Chapter 130

śrīkṛṣṇa uvāca |
śṛṇu tvaṃ rādhike vyomni śaktyakṣinṛpateḥ kṣiteḥ |
viśālaṃ bhūtalaṃ yajñakṛte vīkṣya susaṃskṛtam || 1 ||
[Analyze grammar]

anādiśrīkṛṣṇanārāyaṇasvāmī pumuttamaḥ |
ālanaukānadīpārśve paścime'nāvarāvadhim || 2 ||
[Analyze grammar]

uttare'bdhitaṭaṃ yāvat pañcāśat krośabhūtale |
vilokya maṇḍapaṃ ramyaṃ vimānaṃ samatārayat || 3 ||
[Analyze grammar]

prakāśaḥ koṭisūryāṇāṃ tadā vyomnyabhavat sitaḥ |
jayaśabdāḥ kīrtanāni harṣanādāstadā'bhavan || 4 ||
[Analyze grammar]

vetrabandīstavanāni jayakāraiḥ sahā'bhavan |
vāditrāṇi vividhānyāvādyanta paritastadā || 5 ||
[Analyze grammar]

samutsāhabharāḥ sarve dudruvustadvimānakam |
bālakṛṣṇaṃ prabhuṃ draṣṭuṃ vardhayituṃ sumādibhiḥ || 6 ||
[Analyze grammar]

satkartuṃ puṣpahārādyaiḥ rājā ca janatā yayuḥ |
narā nāryo'tisammarde'vatarantaṃ vimānataḥ || 7 ||
[Analyze grammar]

bālakṛṣṇaṃ prasannāsyaṃ vardhayāmāsurutsukāḥ |
lājābhiścā'kṣataiḥ puṣpaiḥ svāgataṃ vidadhurmudā || 8 ||
[Analyze grammar]

atha śrībhagavān kṛṣṇanārāyaṇapumuttamaḥ |
yayau snātuṃ saṃgame ca samudre ca tataḥ param || 9 ||
[Analyze grammar]

śīghramāgatya ca yajñe madhye pratīkṣatāṃ satām |
svarṇāsane nṛpeṇā'bhyarpite vyarājata prabhuḥ || 10 ||
[Analyze grammar]

ṛṣayo lomaśādyāśca brahmendrādyāḥ sureśvarāḥ |
patnīvratādyā viprāścā muktā nārāyaṇāstathā || 11 ||
[Analyze grammar]

gaṇeśādyā yajñadevā devyaśca mātarastathā |
sarvasṛṣṭisurādyāśca vyarājanta sumaṇḍape || 12 ||
[Analyze grammar]

svastivāco dehaśuddhiḥ prakoṣṭhabandhanādikam |
aṃgadevapratiṣṭhānaṃ mukhyadevādhivāsanam || 13 ||
[Analyze grammar]

vahnyādhānaṃ havanādi yathāpūrvakratau tathā |
vedaghoṣā gītayaśca vyajāyanta vidhikramāt || 14 ||
[Analyze grammar]

anādiśrīkṛṣṇanārāyaṇaśrīpuruṣottamaḥ |
havyaṃ rājñā'rpitaṃ dravyaiścāgnyānano bhunakti saḥ || 15 ||
[Analyze grammar]

saptāhaḥ sa ṛturjāto vaiṣṇavo yatra dehinaḥ |
sṛṣṭitrayanivāsā vai tṛptāḥ pratyakṣabhojinaḥ || 16 ||
[Analyze grammar]

muktā īśā avatārā īśvarāṇyaḥ surādayaḥ |
surāṇyo devadevyaśca dikpālalokapālinaḥ || 17 ||
[Analyze grammar]

yajñadevā lokadevāḥ kṣetrādidevatāstathā |
mānavā vāyulokasthā jalasthāstalagā api || 18 ||
[Analyze grammar]

pādapā vāyupāścāpi śaityapāḥ prāṇinastathā |
tīrthāni santaḥ ṛṣayaḥ pitaro daityadānavāḥ || 19 ||
[Analyze grammar]

rakṣāṃsi tāmasāścāpi jīvāḥ sthāvarajaṃgamāḥ |
tṛptā jātā havyamiṣṭaistathā miṣṭānnabhojanaiḥ || 20 ||
[Analyze grammar]

nyūnaṃ tatra ca naivā'sti kalpadrumaṇivallibhiḥ |
samutthabhakṣyabhojyādi kāmadhenupayāṃsi ca || 21 ||
[Analyze grammar]

dakṣiṇāḥ samavartanta bhūyasyaḥ svarṇaratnajāḥ |
annavastravibhūṣāṇāṃ dānāni nā'ntavanti vai || 22 ||
[Analyze grammar]

dattāni tatra śaktyakṣinṛpeṇa harisannidhau |
parihāraśca saptāhe dvitīyāyāṃ kṛtastataḥ || 23 ||
[Analyze grammar]

avabhṛthaṃ ca madhyānte kṛtaṃ cā'bdhau samāgame |
ālanaukājalamiśre'nāvarābdhijale'pi ca || 24 ||
[Analyze grammar]

anāvarāyāṃ nadyāṃ ca ālanaukāsarityapi |
tadā dānāni hastīnāmaśvānāmuṣṭragogavām || 25 ||
[Analyze grammar]

yānānāṃ vāhanānāṃ ca kṣetravāṭibhuvāṃ tathā |
rājñā dattāni viprebhyo gṛhāṇāmṛddhisaṃyujām || 26 ||
[Analyze grammar]

kanyādānāni dīnebhyo bhojyadānāni vai tadā |
svarṇarūpyakabhūṣāṇāṃ dattāni dānakāni ca || 27 ||
[Analyze grammar]

devāyatanako bhakto mahimānaṃ jagāda ca |
avabhṛthasya sarvebhyaḥ śṛṇu tvaṃ rādhike śubham || 28 ||
[Analyze grammar]

avatīrya kratuṃ sarvaṃ nirvighnaṃ yena pūrṇatā |
karmaṇā cāntimenā'sti saṃbhṛtiḥ sā bhṛthātmikā || 29 ||
[Analyze grammar]

yajñe nyūnaṃ kramatyāgo jantūnāṃ pīḍanādikam |
durītaṃ yatra vai snāne sarvaṃ naśyati tad bhṛtham || 30 ||
[Analyze grammar]

aśuddhijaṃ ca vāgjātaṃ dehajaṃ mānasaṃ ca vā |
pāpaṃ tu yatra vai snāne sarvaṃ naśyati tadbhṛtham || 31 ||
[Analyze grammar]

mantrāṇāṃ vai samuccāre havyadāne'pi vai kratau |
lobhādijaṃ ca yatpāpaṃ sarvaṃ naśyati tad bhayam || 32 ||
[Analyze grammar]

āśāvatāṃ jalānnādyairdakṣiṇābhiratoṣaṇam |
manāg vā cā'ṇumātraṃ vā pāpaṃ naśyati tad bhṛtham || 33 ||
[Analyze grammar]

samitprajvālane janturvahnāvākasmikaḥ patet |
sūkṣmo'pi kāṣṭhasaṃvāsaḥ pāpaṃ naśyati tad bhṛtham || 34 ||
[Analyze grammar]

pātrāṇāṃ cāpi havyānāṃ saṃskṛtau yadi śuddhatā |
pūrṇā na syācca tatpāpaṃ naśyatyeva ca tad bhṛtham || 35 ||
[Analyze grammar]

devānāṃ yadbhavediṣṭatamaṃ tanmilitaṃ na cet |
havane sā kṣatiḥ pāpaṃ naśyatyeva ca tad bhṛtham || 36 ||
[Analyze grammar]

bījānāmaṅkurārhāṇāṃ vahnau yā dagdhatā tu sā |
bījaghātātmakaṃ pāpaṃ naśyatyeveti tad bhṛtham || 37 ||
[Analyze grammar]

gṛdhrādipakṣiṇāṃ cañcvāḥ patitaṃ vyomato'pi ca |
aśuddhaṃ vā'nyadevā'pi pāpaṃ naśyati tad bhṛtham || 38 ||
[Analyze grammar]

asaṃkhyānāṃ tu devānāmāvāhane kvacit kratau |
anupasthitaniḥśvāsaḥ pāpaṃ naśyati tad bhṛtham || 39 ||
[Analyze grammar]

mantroccāraṇakāle'pi svaraiḥ sākaṃ mukhānnanu |
thūkakaṇā utpatanti pāpaṃ naśyati tad bhṛtham || 40 ||
[Analyze grammar]

kāmakrodhādiyuktānāṃ viprāṇāṃ varaṇe kratau |
saṃsargajaṃ vā pāpaṃ tannaśyatyeva ca tad bhṛtham || 41 ||
[Analyze grammar]

yajamānasya cintāyāṃ duḥsvapnaṃ vā samāpatet |
rogo vā sūtakaṃ pāpaṃ naśyatyeva ca tad bhṛtham || 42 ||
[Analyze grammar]

abhīṣṭavyayataścogre vyaye'kasmādupasthite |
saṃkocavyayajaṃ pāpaṃ naśyatyeva ca tad bhṛtham || 43 ||
[Analyze grammar]

yajñe vighnasya kartṝṇāṃ vināśanaṃ bhavet kvacit |
hiṃsanaṃ tattadā pāpaṃ naśyatyeva ca tad bhṛtham || 44 ||
[Analyze grammar]

prāyaścittādigauṇatvaṃ brahmacaryādigauṇatā |
karmakāṇḍādigauṇatvaṃ pāpaṃ naśyati tad bhṛtham || 45 ||
[Analyze grammar]

yajñe nityaṃ pratiyajñaṃ tadaṃgādiṣu vai pṛthak |
puṇyamutpadyate yattat militvā puṇyaparvataḥ || 46 ||
[Analyze grammar]

jāyate yajamāne vai cet kṣatirnāśanaṃ bhṛtham |
kvacit kālaprabhāveṇa nānukūlyaṃ kratau tu yat || 47 ||
[Analyze grammar]

tajjaṃ pāpaṃ kratau jāte naśyatyeva tu tad bhṛtham |
devānāmavamānādi hyajānatā bhaved yadi || 48 ||
[Analyze grammar]

pūjyānāmavamānādi jānatā'pi bhaved yadi |
apūjyapūjyatāpāpaṃ naśyatyeva tu tad bhṛtham || 49 ||
[Analyze grammar]

varuṇaḥ sarvadā sākṣī jalādhidevarūpakaḥ |
svarge sampatpradaḥ syāt sa nārāyaṇātmako bhṛtham || 50 ||
[Analyze grammar]

yajamāne sarvadevā yajamānyāṃ ca devikāḥ |
snānakāle vasantyeva tīrthaṃ sarvātmakaṃ bhṛtham || 51 ||
[Analyze grammar]

ācārye śrīharistvāste yājñikeṣvavatārakāḥ |
ṛtvikṣu ceśvarāḥ santi tīrthaṃ sarvātmakaṃ bhṛtham || 52 ||
[Analyze grammar]

jāpakeṣu ca tīrthāni tattvāni karmacāriṣu |
sāhāyyeṣu ca ṛṣayastīrthaṃ sarvātmakaṃ bhṛtham || 53 ||
[Analyze grammar]

yavāṃkurāḥ pradātavyā varuṇāya mahātmane |
ghṛtādyaṃgapaṃcakaṃ ca dātavyaṃ salile tadā || 54 ||
[Analyze grammar]

pañcāmṛtāni dattāni labhyante divi vai punaḥ |
ṣoḍaśopasuvastvādyaiḥ pūjanīyo jaleśvaraḥ || 55 ||
[Analyze grammar]

tatra nārāyaṇaścāste'kṣareśaḥ puruṣottamaḥ |
jale snānaṃ harau snānaṃ cāvabhṛthaṃ prapuṇyadam || 56 ||
[Analyze grammar]

yatra yajñaścānnasatraṃ pārāyaṇaṃ kathāmṛtam |
avabhṛthaṃ cāplavanaṃ tattīrthaṃ śāśvataṃ matam || 57 ||
[Analyze grammar]

nadā nadyastaṭākāni sarāṃsi dīrghikāstathā |
akhātāni ca khātāni tīrthānyavabhṛthena vai || 58 ||
[Analyze grammar]

avabhathakṣaṇe vāri grāhyaṃ pātreṣu pāvanam |
antakālerpitaṃ martyamukhe mokṣapradaṃ hi tat || 99 ||
[Analyze grammar]

pāpināṃ pāpanāśārthaṃ yajñadevādayaḥ sadā |
avabhṛthasthale snātvā tatatiṣṭhanti tatra vai || 60 ||
[Analyze grammar]

mṛtasyāpi tu jāntorvai yasya kasyāpi dehinaḥ |
asthipatrāṃgabhāgo'lpaḥ patitaścedavabhṛthe || 61 ||
[Analyze grammar]

sa yāti paralokasthaḥ preto vā yāmyalokagaḥ |
asadgatiṃ tato vāpi śrīharerdhāma śāśvatam || 62 ||
[Analyze grammar]

asatkarmāṇi naśyanti jāyante puṇyaparvatāḥ |
avabhṛthasthale snātuḥ paralokāḥ sukhapradāḥ || 63 ||
[Analyze grammar]

avabhṛthasthalīloke māsaḥ śrīpuruṣottamaḥ |
bālakṛṣṇapratimāśca trayo mokṣapradottamāḥ || 64 ||
[Analyze grammar]

sādhavo vaiṣṇavā loke sāṃkhyayoginya ityapi |
lakṣmīnārāyaṇasaṃhitāstisro mūrtayo hareḥ || 656 ||
[Analyze grammar]

brahmapriyā brahmamuktā brahmakuṃkumavāpikā |
trayaste brahmatīrthāni sarvayajñabhṛthāni vai || 66 ||
[Analyze grammar]

hṛdaye sarvadā kṛṣṇanārāyaṇasya saṃsmṛtiḥ |
kare tu taulasī mālā kaṇṭhe sragapi taulasī || 67 ||
[Analyze grammar]

prasādamātragrahaṇaṃ trayaste'kṣaradhāmadāḥ |
lalāṭe tilakaṃ candraḥ bāhvoścakrādilekhanam || 68 ||
[Analyze grammar]

jihvāyāṃ śrīharernāma trayaste yāmyanāśakāḥ |
gṛhe tu vaiṣṇavā yasya vāṭikāyāṃ tu tūlasī || 69 ||
[Analyze grammar]

paśuṣvapi ca gauryasya trināvo bhavapāragāḥ |
bhāryā pativratā yasya kṛpā yasya ca sadguroḥ || 70 ||
[Analyze grammar]

śāstrajñānaṃ bhaktiyuktaṃ pāragaḥ sa bhavāmbudheḥ |
yena sarvaṃ harau kṛṣṇe'rpitaṃ varṣma ca daihikam || 71 ||
[Analyze grammar]

śāntavṛttinirīhaśca trayaṃ nirlepatāpradam |
rātriryasya harāvāste prātaryasya prapūjane || 72 ||
[Analyze grammar]

madhyāhno jñānabhāge ca sa vai mukto'tra sākṛtiḥ |
satāṃ yogād yajñayogād yogāt pratyakṣaśārṅgiṇaḥ || 73 ||
[Analyze grammar]

nage nārī nānyataro jāyate'vabhṛthādhikaḥ |
kratusnānaṃ tilasnānaṃ snānamāmalakīphalaiḥ || 74 ||
[Analyze grammar]

smṛtvā tīrthāni kurvīta jāyate'vabhṛthā'dhikam |
antakāle yajñabhūmistathā nārāyaṇo hariḥ || 75 ||
[Analyze grammar]

smaryante sādhavaḥ sādhvyastatphalaṃ tu bhṛthādhikam |
koṭikanyāpradānena sahasrakratubhiśca yat || 76 ||
[Analyze grammar]

annakṣetrasahasreṇa yatphalaṃ tadavabhṛthāt |
cāturmāsyavrataiścāpi vedādhyayanakaistathā || 77 ||
[Analyze grammar]

sahasravarṣatapasā gosahasrapradānakaiḥ |
yatphalaṃ labhyate bhūmau tatphalaṃ syādavabhṛthāt || 78 ||
[Analyze grammar]

yātrābhiḥ sarvatīrthānāṃ piturmātuśca sevayā |
patyuśca sevayā gavāṃ sevayā devasevayā || 79 ||
[Analyze grammar]

daivikṣetranivāsena tulasīsevayā tathā |
yatphalaṃ labhyate tatsyāt sādhoścaraṇasevayā || 80 ||
[Analyze grammar]

buddhyā hīno naro nārī kathāṃ śrutvā hariṃ bhajet |
sādhuṃ seveta satataṃ mokṣo'pi tadbalād bhavet || 81 ||
[Analyze grammar]

yasyā'gre nāsti vai dravyaṃ kṣetraṃ vā vāṭikā'pi vā |
jīvanaṃ śramamātreṇa bhṛtyadāsyādibhistathā || 82 ||
[Analyze grammar]

tena vai mandiraṃ sevyaṃ kṛṣṇanārāyaṇasya vai |
mārjanena ca lepena jalaprakṣālanena ca || 83 ||
[Analyze grammar]

kaccarādyapahāreṇa puṣpamālākalādibhiḥ |
śilpanena ca vastrādikṣālanena nirantaram || 84 ||
[Analyze grammar]

pātrāṇāṃ mañjanenāpi bhittikāgharṣaṇena ca |
lutājālā'pahāreṇa rajoniṣkāsanena ca || 85 ||
[Analyze grammar]

vyavasthayā ca vastūnāṃ catvare dīpakarmaṇā |
dvāroddhāṭanakāryeṇa vāditranādanena ca || 86 ||
[Analyze grammar]

kīrtanena ca tālādyairguṇānāṃ kathanena ca |
jayaśabdairhare śabdairbhajanairmālikādibhiḥ || 87 ||
[Analyze grammar]

pātrāṇāmānayanaiśca dhānyānāṃ śuddhibhistathā |
jalānāṃ cā''haraṇaiśca stavanaiśca pradakṣiṇaiḥ || 88 ||
[Analyze grammar]

daṇḍavadbhirnamaskārairguṇānāṃ grahaṇaistathā |
bhāvaiḥ premabharairdivyairmanorañjanakāryakaiḥ || 89 ||
[Analyze grammar]

mṛttikā''nayanaiścāpi sevyaṃ śrīkṛṣṇamandiram |
nāryā nareṇa vā nānyatareṇāpi yathāmati || 90 ||
[Analyze grammar]

yathābalaṃ yathāsādhyaṃ yathāyogyaṃ bhavettu yat |
tattathā sevanaṃ kāryaṃ mandirasya satāmapi || 91 ||
[Analyze grammar]

ityevaṃ sevako yastu dāso bhāgavato mahān |
sarvāvabhṛthataḥ śreṣṭhaḥ pāvano vartate hi saḥ || 92 ||
[Analyze grammar]

avabhṛthe tadetyevaṃ devāyatanako muniḥ |
upadiśya virarāma tataḥ śrīpuruṣottamaḥ || 93 ||
[Analyze grammar]

prāha cāsmi prasanno'tra kratau rājñā'rpitaṃ bahu |
sevayā ca prasanno'smi jayatvatra sadā nṛpaḥ || 94 ||
[Analyze grammar]

tato rājā parameśaṃ śrīhariṃ caraṇe'patat |
hariṇā'rpita evā'sya kaṇṭhe hāraḥ suvarṇajaḥ || 95 ||
[Analyze grammar]

rājñā prāghūṇikāḥ sarve pūjitā upadādibhiḥ |
āśīrvādān samagṛhya parihāraṃ tato'karot || 96 ||
[Analyze grammar]

āyayurnijavāseṣu viśaśramuḥ kṣaṇaṃ janāḥ |
rājā saṃbhojayāmāsa sṛṣṭitrayasya dehinaḥ || 97 ||
[Analyze grammar]

dakṣiṇāśca dadau tatra tutuṣuḥ sarvadehinaḥ |
rātrau mahotsavaṃ lokā devarṣayaśca cakrire || 98 ||
[Analyze grammar]

rāsakīrtananṛtyaiśca bhagavattoṣaṇāya vai |
tato nidrāṃ gatāḥ prātaḥ samutthāya ca naityakam || 99 ||
[Analyze grammar]

kṛtvā tatra sabhāyāṃ cāgatāḥ śrīhariṇā tadā |
pūjitā devatādyāścā'mūlyopadāsamarpaṇaiḥ || 100 ||
[Analyze grammar]

tataḥ saṃbhojitāḥ sarvaṃ ājñaptā hariṇā tataḥ |
kartuṃ tu pañcamaṃ yajñaṃ gantavyaṃ sāyameva ha || 101 ||
[Analyze grammar]

kālimā'bdhitaṭe deśe kālimānṛpateḥ kṣitau |
pañcamyāṃ pauṣaśuklasya yajñāraṃbho bhaviṣyati || 102 ||
[Analyze grammar]

āgamiṣyāmyahaṃ tatra caturthyāṃ sāyameva ca |
ityuktvā bhagavān lokān mumukṣūn pradadau manūn || 103 ||
[Analyze grammar]

narān nārīrnānyatarān mumukṣūn śaktirājyagān |
śaraṇaṃ śrīkṛṣṇanārāyaṇo'stu mama sarvadā || 104 ||
[Analyze grammar]

oṃ namaḥ śrīkṛṣṇanārāyaṇāya svāmine svāhā |
kālamāyāpāpakarmaśatruyāmyakuhṛdbhayāt || 105 ||
[Analyze grammar]

śūlamīnadhvajadhanuścakrasvastikavānava |
brahmā'haṃ śrīkṛṣṇanārāyaṇabhakto'smi śāśvataḥ || 106 ||
[Analyze grammar]

anādiśrīkṛṣṇanārāyaṇaḥ svāmī patiśca me |
bālakṛṣṇaḥ parabrahma mama vai śāśvataḥ patiḥ || 107 ||
[Analyze grammar]

pitā bandhuḥ suhṛnmitraṃ rakṣakaḥ poṣako'stu saḥ |
śrīkṛṣṇavallabhasvāmīṃ śrīhariṃ śaraṇaṃ mama || 108 ||
[Analyze grammar]

ityetebhyo dadau mantrān mumukṣubhyaḥ svayaṃ hariḥ |
atha sarve yayustatrājñaptā vai pañcamakratoḥ || 109 ||
[Analyze grammar]

yajñārthaṃ kālimāśasya rājye kālīsarittaṭe |
śrīhariṃ rādhike tatra śaktyakṣibhūpasevitaḥ || 110 ||
[Analyze grammar]

dinadvayaṃ samuvāsā nandayan nṛpamutsukam |
jñānaṃ dadau nṛpādibhyaḥ kṛpayā vallabhaḥ prabhuḥ || 111 ||
[Analyze grammar]

iti śrīlakṣmīnārāyaṇīyasaṃhitāyāṃ dvitīye tretāsantāne śaktyakṣinṛpateḥ rājye caturthaviṣṇuyāgakaraṇamavabhṛthārthasphuṭatāmahimādi cetinirūpaṇanāmā triṃśadadhikaśatatamo'dhyāyaḥ || 130 ||
[Analyze grammar]