Chapter 163

śrīkṛṣṇa uvāca |
śṛṇu tvaṃ rādhike cānyaṃ camatkāraṃ hareḥ śubham |
anādiśrīkṛṣṇanārāyaṇasya pravadāmi te || 1 ||
[Analyze grammar]

kuṃkumavāpikākṣetre pāvane kāmyake pure |
karṣuko bhagavadbhakto dyuviśrāmā'bhidho'bhavat || 2 ||
[Analyze grammar]

dharmaṃ karma na jānāti naiva jānāti pūjanam |
naiva jānāti śāstroktaṃ vidhānaṃ daivakarma ca || 3 ||
[Analyze grammar]

gavāṃ saṃrakṣaṇaṃ caiva govṛṣāṇāṃ prapālanam |
jānātyeva paraṃ karma kṛṣiṃ jānāti cottamām || 4 ||
[Analyze grammar]

snānaṃ gopādarajasā sandhyā gokavalārpaṇam |
gāyatrī gonāmajapaḥ pūjanaṃ goprarakṣaṇam || 5 ||
[Analyze grammar]

vaiśvadevo nijabhuktiḥ svādhyāyaḥ kṛṣireva tu |
homo roṭakanirmāṇaṃ tarpaṇaṃ sasyapoṣaṇam || 6 ||
[Analyze grammar]

evaṃ tasya karmakāṇḍaḥ kṛṣikārye pravartate |
nānyat kiñcit sa jānāti tathāpi śuddhamānasaḥ || 7 ||
[Analyze grammar]

na cauryaṃ nā'nṛtavṛttirna droho jantuhiṃsanam |
na pratāraṇakāryaṃ ca vidyate'sya hṛdi kvacit || 8 ||
[Analyze grammar]

akalmaṣo vṛddhasevī gosevāpuṇyabhāg vratī |
kṣetre vāṭyāṃ samāgacchedatithiścet sa pūjyate || 9 ||
[Analyze grammar]

dīyate'tithaye cekṣudaṇḍaḥ śākadalādikam |
phalaṃ mūlaṃ dalaṃ kandaḥ vāso'pi pūlakagṛhe || 10 ||
[Analyze grammar]

sādhurvā bhagavadbhaktaḥ kaścidāyāttu vāṭikām |
sastrīputraḥ sevate taṃ pādasaṃvāhanādibhiḥ || 11 ||
[Analyze grammar]

rātrau kṣetre drumā'dho bhūtale vahnikhale śubhe |
vahniṃ prajvālya viśrāntiṃ tatprakāśe pravindati || 12 ||
[Analyze grammar]

mānasyai tu pratimāyai samarpayati bhojanam |
jalaṃ phalaṃ mūlakandaṃ kaṇān dalādikaṃ ca yat || 13 ||
[Analyze grammar]

rātrau nārāyaṇaṃ devaṃ smṛtvā nidrāṃ pragacchati |
prātarutthāya śārīraṃ kṛtvā śuddhimayaṃ tataḥ || 14 ||
[Analyze grammar]

gṛhītvā bhojanaṃ kṣetre kṛṣikārye pravartate |
evaṃ vai vartamānasya niṣpāpasya gṛhe kvacit || 15 ||
[Analyze grammar]

aśvapaṭṭasarastīrthaṃ kartuṃ vai bhaktamaṇḍalam |
samāyātaṃ niśāraṃbhe jñātvā''śrayapadaṃ tu tam || 16 ||
[Analyze grammar]

so'pyāśrayaṃ dadau kāṇḍaśālāyāṃ bhāvabhaktimān |
bhaktebhyaḥ sa dadau vāri dugdhaṃ ca roṭakādikam || 17 ||
[Analyze grammar]

tārṇāsanāni pradadau viśrāntiṃ cāpureva te |
niśāyāṃ bhajanaṃ cakruḥ kīrtanaṃ cakrurutsukāḥ || 18 ||
[Analyze grammar]

kīrtane'nādikṛṣṇaśrīpatinārāyaṇo hariḥ |
kīrtitaḥ kaṃbharāputraḥ prabhurgopālanandanaḥ || 19 ||
[Analyze grammar]

svarūpā'dvaitarūpaḥ sa yo'kṣare dhāmni vai pare |
vartate divyarūpaḥ śrīpatiḥ śrīkṛṣṇavallabhaḥ || 20 ||
[Analyze grammar]

sarvāvatāradhartā ca sarvāntaryāmī mādhavaḥ |
jaḍacetanajātātmā bālakṛṣṇaḥ pumuttamaḥ || 21 ||
[Analyze grammar]

īśvarāṇāmīśvaro yo devānāmapi daivatam |
prāṇināṃ prāṇarūpo yo bālakṛṣṇaḥ sa eva saḥ || 22 ||
[Analyze grammar]

indriyāṇāṃ tu yaścendro vastūnāṃ vāstavaṃ balam |
karmaṇāṃ phalado yaśca bālakṛṣṇaḥ sa eva saḥ || 23 ||
[Analyze grammar]

viprāṇāṃ pāvano dharmaḥ kṣatriyāṇāmadhṛṣyatā |
vaiśyānāṃ sasyasampattirbālakṛṣṇaḥ sa eva saḥ || 24 ||
[Analyze grammar]

vṛkṣāṇāṃ rasasampattirvallīnāṃ phalapuṣpitā |
dāsānāṃ sevikāvṛttirbālakṛṣṇaḥ sa eva saḥ || 25 ||
[Analyze grammar]

varṇināṃ brahmacaryaṃ yad gṛhasthānāṃ saputratā |
yatīnāṃ ca satāṃ brahma bālakṛṣṇaḥ sa eva saḥ || 26 ||
[Analyze grammar]

rājñāṃ nītiḥ prajānāṃ ca dāsyaṃ paropakāritā |
anugrahaśca devānāṃ vālakṛṣṇaḥ sa eva saḥ || 27 ||
[Analyze grammar]

grahanakṣatratārāṇāṃ vahneśca vidyutāmapi |
maṇīnāṃ cakṣuṣā tejo bālakṛṣṇa sa eva saḥ || 28 ||
[Analyze grammar]

yā tṛptirdehināṃ bhojye bhogye tṛptiśca yā matā |
yā śāntiḥ prāpyalābhe'sti bālakṛṣṇaḥ sa eva saḥ || 29 ||
[Analyze grammar]

viśvāse phalavattā yā dāne śraddhā ca yā matā |
kathāyāṃ cāntaro bodho bālakṛṣṇaḥ sa eva saḥ || 30 ||
[Analyze grammar]

yajñe yaddhavanaṃ proktaṃ vipreṣu sattvabhāvanā |
yajamāne dadadvṛttirbālakṛṣṇaḥ sa eva saḥ || 31 ||
[Analyze grammar]

garbhatanturyasya haste daurhṛdatvaṃ ca yatkṛtam |
nālapuṣṭervidhātā ca bālakṛṣṇaḥ sa eva saḥ || 32 ||
[Analyze grammar]

cidākāśājaḍākāśaṃ kṛtavān yo nirañjanaḥ |
racayāmāsa cāṇḍāni bālakṛṣṇaḥ sa eva saḥ || 33 ||
[Analyze grammar]

kulālān brahmasaṃjñāṃśca karṣukān viṣṇusaṃjñitān |
lunakān rudrakāṃścakre bālakṛṣṇaḥ sa eva yaḥ || 34 ||
[Analyze grammar]

dugdhayantrātmakapaśūn rasayantrātmapādapān |
jñānayantranarāṃścakre bālakṛṣṇaḥ sa eva yaḥ || 35 ||
[Analyze grammar]

ārtavaṃ ca jagaccakraṃ cālayanniyamena yaḥ |
viśvakarmatvamāpanno bālakṛṣṇaḥ sa eva saḥ || 36 ||
[Analyze grammar]

ekasmād bhūstarāt khādyaṃ bhakṣayitvā'pi pādapāḥ |
bījabhedād bhinnabhāvāḥ bālakṛṣṇaḥ sa bījakaḥ || 37 ||
[Analyze grammar]

bhojyaṃ caikavidhaṃ nyastaṃ jaṭhare bhinnarūpi yat |
bhinnaguṇaṃ yena dehe bālakṛṣṇaḥ sa jāṭharaḥ || 38 ||
[Analyze grammar]

adṛśyād dṛśyabhāvāstu sajātīyāt sajātikāḥ |
bhavantyeva yadāveśād bālakṛṣṇaḥ sa eva saḥ || 39 ||
[Analyze grammar]

mantrādhīnāstathā devā vāgadhīnā'rthaśemuṣī |
ātmādhīnaṃ jaḍaṃ yena bālakṛṣṇaḥ sa eva saḥ || 40 ||
[Analyze grammar]

iṣṭādhīnaścecchukaśca karmādhīnaṃ tathā jagat |
yadadhīnā parāmuktirbālakṛṣṇaḥ sa eva saḥ || 41 ||
[Analyze grammar]

atithīn sevate yaśca tasmai sevāphalapradaḥ |
bījavacchatadhā dātā bālakṛṣṇaḥ sa eva saḥ || 42 ||
[Analyze grammar]

sarvasaukhyapradātā yaḥ sarvarakṣākaraśca yaḥ |
sarvamānasapūraśca bālakṛṣṇaḥ sa eva saḥ || 43 ||
[Analyze grammar]

rātrirviśrāntidā yena dinaṃ pravṛttidaṃ kṛtam |
nidrā śramaharā klṛptā bālakṛṣṇaḥ sa eva saḥ || 44 ||
[Analyze grammar]

sādhurūpaṃ dhṛtaṃ yena vairājaṃ ca tathā dhṛtam |
paramāṇuḥ kṛto yena bālakṛṣṇaḥ sa eva saḥ || 45 ||
[Analyze grammar]

mārdavaṃ divyavastrādau kāṭhinyaṃ copalādiṣu |
dehe dvayaṃ kṛtaṃ yena bālakṛṣṇaḥ sa eva saḥ || 46 ||
[Analyze grammar]

mahākālaḥ kṛto yena mahāmāyā yamāśritā |
puruṣo yojito yena bālakṛṣṇaḥ sa eva saḥ || 47 ||
[Analyze grammar]

pralayaśca kṛto yena sargo yena kṛto muhuḥ |
nirlepastatra yaścāste bālakṛṣṇaḥ sa eva saḥ || 48 ||
[Analyze grammar]

kāmaṃ krodhaṃ mahālobhaṃ mohaṃ madṃ ca matsaram |
ākurvannapi cā'sakto bālakṛṣṇaḥ sa eva saḥ || 49 ||
[Analyze grammar]

sadṛśeṣvapi bījeṣu vibhinnaśaktidhāyakaḥ |
bhinnapākapradātā yo bālakṛṣṇaḥ sa eva saḥ || 50 ||
[Analyze grammar]

kṛṣṇo nārāyaṇo viṣṇurvāsudevo'kṣarādhipaḥ |
antarātmeśvaro yaśca bālakṛṣṇaḥ sa eva saḥ || 51 ||
[Analyze grammar]

bhagavān paramātmā ca hariḥ śrīpuruṣottamaḥ |
rādhālakṣmīpatiryaśca bālakṛṣṇaḥ sa eva saḥ || 52 ||
[Analyze grammar]

kuṃkumavāpikākṣetre sahasrakalaśālaye |
brahmapriyā'saṃkhyasevyo bālakṛṣṇaḥ sa eva saḥ || 53 ||
[Analyze grammar]

bhajanīyaḥ pūjanīyaścintanīyaśca yo hṛdi |
sevayā prāpaṇīyaśca bālakṛṣṇaḥ sa eva saḥ || 54 ||
[Analyze grammar]

evaṃ vai kīrtanaṃ cakruḥ sarve bhaktā niśotsave |
dyuviśrāmaḥ karṣukaśca śrutvā''nandaṃ lalābha ha || 55 ||
[Analyze grammar]

jijñāsāṃ kṛtavān mantragrahaṇe'tithimaṇḍalāt |
atithistatra vipraśca ṣaḍguṇākhya uvāca tam || 56 ||
[Analyze grammar]

gṛhāṇa mantraṃ devasya kṛṣṇanārāyaṇasya mat |
oṃ namaḥ śrīkṛṣṇanārāyaṇāya svāmine svāhā || 57 ||
[Analyze grammar]

itimantraṃ dadau tasmai karṣukāya tu ṣaḍguṇaḥ |
sukaṇṭhīṃ taulasīṃ cāpi dadau nāma narāyaṇam || 58 ||
[Analyze grammar]

mālikāṃ pradadau tasmai japārthaṃ pratimāṃ tathā |
dadau darśanakāryārthaṃ kṛṣṇanārāyaṇasya ca || 59 ||
[Analyze grammar]

mālāyāṃ japanārthaṃ ca kṛṣṇanārāyaṇeti ca |
dadau nāma tadā sarve prātastasmātpratasthire || 60 ||
[Analyze grammar]

āyayuḥ kuṃkumavāpīkṣetraṃ śrīlomaśāśramam |
aśvapaṭṭasaraścāpi sahasraghaṭamandiram || 61 ||
[Analyze grammar]

udyānaṃ sarvatīrthāni vyadhustato narāyaṇam |
bālakṛṣṇaṃ yayuḥ sarve rājamānaṃ gṛhāntare || 62 ||
[Analyze grammar]

sampūjya vidhivattīrthaṃ kṛtvā deśaṃ nijaṃ yayuḥ |
dyuviśrāmaḥ kṛṣīvalaḥ sakuṭumbo mudānvitaḥ || 63 ||
[Analyze grammar]

vicārya tīrthayātrārthaṃ niryayau kāmyakātpurāt |
gobhirgovṛṣabhaiḥ sākaṃ cāśvapaṭṭasarovaram || 64 ||
[Analyze grammar]

āyayau śrīkṛṣṇanārāyaṇaṃ gṛṇan samutsukaḥ |
cārayan vai vane gāśca vṛṣabhān sāyamāpa tat || 65 ||
[Analyze grammar]

sarastīre pūrvadakṣe viśrāntiṃ niśi cākarot |
pāyayitvā jalaṃ gāśca vṛṣabhān pādapāśraye || 66 ||
[Analyze grammar]

vyasarjayanniṣeduste paśavaḥ sukhato'ntike |
rātrau nidrāvaśaṃ yātāḥ paśavo mānavāśca te || 67 ||
[Analyze grammar]

pariśramaṃ cādhvajaṃ te vyapānudan sunidrayā |
aviśaṃkāstīrthabhūmau svapanti sarasastaṭe || 68 ||
[Analyze grammar]

ardharātrau vyatītāyāṃ śānte mānavasañcare |
grāmaśabde praśānte ca nidrāptapaśupakṣiṣu || 69 ||
[Analyze grammar]

siṃhānāṃ maṇḍalaṃ cāyāt saptānāṃ vyāghrajaṃgalāt |
akasmād govṛṣān tadvai jagrāhā'tibhayaṃkaram || 70 ||
[Analyze grammar]

gāvaśca vṛṣabhāścāpyākrośāṃścakruḥ praraṃbhaṇān |
ākrandanāni viśrutya janā bubudhire drutam || 71 ||
[Analyze grammar]

bhagavantaṃ sasmaruśca rakṣārthaṃ parameśvaram |
bhakto'nādikṛṣṇanārāyaṇaṃ sasmāra vai hṛdā || 72 ||
[Analyze grammar]

āyāhi bhagavan kṛṣṇanārāyaṇa parātpara |
sarvajīvā'dhivāsa tvaṃ rakṣa trāhi ca pāhi ca || 73 ||
[Analyze grammar]

godhanaṃ me durbalasya balaṃ kṛṣīvalasya yat |
siṃhairvināśyate cette dāso duḥkhī bhaviṣyati || 74 ||
[Analyze grammar]

śīghraṃ kuru mahārāja yāvannaivābhidharṣitam |
dharṣaṇe naiva jīveyurgāvo vā vṛṣabhāstava || 75 ||
[Analyze grammar]

tvaccharaṇe'rpitāśceme paśavo me na santi vai |
tvameva rakṣa bhagavan dugdhaṃ piba yathocitam || 76 ||
[Analyze grammar]

gā dāsye te mahārāja śīghraṃ pāhi ca rakṣaya |
ityuccārya mahākāṣṭhaṃ vahnidagdhaṃ savahnikam || 77 ||
[Analyze grammar]

samuttolya sthito bhaktaḥ siṃhānāṃ sannidhau haṭhāt |
siṃhāstu garjanāścakrurmuhurnādairbhayaṃkaraiḥ || 78 ||
[Analyze grammar]

saraḥkṣetraṃ samastaṃ tannāditaṃ garjanāmayam |
tresuśca dehinaḥ sarve vinidrā garjanādibhiḥ || 79 ||
[Analyze grammar]

vidudruvuritastato bahiranto bhayārditāḥ |
sāgnikaṃ tanmahākāṣṭhaṃ dṛṣṭvā siṃhā bhayānvitāḥ || 80 ||
[Analyze grammar]

nopājagmuḥ sannidhau vai kintu gāvo bhayānvitāḥ |
saraḥsetuṃ parityajya dudruvurdūrameva yat || 81 ||
[Analyze grammar]

tatpṛṣṭhe dudruvuḥ siṃhā dadhrurdūraṃ gatāśca tāḥ |
ruroda bhaktavaryaśca paśavo jñānavarjitāḥ || 82 ||
[Analyze grammar]

siṃhavajraparābhūtāḥ kiṃ karomyatra so'rudat |
bhaktarakṣākarastāvad bālakṛṣṇaḥ kṛpānidhiḥ || 83 ||
[Analyze grammar]

gopālabālako devaścakradhāryabhavat kṣaṇāt |
harṣanādaṃ nadan kṛṣṇo mumoca cakramulbaṇam || 84 ||
[Analyze grammar]

vegādgataṃ bhramaccakraṃ jaghānasiṃhamaṇḍalam |
yatra yatra paśūnāṃ tu nakhasparśo'bhavattadā || 85 ||
[Analyze grammar]

vidāraṇaṃ tvacāṃ cā'bhūt siṃhakṛtaṃ ca bhañjanam |
tatra tatra paśudehe pasparśa svakareṇa saḥ || 86 ||
[Analyze grammar]

dayālurbhagavān śīghraṃ rujaṃ nyavārayat kṣaṇāt |
sandhānaṃ ca tvacāṃ sparśamātreṇa pūrvavaddhariḥ || 87 ||
[Analyze grammar]

pracakāra yathā sparśo nakhānāṃ naiva vidyate |
navā raktasya saṃsrāvastatra tatrā'bhavaddhyapi || 88 ||
[Analyze grammar]

śrīhareḥ karasaṃsparśād raktasrāvo'pi nā'bhavat |
yathā devaśarīraṃ vai nīrujaṃ tādṛśāni vai || 89 ||
[Analyze grammar]

gavāṃ ca vṛṣabhāṇāṃ ca śarīrāṇi kṛtāni vai |
godhanaṃ rakṣitaṃ caivaṃ tato vaṃśīṃ vyanādayat || 90 ||
[Analyze grammar]

bhaktasya sannidhau gatvā bhaktaṃ ca samabhāvayat |
godhanaṃ sahasā śrutvā vaṃśīṃ bālaharestadā || 91 ||
[Analyze grammar]

tūrṇaṃ cāyāt sarastīre dyuviśrāmasya sannidhau |
bhagavān cakradhāryeva niṣasādā'sane'rpite || 92 ||
[Analyze grammar]

govṛṣāśca samāgatya lilihurharipatkajam |
dugdhadhārāḥ pramuñcantyo gāvaścakrurhi raṃbhaṇam || 93 ||
[Analyze grammar]

bhakto dugdhāni tatkālaṃ dohayitvā hariṃ prabhum |
pāyayāmāsa ruciraṃ miṣṭaṃ śreṣṭhaṃ payo muhuḥ || 94 ||
[Analyze grammar]

praśaṃsan bhagavān dugdhaṃ papau bhaktasamarpitam |
śaṃkhacakragadāpadmadharaṃ hastacatuṣṭayam || 95 ||
[Analyze grammar]

darśayāmāsa rūpaṃ svaṃ haryavatārarūpiṇam |
siṃhebhyaśca dadau muktiṃ vaikuṇṭhaṃ prāhiṇoddhi tān || 96 ||
[Analyze grammar]

dyuviśrāmaṃ ca tatpatnīṃ putrān putrīḥ kuṭumbakam |
divyaṃ rūpaṃ darśayitvā haristūrṇaṃ tiro'bhavat || 97 ||
[Analyze grammar]

phālgune kṛṣṇapakṣasyaikādaśyāṃ rātrimadhyake |
siṃhebhyastu gavāṃ rakṣāṃ cakāra bālakṛṣṇakaḥ || 98 ||
[Analyze grammar]

dvādaśyāṃ ca dadau bhakto dānāni vividhānyapi |
pūjayāmāsa bhāvaiśca śrīpatiṃ puruṣottamam || 99 ||
[Analyze grammar]

dyuviśrāmo dadau bālakṛṣṇāya godhanaṃ tadā |
hariḥ pratyarpayāmāsa bhakto'pi mumude hyati || 100 ||
[Analyze grammar]

haryājñayā ca gāḥ prāpya yayau svaṃ kāmyakaṃ puram |
tattīrthaṃ haritīrthākhyaṃ gotīrthaṃ khyātamapyabhūt || 101 ||
[Analyze grammar]

evaṃ tatra kṛṣīvalaiḥ kāritaṃ harimandiram |
hariṃ ca sthāpayāmāsuścaturbhujaṃ pareśvaram || 102 ||
[Analyze grammar]

bālakṛṣṇaṃ ca gāstatra sthāpayāmāsurutsukāḥ |
śravaṇātpaṭhanāccāsya bhuktirmuktistathā bhavet || 103 ||
[Analyze grammar]

godānaṃ tatra dātavyaṃ koṇe'gnāvāśvasārase |
anādiśrīkṛṣṇanārāyaṇaḥ prasannatāṃ vrajet || 104 ||
[Analyze grammar]

rādhike yamadūtebhyo rakṣāṃ kuryāddhi tīrthinaḥ |
godāturvṛṣadātuśca bālakṛṣṇo dayānidhiḥ || 105 ||
[Analyze grammar]

iti śrīlakṣmīnārāyaṇīyasaṃhitāyāṃ dvitīye tretāsantāne dyuviśrāmākhyakṛṣikārasya siṃhapradharṣitagodhanasyā'vanaṃ harirūpeṇa bhagavatā kṛtaṃ haritīrthaṃ gotīrthaṃ cetinirūpaṇanāmā |
triṣaṣṭyadhikaśatatamo'dhyāyaḥ || 163 ||
[Analyze grammar]