Chapter 118

śrīkṛṣṇa uvāca |
śṛṇu tvaṃ rādhike cā'nyaṃ camatkāraṃ hareḥ śubham |
bhaktarakṣākaraṃ śreṣṭhaṃ pāpatāpapraṇāśanam || 1 ||
[Analyze grammar]

saurāṣṭre jayanagare'bhavat santāraṇo dvijaḥ |
vedadharmarataḥ samyak pūjāvidhānatatparaḥ || 2 ||
[Analyze grammar]

ṣaṭkarmanirataḥ kathāvācane guṇakīrtane |
kathāyāḥ śravaṇe viṣṇoḥ smaraṇe pādasevane || 3 ||
[Analyze grammar]

arcane vandane dāsye sakhye cātmanivedane |
mahābhāgavataścāsīt kṛṣṇapūjāparāyaṇaḥ || 4 ||
[Analyze grammar]

svayaṃ dvijaḥ samutthāya prātarnityaṃ nadītaṭam |
gatvā snātyeva bhadrāyāṃ kṛtvā sandhyāṃ ca vandanam || 5 ||
[Analyze grammar]

jalasya kalaśaṃ mūrghni svayaṃ nītvaiva bhāvataḥ |
śālagrāmasya vai pūjāṃ svā''hṛtakusumādibhiḥ || 6 ||
[Analyze grammar]

svaghṛṣṭacandanādyaiśca karotyeva sadā dvijaḥ |
pūjāyāṃ jāyamānāyāṃ tasya patnī pativratā || 7 ||
[Analyze grammar]

taraṇyākhyā tu sāmagrīrdadātyeva hi bhāvataḥ |
jalaṃ puṣpaṃ phalaṃ cāpi vastraṃ bhūṣāṃ ghṛtādikam || 8 ||
[Analyze grammar]

putrī tasya taralikā kanyā kumārikā satī |
śīghraṃ pūjāsamayādvai pūrvamutthāya nityadā || 9 ||
[Analyze grammar]

snātvā natvā svapitarau devaṃ natvā'tibhāvataḥ |
cullikāṃ vahniyuktāṃ ca vidhāya tvaritā satī || 10 ||
[Analyze grammar]

dugdhapākaṃ pūrikāśca paktvā naivedyamuttamam |
samarpayati kṛṣṇāya viṣṇave cātibhaktitaḥ || 11 ||
[Analyze grammar]

dvitīyā kanyakā nāmnā kumudā sarvadā prage |
gāṃ nijāṃ dohayitvaiva kṣīraṃ dadāti cārcane || 12 ||
[Analyze grammar]

dugdhasārādikaṃ kṛtvā nityaṃ dadāti cārcane |
putrastasya vinodaśca devapuṣpadrumāśraye || 13 ||
[Analyze grammar]

jalasecanakāryādi karotyeva tu sevanam |
pātrāṇāṃ mañjanaṃ dhūpaṃ dīpaṃ jalārpaṇādikam || 14 ||
[Analyze grammar]

karoti sarvadā pārśve pituḥ sthitvā yathāsthalam |
dvitīyastasya putro'pi vasantarṣiśca vaiṣṇavaḥ || 1 || || 81 ||
[Analyze grammar]

vāyudānaṃ vyajanena karoti pūjanādiṣu |
makṣikādrāvaṇaṃ cāpi śarkarātulasīdalam || 16 ||
[Analyze grammar]

phalānyapi dadātyeva yathāpekṣaṃ ca sevanam |
atha pūjottaraṃ sarve kurvanti stavanaṃ prabhoḥ || 17 ||
[Analyze grammar]

pradakṣiṇaṃ daṇḍavacca puṣpāñjaliṃ dadatyapi |
kṣamāyāñcāṃ prakurvanti tato nṛtyanti vai mudā || 18 ||
[Analyze grammar]

vādayanti suvādyāni kīrtayanti pragītikāḥ |
gāyanti tālamānādyairvividhairnartanaiḥ sadā || 19 ||
[Analyze grammar]

evaṃ saṃpūjayitvā ca ramākāntaṃ sadā patim |
tataḥ prasādaṃ bhaktebhyaḥ saṃvibhajya pradāya ca || 20 ||
[Analyze grammar]

gṛhiṇaste samaśnanti śarkarānnajalādikam |
madhyāhne ca tathā sāyaṃ pūjayanti vidhānataḥ || 21 ||
[Analyze grammar]

jīvikārthaṃ tu divase yatante'pekṣitaṃ manāk |
evaṃ prayāte samaye bhagavān puruṣottamaḥ || 22 ||
[Analyze grammar]

suprasanno'tibhaktyaiva sākṣād babhūva caikadā |
āṣāḍhe kṛṣṇapakṣe vai rātrāvekādaśīvrate || 23 ||
[Analyze grammar]

mukuṭaṃ dhārayan ramyaṃ vakraṃ sauvarṇamuttamam |
mayūravaryapicchāgraṃ maṇiratnādiśobhitam || 24 ||
[Analyze grammar]

kuṇḍale makarākāre dadhan ramye tu karṇayoḥ |
tilakaṃ kauṃkuma madhye bhāle bibhrat sucandrakam || 25 ||
[Analyze grammar]

mandahāsyānano divyasmerākarṣitamānasaḥ |
kaṇṭhe sukaustubhahārān tūlasīpatramālikāḥ || 26 ||
[Analyze grammar]

sauvarṇahāramālālīn dadhan kaṭyāṃ tu mekhalām |
sauvarṇīṃ kaṭake cāpi bhujayośca prakoṣṭhayoḥ || 27 ||
[Analyze grammar]

śṛṃkhale svarṇaje ramye'ṅgulīyakormikāḥ kare |
yaṣṭiṃ ca pauraṭīṃ muktāmāṇikyahīrakānvitām || 28 ||
[Analyze grammar]

pāduke ramyasauvarṇajanite dhārayan hariḥ |
pītāmbaraśca ruciro vyadṛśyata yadṛcchayā || 29 ||
[Analyze grammar]

tejomaṇḍalamadhyastho dāsadāsīgaṇārcitaḥ |
yuvā rājādhirājaśca rādhāramādisevitaḥ || 30 ||
[Analyze grammar]

tato bhaktān tirobhāvya kiśoro'bhūt svayaṃprabhuḥ |
bālakṛṣṇasvarūpaḥ śrīmahārājādhirājakaḥ || 31 ||
[Analyze grammar]

kiśoro bhagavān kṛṣṇo dadau mantraṃ svayaṃ prabhuḥ |
 oṃ namaḥ śrīkṛṣṇanārāyaṇāya ravāmine svāhā || 32 ||
[Analyze grammar]

dadau ca mastake hastaṃ prabhustatra tiro'bhavat |
evaṃ tato dinānnityaṃ prārabhyoṣaḥsamarcane || 33 ||
[Analyze grammar]

pūjāyāṃ śrīmahārājo nityamāyāti keśavaḥ |
kiśoraḥ śrīkṛṣṇanārāyaṇaḥ śrībhūprasevitaḥ || 34 ||
[Analyze grammar]

sarvopacārān gṛhṇāti pūjāyāmarpitāni vai |
śrāvaṇe bhādrake māse tathā''śvine'pi vai prabhuḥ || 35 ||
[Analyze grammar]

pūjāṃ teṣāmamāyāṃ vai gṛhītvā prāha tān hariḥ |
ūrjakṛṣṇadalāṣṭamyāṃ mama janmamahotsavaḥ || 36 ||
[Analyze grammar]

caturdaśo'śvasarasastaṭe'kṣarākhyabhūtale |
bhaviṣyatīti yuṣmābhiścāgantavyaṃ mama gṛham || 37 ||
[Analyze grammar]

pitṛbhyāṃ cāpi kanyābhiḥ putraiḥ saha mamālaye |
āgamiṣyanti trailokyeśvarā mamārcanāya yat || 38 ||
[Analyze grammar]

ityuktvā bhagavāṃstebhyo bhaktebhyo'tha tiro'bhavat |
bhaktāste tīrthayātrārthaṃ samutsukāstato'bhavan || 39 ||
[Analyze grammar]

ṣaṣṭhyāṃ prasādhya pātheyaṃ gṛhaṃ pidhāya tālakaiḥ |
upadāḥ subhagā gṛhya padbhyāṃ prasthānamācarat || 40 ||
[Analyze grammar]

saptamyāṃ sāyamevaite prāpustvaśvasarovaram |
dṛṣṭvā kuṃkumavāpīṃ ca tathā śrīlomaśāśramam || 41 ||
[Analyze grammar]

ṛṣīn satīḥ sādhujanān devān devālayān bahūn |
kṣetrapān kṣetrarakṣāṃśca nagaraṃ vāṭikādikāḥ || 42 ||
[Analyze grammar]

udyānāni vicitrāṇi daivivṛkṣavanāni ca |
yajñaśālāḥ kathāśālā dharmaśālā mahālayān || 43 ||
[Analyze grammar]

dṛṣṭvā śrīkambharālakṣmīṃ śrīgopālaṃ hariṃ tathā |
daivīṃ bhūmiṃ vilokyaiva brahmapriyāśca kanyakāḥ || 44 ||
[Analyze grammar]

vimānāni sudivyāni muktān saudhān samantataḥ |
avāpuḥ paramāścaryaṃ parameśvaramadbhutam || 45 ||
[Analyze grammar]

anādiśrīkṛṣṇanārāyaṇaṃ natvā''rcya vai tataḥ |
satkṛtā bhojitāstena nārāyaṇena te janāḥ || 46 ||
[Analyze grammar]

nyūṣuḥ rātriṃ mahīmānagṛhe saudhe'tisundare |
cakrurjāgaraṇaṃ rātrau saptamyāṃ premavihvalāḥ || 47 ||
[Analyze grammar]

dadṛśurvyomamārgeṇa vimānānyāgatāni te |
yeṣu muktāstvakṣarasya tathā golokavāsinaḥ || 48 ||
[Analyze grammar]

vaikuṇṭhasya tathā muktā vairājā'mṛtavāsinaḥ |
brahmaviṣṇumaheśādyā īśvarāḥ pitarastathā || 49 ||
[Analyze grammar]

ṛṣayaḥ svargiṇo devā mervāśrayāḥ surādayaḥ |
dikpālā lokapālāśca mānavāḥ sādhavo'malāḥ || 50 ||
[Analyze grammar]

siddhāḥ sādhvyaḥ satīnāryaḥ sāṃkhyayoginya ityapi |
nadā nadyaśca tīrthāni samudrāḥ ṛtavastathā || 51 ||
[Analyze grammar]

māsā guṇā araṇyāni pātālavāsino'surāḥ |
divyā bhaktāstathā daityā dānavāścāraṇādayaḥ || 52 ||
[Analyze grammar]

rājāno divyabhaktāśca saṃsthitāḥ santi yeṣu vai |
tādṛśāni vimānāni sūryacandranibhāni vai || 53 ||
[Analyze grammar]

kumārīgaṇagītaiścodghoṣitāni śubhāni ca |
vādyanādātiśabdāni vyomno'vaterurakṣare || 54 ||
[Analyze grammar]

kṣetre kuṃkumavāpyāstu sannidho vai sahasraśaḥ |
teṣāṃ prabhāḥ prakāśāśca koṭicandrasamāstadā || 55 ||
[Analyze grammar]

abhavan gagane bhūmau nagare sarvato diśi |
rajomātraṃ nāndhakārastatrā'bhūddhāmasadṛśe || 56 ||
[Analyze grammar]

anādiśrīkṛṣṇanārāyaṇaḥ śrībhagavān prabhuḥ |
tathā gopālakṛṣṇākhyaḥ pitā mātā tu kambharā || 57 ||
[Analyze grammar]

santoṣā ca svasā bhrātā bhagavāṃśca śukastathā |
vallabhaścā'tha vai hemantako'pi bhagavāṃstathā || 58 ||
[Analyze grammar]

dāsau dvau mañjulā haṃsā saguṇā ca sakhīgaṇaḥ |
svāgataṃ vāsamarghyaṃ ca madhuparkaṃ daduḥ sukham || 59 ||
[Analyze grammar]

atha vai brāhmasamaye vedānūcurmaharṣayaḥ |
tadā maṃgalatūryāṇi tvavādyanta samantataḥ || 60 ||
[Analyze grammar]

munayo bhajanaṃ cakruḥ sādhavo dhyānamācaran |
janāścāpi mahīmānā yayuḥ snātuṃ sarovaram || 61 ||
[Analyze grammar]

santāraṇo dvijaścāpi taraṇistasya bhāminī |
taralā ca kumudā ca vinodaśca vasantakaḥ || 62 ||
[Analyze grammar]

sarve te vai kuṭumbaṃ ca smṛtvā kṛṣṇanarāyaṇam |
yayuḥ snātuṃ cāśvapaṭṭasarovarajale tadā || 63 ||
[Analyze grammar]

naukāmādāya śabaraṃ tīrasthaṃ te vyalokayan |
vihartumānasā vārdhau nāvamāruruhuśca te || 64 ||
[Analyze grammar]

śulkaṃ datvā niṣeduśca nāviko nāvamairayat |
jalamadhye gatā naukā krośādapyadhikaṃ yadā || 65 ||
[Analyze grammar]

tadā naukā aparāśca mānavairadhirohitāḥ |
śataśaścāpi saraso madhye taṭe samantataḥ || 66 ||
[Analyze grammar]

viharanti sma jaladhau sukhānnanu sarovare |
yadṛcchayā mahatyā sā naukayā saha vai tadā || 67 ||
[Analyze grammar]

āghātaṃ sahasā prāpya vakrā cādhomukhī kṣaṇāt |
abhavat tadbhayenaite naukāsthāḥ sahasā tadā || 68 ||
[Analyze grammar]

ekapārśve'pasasruśca patitāḥ salilāntare |
naukā'pi jalamadhye sā magnā jalaprapūritā || 69 ||
[Analyze grammar]

atropāyo na caivā'sti samuddhartuṃ tadā hi tān |
mahatyā naukayā cāpi tathā naukābhireva ca || 70 ||
[Analyze grammar]

sahasā tatra te sarve dhīvaraiḥ parimārgitāḥ |
agādhe tu jale tatra magnāḥ ṣaḍeva tatkṣaṇāt || 71 ||
[Analyze grammar]

taraṇasya kalāṃ naite jānanti tena hetunā |
sarasyeva tale magnā dhīvarāṇāṃ na hastagāḥ || 72 ||
[Analyze grammar]

abhavaiṃste tale magnāḥ papurjalaṃ viśeṣataḥ |
sasmaruḥ śrīkṛṣṇanārāyaṇaṃ śrīparameśvaram || 73 ||
[Analyze grammar]

ārttihaṃ trāṇakartāraṃ nirādhārajalāntare |
tuṣṭhuvurmanasā mṛtyupāśādhīnāśca vai harim || 74 ||
[Analyze grammar]

jalamagnāṃ mahīṃ yaśca samuddadhāra sūkaraḥ |
jalasthāṃ ca mahānaukāṃ jagrāha makaraśca yaḥ || 75 ||
[Analyze grammar]

jalamagnaṃ mahāśailaṃ pṛṣṭhe kūrmo dadhāra yaḥ |
jalamagnaṃ gajaṃ bhaktaṃ yo rarakṣa prabhurhariḥ || 76 ||
[Analyze grammar]

jalamagnaṃ ca vaṇijaṃ rarakṣa bhagavāṃstu yaḥ |
jalamagnaṃ mahādeśaṃ coṣṭrālayaṃ rarakṣa yaḥ || 77 ||
[Analyze grammar]

jalamagnaṃ nṛpaṃ yaśca rarakṣodayanaṃ purā |
māṃjhāṃbikāṃ jalamagnāṃ samudre saṃrarakṣa yaḥ || 78 ||
[Analyze grammar]

evaṃ cānyān jalamagnān rarakṣa vahudhā prabhuḥ |
nijabhaktān yadi satyān manyase tvaṃ narāyaṇa || 79 ||
[Analyze grammar]

tadā'smān dayayā kṛṣṇa santāraya jalāntarāt |
mṛtyuste sarvadā'dhīnaḥ kālaste kavalastathā || 80 ||
[Analyze grammar]

jalaṃ prāṇanirodhaśca tava śaktivaśau sadā |
antarātmā bhavānāste tvakālamṛtyuhārakaḥ || 81 ||
[Analyze grammar]

hara duḥkhāni deveśa yadi trātuṃ hi manyase |
tvaṃ naukāstvaṃ mahāprāṇastvaṃ jīvastvaṃ ca jīvanam || 82 ||
[Analyze grammar]

tvameva jalamadhye vai prahlādaṃ prāṇado'bhavaḥ |
nāsti stutestu samayaḥ prāṇā jalanirodhitāḥ || 83 ||
[Analyze grammar]

sthairyaṃ yānti hṛdātmā ca mūrdhānaṃ pratigacchati |
kṣaṇaṃ mṛtyormadhyavarti vidyate nā'dhikaṃ tataḥ || 84 ||
[Analyze grammar]

ityevaṃ te jalamadhye rādhike'tīva mūrchitāḥ |
stutvā'rpaṇaṃ ca śaraṇaṃ jagmuḥ śrīkambharāsutam || 85 ||
[Analyze grammar]

sarvajño bhagavān śrīśo bālakṛṣṇastvarāyutaḥ |
dhṛtvā vai kāmaṭhaṃ rūpaṃ mahākacchapamuttamam || 86 ||
[Analyze grammar]

ṣaḍbhaktān sahasā pṛṣṭhe dhṛtvā tāṃśca jalopari |
ānayāmāsa bhagavān nirnaukājalamastake || 87 ||
[Analyze grammar]

mūrchāṃ jalaṃ ca sahasā bālarūpadharaḥ prabhuḥ |
hastābhyāṃ ca muhuḥ spṛṣṭvā vārayāmāsa tatkṣaṇam || 88 ||
[Analyze grammar]

pītaṃ jalaṃ vilīnaṃ ca karasparśanamātrataḥ |
mūrchā dūra gatā cāpi bhānavanto'bhavaṃśca te || 89 ||
[Analyze grammar]

svastidā mahati kūrme sthitān dadṛśurantike |
bālaṃ gopālakṛṣṇasya rakṣakaṃ dadṛśustathā || 90 ||
[Analyze grammar]

divarūpadharaṃ kṛṣṇaṃ dṛṣṭvā śāntiṃ parāṃ yayuḥ |
mārgayadbhirjanaiḥ ṣaṭ te dṛṣṭā vai kamaṭhopari || 91 ||
[Analyze grammar]

anādiśrīkṛṣṇanārāyaṇena rakṣitā iti |
sahasā te tadā yātā naukāyāṃ kūrmapṛṣṭhataḥ || 92 ||
[Analyze grammar]

jagṛhustān nāvikā vai kūrmaścā'dṛśyatāṃ gataḥ |
śaṃkhacakragadāpadmadharo'bhūd bhagavān hi saḥ || 93 ||
[Analyze grammar]

sarvaireva kṣaṇaṃ dṛṣṭaḥ kūrmo jalāntare naraḥ |
bālakṛṣṇe layaṃ yātaścaivaṃ dṛṣṭo janaistataḥ || 94 ||
[Analyze grammar]

naukayā tān samagṛhya tīramānīya tatyajuḥ |
āścaryaṃ śrībālakṛṣṇacamatkārātmakaṃ prajāḥ || 95 ||
[Analyze grammar]

āvidan rakṣakaṃ kṛṣṇaṃ bhejurvai bhāvatastataḥ |
atha janmotsavapūjāṃ kartuṃ tataśca maṇḍape || 96 ||
[Analyze grammar]

āyayurīśvarā muktā devā devyaśca dehinaḥ |
pūjanaṃ sarvavastvādyairvyadhuścārārtrikaṃ vyadhuḥ || 97 ||
[Analyze grammar]

upadāścārpayāmāsustathā pradadurāśiṣaḥ |
śrīgopālo mahīmānān bhojayāmāsa sarvaśaḥ || 98 ||
[Analyze grammar]

datvā dānāni bahūni matvopakṛtimuttamām |
sarvān visarjayāmāsa mahīmānān yayuśca te || 99 ||
[Analyze grammar]

santāraṇo dvijastatra bālakṛṣṇāya vai tadā |
kanyādvayamataṃ jñātvā kanyādvayaṃ dadau mudā || 100 ||
[Analyze grammar]

jagrāha bhagavān kanyāratnadvayaṃ śriyaḥ patiḥ |
kanyake kṛtakṛtye ca sañjāte patilābhataḥ || 101 ||
[Analyze grammar]

lomaśasyā''śrame cobhe lomaśāya harirdadau |
rakṣituṃ kanyake brahmapriyābhiḥ saha mādhavaḥ || 102 ||
[Analyze grammar]

santāraṇaḥ sapatnīkaḥ saputraḥ śrīharestadā |
pūjāṃ janmotsavaṃ kṛtvā dṛṣṭvā kṛteṣṭako'bhavat || 103 ||
[Analyze grammar]

ājñāmādāya sa vipro yayau jayantapattanam |
rādhike tanmahātīrthaṃ śubhaṃ santāraṇābhidham || 104 ||
[Analyze grammar]

abhavad yatra vai kūrmo rājate bhagavān svayam |
tīre mandiramadhye ca snānāt saṃsāratārakaḥ || 105 ||
[Analyze grammar]

paṭhanācchravaṇāccāpi pāpatāpātsa tārayet |
smaraṇādasya mokṣaḥ syāt kiṃ punaḥ sevanātprabhoḥ || 106 ||
[Analyze grammar]

iti śrīlakṣmīnārāyaṇīyasaṃhitāyāṃ dvitīye tretāsantāne'śvapaṭṭasarovare caturdaśavarṣīyabālakṛṣṇāṣṭamīprātaḥkāle jalamagnānāṃ santāraṇādiviprāṇāṃ kūrmarūpeṇoddharaṇamityādi |
nirūpaṇanāmā'ṣṭādaśādhikaśatatamo'dhyāyaḥ || 118 ||
[Analyze grammar]