Chapter 57

śrīrādhikovāca |
ārabīje gato yastu yamarājaḥ pratāpavān |
kiṃ cakāra tatastatra kathāṃ kathaya keśava || 1 ||
[Analyze grammar]

śrīkṛṣṇa uvāca |
ārabīje yamarājo gatvā vyanādayanmuhuḥ |
bherīṃ raṇakṛtotsāhāṃ vādyāni vividhāni ca || 2 ||
[Analyze grammar]

raṇatūryāṇi ca dūtā vyanādayanmuhurmuhuḥ |
śabdāste dhvanayo vyomni rodasyubhe samāpṛtāḥ || 3 ||
[Analyze grammar]

vyomamārgeṇa yamarāṭ ninādayan diśo muhuḥ |
ājuhāvā'surān deśe'raṇye'drau saṃsthitāṃstadā || 4 ||
[Analyze grammar]

te ca śrutvā'valokyā'pi saśastrāścaryasaṃbhṛtāḥ |
niryayurdaśasāhasrā raktabījo'graṇīstathā || 5 ||
[Analyze grammar]

vyomagā jalagāḥ kecit kecidvimānayāyinaḥ |
kecittu kukkuṭārohāḥ kecitkuñjaravāhanāḥ || 6 ||
[Analyze grammar]

kecittu gardabhārohāḥ keciduṣṭrakṛtā''sanāḥ |
kecidgavayapṛṣṭhasthāḥ kecinmeṣavṛṣāsanāḥ || 7 ||
[Analyze grammar]

kecit khaccaravāhāśca kecidghoṭakavāhanāḥ |
ajapṛṣṭhe sthitāścā'nye mayūrapṛṣṭhasaṃsthitāḥ || 8 ||
[Analyze grammar]

kecinmahiṣavāhāśca kecid genḍakapṛṣṭhagāḥ |
anye ca makarārohā gomāyūrathasaṃsthitāḥ || 9 ||
[Analyze grammar]

vṛkavāhāstathā cā'nye sūkarārohiṇaḥ pare |
gṛdhragarjanapṛṣṭhasthāstathā'nye vāhavarjitāḥ || 10 ||
[Analyze grammar]

sagadāḥ sakṛpāṇāśca sadhanuṣkāḥ sasāyakāḥ |
samudgaraparighāśca sāsikhaḍgāḥ saśaktikāḥ || 11 ||
[Analyze grammar]

satomarāḥ savarmāṇaḥ saśūlāḥ golakā'nvitāḥ |
sadhūṣkṛtītūpayantrāḥ sakuntāḥ pāśavedinaḥ || 12 ||
[Analyze grammar]

sayaṣṭikāḥ sānalāśca vidyattāraprajālinaḥ |
māyāpāśadharāścāpi kṣepaṇādisamanvitāḥ || 13 ||
[Analyze grammar]

śarajālayutāścānye dhanurdharā mahābhaṭāḥ |
niryayuḥ raṇaśabdān vai śrutvā daityāḥ samantataḥ || 14 ||
[Analyze grammar]

apaśyad dānavān sajjān yuddhagān yamarāṭ svayam |
athā''juhāva ca punaryamarājo'bhidhānakaiḥ || 15 ||
[Analyze grammar]

bho rakta bho ārabīja bho marka bho madānaka |
bho asīraka bho pegan bho adīna parīmaka || 16 ||
[Analyze grammar]

bho heḍemṛtyo viharina bho hasan vaśarāsura |
bho irāka damā tuṣka līlābīja trirāśika || 17 ||
[Analyze grammar]

yuddhaṃ kuruta vā yāta pātālaṃ tu nijālayam |
kathaṃ dattha mahākaṣṭaṃ bakadānarṣisādhave || 18 ||
[Analyze grammar]

phalaṃ dadāmi tūrṇaṃ vo yadīto na prayāsyatha |
ityuktāste mahāgarvā mahābalaparākramāḥ || 19 ||
[Analyze grammar]

madyamāṃsāśanā duṣṭā matsyakukkuṭabhakṣiṇaḥ |
vadantaḥ kaṭuśabdāṃśca kirantaśca śarotkarān || 20 ||
[Analyze grammar]

sarve cāyayuravyagrā yamadūtopamāḥ khalāḥ |
tānāgatān bāṇajālairyānastho'dbhutavikramaḥ || 21 ||
[Analyze grammar]

yamaḥ saṃchādayāmāsa svadūtaiḥ saha rādhike |
evaṃ bāṇairavacchādya sarvāstān dānavān yamaḥ || 22 ||
[Analyze grammar]

pākāsurān jaghānāpi tīkṣgāgrairmārgaṇairyamaḥ |
tathā'nyān dīnanāmnaśca daityān jaghāna sarvaśaḥ || 23 ||
[Analyze grammar]

daityā api mahāśūrā vijaghnuryamapārṣadān |
nārācaistomarairvidyudyantraiḥ śaktyādibhistadā || 24 ||
[Analyze grammar]

ṛṣṭibhirbhindipālaiśca parighaiśca gadādibhiḥ |
golakaiḥ parvataiścāpi vṛkṣaiḥ śṛṃgaiḥ śilādibhiḥ || 25 ||
[Analyze grammar]

hastibhirghoṭakaiścāpi nijaghnuryamakiṃkarān |
dūtāḥ śailasamā daityān jaghnuścātyati jīvataḥ || 26 ||
[Analyze grammar]

raktabījo jaghānorau gadayā tvativegataḥ |
śṛṃgavantaṃ yamadūtaṃ vyanadacca punaḥ punaḥ || 27 ||
[Analyze grammar]

dūto'pi tāṃ gadāṃ dhṛtvā raktabījaṃ ca mastake |
jaghāna cātivegena daityo mūrchāmavāpa ha || 28 ||
[Analyze grammar]

dvitīyāṃ ca gadāṃ dhṛtvā bahubhārāṃ yamānugaḥ |
āvidhya cāmbare gurvī mumoca raktabījake || 29 ||
[Analyze grammar]

tāvadvai raktakastāmāyāntīṃ saṃgṛhya cāmbare |
śṛṃgavantaṃ prati śīghraṃ mumoca līlayā yathā || 30 ||
[Analyze grammar]

dūto dhṛtvā gadāṃ naijāṃ śatabāṇairhi raktakam |
bhedayāmāsa bahudhā kṣurapraiśca śilīmukhaiḥ || 31 ||
[Analyze grammar]

śuśubhe raktakastatra palāśaḥ puṣpavān yathā |
raktabījastu tāvadvai samutthāya nijāyudham || 32 ||
[Analyze grammar]

śaktiṃ śatapraghaṇṭāṃ ca prāhiṇot śṛṃgakaṃ yamam |
śailapādo yamaḥ śaktimutplutya drutamambare || 33 ||
[Analyze grammar]

haste dhṛtvā mumocaiva raktabījasya vakṣasi |
śṛṃgavāṃśca gadāṃ tasya mumoconmathya mastake || 34 ||
[Analyze grammar]

yugapattvāgate roddhuṃ samartho nā'bhavad yataḥ |
śakteḥ rarakṣa cātmānaṃ tāvad gadā mahattamā || 35 ||
[Analyze grammar]

śailasamā brahmarandhre papātā'tīva vegataḥ |
dvedhā'bhavat kaṭāhaṃ ca śirasaḥ so'patadbhuvi || 36 ||
[Analyze grammar]

daityā ninyurhi taṃ dūraṃ raktabījaṃ mahābalam |
ārabījastadā śaktiṃ mumoca śailapādake || 37 ||
[Analyze grammar]

vahnibhāṃ śataghaṇṭāṃ ca svarṇapaṭṭābhibhūṣitām |
śṛṃgavān tāṃ parigṛhya gadāṃ mumoca āyasīm || 38 ||
[Analyze grammar]

śailapādo mahāśaktiṃ mumoca vegatastathā |
gadayā tāḍito mūrdhni śaktyā bhinnastathorasi || 39 ||
[Analyze grammar]

ārabījo mamārā'tra vyasuḥ krandan kṣaṇāntare |
atha markastathā madānakaścetyubhayā'surau || 40 ||
[Analyze grammar]

śṛṃgasyāpi vināśāya dudruvatuśca raṃhasā |
tadā dūtaḥ śailapādaścārkahanustadāvubhau || 41 ||
[Analyze grammar]

dudruvaturgade dhṛtvā vyanādayatāṃ rodasī |
sānnidhye ca gadāyuddhaṃ prāvartata parasparam || 42 ||
[Analyze grammar]

brahmāṇḍakṣayakārāśca ghātaśabdāstadā'bhavan |
candrakarṇo'pi dūtastaṃ madānakamamārayat || 43 ||
[Analyze grammar]

arkahanustadā markaṃ daityaṃ śaktyā vyapothayat |
śailapādaśca nārācairandhracandraiḥ śilīmukhaiḥ || 44 ||
[Analyze grammar]

kṣurapraiścātitīkṣṇaiśca śarairbibheda dānavān |
markahastau skandhabhāgāccicched bahulīlayā || 45 ||
[Analyze grammar]

madānakasya ca pādau ciccheda sakthimūlataḥ |
karapādān vinā jāto markamadānakāvubhau || 46 ||
[Analyze grammar]

tau parityajya ca tadā jayaśabdān jaguryamāḥ |
asīrako mahādaityo badhīrakeṇa yāminā || 47 ||
[Analyze grammar]

pegan daityaścāgnimālābhidhena tu yamena ca |
yuyudhāte hi nārācaiḥ vavṛṣatuḥ śarān bahūn || 48 ||
[Analyze grammar]

ākāśaṃ chāditaṃ bāṇaistadā nārācavṛṣṭibhiḥ |
daityānāṃ dhanurāmuktaiḥ sahasrāyutakoṭibhiḥ || 49 ||
[Analyze grammar]

agnimālo badhīraśca dūtau vyomacarau tadā |
vahnimutpādya bāṇaughān jvālayāmāsaturdrutam || 50 ||
[Analyze grammar]

badhīrako mahāśailo'bhavadvai pañcayojanaḥ |
papātāsīrake peganyapi tau cūrṇito mṛtau || 51 ||
[Analyze grammar]

adīnāsurakastatra dhṛtvā tomaramujjvalam |
vikaṭāsyaṃ yamaṃ vegājjaghānorasi dūrataḥ || 52 ||
[Analyze grammar]

parīmako'suraścāpi nāḍīghātaṃ yamaṃ tadā |
madgalenā'bhisampadya tāḍayāmāsa nirbhayaḥ || 53 ||
[Analyze grammar]

heḍemṛtyuḥ kāladaṃṣṭraṃ yamaṃ tatāḍa vai balāt |
parighena mahāśailaśṛṃganibhena corasi || 54 ||
[Analyze grammar]

ākāśe uḍḍayāmāsustrayaste tu mahāsurāḥ |
vegenoḍḍīya ca dūtān mārayāmāsurulbaṇāḥ || 55 ||
[Analyze grammar]

tadā tvete trayo dūtāstathā'nye ṣaṭ mahābalāḥ |
militā nava cākāśe jaghnustryasurakān śaraiḥ || 56 ||
[Analyze grammar]

gadābhirmudgaraiścāpi mahādaṇḍaiśca parvataiḥ |
nipetuste trayo bhagnaśirogrīvoruvakṣasaḥ || 57 ||
[Analyze grammar]

vyasavaḥ samajāyanta dūtāstatrā'nadaṃstadā |
atha daityo vihārī ca hasā ca vaśarāsuraḥ || 58 ||
[Analyze grammar]

militvā te trayo jaghnurlambanāsaṃ yamaṃ tadā |
sahāyā rodanaścāpi narmakaścādrimālakaḥ || 59 ||
[Analyze grammar]

gadāḥ śaktīstathā ṛṣṭīrdhṛtvotpetustadāmbare |
daityān trīn pothayāmāsurnipatyotpatya mārataḥ || 60 ||
[Analyze grammar]

lambanāso yamaḥ pāśairvihāriṇaṃ babandha ha |
gadayā mārayāmāsa vyasuṃ kṣaṇāttadā'karot || 61 ||
[Analyze grammar]

rodano gadayā mūrdhni tatāḍa vaśarāsuram |
triśūlaṃ mārayāmāsa vakṣasyeva balādati || 62 ||
[Analyze grammar]

protaṃ pṛṣṭhe jagāmedaṃ vaśaro'pi mṛto'bhavat |
hasānaṃ narmakaścāpi dūto mamāra bhallakaiḥ || 63 ||
[Analyze grammar]

hasā kaṇṭhe vibhinnaśca pādo kṣiptvā mamāra ha |
ilākasya tato yuddhaṃ cā'drimālayamena ca || 64 ||
[Analyze grammar]

damanasya mahāyuddhaṃ mohapāśayamena tu |
tuṣkadaityasyāpi yuddhaṃ kālakarṇayamena vai || 65 ||
[Analyze grammar]

līlābījasya daityasya mardahastayamena ca |
bahubhirhetibhiścāsīd bhayānakaṃ ca nirdayam || 66 ||
[Analyze grammar]

daityāstaṃ muśalairjadhnuryamān yamāśca mudgaraiḥ |
muśalā mudgarā bhagnā vajralepanibheṣu vai || 67 ||
[Analyze grammar]

tataste gadayā vyomni yodhayāmāsurulbaṇāḥ |
cūrṇībhūtā gadāstatra gadābhireva tatra ca || 68 ||
[Analyze grammar]

atha śaktīḥ samādāya nijaghnuste mahāruṣā |
anyonyaśaktīrāgṛhya bhaṃktvā cikṣipurambare || 69 ||
[Analyze grammar]

atha parvataśṛṃgaiśca nijaghnurdānavāstadā |
yamā vajraiḥ śailaśṛṃgāṇyadārayaṃśca līlayā || 70 ||
[Analyze grammar]

atha bāṇaiśca bhallaiśca triśūlairbahuvegibhiḥ |
nijaghnurmāraṇārthāste parasparaṃ ghṛṇāṃ vinā || 71 ||
[Analyze grammar]

dhṛtvā saṃgṛhya hetīṃśca bhaṃktvā bhaṃktvā parasparam |
cikṣipurbhūtale sarve bāṇairbāṇāṃśca cicchiduḥ || 72 ||
[Analyze grammar]

atha śastrāṇi santyajya mūḍhamārairamārayan |
muṣṭāmuṣṭi nijaghnuśca kaṇṭhākaṇṭhi hyamardayan || 73 ||
[Analyze grammar]

pādāpādi tathā keśākeśi yuddhamabhūttadā |
adrimālayamaḥ pṛthvyāmilākaṃ saṃnipātya ca || 74 ||
[Analyze grammar]

mohapāśo damanaṃ cāsuraṃ nipātya vai bhuvi |
kālakarṇastuṣkadaityaṃ nipātya bhuvi cāmbarāt || 75 ||
[Analyze grammar]

mardahasto'pi ca līlābījaṃ nipātya bhūtale |
vāyutulyabalairdaityān niṣpīḍyorassu jānubhiḥ || 76 ||
[Analyze grammar]

vakṣo'sthnāṃ te pracakruśca cūrṇāni kaṇaśastadā |
ākruśyā''kruśya ca prāṇāṃstatyajuḥ raṇadurmadāḥ || 77 ||
[Analyze grammar]

yatra niṣpīḍitā dūtaiḥ pṛthvyāṃ tatrā'bhavan bharaiḥ |
gartā yojanavistārā yāmyaghātairmuhurmuhuḥ || 78 ||
[Analyze grammar]

nadā raktapravāhāśca jalaṃ raktaṃ tadā'bhavat |
śailābhadaityadehānāṃ rudhirairbhūstadā'ruṇā || 79 ||
[Analyze grammar]

samajāyata raktābhā rādhike hi raṇāṃgaṇe |
athā'nye daityavaryāśca pāko dīnastrirāśikaḥ || 80 ||
[Analyze grammar]

alīthakaḥ śirodhāśca piṇḍitāyaśca vāyujaḥ |
trithuko baṃsuraścordhvamīnaśceti tadagragāḥ || 81 ||
[Analyze grammar]

yuyudhuśca yamaiḥ sārdhaṃ bindumālādibhistadā |
garvagaṃjo yamastaṃ tu bindumālo vibhūtikaḥ || 82 ||
[Analyze grammar]

gaḍeḍaḥ khañjanaścāpi haḍeḍo bhaṣakānanaḥ |
śārdūlo dhaḍaghātaśca kaṭakaṭo dahanāśanaḥ || 83 ||
[Analyze grammar]

ityevamādyāḥ saṃjaghnurdaityān dāruṇagarvakān |
uddhatyoddhṛtya ca pṛthvyāṃ tāḍayāmāsurīśvarāḥ || 84 ||
[Analyze grammar]

bhedayāmāsurevaitānāsurān sakthimadhyataḥ |
pāṭayāmāsurevaitān dvedhā nitambamadhyataḥ || 85 ||
[Analyze grammar]

mṛtāste ye hastagatā yamānāṃ sarva eva ha |
anye dūrād vaidiśāsyā dudruvurjīvanārthakāḥ || 86 ||
[Analyze grammar]

daityasainyamabhūd raṃkaṃ hatotsāhaṃ vināyakam |
khaṇḍitaṃ chinnabhinnaṃ ca jitaprāyaṃ samantataḥ || 87 ||
[Analyze grammar]

tadā dadhmuryamadūtāḥ śaṃkhān bherīn bigūlakān |
vijayena tu sarve te vītaklamāḥ sukhānanāḥ || 88 ||
[Analyze grammar]

nṛtyantaśca hasantaśca hāsayanto'bhavan sukhāḥ |
raktabījo vilokyaivaṃ vijayaṃ yāmyabhāgagam || 89 ||
[Analyze grammar]

parājayaṃ nijaṃ vīkṣya vrīḍānamro'bhavat kṣaṇam |
atha sainyaṃ dhāvamānaṃ rurodha raṇavādyakaiḥ || 90 ||
[Analyze grammar]

raṇasaṃketaśabdaiśca vārayāmāsa sainyapān |
svayaṃ gajaṃ samāruhya yuddhārthaṃ cā'grago'bhavat || 91 ||
[Analyze grammar]

tāvat sainyaṃ sainyapāścāpyabhyadhāvan suroṣiṇaḥ |
yamarājaṃ cāmbare te vimānasyā'bhitaḥ kṣaṇāt || 92 ||
[Analyze grammar]

parivavrurvināśārthaṃ jagṛhuryamarājakam |
yathā pataṅgakoṭyaśca śukakoṭyaśca pañjaram || 93 ||
[Analyze grammar]

tathā dānavayūthāni dadhruryameśvaraṃ kṣaṇāt |
vimānaṃ dṛśyate naiva daityābbhrācchāditaṃ tadā || 94 ||
[Analyze grammar]

yamarājaḥ svayaṃ krodhāt kāladaṇḍaṃ mumoca ha |
daṇḍād daṇḍā vyajāyanta śataśo'tha sahasraśaḥ || 95 ||
[Analyze grammar]

yaṃ daityaṃ spṛśati drāk ca daṇḍayogāt sa naśyati |
bhasma bhavati tatraiva nā'sthi cāpyavaśiṣyate || 96 ||
[Analyze grammar]

evaṃ vai bahusāhasrā hatā daityāstadā'mbare |
yamadaṇḍena saṃdagdhā yayuryāmyagṛhāṇi te || 97 ||
[Analyze grammar]

ye jijīviṣavaste tu dṛṣṭvā nāśaṃ kṣaṇāntare |
dudruvuśca yayuḥ sarve tyaktvā pātālameva ca || 98 ||
[Analyze grammar]

putrapautrān sutān patnīḥ paśūn pakṣiṇa ityapi |
naijāṃ susampadaṃ yogyāṃ nītvā pātālamāviśan || 99 ||
[Analyze grammar]

raktabījo mṛtaścāpi punaḥ kālāntare hi saḥ |
dhundhurnāmnā mahādaityo bhaviṣyatīti rādhike || 100 ||
[Analyze grammar]

anye daityāstatsahāyā bhaviṣyanti yugāntare |
atharṣirbakadānaśca jñātvā cāsuranāśanam || 101 ||
[Analyze grammar]

jalādbahirvinirgatya dharmarājaṃ samāgamat |
satkāraṃ tvakaroccāpi praśaṃsāmakarottathā || 102 ||
[Analyze grammar]

rakṣārthaṃ tvarthayad dūtaṃ dharmarājo dadau yadā |
aravaṃ nāma dūtaṃ svaṃ dadau dūtīṃ tathā'ravīm || 103 ||
[Analyze grammar]

śatadāsān śatadāsīrdadau rakṣārthameva ca |
bakadānāśrame te ca tāśca vāsaṃ samādadhuḥ || 104 ||
[Analyze grammar]

āravā nāma putrāśca yuge'yutāstato'bhavan |
ayutāśca tataḥ putryo'bhavan dūtīprasaṃgajāḥ || 105 ||
[Analyze grammar]

teṣāṃ tāsāṃ prajāstatrā'bhavan koṭyadhikāstataḥ |
evaṃ vai rādhike tatra yamo vināśya dānavān || 106 ||
[Analyze grammar]

rājyaṃ datvā svadūtāya muneḥ rakṣāṃ vidhāya ca |
yayau vimānamāruhya cāśvapaṭṭasarovaram || 107 ||
[Analyze grammar]

yamarājo dvitīyena svarūpeṇa bhaṭaiḥ saha |
vaiṣṇavairvaiṣṇavo bhūtvā nyavasat kṛṣṇasannidhau || 108 ||
[Analyze grammar]

aśvapaṭṭasarasyeva snātvā saṃsnāpya kiṃkarān |
mahāprāsādamākṛtvā tīrthāvāsaṃ cakāra saḥ || 109 ||
[Analyze grammar]

rudro rudragaṇaiḥ sākaṃ nāradaḥ sanatā saha |
svasvā''vāsān pracakruste kṛṣṇanārāyaṇājñayā || 110 ||
[Analyze grammar]

dvāsaptatisahasrakanyakāḥ snātā harergṛhe |
natvā śrīkambharālakṣmīṃ satkṛtā bhojitāstataḥ || 111 ||
[Analyze grammar]

kāntājñayā lomaśasyāśrame tasthurnirantaram |
vimānaṃ sarvadā cāste yautakānvitameva ca || 112 ||
[Analyze grammar]

śrīmadgopālakṛṣṇasyodyāne divyaṃ divaṃ yathā |
kanyāstāḥ pūrvakāmāśca jātā dṛṣṭvā harergṛham || 113 ||
[Analyze grammar]

yasya koṇe vimānaṃ tat parilīyeta tādṛśam |
paṭhanācchravaṇādetaccaritraṃ puṇyavān bhavet || 114 ||
[Analyze grammar]

vighnanāśo bhavettasya mālinyaṃ parinaśyati |
dharmarājasya dūtebhyo bhayaṃ tasya na vidyate || 115 ||
[Analyze grammar]

iti śrīlakṣmīnārāyaṇīyasaṃhitāyāṃ dvitīye tretāsantāne yamarājadvārā raktabījādidaśasāhasradaityānāṃ vināśaḥ aravākhyadūtāya rājyadānaṃ bakadānaṛṣirakṣā |
āravavaṃśodbhavaścetyādinirūpaṇanāmā saptapañcāśattamo'dhyāyaḥ || 57 ||
[Analyze grammar]