Chapter 135

śrīkṛṣṇa uvāca |
śṛṇu tvaṃ rādhike kṛṣṇo nārāyaṇaḥ paraḥ prabhuḥ |
śibeḥ saudhe hyuṣitvā tatkṛtāṃ sevāṃ pragṛhya ca || 1 ||
[Analyze grammar]

vinirgamayya ca niśāṃ māghādyadivase prage |
naityakaṃ daivikaṃ kṛtvā''diśya dharmān susāttvatān || 2 ||
[Analyze grammar]

prāpya dattāṃ mahāpūjāṃ bhojanaṃ copadādikam |
sarvān śubhāśīrvacanaiḥ saṃprayujya prasādya ca || 3 ||
[Analyze grammar]

devāyatanakaṃ bhaktaṃ tathā śrīlomaśādikān |
brahmapriyāstathā sarvā akṣarakṣetravāsinaḥ || 4 ||
[Analyze grammar]

kṣetrapān devatīrthāni kuṭumbaṃ pārṣadādikān |
mātaraṃ pitaraṃ cāpi bhrātṝn bhrātṛvadhūstathā || 5 ||
[Analyze grammar]

bhaginīṃ tatsakhīṃ cāpi rājā'rpitāśca kanyakāḥ |
saurāṣṭrīyajanān naijān vimāneṣu naveṣu ca || 6 ||
[Analyze grammar]

niṣādya svavimānena vyomamārgeṇa sañcaran |
indukuśaṃ samatītya sindhuvyoma vilaṃghya ca || 7 ||
[Analyze grammar]

badarikāśramaṃ gatvā dṛṣṭvā naraṃ narāyaṇam |
ṛṣīn dṛṣṭvā tāpasāṃśca tataḥ śrīkāśikāṃ yayau || 8 ||
[Analyze grammar]

varaṇāyāstaṭe naijāṃ lakṣmīṃ śivasutāṃ satīm |
śivarājaṃ tathā kṛṣṇāṃ candraṃ jayaṃ ca jānakīm || 9 ||
[Analyze grammar]

dṛṣṭvā sarvān sammilitvā snātvā gaṃgājale tataḥ |
viśveśaṃ sarvadevāṃśca dṛṣṭvā sampūjya sarvathā || 10 ||
[Analyze grammar]

vimānaiḥ sahitaiḥ sarvaiḥ śrīhariḥ puruṣottamaḥ |
rādhike cāyayāvaśvapaṭṭakṣetraṃ nijaṃ śubham || 11 ||
[Analyze grammar]

prajābhirjayakāraiśca vardhitāstīrthakāriṇaḥ |
vimānāni tvakṣaraṃ tat kṣetraṃ tu vārasaptakam || 12 ||
[Analyze grammar]

bhramitvā kuṃkumavāpīṃ vilokyodyānavāṭikāḥ |
sarvān vijñāpya ca nijāgamaṃ vai paścime tataḥ || 13 ||
[Analyze grammar]

avaterurmahodyāne sthairyamāptāni vai tataḥ |
puṣpākṣataiśca lājābhiḥ satkṛtāni prajājanaiḥ || 14 ||
[Analyze grammar]

vimānebhyo bahiḥ sarve nirgatyā''pṛcchya vai muhuḥ |
kṣemaṃ ca kuśalaṃ cānā'mayaṃ datvā sragādikam || 15 ||
[Analyze grammar]

satkṛtya ca samāśliṣya svasvasthānaṃ yayurjanāḥ |
nivāsārheṣu saudheṣu nijān harirnyavāsayat || 16 ||
[Analyze grammar]

bhojayāmāsa śīghraṃ ca viśaśramuśca te tathā |
prāhiṇot kanyakāḥ sarvāstadā brahmapriyāyutāḥ || 17 ||
[Analyze grammar]

lomaśasyā''śrame ramye sadā māyāvivarjite |
rarakṣa lomaśaḥ sarvā divyamuktottamo muniḥ || 18 ||
[Analyze grammar]

ṛṣayo devatādyāśca kṣetrapāstatravāsinaḥ |
bhuktvā naijānnivāsāṃśca yayurviśrāntimāgaman || 19 ||
[Analyze grammar]

hariḥ kuṭumbasahito bhuktvā viśrāntimāpa ca |
dvitīyāyā dine prātaḥ kṛtvā svaṃ naityakaṃ vidhim || 20 ||
[Analyze grammar]

mahīmānān surāṣṭrīyān bhojayāmāsa bhāvataḥ |
kanthādharādyāśca tathā raṇaṃgamādayo'pi ca || 21 ||
[Analyze grammar]

viprāḥ śīlavratādyāśca maharṣayo'pi sādhavaḥ |
ājñāṃ prāpya harernaijān grāmān yayuḥ samantataḥ || 22 ||
[Analyze grammar]

devāyatanakaṃ prāha hariḥ prasannamānasaḥ |
tvayā bhakta kṛtaṃ sarvaṃ vaiṣṇavaṃ rāśirājyakam || 23 ||
[Analyze grammar]

naitādṛśaṃ mahat kāryaṃ vinā bhaktena jāyate |
pāvitāḥ kiṃpuruṣā vai narā nāryo napuṃsakāḥ || 24 ||
[Analyze grammar]

prasanno'smi vadā'deyaṃ tava me naiva vidyate |
śṛṇu sarvaṃ dadāmyeva yatte manasi vartate || 25 ||
[Analyze grammar]

ityuktvā ca samākṛṣya mimile vakṣasā svayam |
mastake śrīharistasya hastau tatra nyadhāt kṣaṇam || 26 ||
[Analyze grammar]

hṛdaye caraṇau divyau dadau śrīpuruṣottamaḥ |
devāyano'pi bhakto'sau pūrṇakāmo'sti rādhike || 27 ||
[Analyze grammar]

tato vavre bhaktarāṭ sa gṛhaṃ te vai bhavāmyaham |
yatra yatra bhavānāste pararūpaḥ svayaṃ hariḥ || 28 ||
[Analyze grammar]

avatārasvarūpaścaiśvare daive ca mānuṣe |
vibhavākhyo'thavā vyūhasvarūpo'pyathavāṃ'śakaḥ || 29 ||
[Analyze grammar]

arcārūpo'thavā''veśakalāvibhūtirūpavān |
śaktirūpo devarūpo yatrāste bhagavān bhavān || 30 ||
[Analyze grammar]

tatra tatra gṛhaṃ me'stu madgṛhe vasa sarvadā |
hariḥ prāha ca dhanyo'si tvadātmakagṛhe'nvaham || 31 ||
[Analyze grammar]

yathā vasāmi saukhyena tathā tvaṃ bhava madgṛham |
cetano muktarūpo'si saccidānandavigrahaḥ || 32 ||
[Analyze grammar]

tathā kāryasvarūpo'pi mama devālayo bhava |
devālaye sadā cā'haṃ nivatsye sṛṣṭimaṇḍale || 33 ||
[Analyze grammar]

prāsādo me bhavatveva gataḥ prāsādapātratām |
yatrā'haṃ tatra sarvatra devāyatanako bhava || 34 ||
[Analyze grammar]

anekaśaktisampannaścānekarūpadhṛgbhava |
jaḍavad dṛśyarūpastvaṃ tadadhiṣṭhātṛdevatā || 35 ||
[Analyze grammar]

devālanāṃ sarveṣāṃ bhava tvaṣṭṛpravardhitaḥ |
adhidevo'tirūpaśca darśanīyo hi dehinām || 36 ||
[Analyze grammar]

darśayiṣye ca rūpāṇi devālayātmakāni te |
ityuktvā bhagavānasmai devāyatanakāya ca || 37 ||
[Analyze grammar]

darśayāmāsa śikharānvitaṃ devālayaṃ śubham |
nijamūrtau tato mūrtidevālaye'pi tiṣṭhati || 38 ||
[Analyze grammar]

tādṛśaṃ darśayāmāsa sarvāṃge devatālayam |
vedikāṃ jagatīṃ bhīṭaṃ pīṭhaṃ maṇḍovaraṃ tathā || 39 ||
[Analyze grammar]

śṛṃgaṃ padmaśilāṃ cāpi kalaśaṃ dhvajamityapi |
agragaṃ maṇḍapaṃ cāpi gajāsanaṃ pradakṣiṇam || 40 ||
[Analyze grammar]

sarvaṃ mūrtau harirnaijasvarūpāyāṃ tadā muhuḥ |
devatāyatanāyaiva devatāyatanātmakam || 41 ||
[Analyze grammar]

darśayāmāsa viśadaṃ jñānaṃ divyaṃ dadau tathā |
devāyatanakaḥ prāpya jñānaṃ ca bhavanātmatām || 42 ||
[Analyze grammar]

kṛtakṛtyo'bhavannamro babhūva dvitvarūpavān |
muktarūpastathā devālayarūpo'tiśobhanaḥ || 43 ||
[Analyze grammar]

kuṃkumavāpikākṣetre divyo devālayo'bhavat |
sahasraḥ hastamānaḥ sa prāsādo'bhavadambare || 44 ||
[Analyze grammar]

yaddhaṭāścābbhrasalilaiḥ snānti nityaṃ dhvajānvitāḥ |
tādṛśaṃ khalu bhagavān cakāra svaṃ śubhālayam || 45 ||
[Analyze grammar]

vijñāyaitadṛṣayaśca siddhāḥ devyaśca devatāḥ |
jalajāḥ sthalajāścāpi catuḥkhanisusambhavāḥ || 46 ||
[Analyze grammar]

īśā īśvaramukhyāśca tattvāni cetanānyapi |
vṛkṣā vallyaścākṛtayo garuḍā gajavājinaḥ || 47 ||
[Analyze grammar]

yoginyaḥ puṣpavallyaśca stambā mumukṣavastathā |
araṇyasthā ambarasthā anye'pi saudhayoginaḥ || 48 ||
[Analyze grammar]

jñātvā devāyatanasya devālayasvarūpatām |
tatra vāsaṃ cehamānāścāyayurharisannidhau || 49 ||
[Analyze grammar]

sadehāḥ śrīhareḥ sevāmicchanto bhaktibhāvukāḥ |
prārthayāmāsuratyarthaṃ pūjayitvā hariṃ hi te || 50 ||
[Analyze grammar]

kṛpānātha dayāsindho sarvātman sarvarakṣaka |
sarvāśrayapradātastvaṃ dehi vāsaṃ nijālaye || 51 ||
[Analyze grammar]

bhaktavatsalasaṃjño'si tava sarvaṃ śarīrakam |
tvāṃ vinā naiva lokānāṃ vāsaḥ sukhāya kalpyate || 52 ||
[Analyze grammar]

devatāyatano bhakto bhaktyā tvadālayo'bhavat |
vayaṃ te kṛpayā dāsāstvadālayanivāsinaḥ || 53 ||
[Analyze grammar]

bhavema iti viśvātman dhārayāmaḥ pradehi tat |
tānāha bhagavān kṛṣṇaḥ sarvaśreyaḥparāyaṇaḥ || 54 ||
[Analyze grammar]

durlabhaṃ sulabhaṃ matvā bhavadbhistvarthitaṃ nviha |
mamā''layo bhavatyeva tredhā yatra vasāmyaham || 55 ||
[Analyze grammar]

akṣaraṃ brahma paramaṃ muktisthānaṃ mamā''layaḥ |
yatrā'kṣaraṃ bhaved brahma tatrā'haṃ nivasāmi vai || 56 ||
[Analyze grammar]

yatra vāso hi muktānāṃ nā'nyeṣāṃ bhavati kvacit |
māyāpāraṃ gatānāṃ ca brahmavidāṃ ca yoginām || 57 ||
[Analyze grammar]

yatra pūrve santi sādhyā devā nityanivāsinaḥ |
jīvabhāvaṃ parityajya ceśabhāvaṃ vihāya ca || 58 ||
[Analyze grammar]

māyākarmāśayaṃ dagdhvā mamā''rādhanatatparāḥ |
me dhyānaparamā bhūtvā kṣālitā'śeṣakāraṇāḥ || 59 ||
[Analyze grammar]

śuddhāḥ sañcinmayānandā matprapannā madarthakāḥ |
manmūrtau saṃyamaparāste yānti brahma cā'kṣaram || 60 ||
[Analyze grammar]

matkṛpāleśato divyā ye saṃbhūtā madātmakāḥ |
madanyalayabhāvāste me yānti brahma cākṣaram || 61 ||
[Analyze grammar]

māyāvikṛtilubdhānāṃ māyāmiṣṭarasātmanām |
māyā'haṃbhāvayuktānāṃ māyāsvabhāvaśālinām || 62 ||
[Analyze grammar]

svārthasādhanayatnānāṃ rāgārthaṃ yatatāṃ sadā |
madbhāvanāvihīnānāṃ na sthānaṃ brahmaṇi kvacit || 63 ||
[Analyze grammar]

mama bhaktivihīnānāṃ mama mārgā'vidāṃ tathā |
mama mantrādiśūnyānāṃ na sthānaṃ brahmaṇi kvacit || 64 ||
[Analyze grammar]

ityevaṃ paramaṃ sthānaṃ mayoktaṃ tanmamā'kṣaram |
tadanyad vai dvitīyaṃ tu sthānaṃ me hṛdayaṃ satām || 65 ||
[Analyze grammar]

yatrā'haṃ sarvadā vāsaṃ prakurve cetanālaye |
mama muktā mahāmuktāścā'kṣaraṃ brahma cetyapi || 66 ||
[Analyze grammar]

muktānāṃ hṛdaye nityaṃ satāṃ vai jīvatāmiha |
vasāmo militāḥ sarve hṛdayeṣu satāṃ vayam || 67 ||
[Analyze grammar]

tatra vai vāsanā nāsti nāsti māyāvikāritā |
tatra matto'tiriktaṃ vai nāsti tato vasāmyaham || 68 ||
[Analyze grammar]

mama mūrtiḥ sadā divyā'kṣaradhāmanivāsinī |
bhaktidharmayutā tatra rājate hṛdaye satām || 69 ||
[Analyze grammar]

dharmavaṃśo mama mūrto yo'sti divyaguṇātmakaḥ |
te guṇāstatra rājante hṛdaye vai satāṃ sadā || 70 ||
[Analyze grammar]

śraddhā śāntirdayā medhā tuṣṭiḥ puṣṭirgatistathā |
lajjā maitrī titikṣā ca buddhirmūrtiḥ kriyonnatiḥ || 71 ||
[Analyze grammar]

dharmapriyā vasantyeva sādhūnāṃ hṛdaye sadā |
jñānaṃ vairāgyamaiśvaryaṃ cā'bhayaṃ tapa ārjavam || 72 ||
[Analyze grammar]

satyaṃ kṣemaḥ sukhaṃ śaucaṃ sthairyaṃ dhairyaṃ ca mārdavam |
nigrahastyāga āstikyaṃ santoṣaśca kṣamā smṛtiḥ || 73 ||
[Analyze grammar]

damo yajñaḥ śamo yogaścoparatirupāsanā |
prasādaśca śubhaṃ tejaḥ svādhyāyaḥ praśrayaśca mud || 74 ||
[Analyze grammar]

dhyānaṃ sāmyaṃ brahmavidyā lābhaḥ sāmārtha udyamaḥ |
śravaṇādyā bhaktirūpā vasanti hṛdaye satām || 75 ||
[Analyze grammar]

tatrā'haṃ sarvadā śānto nivasāmi prasannahṛt |
sadālayo mama yūyaṃ tatra vāso'nyadurlabhaḥ || 76 ||
[Analyze grammar]

amuktānāṃ mama mantravihīnānāṃ kadācana |
mamā'bhaktimatāṃ vāso mama satsu na vidyate || 77 ||
[Analyze grammar]

yeṣāṃ vai tvakṣare vāso yeṣāṃ ca hṛdaye satām |
teṣāṃ vāsaḥ sadā yogyo mama devālaye śubhaḥ || 78 ||
[Analyze grammar]

athā'yaṃ bhaktavaryo'dya devāyatanako'bhavat |
devālayasvarūpo'pi jaḍaprakhyo'pi cetanaḥ || 79 ||
[Analyze grammar]

tatra vāsaṃ jaḍacaitye prāsāde yadi cecchatha |
mama mantrān pragṛhṇantu mama bhaktā bhavantu ca || 80 ||
[Analyze grammar]

vinā me sāttvatān bhaktān sthātumarhanti netare |
lomaśo'yamṛṣiśreṣṭho mantrān vaḥ sampradāsyati || 81 ||
[Analyze grammar]

vaiṣṇavāḥ saṃbhavantvatra tato vasantu madgṛhe |
ityuktā devatādyāśca dehinaḥ śrīhariṃ tadā || 82 ||
[Analyze grammar]

natvā samarcya sampūjyā''jñayā śrīlomaśaṃ yayuḥ |
lomaśo'pi dadau tebhyo mantrān cakāra vaiṣṇavān || 83 ||
[Analyze grammar]

tataste devasadanaṃ devāyatanamāyayuḥ |
nemurdevāyatanakaṃ nipeturharipādayoḥ || 84 ||
[Analyze grammar]

haryājñayā vaiṣṇavāste devālayanivāsinaḥ |
bhavituṃ dīkṣitā jātāstadā devālayo'bravīt || 85 ||
[Analyze grammar]

bhagavan caṃcalā devāṃścañcalā dehinastathā |
bhītiyuktāḥ sadā tvete hyāpatkāle samāgate || 86 ||
[Analyze grammar]

āsuropadravaṃ jñātvā vidraveyurna ced yadi |
madhye madhye vihāyaiva gaccheyurna sthalāntaram || 87 ||
[Analyze grammar]

nityavāsapratijñāṃ cet kuryuste tava sannidhau |
tadā vāsaḥ pradeyaḥ syādebhyaśceti vidhiṃ kuru || 88 ||
[Analyze grammar]

bālakṛṣṇastu tacchrutvā devālayavacaḥ śubham |
hitaṃ pathyaṃ tathā satyaṃ prāha prārthayatastadā || 89 ||
[Analyze grammar]

yathā devālayo vakti tathā cenmanyate yadi |
śapathān kurutā'traiva tadā vāsaṃ dadāmyaham || 90 ||
[Analyze grammar]

yāvad devālayastiṣṭhejjīrṇo vā bhittimātrakaḥ |
yāvaddevo'pi tiṣṭhecca tāvatstheyaṃ tadālaye || 91 ||
[Analyze grammar]

devatāyatano devo yadā sthānaṃ vihāya ca |
sarvakālārthamudgacchet tadā gamyaṃ na cānyathā || 92 ||
[Analyze grammar]

ityevaṃ vai pratijñāṃ ca kurutā'tra tadā'pyaham |
vāsaṃ dadāmi devāyatane devālaye sadā || 93 ||
[Analyze grammar]

ityuktāste pratijñāṃ vai tathā cakrurnirantarām |
yāvad devālayastiṣṭhed yāvattiṣṭhecca devatā || 94 ||
[Analyze grammar]

tāvadvastavyamevā'tra mahāpatkālake'pi ca |
ityuktvā ca jalaṃ pītvā prāsādikaṃ kṣitāvapi || 95 ||
[Analyze grammar]

jalaṃ pramucya caraṇe hareḥ surādayo'spṛśan |
ityevaṃ śapathaṃ prāptāḥ prāptā vāsaṃ mahālaye || 96 ||
[Analyze grammar]

devālaye harervāse vāsārhā vaiṣṇavā hi te |
yāvaddevālayastasmāt taddevo'pi ca tiṣṭhati || 97 ||
[Analyze grammar]

tāvadvai rādhike devālayāṃ'gāni ca sarvadā |
tiṣṭhantyeveti bhagnāśca khaṇḍitā api rādhike || 98 ||
[Analyze grammar]

jīrṇoddhārastato devālayasya hitado nṛṇām |
prasannā devatāṃśāste sukhayanti sahāyinaḥ || 99 ||
[Analyze grammar]

evaṃ prasannatāṃ prāpya devāyatanako muniḥ |
devālayātmatāṃ prāptastathā devā nivāsanam || 100 ||
[Analyze grammar]

kṛpayā śrīhareḥ prāptāstān named dūro'pi vai |
śālagrāme khaṇḍite'pi yathā vasāmi sarvadā || 101 ||
[Analyze grammar]

devālaye prabhagne'pi jīrṇe'pi mūrtisaṃyute |
vasāmyeva tvahaṃ yāvad devāyatanako'pi ca || 102 ||
[Analyze grammar]

vasatyeva tu tāvadvai mamā''jñāṃ mūrdhni dhārayan |
paṭhanācchravaṇāccāsya devālayaphalaṃ bhavet || 103 ||
[Analyze grammar]

iti śrīlakṣmīnārāyaṇīyasaṃhitāyāṃ dvitīye tretāsantāne śrīhareraśvapaṭṭasaraḥkṣetraṃ prapyāgamanaṃ akṣaradhāmni satāṃ hṛtsu devālayamūrtau ceti harestredhā vāsaḥ devāyatanarṣerdevālayasvarūpatā devālayāṃgadevānāmapi sthairyādi cetinirūpaṇanāmā pañcatriṃśadadhikaśatatamo'dhyāyaḥ || 135 ||
[Analyze grammar]