranic style and divided into four books according to the four Yugas. In total, the work consists of roughly 120,000 metrical verses.

śrīkṛṣṇa uvāca |
śṛṇu tvaṃ rādhike paścād yadajāyata vacmi te |
anādiśrīkṛṣṇanārāyaṇasvāmipatīśvaraḥ || 1 ||
[Analyze grammar]

praiṣayallomaśaṃ cānyān maharṣīn yajñakovidān |
patnīvrataṃ maharṣiṃ ca śvetavyāsaṃ sanātanam || 2 ||
[Analyze grammar]

sanatkumāraṃ ca tathā gaṇeśaṃ jātavedasam |
satrāyaṇaṃ gālavaṃ ca svīyaprakāśamityapi || 3 ||
[Analyze grammar]

śatānandaṃ nāradaṃ ca devaguruṃ bṛhaspatim |
īśānaṃ ca mahādevaṃ kapilaṃ bhagavanmunim || 4 ||
[Analyze grammar]

śukaṃ ca vallabhamuniṃ vāmanaṃ suratāyanam |
hemantaṃ devaprakāśaṃ yajñopakaraṇānyapi || 5 ||
[Analyze grammar]

samagrāṇi vimāne preṣayāmāsa sa tānmunīn |
pratipaddivase sarve madhyāhnottarameva tu || 6 ||
[Analyze grammar]

prāptā niṣṭhāparātīre yatra vṛkāyanādayaḥ |
svāgataṃ kṛtavantaste yavakrītādayastadā || 7 ||
[Analyze grammar]

āgatānāṃ lomaśādimaharṣīṇāṃ jayādibhiḥ |
madhuparkādibhiścāpi pupūjurlomaśādikān || 8 ||
[Analyze grammar]

vimānaṃ tu vimānena saha bhūmāvarakṣayan |
gāṃgeyāśca yavakrītādayaḥ pupūjurādarāt || 9 ||
[Analyze grammar]

viśvakarmā tathā devāyatano dvau samāgatau |
haryājñayā śilpivaryau tatraiva pratipaddine || 10 ||
[Analyze grammar]

viśramya bhojanaṃ kṛtvā tato bhūmiviśodhanam |
maṇḍapaṃ dharmaśālāśca pākaśālāḥ pracakratuḥ || 11 ||
[Analyze grammar]

yajñaśālā vāsaśālā homaśālāḥ pracakratuḥ |
ghaṭaśālā vastuśālā mahīmānālayān śubhān || 12 ||
[Analyze grammar]

muktaśālā avatāranivāsān devatālayān |
ṛṣiśālāḥ pitṛśālā yakṣarākṣasasadgṛhān || 13 ||
[Analyze grammar]

jaḍacetanavāsāṃśca cakratuste samantataḥ |
śatakrośamite deśe nadīdvayāntarālake || 14 ||
[Analyze grammar]

cakraturmaṇḍapān ramyān yathāvāsisamarhaṇān |
yavakrītādayaścāpi svasvadeśān yayurdrutam || 15 ||
[Analyze grammar]

tattaddeśīyanṛpatīnāninyuśca prajāstathā |
śreṣṭhino bhaktavaryāṃśca narān nārīḥ kuṭumbinaḥ || 16 ||
[Analyze grammar]

vimānaistvaritaṃ sarve cāninyuścādhvarasthalīm |
śṛṇu tvaṃ rādhike mukhyābhidhānāni makhārthinām || 17 ||
[Analyze grammar]

samrāṭ pūrvapradeśānāmuralaketusaṃjñakaḥ |
yavakrītarṣiṇā sārdhaṃ ṣaṣṭilakṣaprajāyutaḥ || 18 ||
[Analyze grammar]

kuṭumbasahitaścībjalakṣmīdravyādibhiḥ saha |
yānavāhanasaṃsmṛddhyā yajñārthaṃ samupāyayau || 19 ||
[Analyze grammar]

romāyanarṣiṇā sākaṃ rumāṇāṃ krathako nṛpaḥ |
lakṣaprajābhiḥ sahitaḥ sakuṭumbaḥ samāyayau || 20 ||
[Analyze grammar]

kṛpāsthalarṣiṇā sārdhama pṛthurājaḥ kuṭumbavān |
daśasāhasramanujaiḥ saha yajñārthamāyayau || 21 ||
[Analyze grammar]

yugaśāvarṣiṇā sārdhamuṣṭrālanṛpatistathā |
haṃkārākhyanṛpaścāpi jayakoṣṭhalabhūpatiḥ || 22 ||
[Analyze grammar]

trayaste bhrātaro bhūpāḥ kuṭumbasahitāstathā |
lakṣaprajāyutāstatra makhārthaṃ samupāyayuḥ || 23 ||
[Analyze grammar]

valgurāyarṣiṇā sārdhaṃ tīrāṇabhūpatistadā |
daśasāhasramanujaiḥ kuṭumbī kratumāyayau || 24 ||
[Analyze grammar]

girīśena samaṃ rājā alvīnaraḥ kuṭumbavān |
daśasāhasramanujaiḥ sārdhaṃ yajñārthamāyayau || 25 ||
[Analyze grammar]

iṣṭalavarṣiṇā sārdhaṃ jinavarddhinṛpastadā |
kuṭumbī pañcasāhasraprajābhiryajñamāyayau || 26 ||
[Analyze grammar]

āpyāyanarṣiṇā sārdhamalpaketurnṛpastadā |
daśasāhasramanujaiḥ kuṭumbena sahāyayau || 27 ||
[Analyze grammar]

sveṣṭajararṣiṇā sārdhaṃ jayakṛṣṇavabhūpatiḥ |
daśasāhasramanujaiḥ kuṭumbena sahāyayau || 28 ||
[Analyze grammar]

pherunararṣiṇā sārdhaṃ parīśānanṛpo makhe |
daśalakṣaprajāyuktaḥ sakuṭumbaḥ samāyayau || 29 ||
[Analyze grammar]

parījamuninā sārdhamindurāyanṛpo makhe |
trisāhasraprajāyuktaḥ sakuṭumbaḥ samāyayau || 30 ||
[Analyze grammar]

pūrtagaṇḍarṣiṇā sārdhaṃ gaṇḍako nṛpa āyayau |
sakuṭumbaḥ pañcaśataprajābhiścādhvare tadā || 31 ||
[Analyze grammar]

supānamuninā sārdhaṃ nudrāṇḍanṛpatistadā |
pañcalakṣaprajāyuktaḥ kuṭumbī samupāyayau || 32 ||
[Analyze grammar]

phalāśanarṣiṇā sārdhaṃ līnorṇanṛpatirmakhe |
lakṣadvayaprajāyuktaḥ kuṭumbī samupāyayau || 33 ||
[Analyze grammar]

vallījīvanamuninā sākaṃ bṛhaccharo nṛpaḥ |
sahasramanujairyuktaḥ kuṭumbī makhamāyayau || 34 ||
[Analyze grammar]

jarāmaunarṣiṇā sārdhaṃ balalīno nṛpo makhe |
daśalakṣaprajāyuktaḥ kuṭumbavān samāyayau || 35 ||
[Analyze grammar]

pālanādarṣiṇā sārdhaṃ varasiṃho nṛpo'dhvare |
lakṣaprajānvitaḥ kuṭumbena yutaḥ samāyayau || 36 ||
[Analyze grammar]

lātavāyarṣiṇā sārdhaṃ rāyagāmalabhūpatiḥ |
sahasramanujaiḥ sārdhaṃ kuṭumbī yajñamāyayau || 37 ||
[Analyze grammar]

phālanādarṣiṇā sākaṃ phenatantunṛpo makhe |
sahasramanujairyuktaḥ kuṭumbī samupāyayau || 38 ||
[Analyze grammar]

svādvadanarṣiṇā sārdhaṃ stokahomanṛpo makhe |
sahasramanujairyuktaḥ kuṭumbī samupāyayau || 39 ||
[Analyze grammar]

nāraravarṣiṇā sārdhaṃ kāṣṭhayānanṛpo makhe |
pañcaśataprajāyuktaḥ kuṭumbī samupāyayau || 40 ||
[Analyze grammar]

lepanādarṣiṇā sārdhaṃ kolako nṛpatiḥ kratau |
śatamānavayuktaśca kuṭumbī samupāyayau || 41 ||
[Analyze grammar]

layadānapradeśebhyaścāṃgarājaḥ samāyayau |
viṣaparṣiyuto lakṣaprajāyuktaḥ kuṭumbavān || 42 ||
[Analyze grammar]

śakuntadeśataścāpi śākuntako nṛpo'dhvare |
lakṣaprajānvitaḥ kuṭumbavān tatra samāyayau || 43 ||
[Analyze grammar]

āyasāttu pradeśādvai prajā yajñe samāyayuḥ |
uttaradvīpabhāgebhyastathā prajāḥ samāyayuḥ || 44 ||
[Analyze grammar]

vimānairhastibhiścāśvairanobhiḥ rāṇḍiyaistathā |
uṣṭraiśca vṛṣabhaiścāpi svarṇaratnadhanānvitāḥ || 45 ||
[Analyze grammar]

bahubhojyapradeyaiśca vastubhiḥ saha cāyayuḥ |
dāsadāsīsamāyuktāḥ putraputryādivalgitāḥ || 46 ||
[Analyze grammar]

dampatīsamudāyāśca save tatra samāyayuḥ |
yajñārhābhiścopadābhiḥ sāmagrībhiḥ samāyayuḥ || 47 ||
[Analyze grammar]

ṣaḍviṃśatikṣitipāste'saṃkhyadravyasamanvitāḥ |
yajñārthaṃ vastusāmagrīnītvotsāhabharā makhe || 48 ||
[Analyze grammar]

āgatya pradaduḥ sarvāḥ sāmagrīrvividhāstadā |
gālavāyarṣaye sarvādhyakṣeśānāya vai tathā || 49 ||
[Analyze grammar]

īśānaḥ śrīmahādevo vaiṣṇavaḥ parameśvaraḥ |
sarvayajñakriyādhyakṣo vastvadhyakṣo'bhavattadā || 50 ||
[Analyze grammar]

maṇḍapādivyavasthāyā niyāmako'pi so hyabhūt |
rājabhistatra cāgatyeśānāya viniveditam || 51 ||
[Analyze grammar]

rājavargo hi pratyekaṃ yajñārthaṃ yajamānakaḥ |
vyayaṃ dātuṃ prabhavati tasmānmakhā nṛpā'rthitāḥ || 52 ||
[Analyze grammar]

ṣaḍviṃśatisaṃkhyākāśca bhavantu kuṇḍaśobhitāḥ |
śrutvaivaṃ rājavargasya vākyaṃ vṛkāyanastathā || 53 ||
[Analyze grammar]

lomaśaśca tatheśāno nīlākarṇādayastathā |
svayaṃprakāśaḥ kapilo devaprakāśako'pare || 54 ||
[Analyze grammar]

agragā jagṛhurvāco viśvakarmā'tra daivataḥ |
ājñāṃ prāpyarṣīṇāṃ tatra tathā kuṇḍāni cakratuḥ || 55 ||
[Analyze grammar]

saptaviṃśo mahān kuṇḍamūrdhanyo bhagavatkṛte |
vihito homamūrdhanyaḥ kṛṣṇanārāyaṇārthakaḥ || 56 ||
[Analyze grammar]

kuṇḍā navavidhāstatra kṛtā vai viśvakarmaṇā |
vedarṣividhitaḥ sarve diśā niyamatastathā || 57 ||
[Analyze grammar]

sarvatobhadravedyākhyaḥ kamalākārakuṇḍakaḥ |
sarvatobhadrikā vedī caturasrā tathā kṛtā || 58 ||
[Analyze grammar]

yonikuṇḍaḥ kṛtaścāpi kuṇḍo'rdhacandrakaḥ kṛtaḥ |
kuṇḍastrikoṇakaścāpi kuṇḍo vartulakastathā || 59 ||
[Analyze grammar]

ṣaṭkoṇakuṇḍakaścāpi ṣaṭpatrakuṇḍakastathā |
kuṇḍo'ṣṭakoṇakaścāpi kuṇḍo'ṣṭapatrakastathā || 60 ||
[Analyze grammar]

kṛtaścācāryakuṇḍaśca ṛgvedikuṇḍakaḥ kṛtaḥ |
yajurvedikuṇḍakaścā'tharvavediprakuṇḍakaḥ || 61 ||
[Analyze grammar]

sāmavedikuṇḍakaśca vedikāścāparāḥ kṛtāḥ |
madhyavedyaḥ pārśvavedyastathā ca vidhinā kṛtāḥ || 62 ||
[Analyze grammar]

evaṃ yathāyathaṃ pṛthvīṃ saṃskṛtya maṇḍapāntare |
yathāyogyān śubhakuṇḍān vedikāścātiśobhitāḥ || 63 ||
[Analyze grammar]

devāyatanakaścāpi viśvakarmā pracakratuḥ |
maṇḍapān rucirān ramyastaṃbhadhvajasuśobhitān || 64 ||
[Analyze grammar]

dikcihnādisamāḍhyasattoraṇādibhirañcitān |
śatakrośe kārayāmāsatustau divyavaibhavān || 65 ||
[Analyze grammar]

naisargikāni tejāṃsi nisargasalilānyapi |
śītasugandhivāyuśca nisargodyānabhūmayaḥ || 66 ||
[Analyze grammar]

svalpavimānavāhāśca vidyudvimānakoṭayaḥ |
dolāśca vividhāstatra nisargagītayastathā || 67 ||
[Analyze grammar]

śītoṣṇahadakuṇḍāśca nisargagandhasārakāḥ |
śayyāvāhanabhogyāni mālāpuṣpāṇi vai tathā || 68 ||
[Analyze grammar]

nisargatailasārāśca sarvaṃ naisargikaṃ kṛtam |
svargaṃ vā satyaloko vā kiṃ vā vaikuṇṭhameva tat || 69 ||
[Analyze grammar]

sūryā nisargajā yatra candrā nisargabhāsurāḥ |
sarāṃsi sarito yatra vahanti ca nisargajāḥ || 70 ||
[Analyze grammar]

evaṃ vai daihikaṃ sarvaṃ klṛptaṃ divyaṃ nisargajam |
rājñāṃ cāpi prajānāṃ ca śreṣṭhināṃ ca tapasvinām || 71 ||
[Analyze grammar]

daridrāṇāṃ narāṇāṃ ca yoṣitāṃ ṣaṇḍhakasya ca |
bhogā bhogyāstathā vāsā bhakṣyāḥ peyāstathālayāḥ || 72 ||
[Analyze grammar]

samānaṃ divyalokīyaṃ nityavibhūtijaṃ tadā |
klṛptaṃ vai saccidānandaṃ hāsanāśavivarjitam || 73 ||
[Analyze grammar]

dugdhārthaṃ cāgatāstatra golokāt kāmadhenavaḥ |
dugdhakulyā dadhikulyā ghṛtakulyāśca pāyasam || 74 ||
[Analyze grammar]

kṣīraṃ ca dugdhasārāṇi navanītāni vai tadā |
akṣayyānyabhavan divyānyapi havyānyanantataḥ || 75 ||
[Analyze grammar]

vṛkṣāśca vallikā kalpalatā ninyurmadhūnyapi |
ikṣusārān guḍān khaṇḍāḥ śarkarāścāpyasaṃkhyakāḥ || 76 ||
[Analyze grammar]

gundrāṃśca gundrapākāṃśca phalāni ca dalāni ca |
araṇyāni vanānyudyānāni ninyuranantataḥ || 77 ||
[Analyze grammar]

oṣadhayastadā divyāḥ kaṇān vrīhīn rasāṃstathā |
tilān yavān sudhānyāni samidho ninyurutsukāḥ || 78 ||
[Analyze grammar]

meghāśca vārdhayo miṣṭā nadā nadyaḥ sarāṃsi ca |
naisargaśītamiṣṭāni ninyuḥ peyāni cāntataḥ || 79 ||
[Analyze grammar]

śrīlakṣmyau śrīhareḥ patnyau bhūlīlābjāvibhūtayaḥ |
ramā'nnapūrṇā kamalā ninyurmiṣṭānnaparvatān || 80 ||
[Analyze grammar]

stambāḥ stabakāgucchāśca gulmā nālāśca kāṇḍikāḥ |
vallayastṛṇapatrāśca ninyuḥ puṣpāṇi cāntataḥ || 81 ||
[Analyze grammar]

gahvarāṇi khanayaśca parvatā vivarāṇi ca |
gairikāścitracūrṇāni ninyuḥ kuṃkumaraṃgakān || 82 ||
[Analyze grammar]

meruḥ pātrāṇi sarvāṇi cendraścā''staraṇāni ca |
devatāśca vimānāni ninyuryajñamahotsave || 83 ||
[Analyze grammar]

vasavaśca kuberaśca dravyāṇi tu dadurmakhe |
himālayoralādyāśca maṇiratnāni vai daduḥ || 84 ||
[Analyze grammar]

samudrā dvīpabhāgāśca mauktikāni dadurmakhe |
ghanāścakrustadā chāyāmṛtavaścānukūlatām || 85 ||
[Analyze grammar]

gandharvā vādakāḥ sarve dadurvādyāni śāradāḥ |
rājānaśca dadurdāsadāsīrbhṛtyān sukarmiṇaḥ || 86 ||
[Analyze grammar]

chatracāmarayānāni vāhanāni kratau tadā |
gṛhe gṛhe ca nicitāścintāmaṇigaṇāstataḥ || 87 ||
[Analyze grammar]

cintayanti yadevā'rthyaṃ tat tat sarvaṃ dadatyapi |
paṭahaḥ śrīharerdivyo nṛtyaṃśca ninadan muhuḥ || 88 ||
[Analyze grammar]

kalpapaṭaharūpo'yaṃ cā'kṣarabrahmarūpavān |
sarvāpekṣyanidhiprakhyo dadātyapyabhivāñchitam || 89 ||
[Analyze grammar]

vastrābhūṣādravaddravyaśṛṃgāraṃ devaśilpinaḥ |
yadapekṣyaṃ drutaṃ pratyupasthāpayanti vai makhe || 90 ||
[Analyze grammar]

evaṃ vai sarvavastūnāmānantyaṃ tatra vidyate |
jaladevī svayaṃ yatra rasarūpā vyajāyata || 91 ||
[Analyze grammar]

bhūdevī bhojyarūpā ca kiṃ nyūnaṃ tatra rādhike |
anādiśrīkṛṣṇanārāyaṇasya vāñcchayā tvidam || 92 ||
[Analyze grammar]

saṃhitaṃ samabhūt tatrā'ntaḥsthitasyā''jñayā drutam |
sūryaṃ candraṃ niśāṃ sandhyāṃ dinaṃ vāyuṃ tathā'mbaram || 93 ||
[Analyze grammar]

analaṃ śravaṇān devān pṛthvīṃ jalaṃ ca parvatān |
meghān kālaṃ vṛṣaṃ māyāmājñāṃ cakāra mādhavaḥ || 94 ||
[Analyze grammar]

anādiśrīkṛṣṇanārāyaṇaḥ śrīpuruṣottamaḥ |
sarve drāgeva sarvatra caturdaśastareṣu vai || 95 ||
[Analyze grammar]

āvedayantu janatā adhvaro vai prajāyate |
havyamādāya ca ketumāle yantu makhotsukāḥ || 96 ||
[Analyze grammar]

ityājñaptairveditāśca sthāninaḥ staravāsinaḥ |
āninyustatra havyāni copadāḥ sīmavarjitāḥ || 97 ||
[Analyze grammar]

ityevaṃ rādhike yajñe'saṃkhyasāmagrikādrayaḥ |
pūrvamevā'bhavan klṛptā acintyā vai maharṣibhiḥ || 98 ||
[Analyze grammar]

ṣaḍviṃśatikṣitipālā mahāścaryaṃ prapedire |
aho devasya māhātmyaṃ cānumātuṃ na śakyate || 99 ||
[Analyze grammar]

abhavan garvahīnāśca sāmagryalpaṃ nijaṃ viduḥ |
paṭhanācchravaṇāccāsya rādhe yajñaphalaṃ labhet || 100 ||
[Analyze grammar]

iti śrīlakṣmīnārāyaṇīyasaṃhitāyāṃ dvitīye tretāsantāne lomaśādīnāmṛṣīṇāṃ devāyatanaviśvakarmaṇoḥ ketumālīyabhūbhṛtāṃ prajānāṃ ca yajñabhūmāvāgamanam |
maṇḍapakuṇḍahavyopakaraṇādisamupasthitiritinirūpaṇanāmā saptaṣaṣṭyadhikaśatatamo'dhyāyaḥ || 167 ||
[Analyze grammar]

Other print editions:

Also see the following print editions of the Sanskrit text or (alternative) English translations of the Lakshminarayana Samhita Chapter 167

Cover of edition (2011)

Shri Lakshmi Narayana Samhita
by Chowkhamba Sanskrit Series Office (2011)

शेतायनव्यास (Shwetayan Vyas)

Buy now!
Like what you read? Consider supporting this website: