Chapter 165

śrīrādhikovāca |
priya prāṇapate kṛṣṇa kānta sarvamanohara |
nīlakarṇo vṛkarṣiśca tathā'nye bhaktapuṃgavāḥ || 1 ||
[Analyze grammar]

kiṃ cakruḥ ketumālākhye nīparāyāstaṭe tataḥ |
tadajñāte pradeśe tatsarvaṃ me vaktumarhasi || 2 ||
[Analyze grammar]

anādiśrīkṛṣṇanārāyaṇasambandhavatkathām |
śrutvā tṛptiṃ na cāpnomi priyaprāṇamukhāt punaḥ || 3 ||
[Analyze grammar]

śrīkṛṣṇa uvāca |
nīparāyāstaṭe rādhe bahuvṛkṣasamākule |
bahupakṣisamāvāse śītavāyumanohare || 4 ||
[Analyze grammar]

vimānātte kṣitau sarve cāvaterurjalāntikam |
gatvā sasnustataḥ pūjāṃ kṛtvā'nādihareśca te || 5 ||
[Analyze grammar]

naivedyaṃ phalamūlādeḥ pakvānnasya tathā''rpya ca |
pātheyādi prabhuktvaiva pītvā vāri prasādajam || 6 ||
[Analyze grammar]

ghaṭikāmātramāśramya cakruste nāmakīrtanam |
harekṛṣṇa bālakṛṣṇa parabrahma harehare || 7 ||
[Analyze grammar]

maheśāna pareśāna sarveśāna harehare |
evaṃ saṃkīrtanaṃ vādyaiḥ saha cakruḥ pramodinaḥ || 8 ||
[Analyze grammar]

tataḥ khaṇḍaṃ vīkṣituṃ te vimānamadhyarohayan |
vyomamārgeṇa dakṣeṇa krameṇa gatimācaran || 9 ||
[Analyze grammar]

yavakrītapradeśāṃste lokayāmāsurambarāt |
nistārāṃ ca nadīṃ pṛthānadīṃ romāyanakṣitim || 10 ||
[Analyze grammar]

kṛpāsthalādriṃ dinapāṃ nadīṃ vīkṣya ca sevikām |
yugaśāvapradeśāṃśca valgurāyapradeśakān || 11 ||
[Analyze grammar]

vīkṣya girīśadeśāṃśca iṣṭalavapradeśakān |
āpyāyanādriṃ ca tathā'lpādriṃ vīkṣya tataḥ param || 12 ||
[Analyze grammar]

sveṣṭajarapradeśāṃśca pherunasapradeśakān |
rāhūnāṃ ca nadīṃ dṛṣṭvā vīkṣya parījaparvatam || 13 ||
[Analyze grammar]

indirāṃ ca nadīṃ dṛṣṭvā gavādakavitāṃnadīm |
nadīṃ gavādayānāṃ ca pūrtagaṇḍapradeśakān || 14 ||
[Analyze grammar]

trigrāsāṃ ca nadīṃ dūrāṃ nadīṃ mitrāṃ nadīṃ tathā |
supānadeśān saṃvīkṣya gurūnāṃ saritaṃ tataḥ || 15 ||
[Analyze grammar]

phalāśanapradeśāṃśca lavavārāṃ nadīṃ tathā |
senānadīṃ vilokyā'tha sthāyinīṃ vīkṣya cāpagām || 16 ||
[Analyze grammar]

vallījīvanadeśāṃśca jarāmaunadradeśakān |
ālpāpāṃ ca nadīṃ vīkṣya audarīṃ saritaṃ tathā || 17 ||
[Analyze grammar]

pālanādapradeśāṃśca nadīṃ viṣatulāṃ tathā |
prapīṭhāṃ ca niyamānāṃ nadīṃ vīkṣya tataḥ param || 18 ||
[Analyze grammar]

lātavāyapradeśāṃśca vīkṣya dūnānadīṃ tataḥ |
pāyupaśyasaro dṛṣṭvā leṇḍugaṃ vīkṣya vai saraḥ || 19 ||
[Analyze grammar]

yonigaṃ ca saro dṛṣṭvā phālanādapradeśakān |
svādvadanapradeśāṃśca nāraravapradeśakān || 20 ||
[Analyze grammar]

trinayāṃ ca nadīṃ vīkṣya lepanādapradeśakān |
koladvīpaṃ prasamīkṣya śvetavārdhiṃ vilokya ca || 21 ||
[Analyze grammar]

hīnāṃ nadīṃ vilokyātha pācaurāṃ saritaṃ tathā |
kāmāyā vastunāyāśca saṃgamaṃ vīkṣya sundaram || 22 ||
[Analyze grammar]

donānadīṃ vilokyā'tha ājavābdhisamāgame |
bhaktāste śanakainaiṃjaṃ vimānaṃ hyavatārayan || 23 ||
[Analyze grammar]

nyūṣuste tatra vṛkṣādyaiḥ ramaṇīye pradeśake |
bhajanaṃ śrīhareścakrurvādyagāyananartanaiḥ || 24 ||
[Analyze grammar]

rātrau viśrāntimāsādya dvitīye divase punaḥ |
ṣaṭkarmāṇi vinirvartya kīrtayantaḥ savādyakāḥ || 25 ||
[Analyze grammar]

tenaiva ca krameṇaite babhramurvai vimānagāḥ |
śratvā prajāśca rājāno raṭaṇaṃ parameśituḥ || 26 ||
[Analyze grammar]

paramānandamāpannā jayavāco'bhisañjaguḥ |
svāgataṃ svāgataṃ ceti satkāravācamairayan || 27 ||
[Analyze grammar]

puṣpādyairvardhayāmāsuḥ pratideśaṃ pratisthalam |
evaṃ deśān bhramitvā ca donānadīṃ samāyayuḥ || 28 ||
[Analyze grammar]

viśaśramurbhojyapānaistṛptā niśāṃ tu kīrtanaiḥ |
yāpayāmāsurevaite tṛtīye'pi dine tathā || 29 ||
[Analyze grammar]

prātaḥ kṛtyaṃ vidhāyaiva niṣadya ca vimānake |
tenaiva ca krameṇaite babhramurvai vimānagāḥ || 30 ||
[Analyze grammar]

anādiśrīkṛṣṇanārāyaṇamūrtergale ca yaḥ |
cintāmaṇirdhṛto mālāmadhye spṛṣṭvā tu taṃ tadā || 31 ||
[Analyze grammar]

vṛkāyano maharṣiśca cintayitvā tu śarkarām |
miṣṭāmamṛtakalpāṃ ca samutpādya navāṃ navām || 32 ||
[Analyze grammar]

yatra yatra janā deśe vilokyante ca tatra ca |
varṣayāmāsa bahudhā hareḥ prasādalabdhaye || 33 ||
[Analyze grammar]

prajāstu harṣanādaiśca jagṛhuḥ śarkarāśca tāḥ |
cakhaduścātimuditā jayanādān pracakrire || 34 ||
[Analyze grammar]

svāgataṃ svāgataṃ ceti prārthayāmāsurutsukāḥ |
prasādaṃ ca samarpayya vimānaṃ sāyameva tat || 35 ||
[Analyze grammar]

donājavā'bdhisaṃgaṃ ca samāyātaṃ niśāmukhe |
rātrau te bhajanaṃ cakruḥ kṛṣṇanārāyaṇeti vai || 36 ||
[Analyze grammar]

tāvattatra samāyātā aṣṭāviṃśatikanyakāḥ |
divyarūpadharāḥ sarvāḥ kumāryaḥ śvetabhāsurāḥ || 37 ||
[Analyze grammar]

divyamālāmbarabhūṣādhāriṇyaścandrakāntayaḥ |
ramaṇīyā'tisundaryo vaiṣṇavyastaulasīsrajaḥ || 38 ||
[Analyze grammar]

nārāyaṇaharekṛṣṇa bālakṛṣṇeti vai harim |
raṭantyaḥ saumyabhāvena bhagavallagnamānasāḥ || 39 ||
[Analyze grammar]

puṣparatnā'kṣatahastāḥ kasturīcandanānvitāḥ |
pūjāsāmagrikāyuktāḥ praṇemustā vimānakam || 40 ||
[Analyze grammar]

kumāryaḥ pañca divyāśca divyābharaṇaśobhitāḥ |
divyavaiṣṇavaveṣāśca pūjopakaraṇānvitāḥ || 41 ||
[Analyze grammar]

ekaḥ śvetaścāparaśca kṛṣṇastṛtīyako javī |
caturthastrinayanaśca pañcamo nīlavarṇakaḥ || 42 ||
[Analyze grammar]

te'pi natvā vimānaṃ ca tasthuḥ kṣaṇaṃ kumārakāḥ |
tāvat trayaṃ samāyātaṃ nānyataraṃ suśobhitam || 43 ||
[Analyze grammar]

strīpuṃbhāvarahitaṃ ca śvetavarṇaṃ manoharam |
natvā vimānaṃ tvaritaṃ tasthau trikaṃ kṣaṇaṃ tadā || 44 ||
[Analyze grammar]

tāvattatra samāyātaṃ viṃśatiyatimaṇḍalam |
sajaṭaṃ vaiṣṇavaṃ divyaṃ tāpasaṃ brahmabhāsuram || 45 ||
[Analyze grammar]

nārāyaṇaharekṛṣṇa bālakṛṣṇa namo'stu te |
ekasvareṇa pravadat neme vimānakaṃ tu tat || 46 ||
[Analyze grammar]

atha smṛddhapuruṣāśca catvārastatra cāyayuḥ |
divyā divyābharaṇāśca divyarddhisaṃbhṛtāḥ śubhāḥ || 47 ||
[Analyze grammar]

tāpasāḥ siddhimantaśca yathā vai brahmacāriṇaḥ |
natvā divyaṃ vimānaṃ te tasthuḥ kṣaṇaṃ viśaśramuḥ || 48 ||
[Analyze grammar]

atha ṣaṣṭirdivyarūpā militvā te narāḥ striyaḥ |
vṛkāyanaṃ tathā cāṭvālarṣīn sarvān praṇamya ca || 49 ||
[Analyze grammar]

stutiṃ cakrurvimānābhimukha vilokya bhāvataḥ |
ekasvareṇa muditā netre pramilya vai tadā || 50 ||
[Analyze grammar]

vyāpako yaḥ parabrahmā'nādiśrīpuruṣottamaḥ |
muktamuktānikāsevyastasmai kṛṣṇāya te namaḥ || 51 ||
[Analyze grammar]

akṣaraṃ brahma yatrāste dhāma divyaṃ parātparam |
sevate yaṃ sadā tatra tasmai kṛṣṇāya te namaḥ || 52 ||
[Analyze grammar]

yanmūrtestu samutpannā rādhā śaktiḥ surūpiṇī |
rādhārthaṃ kṛṣṇarūpo'bhūt tasmai kṛṣṇāya te namaḥ || 53 ||
[Analyze grammar]

yaṃ kṛṣṇaṃ nityagoloke gāvo gopyaśca gopakāḥ |
sevante sukhadaṃ rāse tasmai kṛṣṇāya te namaḥ || 54 ||
[Analyze grammar]

yanmūrtestu samutpannā lakṣmīrmūrtiḥ surūpiṇī |
nārāyaṇo'bhūllakṣmyarthaṃ tasmai kṛṣṇāya te namaḥ || 55 ||
[Analyze grammar]

yaṃ vaikuṇṭhe pārṣadāḥ pārṣadānyaśca bhagāni ca |
prasevante sakhīkoṭyastasmai kṛṣṇāya te namaḥ || 56 ||
[Analyze grammar]

yo nātho'nādisṛṣṭeśca pravāhārthaṃ catuṣṭayam |
vāsudevādikaṃ vyūhaṃ dhatte kṛṣṇāya te namaḥ || 57 ||
[Analyze grammar]

yo devo vai mahābhūmā vairājaśca purā'bhavat |
tridevatāṃ samāpannastasmai kṛṣṇāya te namaḥ || 58 ||
[Analyze grammar]

yaḥ svamūrtau māṇikīṃ ca ramāṃ padmāvatīṃ satīm |
lakṣmīṃ nārāyaṇīṃ dhatte tasmai kṛṣṇāya te namaḥ || 59 ||
[Analyze grammar]

yo haṃsāṃ suguṇāṃ mañjulikāṃ dhatte svavigrahe |
dayāṃ jayāṃ ca lalitāṃ tasmai kṛṣṇāya te namaḥ || 60 ||
[Analyze grammar]

yo rādhāṃ yamunāṃ gaṃgāṃ virajāṃ ca sarasvatīm |
śāradāṃ kamalāṃ dhatte tasmai kṛṣṇāya te namaḥ || 61 ||
[Analyze grammar]

yaḥ svamūrtervivareṣu dhatte brahmāṇḍakoṭikāḥ |
brahmāṇḍeṣvanvitaścāste tasmai kṛṣṇāya te namaḥ || 62 ||
[Analyze grammar]

avyākṛte'mṛte dhāmni śvetadvīpe narāyaṇaḥ |
yastvāste śrīramāsevyastasmai kṛṣṇāya te namaḥ || 63 ||
[Analyze grammar]

ādityamaṇḍale hiraṇmayo yaśca virājate |
agnau yajñasvarūpaśca tasmai kṛṣṇāya te namaḥ || 64 ||
[Analyze grammar]

brahmāṇḍe viṣṇurūpo yaḥ svarge vāmanarūpadhṛk |
badaryāṃ ca hariścāste tasmai kṛṣṇāya te namaḥ || 65 ||
[Analyze grammar]

śeṣe nārāyaṇarūpaścātmasvantarniyāmakaḥ |
sākṣī yaḥ sarvabhūtānāṃ tasmai kṛṣṇāya te namaḥ || 66 ||
[Analyze grammar]

yaścāste bālakṛṣṇo'yaṃ śrīmadgopālanandanaḥ |
kuṃkumavāpikākṣetre tasmai kṛṣṇāya te namaḥ || 67 ||
[Analyze grammar]

yena gaṃgā kṛtā divyā'smanmātā ṣaṣṭibālakā |
pādāṅguṣṭhena satye vai tasmai kṛṣṇāya te namaḥ || 68 ||
[Analyze grammar]

mūrtirūpo vimāne'tra yaścāste bhagavān hariḥ |
gaṃgā'patyakṛpāvarṣī tasmai kṛṣṇāya te namaḥ || 69 ||
[Analyze grammar]

karmakāṇḍāya yogāya jñānāya ca viviktaye |
nītaye ca vicārāya tasmai kṛṣṇāya te namaḥ || 70 ||
[Analyze grammar]

jīvāya jīvakāyāpi prāṇāya kośine ca te |
khāya kāya ca satyāya tasmai kṛṣṇātmane namaḥ || 71 ||
[Analyze grammar]

tīrthāya sādhurūpāya sarvajñāya vihāriṇe |
muktaye muktidātre ca tasmai kṛṣṇātmane namaḥ || 72 ||
[Analyze grammar]

cidacitsarvarūpāya vimānasthāya mūrtaye |
bālāya bālakṛṣṇāya kāntakṛṣṇāya te namaḥ || 73 ||
[Analyze grammar]

brahmapriyādhipataye koṭiśaktīśvarāya ca |
śatacatvāriṃśadūrdhvakanyākāntāya te namonamaḥ || 74 ||
[Analyze grammar]

māyākālapuruṣāṇāṃ pataye dhāmadhāminām |
īśajīvādhipataye tasmai kṛṣṇāya te namaḥ || 75 ||
[Analyze grammar]

gocarāyā'gocarāya ṣaṣṭivandyāya mūrtaye |
śaraṇaṃ smaḥ samāpannāḥ śaraṇyāya ca te namaḥ || 76 ||
[Analyze grammar]

evaṃ stutvā rādhike te vṛkāyanābhikāṃkṣayā |
puṣpāñjalīnnibaddhyaiva vimānabhūmikāṃ yayuḥ || 77 ||
[Analyze grammar]

gāṃgeyāḥ ṣaṣṭibālāste viviśuśca vimānakam |
yatrā''ste bālakṛṣṇaḥ sa mūrtirūpo hariḥ svayam || 78 ||
[Analyze grammar]

dṛṣṭvā puṣpāñjaliṃ cakrurdaṇḍavaccādarādati |
tāvanmūrteḥ prāvirāsa bālakṛṣṇastu gocaraḥ || 79 ||
[Analyze grammar]

caturdaśasamāmūrtirdivyāvayavaśobhanaḥ |
koṭikāmādhisaundaryo hāsyasaumyānanaḥ prabhuḥ || 80 ||
[Analyze grammar]

brahmapriyābhisahitaḥ ṣaṭpatnīsahitaḥ svayam |
gaṃgāditīrthasahito vimāne gocaro'bhavat || 81 ||
[Analyze grammar]

gaṃgāṃ ca mātaraṃ dṛṣṭvā tathā kṛṣṇanarāyaṇam |
ṣaṣṭibālā mumudire gaṃgāstanyaṃ tadā'sravat || 82 ||
[Analyze grammar]

nipetuḥ śrīhareścāpi mātuśca pādayordrutam |
pañjalāni papuḥ sarve prakṣālya magnamānasāḥ || 83 ||
[Analyze grammar]

pūjayāmāsuratyarthaṃ puṣpamauktikahīrakaiḥ |
divyaratnaiḥ svarṇavastrābhūṣaṇaiśca phalādibhiḥ || 84 ||
[Analyze grammar]

divyaiśca madhubhiścāpi sugandhicandanādibhiḥ |
gandhasāraiḥ sarvarasairbhāvanābhiśca vai hṛdā || 85 ||
[Analyze grammar]

nīrājanaṃ tadā cakrurhareśca māturityapi |
pradakṣiṇaṃ pracakruśca prārthanāṃ cakrureva ca || 86 ||
[Analyze grammar]

koṭijanmāparādhānāṃ kṣantā nārāyaṇaprabho |
asmaddeśeṣu cāgatya kuru deśān hi pāvanān || 87 ||
[Analyze grammar]

pratīkṣāmastvāgamaṃ te prajānāṃ pāvanāya vai |
samāgatya harerasmān pāvayātra ciraṃsthitān || 88 ||
[Analyze grammar]

mātrā saha yadā satyāllokādāgamanaṃ tu naḥ |
bhagīrathasya yatnena cābhūttadā hareṇa vai || 89 ||
[Analyze grammar]

grahītā svajaṭāyāṃ no jananī tu tadā vayam |
viyuktā himavadvayomnastyaktvā kiṃpuruṣaṃ talam || 90 ||
[Analyze grammar]

ketumālaṃ nirjanaṃ ca dṛṣṭvā'tra nirupadravam |
nārāyaṇecchayā''gatya nivasāmo'tiśāntitaḥ || 91 ||
[Analyze grammar]

asmanmadhye bhavantīyā aṣṭāviṃśatikanyakāḥ |
gaṃgāputryo vayaṃ sarvāḥ pañca putrā ime tathā || 92 ||
[Analyze grammar]

trīṇyapatyāni caitāni kumārā viṃśatistathā |
catvāraścāpi bālāśca sarve gaṃgodbhavā vayam || 93 ||
[Analyze grammar]

kṛtvā yajñotsavānatra cāhūya daivamaṇḍalam |
ketumālaṃ pāvanaṃ ca kuru kṛṣṇaṃ samantataḥ || 94 ||
[Analyze grammar]

śrutvā'nādikṛṣṇanārāyaṇaḥ śrīkṛṣṇavallabhaḥ |
jahāse mumude cāpi svīcakāra tadarthitam || 95 ||
[Analyze grammar]

datvā tebhyaḥ prasādaṃ ca pratimāyāṃ tirobhavat |
parivāro'pi sarvo hi kṣaṇādantaradhīyata || 96 ||
[Analyze grammar]

vṛkāyano maharṣiśca nīlakarṇādayastathā |
śrutvā vṛttāntakaṃ dṛṣṭvā samāślikṣan hṛdā mudā || 97 ||
[Analyze grammar]

svāgataṃ te tataścakruḥ pūjābhojanavāribhiḥ |
gāṃgeyānāṃ tu sarveṣāṃ bālakṛṣṇakṛpājuṣām || 98 ||
[Analyze grammar]

militvā ca vimāne te cakruḥ śrīharikīrtanam |
pradaduśca tato naijaṃ paricayaṃ parasparam || 99 ||
[Analyze grammar]

āmantraṇaṃ pracakruśca gāṃgeyāstu vimānagān |
naijān deśān pāvayituṃ vihartuṃ ca punaḥ punaḥ || 100 ||
[Analyze grammar]

vṛkāyanādyāḥ svīcakrurāmantraṇaṃ punastataḥ |
jagaduḥ svavimāne ca saha sthātuṃ tu ṣaṣṭikam || 101 ||
[Analyze grammar]

aṅgīcakruśca te ṣaṣṭirdivyabālā yathoditam |
ityevaṃ rādhike kṛṣṇecchayā sammelanaṃ hyabhūt || 102 ||
[Analyze grammar]

itiśrīlakṣmīnārāyaṇīyasaṃhitāyāṃ dvitīye tretāsantāne vṛkāyananīlakarṇādimaharṣīṇāṃ ketumālaṃ prati vimānena gamanaṃ deśanirīkṣaṇaṃ gāṃgeyā'patyaṣaṣṭisammelana |
mityādinirūpaṇanāmā pañcaṣaṣṭyadhikaśatatamo'dhyāyaḥ || 165 ||
[Analyze grammar]