Chapter 39

śrīkṛṣṇa uvāca |
śṛṇu tvaṃ rādhike jñānaṃ tapo yasmānna śiṣyate |
pūrvamekārṇave ghore naṣṭe sthāvarajaṅgame || 1 ||
[Analyze grammar]

bṛhadaṇḍamabhūdekaṃ prajānāṃ bījasaṃbhṛtam |
mahāviṣṇoḥ samudbhūtaṃ yasmin virāḍ virājate || 2 ||
[Analyze grammar]

aṇḍaṃ vibhidya bhagavān vairājaṃ bahirānayat |
vairājāt triguṇā devā brahmaviṣṇumaheśvarāḥ || 3 ||
[Analyze grammar]

sattvavān vai tadā brahmā śūnyaṃ lokamapaśyata |
tato rājasabhāvena pravṛttiṃ svīcakāra ha || 4 ||
[Analyze grammar]

sasmāra darśakaṃ divyaṃ nārāyaṇamatīndriyam |
guṇātītaṃ bhagavantaṃ vyāpakaṃ puruṣaṃ param || 5 ||
[Analyze grammar]

yenedaṃ sakalaṃ vyāptaṃ sthiracetanasaṃjñitam |
yastaṃ veda mahātmānaṃ sa sarvaṃ ved niścitam || 6 ||
[Analyze grammar]

guṇātītaṃ ca puruṣaṃ parabrahma sanātanam |
yastaṃ veda parātmānaṃ sa sarvaṃ veda mokṣavit || 7 ||
[Analyze grammar]

kiṃ teṣāṃ sakalaistīthaiṃrāśramairvā prayojanam |
yeṣāṃ tvanantakaṃ cittamātmanyeva vyavasthitam || 8 ||
[Analyze grammar]

ātmā nadī śīlatīrthā satyajalā śamānvitā |
tatsnātaḥ śuddhyati puṇyo vāriṇā''tmā na śuddhyati || 9 ||
[Analyze grammar]

śreṣṭhaṃ janasya kartavyaṃ cātmavodhasukhe sthitiḥ |
jñeyaṃ satāṃ tadevā'sti yatprāptau kāmanākṣayaḥ || 10 ||
[Analyze grammar]

naitādṛśaṃ paraṃ vittaṃ brahmalagnasya vidyate |
samatā satyatā śīlaṃ cārjavaṃ viratistathā || 11 ||
[Analyze grammar]

tallābhe brahma paramaṃ prāpnotyeva na saśaṃyaḥ |
viditvā taṃ prabhuṃ rādhe dharmasya phalamāpnuyāt || 12 ||
[Analyze grammar]

yo'sāvāpmani dehe'smin vibhurnityo vyavasthitaḥ |
so'nādiḥ śrīpatiḥ kṛṣṇo nārāyaṇaḥ parātparaḥ || 12 ||
[Analyze grammar]

kambharāśrīnandanaḥ saḥ śrīmadgopālabālakaḥ |
kuṃkumavāpikākṣetre vartate bālakṛṣṇakaḥ || 14 ||
[Analyze grammar]

pañcame vatsare pūrṇe yāvastaṃ vīkṣituṃ priye |
ityuktā rādhikā devī sotsāhā veṣamujjvalam || 15 ||
[Analyze grammar]

dadhāra sarvaśobhāḍhyaṃ svarṇamāṇikyasaṃbhṛtam |
mauktikairhīrakaiḥ ratnaiḥ khacitaṃ śobhanaṃ śubham || 16 ||
[Analyze grammar]

śṛṃgāraṃ vividhaṃ dhṛtvā sugandhasāramiśritam |
bindvīpatrīraṅgarekhā'laktakajjalabṛṃhitam || 17 ||
[Analyze grammar]

tantutantīśṛṃkhalormikāmbarābhūṣaṇā'nvitam |
svarṇacūrṇapuṣpagucchakabarībhāraśobhitam || 18 ||
[Analyze grammar]

sanaktakārcanavastubhatapātrakarā patim |
kṛṣṇaṃ śṛṃgārayāmāsa suśobhaṃ saṃskṛtaṃ śubham || 19 ||
[Analyze grammar]

vimānaṃ vṛṣayānaṃ ca vāhayāmāsa satvaram |
phalapuṣpaiḥ svādubhojyairamṛtairbhṛtapātrakam || 20 ||
[Analyze grammar]

svayaṃ kṛṣṇaḥ sārathiśca śrīrādhā rathinī svayam |
śrīmadgolokadhāmnastāvīśalokān vilaṃghya ca || 21 ||
[Analyze grammar]

brahmādistaramullaṃghya bhūtale tu surāṣṭrake |
vyomno'vataret rādhākṛṣṇau kuṃkumavāpikām || 22 ||
[Analyze grammar]

aśvapaṭṭasarastīre bālakṛṣṇā''layā''ṅgaṇe |
śrīkṛṣṇasya rathasyādau brahmāṇḍe vyāpa tanmahaḥ || 23 ||
[Analyze grammar]

sūryacandrau na dṛśyete tejasā'bhibhavaṃgatau |
rādhāyāstejasā pṛthvī diśaścātyupabṛṃhitāḥ || 24 ||
[Analyze grammar]

lomaśasyāśramaścāpi cāndraloka ivā'bhavat |
sarvāśca kanyakā rādhārūpā'tirūpakānvitāḥ || 25 ||
[Analyze grammar]

rājante rādhikāṃ dṛṣṭvā śatarādhā'dhikaikakā |
rādhā dṛṣṭvā tu tāḥ kanyā garvahīnā babhūva ha || 26 ||
[Analyze grammar]

galitaṃ rūpasaundaryamānaṃ tasyāstadā kṣaṇāt |
uttha kṛṣṇaṃ prati prāha bālakṛṣṇaṃ vilokya sā || 27 ||
[Analyze grammar]

aho me vyaktisāphalyaṃ kāritaṃ hi tvayā prabho |
mayā'sya darśanaṃ prāptaṃ kṛṣṇanārāyaṇasya yat || 28 ||
[Analyze grammar]

ṣaṣṭhavarṣasamāraṃbhe prātaraṣṭamikātithau |
bālakṛṣṇaṃ rā dhikā saṃpūjayāmāsa vastubhiḥ || 29 ||
[Analyze grammar]

golokapayasā bālaṃ snāpayāmāsa rādhikā |
sarvatīrthādisalilairabhiṣekaṃ cakāra sā || 30 ||
[Analyze grammar]

candanā'gurukastūrīrasasāradravādibhiḥ |
sampūjyā''bharaṇairvastrairalaṃkārairaśobhayat || 31 ||
[Analyze grammar]

ārārtrikaṃ cakārā'tha mayūrapicchaśobhanam |
mukuṭaṃ dhārayāmāsa bālakṛṣṇasya mastake || 32 ||
[Analyze grammar]

muralīṃ sā dadau haste dakṣabāhuṃ dadau gale |
hāsayitvā sutilakaṃ candrakaṃ sākṣataṃ śubham || 32 ||
[Analyze grammar]

bhāle datvā rādhikā sā nīrājanavidhiṃ vyadhāt |
puṣpāñjaliṃ pradatvaiva namaskāraṃ cakāra sā || 34 ||
[Analyze grammar]

āśīrvādān dadau kāntakānta tvaṃ kāntavadbhava |
duḥsahāṃ cāñjaliṃ rādhā samuccārya ca mastakāt || 35 ||
[Analyze grammar]

dadau bhojyaṃ ca golokādānītaṃ pāyasādikam |
dugdhapiṇḍān baraphīṃśca dugdhasārasya pūrikām || 36 ||
[Analyze grammar]

miṣṭāṃ divyāṃ dadhi śreṣṭhaṃ dadau nānyat tadiṣṭakṛt |
bhojayitvā tato ramyaṃ tāmbūlakaṃ dadau śubham || 37 ||
[Analyze grammar]

athaivaṃ samprapūjyaiva virarāma tataḥ svayam |
śrīkṛṣṇastaṃ kṛṣṇanārāyaṇaṃ pupūja sādaram || 38 ||
[Analyze grammar]

suravālaṃ pītapaṭaṃ kañcukaṃ svarṇatārakam |
śirastrāṇaṃ sakalgiṃ cāvataṃsakau kausumau śubhau || 39 ||
[Analyze grammar]

puṣpahārān pārijātakṛtān dadau gale'rbhakam |
upānahau svarṇasādhyau komalau pradadau tathā || 40 ||
[Analyze grammar]

chatraṃ sucāmare ramye raśanāṃ kuṇḍale dadau |
maṇiṃ kaustubhajātīyottamaṃ mālāṃ ca mauktikīm || 41 ||
[Analyze grammar]

dadau śrībālakṛṣṇāya vaṃśī dadau mṛdusvarām |
yaṣṭiṃ siddhimayīṃ cāpi dadau siṃhāsanaṃ varam || 42 ||
[Analyze grammar]

evaṃ bālaprabhuṃ kṛṣṇaḥ pūjayitvā stutiṃ vyadhāt |
sarvasākṣinnamaste'stu sarvāvatārakāraṇa || 43 ||
[Analyze grammar]

puruṣottama mukteśa paradhāman namo'stu te |
vartamānaṃ ca bhūtaṃ ca bhaviṣyatsarvathā yataḥ || 44 ||
[Analyze grammar]

anvitaṃ rājate saumyaṃ suvyavasthaṃ kramānugam |
ananvitaḥ praśāstā tvaṃ tasmai devāya te namaḥ || 45 ||
[Analyze grammar]

anantāḥ śaktayaste'tra kuṣṇanṛsiṃharūpiṣu |
rādhāramāśrīsvarūpāstaṃ namāmi pareśvaram || 46 ||
[Analyze grammar]

ahaṃ me dhāma golokastathā nārāyaṇo ramā |
śrīrvaikuṇṭhaṃ cāmṛtaṃ satpadaṃ yasmātpravartate || 47 ||
[Analyze grammar]

akṣaraṃ dhāma yasyā'gre samūrtaṃ sevakaṃ sadā |
īśvarā avatārāśca yadaṃśaguṇabhūṣaṇam || 48 ||
[Analyze grammar]

vyūhāśceśvarapālāśca lokapālā maharṣayaḥ |
kratūcchrayāḥ surā yasya guṇaikaikāṃśamūrtayaḥ || 49 ||
[Analyze grammar]

bhavantīha tu saṃsāre taṃ namāmi pareśvaram |
antarātmannanantātmanmadātmaṃste namo namaḥ || 50 ||
[Analyze grammar]

tvaṃ parātman lokasākṣinnananteśa namo'stu te |
sarvajña tvaṃ parameṣṭhin jñānajñeya namo'stu te || 51 ||
[Analyze grammar]

ādideva durārādhya parameśvara te namaḥ |
mahāyogeśvara sādho dayālo te namo namaḥ || 52 ||
[Analyze grammar]

parajyotirvaṣaṭkāra svāhākāra namo'stu te |
sarvadarśana savartā'gniṣomātmannamo'stu te || 53 ||
[Analyze grammar]

mahārājika siddhārcya hiraṇyavāha te namaḥ |
mañjukeśin bālakeśin dayādeśinnamo'stu te || 54 ||
[Analyze grammar]

vibho yājñika yajñeśa bhaktānukampa te namaḥ |
prasīda śrīkṛṣṇanārāyaṇa tubhyaṃ namonamaḥ || 55 ||
[Analyze grammar]

ityuktvā śrīkṛṣṇadevo natvā rādhā tathā prabhum |
yayatuḥ śrīkambharāyāḥ sannidhau bhuvanāntare || 56 ||
[Analyze grammar]

natvā tāṃ ca tathā natvā śrīmadropālakṛṣṇakam |
tatkṛtaṃ svāgataṃ prāpya putrotsavaṃ praśasya ca || 57 ||
[Analyze grammar]

vimānena yayatuśca golokaṃ kṛṣṇarādhike |
athā''yayau ca vaikuṇṭhānnārāyaṇo ramāpatiḥ || 58 ||
[Analyze grammar]

garuḍasthaḥ prabhurbālakṛṣṇapūjārthamityatha |
vāsudevastathā bhūmā cāyayaturmudānvitau || 59 ||
[Analyze grammar]

mahāviṣṇustathā nārāyaṇo naraḥ samāyayuḥ |
śeṣanārāyaṇaścāpi matsyaḥ kūrmaḥ samāyayuḥ || 60 ||
[Analyze grammar]

vārāhaśca kapilaśca hariḥ pṛthuḥ samāyayuḥ |
dattātreyastathā haṃso nṛsiṃhaśca samāyayuḥ || 61 ||
[Analyze grammar]

ṛṣabhaśca vāmanaśca parśurāmaḥ samāyayuḥ |
yajño rāmaḥ kumārāśca hayagrīvaḥ samāyayuḥ || 62 ||
[Analyze grammar]

nārado rājarājaśca parameśāḥ samāyayuḥ |
anādiśrīkṛṣṇanārāyaṇa jayeti te jaguḥ || 63 ||
[Analyze grammar]

pañcāmṛtairamṛtaiśca bālā'ṅguṣṭhā'bhiṣecanam |
cakruḥ paścād darbhajalairamṛtaiḥ prokṣaṇaṃ vyadhuḥ || 64 ||
[Analyze grammar]

candanaṃ sā'kṣataṃ bhāle tvarcayāmāsurādarāt |
tilakaṃ kukumāḍhyaṃ ca cakrurdaduḥ sugandhakam || 65 ||
[Analyze grammar]

puṣpahārān daduḥ kaṇṭhe mukuṭaṃ puṣpamālikāḥ |
dadustulasīpatrāṇi vibhūṣaṇāni cāmare || 66 ||
[Analyze grammar]

chatraṃ copānahau divye'mbarāṇi vividhānyapi |
karpūrādyairvartikābhirnīrājanaṃ pracakrire || 67 ||
[Analyze grammar]

dhūpaṃ dīpaṃ sunaivedyaṃ cāmṛtānnaṃ phalāni ca |
daduḥ sarve'vatārāśca jalaṃ tāmbūlakāni ca || 68 ||
[Analyze grammar]

arpayāmāsuratyarthaṃ svasvalokabhavāni ca |
ityevaṃ pūjanārthaṃ taddhāmavāsāḥ striyo'pi ca || 69 ||
[Analyze grammar]

āyayurbahubhirvastūttamaiḥ pupūjurīśvaram |
evaṃ samarcayitvā tāḥ prayayurnijadhāma te || 70 ||
[Analyze grammar]

tato devāśca pitaro munayaḥ ṛṣayastathā |
mānavā brāhmaṇādyāścā''yayuḥ kṛṣṇārcanāya vai || 71 ||
[Analyze grammar]

divyavimānamāruhya cāśvapaṭṭasarovaram |
abhito vyomamārgeṣu viśramya kṛṣṇamandiram || 72 ||
[Analyze grammar]

āyayuḥ pūjayāmāsurvividhaiścopadādibhiḥ |
rañjayāmāsuratyarthaṃ bālakṛṣṇaṃ pareśvaram || 73 ||
[Analyze grammar]

tato'nye bhūmayaḥ śailā nadyaḥ sarāṃsi sāgarāḥ |
tīrthāni devataravo vallikāḥ stabakāstathā || 74 ||
[Analyze grammar]

vanadevyaśca gulmāśca tattvāni vividhānyapi |
āyayuḥ śrībālakṛṣṇapūjārthaṃ cārhaṇāṃ vyadhuḥ || 75 ||
[Analyze grammar]

tato yakṣā guhyakāścāraṇā kiṃpuruṣāstathā |
bhāṭāśca kinnarāścāpi gandharvā devayoṣitaḥ || 76 ||
[Analyze grammar]

māgadhā bandinaḥ sūtā vidyādhrāḥ pannagādayaḥ |
āyayuḥ śrībālakṛṣṇotsave pūjārthameva te || 77 ||
[Analyze grammar]

pūjanaṃ te pracakruśca nartakā nṛtyamācaran |
avādyanta suvādyāni gāyakāḥ saṃjagustadā || 78 ||
[Analyze grammar]

kathakāstatkathāṃ cakrurnāṭyadhrā nāṭyamācaran |
yājñikāścācaran yajñaṃ sādhavo japamācaran || 79 ||
[Analyze grammar]

satyo nāryo daduścāśīrvādān vṛddhāḥ śubhāśiṣaḥ |
śrīmadgopālakṛṣṇaśca lomaśo'pi munistadā || 80 ||
[Analyze grammar]

tathānye ṛṣayastatra sthitāśca brahmakanyakāḥ |
śrīhareḥ pūjanaṃ cakruryojayāmāyurāśiṣā || 81 ||
[Analyze grammar]

tataḥ pitā tu tān sarvān mahīmānān samantataḥ |
dugdhapākādisadbhojyaistarpayāmāsa laḍḍukaiḥ || 82 ||
[Analyze grammar]

bhojayitvā ca tān sarvānāgatān tatparaṃ hariḥ |
dāpayāmāsa dānāni viprān dāsīśca sevakān || 83 ||
[Analyze grammar]

pātrebhyaśca yathāyogyaṃ yathābhikṣukabhikṣitam |
ratnaṃ hiraṇyaṃ rajataṃ miṣṭānnaṃ cāmbarāṇyapi || 84 ||
[Analyze grammar]

mudrikāśca vibhūṣāśca pātrāṇyapi dhanāni ca |
dadau yatheṣṭaṃ sarvebhyaścāgatebhyaḥ punaḥ punaḥ || 85 ||
[Analyze grammar]

tato gateṣu sarveṣu svasvadhāmagṛhāṇi ca |
lomaśaḥ kanyakāyukto yathā naijāśramaṃ mudā || 86 ||
[Analyze grammar]

athā'nye kuṃkumavāpīkṣetrīyā brāhmaṇādayaḥ |
premṇā pupūjurāgatya parameśaṃ hariṃ prabhum || 87 ||
[Analyze grammar]

yayuḥ svasvagṛhaṃ paścānmahāścaryaṃ vabhūva ha |
śṛṇu tvaṃ rādhike tatra yugalaṃ caikamāgatam || 88 ||
[Analyze grammar]

nārī kajjalavarṇīyā naraḥ kuṣṭhāḍhyavigrahaḥ |
anādiśrīkṛṣṇanārāyaṇaṃ natvā''ha bālaka || 89 ||
[Analyze grammar]

pāpoddhāraṃ kuru kṛṣṇa patitayorvivaṃśayoḥ |
harirjānannapi tau tu papraccha dīnamānasau || 90 ||
[Analyze grammar]

kau yuvāṃ vadata pāpaṃ kiṃ kṛtaṃ ca kathaṃ ca ruk |
naraḥ prāhā'bhavaṃ vipro devāyano hi nāmataḥ || 91 ||
[Analyze grammar]

gaurjare śrīpattane ca tatreyaṃ mama bhāminī |
devapūjāparau cāvāṃ nityakarmaparāyaṇau || 92 ||
[Analyze grammar]

śaityābhipīḍitau snānaṃ vinā pūjanatatparau |
samabhūva tato doṣādāyuṣyaṃ tvantatāṃ gatam || 93 ||
[Analyze grammar]

mṛtau jvareṇa ca śīghraṃ sahaiva śvapacagṛhe |
jātau tatraiva nagare vivāhitau punastathā || 94 ||
[Analyze grammar]

jātismarau kuṣṭhikṛṣṇau duḥkhitau pāpanāśaka |
jñātvā svapnaprabhāveṇa nārāyaṇo'si mādhavaḥ || 95 ||
[Analyze grammar]

pāpaṃ vidhūya nau mokṣaṃ kuru nārāyaṇaprabho |
adya te divaso nātha baddhamuktipradāpane || 96 ||
[Analyze grammar]

pāpināṃ pāpahartā tvaṃ vartase ceti lokataḥ |
samākarṇya ca vai padbhistvāyātau śaraṇaṃ tava || 97 ||
[Analyze grammar]

anādiśrīkṛṣṇanārāyaṇaḥ śrutvā dayāparaḥ |
tāvuvāca kṛpāsindhū rādhike pāpanāśanaḥ || 98 ||
[Analyze grammar]

aśvapaṭṭasarasyeva snātvā pītvā jalaṃ ca tat |
pradakṣiṇāṃ tataḥ kṛtvā pibataṃ caraṇāmṛtam || 99 ||
[Analyze grammar]

śuddhau bhūtvā brahmalokaṃ vrajiṣyatho'timānavau |
evaṃ śrutvā tatastābhyāṃ yathoktaṃ cānuvartitam || 100 ||
[Analyze grammar]

drāg bhūtvā divyadehau tau divyayāne sthitau punaḥ |
lakṣātilakṣayajñānāṃ phalaṃ prāpya gatau divam || 101 ||
[Analyze grammar]

śrīpattanāt samārabhya kuṃkumavāpikāvadhim |
yāvanti caṃkramaṇāni tāvad yajñaphalaṃ hyabhūt || 102 ||
[Analyze grammar]

evaṃ śrīkāntasādhūnāmapyabhigamane phalam |
jāyate ki punaḥ kṛṣṇanārāyaṇasya sannidhau || 103 ||
[Analyze grammar]

rādhike śrīhariḥ sevyaḥ sevyāśca sādhavo'sya ca |
tīrthaṃ kṣetraṃ vrataṃ sevyaṃ koṭiyajñaphalapradam || 104 ||
[Analyze grammar]

pade pade'śvamedhasyā'bhigame jāyate phalam |
ityevaṃ tau kṛtau muktau nārāyaṇena śārṅgiṇā || 105 ||
[Analyze grammar]

ṣaṣṭhavarṣasamārambhāṣṭamīdine śubhotsave |
paṭhanācchravaṇāccāpi mokṣo muktistathā bhavet || 106 ||
[Analyze grammar]

iti śrīlakṣmīnārāyaṇīyasaṃhitāyāṃ dvitīye tretāsantāne prabhoḥ ṣaṣṭhavatsarasyā'ṣṭamyāṃ śrīrādhākṛṣṇā'vatāravyūhadevamānavādikṛtamahotsavapūjanaṃ devāyanadvijasya tatpatnyāśca śvapacajanmamokṣaṇaṃ cetyādinirūpaṇanāmaikonacatvāriṃśo'dhyāyaḥ || 39 ||
[Analyze grammar]