Chapter 161

śrīkṛṣṇa uvāca |
rādhike divyabhaktaḥ sa devāyatanako muniḥ |
śrutvā''ścaryabhṛtaḥ kṛṣṇaṃ nārāyaṇaṃ pupūja ha || 1 ||
[Analyze grammar]

ārārtrikaṃ paraṃ kṛtvā premamagno'tisiddhimān |
anādiśrīkṛṣṇanārāyaṇecchayā tadā svayam || 2 ||
[Analyze grammar]

divyaprāsādarūpo'bhūt sahasrakalaśānvitaḥ |
sarvalakṣaṇasampannaḥ sarvāṃgaparipūritaḥ || 3 ||
[Analyze grammar]

sarvopasthāpanayuktaḥ sevāyāṃ mūrtimānapi |
vyatirikeṇāpi cāste muktarūpadharo'pi san || 4 ||
[Analyze grammar]

prāsādaḥ so'bhavat khyāto devādyaiśca prapūjitaḥ |
indro vilokya tattulyaṃ kārayituṃ mano'karot || 5 ||
[Analyze grammar]

viśvakarmāṇamāhūya darśayāmāsa tatkṛtim |
ājñāṃ dadau tato'marāvatyāṃ kartuṃ sumandiram || 6 ||
[Analyze grammar]

viśvakarmā samabhyasya kuṃkumā'kṣarabhūsthale |
tataḥ svargaṃ yayau śṛṃgaṃ sahasrakalaśaṃ vyadhāt || 7 ||
[Analyze grammar]

anādiśrīkṛṣṇanārāyaṇaṃ śrīpuruṣottamam |
patnīṣaṭkasahitaṃ sthāpayāmāsa mahotsavaiḥ || 8 ||
[Analyze grammar]

atha pravṛttāḥ prāsādāḥ sarvalokeṣu vai tataḥ |
sarvatrā''dhyātmiko devāyano devo'sti teṣu vai || 9 ||
[Analyze grammar]

evaṃ divyaṃ mandiraṃ tu draṣṭumāyānti mānavāḥ |
surāḥ pātālasaṃsthāśca satyalokanivāsinaḥ || 10 ||
[Analyze grammar]

kuṃkumavāpikākṣetraṃ dṛṣṭvā mandiraśobhitam |
pramodante narā nāryo viśrāmyanti bṛhatsukhe || 11 ||
[Analyze grammar]

darśanīyaṃ mandiraṃ tu śrutvā kapardisaṃghataḥ |
āsamudrāt samāyānti janā draṣṭuṃ samutsukāḥ || 12 ||
[Analyze grammar]

dhanamedo dhīvaro'pi pratīcivārdhitīragaḥ |
śrutvā kuṭumbasahito draṣṭuṃ gṛhād viniryayau || 13 ||
[Analyze grammar]

vastrāpathaṃ śubhaṃ dṛṣṭvā turīdevīṃ yayau pathi |
vṛkṣacchāyāghaṭāmadhye sthitāṃ mūrtimayīṃ śubhām || 14 ||
[Analyze grammar]

jīvantikānadītīre prāsāde saṃsthitāṃ satīm |
āmrāṇāṃ vanamadhyasthāṃ kāṣṭhahārādisevitām || 15 ||
[Analyze grammar]

āśrayadāṃ vanināṃ tāṃ śāntidāṃ vanavāsinīm |
vilokya gajapṛṣṭhasthāṃ caturbhujāṃ haripriyām || 16 ||
[Analyze grammar]

lakṣmyaṃśarūpāṃ sattvāḍhyāṃ phalapuṣpādipūjitām |
neme gatvā'ntike tasthau dhanamedo'tibhāvataḥ || 17 ||
[Analyze grammar]

sasnau nadyā hrade cāmravṛkṣasyā'dho bhuvastale |
sāmagrīryātrikīḥ sarvā nidhāya ca tataḥ param || 18 ||
[Analyze grammar]

samādāya jalaṃ śītaṃ puṣpāṇi cāmpakāni ca |
amṛtasya phalānyuttamāni pakvāni taulasīm || 19 ||
[Analyze grammar]

yayau lakṣmīṃ turīnāmnīmarcayituṃ hi mandire |
kuṭumbena tu taddevyāḥ sannidhau praṇanāma saḥ || 20 ||
[Analyze grammar]

stutiṃ cakāra vidhinā vanyarakṣaṇakāriṇīm |
pupūja parayā prītyā phalapuṣpajalādibhiḥ || 21 ||
[Analyze grammar]

aho mātaśca he mātarmahālakṣmi mahāsati |
vane dattaṃ mayā nītaṃ gṛhaṇā''dyaṃ namostu te || 22 ||
[Analyze grammar]

prasannā bhava yātrārthaṃ prajvālaya ca kalmaṣam |
dhīvarāṇāṃ pāvanī tvaṃ samuddhara haripriye || 23 ||
[Analyze grammar]

na jānāmyarcanaṃ jātyā nikṛṣṭo'śuddha eva yat |
hṛdayaṃ te'rpitaṃ śuddhaṃ matvā gṛhāṇa cāmṛtam || 24 ||
[Analyze grammar]

buddhiṃ dehi tathā bhaktiṃ muktiṃ dehi madarhikām |
parivārasahitasya mahyaṃ śreyaḥ pradehi ca || 25 ||
[Analyze grammar]

ityuktvā ca muhurnatvā mārjayāmāsa mandiram |
śuṣkapatrāṇi niṣkāsya dhūlyādi cāpahṛtya ca || 26 ||
[Analyze grammar]

jalena kṣālayāmāsa mandiraṃ turikāṃ tathā |
snapayāmāsa salilaiḥ pradakṣiṇāṃ cakāra saḥ || 27 ||
[Analyze grammar]

patrapuṣpāṇi cādāya nūtanāni bahūnyapi |
toraṇaṃ mālikāṃ cāpi klṛptvā dadau samarhaṇe || 28 ||
[Analyze grammar]

rātrimuvāsa tatraivāśrayaṃ pravīkṣya śāntidam |
phalādivanyabhojyaṃ ca dṛṣṭvovāsa dināntare || 29 ||
[Analyze grammar]

tṛtīye'pi dine tasthau viśrāntimāpa bhūyasīm |
nityaṃ svagṛhavat sarvaṃ devīkāryaṃ supūjanam || 30 ||
[Analyze grammar]

saṃśodhanaṃ sevanādi karoti bhāvato vane |
rātrau kurvanti bhajanaṃ kuṭumbino hi kaṇṭhataḥ || 31 ||
[Analyze grammar]

vahniṃ prakāśayitvaiva tāpaṃ śaityanivṛttaye |
gṛhṇantyapi ca taddevyā āgāre militāśca te || 32 ||
[Analyze grammar]

ityevaṃ rādhike rātriṃ viniryāpya dināntare |
puṣpāṇi vividhānyeva samādāyā'mbarāṇi ca || 33 ||
[Analyze grammar]

puṣpāṇāmeva saṃsādhya lakṣmyai samarpayanti te |
mukuṭaṃ karṇaphullāni cāvataṃsān sukañcukīm || 34 ||
[Analyze grammar]

śāṭīṃ ca ghargharīṃ mālāṃ gucchaṃ ca raśanāṃ tathā |
pāduke jhullarīṃ ceti kṛtvā samarpayanti te || 35 ||
[Analyze grammar]

sugandhi madhu miṣṭaṃ cānīya vṛkṣasusaṃsthitam |
samarpayanti devyai ca bhojanaṃ surasān bahūn || 36 ||
[Analyze grammar]

candanasya śubhaṃ kāṣṭhaṃ samāhṛtya vanāntarāt |
dhūpaṃ kurvanti gandhāḍhyaṃ sevante smeti bhāvataḥ || 37 ||
[Analyze grammar]

bhajanaṃ śrīhare kṛṣṇa lakṣmi mātarnamo'stu te |
evaṃ kurvanti satataṃ vanamadhye turīgṛhe || 38 ||
[Analyze grammar]

turyāvasthātmikā lakṣmīradṛśyā'pi tadarhaṇām |
samagrahīt prasannā'bhūt svabhāvasevayā satī || 39 ||
[Analyze grammar]

mūrtau sthitā'pi jagrāhā'mṛtaṃ madhu phalāni ca |
papau tu salilaṃ śītaṃ dadhāra mālikāśca tāḥ || 40 ||
[Analyze grammar]

pauṣpāmbarāṇi jagṛhe dhūpaṃ jagrāha bhāvataḥ |
vane sevāṃ bhaktakṛtāṃ sarvāṃ jagrāha mūrtigā || 41 ||
[Analyze grammar]

evaṃ kuṭumbasahito dhanamedo'pi dhīvaraḥ |
yogakṣemau vane lebhe tīrthayātrāprasaṃgataḥ || 42 ||
[Analyze grammar]

nirmalāntaḥkaraṇaḥ sa pañcadaśadināni vai |
uvāsa mandire tatra vane turyāntike mudā || 43 ||
[Analyze grammar]

nityapūjādisampattyā puṇyaṃ cāvāpa bhūri ca |
pāvitryaṃ prāpa bahudhā lakṣmīdevīprasādataḥ || 44 ||
[Analyze grammar]

pauṣaśuklasya pūrṇāyāṃ rātrau candre śirogate |
kīrtanaṃ pracakārā'sau mṛdaṃgena kuṭumbibhiḥ || 45 ||
[Analyze grammar]

śītakāntisudhāvalye vanavṛkṣādiśobhite |
nirmale rajanībhāge śānte rājasabhāvane || 46 ||
[Analyze grammar]

gītiṃ cakāra patnyā ca putrībhiḥ putrakaiḥ saha |
pratyakṣaṃ madhuraṃ śrutvā sākṣāt turī babhūva ha || 47 ||
[Analyze grammar]

rūparūpānuśobhāḍhyāvayavāṃ'gātisundarī |
prasannavadanā haste kamalaṃ bibhratī satī || 48 ||
[Analyze grammar]

maṇisvarṇavibhūṣāḍhyā divyāmbarādidhāriṇī |
koṭiśāradapūrṇendukāntyatikāntibhāsurā || 49 ||
[Analyze grammar]

śvetagajasya pṛṣṭhe sā niṣaṇṇā ca manoharā |
varadānaṃ gṛhāṇā'tra prasannā'smītyuvāca tam || 50 ||
[Analyze grammar]

bhakta tvayā vane me'tra mandire vasatiḥ kṛtā |
sevā bahuprakāreṇa kṛtā naijagṛhādivat || 51 ||
[Analyze grammar]

varaṃ varaya bhadraṃ te yatheṣṭaṃ vada cārpaye |
ekavāraṃ gṛhasyāpi mārjanena mamātra ca || 52 ||
[Analyze grammar]

dāridryaṃ nāśamāyāti svargaṃ divyamavāpnuyāt |
ekavāraṃ pradīpena mamālaye tu vai ciram || 53 ||
[Analyze grammar]

phalaṃ sūryasya lokāptiḥ sahasrayugajā bhavet |
ekavāraṃ tulasyāścārpaṇena mama mastake || 54 ||
[Analyze grammar]

cakravartitvamevā'smai dadāmi sampadaściram |
puṣpahārādyarpaṇena dadāmi svarṇabhūṣaṇam || 55 ||
[Analyze grammar]

ekavāraṃ phalānāmarpaṇena pradadāmi vai |
śāśvataṃ cāmṛtaṃ svargamaindraṃ padaṃ samujjvalam || 56 ||
[Analyze grammar]

ekavāraṃ jaladānād dadāmi vāruṇaṃ padam |
ātmārpaṇena sarvasvaṃ dadāmi dhāma śāśvatam || 57 ||
[Analyze grammar]

patirme bhagavān sākṣādanādiḥ śrīnarāyaṇaḥ |
tatsmṛddhiṃ pradadāmyasmai madbhaktāya mahātmane || 58 ||
[Analyze grammar]

mayyarpitaṃ pragṛhṇāmi samarpya pataye tataḥ |
tatprasādaṃ sadā cā'dmi tasya sevāparāyaṇā || 59 ||
[Analyze grammar]

anādiśrīkṛṣṇanārāyaṇaḥ śrīpuruṣottamaḥ |
smṛddhaḥ prasanno bhagavān jāyate mama sevayā || 60 ||
[Analyze grammar]

ahaṃ priyā yathā tasya yathā ca māṇikī priyā |
tathā priyo'pi me bhaktastasmai dadātyalaṃ patiḥ || 61 ||
[Analyze grammar]

dhanameda pavitro'si prasannā'haṃ yatastvayi |
vṛṇu yatte mānase'sti dadāmi pativāñcchayā || 62 ||
[Analyze grammar]

ityukto dhanamedaḥ sa rādhike kṣaṇamāntare |
āścaryaṃ paramaṃ prāpya sukhaṃ prāpya mudaṃ parām || 63 ||
[Analyze grammar]

dāsyaṃ kuṭumbayuktasya varayāmāsa mātari |
na sampadaṃ na ca rājyaṃ naiśvaryaṃ samiyeṣa saḥ || 64 ||
[Analyze grammar]

dhanyo'si dhanameda tvaṃ dāsye sarvaṃ pravartate |
dāsyaṃ tu durlabhaṃ loke niśchadmaṃ svāminaḥ kṛte || 65 ||
[Analyze grammar]

abhilaṣanti dāsyaṃ vai bhṛtyāḥ saṃsārakoṭiṣu |
svārthadāsā hyasaṃkhyātā vartante bhuvanatraye || 66 ||
[Analyze grammar]

hārdadāsā durlabhā vai hārdadāso'tra me bhava |
hārdadāsye vasantyeva siddhyaiśvaryāṇi sarvadā || 67 ||
[Analyze grammar]

chadmadāsye kleśabhūtā vartante raktahāriṇaḥ |
tasmāt kartavyamevātra dāsyaṃ hṛdayaraṃjitam || 68 ||
[Analyze grammar]

yathā dāsī bhavāmyatra nārāyaṇasya padmajā |
yathā dāsī bhavatyatra śivasya pārvatī satī || 69 ||
[Analyze grammar]

sūryadāsī prabhā cāste dāsī padmāvatī hareḥ |
yathā ca māṇikī dāsī rādhā dāsī harerjayā || 70 ||
[Analyze grammar]

yathā ca maṃjulā haṃsā dāsī ca suguṇā hareḥ |
lalitā cā'kṣarabrahma garuḍo dāsa ityapi || 71 ||
[Analyze grammar]

tathā dāsyaṃ kuru deve yathā ca hanumān kapiḥ |
yathā hemantako dāso vasanto dāsa ityapi || 72 ||
[Analyze grammar]

kalpe kalpe bhavantyeva dāsā hyete harestathā |
labha dāsyaṃ mayi me ca patyau śrīpuruṣottame || 73 ||
[Analyze grammar]

anādiśrīkṛṣṇanārāyaṇaḥ śrīkaṃbharāsutaḥ |
mānavena tu rūpeṇa vartate yatra gacchasi || 74 ||
[Analyze grammar]

kuṃkumavāpikākṣetre lomaśāśramasannidhau |
devāyatanasaudhe śrīkāntastatra virājate || 75 ||
[Analyze grammar]

mādṛśyaḥ kamalāstatra rājante koṭiśo'pi ca |
sarvavīryadharasyā'sya sevayā''nandasaṃbhṛtāḥ || 76 ||
[Analyze grammar]

yāhi bhakta śubhaṃ kṣetraṃ kuṃkumavāpikābhidham |
kāntaṃ sevaya sarvaṃ te dāsyaṃ phalarddhimadbhavet || 77 ||
[Analyze grammar]

gṛhāṇa vanapuṣpāṇi phalāni vividhāni ca |
arpaya pataye tatra namaskārāṃśca me vada || 78 ||
[Analyze grammar]

ahaṃ paścimabhāge'tra kṣetrasīmni tadājñayā |
turīrūpeṇa tiṣṭhāmi kṣetrapā kamalā svayam || 79 ||
[Analyze grammar]

adṛśyena svarūpeṇa kṛṣṇaṃ seve hi nityadā |
yāhi śīghraṃ mānaseṣṭaṃ tava tatra bhaviṣyati || 80 ||
[Analyze grammar]

ityuktvā sā turīlakṣmīrmūrtau vilīnatāṃ gatā |
dhanamedo harṣamatto māghamāse tu kṛṣṇake || 81 ||
[Analyze grammar]

pakṣe kuṃkumavāpyāṃ sakuṭumbaśca mudā yayau |
vīkṣya vīkṣya mudaṃ prāpa hyudyānāni vanāni ca || 82 ||
[Analyze grammar]

lomaśasyāśramaṃ vīkṣya vīkṣyākāśagatālayam |
brahmapriyāḥ samālokya vilokyā'śvasarovaram || 83 ||
[Analyze grammar]

saudhāni bahulakṣāni vilokya devatālayān |
vīkṣya tīrthāni divyāni dhanamedo jaharṣa ha || 84 ||
[Analyze grammar]

sthale sthale cakārā'sau daṇḍavat sakuṭumbakaḥ |
lakṣmīdarśitakāntaṃ ca draṣṭuṃ mahālayaṃ yayau || 85 ||
[Analyze grammar]

yatrā'nādiḥ kṛṣṇanārāyaṇo virājate prabhuḥ |
koṭisūryābhamukuṭābhūṣaṇādipratejitaḥ || 86 ||
[Analyze grammar]

rūpānurūpāvayavo bhagavān kamalādibhiḥ |
sevitaḥ śrīhariḥ sākṣād devamuktādisevitaḥ || 87 ||
[Analyze grammar]

neme ca daṇḍavat kṛṣṇaṃ dadau turīpradopadāḥ |
pupūja ca svayaṃ puṣpaiḥ phalairbhāvairhṛdaṃgamaiḥ || 88 ||
[Analyze grammar]

pādodakaṃ papau mūrti hṛdaye sa dadhāra ca |
prāpya prāsādikaṃ cāpi satkāraṃ svāgatādikam || 89 ||
[Analyze grammar]

bhojanaṃ cāpi saṃprāpya viśrāntiṃ sa cakāra ha |
sāyaṃ tīrthāni kartuṃ ca yayāvaśvasarastaṭe || 90 ||
[Analyze grammar]

niśāyāṃ ca taṭe nyagrodhasya tale hyuvāsa saḥ |
jātisvabhāvabhāvena tīre vāsamarocayat || 91 ||
[Analyze grammar]

rātrau sa bhajanaṃ cakre nāmasaṃkīrtanaṃ hareḥ |
prātarjātisvabhāvena vīkṣya matsyāṃstu rohitān || 92 ||
[Analyze grammar]

cakracihnasuśobhāḍhyān dhartuṃ mano'karottadā |
tīraṃ gatvā sūtraraśmiṃ mumocā'psu sakaṇḍakām || 93 ||
[Analyze grammar]

matsyarūpadharaḥ kṛṣṇanārāyaṇaḥ svayaṃ hariḥ |
bhūtvā''nane ca baḍiśaṃ gṛhītvā tadvaśaṃ yayau || 94 ||
[Analyze grammar]

dhanamedena samprāpto matsyo viśālatāṃ yayau |
śaṃkhacakragadādhārī babhūva padmavān kṣaṇāt || 95 ||
[Analyze grammar]

mahadrūpaṃ vilokyā'sau lajjāṃ bhakto yayau tadā |
hariḥ prāha svabhāvaṃ tvaṃ tyaja māṃ bhaja dhīvara || 96 ||
[Analyze grammar]

lakṣmyāstvāśīrvacanaiśca prāpto'haṃ te kṛpālavāt |
dāsyaṃ gṛhāṇa me yāhi lomaśaṃ manumāvaha || 97 ||
[Analyze grammar]

vaiṣṇavo bhava tiṣṭhā'tra kuru me sevanaṃ tathā |
yathā tvaṃ dṛṣṭavānatra matsyarūpaṃ caturbhujam || 98 ||
[Analyze grammar]

matsyatīrthamidaṃ me'sti matsyāvatārarūpavān |
tvadarthaṃ te dṛṣṭipathaṃ samāgato'smi taṃ bhaja || 99 ||
[Analyze grammar]

dhīvarā matsyadāyādā matsyasnehā bhavanti vai |
tavā'haṃ matsyarūpeṇa dāsye mokṣaṃ bhajasva mām || 100 ||
[Analyze grammar]

matsyamūrtiṃ vidhāyā'tra vaṭādhastād bhajasva mām |
tīrthaṃ matsyāvatārasya mamaitatpāpanāśanam || 101 ||
[Analyze grammar]

aśvapaṭṭasarastīre svargamokṣapradaṃ śubham |
dhīvarāṇāṃ viśeṣeṇa bhaviṣyati prabhuktidam || 102 ||
[Analyze grammar]

ityuktvā rādhike kṛṣṇanārāyaṇastiro'bhavat |
dhanamedo yayau śīghraṃ lomaśasyāśramaṃ tataḥ || 103 ||
[Analyze grammar]

prāpto mantraṃ taulasīṃ ca srajaṃ vaiṣṇavadāsatām |
oṃ namaḥ śrīkṛṣṇanārāyāṇāya pataye svāhā || 104 ||
[Analyze grammar]

itiprāpya sarastīre samāyayau kuṭumbayuk |
vaṭādhastāt parṇakuṭīṃ kṛtvovāsa nirantaram || 105 ||
[Analyze grammar]

matsyamūrtiṃ tataḥ kṛtvā bheje kṛṣṇanarāyaṇam |
svalpakālena vai rādhe muktiṃ cāpa tu śāśvatīm || 106 ||
[Analyze grammar]

divyapārṣadavaryaiśca nīyamānaḥ kuṭumbayuk |
yayāvakṣaralokaṃ sa tīrthe mātsye'śvasārase || 107 ||
[Analyze grammar]

evaṃ ye tatra vai gatvā kariṣyantyāplavādikam |
dhīvarā api tattulyā mokṣaṃ yāsyanti rādhike || 108 ||
[Analyze grammar]

māghā'māyāṃ mayā tatra matsyarūpaṃ prakāśitam |
paṭhanācchravaṇāccāsya matsyatīrthaphalaṃ bhavet || 109 ||
[Analyze grammar]

bhuktiṃ muktiṃ labhenmartyaḥ svargaṃ putraṃ dhanādikam |
yadyadiṣṭatamaṃ sarvaṃ labhet kṛṣṇakṛpālavāt || 110 ||
[Analyze grammar]

iti śrīlakṣmīnārāyaṇīyasaṃhitāyāṃ dvitīye tretāsantāne turīdevyā āśīrvādena dhanamedadhīvarasya yātrāloḥ kuṃkumavāpyāṃ matsyāvatāradarśanottaraṃ muktirmatsyatīrthaṃ ceti |
nirūpaṇanāmaikaṣaṣṭyadhikaśatatamo'dhyāyaḥ || 161 ||
[Analyze grammar]