Chapter 35

śrīkṛṣṇa uvāca |
śṛṇu tvaṃ rādhike kṛṣṇanārāyaṇasya śobhanām |
camatkāramayīṃ līlāṃ bhuktimuktipradāyinīm || 1 ||
[Analyze grammar]

ekadā tu naṭāstatrā''yayuḥ kailāsadeśajāḥ |
naikanāṭyakriyāvijñāḥ samājastabdhatākarāḥ || 2 ||
[Analyze grammar]

bahusādhanasampannāścaindrajālikabodhinaḥ |
sahasramānavāstatra pañcaśatāni kanyakāḥ || 3 ||
[Analyze grammar]

śataṃ gajāḥ śataṃ cāśvāḥ śataṃ ca gavayāstathā |
śatamuṣṭrā gardabhāśca śataṃ kesariṇo daśa || 4 ||
[Analyze grammar]

vyāghrāśca viṃśatisaṃkhyā bhallukā daśa ityapi |
vānarāḥ śatamevāpi haṃsāḥ śukāḥ śataṃ śatam || 5 ||
[Analyze grammar]

śvānastrīṇi śatānyeva gaṇḍakā daśa ityapi |
mallāśca viṃśatistatra saṃhatya bahuvistaram || 6 ||
[Analyze grammar]

nāṭyamaṇḍalamūrdhanyaṃ khyātaṃ tad bhūmimaṇḍale |
ardhanārīśvarākhyena naṭena paripālitam || 7 ||
[Analyze grammar]

śataṃ tu garuḍāstatra śataṃ cā'nalapakṣiṇaḥ |
kāmarūpadharāḥ sarve kalpadrulabdhabhojanāḥ || 8 ||
[Analyze grammar]

antarīkṣagatayaśca vyomanagaradarśakāḥ |
vidyutkalāprayoktāro bahurūpapradarśakāḥ || 9 ||
[Analyze grammar]

vidyante kṛtaśikṣāśca yatra nṛpaśupakṣiṇaḥ |
saurāṣṭre kuṃkumavāpīkṣetre tannāṭyamaṇḍalam || 10 ||
[Analyze grammar]

aśvapaṭṭasarastīre cottare samuvāsa ha |
kṛtasthānaṃ jalapānaṃ snānaṃ cakāra vāriṣu || 11 ||
[Analyze grammar]

pauṣamāse pūrṇimāyāṃ nāṭyaṃ rātrau cakāra tat |
viśālo maṇḍapastatra ramyaḥ krośamito'bhavat || 12 ||
[Analyze grammar]

lakṣaśo mānavāstatra draṣṭuṃ saurāṣṭravāsinaḥ |
āyayuḥ paritastatra niṣedurdṛṣṭihetave || 13 ||
[Analyze grammar]

anādiśrīkṛṣṇanārāyaṇaśca lomaśo muniḥ |
mātā pitā kanyakāśca niṣedurnarayoṣitaḥ || 14 ||
[Analyze grammar]

vidyuddīpā nisargāśca maṇḍapasthitaraśmiṣu |
cakāśire candratulyā divābhrāntistadā'bhavat || 15 ||
[Analyze grammar]

tāvannisargavādyāni tvavādyanta ca maṇḍape |
stambhaśirassu miṣṭāni brahmaparṣannibhāni vai || 16 ||
[Analyze grammar]

stambhakumbhīṣu ca tatra babhūvurgītikāḥ śubhāḥ |
vyomavāṇīsvarūpiṇyo gāyakairvādakairyutāḥ || 17 ||
[Analyze grammar]

stambhamadhyeṣu lokyante kanyānāmayutāni ca |
śrīramākamalāgaurītulyarūpāṇi sarveśaḥ || 18 ||
[Analyze grammar]

vitāneṣu tadā svargaṃ sudharmā cāpi vīkṣyate |
alakā cā'mṛtā svarṇā hiraṇyā cāśmakā ca pūḥ || 19 ||
[Analyze grammar]

kalpaparṣat vilokyante śobhottaravirājitāḥ |
vastrabhittiṣu lokyante surā daityāśca dānavāḥ || 20 ||
[Analyze grammar]

ṛṣayaḥ pannagāśceśāḥ pitaro mānavottamāḥ |
nisargadarśanāścaite vilokyante samantataḥ || 21 ||
[Analyze grammar]

kṛtrimaṃ sarvamevedaṃ tvaindrajālikadarśanam |
maṇḍape saṃvilokyaiva parṣat stabdhā'bhavat kṣaṇam || 22 ||
[Analyze grammar]

atha gītiḥ svastivācya nāndīvodhakamaṃgalam |
aśrūyata kṛṣṇanārāyaṇastutyātmakaṃ tadā || 23 ||
[Analyze grammar]

jaya jaya jagadiṣṭo jaya jaya jagadiṣṭaḥ |
jaya janavandita nanditavadanaḥ kṛtamadaripudamanaḥ |
jaya jaya jagadiṣṭaḥ || 24 ||
[Analyze grammar]

jaya puruṣottama muktasuvandita nanditanijaśaraṇaḥ |
jaya rādhādhipa jaya kamalādhipa jaya mādhava dhavagaḥ || 25 ||
[Analyze grammar]

jaya jaḍacetanamadhyakṛtāśraya pāravatīvaraṇaḥ |
jaya nārāyaṇa cāmṛtanivasana brahmaparaṃ hṛdayaḥ || 26 ||
[Analyze grammar]

jaya māṇikyapate'kṣarapālaka suramunipitṛdharaḥ |
jaya cātman jaya prabhāpate jaya kambharāśrītanujaḥ || 27 ||
[Analyze grammar]

jaya gopālatanūdbhavabālaka jaya brahmāṇḍadharaḥ |
jaya śaṃkaracaritātmanivedana vaiṣṇavakaṣṭaharaḥ || 28 ||
[Analyze grammar]

jaya kanyā'rbudapadmapate priya lakṣmīśvara sukhadaḥ |
jaya kuṃkumavāpīdhṛtacaraṇa jaya cāśvasarastaraṇaḥ || 29 ||
[Analyze grammar]

jaya dhāmādhipate'dhipate jaya mañjulamūrtidharaḥ |
jaya cānandanidhe saguṇeśvara svastikaraḥ sukaraḥ || 30 ||
[Analyze grammar]

jaya saurāṣṭramaṇe hyavatārin haṃsaga janalīlaḥ |
jaya sarjaka rakṣaka hāraka jaya jaḍacetanatanugaḥ || 31 ||
[Analyze grammar]

ityaśrūyanta māṃgalyavācastatra tataḥ param |
prastāvakṛt kṛṣṇaveṣo raṅgamadhye hyupasthitaḥ || 32 ||
[Analyze grammar]

nemuḥ pāriṣadā māṃ ca praṇamantaṃ sabheśvaram |
avocaṃ ca tadā cāhaṃ nāṭyamādyantagarbhitam || 33 ||
[Analyze grammar]

parabrahma jagadyonirjagadādirajaḥ prabhuḥ |
parāvarāṇāṃ paramaḥ sarvalokagurorguruḥ || 34 ||
[Analyze grammar]

kṛpayā lokaśreyo'rthaṃ kambharāgarbhago hyayam |
prabhuḥ prabhūṇāṃ paramaścāvatīrṇo'sti bhūtale || 35 ||
[Analyze grammar]

so'yamāyāti bālātmā paśyantu taṃ pareśvaram |
ityuktvā'haṃ ca tiṣṭhāmi rādhe bālaṃ pradarśayan || 36 ||
[Analyze grammar]

tāvadbālaḥ kṛṣṇaveṣastatra raṅge samāyayau |
dadarśa ca samājastaṃ koṭikoṭyarkasannibham || 37 ||
[Analyze grammar]

athā'sya varṣmaṇaḥ koṭikṛṣṇarāmanarāyaṇāḥ |
niryayurvāsudevādyā vyūhāścāpi tathā'rbudāḥ || 38 ||
[Analyze grammar]

bhūmānaśca mahāviṣṇuvairājavedhaso'pi ca |
sadāśivo'vatārāśca niryayurbāladehataḥ || 39 ||
[Analyze grammar]

pitaraḥ ṛṣayo devāstattvāni mānavāstathā |
nāgā daityā dānavāśca vṛkṣāḥ śailāstathā''pagāḥ || 40 ||
[Analyze grammar]

niryayurjaṅgamā devyo sthiramānasasṛṣṭayaḥ |
sarvaṃ pradarśitaṃ bāle kṛṣṇe nārāyaṇe tadā || 41 ||
[Analyze grammar]

samājastaṃ vilokyaiva svaṃ svalokān narāyaṇe |
āścaryaṃ paramāpanno jayaśabdānuvāca ha || 42 ||
[Analyze grammar]

athopahāraṃ kṛtvā'hamavocaṃ darśakāṃstadā |
so'yaṃ bālaḥ paramātmā bhavanmadhye virājate || 43 ||
[Analyze grammar]

śrīmadgopālakṛṣṇasya pārśve śrīparameśvaraḥ |
ityukto hi mayā yāvajjanastāvannarāyaṇaḥ || 44 ||
[Analyze grammar]

paṭapṛṣṭhe yayau nītvā pāriṣadanamaḥkriyām |
athā''yayuḥ pāravatī lakṣmīḥ rādhā prabhā puraḥ || 45 ||
[Analyze grammar]

tāvat kiśorarūpo'sau bālakṛṣṇaḥ samāyayau |
catasro vandanaṃ cakruḥ patyuḥ pumuttamasya tāḥ || 46 ||
[Analyze grammar]

pādaprakṣālanaṃ cakruḥ papuścaraṇavāri tat |
tatastaṃ pūjayāmāsuścakrurnīrājanaṃ tathā || 47 ||
[Analyze grammar]

rājate śrīharistatra svarṇāsane'rpitāñjaliḥ |
atha tāḥ śrīharermūrtau catasro'pi layaṃ yayuḥ || 48 ||
[Analyze grammar]

janāḥ punaśca dadṛśuścodbhūtāḥ śrīharestanoḥ |
śataṃ ca dvādaśa cāpi codbhūtāḥ śrīhareḥ priyāḥ || 49 ||
[Analyze grammar]

tathā ca dadṛśurlokā lomaśasyāśramaṃ mahat |
kanyakāyā hareḥ patnyaḥ koṭyarbudābjasaṃkhyakāḥ || 50 ||
[Analyze grammar]

niryayuḥ śrīharermūrte'rnāṭyavedyāṃ lulophire |
raṅgasthāstāḥ svakaṃ rūpaṃ nāṭye dṛṣṭvā tu vismitāḥ || 51 ||
[Analyze grammar]

brahmasaraso devyaścāpsaraso niryayurhareḥ |
raṅge dṛṣṭvā pāriṣadāḥ satālajayaghoṣaṇām || 52 ||
[Analyze grammar]

cakruḥ prasannāḥ paritaḥ parihārastato'bhavat |
athā''yayau raṅgapīṭhe śrīmadgopālakṛṣṇakaḥ || 53 ||
[Analyze grammar]

kambharāśrīmahālakṣmīsahito bālakṛṣṇavān |
datvā devebhya āśīrvādān saputro gṛhaṃ yayau || 54 ||
[Analyze grammar]

evaṃ pradarśya raṅgeśaḥ paṭapṛṣṭhe yayau punaḥ |
ityevaṃ rādhike sarvamavatāritvabodhakam || 55 ||
[Analyze grammar]

caritraṃ sampradarśyaiva tatparihāramācarat |
athā'nyad dṛśyamāpede maṇḍape vyomamārgake || 56 ||
[Analyze grammar]

rajjujāleṣu baddheṣu naṭā dṛḍhasuveṣiṇaḥ |
śatasaṃkhyāścāvateruḥ pratirajjuṃ vihaṃgamāḥ || 57 ||
[Analyze grammar]

uḍḍayante śatahastān raśmeḥ raśmyantaraṃ prati |
chatrābhyāṃ cāpi gacchanti sahasrahastakāmbaram || 58 ||
[Analyze grammar]

rajjuprāntaṃ samādāya kṣipto yāti śatottaram |
dhanuṣā śaravat kṣiptaḥ sahasrottaramāyayau || 59 ||
[Analyze grammar]

padbhyāṃ kṣiptaḥ prayātyeva śatahastocchrayaṃ punaḥ |
nirālambo'vatarati rajjumadhye'valambate || 60 ||
[Analyze grammar]

vaṃśādvaṃśāntaraṃ yāti sthalāt sthalāntaraṃ ca khe |
ekaraśmau ca bahūnāṃ parasparābhiyāyinām || 61 ||
[Analyze grammar]

sthālyāṃ dattapadānāṃ ca madhye sannihitātmanām |
aspṛṣṭvā'nyonyamevā'tra raśmau tvagre pravāsanam || 62 ||
[Analyze grammar]

tata uḍḍayanaṃ prānte prāntāntare'valambanam |
madhye vyomnyavalambantaṃ cūmbayitvā janāntaram || 63 ||
[Analyze grammar]

atha rajjuniṣadanoḍḍayanaṃ sarvato diśam |
anālambaṃ kareṇāpi padbhyāṃ vā'nyena carmaṇā || 64 ||
[Analyze grammar]

evamuḍuyanaṃ nāṭye darśayitvā tataśca te |
cakruśca gopuraṃ ramyaṃ pañcāśannāṭyaśikṣitāḥ || 65 ||
[Analyze grammar]

dvitīyaṃ gopuraṃ cakruḥ śataṃ caikordhvagaṃ tataḥ |
tṛtīyaṃ gopuraṃ cakrustriśataṃ dvitīyopari || 66 ||
[Analyze grammar]

pañcāśatpuruṣā madhye staṃbhadṛśyāstatadā'bhavan |
ityevaṃ ca sudharmāyā gopuraṃ ramaṇīyakam || 67 ||
[Analyze grammar]

kammānikātrayayutaṃ pañcāśanmānavā vyadhuḥ |
tatra pārśve sthitāḥ kanyāḥ puttalya iva sarvaśaḥ || 68 ||
[Analyze grammar]

divyarūpadharāḥ sarvāḥ paryo devyaḥ suśobhanāḥ |
hastacāmaraśobhāśca saptakalaśamastakāḥ || 69 ||
[Analyze grammar]

śobhante gopure tatra sarvasiddhiparāyaṇāḥ |
ityevaṃ gopuraṃ rādhe kārayitvā naṭeśvaraḥ || 70 ||
[Analyze grammar]

sā'mbālikaṃ gajasainyaṃ nyaveśayattadantaram |
gataṃ punarnirgataṃ ca yadā pratyekatogajam || 71 ||
[Analyze grammar]

gajaṃ gajaṃ prati tatra gopuramānavastriyaḥ |
ūrdhvamutplutya ca śanairavaterurgaje gaje || 72 ||
[Analyze grammar]

gajasainyaṃ sāntameva gopurā api santi na |
evaṃ dṛṣṭvā mahāyatnaṃ mahākauśalyameva ca || 73 ||
[Analyze grammar]

jayakāro'bhavannaṭeśvaranaṭanaṭīkṛte |
naitādṛśaṃ purā dṛṣṭaṃ gopuraṃ drakṣyate na vā || 74 ||
[Analyze grammar]

kuṃbhakaṃ tu vinā''yāmaṃ kaiścit kartuṃ na śakyate |
vihāyasagatīnāṃ tu saralā gopurakṛtiḥ || 75 ||
[Analyze grammar]

atha hastyuṣṭrakāśvānāṃ prāsādāstatra nirmitāḥ |
sāptabhaumā yatra narā nāryo dolāsu sarvataḥ || 76 ||
[Analyze grammar]

āndolanaṃ prakurvanti sthiraprāsādabhūmiṣu |
madhye sopānamārgāśca gavayā'javṛṣādijāḥ || 77 ||
[Analyze grammar]

bhūmikāścānalapakṣigāruḍapakṣikalpitāḥ |
chatraṃ pannagavaryāṇāṃ raśmayaḥ pannagāśca vai || 78 ||
[Analyze grammar]

śukā haṃsāḥ kūjanaṃ ca kurvanti rajjusaṃsthitāḥ |
udyānāni ca paritastadendrajālakāritāḥ || 79 ||
[Analyze grammar]

araṇye vahnijālāni vṛṣṭijālāni cāmbare |
vāyuvegāstathā saudhe sūryacandrau ca kṛtrimau || 80 ||
[Analyze grammar]

saudheṣu vānarāstatrodyānaphalāni bhuñjate |
evaṃ pradarśya prāsādān parihāraṃ tadā'karot || 81 ||
[Analyze grammar]

atha mallāḥ samāyātā mallayuddhārthamutsukāḥ |
vividhaṃ mallayuddhaṃ te narā nāryastadā vyadhuḥ || 82 ||
[Analyze grammar]

parihāraṃ tasya kṛtvā tadā hāsyakaraṃ param |
susainyaṃ vānarāṇāṃ vai bhallukānāṃ mahattaram || 83 ||
[Analyze grammar]

mānuṣaveṣayuktānāṃ bhaṭānāṃ śastradhāriṇām |
siṃhagardabhagaṇḍakavyāghravāhanayāyinām || 84 ||
[Analyze grammar]

āgataṃ raṅgamadhye tad yatra śvānaḥ śṛgālakāḥ |
yuddhavāditrasaṃvādā mahiṣārohiṇastadā || 85 ||
[Analyze grammar]

senāpatiśca śarabhastatsainyaṃ ca parasparam |
dvedhā bhūtvā paṭapṛṣṭhe samārebhe mahāraṇam || 86 ||
[Analyze grammar]

yuddhe hatāstadā tatra prāyaśaḥ ṛkṣavānarāḥ |
bhallukā gardabhāḥ śvānaḥ śṛgālāḥ siṃhanāśitāḥ || 87 ||
[Analyze grammar]

aindrajālikamevā''sīt hataṃ yadyat tadā'bhavat |
satyāstu vānarāḥ ṛkṣā bhallukādyā hatā na vai || 88 ||
[Analyze grammar]

atha tasya parihāraṃ cakre naṭeśvarastataḥ |
vyomayuddhaṃ kumārīṇāmabhūttadindrajālakṛt || 89 ||
[Analyze grammar]

hatā bhinnāḥ patantyeva vyomnaḥ kumārikā bhuvi |
sarvaṃ kumārikāsainyaṃ hataṃ suptaṃ bhuvastale || 90 ||
[Analyze grammar]

tadā nārīśvaraḥ senāpatiḥ ruroda vai bahu |
aho me kanyakā naṣṭāḥ sarvaṃ sainyaṃ hataṃ mama || 91 ||
[Analyze grammar]

tadā bālaḥ svayaṃ kṛṣṇo jīvayāmāsa kanyakāḥ |
rudracchāyā svarūpāstāḥ kanyā raudryaḥ sahasraśaḥ || 92 ||
[Analyze grammar]

navīnā eva bhagavānnirmame aindrajālikāḥ |
nārīśvaro mahāścaryaṃ prāpto garvaṃ vimucya ca || 13 ||
[Analyze grammar]

papāta pādayostatra bālakṛṣṇasya vai tadā |
parihāraṃ cakārā'tha dṛśyasyā'sya naṭādhipaḥ || 94 ||
[Analyze grammar]

aindrajālikakanyāstāḥ sahasraṃ rudrasannibhāḥ |
mumuhuḥ śrīharau tatra vavruśca varadānakam || 95 ||
[Analyze grammar]

tvaṃ nāthā'smatpatiḥ prāṇarakṣako bhava sarvadā |
hariḥ prāha tathā'stveva lomaśāya nyavedayat || 96 ||
[Analyze grammar]

lomaśasyā''śrame tāśca rarakṣa bhagavān svayam |
atha siṃhā raṅgabhūmau samānītāstu paṃktiśaḥ || 97 ||
[Analyze grammar]

tasya śikṣakavaryeṇa mukhavyāpādānaṃ tadā |
kāritaṃ tanmukhamadhye narā nāṭyakarāstadā || 98 ||
[Analyze grammar]

daduḥ śirāṃsi naijāni tadāścaryaṃ mahaddhyabhūt |
atha tatparihāraṃ ca kṛtvā nārīśvaraḥ svayam || 99 ||
[Analyze grammar]

kārayitvā kesariṇo mukhavyāpādanaṃ tadā |
svasyaiva mastakaṃ mukhe dadāvāścaryakṛd yathā || 100 ||
[Analyze grammar]

atha tasya mahāgarvaṃ jñātvā kṛṣṇanarāyaṇaḥ |
garvavināśanārthāya matiṃ kesariṇe dadau || 101 ||
[Analyze grammar]

ayaṃ me rakṣakastvāste pīḍāṃ nityaṃ karoti hi |
tasmādya śirastasya bhakṣayāmi prasahya vai || 102 ||
[Analyze grammar]

iti nirṇīya ca ruṣā mukhe dhṛtaṃ tu mastakam |
acūrṇayat balānmukhaṃ dṛḍhaṃ pidhāya kesarī || 103 ||
[Analyze grammar]

hāhākāro mahānāsīd dṛśyanti śokasāgaraḥ |
ruruduśca naṭā naṭyaḥ śataśo'tha sahasraśaḥ || 104 ||
[Analyze grammar]

yadyapi ca svayaṃ rudrastvardhanārīśvaraḥ prabhuḥ |
naṭeśvaro dadau svasya śiraḥ kālamukhe tadā || 105 ||
[Analyze grammar]

nirbhayo'bhūt siddhimāṃśca tathāpi paravaśyatā |
devairjñātā svayaṃ tatra cātha kṛṣṇanarāyaṇaḥ || 106 ||
[Analyze grammar]

bālakaḥ svāsanācchīghramutthāya harasannidhau |
jagāma tu satī śaṃbhumaṃke nidhāya śocati || 107 ||
[Analyze grammar]

satīmāha pradehyetanmastakaṃ kūrcitaṃ tu yat |
hastasparśena vai svasthaṃ yathāpūrvaṃ karomi vai || 108 ||
[Analyze grammar]

ityuktvā vāmahastena pasparśa śrīnarāyaṇaḥ |
rādhike satvaraṃ śaṃbhoḥ śiraḥ pūrvavadābhavat || 109 ||
[Analyze grammar]

śaṃbhurutthāya ca kṛṣṇanārāyaṇaṃ pareśvaram |
praṇanāma prasannaḥ san garvaṃ jahau haraḥ svayam || 110 ||
[Analyze grammar]

atha bālo haraṃ prāha darśanaṃ dehi vai hara |
ardhanārīśvaro bhūtvā pāriṣadebhya eva tu || 111 ||
[Analyze grammar]

śaṃbhustadā'bhavat tatra cārdhanārīśvaraḥ svayam |
ardhaṃ nārīsvarūpaṃ cā''nakhakeśaṃ suśobhanam || 112 ||
[Analyze grammar]

keśā jaṭāḥ śmaśrvaśmaśrūḥ stanā'stanaṃ tadā'bhavat |
yoniliṃgaṃ vṛṣaṇaikaṃ lomālomaṃ tadā'bhavat || 113 ||
[Analyze grammar]

śāṭīcarma bhūṣaṇā'bhūṣaṇaṃ rūpaṃ tadā'bhavat |
raṅge taṃ tādṛśaṃ dṛṣṭvā tadantaḥ śrīhariṃ tathā || 114 ||
[Analyze grammar]

dṛṣṭvā samājaḥ sahasā tutoṣā'tīva tatkṣaṇe |
naṭeśvaraḥ svayaṃ śaṃbhurnaṭāstasya gaṇā ime || 115 ||
[Analyze grammar]

paśvādyāstasya bhaktāśca hariṃ toṣayituṃ nanu |
āyātā nāṭayavidhaye tuṣṭo hariḥ svayaṃ tataḥ || 116 ||
[Analyze grammar]

dadau vāsaṃ cāśvapaṭṭasarasyevottare taṭe |
divyadehān pracakre tān sarvān naṭān naṭīḥ prabhuḥ || 117 ||
[Analyze grammar]

pāritoṣikamiṣṭaṃ ca paradhāmagatiṃ dadau |
tīrthaṃ tannaṭanāṭyākhyaṃ sarvoddhārakaraṃ param || 118 ||
[Analyze grammar]

pāpināṃ tārakaṃ svargapradaṃ śreṣṭhaṃ babhūva ha |
śravaṇātpaṭhanāccāpi bhuktirmuktiḥ prajāyate || 119 ||
[Analyze grammar]

parihāraṃ tataḥ kṛtvā hariḥ svasyā''layaṃ yayau |
saurāṣṭramānavā devāḥ ṛṣayaḥ pitarastathā || 120 ||
[Analyze grammar]

anye ca darśakāḥ sarve yayuḥ svasvālayān mudā |
ityevaṃ rādhike kṛtvā nāṭyaṃ śrīśaṃkaraḥ svayam || 12 || || 1 ||
[Analyze grammar]

nivāsamakarottatra gaṇaiḥ paśupatattribhiḥ |
prāṇibhiḥ sarvathā cāśvasarasaścottare vane || 122 ||
[Analyze grammar]

vaṭabilvakadambānāmaraṇye vāsamācarat |
yāvat pṛthvī sthirā syācca tāvat tatra nivatsyati || 123 ||
[Analyze grammar]

kṛṣṇaveṣastvayā sākaṃ rādhike'dṛśyatāṃ gataḥ |
kṛtrimo nāṭyasaudhaśca tadānīṃ vilayaṃ gataḥ || 124 ||
[Analyze grammar]

anādiśrīkṛṣṇanārāyaṇaḥ śrīśaṃkarāya vai |
jagādā'nugrahaṃ kurvan nāṭye ye dehino'tra ca || 125 ||
[Analyze grammar]

bhavān gaṇā narā nāryaḥ kanyakāḥ paśupakṣiṇaḥ |
sarve bhavantu ca dvedhā kṛpayā mama sarvathā || 126 ||
[Analyze grammar]

divyarūpā mama muktā mama dhāmnyakṣarābhidhe |
divyayānaiḥ prayāntyeva caturdhāmuktimāsthitāḥ || 127 ||
[Analyze grammar]

etad dadāmi kṛpayā pāritoṣikamuttamam |
anyarūpairvasantvatra vaṭabilvavane sadā || 128 ||
[Analyze grammar]

ityevaṃ śrīhariḥ prāha nyūṣurharādayaḥ sadā |
vasati śrīhariḥ saudhe śaṃbhoḥ saudhaṃ ca nirmame || 129 ||
[Analyze grammar]

ityevaṃ śaṃkaro devaḥ kṛṣṇanārāyaṇaṃ harim |
toṣayituṃ kṛtavāṃśca divyaṃ nāṭyotsavaṃ param || 130 ||
[Analyze grammar]

bhagavānapi sarvātmā śaṃbhuṃ toṣayituṃ tadā |
bhūtvā tu darśakastatra nāṭyabhūmau sthito'bhavat || 131 ||
[Analyze grammar]

pūrayāmāsa bhaktasya śaṃbhormanorathaṃ hariḥ |
bhaktādhīno yataḥ kṛṣṇanārāyaṇo'sti rādhike || 132 ||
[Analyze grammar]

iti śrīlakṣmīnārāyaṇīyasaṃhitāyāṃ dvitīye tretāsantāne kailāsīyā'rdhanārīśvaranāṭyamaṇḍalena kuṃkumavāpyāṃ kṣetre kṛtā'laukikānekanāṭyaiḥ prabhuḥ santuṣṭaḥ san śaṃkaragarvagañjano mokṣadaścā'bhavat naṭanāṭyatīrthaṃ cetyādinirūpaṇanāmā pañcatriṃśo'dhyāyaḥ || 35 ||
[Analyze grammar]