Chapter 99

śrīkṛṣṇa uvāca |
śṛṇu tvaṃ rādhike paścādanādiśrīnarāyaṇaḥ |
yathoddhāraṃ kṛtavān śrīhariḥ provāca tāṃ kathām || 1 ||
[Analyze grammar]

śrīkṛṣṇanārāyaṇa uvāca |
hemaśālāyanarṣe tvaṃ kathā śṛṇu tataḥ parām |
yā'bhūnmārjārikā nārāyaṇasarastaṭe tu sā || 2 ||
[Analyze grammar]

vṛkādibhayamāpannā yayau kheṭaṃ samīpagam |
yatra vai śrīharerbhaktā vasanti paśupālakāḥ || 3 ||
[Analyze grammar]

narā nāryo vaiṣṇavāste bhajante parameśvaram |
tatra sā hyaṭati nityaṃ pratigrahaṃ kṣudhānvitā || 4 ||
[Analyze grammar]

duḥkhenā''sādya bhojyaṃ vai cauryeṇa bahuyatnataḥ |
vartate sā'thavā cauryaṃ karotyeva na ca kvacit || 5 ||
[Analyze grammar]

śunāṃ bhayāttu sā rātrau śete pulakasañcaye |
tṛṇānāṃ sañcaye cāpi gṛhapṛṣṭhasthasañcaye || 6 ||
[Analyze grammar]

yathākathañcitsamprāpyocchiṣṭaṃ vṛttiṃ karoti sā |
yatra nāstyeva mārjārajātistatreyamekalā || 7 ||
[Analyze grammar]

vinā naraṃ vasatyeva yuvatī ṛtudharmiṇī |
kāmadāhena mārjārī pīḍyate'haniṃśaṃ tadā || 8 ||
[Analyze grammar]

śāpasya kāraṇenaiva mārjāraṃ labhate na sā |
kheṭād dūratarā grāmāstatra gantuṃ na śakyate || 9 ||
[Analyze grammar]

madhye vanyapaśūnāṃ sā bhayāttatraiva tiṣṭhati |
evaṃ sā pīḍitā kāmadāhenā'ṣṭasamāvadhim || 10 ||
[Analyze grammar]

navame vatsare vṛṣṭiścātivṛṣṭirabhūdbhuvi |
tatpravāheṇa vai kaścinmārjāro dūrabhūmitaḥ || 11 ||
[Analyze grammar]

taraṃgairuhyamānaḥ saḥ sarovāriṣu cāyayau |
vṛkṣaśākhāṃ samālambya jīvan sarovarāntike || 12 ||
[Analyze grammar]

jalena vakravegena śākhayā sahitastu saḥ |
mārjāro vāhitastīraṃ śākhā tīragatā'bhavat || 13 ||
[Analyze grammar]

jale līne biḍālaḥ saḥ yayau śanaiḥ śanaistadā |
kheṭaṃ vilokya tatraiva yatra mārjārikā'sti sā || 14 ||
[Analyze grammar]

tena yogaṃ gatā sā ca sagarbhā sambabhūva ha |
kuṃbhakāragṛhe sā tu ghāsakaccaramadhyagā || 15 ||
[Analyze grammar]

sagarbhā pūrṇakālena prasūtā pañcabālakān |
nidadhe tṛṇapuñje tān tato vai cāparasthale || 16 ||
[Analyze grammar]

tataḥ sthalāntare cāpi rarakṣa nijabālakān |
athā'pakvasthale cāmapātrapuñje rarakṣa sā || 17 ||
[Analyze grammar]

kuṃbhakāreṇa saṃklṛpte pākārthaṃ vahnigartake |
āmapātreṣu bālān sā gopayitvā bahiryayau || 18 ||
[Analyze grammar]

nijabhojyasya lābhārthaṃ paścāt kubhakṛtā'nalaḥ |
dattaḥ pātraprapākārthaṃ sā dṛṣṭvā dhūmrameva tam || 19 ||
[Analyze grammar]

śīghraṃ tatra samāyātā dadarśā'gre'nalaṃ mukhe |
pṛṣṭhe'patyāni tiṣṭhanti mārgo nirgamanāya na || 20 ||
[Analyze grammar]

vahnirvṛddhiṃ gatastatra jvālāmālāsamujjvalaḥ |
sāpi śvabhayatastatra pārśve tṛṇeṣu kaccare || 21 ||
[Analyze grammar]

suguptā cā'rudaccāti bālā rudanti cānale |
bālānāṃ prāṇarakṣārthaṃ hyupāyo vidyate na vai || 22 ||
[Analyze grammar]

kuṃbhakāro na tatrāsti rodanaṃ śṛṇuyāttu kaḥ |
apatyasnehasampannā'patyarakṣaṇahetave || 23 ||
[Analyze grammar]

anādiśrīkṛṣṇanārāyaṇasvāminamasmarat |
tuṣṭāva kalpitairbhāvairnārāyaṇaṃ pareśvaram || 24 ||
[Analyze grammar]

vahniḥ pātrapragarte tu paritaścāvṛto'bhavat |
apatyāni tu pātrāṇāṃ madhye tiṣṭhanti tattale || 25 ||
[Analyze grammar]

jvalate cā'nalaścordhvaṃ tale naivā'bhiyāti ca |
mārjārikā'tibhāvenā'japat kṛṣṇa hare prabho || 26 ||
[Analyze grammar]

rakṣa me bālakān kṛṣṇa yatnena prāpitān śubhān |
nirdoṣān jñānahīnāṃśca rakṣa svāminnarāyaṇa || 27 ||
[Analyze grammar]

yadyahaṃ tvayi bhaktā'smi rakṣa me bālakān vibho |
garbhe rakṣā kṛtā yena yatpitā ca jalāntare || 28 ||
[Analyze grammar]

rakṣito yena devena sa me bālān prarakṣatu |
nārāyaṇa hare kṛṣṇa svāmin śrīman pumuttam || 29 ||
[Analyze grammar]

yenā'haṃ janitā pūrvaṃ sa me bālān prarakṣatu |
agnau jale pṛthivyāṃ cāmbare vāyau nivāsakṛt || 30 ||
[Analyze grammar]

hṛdaye cāmapātre ca garte bhrāṣṭre ca cullake |
yaḥ sadā vyāpako devaḥ sa me bālān prarakṣatu || 31 ||
[Analyze grammar]

hare kṛṣṇa hare svāmin kṛṣṇa rakṣaya bālakān |
priyān me prāṇataḥ svalpānanāthān saṃprarakṣaya || 32 ||
[Analyze grammar]

lakṣajapān kariṣye'haṃ tava tuṣṭyarthameva yat |
rakṣa me śāvakān kṛṣṇanārāyaṇa jagadguro || 33 ||
[Analyze grammar]

śaraṇāgatarakṣākṛt potakānme prarakṣaya |
ityevaṃ prārthayitrī sā kuṃbhakārāṃgaṇe sthitām || 34 ||
[Analyze grammar]

tulasīṃ prati gatvaiva neme ca daśa daṇḍavat |
pradakṣiṇāśca pañcāśaccakre matvā drume harim || 35 ||
[Analyze grammar]

kṛṣṇanārāyaṇasvāmin śrīpate kamalāpate |
rakṣa rādhāpate brahmapate muktapate prabho || 36 ||
[Analyze grammar]

pārvatīśa prabhāsvāmin haṃseśa mañjulāyate |
saguṇeśā''tmasākṣiṃstvaṃ rakṣa bālān hare mama || 37 ||
[Analyze grammar]

ātmātman karuṇāsindho lakṣmīpate jayāpate |
amṛtaprada devānāṃ rakṣa śāntāpate'cyuta || 38 ||
[Analyze grammar]

śrīpate bhūpate badrīpate līlāpate'nagha |
bhūtipate'kṣarapate śaktipate'va bālakān || 39 ||
[Analyze grammar]

golokādhipate haimīpate ca lalitāpate |
gahvarāvāsa garbhāsya rakṣa vahnipate pate || 40 ||
[Analyze grammar]

hṛṣīkeśa maheśeśa brahmapriyeśa bhīhara |
akṣarakṣetravāsā'smadbālakān rakṣa meśvara || 41 ||
[Analyze grammar]

vahnirdevo'vatu bālān śāntadāho'stu sarvaga |
bālā me tvamṛtadehā bhavantu bhavadāśraye || 42 ||
[Analyze grammar]

yatrā'nyastvāśrayo nāsti tatrāśrayo bhavān guruḥ |
tārakaśca śaraṇyaśca nātha rakṣaya bālakān || 43 ||
[Analyze grammar]

ityevaṃ cārthayamānā biḍālī tulasīṃ muhuḥ |
natvā patrāṇi cādāya vahnisthāna gatā'bhavat || 44 ||
[Analyze grammar]

patrāṇi tvarpayāmāsa vahnidehāya śārṅgiṇe |
rakṣa me bālakān agne vārdhakyaphalarūpiṇaḥ || 45 ||
[Analyze grammar]

ityuktvā ca namaskṛtya pracakāra pradakṣiṇam |
nā'nyopāyo'tra ca hareḥ smṛtiṃ vinā tu rakṣaṇe || 46 ||
[Analyze grammar]

ityevaṃ manasā vācā karmaṇā parameśvaram |
apūjayad biḍālī sā patraiḥ śrīpuruṣottamam || 47 ||
[Analyze grammar]

jepe nāma ca satataṃ tasthau bhrāṣṭrāgnisannidhau |
jīvitāśāṃ samālambya bhajamānā jagatpatim || 48 ||
[Analyze grammar]

athaivaṃ sā sthitā pārśve kaścinnāyāti mānavaḥ |
dṛśyate naiva rakṣākṛt nirāśā bhajate harim || 49 ||
[Analyze grammar]

tāvacchuśrāva bālānāṃ vākyāni bhrāṣṭrikāntarāt |
jīvitāśāvatī sā ca prasannamānasā'bhavat || 50 ||
[Analyze grammar]

vahniścoparibhāge cā'mbarīṣordhve pravardhate |
nīlaharitapiṅgābhirjvālābhiśca samantataḥ || 51 ||
[Analyze grammar]

raktacitrābhirugrābhiḥ śvetamūlābhirulbaṇaḥ |
agnirnimbhrāṣṭrake vyāpto'bhavadvai parito'bhitaḥ || 52 ||
[Analyze grammar]

antarbahistathā pārśve madhye tale'pi sarvaśaḥ |
āmapātrāṇi pakvāni vigataṃ ca divāniśam || 53 ||
[Analyze grammar]

kṣudhātṛṣāyutā sāpi mārjārī bālakānnijān |
śṛṇoti vadamānāṃśca ramataḥ kṣudhitāṃstathā || 54 ||
[Analyze grammar]

ekaḥ prāha kadā mātā prāgamiṣyati cāgraja |
kṣudhā me bādhate cāti samāhvaya ca mātaram || 55 ||
[Analyze grammar]

jyeṣṭhaḥ prāhā'nalaścāste mārgān ruddhvā samantataḥ |
kathaṃ mātā samāgacchet smara śrīparameśvaram || 56 ||
[Analyze grammar]

yena garbhe kṛtā rakṣā so'tra rakṣāṃ kariṣyati |
jīvayiṣyati bhagavān datvā bhaktyā hi bhojanam || 57 ||
[Analyze grammar]

agniṃ paśyoṣṇamatyugraṃ jvālāmālāsamedhitam |
kathaṃ mātā'tra cāgacchet smara kṛṣṇanarāyaṇam || 58 ||
[Analyze grammar]

kṛpā bhagavataścaiṣā jīvāmo yadvibhāvasau |
śītale vivare cātra rakṣaṇaṃ hariṇā kṛtam || 59 ||
[Analyze grammar]

agnirnātra samāyāti satyapīndhanasañcaye |
paśya jvālā na dahati dhūmo mūrchāṃ karoti na || 60 ||
[Analyze grammar]

ehyāgaccha bahiryāmo nirvahnisuṣirād drutam |
śīto bahnirayaṃ bhāti me na dahyati cānuja || 61 ||
[Analyze grammar]

mātaraṃ prati gacchāma ścetyuktvā niryayurdrutam |
vahnimadhyād vinirgatyā'dagdharomāṇa eva tām || 62 ||
[Analyze grammar]

mātaraṃ prayayuḥ sarve bālā bhrāṣṭrād vinirgatāḥ |
harṣavyāptāḥ kṣudhāvyāptā apiban mātṛsatpayaḥ || 63 ||
[Analyze grammar]

mātā snehaṃ pracakre ca lilehāpi punaḥ punaḥ |
mātre prāhustu te bhrāṣṭraṃ śītalaṃ rakṣaṇālayam || 64 ||
[Analyze grammar]

paya āpīya cā''pṛcchya bhrāṣṭre praviśya te punaḥ |
bhrāṣṭrikāyāstale gatvā viśaśramuḥ sukhaṃ mudā || 65 ||
[Analyze grammar]

yo'gniścā''maghaṭādīnvai pakvān karoti dāhataḥ |
yo'gniścendhanaghāsādīn dagdhā bhasma karotyapi || 66 ||
[Analyze grammar]

so'yameva biḍālyāstu bālakārthe suśītalaḥ |
tadānīṃ dāhahīno vai jātaḥ kṛṣṇakṛpāvaśāt || 67 ||
[Analyze grammar]

mārjārī cāvalokyaitat svayaṃ ca nirbhayā satī |
bhrāṣṭrītale samāgantuṃ yayau bhrāṣṭrīmukhaṃ prati || 68 ||
[Analyze grammar]

tāvad vahnistathā spraṣṭo'tyuṣṇaścātyantadāhakaḥ |
āścaryaṃ paramaṃ prāptā'smarat kṛṣṇanarāyaṇam || 69 ||
[Analyze grammar]

aho devasya māhātmyaṃ hyekameva tu vastu yat |
sukhāyaikasya bhavati duḥkhāyā'nyasya tat khalu || 70 ||
[Analyze grammar]

sarveṣāṃ dāhakartā'yaṃ pakṣe dāhakaro'bhavat |
avaśyaṃ śrīnaranārāyaṇena paramātmanā || 71 ||
[Analyze grammar]

rakṣitā bālakā me'tra rakṣyante ca punaḥ punaḥ |
idaṃ me bhaktimāhātmyaṃ bālānāṃ śaraṇāgatiḥ || 72 ||
[Analyze grammar]

yadvā tadvā bhavetpuṇyaṃ prāgbhavīyaṃ mahattaram |
yena bālā ramante me vahnimadhye yathā gṛhe || 73 ||
[Analyze grammar]

mārjārī kṛṣṇamāhātmyaṃ jñātvā pūrṇatamaṃ tadā |
bheje cātīva bhāvena śrīhariṃ parameśvaram || 74 ||
[Analyze grammar]

kṣudhātṛṣābhisantaptā kṛtvā dṛḍhaṃ ca niścayam |
mayā nā'nyatra gantavyaṃ harirdāsyati bhojanam || 75 ||
[Analyze grammar]

mahyaṃ mama ca bālebhyo rakṣakaḥ rakṣayiṣyati |
ityevaṃ manyamānā sā jajāpa auṃ hare'cyuta || 76 ||
[Analyze grammar]

kṛṣṇagovindagopālanārāyaṇanarāyaṇa |
śvāsocchvāsaṃ jajāpaivaṃ vācā ca manasā hṛdā || 77 ||
[Analyze grammar]

niṣasāda samīpe ca bhrāṣṭrikāyā hariśritā |
dinadvayaṃ gataṃ tāvannottiṣṭhati na yāti ca || 78 ||
[Analyze grammar]

kṛṣṇo nārāyaṇo devo narottamo narāyaṇaḥ |
dṛḍhaṃ ca niścayaṃ jñātvā bhaktiṃ jñātvā parātparām || 79 ||
[Analyze grammar]

śaraṇāgatarakṣākṛt kuṃbhakārasvarūpadhṛk |
bhādraśrāddhe kṛtaṃ kṣīrapākaṃ ca pūrikāstathā || 80 ||
[Analyze grammar]

kare dhṛtvā samāyāto dadau pitṛbhya eva saḥ |
ambare ca dadau kākapakṣibhyo dhenave dadau || 81 ||
[Analyze grammar]

dadau bhūtebhya evā'sau mārjāryai cāpi sandadau |
tāvat tadbālakā vahnibhrāṣṭrato bahirāyayuḥ || 82 ||
[Analyze grammar]

tebhyo dugdhaṃ śrāddhapakvamapāyayat sukhapradam |
pītvā te viviśustatra bhrāṣṭrītale sukhāvahe || 83 ||
[Analyze grammar]

evaṃ kuṃbhakṛtā tenā''hutāḥ kuṃbhakṛto'pare |
paśyantu vahnimadhye vai jīvanti hi biḍālakāḥ || 84 ||
[Analyze grammar]

ityuktvā darśayāmāsa kuṃbhakṛdbhyo hi bālakān |
bhrāṣṭryadhipālakaścāpi dadarśāścaryamāptavān || 85 ||
[Analyze grammar]

āmapātrāṇi pacyante naiva dahyanti bālakāḥ |
āścaryaṃ paramaṃ tvetat tatra prakāśatāṃ gatam || 86 ||
[Analyze grammar]

āyayurjanasaṃghāstu vīkṣituṃ bhrāṣṭrikā'rbhakān |
pupūjurvahnidevaṃ ca biḍālyai bhojanaṃ daduḥ || 87 ||
[Analyze grammar]

arbhakebhyo dadurdugdhaṃ bālāścāgatya te bahiḥ |
pītvā prayānti bhrāṣṭryāṃ te suṣireṇa punaḥ punaḥ || 88 ||
[Analyze grammar]

evaṃ vilokya lokāste niścikyurharirakṣitāḥ |
jīvantyete na duhyanti dīnarakṣākaro hi saḥ || 89 ||
[Analyze grammar]

athā'dhipaḥ kuṃbhasraṣṭā vahniśāntyuttaraṃ svayam |
dūrīcakāra bhasmādi kuṃbhān pātrāṇi sarvaśaḥ || 90 ||
[Analyze grammar]

talaṃ riktaṃ cakārā'pi yatra bālā vyavasthitāḥ |
tatra śrībhagavatpādacihne saṃdṛṣṭavān hi saḥ || 91 ||
[Analyze grammar]

kuṃbhakāraścakārā'tra bhagavatpādavedikām |
tīrthaṃ mārjārarakṣākhyaṃ prasiddhaṃ tvabhavaddhi tat || 92 ||
[Analyze grammar]

bālakā rakṣitā yena nārāyaṇena yoginā |
so'pi tatraiva sarveṣu madhye tadā virājate || 93 ||
[Analyze grammar]

kuṃbhakārasvarūpeṇa nānye vidanti taṃ prabhum |
athā'yaṃ bhagavān badrīnārāyaṇaḥ svayaṃ tadā || 94 ||
[Analyze grammar]

kṛpayā darśayāmāsa rūpaṃ nijaṃ caturbhujam |
kuṃbhakārā hariṃ dṛṣṭvā pupūjuḥ śraddhayā'nvitāḥ || 95 ||
[Analyze grammar]

mārjārikā dadarśainaṃ śrīmannārāyaṇaṃ harim |
drāgeva smaraṇaṃ prāptāḥ sanatsujātarūpiṇaḥ || 96 ||
[Analyze grammar]

śokaṃ cakāra vividhaṃ biḍālīprasavādijam |
kvā'haṃ sanatsujāto'smi kvā'haṃ biḍālatāṃ gataḥ || 97 ||
[Analyze grammar]

adya nārāyaṇaḥ sākṣācchāpanāśārthamāgataḥ |
ityevaṃ tvāptavairāgyo neme nārāyaṇaṃ harim || 98 ||
[Analyze grammar]

nārāyaṇo'pi tāṃ tiryagdehād vivṛtya satvaram |
sanatkumārarūpaṃ ca dadau brahmasutātmakam || 99 ||
[Analyze grammar]

arbhakāḥ kuṃbhakāraiśca rakṣitā vardhitāstathā |
tadvaśāste vanīyā vai mārjārā abhavaṃstataḥ || 100 ||
[Analyze grammar]

atha nārāyaṇo devastathā sanatsujātakaḥ |
yayatuśca saraḥ snātuṃ kuṃbhakārā yayustataḥ || 101 ||
[Analyze grammar]

tadā devaiḥ puṣpavṛṣṭirmuktā vyomnā sarovare |
nārāyaṇena vai sākṣād yatra snātaṃ tataḥ suraiḥ || 102 ||
[Analyze grammar]

nārāyaṇasaraśceti tīrthaṃ prakhyāpitaṃ śubham |
rakṣākṛnmuktikṛccāpi nārāyaṇasya dāyakam || 103 ||
[Analyze grammar]

sanatsujātasahitaḥ snātvā nārāyaṇaḥ prabhuḥ |
yayau śrībadarīṃ haimaśaile viśālikāṃ nijām || 104 ||
[Analyze grammar]

ṛṣiḥ sanatsujātaśca snātvā tripathagājale |
natvā nārāyaṇaṃ satyalokaṃ yayau kṣaṇāttataḥ || 105 ||
[Analyze grammar]

grāmo mārjārapurasaṃjñako'bhavat prajākṛtaḥ |
ityevaṃ śrīkṛṣṇanārāyaṇo hemāyanarṣaye || 106 ||
[Analyze grammar]

mārjāraputrarakṣāyāḥ kathāmakathayattathā |
virarāma kṣaṇaṃ rādhe prāpurharṣaṃ mahattaram || 107 ||
[Analyze grammar]

iti śrīlakṣmīnārāyaṇīyasaṃhitāyāṃ dvitīye tretāsantāne mārjārikā'patyānāṃ kuṃbhakāramahābhrāṣṭrīvahnito nārāyaṇakṛtarakṣaṇaṃ mārjārikāyāḥ śāpamokṣaṇaṃ cetyādinirūpaṇa |
nāmā navanavatitamo'dhyāyaḥ || 99 ||
[Analyze grammar]