Chapter 40

śrīkṛṣṇa uvāca |
śṛṇu tvaṃ rādhike tatra cāśvapaṭṭasarovare |
bālakṛṣṇaṃ prapūjyaiva nivāsaṃ prabhusannidhau || 1 ||
[Analyze grammar]

pracakruḥ sarasastīre paścime setukocchraye |
dattātreyaṃ paraṃ tīrthaṃ tathā vārāhatīrthakam || 2 ||
[Analyze grammar]

kūrmatīrthaṃ matsyatīrthaṃ kapilaṃ tīrthamityapi |
haritīrthaṃ pṛthutīrthaṃ vāsudevābhidhaṃ tathā || 3 ||
[Analyze grammar]

haṃsatīrthaṃ dattātreyatīrthaṃ nṛsiṃhatīrthakam |
tīrthamṛṣabhasaṃjñaṃ ca yogeśvarākhyatīrthakam || 4 ||
[Analyze grammar]

tīrthaṃ ca vāmanaṃ parśurāmatīrthaṃ śubhaṃ tataḥ |
yajñatīrthaṃ rāmatīrthaṃ tīrthaṃ hayaśiro'bhidham || 5 ||
[Analyze grammar]

sanatkumāratīrthaṃ ca tīrthaṃ nāradasaṃjñakam |
vyāsatīrthaṃ kṛṣṇatīrthaṃ buddhatīrthaṃ tathā param || 6 ||
[Analyze grammar]

tīrthaṃ nārāyaṇaṃ viṣṇutīrthaṃ śrīpuruṣottamam |
mahāviṣṇukṛtaṃ tīrthaṃ naranārāyaṇābhidham || 7 ||
[Analyze grammar]

ardhanārīśvaratīrthaṃ lakṣmītīrthaṃ paraṃ śubham |
rādhike ca tvayā sākaṃ snātaṃ yatra mayā ca tat || 8 ||
[Analyze grammar]

rādhātīrthaṃ kṛṣṇatīrthaṃ cāśvapaṭṭasarovare |
pāpatāpakṣayakaraṃ mokṣadaṃ dhāmavāsadam || 9 ||
[Analyze grammar]

evametāni tīrthāni jātāni tatra rādhike |
atha ṣaṣṭhe mārgamāse mahākālavanasthitāḥ || 10 ||
[Analyze grammar]

ṛṣayastvāyayuścā'śvapaṭṭakṣetre hi tairthikāḥ |
samīraṇaḥ pavamānaḥ santāraṇaśca barburaḥ || 11 ||
[Analyze grammar]

voḍhuśca ghanabhedaśca dyuviśrāmaśca paṅkilaḥ |
nīlakarṇastathā'larkaḥ puṇḍarīkaḥ kalāyanaḥ || 12 ||
[Analyze grammar]

vītihotraśca camasaḥ parṇakutso'śvapāṭalaḥ |
bhāllaveyaścorjavrataścāśvalāyana ityapi || 13 ||
[Analyze grammar]

pārṣṇiradaḥ sumantuśca hyaśokākṣo'bhayā'kṣakaḥ |
brahāstambaḥ kūpyavālaścetanabrahma ityapi || 14 ||
[Analyze grammar]

devyaḥ śrīḥ kamalā pṛthvī rāṇikā'maraputrikā |
dhanyeśvarī satīśā ca devānikī ca kṛṣṇikā || 15 ||
[Analyze grammar]

pampā nārāyaṇī gaṅgā yamunā gaṇḍakī kuśā |
sarasvatī hiraṇyā ca svarṇarekhā ca gomatī || 16 ||
[Analyze grammar]

gautamī vallayo vṛkṣāstattvānyapyāyayustadā |
mārgamāse site pakṣe dvitīyāyāṃ samāhitāḥ || 17 ||
[Analyze grammar]

aśvapaṭṭasaraḥsnānaṃ cakruḥ prātaśca devatāḥ |
anādiśrīkṛṣṇanārāyaṇaṃ nemurgṛhaṃ gatāḥ || 18 ||
[Analyze grammar]

lomaṣarṣiṃ tato nemurnemustebhyo'pi kanyakāḥ |
sakṛtā bhojitāḥ sarve vanditāḥ pūjitāstathā || 19 ||
[Analyze grammar]

aśvapaṭṭasarastīraṃ paścimaṃ kundaśobhitam |
kuñjanikuñjarahitaṃ viśālasthalagauravam || 20 ||
[Analyze grammar]

pārijātavanāḍhyaṃ ca sugandhidrumamañjulam |
yayurmadhyāhnakāle te nityakarmaparāyaṇāḥ || 21 ||
[Analyze grammar]

tatra gundrakadāḍīmatintiḍīdrumaśobhite |
chāyite bhūtale ramye bālakṛṣṇālayāntike || 22 ||
[Analyze grammar]

viśrāmaṃ paramaṃ cakruḥ sāyaṃ kathāmavācayat |
lakṣmīnārāyaṇasaṃhitāyā ūrjavrato muniḥ || 23 ||
[Analyze grammar]

mārkaṇḍeyaḥ kālajitaḥ pañcaśikhaśca lomaśaḥ |
āsurirjamadagniśca hanumān jāmbavāṃstathā || 24 ||
[Analyze grammar]

vibhīṣaṇaśca vyāsaśca prahlādaśca baliḥ ṛbhuḥ |
gālavaśca kṛpaścā'nye śatakalpāyuṣaśca ye || 25 ||
[Analyze grammar]

saptakalpajīvanāścā'yutakalpaprajīvanāḥ |
kathāśravaṇamūrdhanyā niṣeduḥ sadasi sthitāḥ || 26 ||
[Analyze grammar]

kambharānandanastatra pitṛbhyāṃ sahitaḥ prabhuḥ |
madhyāsane brahmavidbhirniveśito virājate || 27 ||
[Analyze grammar]

devāḥ surāḥ sagandharvāḥ savidyādharamānavāḥ |
devīsamūhasahitāḥ śṛṇvanti sma kathāṃ śubhām || 28 ||
[Analyze grammar]

ūrjavrato maharṣiśca lakṣakalpāyurīśvaraḥ |
prapyakṣasya harerādyaṃ maṃgalaṃ prajagāda ha || 29 ||
[Analyze grammar]

nāsīdakṣaramekalaṃ nahi gavāṃ dhāmā'pi cā''sīd yadā vaikuṇṭhaṃ ca yadā'pi nāmṛtapadaṃ dhāmā'pi nā'bhūd yadā |
jīveśādikasarjanaṃ ca tu yadā nāsīttadāsīcca yaḥ so'nādirharikṛṣṇabālasurūpo me stānnamo bhūmikā || 30 ||
[Analyze grammar]

yo naije paradhāmni muktapuruṣaiścānyeṣutacchaktibhi |
mūrtairgrāhyaguṇairvibhūtibhirajaiḥ saṃsevyate cārthibhiḥ |
yo dvedhā'bhirato'pi caikala iha prālokyate bālava |
cchrīmatkṛṣṇanarāyaṇo'stu mama vākprasthānabhūmiḥ prabhuḥ || 31 ||
[Analyze grammar]

yadiha ṛṣikathāyāṃ vartate tvantarātmā |
manutanujanibho'yaṃ bālakaḥ kaṃbharāyāḥ |
akalakalavilāso viśvabhārodaro'yaṃ |
saphalayatu janān gopālakṛṣṇālayasthaḥ || 32 ||
[Analyze grammar]

sa jayatu bhuvi ramyā kuṃkumī vāpikeyaṃ |
jagadaghaharamagryaṃ cāśvapaṭṭaṃ saraśca |
vijayatu munimānyo lomaśaḥ sādhuvaryaḥ |
pravijayatu ca lakṣmīsaṃhitā mokṣadātrī || 33 ||
[Analyze grammar]

ādau madhye cāvasāne'nādikṛṣṇanarāyaṇaḥ |
gīyate'tra parabrahma so'yaṃ tanotu maṅgalam || 34 ||
[Analyze grammar]

jyeṣṭho bhrātā ca bhagavān santuṣṭā ca svasā satī |
śuko bhrātā tato vijño'nujaḥ śrīvallabhastathā || 35 ||
[Analyze grammar]

mātā ca kaṃbharālakṣmīḥ pitā gopālakṛṣṇakaḥ |
śataṃ dvādaśa kāntāśca vijayantu sabālakāḥ || 36 ||
[Analyze grammar]

svayaṃprakāśaḥ śiṣyaśca mūrdhanyaḥ śiṣyamaṇḍale |
koṭiśiṣyagaṇāścānye koṭyarbudā'bjayoṣitaḥ || 37 ||
[Analyze grammar]

lomaśo gurumukhyaśca ṛṣayo'nye hariṃvidaḥ |
namasyāmo brahmavaṃśyā jaṃgamāstairthikārcitāḥ || 38 ||
[Analyze grammar]

aparokṣaḥ parokṣo'yaṃ bālo'bālabṛhatparaḥ |
karotu śreya iṣṭaṃ naḥ śrīhariḥ puruṣottamaḥ || 39 ||
[Analyze grammar]

lakṣmīśo māṇikīśaśca pārvatīśaḥ prabhāpatiḥ |
śrīrādhārukmiṇīkāntaḥ karotu maṃgalaṃ sadā || 40 ||
[Analyze grammar]

jānantu ṛṣayaścainaṃ parameśaṃ parātparam |
anādinidhanaṃ kṛṣṇaṃ svāminaṃ parameśvaram || 41 ||
[Analyze grammar]

anena hi purā vedā uddhṛtāḥ sāgarāttathā |
uddhṛtā pṛthivī devī dantāgreṇa purā tathā || 42 ||
[Analyze grammar]

anena pṛṣṭhabhāge ca śeṣo dhṛto hi vidyate |
anena nijaparyaṃke dhṛto nārāyaṇaḥ svayam || 43 ||
[Analyze grammar]

anena sāṃkhyavijñānaṃ svaprakāśāya cārpitam |
anena brahmaṇe jñānaṃ purā śrīhariṇā'rpitam || 44 ||
[Analyze grammar]

daityā niṣūditāścāpi vāsudevena śārṅgiṇā |
janmarakṣālayāṃścakre so'yaṃ vyūhātmako hariḥ || 45 ||
[Analyze grammar]

pṛthvī prapālitā'nena rājarājo'pyayaṃ hyabhūt |
tapastaptaṃ tathā'nena haṃsaḥ so'yaṃ purābhavat || 46 ||
[Analyze grammar]

keśarī so'yamevā''sīt hiraṇyakośakāntakaḥ |
sādhuceṣṭo vanyavāso'bhavat so'yaṃ dayāparaḥ || 47 ||
[Analyze grammar]

hrasvarūpo bhūmihartā mahendrā'nuja eva ca |
atrātāraḥ kṣatāḥ parśughātenā'nena sūriṇā || 48 ||
[Analyze grammar]

vahnāvājyapibo'yaṃ vai vṛṣṭiyogaprado'pyayam |
dakṣiṇāpathagān daityān yāmyaṃ prāpayitā hyayam || 49 ||
[Analyze grammar]

brahmaputraḥ sādhuśreṣṭho bālarūpaḥ purā tu yaḥ |
sa evā'dya bālaveṣo vartate'tra narottamaḥ || 50 ||
[Analyze grammar]

vīṇāmagno maharṣiśca vedavidyāvibhājakaḥ |
rādhākāntaḥ satīsevyo bodhavārdhirayaṃ hi saḥ || 51 ||
[Analyze grammar]

svāmī kāntaḥ patiḥ pātā rakṣako janakaḥ pitā |
rājā draṣṭā'ntarātmā ca bālo'yaṃ ṛṣisammataḥ || 52 ||
[Analyze grammar]

bhajadhvaṃ bhāvato bhaktyā śāśvatālayado yataḥ |
prapadye parameśānaṃ taṃ hyajaṃ vaiṣṇavapriyam || 53 ||
[Analyze grammar]

parabrahma mahātmānaṃ viśvasya jagataḥ patim |
namastasmai devadaityeśvaramuktādisevine || 54 ||
[Analyze grammar]

sarvākṣāya sarvavyāptātmane'ntaryāmiṇe namaḥ |
gāyanti yaṃ gāyatriṇo'rcayantyenaṃ samarpitāḥ || 55 ||
[Analyze grammar]

yatra sarvaṃ kāraṇaṃ ca kāryaṃ kriyā ca sādhanam |
daivataṃ sadasaścāpi namastasmai vilāsine || 56 ||
[Analyze grammar]

namaḥ śāntāya variṇe śaṃkhacakradhvajābjine |
śūline śārṅgiṇe cāpi vajriṇe śariṇe namaḥ || 57 ||
[Analyze grammar]

svastimate mīnavate namaste prabhaviṣṇave |
namo'stvapratirūpāya svarūpadhvajadhāriṇe || 58 ||
[Analyze grammar]

namo nānābhirāmāya namaḥ paṭutarāya ca |
namaḥ sāṃkhyapravaktre te yogavaktre ca te namaḥ || 59 ||
[Analyze grammar]

namaḥ śrutipravaktre te nyāyavaktre namo namaḥ |
namo muktipravaktre te namaḥ śikṣāpradāya ca || 60 ||
[Analyze grammar]

namo mīmāṃsanavaktre namo'mṛtapradāya ca |
namo hiraṇyavapuṣe namaścampakavarcase || 61 ||
[Analyze grammar]

namaḥ stutyāya mantrāya sarvabhūtaśarīriṇe |
namo hotre namaḥ śīlavratasthāyā'tirūpiṇe || 62 ||
[Analyze grammar]

namo dīrghākṣiṇe tubhyaṃ sarvakāmapradāyine |
nabhaścāntaranetrāya sarvanetrāya te namaḥ || 63 ||
[Analyze grammar]

bhedā'bhedaprabhinnāya namaste vyatirekiṇe |
chāyātapanarūpāya śāntasattvāya te namaḥ || 64 ||
[Analyze grammar]

yajñabhāgapriyāyaikamūrtaye brahmaṇe namaḥ |
pañcālaputrīrakṣāya bhaguputrīpravāhine || 65 ||
[Analyze grammar]

anaraṇyasuteśāya namo nārāyaṇīśine |
annadāyā'nnapataye kośātmakāya te namaḥ || 66 ||
[Analyze grammar]

bālānurūpagotre ca bālalīlāvilāsine |
namo bālāya vṛddhāya mañjukeśāya te namaḥ || 67 ||
[Analyze grammar]

namaḥ ṣaṭkarmatuṣṭāya sahasrābharaṇāya ca |
dharmārthakāmamokṣāṇāmāśrayāya ca te namaḥ || 68 ||
[Analyze grammar]

namo'nantaguṇaiśvaryavibhūtyāśrayiṇe namaḥ |
meghaśobhāya candrārkatārāprabhāya te namaḥ || 69 ||
[Analyze grammar]

tvamannamannabhoktā ca pakvabhuk pāvano'nalaḥ |
vāri tvaṃ tvaṃ tathātṛptiḥ sukhamānanda te namaḥ || 70 ||
[Analyze grammar]

jarāyujā'ṇḍajāścāpi svedodbhijāstvayā kṛtāḥ |
tvameva cāvatāreśa bhūtagrāmaścaturvidhaḥ || 71 ||
[Analyze grammar]

sraṣṭā carācarasyā'sya pātā hantā tvameva ha |
tvāmāhurbrahma vidvāṃsaḥ paraṃ brahmavidāṃ gatiḥ || 72 ||
[Analyze grammar]

manasaḥ paramaṃ jyotirjyātistvaṃ jyotiṣāmapi |
haṃso vṛkṣo madhukaraḥ prāhustvāṃ brahmavādinaḥ || 73 ||
[Analyze grammar]

yajñeṣṭakṛt phalanaratvaṃ tvāmāhurmunayastathā |
paṭhyase stutibhirnityaṃ vedopaniṣadāṃ gaṇaiḥ || 74 ||
[Analyze grammar]

narā nāryaḥ sthāvarā jaṅgamāstiryañca ityapi |
tvameva vidyase kṛṣṇanārāyaṇa jagatprabho || 75 ||
[Analyze grammar]

tvameva meghasaṃghāśca vidyuto'śanigarjitam |
saṃvatsarastvamṛtavo māso māsārdhameva ca || 76 ||
[Analyze grammar]

yugānimeṣāḥ kāṣṭhāśca nakṣatrāṇi grahāstathā |
tvaṃ śarī tvaṃ gadī cakrī khaḍgī vajrī śarāsanī || 77 ||
[Analyze grammar]

chettā bhettā prahartā'si mantā netā sanātanaḥ |
samudrāḥ saritaḥ śailā vṛkṣāḥ sarāṃsi bhūstarāḥ || 78 ||
[Analyze grammar]

latātṛṇauṣadhivallīpaśavo mṛgapakṣiṇaḥ |
pṛthukarmaguṇārambhaḥ kālaḥ puṣpaphalodayaḥ || 79 ||
[Analyze grammar]

madhyaṃ bījaṃ cāṃ'kuraṃ ca patraṃ kāṇḍaṃ ca granthikā |
nālaṃ puṣpaṃ phalaṃ cāpi raso gandhastvameva ca || 80 ||
[Analyze grammar]

piṣṭaṃ miṣṭaṃ sadeṣṭaṃ ca tvameva parameśvara |
pavitraṃ ca pavitrāṇāṃ maṃgalānāṃ ca maṃgalam || 81 ||
[Analyze grammar]

udayānāmudayāgryaṃ tvameva paramā gatiḥ |
prāṇā nimeṣā jṛmbhaśca kṣutaṃ cā'bhyāhatistathā || 82 ||
[Analyze grammar]

brahmakālayamāgnīnāṃ śāstā bodhayitā bhavān |
canuryugaścanurvedaścātuhotrapravartakaḥ || 83 ||
[Analyze grammar]

cāturāśramyanetā ca cāturvarṇyakarastathā |
praśilpī gaṇako mātā sarvaśilpapravartakaḥ || 84 ||
[Analyze grammar]

svāhā svadhā vaṣaṭkāro namaskāraḥ stutistathā |
prārthanā prārthanīyaṃ ca tvameva te namonamaḥ || 85 ||
[Analyze grammar]

gūḍhavrato guhyatapāstārako bhūmisandharaḥ |
dhātā vidhātā sandhātā tvameva te namonamaḥ || 86 ||
[Analyze grammar]

brahmā śaṃbhustathā viṣṇurvirāḍ bhūmā tvameva ca |
tapaḥ satyaṃ brahmacaryamārjavaṃ tvaṃ pratoṣaṇam || 87 ||
[Analyze grammar]

bhūrbhuvaḥ svaṃ jīvasṛṣṭirīśasṛṣṭistvameva ca |
brahmasṛṣṭiḥ ṛtaṃ dīkṣā damanaṃ tvaṃ janārdanaḥ || 88 ||
[Analyze grammar]

kāntaḥ priyaḥ patiḥ svāmī nārāyaṇastvameva ca |
bindurnādo dhvanirbrahma vimarśaḥ sphoṭa ityapi || 89 ||
[Analyze grammar]

paśyantī ca parā madhyā viśiṣṭā vāk tvameva ca |
gaurbhūmirbrāhmabhaktaśca sādhuḥ satī ca kiṃkarī || 90 ||
[Analyze grammar]

vaśyaḥ sarvaṃ tvamevā''sse tvāṃ vinā nāsti nāstyapi |
śaśāṃkā'nalaśītoṣṇakṣuttṛṣāśca jarāmayāḥ || 91 ||
[Analyze grammar]

ādhayo vyādhayaḥ śāntirbheṣajaṃ tvaṃ janārdana |
somapāstvaṃ ca mādhuṃrya marutpatirjagatpatiḥ || 92 ||
[Analyze grammar]

amṛtāśī jagannāthāḥ kuṃkumeśastvameva ca |
akṣateśo gaṇeśaśca mukteśastvaṃ pareśvaraḥ || 93 ||
[Analyze grammar]

viṣāgnipāḥ somapāśca kṣīrapā navanītapāḥ |
ājyapā madhupāḥ sarvabhoktā tvaṃ ca pitāmahaḥ || 94 ||
[Analyze grammar]

hiraṇyaretāḥ puruṣaśreṣṭhastvameva caikalaḥ |
tvaṃ strīpumān tvaṃ tṛtīyo bhāvadvayavivarjitaḥ || 95 ||
[Analyze grammar]

bhāvatrayātigaścāpi bhāvatraye pravartase |
bālo yuvā sthaviraśca jīrṇadaṃṣṭro'si viśvakṛt || 96 ||
[Analyze grammar]

candrādityau cakṣuṣī te jihvā te ca sarasvatī |
ahorātre nimiṣobhe ātmānaste gṛhālayāḥ || 97 ||
[Analyze grammar]

na brahmā na śivo viṣṇuḥ paurāṇā ṛṣayo na te |
māhātmyaṃ vedituṃ śaktā yāthātathyena bālaka || 98 ||
[Analyze grammar]

puṃsāmīśeśvarāṇāṃ muktānāṃ koṭyarbudāni ca |
tiṣṭhase tvaṃ samāvṛtya cāntarbahistvameva saḥ || 99 ||
[Analyze grammar]

mahatastamasaḥ pāre'kṣarasyā'pi pare sadā |
pare dhāmni pareśastvaṃ rājase so'tra mūrtimān || 100 ||
[Analyze grammar]

yaṃ vinidrā jitaprāṇāḥ sattvasthā brahmavartinaḥ |
paraṃ paśyanti yuñjānāstasmai yogātmane namaḥ || 101 ||
[Analyze grammar]

yā yā mūrtayaḥ sūkṣmāste śakyā darśayituṃ na tāḥ |
tābhyaḥ sarvābhya evā'tra tvadrūpābhyo namo namaḥ || 102 ||
[Analyze grammar]

bhaktānukampī bhagavān bhakteṣu vartase sadā |
keśā meghā yasya nāḍyo nadyaḥ kukṣau mahābdhayaḥ || 103 ||
[Analyze grammar]

śayānāya jale haime tapasyate ca te namaḥ |
ye'ṅguṣṭhamātrāḥ puruṣāścidaḥ sthāvarajaṅgamāḥ || 104 ||
[Analyze grammar]

ye nadīṣu samudreṣu parvateṣu guhāsu ca |
vṛkṣamūleṣu goṣṭheṣu kāntāragahaneṣu ca || 105 ||
[Analyze grammar]

catuṣpatheṣu rathyāsu catvareṣu sabhāsu ca |
hastyaśvarathaśālāsu jīrṇodyānālayeṣu ca || 106 ||
[Analyze grammar]

ye'pi pañcasu bhūteṣu diśāsu vidiśāsu ca |
candre sūrye satyaloke vaikuṇṭhākhyacatuṣṭaye || 107 ||
[Analyze grammar]

rasātalagatā ye ca ye ca tasmāt paraṃgatāḥ |
tava bhaktāstava dāsāḥ kiṃkarāstava keśava || 108 ||
[Analyze grammar]

dāsyaḥ satyastava bhaktāḥ kiṃkaryastava mādhava |
namastebhyo namastābhya ubhābhyāṃ ca namo'cyuta || 109 ||
[Analyze grammar]

yeṣāṃ na vidyate saṃkhyāḥ pramāṇaṃ rūpameva ca |
asaṃkhyāste muktagaṇā namastebhyo'stu nityaśaḥ || 110 ||
[Analyze grammar]

prasīda bālarūpa tvaṃ svakaṃ bhāvaṃ pradarśaya |
tvayi no hṛdayānyatra bhavantu satkathāphalam || 111 ||
[Analyze grammar]

ityevaṃ rādhike tena stutaḥ kṛṣṇanarāyaṇaḥ |
kathārambhe prasannaḥ sannātmano darśanaṃ dadau || 112 ||
[Analyze grammar]

divyakoṭyarkabhāpūrṇaṃ romaikaikaṃ tu yasya vai |
sarve'vatārā yanmūrtau sarvadhāmāni yatra ca || 113 ||
[Analyze grammar]

sarveśvarāḥ ṛṣayaśca devā mānavakoṭayaḥ |
daityā brahmāṇḍasannāhā yadromṇyeva caranti ca || 114 ||
[Analyze grammar]

koṭimuktāḥ koṭikāntāḥ koṭipālā maheśvarāḥ |
yatkukṣau bhāsamānāśca sarvatejāṃsi yatra ca || 115 ||
[Analyze grammar]

sarve vai pralayā yatra yatra sarvāśca sṛṣṭayaḥ |
yatra sarve ātmavargā bhāsante divyadṛṣṭitaḥ || 116 ||
[Analyze grammar]

tādṛśaṃ paramaṃ divyaṃ mūrtaṃ kaiśoraśobhanam |
darśayāmāsa bhagavān kṛṣṇanārāyaṇaḥ svayam || 117 ||
[Analyze grammar]

vihasyā''bhāṣya kuśalaṃ divyadṛṣṭiṃ ca sandadau |
vilokya ṛṣayaḥ sarve tathā'nye śravaṇe ratāḥ || 118 ||
[Analyze grammar]

lakṣmīnārāyaṇasaṃhitāyāste dadṛśuḥ prabhum |
adṛṣṭapūrvaṃ hṛdyaṃ ca dṛṣṭvā nyadhurhariṃ hṛdi || 119 ||
[Analyze grammar]

evaṃ pradarśya ca punaḥ parihāraṃ cakāra ha |
yathā bālo vartate'tra tathā bālo'bhavatpunaḥ || 120 ||
[Analyze grammar]

tathā dṛṣṭvā kṛtakṛtyān matvā svān munipuṅgavāḥ |
ānandaṃ paramaṃ prāpuḥ śaśvannirvāṇagā yathā || 121 ||
[Analyze grammar]

evaṃ sākṣāt saṃhitāyāḥ pātraṃ śrīparameśvaram |
sākṣātkṛtya tato nityaṃ śṛṇvantyeva kathāmṛtam || 122 ||
[Analyze grammar]

evaṃ māsatrayaṃ jātaṃ pārāyaṇaṃ paraṃ śubham |
kuṃkumavāpikākṣetre rādhike mokṣadaṃ tadā || 123 ||
[Analyze grammar]

kathānte phālgunīṃ kṛtvā''sthāpya tirthāni sarvathā |
svasvanāmnā ṛṣayaśca vāsaṃ tatraiva cakrire || 124 ||
[Analyze grammar]

tadetat saṃhitātīrthaṃ koṭitīrthaṃ pragīyate |
ṛṣitīrthaṃ kathātīrthaṃ divyatīrthaṃ tadeva ca || 125 ||
[Analyze grammar]

iti śrīlakṣmīnārāyaṇīyasaṃhitāyāṃ dvitīye tretāsantāne mārgaśīrṣe ūrjavratarṣikṛtāyālakṣmīnārāyaṇasaṃhitākathāyāḥ śravaṇaprasaṃge prabhordivyadarśanam ṛṣīṇāṃ stavanāni ṛṣīṇāṃ nivāsāttīrthāni cetinirūpaṇanāmā catvāriṃśo'dhyāyaḥ || 40 ||
[Analyze grammar]